Read Southern Kisi Ma̍kī 6 Bible Online

Ma̍kī 6 - Southern Kisi bible

Ma̍kī 6

¹Mi̍ Chi̍i̍sū fāŋa᷄ŋ o̍ fo̍ndāŋ o̍ wa̍ wo̍. O̍ ko̍ŋ kɔ̍ɔ̍lī, mbo̍ kūā o̍ ndu̍ lo̍. Mi̍ bu̍ɛ̍i̍yāā ndūa̍a̍ tūāl ndu̍ kɔ̄ɔ̄lī.

²O̍ pāa̍le̍ pɛ̍ŋgīāālē Chu̍ūwa̍ chōo̍, mbo̍ kāndū wāŋnda̍ pɛ̄ɛ̄kōo̍ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ. Mi̍ wānāā bɔ̄ɔ̍ bɔ̍ɔ̍ a̍ tu̍ɛ̍ī ndu̍ dīōm. Mi̍ kɔ̄ndɔ̄fi̍llo̍ bīī nda̍ ta̍u̍. Ma̍ nyūūni̍āŋ tɛ̍ɛ̄ŋ āā, “Kūɛ̍ɛ̍nɛ̍ o̍ sɔ̍lā yɛ̄ kɔ̄l kālu̍ bɛ̍ndū bɛ̄ndōo̍ ho̍ō? Vɛ᷅ mi̍ kɔ̄l kālo̍o̍ ho̍ō wā ndu̍ ō kēna᷄ŋ? Lā to̍fa̍ ka̍a̍ma̍ālā o̍ to̍sa̍ la̍ŋ.

³Ka̍a̍pi̍ndā, Po̍ Mēēli̍o̍o̍ ndu̍ le̍ cho̍ ho̍ō le̍? Chēmi̍si̍ ni̍, a̍ Chōo̍sɛ̍, a̍ Chu̍dā, a̍ Sa̍i̍mɔ̄ŋ, pɔ̄mbūāā ndūa̍a̍ cho̍ ka̍ŋ ni̍. Yēmāa̍ ndūa̍a̍ ā cho̍ na̍nu᷄ŋ mɛ̄ɛ̍ na̍a̍ ŋ̄ sūāā nu̍a̍ā yɛ̍.” Mi̍ wāŋnda̍ ha̍ā ā kɛ̄ɛ̄ ndu̍.

⁴O̍ ko̍ŋ, mi̍ Chi̍i̍sū di̍mūl nda̍ āā, “Wāŋnda̍ kpo̍u̍ mā ke̍ wāna̍ su̍a̍ā le̍ Mɛ̄lɛ̄ka̍ wo̍ bɛ̄ɛ̄le̍ŋ. Kɛ̍, wāŋnda̍ o̍ ndu̍ lo̍ chi̍e̍e̍, a̍ wānāya᷅ŋ ndɔ᷄ŋ, a̍ wānāā nda̍ fūla̍ o̍ yu̍ŋgu̍ pi᷅lɔ̍ɔ̍ chōo̍ wa̍, ā ke᷅ ndu̍ lēbɛ̄ɛ̄ le̍.”

⁵Chi̍i̍sū nɔ̍la̍ mbō tōsa̍ ka̍a̍ma̍ā che᷅le̍ŋ lo̍ŋ te̍. Mɛ̄ɛ̍ bālā o̍ ha̍ndu̍ wānāā lānāāwa̍ ā ti᷄ŋ chōo̍, mbo̍ sīŋgī nda̍ wo̍.

⁶Mi̍ kɔ̄ndɔ̄fi̍llo̍ bīī ndu̍ le̍ mɛ̄ɛ̍ nda̍ kɛ̄ɛ̍ le̍ lāāla᷄ŋndo̍ yɛ̍. Mi̍ Chi̍i̍sū ku̍ā o̍ sɔ̄ndɔ̄kɔ̍lta̍ŋ yo̍o̍ŋgū kɛ̄ndɔ̄ɔ̍ dīmīo̍o̍.

⁷Mbo̍ vēēlū bu̍ɛ̍i̍yāā tɔ̍ a̍ ā ŋīɔ̍ɔ̍ŋnda̍, mbo̍ kāndū nda̍ vīōmɔ̄ɔ̍ ā ŋīɔ̍ɔ̍ŋ ŋīɔ̍ɔ̍ŋnda̍. Mbo̍ kē nda̍ kpāāyāa̍ nyi̍nāā wɔ̄ɔ̍ŋnda̍ chōo̍.

⁸Mbo̍ dīmūl nda̍ āā, “Lā chu̍ā nyɛ̄ o̍ nyɛ̄ o̍ kɔ̄lā nyāla̍ŋ ni᷄ŋ te̍, mɛ̄ɛ̍ tīnda̍la̍ŋ. Nyɛ̄ dīa̍a̍ bɛ̍ɛ̍ lā chu̍ā le̍, bɔ̄lɔ̄ bɛ̍ɛ̍ lā chu̍ā le̍. Īka̍ni̍ bɛ̍ɛ̍ lā ku̍ā o̍ lāyi̍fɔ̄ le̍.

⁹Kɛ̍, lā chu̍a̍ kɔ̍ɔ̍vɛ̄i̍la̍ nyāla̍ŋ mī lā wōūnu̍ŋ a̍ do᷅māla̍ŋ lā pīlɛ̍ŋ pi̍lɛ̍ŋ.”

¹⁰Mbo̍ dīmūl nda̍ vɛ̄lɛ̄ āā, “Chi̍e̍e̍ o̍ chi̍e̍e̍ nya̍ kūɛ̄ pɛ̍, chīɛ̄ī nda̍ yīya̍ nya̍ pɛ̍, lā lo̍ o̍ chīɛ̄ī kōŋ ni᷄ŋ ha̍a̍a̍ mī lā fāŋa̍ŋ o̍ chi̍e̍e̍ ko̍ŋ.

¹¹Chi̍e̍e̍ bi̍i̍ nya̍ bīyɔ̄ɔ̄ kɛ̄ndɛ̄ le̍, ndu̍yɛ̍, mā kɛ̄ɛ̍ nya̍ nīla̍ŋ yāŋɔ̄ɔ̄ pɛ̍, tē lā wa̍ fāŋa᷄ŋndo̍ lo̍ŋ pɛ̍, lā ko᷄ŋ chu̍ndo̍o̍ nya̍ o̍ ŋ̄pēlū le̍ nda̍ chɔ̄mndo̍ māā ā tōsa̍ su̍ɛ̍i̍ kɛ̍ndɛ̄ le̍.”

¹²Ma̍ kūā. Ma̍ kɔ̍ di̍mī māā wāŋnda̍ ma᷄l yɔ᷅ŋndā wɔ̄ɔ̍ŋnda̍ŋ.

¹³Ma̍ tūāū nyi̍nāā wɔ̄ɔ̍ŋāā ka̍ ka̍ wa᷅ŋnda̍ kɔ̄ɔ̄lī. Ma̍ sūū wānāā lānāāwa̍ ā ka̍ ka̍ chu̍ɛ̍īya̍ŋ, ma̍ sīŋgī nda̍.

¹⁴O̍ te̍le̍ŋ ko̍ŋ ni᷄ŋ, mi̍ Māsāa̍ Hɛ̍lɔ̄ɔ̄ tu̍ɛ̍ī Chi̍i̍sū tɔ̍ɔ̍ a̍ mɛ̄ɛ̍ o̍ wa̍ tōsāa̍ yɛ̍, kāni̍ fo̍ndōle̍, dīōla̍ Chi̍i̍sūla̍ŋ la̍ a̍a̍ ti̍u̍ ni᷅ŋ si̍lɔ̍. Mi̍ wāŋnda̍ ā pūm ā dīmī āā, “Chɔ᷄ŋ Wānā Pu̍lāa̍ ndu̍ mi̍i̍ŋgu̍ yōōmū ni̍. Le̍la̍ŋ bɛ̍ɛ̍ o̍ nɔ̍ kpāāyāa̍ le̍ kɔ̄ndɔ̄fi̍ltā wāā nu̍a̍ā tōsāa̍ ni̍.”

¹⁵Mi̍ wāŋnda̍ ā pūm ā dīmī āā, “Īla̍a̍chā cho̍ ho̍ō ni̍.” Mi̍ ā pūm ā dīmī āā, “Wāna̍ su̍a̍ā le̍ Mɛ̄lɛ̄ka̍ wo̍ chō ho̍ō ni̍, nu̍a̍ā ŋ̄ chā āā bɛ̄ndūāā pāāndūa̍a̍ su̍a̍ā le̍ Mɛ̄lɛ̄ka̍ wa̍ ni̍.”

¹⁶Kɛ̍ mɛ̄ɛ̍ Māsāa̍ Bɛ̍ndōo̍ Hɛ̍lɔ̄ɔ̄ tu̍e̍ī ndi̍, mbo̍ dīmī āā, “Chɔ᷄ŋ ya̍ I̍ ke̍lū bōlle̍ŋ ndo̍, ndu̍ mi̍i̍ŋgu̍ yōōmū ni̍.”

¹⁷Bōōndi̍i̍ Hɛ̍lɔ̄ɔ̄ chu̍a̍ Hɛ̄lo̍o̍dīāā, la̍nɔ̍ɔ̍ Fi̍li̍pī pɔ̍mbɔ̄ ndɔ̄ o̍ nɔ̄ɔ̍ ni᷄ŋ nde̍, mi̍ Chɔ᷄ŋ di̍mūl ndu̍ āā, “Ō cho̍ i̍ kɛ̍ndɛ̄ mā chu̍a̍ la̍nɔ̍ɔ̍ pɔ̄mbɔ̄ nūm o̍ nɔ̄ɔ̍ ni᷄ŋ te̍.” Mi̍ Hɛ̄lo̍o̍dīāā tu̍u̍lū kɔ̄l ta̍u̍ a̍ Chɔ᷄ŋ mbo̍ yēēmā le̍ ndu̍ dīyɔ̄ɔ̍. Kɛ̍, nɛ̄ī o̍ nɛ̄ī ve̍ mī ndu̍ o̍o̍ di̍ī ndu̍ le̍. Kāni̍ fo̍ndōle̍, Māsāa̍ Hɛ̍lɔ̄ɔ̄ ndu̍ o̍o̍ nɔ̍ bɛ̄ɛ̄le̍ŋ ta̍u̍ le̍ Chɔ᷄ŋ. Fo̍ndōle̍, wāna̍ cho̍ le̍ Mɛ̄lɛ̄ka̍ wo̍ Chɔ᷄ŋ wa̍ ni̍, ndu̍yɛ̍ ō wa̍ wānā sa̍kpō. Le̍la̍ŋ, mi̍ Hɛ̍lɔ̄ɔ̄ chi̍i̍ndīāā ndu̍. Tē Hɛ̍lɔ̄ɔ̄ ndu̍ o̍o̍ tu̍e̍ī Chɔ᷄ŋ dīōm pɛ̍ ndu̍ o̍o̍ hi̍nī kɔ̍l tē. Kɛ̍, o̍ ke̍ŋ ni̍ŋ kpo̍u̍, mbō ya᷄ŋ Chɔ᷄ŋ nīla̍ŋ a̍ kɔ̄l kɛ̄ndɛ̄. Le̍ Hɛ̄lo̍dīāā kɔ̄llo̍ nɛ̄ŋīo̍o̍, mi̍ Hɛ̍lɔ̄ɔ̄ vi̍ām wānā le̍ Chɔ᷄ŋ bīyɔ̄ɔ̍. Ma̍ bīī Chɔ᷄ŋ. Ma̍ dūāū ndu̍ o̍ chīɛ̄ī mānyūmndo̍ ni᷄ŋ.

¹⁸

¹⁹

²⁰

²¹O̍ mɛ̄ɛ̄lu̍la̍ŋ, mi̍ pāa̍le̍ Hɛ̄lo̍o̍dīāā sɔ̍la̍ fo̍ndāa̍ le̍ŋ lē fūūlūū, le̍ŋ le̍ yɔ̍nūŋ ni̍ māā pāa̍le̍ lo̍o̍na᷄ŋnde̍ŋ a̍ vīōlɔ᷄ŋ Māsā Bɛ̍ndōo̍ Hɛ̍lɔ̄ɔ̄ wo̍ o̍kɔ̄ɔ̄. O̍ ko̍ŋ mi̍ Hɛ̍lɔ̄ɔ̄ bɛ̍ɛ̍ndīāā nyɛ̄ dīāā bɛ̄ndū bɛ̍ndōo̍ le̍ lāŋgba̍ā ndūāā ka᷅lla̍, ā cha᷅l ndu̍ īkɛ̄i̍ o̍ tōŋgo̍ lākɔ̍ɔ̍sɔ̍ɔ̍ ni᷄ŋ nda̍, a̍ lāŋgba̍ā kālla̍ o̍ lɛ̄ŋndē Kāli̍līle̍ŋ ni᷄ŋ, a̍ lāŋgba̍ā kālla̍ a̍ cho̍ so̍vɛ̄i̍ya̍ bōlle̍ŋ nda̍.

²²Mi̍ chu̍a̍ Hɛ̄lo̍o̍dīāā wo̍ lūɛ̄ī mbo̍ yā nda̍ o̍ hɔ̄l. Mi̍ Māsā Bɛ̍ndōo̍ Hɛ̍lɔ̄ɔ̄ nda̍ mīālāā ndūa̍a̍ ki̍nɛ̍i̍ a̍ na᷅ŋ kɔ̄l ta̍u̍ ta̍u̍ a̍ mɛ̄ɛ̍ o̍ ye᷅ yɛ̄. Mbo̍ chūēl ndu̍ būŋgɛ̄i̍ mbo̍ dīmūl ndu̍ āā, “Nyɛ̄ o̍ nyɛ̄ ŋ̄ yēēma̍ pɛ̍, I̍ nɔ̍lā mī ke̍ nu̍m.”

²³Mbo̍ chūēl ndu̍ būŋgɛ̄i̍ mbo̍ mēna᷄ŋ āā, “Nyɛ̄ o̍ nyɛ̄ ŋ̄ nyūna̍ ya̍ pɛ̍, I̍ nɔ̍lā mī ke̍ nu̍m. Ā yɔ᷄ŋ bɛ̍ɛ̍ āā lɛ̄ŋndē ya̍ cho̍ le᷅ŋ chōo̍ ma̍sāa̍ le̍ŋ ni̍, I̍ nɔ̍lā mī ke̍ nu̍m lē ti᷄ŋ.”

²⁴Mi̍ chūāāmbɔ̄ɔ̍ fūlā mbo̍ kɔ̍ nyūnā kāla̍ ndɔ̄ āā, “Yɛ̄ɛ̍nɛ̍ ya̍ I̍ nyu̍na̍ yɛ̍ le̍ ndu̍?” Mi̍ kāla̍ ndɔ̄ di̍mūl ndu̍ āā, “Kɔ̍ nyu̍nā ndu̍ mbō ke̍ nu̍m bōlle̍ Chɔ᷄ŋ Wānā Yi̍ŋāa̍ le̍ŋ.”

²⁵Mi̍ chūāāmbɔ̄ɔ̍ mīīŋgū chɔ̍ chɔ̍ nāa̍ Māsā Bɛ̍ndōo̍ Hɛ̍lɔ̄ɔ̄ chu̍a̍. Mbo̍ kɔ̍ di̍mūl ndu̍ āā, “I̍ ye̍e̍ma̍ mā ke̍ ya̍ bōlle̍ Chɔ᷄ŋ Wānā Yi̍ŋāa̍ le̍ŋ o̍ wo̍lɛ̄i̍yo̍ ni᷄ŋ.”

²⁶Mɛ̄ɛ̍ chūāāmbɔ̄ɔ̍ dīmi̍ le̍nde̍, mi̍ mɔ̍nɛ̍i̍ bīī Māsā Bɛ̍ndōo̍ Hɛ̍lɔ̄ɔ̄ ta̍u̍ ta̍u̍. Kɛ̍ ndu̍yɛ̍ ndu̍ o̍o̍ chi̍i̍ ni᷅ŋ chūāāmbɔ̄ɔ̍ būŋgɛ̄i̍ chūēl mīālāā ndūa̍a̍ kpo̍u̍ o̍ hɔ̄l. Le̍ sa̍bōo̍ ho̍ō, ndu̍ o̍o̍ ye̍e̍ma̍ mī ndu̍ o̍o̍ tɛ̍ɛ̍mbu̍u̍ dīōm ndɔ̄ɔ̍ nāa̍ chūāāmbɔ̄ɔ̍ chūā le̍.

²⁷Lē pīlɛ̍ kpe̍, mbo̍ vīām so̍vɛ̄i̍ya̍a̍ wa̍ ndu̍ māndāa̍ wa̍ ō pīlɔ̍ɔ̄ āā, “Kɔ̍ hu᷅ŋ a̍ bōlle̍ Chɔ᷄ŋnde̍ŋ.” Mi̍ lāŋu̍nɔ̄ kōŋ kūā o̍ chīɛ̄ī mānyūmndo̍ mbo̍ kīālū Chɔ᷄ŋ bōlle̍ŋ.

²⁸Mbo̍ hūŋ a̍ le̍ŋ o̍ wo̍lɛ̄i̍yo̍ ni᷄ŋ. Mi̍ Hɛ̍lɔ̄ɔ̄ ke᷅ chūāāmbɔ̄ɔ̍. Mi̍ chūāāmbɔ̄ɔ̍ kē kāla̍ ndɔ̄.

²⁹Mɛ̄ɛ̍ bu̍ɛ̍i̍yāa̍ Chɔ᷄ŋ nda̍ tūēī sūɛ̍i̍ he̍ī, ma̍ hu᷄ŋ chu̍ā dīāllūŋ ndɔ᷄ŋ ma̍ kɔ̍ chɔ᷅. Le̍ sa̍bōo̍ ho̍ō Hɛ̍lɔ̄ɔ̄ dīmi̍ ni̍ āā, “Chɔ᷄ŋ yā ke̍lū bōlle̍ŋ ndo̍ mīīŋgu̍ yōōmū.”

³⁰Mi̍ wānāā Chi̍i̍sū ve᷅m hɔ̄ltē ndɔ̄ wa̍ mīīŋgū nāa̍ Chi̍i̍sū chu̍a̍. Ma̍ dīmūl ndu̍ kpo̍u̍ a̍ nyɛ̄ nda̍ tōsa̍ wo̍ a̍ pɛ̄ɛ̄kū nda̍ pɛ̄ɛ̄ku̍ wāŋnda̍ wo̍.

³¹Mbo̍ dīmūl nda̍ āā, “Ŋ̄ kɔ̄nu᷅ŋ nāa̍ do̍ŋ do̍ŋnda̍ mī ŋ̄ kɔ̍ pɛ̍ŋgī nyɛ̄ pɔ̄mbɔ̄.” Kāni̍ fo̍ndōle̍, wānāā fāŋgā fa̍ŋgā a̍ wa̍ hūnɔ̄ɔ̍ mā mīīŋgū. Nda̍ a̍a̍ nɔ̍ fo̍ndāŋ le̍ nyɛ̄ dīa̍a̍ di̍o̍o̍ le̍.

³²Ma̍ lūɛ̄ī o̍ dɛ̄ndɔ̄ɔ̍ ni᷄ŋ ma̍ kūā nāa̍ do̍ŋ do̍ŋnda̍ nda̍ kpe̍e̍le̍.

³³O̍ te̍le̍ŋ ko̍ŋ ni᷄ŋ, mi̍ wānāā fāŋgā fa̍ŋgā a̍ cha᷅ nda̍ o̍ kɔ̄la̍ŋ. Ndu̍yɛ̍, ma̍ sīnā nda̍. Ma̍ māl o̍ chi̍o̍o̍ŋ kpo̍u̍ a̍ kīlta̍ŋ, ma̍ fūūlūū nda̍ lāchī.

³⁴Mɛ̄ɛ̍ Chi̍i̍sū fu̍u̍lu̍u̍ lo̍ŋ, mbo̍ fūlā o̍ dɛ̄ndɔ̄ɔ̍ ni᷄ŋ, mbo̍ hēl o̍ kɔ̄ŋgɔ̍. Mɛ̄ɛ̍ o̍ che᷅ wāŋnda̍ fāŋgā bɛ̍ndōo̍, mi̍ nyīɛ̍ɛ̍ye̍ bīī ndu̍ le̍ nda̍. Kāni̍ fo̍ndōle̍, ā wa̍ māwāā mɛ̄ɛ̍ sāa̍ wā nu̍a̍ā ā nɔ᷅ wa̍nā ma̍ndāā le̍ yɛ̍. Mbo̍ kāndū nda̍ pɛ̄ɛ̄kōo̍ a̍ sɔ̄ɔ̍ŋ ta̍u̍ ta̍u̍.

³⁵A̍ pāa̍le̍ de̍lāāle̍ŋ do̍ŋ, mi̍ bu̍ɛ̍īyāā ndūa̍a̍ hūŋ nāa̍ ndu̍ chu̍a̍. Ma̍ dīmūl ndu̍ āā, “Māsānɔ̄ɔ̍, te̍le̍ŋndo̍ chō ni᷅ŋ ō kūānu᷄ŋ la̍nda̍ŋ. Ndu̍yɛ̍ ā chē mɛ̄ɛ̍ na̍a̍ ŋ̄ chō yōndōo̍ ni᷄ŋ na̍nu᷄ŋ yɛ̍.

³⁶Le̍la̍ŋ di̍mu̍l nda̍ ā kɔ̍ mā kɔ̍ nu̍u̍vīāā nyɛ̄ dīa̍a̍ o̍ tāndāa̍ ho̍ō ni᷄ŋ o̍ sɔ̄ndɔ̄kɔ̍lta̍ŋ mā pēndū mā dē.”

³⁷Kɛ̍ mi̍ Chi̍i̍sū di̍mūl nda̍ āā, “Lā ke̍ nda̍ nyɛ̄ dīa̍a̍ mā dē.” Ma̍ nyūnā ndu̍ āā, “Ŋ̄ kɔ̍ mī ŋ̄ kɔ̍ pi̍o̍ndū bēe̍dīi̍yo̍ a̍[1] nyɛ̄ sɔ̄lāa̍ o̍ bānā ba̍na̍ mī ŋ̄ ke̍ nda̍ mā dē?”

³⁸Mi̍ Chi̍i̍sū nyu̍nā nda̍ āā, “Vɛ̄ɛ̍nɛ̍ nya̍ nɔ̄ yɛ̄ bēe̍dīi̍yo̍ kpūŋgba᷄ŋ? Lā kɔ̍ tōfa̍ wɔ̄.” Ma̍ kɔ̍ to̍fā. Mɛ̄ɛ̍ nda̍ sāālu̍ŋ mɛ̄ɛ̍ nda̍ nɔ̄ yɛ̍, ma̍ dīmī āā, “Ŋ̄ sāālu᷅ŋ kpūŋgba᷄ŋ ŋ̄ ŋūɛ̍ɛ̍nu̍ a̍ sūūwa̍ ā ŋīɔ̍ɔ̍ŋ.”

³⁹Mbo̍ dīmūl bu̍ɛ̍i̍yāā ndūa̍a̍ āā, “Lā tōsa̍ mā cha᷄l a̍ ku̍ndāla̍ŋ o̍ bīl pūīyāa̍ chōo̍.”

⁴⁰Ma̍ chāl a̍ ku̍ndāla̍ŋ. Ku̍ndāa̍ ō pūm kɛ̄mɛ̄, ku̍ndāa̍ ō pūm be̍le̍-ŋu̍ɛ̍ɛ̍nu̍.

⁴¹Mi̍ Chi̍i̍sū bi̍ī bēe̍dīi̍ kpūŋgbāŋ ŋūɛ̍ɛ̍no̍o̍ a̍ sūūwāā ŋīɔ̍ɔ̍ŋ nda̍. Mbo̍ tōfā chōo̍ cho̍o̍ mbo̍ mēl Mɛ̄lɛ̄ka̍ ba̍li̍ka̍. Mbo̍ yīmī yīmī ndu̍ būŋga᷄ŋ. Mbo̍ kē bu̍ɛ̍īyāā ndūa̍a̍ le̍ mā pīɔ̍u̍ wāŋnda̍. Mbo̍ pīɔ̄ū nda̍ kpo̍u̍ su̍u̍wāā ŋīɔ̍ɔ̍ŋnda̍.

⁴²Nda̍ kpo̍u̍ ma̍ dīā ma̍ pūm ma̍ dēmā.

⁴³Mi̍ bu̍ɛ̍i̍yāā ndūa̍a̍ chūūŋgīāā ō bīŋgī bi̍ŋgī nda̍ dēma̍ wo̍ ma̍ dūāū o̍ kāmbɛ̍i̍la̍ŋ ni᷄ŋ. Mbo̍ pīā kāmbɛ̍i̍la̍ŋ tɔ̍ a̍ lā tīɔ̍ɔ̍ŋ.

⁴⁴Pūa̍a̍ de᷅ nyɛ̄ dīa̍a̍ ho̍ō wa̍ ā wa̍ wāa̍la̍ŋ lā ŋūɛ̍ɛ̍nu̍.

⁴⁵Mɛ̄ɛ̍ he̍ī hīōū dɔ̍ɔ̍, mi̍ Chi̍i̍sū di̍mūl bu̍ɛ̍i̍yāā ndūa̍a̍ māā ā lūɛ̍i̍ o̍ dɛ̄ndɔ̄ɔ̍ ni᷄ŋ mā kūɛ̄ pɔ̄ɔ̄ ndu̍ lāchī mā ta᷄ŋ mɛ̄ŋmā ībūŋga᷄ŋ mā kūɛ̄ Bɛ̄tīsa̍i̍dā. Mi̍ ndu̍ pi̍la̍ lo᷅ a̍ mākɔ̄ɔ̄ le̍ fāŋgāa̍ pīɔ̄lɔ̄ɔ̍.

⁴⁶Mɛ̄ɛ̍ o̍ cho̍ŋgu̍ŋ nda̍, mbo̍ hēl o̍ pēmbēi̍ chōo̍ le̍ Mɛ̄lɛ̄ka̍ pīɛ̄īyo̍. Ō lo̍ lo̍ŋ mi̍ nyūmnda̍ŋ mā tūāl.

⁴⁷A̍ bōōndi̍i̍ ke̍ŋ, dɛ̄ndɔ̄ɔ̍ ndu̍ o̍o̍ wa̍ ni᷅ŋ kɔ᷄ŋnda̍ŋ o̍ mɛ̄ŋnda̍ŋ chōo̍. Mi̍ ndu̍ wa᷅ o̍ kɔ̄ŋgɔ̍ ndu̍ pīlɛ̍.

⁴⁸Mi̍ Chi̍i̍sū cha᷅ māā ā wa̍ fāfa̍la̍a̍ le̍ kɔ̄la̍ŋ a̍ dɛ̄ndɔ̄ɔ̍, kāni̍ fo̍ndōle̍, hūēīye̍ wa̍ hɔ̄ŋndo̍. A̍ te̍le̍ŋ pāa̍le̍ si̍a̍āle̍ŋ, mbo̍ tūāl bu̍ɛ̍i̍yāā ndūa̍a̍ kɔ̄ɔ̄lī o̍ mɛ̄ŋnda̍ŋ chōo̍. Ndu̍ o̍o̍ nɔ̍ yīya᷄ŋndo̍ le̍ kēēku̍la̍ŋ nda̍ īkɛ̄i̍.

⁴⁹Mɛ̄ɛ̍ nda̍ chē ndu̍ hūnɔ̄ɔ̍ o̍ mɛ̄ŋnda̍ŋ chōo̍, ā wa̍ ko̍ kɔ̍l āā nyi̍nāa̍ ni̍. Ma̍ mɛ̄lī ye̍e̍la̍ŋ

⁵⁰kāni̍ fo̍ndōle̍, nda̍ kpo̍u̍ ma̍ chā ndu̍. Mi̍ sīōōŋnde̍ bīī nda̍. Mi̍ Chi̍i̍sū su̍a̍ā nāa̍ nda̍ chu̍a̍ o̍ lē pīlɛ̍ ni᷄ŋ kpe̍. Mbo̍ dīmūl nda̍ āā, “Lā yɔ᷅ŋ īsīōōŋ te̍. Ya̍ ni̍.”

⁵¹Mbo̍ lūɛ̄ī nāa̍ nda̍ chūā o̍ dɛ̄ndɔ̄ɔ̍ ni᷄ŋ. O̍ ko̍ŋ, mi̍ hūēīye̍ ī pɛ̄ŋgī hɔ̄ŋndo̍. Mi̍ kɔ̄ndɔ̄fi̍llo̍ bīī nda̍,

⁵²fo̍ndōle̍ nda̍ a̍a̍ nɔ̍ si̍nā pɛ̄ŋgu̍ o̍ sūɛ̍i̍ kpe̍e̍kpe̍i̍ wa̍ a̍ bēe̍dīi̍ o̍ ke̍ wāŋnda̍ wo̍ o̍kɔ̄ɔ̄ le̍. Hūlmā nda᷄ŋ mā nɔ̄la̍ nyɛ̍ yɔ̍nu̍ŋ ndo̍ sīnā le̍.

⁵³Ma̍ tāŋ mɛ̄ŋmā ībūŋga᷄ŋ. Ma̍ hūŋ o̍ kɔ̄ŋgɔ̍ lɛ̄ŋndē Kɛ̄nɛ̍sa̍lūɛ̄īle̍ŋ. Ma̍ yīī dɛ̄ndɔ̄ɔ̍.

⁵⁴Mɛ̄ɛ̍ nda̍ fūla̍ dɔ̍ɔ̍ o̍ dɛ̄ndɔ̄ɔ̍ ni᷄ŋ, mi̍ wāŋnda̍ sīnā māā Chi̍i̍sū ni̍.

⁵⁵Sīnāa̍ māā ndu̍ ni̍, ma̍ nyāānu᷄ŋ o̍ bɛ̍ɛ̄la̍ŋ ma̍ kāndū hūnɔ̄ɔ̍ a̍ wānāā lānāāwa̍ o̍ mbōōmāla̍ŋ ni᷄ŋ fūlāa̍ bā o̍ bā fe̍e̍ nda̍ tūēī ndu̍ tɔ̍ɔ̍.

⁵⁶Ndu̍yɛ̍, bā o̍ bā ndu̍ o̍o̍ ku̍ɛ̄ pɛ̍, ā yɔ᷄ŋ bɛ̍ɛ̍ o̍ sɔ̄ndɔ̄kɔ̍lta̍ŋ ni̍, o̍ chi̍e̍e̍ŋ bɛ̍ndo᷄ŋ ni᷄ŋ ni̍, ɔ̄ɔ̄, o̍ chīɔ̍ɔ̍ŋ ni᷄ŋ ni̍, mā yɛ̄ɛ̄mbu̍u̍ wānāā lānāāwa̍ o̍ lɔ̍ɔ̍la̍ŋ ni᷄ŋ. Mi̍ wānāā lānāāwa̍ nyɔ̄ɔ̄lu̍ ndu̍ le̍ mā pīla̍ŋ do᷅ma̍ ndɔ̄ɔ̍ bɔ̄ɔ̄le̍ŋ. Ndu̍yɛ̍, wānāa̍ pi̍la̍ŋ do᷅ma̍ ndɔ̄ɔ̍ bɔ̄ɔ̄le̍ŋ nda̍ ki̍nɛ̍i̍ ma̍ sīāŋgū kpo̍u̍.