Read Southern Kisi Ma̍kī 7 Bible Online

Ma̍kī 7 - Southern Kisi bible

Ma̍kī 7

¹Chu̍ūwa̍ kpo̍u̍, tāāma̍ Fālīsi̍īya̍ nda̍ a̍a̍ hɛ̍na̍ŋ ka̍ā fi̍nyāā ndāā ma̍māa̍ chūa̍a̍. Mɛ̄ɛ̍ mī nda̍ a̍a̍ pu̍lū bāla̍ŋ pūlɔ̄ɔ̄ pūm fɛ̍lɛ̍ŋ, mālāŋ nda̍ a̍a̍ di̍ā nyɛ̍ dīa̍a̍. Ndu̍yɛ̍, tē nda̍ a̍a̍ chɛ̍ŋ o̍ lɔ̍ɔ̍ ni᷄ŋ pɛ̍, nda̍ a̍a̍ di᷅ nyɛ̄ o̍ nyɛ̄ dīāā le̍, mɛ̄ɛ̍ mī nda̍ a̍a̍ pu̍lū fɛ̍lɛ̍ŋ nda̍ pi̍la̍ pūlɔ̄ɔ̄ kōŋ. Ndu̍yɛ̍, ka̍ālā chēle̍ŋ lā chō lā nda̍ a̍a̍ chu̍ā la̍ŋ, mɛ̄ɛ̍ tāālāla̍ŋ tūēīyo̍ bɛ̍ɛ̍ la̍ cho̍ nu̍a̍ā yɛ̍. A̍ kpɛ̍ɛ̍nɔ̍ŋ a̍ nyɛ̄m lāāndūŋ chīli̍ŋndo̍ŋ. A̍ bōōndi̍i̍ ke̍ŋ, mi̍ ku̍ndā Fālīsi̍īya̍ a̍ wānāa̍ pɛ̍ɛ̍kū wāŋnda̍ sāwāla̍ Mɛ̄lɛ̄ka̍la̍ŋ nda̍, a̍ fu̍la̍ Chūlu̍sɛ̄lɛ̄m nda̍ ā chūūŋgi̍āŋ na̍a̍ pi᷅lɛ̍ nāa̍ Chi̍i̍sū chu̍a̍. Ma̍ chā bu̍ɛ̍i̍yāā ndūa̍a̍ ā pūm nyɛ̄ dīa̍a̍ dīo̍o̍ ā pūlu̍ ba᷅la̍ŋ fɛ̍lɛ̍ŋ mɛ̄ɛ̍ Fālīsi̍īya̍ dīmi̍ o̍ ka̍ā ndāa̍ ni᷄ŋ māā wānā pu̍lū fɛ̍ɛ̍ŋ yɛ̍ le̍. Le̍ he̍ī ma̍ yīya᷄ŋ māā bu̍ɛ̍i̍yāa̍ Chi̍i̍sūa̍a̍ ā dē nyɛ̄ dīa̍a̍ a̍ bālā nɔ̄ɔ̄lɛ̍i̍la̍ŋ. Mi̍ ku̍ndā Fālīsi̍īya̍ a̍ wa(...)

⁴

⁵

⁶Mi̍ Chi̍i̍sū di̍mūl nda̍ āā, “Dīōmndā wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā so̍ō a̍ nya̍ wānāā kāŋgālāa̍ ha̍ā o̍kɔ̄ɔ̄ la̍ŋ, tōnya̍ kpe̍e̍kpe̍i̍ la̍ cho̍ ni̍. Mbo̍ pōōnyīāā māā, Mɛ̄lɛ̄ka̍ dīmi̍ āā, wāŋnda̍ ha̍ā dīmi̍ a̍ sōndō māā ā ke̍ ya̍ bɛ̄ɛ̄le̍ŋ. Kɛ̍ ndu̍yɛ̍ ā hɛ̄na̍ŋ mā tōsa̍ nyɛ̄ ya̍ di̍mūl nda̍ le̍ tōsāa̍ wo̍ le̍.

⁷Ō bɛ̄nda̍ bɛ̍ɛ̍ mā pɛ̄ŋgi̍ a̍ ya̍ pīɛ̄īyo̍. Kāni̍ fu̍u̍le̍, sāwāla̍ nda̍ pi̍la̍ tōōsi̍a̍a̍ la̍ŋ, la̍ŋ nda̍ pɛ̄ɛ̄kū wa᷅ŋnda̍ ni̍, mā dīmī māā sāwāla̍ nīla̍ŋ ni̍.”

⁸Mi̍ Chi̍i̍sū di̍mī āā, “Lā ma᷄l sāwāla̍ Mɛ̄lɛ̄ka̍la̍ŋ mi̍ lā chūā ka̍ā wāŋndā chīe̍e̍ya̍.”

⁹Mbo̍ dīmūl nda̍ āā, “Lā chāā bɔ̍ɔ̍ ka᷅fɛ̍īla̍ŋ nūūvīa̍a̍ le̍ sāwāla̍ Mɛ̄lɛ̄ka̍la̍ŋ kīɔ̍ɔ̍, le̍ hāli̍ kpe̍ŋ, mī lā mānda̍ ka̍ā nyāa̍.”

¹⁰Mi̍ Mūu̍sē di̍mī āā, “Ke̍ fi̍nyā nu̍m bɛ̄ɛ̄le̍ŋ a̍ kālā nu̍m.” Mbo̍ dīmī vɛ̄lɛ̄ āā, “Wānā o̍ wāna̍ ye̍i̍ fi̍nyā ndɔ̍ kɛ̄lɛ̄ŋgāā kālā ndɔ̍ pɛ̍, wānā ko̍ŋ lā dīi̍ ndu̍.

¹¹Kɛ̍ ndu̍yɛ̍, nya̍ dīmi̍ māā ā yɔ᷄ŋ bɛ̍ɛ̍ mī wāŋndo̍ nɔ̄ nyɔ̄ɔ̍ ō ndu̍ o̍o̍ ke᷅ ni̍ŋ fi̍nyā ndɔ̍ kɛ̄lɛ̄ŋgāā kāla̍ ndɔ̍ le̍ nda̍ mālāa̍ wo̍, kɛ̍ tē ō dīmi̍ ni᷅ŋ pɛ̍ māā ō chu̍a̍ ni᷅ŋ būŋgɛ̄i̍ le̍ mbō ke̍ Mɛ̄lɛ̄ka̍ ndu̍, ko̍ŋ cho̍ ni̍ mbō dīmi̍ pɛ̍ māā kɔ̄ba᷅ŋndo̍ nyɛ̄ kōŋ chō ni̍ māā mbō ke̍ lɛ̍ bɛ̍ɛ̍ nda̍ nyɛ̄ kōŋ te̍ ō ve᷅ i̍sɔ̍ɔ̍ le̍.

¹²Mɛ̄ɛ̍ o̍ he̍ī ni᷄ŋ, lā chɛ᷅l lɛ̍ mī wāŋndo̍ ho̍ō māla̍ lɛ̄ fi̍nyā ndɔ̄ a̍ kāla̍ ndɔ̄ le̍.

¹³Le̍la̍ŋ, ka̍ā nya̍ chō ho̍ō wāŋnda̍ pɛ̄ɛ̄kōo̍ wo̍ ndu̍ cho̍ dīo̍m Mɛ̄lɛ̄ka̍a̍ tɛ̄ɛ̄mbūū wo̍ ni̍. Ndu̍yɛ̍, ŋ̄ fāŋgāŋ wāā nu̍a̍ā nya̍ chō tōsāa̍ ni̍.”

¹⁴O̍ ko̍ŋ kɔ̍ɔ̍lī, mi̍ Chi̍i̍sū ve̍e̍lū vɛ̄lɛ̄ wāŋnda̍ ma̍ hūŋ nāa̍ ndu̍ chu̍a̍. Mbo̍ dīmūl nda̍ āā, “Nya̍ kpo̍u̍ lā ya᷄ŋ ni᷅la̍ŋ o̍ nyɛ̄ ya̍ cho̍ nya̍ dīmūl lo̍ le̍ mī lā sɔ̄la̍ sīnā pɛ̄ŋgo̍o̍.

¹⁵Ō cho̍ nyɛ᷅ lu̍ɛ̍ī wa᷅ŋndo̍ ni᷄ŋ ndo̍ le̍ si̍i̍ŋgūū ndu̍ wānā wɔ̍ɔ̍ŋ Mɛ̄lɛ̄ka̍ o̍ hɔ̄l te̍. Kɛ̍ nyɛ̍ fu̍lā ndu̍ ni᷄ŋ ndo̍ ndu̍ si̍i̍ŋgūū ndu̍ wānā wɔ̍ɔ̍ŋ Mɛ̄lɛ̄ka̍ o̍ hɔ̄l ni̍. [

¹⁶Nūm o̍ nu᷄m nɔ̍ nīla̍ŋ le̍ tūēīyɔ̄ɔ̍ pɛ̍, lā ya᷄ŋ nīla̍ŋ mī lā tūēī mī lā sīna̍ pɛ̄ŋgu̍.]”

¹⁷Mɛ̄ɛ̍ o̍ mɛ̍i̍ wāŋnda̍ mbo̍ lūɛ̄ī chīɛ̄ī ni᷄ŋ, mi̍ bu̍ɛ̍i̍yāā ndūa̍a̍ nyūnā ndu̍ a̍ tālo̍o̍ ho̍ō o̍kɔ̄ɔ̄.

¹⁸Mbo̍ nyūnā nda̍ āā, “Nya̍ bɛ̍ɛ̍ lā si̍nā i̍sɔ̍ɔ̍ pɛ̄ŋgu̍ le̍? Lā si̍nā nu̍a̍ā māā ō cho̍ nyɛ̍ dīāā wāna̍ chi̍o̍o̍ dīā ho̍ō wo̍ le̍ si̍i̍ŋgūū ndu̍ wānā wɔ̍ɔ̍ŋ Mɛ̄lɛ̄ka̍ o̍ hɔ̄l te̍ le̍?

¹⁹Kāni̍ fo̍ndōle̍ ō cho̍ la̍kɔ̍ o̍ kɔ̄llo̍ ni᷄ŋ te̍. O̍ dēmbōo̍ ni᷄ŋ o̍ cho̍ lākɔ̄ ni̍, mbō lo̍ o̍ ko̍ŋ mbō sɔ̄nda̍ŋ ndu̍.” Nyɛ̄ Chi̍i̍sū di̍mi̍ wo̍ chɔ᷄m māā nyɛ̄ dīāā o̍ nyɛ̄ dīāā ō na᷄ŋ le̍ dīo̍o̍.

²⁰Mbo̍ dīmī āā, “Nyɛ̍ fu̍lā wa᷅ŋndo̍ sīmnu᷄ŋ o̍ nɔ̍ɔ̍lɛ̍i̍ Mɛ̄lɛ̄ka̍ o̍ hɔ̄l.

²¹Kāni̍ fu̍u̍le̍, o̍ wāna̍ chi̍o̍o̍ ni᷄ŋ yīya᷄ŋnda̍ wɔ̍ɔ̍ŋnda̍ŋ lā fūlā ni̍. Yīya᷄ŋnda̍ to̍sāā sɔ̄ɔ̍ŋ wɔ̍ɔ̍ŋnda̍ŋ kpo̍u̍, wāŋndo̍ o̍ kɔ̄llo̍ ni᷄ŋ ko̍ni̍ la̍ cha᷅ŋ ni̍. Sūūndāa̍ a̍ wānā nya̍ cho̍ o̍ nɔ̄ ni̍ŋ nya̍ ndu̍ le̍ wo̍, a̍ vīīle̍ŋ, a̍ dīyɔ̄ɔ̍, a̍ sūūndāa̍ a̍ la̍nɔ̍ pi̍la̍a̍ kɛ̄lɛ̄ŋgāā pɔ̍nɔ̍ pi̍la̍a̍,

²²a̍ hɔ̄lte̍ŋ nɔ̄ɔ̍, a̍ kɔ̄l vēsɛ̍i̍yo̍, a̍ kāŋgālāa̍, a̍ māāla̍ŋ, a̍ wāŋndo̍ pāŋālāa̍ le̍ nyɛ̄ ndɔ̄ɔ̍, a̍ chōŋgūla̍ŋ, a̍ yōŋgāa̍, a̍ kīɔ̍ɔ̍ bɛ̄ɛ̄le̍ŋ kɛ̄si᷄ŋndo̍.

²³Sɔ̄ɔ̍ŋ wɔ̍ɔ̍ŋndo̍ŋ mu᷅ŋ kpo̍u̍, o̍ wāna̍ chi̍o̍o̍ ni᷄ŋ ŋ̍ fu̍lā ni̍. Ndu̍yɛ̍ mu̍ŋ to̍sā ni̍ mī wāŋndo̍ sīmnu᷄ŋ o̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l.”

²⁴Mɛ̄ɛ̍ Chi̍i̍sū chɛ̍ŋ lo̍ŋ, mbo̍ kūā o̍ lɛ̄ŋndē chi̍e̍e̍ŋ bɛ̍ndo᷄ŋ Ta̍a̍yā a̍ Sa̍i̍dɔ̄ŋ cho̍ lēni᷄ŋ nde̍ŋ. Mbo̍ lūɛ̄ī o̍ chīɛ̄ī pīlɛ̍ ni᷄ŋ. Ndu̍ o̍o̍ hɛ̍na̍ŋ mī wānā o̍ wānā ndu̍ o̍o̍ si̍na̍ māā ō chō lo̍ŋ te̍. Kɛ̍, mɛ̄ɛ̍ o̍ mɛ̄ɛ̍ to̍sāā ve̍ mī nda̍ a̍a̍ kɛ̍ɛ̍ sīnā le̍.

²⁵Chūā pīlɛ̍ wa̍ lo̍ŋ, nyi̍nā wɔ̄ɔ̍ŋndo̍ wa̍ chūā ndɔ̄ɔ̍ kɔ̄ɔ̄lī. Mbo̍ tūɛ̄ī a̍ Chi̍i̍sū o̍kɔ̄ɔ̄. Mbo̍ hūŋ sa̍kpō mbo̍ dēl ndu̍ o̍ lābɛ̄ŋgu̍ ni̍ŋ.

²⁶Mbo̍ nyɔ̄ɔ̄lū ndu̍ le̍ mbō fāŋa̍ nyi̍nā wɔ̄ɔ̍ŋndo̍ chūā ndɔ̄ɔ̍ kɔ̄ɔ̄lī. Chūa̍a̍ ho̍ō ve̍ Chu̍ūnɔ̄ le̍. O̍ būŋgɛ̄ī Fōni̍i̍sīāāve̍ ni᷄ŋ o̍ lɛ̄ŋndē Si̍i̍lūīāle̍ŋ ni᷄ŋ, ndu̍ o̍o̍ ve̍lu᷄ŋ ni̍.

²⁷Mi̍ Chi̍i̍sū di̍mu̍l ndu̍ āā, “Chūāāmbūa̍a̍ sɔ̄la̍ fɛ̍lɛ̍ŋ nyɛ̍ dīa̍a̍. Ō bɛ̍ndā mī wānā chu̍a̍ nyɛ̄ dīa̍a̍ cho̍ le̍ chūāāmbūa̍a̍ wo̍ mā do̍u̍ tūŋnda̍ le̍.”

²⁸Mi̍ chūa̍a̍ mūlī ndu̍ dīo̍m āā, “Tōnya̍ i̍ cho̍ ni̍, Fāllo̍, kɛ̍ ā yɔ᷄ŋ bɛ̍ɛ̍ āā tūŋāa̍ cho̍ o̍ ti̍bīi̍ di̍a̍ā nyɛ̄ dīa̍a̍ bɛ̄ŋgu̍ wa̍ ni̍ ā dīā ku̍wu̍ŋ chūāāmbūa̍a̍.”

²⁹Mi̍ Chi̍i̍sū di̍mūl ndu̍ āā, “Le̍ mūlī ŋ̄ mūli̍ ho̍ō wo̍, mi̍i̍ŋgu̍ o̍ nūm ndo̍. Nyi̍nā wɔ̄ɔ̍ŋndo̍ fāŋa̍ŋ chu̍a̍ nūmndo̍ kɔ̄ɔ̄lī.”

³⁰Mbo̍ mīīŋgū o̍ ndu̍ lo̍. Mbo̍ kōmāl nyi̍nā wɔ̄ɔ̍ŋndo̍ fāŋa̍ŋ chu̍a̍ ndɔ̄ɔ̍ kɔ̄ɔ̄lī. Chūā ndɔ̄ɔ̍ wānu̍ŋ i̍hi̍ni̍ o̍ kpēlē.

³¹Mbo̍ māl lɛ̄ŋndē chi̍e̍e̍ bɛ̍ndōo̍ Ta̍a̍yā wa̍ ni᷄ŋ nde̍ŋ. Mbo̍ mīīŋgū o̍ Mɛ̄ŋmā Ībūŋga᷄ŋ Kāli̍lī i̍kɛ̍i̍. O̍ mīīŋgū ndɔ̄ɔ̍ ni᷄ŋ, mbo̍ kēēkū o̍ chi̍e̍e̍ bɛ̍ndōo̍ ni᷄ŋ dīōla̍ŋ āā, Sa̍i̍dɔ̄ŋ a̍ o̍ lɛ̄ŋndē Dɛ̄ka̍pɔ̍līīle̍ŋ, ko̍ŋ cho̍ ni̍, lɛ̄ŋndē chi̍e̍e̍ŋ bɛ̍ndūŋ tɔ̍le̍ŋ.

³²Ma̍ hūŋ a̍ pōo̍ nāa̍ ndu̍ chu̍a̍. Pōo̍ ho̍ō nīla̍ŋ lā wa̍ ndu̍ lā bāŋu̍lɛ̍i̍, ndu̍yɛ̍, ndu̍ o̍o̍ nɔ̍lā su̍ɛ̍i̍ lāpi̍ le̍. Ma̍ nyɔ̄ɔ̄lū ndu̍ le̍ hāli̍ kpe̍ŋ mī ndu̍ o̍o̍ ha̍ndu̍ ndu̍ bāla̍ŋ chōo̍.

³³Mi̍ Chi̍i̍sū fa̍ŋa᷄ŋ a̍ pōo̍ ho̍ō o̍ fāŋgā bɛ̍ndōo̍ tɛ̍ɛ̄ŋ. Mbo̍ wōū ndu̍ sōo̍ŋ o̍ lānī. Mbo̍ tūfū lɔ̄lūa̍ŋ. Mbo̍ pīla᷄ŋ ndu̍ dīɔ̄ɔ̄mūle̍ŋ.

³⁴Mɛ̄ɛ̍ Chi̍i̍sū to̍fa̍ ɛ̄chɛ̍nɛ̄, mbo̍ yōōmū fu̍ū. Mbo̍ dīmūl ndu̍ āā, “Ɛ̍fa̍tā.” Ko̍ŋ cho̍ ni̍ āā, ku̍mbi̍ŋ.

³⁵Mi̍ nīlā pōo̍ ho̍ō la̍ kūmbi᷄ŋ. Mi̍ dīɔ̄ɔ̄mūlē ndɔ̄le̍ŋ lē yɔ̄nu᷄ŋ fe̍fe̍le̍. Mbo̍ sūāā nyɛ̄ kɛ̄ndɛ̄ wa̍la̍ŋ.

³⁶Mi̍ Chi̍i̍sū si̍lā wāŋnda̍ āā, “Lā di̍mūl wānā su̍ɛ̍i̍ he̍ī le̍.” Kɛ̍ mɛ̄ɛ̍ kpɛ̍ o̍ hi̍a̍ū la̍chi̍ a̍ nda̍ sīlāa̍ yɛ̍, le̍nde̍ ko̍ni̍ nda̍ hīāū la̍chi̍ a̍ wāŋnda̍ ndi̍ dīmūllo̍ ni̍.

³⁷Mi̍ kɔ̄ndɔ̄fi̍llo̍ bīī nda̍ ta̍u̍ ta̍u̍. Ma̍ dīmī āā, “Ō tōsa̍ sɔ̄ɔ̍ŋ kpo̍u̍ ŋ̄ kɛ̍ndɛ̄. Ō tōsa̍ mi̍ wāna̍ nīlā bāŋu̍lɛ̍i̍yo̍ bɛ̍ɛ̍ o̍ tu̍ɛ̍ī. Mbo̍ tōsā mi̍ bo̍bo̍nɔ̍ɔ̍ su̍a̍ā.”