Read Southern Kisi Ma̍kī 8 Bible Online

Ma̍kī 8 - Southern Kisi bible

Ma̍kī 8

¹O̍ pālɛ̍i̍ ke̍ŋ ni᷄ŋ, mi̍ wāŋnda̍ ā chūūŋgi̍āŋ vɛ̍lɛ̄ nāa̍ pi᷅lɛ̍. Kɛ̍ nda̍ a̍a̍ nɔ̍ nyɛ̍ dīāā le̍ di̍o̍ le̍. Mi̍ Chi̍i̍sū ve̍e̍lū bu̍ɛ̍i̍yāā ndūa̍a̍. Mbo̍ dīmūl nda̍ āā,

²“Nyīɛ̍ɛ̍ye̍ chō ya̍ le̍ fāŋgāa̍ ho̍ō. Pālɛ̍i̍ ī yāa̍ ni᷅ŋ kpu̍lu̍ku̍u̍ ā chō ya̍ kɔ̄ɔ̄lī. Ndu̍yɛ̍, nyɛ̄ dīāā bɛ̍ɛ̍ ā nɔ̍ lɛ̍ le̍.

³Tē I̍ mi̍ŋgi̍ nda̍ a̍ yīa̍a̍ŋ o̍ lā nda̍ lo̍ pɛ̍, ā chō kēī wōū nɛ̄ī tɛ̍ɛ̄ŋ. Ndu̍yɛ̍, ā pūm ā fūla̍ la̍nda̍ŋ.”

⁴Mi̍ bu̍ɛ̍i̍yāā ndūa̍a̍ nyūnā ndu̍ āā, “Kɛ̍ kūɛ̍ɛ̍nɛ̍ na̍a̍ ŋ̄ sɔ̄la̍ yɛ̍ ni̍ŋ nyɛ̄ dīa̍a̍ tūu̍le̍ŋ o̍ po̍llo̍ ho̍ō ni᷄ŋ le̍ wāŋnda̍ ha̍ā?”

⁵Mbo̍ nyūnā nda̍ āā, “Vɛ̄ɛ̍nɛ̍ nya̍ nɔ̄ yɛ̄ bēe̍dīi̍yo̍ kpūŋgba᷄ŋ?” Ma̍ dīmī āā, “Ŋ̄ ŋɔ᷄mmɛ̍ū.”

⁶Mi̍ Chi̍i̍sū di̍mūl fāŋgā bɛ̍ndōo̍ ho̍ō ma̍ chāl. Mbo̍ chūā bēe̍dīi̍ kpūŋgbāŋ ŋɔ᷄mmɛ̍ū kōŋ. Mbo̍ mēl Mɛ̄lɛ̄ka̍ ba̍li̍ka̍a̍. Mbo̍ yīmī yīmī mbo̍ kē bu̍ɛ̍i̍yāā ndūa̍a̍ le̍ mā pīɔ̍u̍ nda̍. Ma̍ pīɔ̄ū nda̍.

⁷Ndu̍yɛ̍, nda̍ a̍a̍ nɔ̍ sūūwa̍ nyɛ̄ pɔ̄mbɔ̄. Mbo̍ mēl Mɛ̄lɛ̄ka̍ ba̍li̍ka̍a̍ le̍ sūūwāā kāŋ. Sūūwāā kāŋ bɛ̍ɛ̍ mbo̍ dīmī māā ā pīɔ̍u̍.

⁸Mi̍ wāŋnda̍ dīā ma̍ pūm. Mi̍ bu̍ɛ̍i̍yāā ndūa̍a̍ chɔ̄ɔ̄vīāā ō nda̍ dēma̍ wo̍ ma̍ dūāū o̍ kāmbɛ̍i̍la̍ŋ ni᷄ŋ. Mbo̍ pīā kāmbɛ̍i̍la̍ŋ lā ŋɔ᷄mmɛ̍ū.

⁹Ndu̍yɛ̍, wānāa̍ de᷅ nyɛ̄ dīa̍a̍ ho̍ō wa̍, ā wa̍ wāa̍la̍ŋ lā hīɔ̍ɔ̍lu̍. O̍ ko̍ŋ kɔ̍ɔ̍lī mi̍ Chi̍i̍sū to̍sā ma̍ mīīŋgū o̍ lā nda̍ lo̍.

¹⁰Ndu̍ ni̍ bu̍ɛ̍i̍yāā ndūa̍a̍ ni̍ ma̍ lūɛ̄ī o̍ dɛ̄ndɔ̄ɔ̍ ni᷄ŋ ma̍ kūānu᷄ŋ o̍ lɛ̄ŋndē Dālīma̍nu̍tāāle̍ŋ ni᷄ŋ.

¹¹Mi̍ ku̍ndā Fālīsi̍īya̍ ā pūm hūŋ ma̍ kāndū ndu̍ sɛ̄ɛ̄ŋgīa̍a̍. Ma̍ nyūnā ndu̍ le̍ mī ndu̍ o̍o̍ to̍sa̍ ka̍a̍ma̍a̍ le̍ chɔ̄mndo̍ māā kpāāya̍ Mɛ̄lɛ̄ka̍a̍ kpe̍e̍kpe̍i̍ o̍ nɔ̍ ni̍. Ā tōsa̍ he̍ī le̍ ndu̍ tɔ̄ɔ̄nda᷄ŋndo̍.

¹²Mi̍ nyīɛ̍ɛ̍ye̍ pīā o̍ kɔ̄l ndɔ̄ɔ̍ ni᷄ŋ. Mbo̍ dīmī āā, “Le̍ yɛ̄ɛ̍nɛ̍ wāŋnda̍ te̍le̍ŋndo̍ ho̍ō a̍ nyu̍na̍ yɛ̄ le̍ ka̍a̍ma̍a̍? Mī di̍mu̍l nya̍, ka̍a̍ma̍ā o̍ ka̍a̍ma̍ā I̍ cho̍ nda̍ tōsāl te̍.”

¹³Mbo̍ mɛ̄ī nda̍ lo̍ŋ mbo̍ lūɛ̄īnu᷄ŋ o̍ dɛ̄ndɔ̄ɔ̍ ni᷄ŋ mbo̍ tāŋnu᷄ŋ kɔ̍ŋgɔ̍ɔ̍ pīlɔ̍ɔ̄.

¹⁴O̍ te̍le̍ŋ ko̍ŋ ni᷄ŋ, mi̍ bu̍ɛ̍i̍yāā ndūa̍a̍ pūɛ̄ɛ̄nu᷄ŋ le̍ kɔ̄la̍ŋ a̍ bēe̍dīi̍yo̍ o̍ bā tūu̍le̍ŋ. Kpūŋgbɛ̄i̍ ī pīlɛ̍ ko̍ni̍ nda̍ a̍a̍ nɔ̍ o̍ dɛ̄ndɔ̄ɔ̍ ni᷄ŋ ni̍.

¹⁵Mi̍ Chi̍i̍sū si̍lā nda̍ āā, “Lā mānda̍ŋ, a̍ yi̍i̍sīi̍ ku̍ndā Fālīsi̍īya̍ a̍ yi̍i̍sīi̍ ku̍ndā Hɛ̍lɔ̄ɔ̄ wo̍.”

¹⁶Mi̍ bu̍ɛ̍īya̍ kāndū sūūki̍āŋndo̍ nda̍ pi̍la̍ tɛ̄ɛ̄ŋ āā, “Le̍ mɛ̄ɛ̍ na̍a̍ ŋ̄ nɔ̍ be̍e̍dīi̍ le̍ yɛ̍ o̍ di̍mi̍ dīōmnda̍ŋ nda᷅ŋ ni̍.”

¹⁷Mɛ̄ɛ̍ Chi̍i̍sū si̍na̍ nyɛ̄ nda̍ wa̍ dīmīo̍o̍ wo̍, mbo̍ nyūnā nda̍ āā, “Le̍ yɛ̄ɛ̍nɛ̍ nya̍ chō yɛ̄ dīmu̍la᷅ŋndo̍ āā, ‘Ŋ̄ nɔ̍ be̍e̍dīi̍ le̍?’ Pɛ̄ŋgo̍o̍ ho̍ō bɛ̍ɛ̍ lā sīna̍ wɔ̍ ndi̍ pɛ̄ŋgu̍ le̍? Kɔ̄ltā nyāla̍ŋ la̍ cho̍ lā kālā ka̍lā ni̍?

¹⁸Mī lā nɔ̄ hɔ̄lta̍ŋ, lā chi᷅ a̍ la̍ŋ te̍? Mī lā nɔ̄ nīla̍ŋ, lā tu̍i̍ī a̍ la̍ŋ te̍?

¹⁹Lā pūɛ̄ɛ̄nu̍ŋ ni᷅ŋ bɛ̍ɛ̍ a̍ mɛ̄ɛ̍ ya̍ to̍sa̍ mi̍ wānāā wāa̍la̍ ŋu̍ɛ̍ɛ̍nu̍a̍a̍ dīā bēe̍dīi̍ kpūŋgbāŋ ŋūɛ̍ɛ̍no̍o̍ ma̍ pūm yɛ̍? Ō pɔ̄m pɔ̍mbɔ̄ nda̍ dēma̍ wo̍, vɛ̄ɛ̍nɛ̍ o̍ pɛ᷅ yɛ̄ kāmbɛ̍i̍la̍ŋ?” Ma̍ mūlī ndu̍ dīōm āā, “Kāmbɛ̍i̍la̍ŋ tɔ̍ a̍ lā tīɔ̍ɔ̍ŋ.”

²⁰Mi̍ Chi̍i̍sū di̍mūl nda̍ āā, “Ndu̍yɛ̍, bēe̍dīi̍ kpūŋgbāŋ ŋɔ᷄mmɛ̍ū ya̍ I̍ yi̍mi̍ yi̍mi̍ le̍ wānāā wāa̍la̍ hi̍ɔ̍ɔ̍lu̍a̍a̍ wo̍, vɛ̄ɛ̍nɛ̍ ō pɔ̄m pɔ̍mbɔ̄ nda̍ dēma̍ mi̍ lā chɔ̄ɔ̄vīāā wo̍, ndu̍ o̍o̍ wa̍ yɛ̄ kāmbɛ̍i̍la̍ŋ?” Ma̍ mūlī ndu̍ dīo̍m āā, “Kāmbɛ̍i̍la̍ŋ lā ŋɔ᷄mmɛ̍ū.”

²¹Mbo̍ nyūnā nda̍ āā, “Lā sīna̍ wɔ̍ ndi̍ pɛ̄ŋgu̍ le̍?”

²²Ma̍ hūŋ Bɛ̄tīsa̍i̍dā chi̍e̍e̍. Mi̍ wāŋnda̍ ā pūm ā hūŋ a̍ po̍ su̍mɛ̍i̍yo̍ nāa̍ Chi̍i̍sū chu̍a̍. Ma̍ nyɔ̄ɔ̄lū ndu̍ le̍ ndu̍ pīla᷄ŋndo̍.

²³Mi̍ Chi̍i̍sū sa̍ā po̍ su̍mɛ̍i̍yo̍ bāa̍ mbo̍ fāŋa᷄ŋ a̍ ndu̍ chi̍e̍e̍. Mbo̍ kɔ̍ tu̍fū lɔ̄lūa̍ŋ ndu̍ o̍ lāhɔ̄l. Mbo̍ hāndū ndu̍ bāla̍ŋ chōo̍ mbo̍ nyūnā ndu̍ āā, “Ā chō pa̍ nyɛ᷅ o̍ nyɛ̄ chɔ̄ɔ̍?”

²⁴Mbo̍ chūā hɔ̄lla̍ chōo̍. Mbo̍ dīmī āā, “I̍ cho̍ wāŋndā chīe̍e̍ya̍ chɔ̄ɔ̍ bālɔ̄ɔ̍, kɛ̍ wānā cha᷅ ko̍ nda̍ āā yɔ̄mnde̍ ni̍.”

²⁵Mi̍ Chi̍i̍sū hāndū vɛ̄lɛ̄ ndu̍ bāla̍ŋ o̍ lāhɔ̄l. Mi̍ pōo̍ tōfā chi̍ŋ mbo̍ sīāŋgū. Ndu̍yɛ̍, mbo̍ chā nyɛ̄ o̍ nyɛ̄ wa̍la̍ŋ.

²⁶Mi̍ Chi̍i̍sū mi̍ŋgī ndu̍ o̍ ndu̍ lo̍. Mbo̍ dīmī āā, “Ku̍ā lɛ̄ chi̍e̍e̍ le̍.”

²⁷Mi̍ Chi̍i̍sū nda̍ bu̍ɛ̍i̍yāā ndūa̍a̍ kūā o̍ sɔ̄ndɔ̄kɔ̍lta̍ ba̍lu̍ Sīsāli̍a̍ā Fi̍li̍pāī la̍ŋ. O̍ kɔ̄lā ndāla̍ŋ ni᷄ŋ, mi̍ Chi̍i̍sū nyu̍nā bu̍ɛ̍i̍yāā ndūa̍a̍ āā, “Wāna̍ māā vɛ̄ɛ̍nɛ̍ wāŋnda̍ dīmi̍ yɛ̄ māā ya̍ I̍ cho̍?”

²⁸Ma̍ mūlī ndu̍ dīōm āā, “Ā pūm ā dīmi̍ āā, Chɔ᷄ŋ Wānā Yi̍ŋāa̍ ŋ̄ chō ni̍. Ā pūm yɛ̍ āā, Īla̍a̍chā. Ā pūm yɛ̍ āā, wāna̍ su̍a̍ā le̍ Mɛ̄lɛ̄ka̍ wo̍ ō pūm ŋ̄ chō ni̍.”

²⁹Mbo̍ nyūnā nda̍ āā, “Kɛ̍, vɛ̄ɛ̍nɛ̍ nya̍ nya̍ dīmi̍ yɛ̄? Wāna̍ māā vɛ̄ɛ̄ ya̍ cho̍ yɛ̄?” Mi̍ Pītɛ̍ mūlī āā, “Nu᷄m cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.”

³⁰Mi̍ Chi̍i̍sū si̍lā nda̍ māā ā di̍mūl wānā o̍ wānā a̍ ndu̍ o̍kɔ̄ɔ̄ le̍.

³¹Mi̍ Chi̍i̍sū ka̍ndū nda̍ pɛ̄ɛ̄kōo̍ āā, “Wāna̍ nda̍ vēēlu̍ āā, Po̍ Wānā Pɔ̍nɔ̍ɔ̍ wo̍ nɔ̄ le̍ mɔ̍nɛ̍i̍ bīyɔ̄ɔ̍ ta̍u̍. Ndu̍yɛ̍ lāŋgba̍ā kālla̍, a̍ wānāā bɛ̄ndūa̍a̍ sōlīāā lāsa̍lāa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, ā chō ndu̍ kɛ̄ɛ̄, ndu̍yɛ̍ mā dīī ndu̍. Kɛ̍, tē pālɛ̍i̍ ī hīōū pɛ̍ i̍ ya̍a̍, ō mīīŋgu̍ yōōmū.”

³²Mbo̍ dīmī dīōmnda̍ŋ nda᷅ŋ kpe̍nde̍ke̍le̍. O̍ ko̍ŋ kɔ̍ɔ̍lī, mi̍ Pītɛ̍ ve̍e̍lū ndu̍ nda̍ ŋi̍ɔ̍ɔ̍ŋ mbo̍ dīmūl ndu̍ āā, “Yi̍ya᷄ŋ yi̍ya᷄ŋ wa̍ā le̍nde̍ mā tu̍u̍nu̍ŋ ke̍ŋ te̍.”

³³Mi̍ Chi̍i̍sū mu̍li᷄ŋ mbo̍ nūā bu̍ɛ̍i̍yāā ndūa̍a̍, mbo̍ mūli̍ Pītɛ̍ dīōm āā, “Fa̍ŋa̍ŋ ya̍ na̍nu᷄ŋ, nūm Sēta̍nā, māsa̍ nyi̍nāā wɔ̄ɔ̍ŋnda̍. Nyɛ̄ ŋ̄ yīya̍ŋ ho̍ō wo̍, ō cho̍ yi̍ya᷄ŋ Mɛ̄lɛ̄ka̍ le̍. Yīya᷄ŋ īwāna̍ chi̍e̍e̍ya̍a̍ ŋ̄ yīya̍ŋ ho̍ō ni̍.”

³⁴Mbo̍ vēēlu̍ fāŋgāa̍ a̍ bu̍ɛ̍i̍yāā ndūa̍a̍ hɔ̄lāā tūlu̍. Mbo̍ dīmī āā, “Wānā o̍ wāna̍ hɛ̍na̍ŋ le̍ wāa̍ wāna̍ nī pɛ̍, mɛ̄ɛ̍ wānā ko̍ŋ ō to̍sā hɛ̄na᷄ŋ kɔ̄l ndɔ̄ɔ̍ le̍. Ndu̍yɛ̍, wānā ko̍ŋ nɔ̄ mbō wa̍ ō bɛ̄ɛ̄ndīa̍ŋ lēpāla̍ o̍ lēpāla̍ le̍ mā dīī ndu̍.

³⁵Kāni̍ fo̍ndōle̍, wānā o̍ wāna̍ ki̍ndi̍ le̍ yōōmū ndɔ̄ɔ̍ chīīndīa̍a̍ pɛ̍, mɛ̄ɛ̍ ō chō yōōmū kpe̍e̍kpe̍i̍yo̍ fūlā. Kɛ̍ ndu̍yɛ̍, wānā o̍ wāna̍ yōōmū ndɔ̄ɔ̍ hɛ̄lu᷄ŋ ndu̍ le̍ ya̍ a̍ Yōōŋgū Kɛ̄ndɛ̍ Mɛ̄lɛ̄ka̍a̍ pɛ̍, mɛ̄ɛ̍ ō chō hūnɔ̄ɔ̄ yōōmū kpe̍e̍kpe̍i̍yo̍ sɔ̄lā.

³⁶Kāni̍ fo̍ndōle̍, tɔ̄nɔ̍ yɛ̄ɛ̍nɛ̍ wāŋndo̍ sɔ̄lā yɛ̍, tē ō wa̍ pɛ̍ mbō sɔ̄la̍ chi̍e̍ēŋndo̍ ho̍ō kpo̍u̍, kɛ̍ ndu̍yɛ̍ mbō fūla̍ yōōmū kpe̍e̍kpe̍i̍yo̍?

³⁷Ndu̍yɛ̍ tē yōōmū kpe̍e̍kpe̍i̍yo̍ hɛ̄lu᷄ŋ pɛ̍ wa᷅ŋndo̍, ō nɔ̄lā lɛ̍ pa̍ ndu̍ bāŋa᷄?

³⁸Ya̍ wāna̍ nda̍ vēēlū ho̍ō āā, Po̍ Wānā Pɔ̍nɔ̍ɔ̍ wo̍, I̍ cho̍ hūnɔ̄ɔ̄ o̍ nāŋɔ̄ɔ̍ Fi̍nyā nūu̍ ni᷄ŋ a̍ ki̍i̍la̍a̍ Mɛ̄lɛ̄ka̍a̍ lātūlu̍. O̍ ko̍ŋ, wānā o̍ wāna̍ kɛ̍ɛ̍ ya̍ a̍ dīōmndā nīla̍ŋ o̍ chi̍e̍ēŋ yɔ̄ŋ wɔ̄ɔ̍ŋ māl ho̍ō Mɛ̄lɛ̄ka̍ wo̍ ni᷄ŋ pɛ̍, wānā ko̍ŋ, I̍ cho̍ hūnɔ̄ɔ̄ ndu̍ kɛ̄ɛ̄.”