Read Southern Kisi Ma̍kī 9 Bible Online

Ma̍kī 9 - Southern Kisi bible

Ma̍kī 9

¹Mbo̍ hīāū lāchī a̍ dīmīo̍o̍ āā, “Mī di̍mu̍l nya̍, wānāā pūm ā chō na̍nu᷄ŋ ā lō ni̍ŋ yo̍o̍mū mā chē Māsāle̍ Mɛ̄lɛ̄ka̍le̍ŋ mī lē hīŋ a̍ kpāāyāa̍ hɔ̄lāā tūlu̍.”

²Mɛ̄ɛ̍ pālɛ̍i̍ hīōū i̍ ŋɔ᷄mpu᷅m, mi̍ Chi̍i̍sū chu̍ā Pītɛ̍, a̍ Chēmi̍si̍, a̍ Chɔ᷄ŋ, ma̍ hēl o̍ pēmbīī pūm chōo̍. Lo̍ŋ nda̍ wa̍ ni̍, nda̍ kpe̍e̍le̍. Ā lo̍ Chi̍i̍su̍ tōfāa̍ mi̍ Mɛ̄lɛ̄ka̍ māŋgālā ndu̍ nda̍ o̍ hɔ̄l lo̍ŋ le̍ pi᷅lɛ̍ be̍lu᷄ŋ.

³Mi̍ nyɛ̄la̍ŋ ndu̍ lēkɔ̄ɔ̍ la̍ yɔ̄nu᷄ŋ ŋɛ̍lɛ̄ŋgi̍ ŋɛ̍lɛ̄ŋgi̍ a̍ dīōndɔ̄ɔ̍. Wānā o̍ wānā o̍ chi̍e̍ēŋndo̍ chōo̍ a̍ nɔ̍lā mā tɔ̄ɔ̄ lānyɛ̄ mī lā dēndū le̍nde̍ le̍.

⁴O̍ ko̍ŋ kɔ̍ɔ̍lī, mi̍ bu̍ɛ̍i̍yāā yāa̍wa̍ ha̍ā ā lō o̍ ko̍ŋ ma̍ chā Īla̍a̍chā nda̍ Mūu̍sē. Ma̍ chā nda̍ ā chō sūūki̍āŋndo̍ nda̍ Chi̍i̍sū wa̍ā.

⁵O̍ ko̍ŋ, mi̍ Pītɛ̍ di̍mūl Chi̍i̍sū āā, “Ti̍chā, ō bɛ̄nda̍ bɛ̍ɛ̍ mi̍ ŋ̄ wā na̍nu᷄ŋ. Ŋ̄ bāŋ ndɔ̍ būu̍ŋnda̍ŋ lā yāa̍, ō pīlɛ̍ le̍ nu̍m, ō pīlɛ̍ le̍ Mūu̍sē, ō pīlɛ̍ le̍ Īla̍a̍chā.”

⁶Kɛ̍ Pītɛ̍ ndu̍ o̍o̍ si̍nā nyɛ᷅ ndu̍ pi̍la̍ wa̍ ko̍ŋ di̍mīo̍o̍ wo̍ pɛ̄ŋgu̍ le̍, a̍ sīōōŋīi̍ wa̍ nda̍ ve̍.

⁷Mi̍ yu̍mbu̍ yu̍mbu̍ bɛ̍ndōo̍ hūŋ mbo̍ kūmbū nda̍ kpu̍. Mi̍ dīōmndo̍ sūāā o̍ yu̍mbu̍ yu̍mbo̍o̍ ni᷄ŋ āā, “Po̍ nī ka̍a̍lāa̍ cho̍ ho̍ō ni̍. Lā tūe̍i̍ ndu̍ dīōm.”

⁸O̍ lē pīlɛ̍ ni᷄ŋ kpe̍e̍le̍, mɛ̄ɛ̍ nda̍ mɛ̄ɛ̄ndīa̍ŋ, ā chi̍ lɛ̍ wa̍nā o̍ wānā che᷅le̍ŋ hɔ̄lāā tūlu̍ a̍ nda̍ le̍, mɛ̄ɛ̍ Chi̍i̍sū.

⁹Mɛ̄ɛ̍ Chi̍i̍sū nda̍ bu̍ɛ̍i̍yāā yāa̍wa̍ ā wa̍ mīīŋgōo̍ ma̍ wa̍ pēmbēi̍ tōlɔ̄ɔ̍, mbo̍ sīlā nda̍. Mbo̍ dīmūl nda̍ āā, “Nyɛ̄ nya̍ chē ho̍ō wo̍, lā di̍mūl wānā o̍ wānā a̍ ndu̍ o̍kɔ̄ɔ̄ le̍, mɛ̄ɛ̍ mbō lo̍ o̍ ko̍ŋ mī wāna̍ nda̍ vēēlū āā Po̍ Wānā Pɔ̍nɔ̍ɔ̍ wo̍ ō mīīŋgu̍ yōōmū.”

¹⁰Ma̍ kɛ̄si᷄ŋ su̍ɛ̍i̍ he̍ī o̍ lākɔ̄l. Ma̍ wā nyūūni̍āŋndo̍ āā, “Yɛ̄ɛ̍nɛ̍ cho̍ yɛ̄ mīīŋgōo̍ yōōmū?”

¹¹Ma̍ nyūnā ndu̍ āā, “Le̍ yɛ̄ɛ̍nɛ̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā dīmi̍ yɛ̍ āā, ‘Mɛ̄ɛ̍ mī Īla̍a̍chā hi᷅ŋ fɛ̍lɛ̍ŋ’?”

¹²Mi̍ Chi̍i̍sū mu̍lī nda̍ dīōm āā, “Le̍nde̍ i̍ cho̍ ni̍, mɛ̄ɛ̍ mī Īla̍a̍chā hi᷅ŋ fɛ̍lɛ̍ŋ mbō bɛ̄ɛ̄ndi̍a̍a̍ nyɛ̄ o̍ nyɛ̄ fe̍e̍ o̍ kɛ̍ndɛ̄. Le̍ yɛ̄ɛ̍nɛ̍ i̍ cho̍ yɛ̄ i̍ pōōnyīa̍ŋ māā mɛ̄ɛ̍ mī wāna̍ nda̍ vēēlu̍ āā, Po̍ Wānā Pɔ̍nɔ̍ɔ̍ wo̍ ō bīī mɔ̍nɛ̍i̍ ta̍u̍, ndu̍yɛ̍, mā tɛ̄ɛ̄mbu̍u̍ ndu̍ lābɛ̄ɛ̄?

¹³Kɛ̍ ndu̍yɛ̍ I̍ di̍mūl lɔ̍ nya̍, Īla̍a̍chā hi᷅ŋ ni᷅ŋ. Ma̍ tōsā nyɛ̄ o̍ nyɛ̄ nda̍ yēēma̍ a̍ ndu̍, mɛ̄ɛ̍ i̍ cho̍ ī pōōnyīāā a̍ ndu̍ o̍kɔ̄ɔ̄ yɛ̍.”

¹⁴O̍ ko̍ŋ kɔ̍ɔ̍lī, mi̍ Chi̍i̍sū nda̍ bu̍ɛ̍i̍yāā yāa̍wa̍ ā hūŋ nāa̍ bu̍ɛ̍īya̍ ā pīli̍a̍ā chūā. Mɛ̄ɛ̍ nda̍ fūūlu̍u̍ ma̍ chā fāŋgā bɛ̍ndōo̍ ō bālāā nda̍. Mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā sa̍āŋ di̍ōmnda̍ŋ hīŋa᷅ŋndo̍ a̍ bu̍ɛ̍īya̍ ha̍ā.

¹⁵Mɛ̄ɛ̍ fāŋgā bɛ̍ndōo̍ chē Chi̍i̍sū, mi̍ kɔ̄ndɔ̄fi̍llo̍ bīī nda̍. Ma̍ nyāānu᷄ŋ nāa̍ Chi̍i̍sū chu̍a̍. Ma̍ yīl ndu̍.

¹⁶Mi̍ Chi̍i̍sū nyu̍nā nda̍ āā, “O̍ yɛ̄ɛ̍nɛ̍ cho̍o̍ nya̍ chō yɛ̄ dīōmnda̍ŋ hīŋa᷅ŋndo̍ nya̍ nda̍?”

¹⁷Wāŋndo̍ ō pūm ō wa̍ o̍ fāŋgā bɛ̍ndōo̍ ho̍ō tɛ̄ɛ̄ŋ mbo̍ mūlī ndu̍ dīōm āā, “Ti̍chā, I̍ hi᷅ŋ a̍ po̍ nūu̍ nāa̍ nūm chu̍a̍, kāni̍ fo̍ndōle̍ nyi̍nā wɔ̄ɔ̍ŋndo̍ chō ndu̍ kɔ̄ɔ̄lī. Mbō tōsa̍ ndu̍ ō su̍ū le̍.

¹⁸Lɔ̍ɔ̍ lɔ̍ɔ̍ chūa̍a̍ ndu̍ mbō ma᷄l ndu̍ lɛ̄ŋ. Hīīyo̍ fūla̍ ndu̍ o̍ sōndō pɛ̍, ō sɔ̄m chīŋndo̍ŋ, ō bīōndu̍ŋ. Ndu̍yɛ̍, mi̍ di̍mūl bu̍ɛ̍i̍yāā nūmnda̍ le̍ mā tōū ndu̍ nyi̍nāa̍ ho̍ō kɔ̄ɔ̄lī. Kɛ̍ mā būmbā.”

¹⁹Mi̍ Chi̍i̍sū di̍mī āā, “E̍e̍e̍ nya̍ wāŋnda̍ ha̍ā. Lā nɔ̍ lāāla᷄ŋ te̍ ma᷅. I̍ vi̍o̍ū ni᷅ŋ a̍ nya̍ la̍tu̍lu̍ ma᷅. I̍ sa̍ŋga̍ ni᷅ŋ a̍ nya̍ bīūwɔ᷄ŋndo̍ fɔ̍.” Mbo̍ dīmūl ndu̍ āā, “Hu̍ŋ a̍ po̍ nu̍mndo̍ nāa̍ ya̍ chu̍a̍.”

²⁰Ma̍ hūŋ a̍ ndu̍ nāa̍ ndu̍ chu̍a̍. Mɛ̄ɛ̍ nyi̍nā wɔ̄ɔ̍ŋndo̍ chē Chi̍i̍sū, lē pīlɛ̍ kpe̍ mbo̍ chūā bɛ̍ɛ̍ po̍o̍mbɔ̄ɔ̍. Mi̍ pōo̍mbɔ̄ɔ̍ dēl lɛ̄ŋ. Mbo̍ pīmbūl. Mi̍ hīīyo̍ fūlā ndu̍ o̍ sōndō.

²¹Mi̍ Chi̍i̍sū nyu̍nā fi̍nyā ndɔ̍ āā, “Vɛ̄ɛ̍nɛ̍ kpɛ̍ o̍ vi̍o̍ū yɛ̄ ni᷅ŋ nu̍a̍ā?” Mi̍ fi̍nyā ndɔ̄ mu̍lī āā, “Chɔ̍ŋ o̍ chūāāmbɔ̄yɛ̍ī ndūɛ̍i̍ ni᷄ŋ ha̍a̍a̍ mbo̍ fūūlūū a̍ te̍le̍ŋndo̍ ho̍ō.

²²Mbō ma᷄l ndu̍ o̍ yīŋ a̍ o̍ mɛ̄ŋnda̍ŋ ni᷄ŋ, te̍le̍ŋnda̍ ka̍ ka̍ le̍ ndu̍ dīyɔ̄ɔ̍. Tē ā nɔ̄lā pɛ̍ mā to̍sa̍ nyɛ̄ o̍ nyɛ̄ a̍ ndi̍ o̍kɔ̄ɔ̄ pɛ̍, mɛ̄ɛ̍ tūīīnu̍ŋ na̍a̍ īnyīɛ̍ɛ̍, mā ma̍la̍ na̍a̍ fɔ̍.”

²³Mi̍ Chi̍i̍sū nyu̍nā ndu̍ āā, “Vɛ̄ɛ̍nɛ̍ ŋ̄ yīya᷄ŋ yɛ̍ ma̍ dīmī āā, ‘Tē ā nɔ̄lā pɛ̍?’ Wāna̍ nɔ̍ lāāla᷄ŋndo̍ wo̍ ō nɔ̄lā mbō tōsa̍ nyɛ̄ o̍ nyɛ̄.”

²⁴Lē pīlɛ̍ kpe̍, mi̍ fi̍nyāa̍ pōo̍mbɔ̄ɔ̍ dīmī chōo̍ cho̍o̍ āā, “I̍ nɔ̍ lāāla᷄ŋndo̍. Kɛ̍, ō cho̍ o̍ bɔ̍ɔ̍ le̍. Ma̍la̍ ya̍ mī nɔ̍ lāāla᷄ŋndo̍ ta̍u̍.”

²⁵Mɛ̄ɛ̍ Chi̍i̍sū che᷅ māā fāŋgāa̍ chō ni᷅ŋ hūnɔ̄ɔ̍ a̍ nyīīnda᷅ŋndo̍ le̍ hūnɔ̄ɔ̍ nda̍ īkɛ̄i̍, mbo̍ dīmūl nyi̍nā wɔ̄ɔ̍ŋ kōŋ āā, “Nūm nyi̍nā wɔ̄ɔ̍ŋ to̍sā wāŋndo̍ ō tu̍i̍ī le̍ wo̍, mā tōsā ō su̍ū le̍ wo̍, mī di̍mu̍l nu̍m, fa̍ŋa̍ŋ po̍o̍mbɔ̄ɔ̍ ho̍ō kɔ̄ɔ̄lī. Tu̍āl lɛ̄ ndu̍ kɔ̄ɔ̄lī le̍.”

²⁶Mi̍ nyi̍nāa̍ ho̍ō kōŋūl kpe̍le̍ŋ. Mbo̍ chūā bɛ̍ɛ̍ po̍o̍mbɔ̄ɔ̍. Mbo̍ yɔ̄ɔ̄kpīāā ndu̍ ta̍u̍. O̍ ko̍ŋ kɔ̍ɔ̍lī, mbo̍ fāŋa᷄ŋ ndu̍ kɔ̄ɔ̄lī. Mi̍ pōo̍mbɔ̄ɔ̍ wōū kpa̍nɛ̍i̍. Mi̍ wāŋnda̍ ta̍u̍ a̍ di̍mī āā, “Ō vī. Ō vī.”

²⁷Kɛ̍, mi̍ Chi̍i̍sū sa̍ā ndu̍ bāa̍. Mbo̍ chūā ndu̍ mbo̍ sīm.

²⁸Mi̍ Chi̍i̍sū ku̍ā chīɛ̄ī ni̍ŋ. Ndu̍ a̍ bu̍ɛ̍i̍yāā ndūa̍a̍ ko̍ni̍ a̍ wa̍ lo̍ŋ ni̍. Mi̍ bu̍ɛ̍i̍yāā ndūa̍a̍ nyūnā ndu̍ āā, “Vɛ᷅ mi̍ ŋ̄ būmbā nyi̍nā wɔ̄ɔ̍ŋ kōŋ tōūwɔ̄ɔ̄ pōo̍mbɔ̄ɔ̍ ho̍ō kɔ̄ɔ̄lī?”

²⁹Mi̍ Chi̍i̍sū mu̍lī nda̍ dīōm āā, “Le̍ mī wānā nɔ̍la̍ nyi̍nā wɔ̄ɔ̍ŋ wāā le̍nde̍ to̍u̍wɔ̄ɔ̄ wāŋndo̍ kɔ̄ɔ̄lī, mɛ̄ɛ̍ Mɛ̄lɛ̄ka̍ pīɛ̄īyo̍. Tē ō cho̍ ko̍ŋ te̍, wānā nɔ̍lā le̍.”

³⁰Mi̍ Chi̍i̍sū nda̍ bu̍ɛ̍i̍yāā ndūa̍a̍ ā fa̍ŋa᷄ŋ lo̍ŋ. Ma̍ kēēkū Kāli̍lī. Chi̍i̍sū ndu̍ o̍o̍ hɛ̍na̍ŋ mī wānā o̍ wānā ndu̍ o̍o̍ si̍na̍ nāa̍ nda̍ wa̍ wa̍ le̍.

³¹Kāni̍ fo̍ndōle̍, ō wa̍ bu̍ɛ̍i̍yāā ndūa̍a̍ pɛ̄ɛ̄kōo̍. Mbo̍ dīmūl nda̍ āā, “Wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ā chō ndu̍ mālɔ̄ɔ̄ wāŋnda̍ o̍ bā. Ndu̍yɛ̍ tē ā ma᷄l ndu̍ wāŋnda̍ o̍ bā pɛ̍, ā dīī ndu̍. Tē ā dīī ndu̍ pɛ̍, mī pālɛ̍i̍ hīōū i̍ ya̍a̍, ō mīīŋgu̍ yōōmū.”

³²Kɛ̍ nda̍ a̍a̍ si̍nā nyɛ᷅ ndu̍ o̍o̍ di̍mi̍ ko̍ŋ ndo̍ pɛ̄ŋgu̍ le̍. Kɛ̍ sīōōŋnde̍ wa̍ nda̍ le̍ ndu̍ nyūnāa̍ a̍ ndi̍ o̍kɔ̄ɔ̄.

³³Ma̍ fūūlūū Kēpa̍a̍nīɔ̄m. Mɛ̄ɛ̍ o̍ wa̍ chīɛ̄ī ni̍ŋ, mbo̍ nyūnā nda̍ āā, “O̍ yɛ̄ɛ̍nɛ̍ cho̍o̍ nya̍ wa̍ yɛ̄ dīōmnda̍ŋ hīŋa᷅ŋndo̍ o̍ nɛ̄ī?”

³⁴Kɛ̍ ā sūu̍ le̍, kāni̍ fo̍ndōle̍, o̍ hūnɔ̄ɔ̄ ndāa̍ ni᷄ŋ ā wa̍ dīōmnda̍ŋ hīŋa᷅ŋndo̍ le̍ wāna̍ wa᷅ wa̍nā bɛ̍ndōo̍ nda̍ tɛ̄ɛ̄ŋ ndo̍.

³⁵Mɛ̄ɛ̍ Chi̍i̍sū cha̍l, mbo̍ vēēlū bu̍ɛ̍i̍yāā tɔ̍ a̍ ā ŋīɔ̍ɔ̍ŋnda̍. Mbo̍ dīmūl nda̍ āā, “Nūm o̍ nu᷄m ye̍e̍ma̍ le̍ wāa̍ wāna̍ tāso̍o̍ pɛ̍, mɛ̄ɛ̍ mā wa̍ wānā mɛ̍ɛ̍lāa̍ kpɔ̍ŋ, ndu̍yɛ̍, mɛ̄ɛ̍ mā wa̍ bu̍ɛ̍īyo̍ le̍ wāŋnda̍ kpo̍u̍.”

³⁶Mi̍ Chi̍i̍sū chu̍ā chūāāmbɔ̄ pɔ̄mbɔ̄ɔ̍, mbo̍ sīmī ndu̍ nda̍ tɛ̄ɛ̄ŋ. Mɛ̄ɛ̍ o̍ chu̍a̍ ndu̍ o̍ bāla̍ŋ chōo̍, mbo̍ dīmūl nda̍ a̍a̍,

³⁷“Wānā o̍ wāna̍ chɛ̍l chūāāmbɔ̄ wāā nu̍a̍ā le̍ mɛ̄ɛ̍ ŋ̄ cho̍ bu̍ɛ̍ī nī yɛ̍ pɛ̍, mɛ̄ɛ̍ ya̍ ŋ̄ chɛ᷄l ko̍ŋ ni̍. Ndu̍yɛ̍, wānā o̍ wāna̍ chɛ̍l la̍ pɛ̍, mɛ̄ɛ̍ ō cho̍ ya̍ le̍ ŋ̄ chɛ᷄l te̍, mɛ̄ɛ̍ wāna̍ ve᷅m ya̍ wo̍, ndu̍ ŋ̄ chɛ᷄l ko̍ŋ ni̍.”

³⁸Mi̍ Chɔ᷄ŋ di̍mūl ndu̍ āā, “Ti̍chā, ŋ̄ chē pōo̍, dīōlā nūmnda̍ŋ pīɔ̄lɔ̄ɔ̍ o̍ nyi̍nāā wɔ̄ɔ̍ŋnda̍ tōūwɔ̄ɔ̍ ni᷄ŋ. Ndu̍yɛ̍, mi̍ ŋ̄ kūūnā ndu̍, kāni̍ fo̍ndōle̍, ō cho̍ wa̍nā na̍a̍ le̍.”

³⁹Mi̍ Chi̍i̍sū di̍mī āā, “Lā ku̍u̍nā ndu̍ le̍. Wānā o̍ wāna̍ pɛ᷅l dīōlā nīla̍ŋ mbō tōsa̍ ka̍a̍ma̍a̍ pɛ̍, wānā ko̍ŋ ō nɔ̍lā mbō dīmu̍l la̍ dīōm wɔ̄ɔ̍ŋ o̍ kōŋ kɔ̍ɔ̍lī lē.

⁴⁰Wānā o̍ wāna̍ tu̍l na̍a̍ lēyɛ̄ le̍, mɛ̄ɛ̍ ō chō kūmbū nāa̍.

⁴¹Mī di̍mu̍l nya̍, wānā o̍ wāna̍ ke̍ nya̍ mɛ̄ŋmā tāāla᷄ŋ le̍ kōlɔ̄ɔ̍ le̍ mɛ̄ɛ̍ nya̍ chō le̍ ya̍ yɛ̍ pɛ̍, wānā ko̍ŋ, Mɛ̄lɛ̄ka̍ chō ndu̍ hūnɔ̄ɔ̄ fāndāa̍ kē.”

⁴²Mi̍ Chi̍i̍sū hi̍a̍ū lāchī a̍ sūɛ̍i̍ āā, “Wānā o̍ wānā yɔ̍ŋi̍ nūm o̍o̍ to̍sa̍ mī ā pɔ̄mbūa̍a̍ la̍a̍la̍ŋ ha̍ā a̍ ya̍ wa̍, mī ō pīlɛ̍ bɛ̍ɛ̍ ma̍l lāāla᷄ŋ ndɔ̄ ko̍ŋ yɛ̍, ō bɛ̄ndā bɛ̍ɛ̍ mā bāa̍ nu̍m pōū bɛ̄ndōo̍ o̍ lābo̍lō mā ma᷄l nu̍m o̍ mɛ̄ŋmā yīŋgi̍lɛ̍i̍ya̍ŋ ni᷄ŋ.

⁴³Tē bā nūmndo̍ wa̍ tōsāa̍ pɛ̍ mā tōsā yɔ᷅ŋ wɔ̄ɔ̍ŋndo̍, mɛ̄ɛ̍ ki̍o̍lu̍ ndu̍. Ō bɛ̄ndā mā nɔ̄ bāa̍ ō pīlɛ̍, kɛ̍ ndu̍yɛ̍ mā sɔ̍la̍ yōōmū kpe̍e̍kpe̍i̍yo̍. Ndu̍ hi̍a̍ū na̍ŋɔ̄ɔ̄ a̍ bāla̍ŋ nɔ̄ɔ̍ lā tīɔ̍ɔ̍ŋ, kɛ̍ ndu̍yɛ̍ mā hu̍ŋ kɔ᷅ nāa̍ Mɛ̄lɛ̄ka̍ dūāū wa̍nāā wɔ̄ɔ̍ŋnda̍ wa̍, nāa̍ yīŋnde̍ŋ lē nyu᷅m kpo̍sōŋ te̍ wa̍. [

⁴⁴Lo̍ŋ ndu̍ dōndo̍po᷅llāa̍ di̍ā nda̍ wa̍ ā vi᷅ kpo̍so̍ŋ te̍. Ndu̍yɛ̍ yīŋnde̍ŋ lo̍ŋ le̍ nyu᷅m te̍.]

⁴⁵Tē pēlīī nūmnde̍ ī wa̍ tōsāa̍ pɛ̍ mā tōsā yɔ᷅ŋ wɔ̄ɔ̍ŋndo̍, mɛ̄ɛ̍ ki̍o̍lu̍ ndi̍. Ō bɛ̄ndā mā nɔ̄ pēlēi̍ ī pīlɛ̍, kɛ̍ ndu̍yɛ̍ mā sɔ̍la̍ yōōmū kpe̍e̍kpe̍i̍yo̍. Ndu̍ hi̍a̍ū na̍ŋɔ̄ɔ̄ a̍ pēlo᷄ŋ nɔ̄ɔ̍ ŋ̄ mūu̍ŋ, kɛ̍ ndu̍yɛ̍ mā hu᷄ŋ vi̍o̍ū nu̍m nāa̍ Mɛ̄lɛ̄ka̍ dūāū wa̍nāā wɔ̄ɔ̍ŋnda̍ wa̍. [

⁴⁶Lo̍ŋ ndu̍ dōndo̍po᷅llāa̍ di̍ā nda̍ wa̍ ā vi᷅ kpo̍so̍ŋ te̍. Ndu̍yɛ̍ yīŋnde̍ŋ lo̍ŋ le̍ nyu᷅m te̍.]

⁴⁷Ndu̍yɛ̍ tē hɔ̄ltē nūmnde̍ŋ lē wa̍ tōsāa̍ pɛ̍ mā tōsā yɔ᷅ŋ wɔ̄ɔ̍ŋndo̍, mɛ̄ɛ̍ ka̍la̍ le̍ŋ. Ō bɛ̄ndā mā nɔ̄ hɔ̄lte̍ŋ lē pīlɛ̍, kɛ̍ ndu̍yɛ̍ mā lūɛ̄ī o̍ māsāle̍ Mɛ̄lɛ̄ka̍le̍ŋ ni᷄ŋ. Ndu̍ hi̍a̍ū na̍ŋɔ̄ɔ̄ a̍ hɔ̄lta̍ŋ nɔ̄ɔ̍ lā tīɔ̍ɔ̍ŋ fa̍ū, kɛ̍ ndu̍yɛ̍ mā hu᷄ŋ vi̍o̍ū nu̍m nāa̍ Mɛ̄lɛ̄ka̍ dūāū wa̍nāā wɔ̄ɔ̍ŋnda̍ wa̍.

⁴⁸Lo̍ŋ ndu̍ dōndo̍po᷅llāa̍ di̍ā nda̍ wa̍ ā vi᷅ kpo̍so̍ŋ te̍. Ndu̍yɛ̍ yīŋnde̍ŋ lo̍ŋ le̍ nyu᷅m te̍.

⁴⁹“Wānā o̍ wānā cho̍ wā ō lūāālūāā a̍ yīŋnde̍ŋ, mɛ̄ɛ̍ hɛ᷄lle̍ ī lūāālūāā nu̍a̍ā o̍ pāūwo̍ ni᷄ŋ yɛ̍.

⁵⁰“Hɛ᷄lle̍ ī yēēla̍. Kɛ̍ tē yēēlāa̍ fūla̍ŋ o̍ hɛ᷄lle̍ ni᷄ŋ pɛ̍, wānā nɔ̍lā lɛ̍ ndi̍ mīŋgī yēēla̍ le̍. “Lā nɔ̍ hɛ̍lle̍ o̍ nya̍ pi̍la̍ ni᷄ŋ, mī lā nɔ̄ kɔ̄l nyūlōo̍ nya̍ pi̍la̍ tɛ̄ɛ̄ŋ.”