Read Southern Kisi Lu̍kū 1 Bible Online

Lu̍kū 1 - Southern Kisi bible

Lu̍kū 1

¹Ya̍ Lu̍kū cho̍ yāu̍wo̍ ho̍ō pōōnyīa̍a̍ nāa̍ nūm wānā bɛ̍ndōo̍ Tīōōfi̍lɔ̄ɔ̄ chu̍a̍ ni̍. Sɔ̄ɔ̍ŋ fa̍ŋgā fa̍ŋgāŋ Mɛ̄lɛ̄ka̍ tōsa̍ mu᷅ŋ na̍a̍ tɛ̄ɛ̄ŋ ndo̍ŋ, a̍ mu̍ŋ o̍kɔ̄ɔ̄ ya̍ cho̍ pōōnyīa̍a̍ ni̍. Wānāa̍ wa̍ o̍ hɔ̄lndɔ̄ ma̍ chā sɔ̄ɔ̍ŋ mu᷅ŋ o̍ yɔ̄nɔ᷄ŋndo̍ wa̍ nda̍ chɔ̍m na̍a̍ a̍ mu̍ŋ o̍kɔ̄ɔ̄ ni̍.

²Nūm pi̍la̍ si̍nā māā chɔ̍ŋ a̍ bōōndi̍i̍ ke̍ŋ, mi̍ wānāā ka̍ ka̍ ki̍ndī ma̍ pōōnyīāā a̍ sɔ̄ɔ̍ŋ mu᷅ŋ o̍kɔ̄ɔ̄. Wānāā tāsi̍a̍a̍ wa̍ o̍ hɔ̄lndɔ̄ wa̍ nyɛ̄ nda̍ dīmu̍l na̍a̍ wo̍, ndu̍ wāŋnda̍ ha̍ā pōōnyi̍a̍a̍ ni̍.

³Chɔ̍ŋ o̍ kāndɔ᷄ŋndo̍ ya̍ bɛ̍ɛ̍ mi̍ nyu̍u̍ni̍a̍a̍ fɛ̍sɛ̄ fɛ̍sɛ̄ a̍ nyɛ̄ o̍ nyɛ̍ yɔ̍nu̍ŋ o̍kɔ̄ɔ̄. Le̍la̍ŋ, mi̍ yi̍ya᷄ŋ māā ō chō ī kɛ̄ndɛ̄ mī po̍o̍nyi̍a̍l nu̍m nyɛ̄ kɛ̄ndɛ̍ī a̍ mɛ̄ɛ̍ nyɛ̄ o̍ nyɛ̄ yɔ̄nu̍ŋ yɛ̍.

⁴I̍ cho̍ he̍ī tōsāa̍ le̍ mā chɔ̍ɔ̍lu̍ si̍na̍ wa̍la̍ŋ a̍ nyɛ̄ nda̍ chɔ᷄m nu̍m ndo̍ o̍kɔ̄ɔ̄.

⁵Fāl pīlɛ̍ wa̍ ni̍, dīōla̍ŋ āā, Sɛ̄kāla̍yā. Wānā so̍līāā lāsa̍lāa̍ o̍ wa̍ ni̍, mā vēēlū ku̍ndā o̍ fu̍la̍ ni᷄ŋ ndo̍ āā, Ku̍nda̍ Ābi̍chāwo̍. Bōōndi̍i̍ ke̍ŋ Māsāa̍ Hɛ̍lɔ̄ɔ̄ ndu̍ wa̍ lɛ̄ŋndē Chūdi̍a̍āle̍ŋ bōlle̍ŋ ni̍. La̍nɔ̍ɔ̍ fāllo̍ Sɛ̄kāla̍yā dīōlā ndɔ̄la̍ŋ la̍ wa̍ ni̍ āā, Li̍sa̍bɛ̄ɛ̄. Ndu̍ bɛ̍ɛ̍ o̍ pūlāle̍ wānāā sōlīāā lāsa̍lāa̍ chōo̍ ndu̍ o̍o̍ fu̍la̍ ni̍.

⁶Nda̍ ŋi̍ɔ̍ɔ̍ŋ nda̍ a̍a̍ chu̍ā sa̍wāla̍ Māsānɔ̄ɔ̍ Mɛ̄lɛ̄ka̍la̍ŋ sa̍kpo̍ mɛ̄ɛ̍ la̍ cho̍ fa̍ū.

⁷Kɛ̍ ndu̍yɛ̍, nda̍ a̍a̍ nɔ̍ ŋ̍chu̍a̍u̍ le̍, kāni̍ fo̍ndōle̍, Li̍sa̍bɛ̄ɛ̄ ndu̍ o̍o̍ vi̍lū le̍. Ndu̍yɛ̍ vɛ̍lɛ̄, nda̍ ŋi̍ɔ̍ɔ̍ŋ nda̍ a̍a̍ yu̍wa̍ ni᷅ŋ ta̍u̍.

⁸Te̍le̍ŋ pi᷅lɛ̍, ku̍nda̍ Sɛ̄kāla̍yā wo̍ ndu̍ o̍o̍ nɔ̍ le̍ wa̍llo̍ tōsāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ ni̍. O̍ ko̍ŋ, mi̍ Sɛ̄kāla̍yā ku̍ā wa̍llo̍.

⁹Le̍ sīnāa̍ wāna̍ ku̍ā o̍ chīɛ̍i̍ Māsānɔ̄ɔ̍ Mɛ̄lɛ̄ka̍a̍ ni᷄ŋ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ māā sa̍lā wo̍, kōo̍ŋ wānāā sōlīāā lāsa̍lāa̍ nda̍ a̍a̍ wu̍ū ni̍. Mɛ̄ɛ̍ nda̍ wūu̍ kōo̍ŋ, mi̍ ŋ̄ chɔ̄m māā Sɛ̄kāla̍yā ndu̍ o̍o̍ nɔ̍ le̍ sa̍lā kōŋ lōmɔ̄ɔ̍ bōōndi̍i̍ ke̍ŋ ni̍.

¹⁰Bōōndi̍i̍ Sɛ̄kāla̍yā ku̍ɛ̄ sa̍lā kōŋ lōmɔ̄ɔ̍ o̍ chīɛ̍i̍ Mɛ̄lɛ̄ka̍a̍ ni᷄ŋ nde̍, mi̍ fāŋga̍ chu̍u̍ŋgi̍āŋ le̍ Mɛ̄lɛ̄ka̍ pīɛ̄īyo̍ wo̍ nda̍ lō pīɛ̄īle̍ŋ o̍ bɛ̍ɛ̄ chīɛ̍i̍ Mɛ̄lɛ̄ka̍a̍.

¹¹Wāa̍ sa̍lāa̍ lōmɔ̄ɔ̍, mi̍ ki̍i̍la̍nɔ̍ Māsānɔ̄ɔ̍ Mɛ̄lɛ̄ka̍a̍ chɔ̄mnu᷄ŋ Sɛ̄kāla̍yā o̍ lē pīlɛ̍ ni᷄ŋ kpe̍. Ō wa̍ īsīsi̍ o̍ bā kɛ̄ndɔ̄ɔ̍ chōo̍ o̍ ma̍āŋ nda̍ lūām sa̍lā nyɛ̄m chūŋ kɛ̄ndɔ᷄ŋ ndo̍ īkɛ̄i̍.

¹²Mɛ̄ɛ̍ Sɛ̄kāla̍yā che᷅ ndu̍ īsīsi̍, mbo̍ wōōlū. Mi̍ sīōōŋnde̍ bīī ndu̍ ta̍u̍.

¹³Kɛ̍, mi̍ ki̍i̍la̍nɔ̍ Mɛ̄lɛ̄ka̍a̍ dīmūl ndu̍ āā, “Yɔ᷅ŋ īsīōōŋ te̍, Sɛ̄kāla̍yā. Mɛ̄lɛ̄ka̍ mūli̍ pīɛ̄īlē nūmnde̍ŋ. Li̍sa̍bɛ̄ɛ̄ la̍a̍ nu̍m chō nu̍m pōo̍ vīlūl. Ndu̍yɛ̍, mā ke̍ ndu̍ dīōla̍ŋ āā Chɔ᷄ŋ.

¹⁴Ā chō hūnɔ̄ɔ̄ kɔ̄l nāŋɔ̄ɔ̄ ta̍u̍. Vīōlɔ᷄ŋ ndɔ̄ɔ̍ tōsā ni̍ŋ, mī wānāā ka̍ ka̍ a̍ na̍ŋ kɔ̄l.

¹⁵Kāni̍, ō wā ni̍ŋ wa̍nā bɛ̍ndū o̍ Māsānɔ̄ɔ̍ Mɛ̄lɛ̄ka̍ lo̍. Ō nɔ̍ mbō ko᷄l māmūɛ̄ī kɛ̄lɛ̄ŋgāā kōlɔ̄ɔ̄ kālā ka̍lā le̍. Ndu̍yɛ̍, chɔ̄nɔ᷄ŋndo̍ a̍ vīōlɔ᷄ŋ ndɔ̄ɔ̍, Nyi̍na̍ Mɛ̄lɛ̄ka̍a̍ chō wā ndu̍ kɔ̄ɔ̄lī ta̍u̍.

¹⁶Ō tōsā ni̍ŋ mī wāŋnda̍ I̍sɔ̄lūɛ̄ī ā ka̍ ka̍ mi̍i̍ŋgu̍ nāa̍ Māsānɔ̄ɔ̍ Mɛ̄lɛ̄ka̍ ndāa̍ chūā.

¹⁷Mɛ̄ɛ̍ Nyi̍na̍ Mɛ̄lɛ̄ka̍a̍ wa̍ Īla̍a̍chā kɔ̄ɔ̄lī, ndu̍yɛ̍, mbo̍ nɔ̄ kpāāyāa̍ yɛ̍, le̍nde̍ o̍ hi̍a̍ū ni̍ŋ Ma̍sānɔ̄ɔ̍ Mɛ̄lɛ̄ka̍ lāchī a̍ Nyi̍na̍ Mɛ̄lɛ̄ka̍a̍ a̍ kpāāyāa̍ ni̍. Ō tōsā ni̍ŋ mī fi̍nyāa̍ mūli̍ kɔ̄lta̍ŋ o̍ chūāūwāā ndāa̍ lo̍. Ō tōsa̍ ni̍ŋ mī wānāā lānīa̍a̍ sɔ̄la̍ tāāsi̍o̍o̍ mɛ̄ɛ̍ wānāā sa̍kpūa̍a̍ chō yɛ̍. Ndu̍yɛ̍, ō tōsā ni̍ŋ mī wāŋnda̍ bɛ̄ɛ̄ndi̍a̍ŋ le̍ Māsānɔ̄ɔ̍ Mɛ̄lɛ̄ka̍.”

¹⁸Mi̍ Sɛ̄kāla̍yā nyu̍nā ki̍i̍la̍nɔ̍ Mɛ̄lɛ̄ka̍a̍ āā, “Yɛ̄ɛ̍nɛ̍ chɔ᷅m yɛ̍ ya̍ māā nyɛ̄ ŋ̄ dīmi̍ wo̍ chō yɔ̄nɔ᷄ŋ? Kāni̍, wānā yu̍vɛ̍i̍yo̍ ya̍ cho̍ ni̍, ndu̍yɛ̍, la̍a̍ nūu̍ bɛ̍ɛ̍, ō chō ni᷅ŋ ō yūvɛ̍i̍.”

¹⁹Mi̍ ki̍i̍la̍nɔ̍ Mɛ̄lɛ̄ka̍a̍ mūlī āā, “Dīōlā nīla̍ŋ āā, Ke̍e̍bīlɛ̄. Bu̍ɛ̍i̍ Mɛ̄lɛ̄ka̍a̍ ya̍ cho̍ ni̍. Ndu̍yɛ̍, ndu̍ ve᷅m ya̍ le̍ mī so̍ō nāa̍ nūm chu̍a̍ ni̍ le̍ mī di̍mu̍l nu̍m yōōŋgū kɛ̄ndɔ̄ɔ̍ ho̍ō.

²⁰Tē bōōndi̍i̍ kpe̍e̍kpe̍i̍ sɔ̄ɔ̍ŋ mu᷅ŋ ŋ̄ nɔ̄ le̍ yɔ̄nɔ᷄ŋndo̍ ve̍ ī fūūlu̍u̍ pɛ̍, mɛ̄ɛ̍ mī ŋ̄ yɔ̄nu̍ŋ. Kɛ̍ ndu̍yɛ̍, kɛ̍si̍ŋ o̍ kɔ̄l, māā chɔ̍ŋ a̍ bōōnde̍i̍ he̍ī ha̍a̍a̍ mbō fūūlu̍u̍ a̍ pāa̍le̍ sūɛ̍i̍ he̍ī chō yɔ̄nɔ᷄ŋ nde̍ŋ ā chō sōndō kūmbɔ̄ɔ̄ a̍ nɔ̍lā ni̍ŋ mā sōō le̍. Kāni̍ fo̍ndōle̍, le̍ mɛ̄ɛ̍ ŋ̄ lāāla̍ŋ a̍ di̍ōmndā yā di̍mu̍l nu̍m nda̍ŋ te̍ yɛ̍.”

²¹A̍ bōōndi̍i̍ ke̍ŋ wāŋnda̍ wa̍ Sɛ̄kāla̍yā chūmndo̍. Ndu̍yɛ̍, ma̍ wā kɔ̄llo̍ kēēlīa̍a̍ āā, “Vɛ᷅ mbo̍ wā vīōūwɔ̄ɔ̄ bɛ̄ndōo̍ ho̍ō o̍ chīɛ̍i̍ Mɛ̄lɛ̄ka̍a̍ ni᷄ŋ?”

²²O̍ ko̍ŋ kɔ̍ɔ̍lī, mɛ̄ɛ̍ o̍ fu̍la̍, ndu̍ o̍o̍ nɔ̍lā su̍ɛ̍i̍ nāa̍ nda̍ chūā le̍. Ma̍ sīnā māā yi̍lāŋndo̍ o̍ che᷅ o̍ chīɛ̍i̍ Mɛ̄lɛ̄ka̍a̍ ni᷄ŋ ni̍. Tūūlīa̍a̍ ko̍ni̍ o̍ wa̍ sɔ̄ɔ̍ŋ a̍ lābā nāa̍ nda̍ chūā ni̍. Mbo̍ yɔ̄nu᷄ŋ māā bo̍bo̍nɔ̍. Ndu̍ o̍o̍ nɔ̍lā su̍ɛ̍i̍ le̍.

²³Mɛ̄ɛ̍ pālɛ̍i̍ Sɛ̄kāla̍yā ndu̍ o̍o̍ nɔ̍ le̍ wa̍llo̍ tōsāa̍ o̍ chīɛ̍i̍ Mɛ̄lɛ̄ka̍a̍ ni᷄ŋ nde̍ i̍ chūū, mbo̍ mīīŋgū o̍ chīɛ̄ī ndɔ̄ɔ̍.

²⁴O̍ ko̍ŋ kɔ̍ɔ̍lī, mi̍ Li̍sa̍bɛ̄ɛ̄ la̍a̍ ndɔ̄ chu̍ā yo᷄llo̍. Ndu̍yɛ̍, le̍ pāŋgo̍ŋ ŋ̄ ŋūɛ̍ɛ̍nu̍ ō chō o̍ ndu̍ lo̍ chi̍ɛ̍ī ni̍ŋ, ō ku̍ē ba᷅ o̍ bā le̍.

²⁵Mɛ̄ɛ̍ Li̍sa̍bɛ̄ɛ̄ chu̍a̍ yo᷄llo̍, mbo̍ di̍mī āā, “Māsānɔ̄ɔ̍ Mɛ̄lɛ̄ka̍, ndu̍ to̍sa̍l la̍ he̍ī ni̍. Ō yīya̍ŋ ya̍ chōo̍, mbo̍ sōlī ya̍ o̍ si̍ɔ̍mbu̍la̍ŋ nda᷅ŋ ni᷄ŋ wa᷅ŋnda̍ tɛ̄ɛ̄ŋ.”

²⁶Li̍sa̍bɛ̄ɛ̄ ndu̍ o̍o̍ chu̍a̍ ni᷅ŋ pāŋgo̍ŋ ŋ̄ ŋɔ᷄mpu᷅m a̍ yo᷄llo̍. A̍ bōōndi̍i̍ ke̍ŋ mi̍ Mɛ̄lɛ̄ka̍ vīām Ke̍e̍bīlɛ̄ ki̍i̍la̍nɔ̍ ndɔ̄, Na̍a̍sa̍lūɛ̄ī chi̍e̍e̍ o̍ būŋgɛ̄ī Kāli̍līve̍ ni᷄ŋ.

²⁷Mbo̍ kūā nāa̍ yūfu̍a̍a̍nɔ̍ pi᷅lɛ̍ chūā, dīōla̍ŋ āā, Mēēle̍. Ndu̍yɛ̍, chūa̍a̍ ho̍ō wa̍ ni᷅ŋ ō dūāūwāā fu̍lu̍ le̍ mā cha᷄l nda̍ po̍ pi᷅lɛ̍ dīōla̍ŋ Chōo̍sɛ̍. Pōo̍ ho̍ō yɛ̍ o̍ pūlāle̍ Māsāa̍ Dēēve̍le̍ŋ chōo̍ ndu̍ o̍o̍ fu̍la̍ ni̍.

²⁸Mi̍ ki̍i̍la̍nɔ̍ Mɛ̄lɛ̄ka̍a̍ ho̍ō lūɛ̄ī nāa̍ Mēēle̍ chu̍a̍. Mbo̍ yīl āā, “I̍sɛ̄.” Mbo̍ dīmūl ndu̍ āā, “Māsānɔ̄ɔ̍ Mɛ̄lɛ̄ka̍ chē nu̍m nyīnā. Ndu̍yɛ̍, ō chō nu̍m kɔ̄ɔ̄lī.”

²⁹Mɛ̄ɛ̍ Mēēle̍ tūēī nyɛ̄ ki̍i̍la̍nɔ̍ Mɛ̄lɛ̄ka̍a̍ dīmi̍ wo̍, mi̍ kɔ̄ndɔ̄fi̍llo̍ bīī ndu̍ ta̍u̍. Mbo̍ sāā kɔ̄llo̍ kēēlāa̍ āā, “Dīōmndā māāvɛ̄ɛ̍ la̍ cho̍ yɛ̄ la᷅ŋ?”

³⁰Mi̍ ki̍i̍la̍nɔ̍ Mɛ̄lɛ̄ka̍a̍ lō o̍ ko̍ŋ mbo̍ dīmūl ndu̍ āā, “Yɔ᷅ŋ īsīōōŋ te̍ Mēēle̍, kāni̍ fo̍ndōle̍, Mɛ̄lɛ̄ka̍ chē nu̍m nyīnā.

³¹Ā chō yo᷄llo̍ chūā mā vēlū pōo̍, ndu̍yɛ̍, mā ke̍ ndu̍ dīōla̍ŋ āā, Chi̍i̍sū.

³²Ō wā ni̍ŋ wa̍nā bɛ̍ndū, ndu̍yɛ̍, ā vēēlū ndu̍ ni̍ŋ āā, Mɛ̄lɛ̄ka̍ Bɛ̄ndōo̍, Po̍ ndɔ̄ɔ̍. Māsānɔ̄ɔ̍ Mɛ̄lɛ̄ka̍ chō tōsā mbō wa̍ māsāa̍ o̍ fōōfo̍ Dēēve̍ fi̍nyā ndɔ̄ ma̍māa̍ chōo̍.

³³Ō wā ni̍ŋ ma̍sā bɛ̍ndōo̍ wāŋnda̍ I̍sɔ̄lūɛ̄ī cho̍o̍ le̍ fɛ̍ɛ̍ŋ a̍ fɛ̍ɛ̍ŋ. Ndu̍yɛ̍, māsāle̍ ndɔ̄le̍ŋ lē nɔ᷅ ni̍ŋ la̍mɛ̍ɛ̍lu̍ le̍.”

³⁴Mi̍ Mēēle̍ nyu̍nā ki̍i̍la̍nɔ̍ Mɛ̄lɛ̄ka̍a̍ āā, “Vɛ̄ɛ̍nɛ̍ he̍ī nɔ̄lā yɛ̍ mī ī yɔ̄nu̍ŋ, I̍ si̍nā yɛ̍ sūɛ̍i̍ wānā pɔ̍nɔ̍ le̍?”

³⁵Mi̍ ki̍i̍la̍nɔ̍ Mɛ̄lɛ̄ka̍a̍ mūlūl ndu̍ āā, “Wa̍li̍ Mɛ̄lɛ̄ka̍a̍ cho̍ ko̍ŋ ni̍. Nyi̍na̍ Mɛ̄lɛ̄ka̍a̍ chō nu̍m tōlɔ̄ɔ̄ kɔ̄ɔ̄lī, ndu̍yɛ̍, Mɛ̄lɛ̄ka̍ Bɛ̄ndōo̍, kpāāya̍ ndɔ̄ɔ̍ chō nu̍m wā chōo̍. Le̍ sa̍bū kōŋ, chɛ̄lɛ̄kpɛ̍ ŋ̄ chō vīōlɔ̄ɔ̄ wo̍ ā vēēlū ndu̍ ni̍ŋ āā, Po̍ Mɛ̄lɛ̄ka̍a̍.

³⁶Ndu̍yɛ̍, si̍na̍ pɛ̍ŋgu̍ māā wānāyɛ̍ī nūmnde̍ Li̍sa̍bɛ̄ɛ̄, ō nda̍ a̍a̍ dīmi̍ māā ō vi̍lū le̍ wo̍ ō chō bɛ̍ɛ̍ o̍ yu̍vɛ̍i̍ ni̍, kɛ̍, ō chō a̍ yo᷄llo̍. Ndu̍yɛ̍, wānā pɔ̍nɔ̍ɔ̍ cho̍ ndu̍ o̍ dēmbē ni̍. Ō chō ni᷅ŋ bɛ̍ɛ̍ pa̍ŋgo̍ŋ ŋ̄ ŋɔ᷄mpu᷅m.

³⁷Nyɛ̄ o̍ nyɛ̄ cho̍ mī Mɛ̄lɛ̄ka̍ būmba̍ tōsā le̍.”

³⁸Mi̍ Mēēle̍ di̍mī āā, “Bu̍ɛ̍i̍ Māsānɔ̄ɔ̍ Mɛ̄lɛ̄ka̍a̍ ya̍ cho̍ ni̍. Ī yɔ̄nu̍ŋ mɛ̄ɛ̍ ŋ̄ dīmi̍ yɛ̍ fɔ̍.” O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ kūānu᷄ŋ.

³⁹O̍ ko̍ŋ kɔ̍ɔ̍lī, mi̍ Mēēle̍ bɛ̍ɛ̍ndīa̍ŋ mbo̍ bīī nɛ̄īyo̍ chɔ̍ chɔ̍ le̍ kɔ̄la̍ŋ o̍ chi̍e̍e̍ pi᷅lɛ̍ o̍ lɛ̄ŋndē īpēmbūle̍ŋ. Lɛ̄ŋndē lēŋ dīōla̍ŋ āā, Chūdi̍a̍ā.

⁴⁰Mɛ̄ɛ̍ o̍ fu̍u̍lu̍u̍ mbo̍ lūɛ̄ī o̍ Sɛ̄kāla̍yā lo̍ chi̍ɛ̍ī ni̍ŋ. Mbo̍ yīl Li̍sa̍bɛ̄ɛ̄.

⁴¹Mɛ̄ɛ̍ yīlɔ̄ɔ̄ Mēēle̍ yi᷄llo̍ de᷄l Li̍sa̍bɛ̄ɛ̄ o̍ lānī, mi̍ chɛ̄lɛ̄kpɔ̍ɔ̍ ndu̍ ni᷄ŋ o̍ kpe̍e̍ŋīa̍ŋ. Ndu̍yɛ̍, mi̍ Nyi̍nā Mɛ̄lɛ̄ka̍a̍ tūāl Li̍sa̍bɛ̄ɛ̄ kɔ̄ɔ̄lī.

⁴²Mbo̍ dīmī chōo̍ cho̍o̍ āā, “Mɛ̄lɛ̄ka̍ dɔ̄ū nūm Mēēle̍ sa̍lā mbo̍ hīāū wāŋ lāāndūa̍a̍ kpo̍u̍. Sa̍lāa̍ chō chɛ̄lɛ̄kpɛ̍ ŋ̄ chō vīōlɔ̄ɔ̄ wo̍ chōo̍.

⁴³Ya̍ kɛ̍i̍ kālāa̍ Māsānɔ̍ɔ̍ Mɛ̄lɛ̄ka̍ nūu̍ kīālū kpa̍li̍ ni̍ mbō hīŋ ya̍ yīlɔ̄ɔ̍?

⁴⁴Kāni̍ fo̍ndōle̍, mɛ̄ɛ̍ ya̍ I̍ tu̍e̍ī yīlɔ̄ɔ̄ ŋ̄ yi᷄l lo̍, mi̍ chɛ̄lɛ̄kpɔ̍ɔ̍ kpēēŋīa̍ŋ ya̍ o̍ dēmbē a̍ kɔ̄l kɛ̄ndɔ̄ɔ̍.

⁴⁵Sa̍lāa̍ chō nu̍m chōo̍ nu᷄m la̍a̍la̍ŋ kpe̍e̍kpe̍i̍ māā dīōm Māsānɔ̄ɔ̍ Mɛ̄lɛ̄ka̍ dīmu̍l nu̍m ndo̍ chō yɔ̄nɔ᷄ŋ ndo̍.”

⁴⁶Mi̍ Mēēle̍ di̍mī āā, “I̍ sa̍ŋga̍la̍ Māsānɔ̄ɔ̍ Mɛ̄lɛ̄ka̍ a̍ kɔ̄l nūu̍ kpo̍u̍.

⁴⁷Nyi̍nā nūu̍ na᷄ŋ kɔ̄l a̍ Mɛ̄lɛ̄ka̍ o̍ pi̍ŋī ya̍ wo̍.

⁴⁸Kāni̍ fo̍ndōle̍, ō lōōnu̍ŋ a̍ ya̍, bu̍ɛ̍ī ndɔ̄ pɔ̍mbu̍ɛ̍i̍ ni̍i̍ yo̍ ho̍ō. Chɔ̍ŋ a̍ bōōnde̍i̍ he̍ī ha̍a̍a̍, wāŋnda̍ kpe̍de̍ ā chō dīmī māā I̍ cho̍ wāna̍ Mɛ̄lɛ̄ka̍ dɔ̄ū sa̍lā.

⁴⁹Kāni̍ fo̍ndōle̍, Mɛ̄lɛ̄ka̍ nɔ̍ kpāāyāa̍ wo̍ ō tōsa̍l la̍ sūɛ̍i̍ bɛ̍ndū. Ō wo̍ū ba̍ o̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ ni᷄ŋ te̍.

⁵⁰Mbō tūīīnu̍ŋ wa̍nāa̍ wo̍ ndu̍ wa̍ īnyīɛ̍ɛ̍, wānāa̍ wa̍ pāāndū yōōmū wa̍ ni̍, a̍ wānāa̍ cho̍ yōōmū pɛ̄ŋgo̍o̍ ho̍ō wa̍, a̍ wānāa̍ cho̍ hūnɔ̄ɔ̄ wā yōōmū wa̍.

⁵¹Ō tōsa̍ wa̍lta̍ bɛ̍ndūla̍ŋ a̍ kpāāyā ndɔ̄ bɛ̍ndōo̍. Mbo̍ tōsā mi̍ wānāā yōŋgāa̍ a̍ yi̍ya̍ŋ o̍ kɔ̄ltā ndāla̍ŋ ni᷄ŋ māā ā chō ā bɛ̄ndū wa̍ ā sɔ̄ɔ̄ndīa̍ŋ.

⁵²Mbo̍ tūsī wānāā bɛ̄ndūa̍a̍ cho̍ o̍ kpe̍ŋgbe̍i̍la̍ lēmāsāla̍ŋ chōo̍ wa̍ lɛ̄ŋ. Mbo̍ hēēlū wānāa̍ cho̍ nyɛ᷅ o̍ nyɛ̄ le̍ wa̍ te̍mā.

⁵³Mbo̍ ke̍ wānāa̍ nɔ̍lā sɔ̍lā le̍ wa̍ nyɛ̄m kɛ̄ndɔ᷄ŋ ta̍u̍. Kɛ̍, mbo̍ tōsā mi̍ wānāā sūlāa̍ kūā bālā fo̍ndō.

⁵⁴Mbo̍ chūā būŋgɛ̄i̍ le̍ fi̍nyāā nāā ma̍māa̍ īnyīɛ̍ɛ̍ tūīīnɔ᷄ŋndo̍ le̍ fɛ̍ɛ̍ŋ a̍ fɛ̍ɛ̍ŋ, ko̍ŋ cho̍ ni̍, E̍bīlāha᷅m a̍ chūāūwāā ndūāā ma̍māa̍. Ō lōōnu̍ŋ bu̍ŋgɛ̄ī o̍ chu̍a̍ ve̍, mbo̍ mālā wāŋnda̍ I̍sɔ̄lūɛ̄ī, bu̍ɛ̍i̍yāā ndūa̍a̍.”

⁵⁵

⁵⁶Mi̍ Mēēle̍ chu̍ā pāŋgo̍ŋ ŋ̄ ŋgāa̍ nda̍ Li̍sa̍bɛ̄ɛ̄. O̍ ko̍ŋ kɔ̍ɔ̍lī, mbo̍ mīīŋgū o̍ ndu̍ lo̍.

⁵⁷Mɛ̄ɛ̍ te̍le̍ŋndo̍ fūūlu̍u̍ le̍ mī Li̍sa̍bɛ̄ɛ̄ ve̍lū, mbo̍ vīālū wānā pɔ̍nɔ̍ɔ̍.

⁵⁸Mi̍ wānāā nda̍ chīɛ̄ɛ̄li̍āŋ nda̍ a̍ wānāya᷅ŋ ndɔ᷄ŋ ā tūɛ̄ī māā Māsānɔ̄ɔ̍ Mɛ̄lɛ̄ka̍ tōsa̍l Li̍sa̍bɛ̄ɛ̄ kɛ̄ndɛ̄ī bɛ̍ndū. Ma̍ nāŋ kɔ̄l hɔ̄lāā tūlu̍ a̍ ndu̍.

⁵⁹Chɔ̍ŋ a̍ vīōlɔ᷄ŋ ndɔ̄ɔ̍ mɛ̄ɛ̍ chɛ̄lɛ̄kpɔ̍ɔ̍ wa̍ pālɛ̍i̍ ī ŋɔ̄ma̍a̍, ma̍ hūŋ le̍ ndu̍ hīvīo̍o̍ o̍ chīɛ̄ī kɔ̄ɔ̄lī. Ā wa̍ ndu̍ ni᷅ŋ le̍ dīōla̍ŋ kē āā, Sɛ̄kāla̍yā mɛ̄ɛ̍ fi̍nyā ndɔ̄ nɔ̍ dīōla̍ŋ yɛ̍.

⁶⁰Kɛ̍, mi̍ kāla̍ ndɔ̄ di̍mī āā, “Ŋ̄ nɔ̄ le̍ ndu̍ vēēlōo̍ āā, Chɔ᷄ŋ.”

⁶¹Kɛ̍, ma̍ dīmūl ndu̍ āā, “Wānā o̍ wānā cho̍ o̍ yu̍ŋgu̍ nya̍a̍ chōo̍ mbō nɔ̄ dīōlā lāŋ te̍.”

⁶²Ma̍ tūūlīāl fi̍nyā ndɔ̍ a̍ lābā le̍ mā sīna̍ dīōlā ndu̍ o̍o̍ hɛ̍na̍ŋ mā vēēlu̍ po̍ ndɔ̄ɔ̍ la̍ŋ.

⁶³Mbo̍ tūūlīāl nda̍ le̍ mā chūu̍ ndu̍ nyɛ̄ nda̍ pōōnyīāā le̍cho̍o̍ wo̍. Mɛ̄ɛ̍ nda̍ chūu̍ ndu̍, mbo̍ pōōnyīāā āā, “Dīōlā ndɔ̄la̍ŋ āā, Chɔ᷄ŋ.” Mi̍ kɔ̄ndɔ̄fi̍llo̍ bīī nda̍ kpe̍de̍.

⁶⁴Chīīyo̍ dīōla̍ŋ nda᷅ŋ dɔ̄wɔ̄ɔ̍ o̍ lē pīlɛ̍ ni᷄ŋ kpe̍, mi̍ dīɔ̄ɔ̄mūle̍ŋ lē yɔ̄nu᷄ŋ ndu̍ fe̍fe̍le̍. Mbo̍ chūā sōndōo̍ mbo̍ sūāā. Mbō sāŋgālā Mɛ̍lɛ̄ka̍.

⁶⁵Mi̍ kɔ̄ndɔ̄fi̍llo̍ bīī wānāā nda̍ chīɛ̄ɛ̄li̍āŋ nda̍. Mi̍ tɔ̍ɔ̍ tīū si̍lɔ̍ o̍ lɛ̄ŋndē īpēmbūle̍ŋ Chūdi̍a̍ā a̍ nyɛ̍ yɔ̍nu̍ŋ ndo̍.

⁶⁶Wānā o̍ wāna̍ tu̍e̍ī a̍ ndi̍ o̍kɔ̄ɔ̄ ma̍ kɛ̄si᷄ŋ ndi̍ o̍ kɔ̄l. Ma̍ dīmī āā, “Wāna̍ māā vɛ̄ɛ̍nɛ̍ pōo̍mbɔ̄ɔ̍ ho̍ō wā yɛ̍ ni̍ŋ?” Ā dīmi̍ he̍ī ka̍ni̍ fo̍ndōle̍, ba̍ Māsānɔ̍ɔ̍ Mɛ̄lɛ̄ka̍a̍ wa̍ ndu̍ chōo̍.

⁶⁷Mi̍ Nyi̍na̍ Mɛ̄lɛ̄ka̍a̍ tūāl Sɛ̄kāla̍yā kɔ̍ɔ̍lī, fi̍nyāa̍ Chɔ᷄ŋ. Mbo̍ dīmī yōōŋgu̍ Mɛ̄lɛ̄ka̍a̍ āā,

⁶⁸“I̍ sa̍ŋga̍la̍ Māsānɔ̄ɔ̍ Mɛ̄lɛ̄ka̍ wāŋnda̍ I̍sɔ̄lūɛ̄ī a̍ pi̍ɛ̍ī yo̍. Kāni̍ fo̍ndōle̍, ō hīŋ wānāā ndūa̍a̍ tɛ̄ɛ̄ŋ, ndu̍yɛ̍, mbo̍ bāŋā nda̍.

⁶⁹Ō yɔ̄ŋgu̍ wāna̍ kpāāyāa̍ o̍ pi̍ŋī na̍a̍ wo̍ fūlāa̍ o̍ pūlāle̍ Dēēve̍le̍ŋ chōo̍.

⁷⁰Sīndɛ̄ pa̍ Mɛ̄lɛ̄ka̍ dɔ̄ū sūɛ̍i̍ he̍ī wānāā ndūa̍a̍ su̍a̍ā le̍ ndu̍ wa̍ o̍ sōndō ni̍.

⁷¹Mbo̍ dīmī māā ō chō na̍a̍ sōlī ya̍a̍mɔ̍ɔ̍wa̍a̍ nāa̍ o̍ bā a̍ tu̍l na̍a̍ lēyɛ̄ wa̍ kpe̍de̍.

⁷²Mbo̍ dīmī māā ndu̍ Mɛ̍lɛ̄ka̍ ō chō fi̍nyāā nāā ma̍māa̍ īnyīɛ̍ɛ̍ tūīīnɔ᷄ŋ, ndu̍yɛ̍, mbo̍ lo̍o̍nūŋ a̍ kpe̍ma̍ o̍ yi̍i̍ nda̍ nda̍ā wo̍.

⁷³Mbo̍ chūā būŋgɛ̄i̍ mbo̍ mēnāla᷄ŋ E̍bīlāha᷅m, fi̍nyā nāā ma̍mā.

⁷⁴Būŋgɛ̄ī kēŋ ndi̍ cho̍ ni̍ māā ō chō na̍a̍ sōlī ya̍a̍mɔ̍ɔ̍wa̍a̍ nāa̍ o̍ bā le̍ mī ŋ̄ tōsa̍ wa̍llo̍ le̍ ndu̍ sīōōŋīī bɛ̍ɛ̍ ve᷅ na̍a̍ le̍.

⁷⁵Ŋ̄ chō wa̍llo̍ tōsā le̍ ndu̍ māā wānāa̍ cho̍ le̍ Mɛ̄lɛ̄ka̍ ndu̍ o̍ hɔ̄l sa̍kpō, ha̍a̍a̍ a̍ te̍le̍ŋ na̍a̍ ŋ̄ chō yōōmū wo̍.”

⁷⁶Mi̍ Sɛ̄kāla̍yā hi̍a̍ū lāchī a̍ sūɛ̍i̍ āā, “Nūm po̍ nūu̍, ā chō nu̍m vēēlū āā, wāna̍ su̍a̍ā le̍ Mɛ̄lɛ̄ka̍ bɛ̄ndōo̍ wo̍. Kāni̍ fo̍ndōle̍, ā chō lākɔ̄ Māsānɔ̄ɔ̍ Mɛ̄lɛ̄ka̍ lāchī le̍ nɛ̄īyo̍ tōōsīa̍a̍ le̍ ndu̍.

⁷⁷Ndu̍yɛ̍, ā chō tōsā mī wānāā ndūa̍a̍ sīna̍ māā Mɛ̄lɛ̄ka̍ chō nda̍ pīŋī. Pīŋīo̍o̍ nda̍ cho̍ ni̍, mbō ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

⁷⁸Mu᷅ŋ kpo̍u̍ ŋ̄ chō yɔ̄nɔ᷄ŋ, kāni̍ fo̍ndōle̍, Mɛ̄lɛ̄ka̍ nāa̍ chō Mɛ̄lɛ̄ka̍ īnyīɛ̍ɛ̍ bɛ̄ndū bɛ̍ndū. Ō chō tōsā mī nyɛ̄ wa̍wo̍ŋndo̍ chɛ᷄ŋ o̍ fo̍nda᷄ŋ Mɛ̄lɛ̄ka̍a̍ mbō dēndū na̍a̍ chōo̍ mɛ̄ɛ̍ yɛ̄ɛ̄ŋndē īdīi̍le̍ŋ lē fūlā nu̍a̍ā yɛ̍.

⁷⁹Ō chō nyɛ̄ wa̍wo̍ŋndo̍ yɔ̄ŋgu̍ le̍ wānāa̍ cho̍ o̍ nyūmnda̍ŋ ni᷄ŋ, ndu̍yɛ̍, mi̍ pīɔ̍mndo̍ wā nda̍ bɛ̄lū bɛ̄lūūwo̍ wa̍. Ndu̍yɛ̍, mbō chɔ᷄m na̍a̍ nɛ̄i̍ wānā ku̍ā le̍cho̍o̍ mā sɔ̍lā kɔ̄l nyūlōo̍ wo̍.”

⁸⁰O̍ ko̍ŋ kɔ̍ɔ̍lī, mi̍ pōo̍mbɔ̄ɔ̍ hīndū. Mbo̍ sīmnu᷄ŋ wa᷅na̍ dīāllūŋ kālā o̍ nyi̍nā ndɔ̄ɔ̍ ni᷄ŋ. Ō lo̍ o̍ po̍llo̍ ni᷄ŋ, ha̍a̍a̍ mbo̍ fūūlūū a̍ te̍le̍ŋ o̍ chɔ̍mnu̍ŋ wa᷅ŋnda̍ I̍sɔ̄lūɛ̄ī kpe̍nde̍ke̍le̍ wo̍.