Read Southern Kisi Lu̍kū 12 Bible Online

Lu̍kū 12 - Southern Kisi bible

Lu̍kū 12

¹A̍ bōōndi̍i̍ ke̍ŋ, mi̍ wāŋnda̍ chūūŋgi̍āŋ nāa̍ Chi̍i̍sū wa̍ wa̍. Ā wa̍ wāa̍la̍ŋ ta̍u̍ ta̍u̍. Ā wa̍ fāŋgā ha̍a̍a̍ dēli̍ de̍li̍āŋndo̍ chōo̍. Mi̍ Chi̍i̍sū ka̍ndū sūɛ̍i̍ nāa̍ bu̍ɛ̍i̍yāā ndūa̍a̍ chūā fɛ̍lɛ̍ŋ. Mbo̍ dīmūl nda̍ āā, “Lā mānda̍ŋ, yɔ̍ŋi̍ nya̍ sīmnu̍ŋ wa̍nāā sōndō yēēlɛ̍i̍ mɛ̄ɛ̍ ku̍ndā Fālīsi̍īya̍ chō yɛ̍. Mɛ̄ɛ̍ yi̍i̍sīi̍yo̍ tīū nu̍a̍ā o̍ bēe̍dīi̍yo̍ ni᷄ŋ yɛ̍, le̍nde̍ sōndō ndā ye̍e̍lɛ̍i̍yo̍ tīū wa᷅ŋnda̍ tɛ̄ɛ̄ŋ ni̍.

²Ndu̍yɛ̍, nyɛ̄ o̍ nyɛ̍ cho̍ ō kūmbāā ō pīlɛ̍ bɛ̍ɛ̍ cho̍ lo᷅ mbō kɛ̄ɛ̍ fūlā kpe̍nde̍ke̍le̍ le̍. Ndu̍yɛ̍, nyɛ̄ o̍ nyɛ̍ cho̍ ō vīāŋāā ō pīlɛ̍ bɛ̍ɛ̍ cho̍ lo᷅ mī wāŋnda̍ kɛ̄ɛ̍ sīnā a̍ ndu̍ o̍kɔ̄ɔ̄ le̍.

³Nyɛ̄ o̍ nyɛ̄ nya̍ dīmi̍ o̍ nyūmnda̍ŋ ni᷄ŋ, wāŋnda̍ chō ndu̍ tūēīyɔ̄ɔ̄ ī pāla̍ de᷅ŋ. Nyɛ̄ o̍ nyɛ̄ nya̍ dīmi̍ tōōlō a̍ dīōla̍ŋ lā kīīndīāā, ā chō ndu̍ hēēlū chōo̍ cho̍o̍ o̍ lu᷅ŋ.”

⁴Mi̍ Chi̍i̍sū hi̍a̍ū lāchī a̍ sūɛ̍i̍ āā, “Mi̍ di̍mu̍l nya̍ chāāŋāā nīa̍a̍, lā wo᷅ wānāa̍ nɔ̍lā mā dīī nya̍ chi̍e̍ēŋ na̍nu᷄ŋ, kɛ̍, o̍ ko̍ŋ kɔ̍ɔ̍lī, ā nɔ̍lā mā tōsa̍ lɛ̄ nyɛ̄ o̍ nyɛ̄ chēle̍ŋ a̍ nya̍ le̍ wa̍ le̍.

⁵Kɛ̍, I̍ chɔ᷅m ndɔ̍ nya̍ wāna̍ nya̍ wō wo̍. Lā wo̍ Mɛ̍lɛ̄ka̍ o̍ nɔ̍ ho̍ō kpāāyāa̍ tē ō dīī dīāllūŋ wāŋndo̍ pɛ̍, ō dɔ̄ū vɛ̄lɛ̄ ndu̍ o̍ fo̍ndāŋ nyɛ̄ pālāa̍ nāa̍ ndu̍ Mɛ̍lɛ̍ka̍ dūāū wa̍nāā yɔ̄ŋ wɔ̄ɔ̍ŋnda̍ wa̍. Mī di̍mu̍l nya̍, ndu̍ nya̍ wō ni̍.”

⁶Mbo̍ lō o̍ ko̍ŋ mbo̍ dīmūl nda̍ āā, “Ni᷄ŋnda̍ ā cho̍ yo̍u̍wāa̍ nɔ̍ ba̍ā le̍. Ka̍pāla̍ŋ lā tīɔ̍ɔ̍ŋ nda̍ pīsī a̍ ŋu̍ɛ̍ɛ̍nu̍ ni̍. Kɛ̍ ndu̍yɛ̍, ni᷄ŋndo̍ ō pīlɛ̍ bɛ̍ɛ̍ Mɛ̄lɛ̄ka̍ pu̍ɛ̍ɛ̍nūŋ a̍ ndu̍ o̍kɔ̄ɔ̄ le̍.

⁷Nya̍ nya̍, yīīŋīī yi̍īŋnde̍ nya̍ o̍ lēbōl bɛ̍ɛ̍, Mɛ̄lɛ̄ka̍ sīnā mɛ̄ɛ̍ i̍ cho̍ bōllē pīlɛ̍ yɛ̍. Lā yɔ᷅ŋ īsīōōŋ te̍. Kāni̍, wāŋndo̍ ō pīlɛ̍ bɛ̍ɛ̍ nya̍ tɛ̄ɛ̄ŋ ō hīōū a̍ ni᷄ŋnda̍, mɛ̄ɛ̍ o̍ mɛ̄ɛ̍ nda̍ wa̍ fa̍ŋgā.”

⁸Mi̍ Chi̍i̍sū di̍mī āā, “Ndu̍yɛ̍, I̍ di̍mūl lɔ̍ nya̍, wānā o̍ wāna̍ sɔ̍lɔ̍la̍ŋ pɛ̍ wa᷅ŋnda̍ o̍ hɔ̄l kpe̍nde̍ke̍le̍ māā le̍ ya̍ o̍ cho̍ ni̍, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chō hūnɔ̄ɔ̄ sɔ̄lɔ̄la᷄ŋ ki̍i̍la̍a̍ Mɛ̄lɛ̄ka̍a̍ o̍ hɔ̄l māā le̍ ndu̍ wānā ko̍ŋ chō ni̍.

⁹Kɛ̍ ndu̍yɛ̍, wāna̍ o̍ wāna̍ di̍mi̍ pɛ̍ wa᷅ŋnda̍ o̍ hɔ̄l kpe̍nde̍ke̍le̍ māā ō cho̍ wa᷅na̍ nī le̍, ya̍ bɛ̍ɛ̍ I̍ cho̍ dīmī ki̍i̍la̍a̍ Mɛ̄lɛ̄ka̍a̍ o̍ hɔ̄l māā ō cho̍ wa᷅na̍ nī le̍.

¹⁰“Wānā o̍ wāna̍ di̍mi̍ dīōm wɔ̄ɔ̍ŋ a̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ pɛ̍ ō sɔ̄lā ma̍lɔ̄ɔ̍ le̍ yɔ̄ŋ wɔ̄ɔ̍ŋ kōŋ. Kɛ̍, wānā o̍ wāna̍ di̍mi̍ dīōm wɔ̄ɔ̍ŋndo̍ a̍ Nyi̍na̍ Mɛ̄lɛ̄ka̍a̍ pɛ̍, ō sɔ̍lā ma̍lɔ̄ɔ̍ le̍.

¹¹“Tē ā kūɛ̄ a̍ nya̍ o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ pɛ̍ ɔ̄ɔ̄ wānāā bɛ̄ndūāā lēlɛ̄ŋnda̍ o̍ hɔ̄l, kɛ̄lɛ̄ŋgāā mā kūɛ̄ a̍ nya̍ le̍ mī wānāa̍ cho̍ lɛ̄ŋnde̍ bōlle̍ wa̍ ā kɔ̄ɔ̄sa̍ a̍ nya̍ pɛ̍, lā bu̍u̍la᷄ŋ le̍ nyɛ̄ nya̍ dīmī wo̍ le̍, kɛ̄lɛ̄ŋgāā le̍ mɛ̄ɛ̍ nya̍ kɔ̄ɔ̄sā le̍ mī lā fūla̍ lēni᷄ŋ yɛ̍ le̍.

¹²Kāni̍ fo̍ndōle̍, bōōndi̍i̍ ke̍ŋ ko̍ni̍ Nyi̍na̍ Mɛ̄lɛ̄ka̍a̍ chō dīōm nya̍ nɔ̄ le̍ dīmīo̍o̍ wo̍ dɔ̄wɔ̄ɔ̍ nya̍ o̍ sōndō ni̍.”

¹³Mi̍ wānā pi᷅lɛ̍ lō o̍ fāŋgāa̍ tɛ̄ɛ̄ŋ mbo̍ dīmī āā, “Ti̍chā, di̍mu̍l bɛ̍ nūu̍ mī ŋ̄ pīɔ̍u̍ nyɛ̄m ke᷅ŋ fi̍nyā nāa̍ mɛ̄i̍ yo̍ŋ na̍a̍ ndu̍.”

¹⁴Kɛ̍, mi̍ Chi̍i̍sū mu̍lūl ndu̍ āā, “Lāŋu̍nɔ̄ɔ̍, nɛ̄ɛ̍nɛ̍ hɛ̍li̍ yɛ̄ ya̍ le̍ wāa̍ wānā ki̍a̍lāā īyāma̍a̍ ɔ̄ɔ̄ le̍ wāa̍ wānā pi̍ɔ̍u̍wāā nyɛ̄m kɛ̍ nya̍ tɛ̄ɛ̄ŋ?”

¹⁵Mi̍ Chi̍i̍sū di̍mūl wāŋnda̍ āā, “Lā mānda̍ŋ, yɔ̍ŋi̍ yēēmɛ̍i̍ le̍ nyɛ̄m fāŋgā fa̍ŋga᷄ŋ ī hīo̍u̍ nya̍ o̍ kɔ̄l kɔ̄ɔ̄lī. Kāni̍ fo̍ndōle̍, ō cho̍ nyɛ᷅m fa̍ŋga᷄ŋ te̍ ŋ̍ to̍sā mī wāna̍ chi̍o̍o̍ wa̍ yōōmū le̍, ā yɔ᷄ŋ bɛ̍ɛ̍ mī wāŋndo̍ nɔ̄ mu̍ŋ ta̍u̍ bɛ̍ndū.”

¹⁶Mbo̍ lō o̍ ko̍ŋ mbo̍ dīmūl nda̍ tālo̍o̍ āā, “Po̍ su̍lāā pīlɛ̍ wa̍ ni̍, mi̍ tɔ̄lɔ̄ɔ̄la̍ŋ o̍ chīɔ̄ɔ̄ŋ ndɔ᷄ŋ ni᷄ŋ la̍ ku̍ām ta̍u̍ ta̍u̍.

¹⁷Mɛ̄ɛ̍ tɔ̄lɔ̄ɔ̄lā ndɔ̄la̍ŋ lā kōm le̍nde̍, mbo̍ lō o̍ ko̍ŋ, mbo̍ nyūnā ndu̍ pi̍la̍ āā, ‘Ō yɛ̄ɛ̍nɛ̍ ya̍ I̍ to̍sa̍ yɛ̍? I̍ nɔ̍ fo̍ndāŋ o̍ fo̍ndāŋ ya̍ I̍ du̍a̍ū tɔ̍lɔ̄ɔ̄lā nīla̍ŋ te̍.’

¹⁸Mbo̍ dīmūl ndu̍ pi̍la̍ āā, ‘Pūūsīa̍a̍ ya̍ I̍ cho̍ ko̍nda̍la̍ pa̍a̍ndūla̍ŋ nda᷅ŋ ni̍, mī ta̍ŋgu̍l la̍ŋ lā bɛ̄ndū mī lā hīōū māā pāāndū. Tē I̍ chi̍i̍ tāŋgūl pɛ̍ kpo̍u̍, I̍ dɔ̍ū tɔ̄lɔ̄ɔ̄lā nīla̍ŋ a̍ wōlɔ̄ɔ̄lā nīla̍ŋ lēni᷄ŋ.’

¹⁹O̍ ko̍ŋ kɔ̍ɔ̍lī, mī di̍mūl ya̍ pi̍la̍ āā, ‘Ā nɔ̄ nyɔ̄ɔ̍ŋ ta̍u̍ ta̍u̍. Ō chūā wɔ̍sīlā fāŋgā ā chō mu̍ŋ dīo̍o̍. Le̍la̍ŋ, bu̍u̍la᷄ŋ le̍ nyɛ̄ o̍ nyɛ̄ le̍. Di̍o̍ mā ko̍l, mā wa̍ a̍ kɔ̄l kɛ̄ndɛ̄.’

²⁰Kɛ̍, mi̍ Mɛ̄lɛ̄ka̍ lō o̍ ko̍ŋ, mbo̍ dīmūl po̍ su̍lāa̍ ho̍ō āā, ‘A̍ chō dīɔ̄m bɛ̄ndū. Chūɛ̄llɛ̄ŋ kpe̍e̍kpe̍i̍ ya̍ cho̍ yōōmū nūmndo̍ chīī ni̍. Ndu̍yɛ̍, tē I̍ chi̍i̍ yōōmū nūmndo̍ pɛ̄, nɛ̄ɛ̍nɛ̍ cho̍ yɛ̄ nyɛ̄m ŋ̄ chūūŋgi̍a̍a̍ mu̍ŋ ki̍nɛ̍i̍yo̍ŋ lōō?’ ”

²¹Mi̍ Chi̍i̍sū di̍mūl nda̍ āā, “Le̍nde̍ ko̍ni̍ wāna̍ la̍ndu̍ŋ kɔ̍l o̍ nyɛ̄m chi̍e̍ēŋndo̍ŋ mu᷅ŋ chūūŋgīa̍a̍ su̍e̍e̍ wo̍ chō ni̍. Mɛ̄ɛ̍ o̍ mɛ̄ɛ̍ o̍ nɔ̍ mu̍ŋ Mɛ̄lɛ̄ka̍ ndu̍ si̍nā māā ō tāmbɛ̍i̍ pɛ̍sɛ̄kɛ̍ o̍ cho̍ ni̍.”

²²Mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Le̍la̍ŋ, mī di̍mu̍l nya̍, lā bu̍u̍la᷄ŋ le̍ nyɛ̄ nya̍ dīā mī lā wa̍ yōōmū wo̍ le̍. Ndu̍yɛ̍, lā bu̍u̍la᷄ŋ le̍ nyɛ̄ nya̍ wōūnūŋ ndo̍ le̍.

²³Kāni̍ fo̍ndōle̍, yōōmū nya̍ nɔ̄ wo̍, ndu̍ hi̍o̍ū a̍ nyɛ̄ dīa̍a̍. Ndu̍yɛ̍, dīāllūŋ nya᷄ŋ mu̍ŋ ŋ̍ hi̍o̍ū a̍ nyɛ̄ chūɛ̄ɛ̄na᷄ŋndo̍.

²⁴Lā yīya̍ŋ ndɔ̍ a̍ yōūwa̍ o̍kɔ̄ɔ̄. Yōūwa̍ to̍sā i̍chi̍ɛ̍ɛ̍ le̍, kɛ̄lɛ̄ŋgāā mā nɔ̄ īchīɛ̄ɛ̄ le̍ kōūwɔ̄ɔ̄. Ā nɔ̍ ko̍nda̍la̍ du̍a̍u̍wāā tɔ̄lɔ̄ɔ̄ le̍. Kɛ̍, o̍ ko̍ŋ ni̍ŋ kpo̍u̍, mī Mɛ̄lɛ̄ka̍ ke̍ nda̍ nyɛ̄ nda̍ dīā wo̍. Nya̍ hi̍o̍ū a̍ yōūwa̍ po̍lo̍ŋ.

²⁵Ndu̍yɛ̍, ā yɔ᷄ŋ bɛ̍ɛ̍ mī lā būūla̍ŋ le̍ mu᷅ŋ kpo̍u̍, lā nɔ̄lā pa̍ mī lā chɔ̄ɔ̄lu̍ yōōmūlā nyāla̍ŋ bɛ̄ndī le̍ pāa̍le̍ŋ lē pīlɛ̍ bɛ̍ɛ̍? Lā nɔ̍lā le̍.

²⁶Tē lā būmba̍ ī pɔ̄mbūɛ̄ī wāā le̍nde̍i̍ tōsā pɛ̍, ɔ̍ɔ̄ le̍ sa̍bū nya̍ būūlāŋ ni᷅ŋ le̍ nyɛ̄ o̍ nyɛ̄ chēle̍ŋ ndo̍?

²⁷Lā yīya̍ŋ ndɔ̍ a̍ pɔ̄mbīa̍ŋ mɛ̄ɛ̍ ma̍ na̍ŋ yɛ̍. Mā sa̍a̍ŋgīāā mɛ̄ɛ̍ wāŋndā chīe̍e̍ya̍ sāāŋgīāā yɛ̍ le̍. Ndu̍yɛ̍, mā to̍o̍sīāā la̍nyɛ̍ le̍. Kɛ̍, mī di̍mu̍l nya̍, mi̍ chē bɛ̍ɛ̍ mi̍ Māsāa̍ Sɔ̍lɔ̍mɔ̄ŋ ndu̍ o̍o̍ su᷅l sūllo̍ pi̍la̍, kɛ̍ ndu̍ o̍o̍ nɔ̍ nyɛ̍ chūɛ̄ɛ̄na᷄ŋ mbō fūūlu̍u̍ nāŋɔ̄ɔ̍ mɛ̄ɛ̍ pɔ̄mbīa̍ŋ mā chō nu̍a̍ā yɛ̍ le̍.

²⁸Lā tōfa̍ mɛ̄ɛ̍ Mɛ̄lɛ̄ka̍ nɛ̄ŋi̍ bīl fo̍ndōo̍ ho̍ō yɛ̍. Mī bīllo̍ ho̍ō wa̍ yōōmū māā hāū. Kɛ̍, dīi̍māndɔ̄ɔ̍ ā lōm ndu̍ o̍ yīŋ. O̍ ko̍ŋ ni̍ŋ kpo̍u̍, mī Mɛ̄lɛ̄ka̍ nɛ̄ŋi̍ ndu̍ nu̍a̍ā kpɛ̍. Nāa̍ o̍ to̍sa̍ wɔ̄ le̍nde̍, ō nɔ̄lā kpe̍e̍kpe̍i̍ mbō ke̍ nya̍ nyɛ̄ chūɛ̄ɛ̄na᷄ŋndo̍. Lā nɔ̍ la̍a̍la᷄ŋ bɔ̍ɔ̍ le̍ ma᷅.

²⁹“Le̍la̍ŋ, lā wa᷅ a̍ kɔ̄l lānda᷄ŋ kɛ̄lɛ̄ŋgāā mī lā būūla̍ŋ le̍ nyɛ̄ nya̍ dīā wo̍ a̍ nyɛ̄ nya̍ kōl lo̍ le̍.

³⁰Le̍ nyɔ̄ɔ̍ŋ mu᷅ŋ ko̍ni̍ wānāa̍ cho̍ a̍ Chu̍ū le̍ wa̍ ā fāfālā ni̍. Kɛ̍, Mɛ̄lɛ̄ka̍ fi̍nyā nyā ndu̍ si̍nā māā lā nɔ̄ le̍ nyɔ̄ɔ̍ŋ mu᷅ŋ sɔ̄lāa̍.

³¹Lā lāndu̍ŋ kɔ̍l le̍ nyɛ᷄m cho̍ o̍ māsāle̍ Mɛ̄lɛ̄ka̍le̍ŋ ni᷄ŋ ndo̍ŋ. O̍ ko̍ŋ kɔ̍ɔ̍lī, nyɔ̄ɔ̍ŋ ŋ̄ tɔ̄ɔ̍ŋ bɛ̍ɛ̍, Mɛ̄lɛ̄ka̍ nɔ̄lā mbō ke̍ nya̍.”

³²Mi̍ Chi̍i̍sū di̍mī āā, “Lā yɔ᷅ŋ īsīōōŋ te̍, nya̍ ku̍ndā nī pɔ̍mbɔ̄ɔ̍ ho̍ō. Kāni̍ fo̍ndōle̍, Mɛ̄lɛ̄ka̍ fi̍nyā nyā ō hīni̍ kɔ̄l le̍ mbō ke̍ nya̍ nyɛ̄m fāŋgā fa̍ŋgā, bōōndi̍i̍ o̍ cho̍ wā māsāa̍ wānāā ndūa̍a̍ chōo̍ ve̍.

³³Lā pīsi̍ nyɛ᷅m nya̍ nɔ̄ wo̍ŋ mī lā ke̍ wānāā tāmbɛ̍i̍ya̍ ka̍ni̍ŋ mu̍ŋ. Lā fāfa̍la̍ le̍ nyɛ̄ sɔ̄lāa̍ chu̍ū le̍ wo̍ sɔ̄lāa̍. Ko̍ŋ cho̍ ni̍, nyɛ̄m ba̍ā kāla᷄ŋ o̍ fo̍nda᷄ŋ Mɛ̄lɛ̄ka̍a̍. Mu̍ŋ chu̍ū le̍. Lo̍ŋ ndu̍ ndu̍, vīīnɔ̄ nɔ̍lā mbō chīīmbu̍u̍ mu̍ŋ te̍. Ndu̍yɛ̍, kāāŋgūāā di᷅ nyɛ᷅m nūmndo̍ŋ te̍.

³⁴Nāa̍ wāŋndo̍ kɛ̄sī nyɛ᷅m ndɔ᷄ŋ ba̍ā kāla᷄ŋ nda̍, lo̍ŋ ko̍ni̍ kɔ̄l ndɔ̄ɔ̍ wā ni̍.”

³⁵“Lā wa̍ a̍ bɛ̍ɛ̍ndīa̍ŋ le̍ wa̍li̍ cho̍ le̍ tōsāa̍ wo̍. Ko̍ŋ cho̍ ni̍, lā wōūnu̍ŋ nyɛ̍lā wa̍lta̍ŋ, ndu̍yɛ̍, mī la̍mbūi̍la̍ nyāla̍ŋ lā wa̍ lā mɛ̄ndūlāā.

³⁶Lā tōsa̍ māā bu̍ɛ̍īya̍ ā ma̍sā ndāa̍ kūɛ̄ o̍ bɔ̄ŋa᷅ŋndo̍ wa̍. Mɛ̄ɛ̍ ma̍sā ndāa̍ kūɛ̄, ma̍ chāl tōfāa̍ o̍ nɛ̄ī le̍ ndu̍ māā tē ō hīŋ dɔ̍ɔ̍ pɛ̍, mbō kūndū dīo̍o̍ ā kūmbu̍l ndu̍ lē pīlɛ̍ kpe̍.

³⁷Tē wānā nda̍ bānāa̍ hīŋ pɛ̍ mbō kōma̍l nda̍ lāhɔ̄l, ō wā su̍ɛ̍i̍ kɔ̄l kɛ̄ndɛ̄ le̍ nda̍. Mī di̍mu̍l nya̍, bɛ̄ɛ̄ndīa̍ŋndo̍ ma̍sā ndāa̍ bɛ̄ɛ̄ndīāŋ ni̍, mbō dīmu̍l nda̍ mā cha᷄l. Ndu̍yɛ̍ o̍ ko̍ŋ kɔ̍ɔ̍lī, mī ndu̍ pi̍la̍ pi̍ɔ̍u̍ nda̍ nyɛ̄ dīa̍a̍.

³⁸Ā yɔ᷄ŋ bɛ̍ɛ̍ a̍ dītɛ̍ɛ̄ŋndo̍ kɛ̄lɛ̄ŋgāā a̍ pāa̍le̍ si̍a̍āle̍ŋ o̍ hu̍ŋ ni̍, tē ō kōma̍l nda̍ lāhɔ̄l pɛ̍, ō wā su̍ɛ̍i̍ kɔ̄l kɛ̄ndɛ̄ le̍ nda̍.”

³⁹Mi̍ Chi̍i̍sū hi̍a̍ū lāchī a̍ sūɛ̍i̍ āā, “Kɛ̍, lā kɛ̄si̍ŋ o̍ kɔ̄l māā tē wāna̍ chīɛ̄īyo̍ ndu̍ o̍o̍ si̍nā bo̍o̍ndi̍i̍ vīīnɔ̄ɔ̍ wā hu̍nɔ̄ɔ̍ ndu̍ chīīmbūūwo̍ ve̍ pɛ̍, ndu̍ o̍o̍ lɔ᷅l mī vīīnɔ̄ɔ̍ ndu̍ o̍o̍ hu̍ŋ pi̍ɔ̄l dīō ndɔ̄ɔ̍ mī ndu̍ o̍o̍ chi̍i̍mbu̍u̍ nyɛ̄m ndɔ᷄ŋ te̍.

⁴⁰Le̍nde̍ nya̍ wa̍ a̍ bɛ̍ɛ̍ndīa̍ŋ ni̍. Kāni̍ fo̍ndōle̍, bōōndi̍i̍ nya̍ ve᷅ ni̍ŋ wa᷅na̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ kɔ̄l te̍ ve̍, bōōndi̍i̍ ke̍ŋ o̍ hu᷅ŋ ni̍ŋ ni̍.”

⁴¹Mi̍ Pītɛ̍ nyu̍nā āā, “Māsānɔ̄ɔ̍, bāā le̍ na̍a̍ ko̍ni̍ ŋ̄ dīmi̍ tālo̍o̍ ho̍ō ni̍, bāā le̍ wānā o̍ wānā?”

⁴²Mi̍ Māsānɔ̄ɔ̍ Chi̍i̍sū dīmī āā, “I̍ chɔ᷅m ndɔ̍ nya̍ mɛ̄ɛ̍ bu̍ɛ̍i̍ cho̍ sa̍kpō, ndu̍yɛ̍ mbo̍ wā bu̍ɛ̍ī kɔ̄l kālu̍ wo̍ mɛ̄ɛ̍ o̍ nɔ̍ le̍ wāa̍ yɛ̍. Bu̍ɛ̍ī kɔ̄l kālo̍o̍ ndu̍ cho̍ bu̍ɛ̍ī ma̍sā ndɔ̄ɔ̍ hāndū ho̍ō chāāŋāā ndūāā bu̍ɛ̍īya̍ chōo̍ wo̍ ni̍ le̍ mbō wa̍ nda̍ nyɛ̄ dīāā nda̍ nɔ̄ le̍ sɔ̄lāa̍ wo̍ kīo̍o̍ o̍ te̍le̍ŋ nda̍ nɔ̄ le̍ nyɛ̄ dīa̍a̍ dīo̍o̍ wo̍.”

⁴³Mi̍ Chi̍i̍sū hi̍a̍ū lāchī a̍ sūɛ̍i̍ āā, “Tē bu̍ɛ̍īyo̍ ho̍ō ma̍sānɔ̄ ndɔ̄ɔ̍ hīŋ pɛ̍ mbō kōma̍l ndu̍ he̍ī tōsāa̍, ō wā su̍ɛ̍i̍ kɔ̄l kɛ̄ndɛ̄ bɛ̄ndū le̍ ndu̍.

⁴⁴Mī di̍mu̍l nya̍ tōnya̍a̍, tē ma̍sā ndɔ̄ɔ̍ hīŋ pɛ̍, hāndɔ̄ɔ̍ o̍ ha̍ndū bu̍ɛ̍īyo̍ ho̍ō mbō wa̍ nyɛ̄m ndɔ᷄ŋ o̍ nɔ̍ wo̍ŋ kpe̍de̍ la̍chi̍ ni̍.

⁴⁵Kɛ̍, tē bu̍ɛ̍ī kōŋ ō wa̍ bu̍ɛ̍ī wɔ̄ɔ̍ŋ pɛ̍, dīmīo̍o̍ ko̍ni̍ o̍ di̍mī ni̍ āā, ‘Ma̍sānɔ̄ nūu̍ cho̍ ya̍lā hūnɔ̄ɔ̄ le̍.’ O̍ ko̍ŋ, mbō kāndu̍ chāāŋāā ndūāā bu̍ɛ̍īya̍ lɔ̄ɔ̍, wānā pɔ̍nɔ̍ ni̍, wānā la̍nɔ̍ ni̍, ndu̍yɛ̍, mbō kāndu̍ di̍o̍la̍ ndɔ̄ a̍ mūɛ̄īmā ndɔ̄ ko̍lī kōlī mī mā bīī ndu̍.

⁴⁶Bu̍ɛ̍ī wāā nu̍a̍ā pāa̍le̍ o̍ ve᷅ ma̍sānɔ̄ ndɔ̄ɔ̍ kɔ̄l le̍ hūnɔ̄ɔ̄ kpo̍so̍ŋ te̍ le̍ŋ, pāa̍le̍ le̍ŋ o̍ ko̍māl ndu̍ ni̍. Bōōndi̍i̍ o̍ wa᷅ ni̍ŋ o̍ pu̍ɛ̍ya᷄ŋ pɔ̍lī ve̍, ma̍sānɔ̄ ndɔ̄ɔ̍ chō ndu̍ kōmāl ni̍. O̍ ko̍ŋ, mī ma̍sānɔ̄ ndɔ̄ɔ̍ bīī ndu̍, mbō kōŋ ndu̍ kōŋɔ̄ɔ̍ pi̍la̍. O̍ ko̍ŋ kɔ̍ɔ̍lī, mbō nyīndū ndu̍ kūmbū wānāa̍ tu̍i̍ī Mɛ̍lɛ̄ka̍ dīōm te̍ wa̍.

⁴⁷“Ndu̍yɛ̍, bu̍ɛ̍i̍ si̍nā ho̍ō nyɛ̄ ma̍sānɔ̄ ndɔ̄ɔ̍ yēēma̍ ndu̍ mbō tōsa̍ wo̍ wa̍, tē ō bɛ̄ɛ̄ndi̍a̍ŋ mbō tōsa̍ nyɛ̄ o̍ di̍mi̍ wo̍ le̍, lɔ̄ɔ̍ pi̍la̍ ma̍sānɔ̄ ndɔ̄ɔ̍ lūāā ndu̍ ni̍.

⁴⁸Kɛ̍, bu̍ɛ̍i̍ si̍nā nyɛ᷅ ma̍sānɔ̄ ndɔ̄ɔ̍ yēēma̍ ndu̍ mbō tōsa̍ le̍ wo̍ ndu̍, ō tōsa̍ bɛ̍ɛ̍ su̍ɛ̍i̍ wa̍ā le̍nde̍, ā lo̍ō ndu̍ ō bɔ̄ɔ̍ le̍ ndi̍ le̍. Wāna̍ nda̍ kē ta̍u̍ wo̍, ndu̍ Mɛ̄lɛ̄ka̍ nyūnā le̍ yɔ̄ŋgōo̍ ta̍u̍ ni̍. Ndu̍yɛ̍, wāna̍ wāŋnda̍ kē ta̍u̍ wo̍, ndu̍ nda̍ yēēmā mbō yɔ̄ŋgu̍ ta̍u̍ ni̍. Ā yēēmā bɛ̍ɛ̍ mbō ke̍ nda̍ mbō hīōū mɛ̄ɛ̍ nda̍ ke̍ ndu̍ yɛ̍.”

⁴⁹Mi̍ Chi̍i̍sū di̍mī āā, “I̍ hi᷅ŋ māhūnāā le̍ chi̍e̍ēŋndo̍ mālɔ̄ɔ̍ o̍ yīŋ. Yēēmɛ̍i̍ nīi̍ cho̍ ni̍ māā yīŋndē kālā le̍ŋ lē bīi̍ ni᷅ŋ bɛ̍ɛ̍ ko̍.

⁵⁰Ya̍ bɛ̍ɛ̄ I̍ cho̍ kēēkū o̍ yīŋndē lēŋ ni᷄ŋ. Pūlɔ̄ɔ̍ ho̍ō ya̍ I̍ nɔ̍ le̍ sɔ̄lāa̍ ni̍. Ndu̍yɛ̍, kɔ̄l nūu̍ cho̍ o̍ hi̍nīāā le̍ ha̍a̍a̍ mbō lo̍ o̍ ko̍ŋ mī ī chūū.”

⁵¹Mbo̍ nyūnā āā, “Lā yīya̍ŋ māā kɔ̄l nyūlōo̍ ya̍ I̍ hi᷅ŋ lūēī o̍ chi̍e̍ēŋndo̍ ni᷄ŋ ni̍? Kɔ̄l nyūlū bɛ̍ɛ̍. Mī di̍mu̍l nya̍, pīɔ̄ūvi̍āŋndo̍ ya̍ I̍ hi᷅ŋ lūēī o̍ chi̍e̍ēŋndo̍ ni᷄ŋ ni̍.

⁵²Chɔ̍ŋ a̍ bōōnde̍i̍ he̍ī, yu̍ŋgu̍la̍ŋ lā chō pīɔ̄ūvi̍āŋ. Yu̍ŋgu̍ nɔ̍ wāŋnda̍ ā ŋūɛ̍ɛ̍nu̍ wo̍ pīɔ̄ūva᷅ŋ ni̍ŋ, mī ā yāa̍ wa̍ chīe̍i̍ ā ŋīɔ̍ɔ̍ŋnda̍ ha̍ā, tē ko̍ŋ te̍, ā ŋīɔ̍ɔ̍ŋnda̍ chīe̍i̍ ā yāa̍ wa̍.

⁵³Fi̍nyāa̍ chō hūnɔ̄ɔ̄ po̍ ndɔ̄ɔ̍ chīe̍i̍, tē ko̍ŋ te̍, mī pōo̍ chīe̍i̍ fi̍nyā ndɔ̍. Kālāa̍ chīēī ni̍ŋ chu̍a̍ ndɔ̄ɔ̍, tē ko̍ŋ te̍, mī chūa̍a̍ chīe̍i̍ kālāa̍. Kālāli̍ɔ̍ɔ̍ chīēī ni̍ŋ chu̍a̍ ndɔ̄ la̍a̍ndōo̍, tē ko̍ŋ te̍, mī chūa̍a̍ chīe̍i̍ kālālɛ̍i̍ ndɔ̄.”

⁵⁴Mi̍ Chi̍i̍sū di̍mūl fāŋgāa̍ āā, “Tē pīɔ̍ɔ̍ he᷄l pɛ̍ ba᷅ pāa̍le̍ŋ lē dēl lo̍, lā dīmi̍ āā, ‘Pīɔ̍ɔ̍ chō sīā ta̍u̍.’ Ndu̍yɛ̍, mbō yɔ̄nu̍ŋ le̍nde̍.

⁵⁵Tē hūēīye̍ wa̍ hēēlōo̍ a̍ hɔ̄ŋndo̍ pɛ̍, lā dīmi̍ āā, ‘Hāŋgu̍llo̍ chō wā ta̍u̍,’ ndu̍yɛ̍, mbō yɔ̄nu̍ŋ le̍nde̍.

⁵⁶Lā chō wānāā kāŋgālā. Lā nɔ̄lā mī lā tōfa̍ chi̍e̍ēŋndo̍ a̍ ha̍la̍a̍, ndu̍yɛ̍ mī lā chɔ᷄m tē pīɔ̍ɔ̍ si̍ā ni̍ŋ ni̍, ɔ̄ɔ̄ tē wālōo̍ wa̍ ni̍ŋ ni̍. Kɛ̍ vɛ᷅ ni᷅ŋ, lā nɔ̍lā mī lā sīna̍ sɔ̄ɔ̍ŋ cho̍ yɔ̄nɔ᷄ŋndo̍ te̍le̍ŋndo̍ ho̍ō wo̍ŋ pɛ̄ŋgu̍ le̍?”

⁵⁷Mi̍ Chi̍i̍sū hi̍a̍ū lāchī a̍ dīmīo̍o̍ āā, “Nya̍ pi̍la̍ lā kɛ̄ɛ̄si̍a̍a̍ o̍ bɛ̍nda̍ le̍ tōsāa̍ wo̍.

⁵⁸Tē wāŋndo̍ wa̍ kɔ̄la̍ŋ se̍ī nūmndo̍ bīyɔ̄ɔ̍ pɛ̍, nyɔ̍ɔ̍lu̍ ndu̍ lɔ̍ɔ̍ nya̍ chō nya̍ ŋi̍ɔ̍ɔ̍ŋ ndo̍ mī lā tōōsi̍āŋ tɛ̍ɛ̄ŋ. Te̍ a̍ to̍sa̍ le̍nde̍ le̍, ō chō tōsā mā hu᷄ŋ bi̍ī nu̍m mā kūɛ̄ a̍ nūm o̍ māsāa̍ lo̍. O̍ ko̍ŋ, mī māsāa̍ ma᷄l nu̍m wāna̍ du̍a̍ū wa᷅ŋnda̍ chīɛ̄ī ni̍ŋ ndo̍ o̍ bā mbō dɔ̄ū nu̍m chīɛ̄ī ni̍ŋ.

⁵⁹Ndu̍yɛ̍ mī di̍mu̍l nu̍m, tē ā dɔ̄ū nu̍m chīɛ̄ī ni̍ŋ pɛ̍, lo̍ŋ ŋ̄ lō ni̍, ā so̍lī nu̍m te̍ mɛ̄ɛ̍ mā chi̍i̍ nyɛ̄ o̍ nyɛ̄ nda̍ kēlū nu̍m chōo̍ pa̍a̍wā mālāŋ nda̍ sōlī nu̍m.”