Read Southern Kisi Lu̍kū 14 Bible Online

Lu̍kū 14 - Southern Kisi bible

Lu̍kū 14

¹O̍ pāa̍le̍ pi᷅lɛ̍ pɛ̍ŋgīāālē Chu̍ūwa̍ chōo̍, mi̍ Chi̍i̍sū ku̍ā nyɛ̄ dīa̍a̍ dīo̍o̍ o̍ chīɛ̄ī wānā bɛ̍ndū pīlɛ̍. Fālīsi̍īnɔ̄ɔ̍ wānā bɛ̍ndōo̍ ho̍ō ō wa̍ ni̍. Ndu̍yɛ̍, mi̍ wāŋnda̍ chāl Chi̍i̍su̍ mɛ̄ŋgɛ̄lāa̍ kpe̍e̍kpe̍i̍.

²Mi̍ po̍ pi᷅lɛ̍ hūŋ nāa̍ ndu̍ chu̍a̍. Ndu̍yɛ̍, ndu̍ o̍o̍ nɔ̍ nāā hīīndāa̍.

³Mi̍ Chi̍i̍sū nyu̍nā ku̍ndā Fālīsi̍īya̍ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ āā, “Vɛ̄ɛ̍nɛ̍ sāwa̍ pāa̍le̍ nāāle̍ pɛ̍ŋgīāāle̍ŋ ō dīmi̍ yɛ̄? Bāā wānā si̍ŋgī wa᷅na̍ nāa̍ lēchōo̍, bāā wānā si̍ŋgī le̍?”

⁴Kɛ̍, ā sūu̍ nyɛ᷅ o̍ nyɛ̄ le̍. O̍ ko̍ŋ, mbo̍ chūā pōo̍ mbo̍ sīŋgī ndu̍. Mbo̍ dīmūl ndu̍ māā ō kɔ̄nu̍ŋ.

⁵O̍ ko̍ŋ kɔ̍ɔ̍lī, mi̍ Chi̍i̍sū nyu̍nā nda̍ āā, “Ɔ̍ɔ̄ wāna̍ cho̍ nya̍ tɛ̄ɛ̄ŋ na̍nu᷄ŋ, tē ō wa̍ pɛ̄ mī po̍ ndɔ̄ɔ̍ de᷄l o̍ so̍o̍ŋ māmɛ̄ŋndo̍ ni᷄ŋ, kɛ̄lɛ̄ŋgāā nāū ndɔ̄ɔ̍, kɛ̍ ndu̍yɛ̍, o̍ pāa̍le̍ nāāle̍ pɛ̍ŋgīāāle̍ŋ chōo̍, wānā ko̍ŋ ō ku̍ē chɔ̍ chɔ̍ mbō sōli̍ ndu̍ le̍ wo̍?”

⁶Kɛ̍, wāŋnda̍ ha̍ā ā nɔ̄la̍ mā sōō nyɛ̄ o̍ nyɛ̄ le̍.

⁷Mɛ̄ɛ̍ Chi̍i̍sū che᷅ wānāā nda̍ vēēlu̍ le̍ nyɛ̄ dīa̍a̍ dīo̍o̍ wa̍ ā chō lāūwo̍ le̍ kɔ̄la̍ŋ cha᷄lle̍ o̍ fo̍ndāŋndā nda̍ bɛ̄ɛ̄ndi̍a̍a̍ le̍ wānāā bɛ̄ndūa̍a̍ la̍ŋ, mbo̍ dīmūl nda̍ tālo̍o̍ ho̍ō āā,

⁸“Tē wāŋndo̍ vēēlu̍ nu̍m le̍ nyɛ̄ dīa̍a̍ o̍ bɔ̄ŋa᷅ŋ nɔ̄ kɛ̍sīa̍a̍ pɛ̍, cha᷅l o̍ fo̍ndāŋ nda̍ tōōsi̍a̍a̍ le̍ wānāā bɛ̄ndūa̍a̍ wo̍ le̍. Tē a̍ cha̍l lo̍ŋ pɛ̍, kɛ̄lɛ̄ŋgāā dɔ̍ɔ̍ ā vēēlu̍ vɛ̄lɛ̄ wānā che᷅le̍ŋ o̍ hi̍o̍ū nu̍m ndo̍.

⁹Tē ī yɔ̄nu̍ŋ yɛ̍ le̍nde̍ pɛ̍, wāna̍ ve̍e̍lu̍ nya̍ vēllāa̍ vēllē wo̍ chō hūnɔ̄ɔ̄ nu̍m dīmūl āā, ‘Me̍l fa᷅llo̍ ho̍ō kpe̍ŋgbe̍i̍ ŋ̄ cha᷄l ko̍ŋ cho̍o̍ wo̍.’ Le̍ chɔ̄nɔ᷄ŋ ko̍ŋ ni᷅ŋ ma̍ mi̍i̍ŋgu̍ o̍ kpe̍ŋgbe̍i̍ mɛ̍ɛ̍lāa̍, si̍ɔ̍mbu̍la̍ŋ lā wā nu̍m.

¹⁰Le̍la̍ŋ, Tē ā vēēlu̍ nu̍m o̍ bɔ̄ŋa᷅ŋndā wāā le̍nde̍ pɛ̍, cha̍l o̍ kpe̍ŋgbe̍i̍ mɛ̍ɛ̍lāa̍ kpɔ̍ŋ. Ō bɛ̄nda̍ mī wāna̍ ve̍e̍lu̍ nu̍m ndo̍ ndu̍ di̍mu̍l nu̍m āā, ‘Chāa̍ŋ nūu̍, he̍l la̍chi̍ na̍nū.’ O̍ ko̍ŋ, ā nɔ̄lā mā sɔ̍la̍ bɛ̄ɛ̄le̍ŋ wānāā nya̍ chō nyɛ̄ dīa̍a̍ dīo̍o̍ wa̍ kpo̍u̍ o̍ hɔ̄l. Le̍la̍ŋ, wānā o̍ wānā he̍e̍lū nūm pi̍la̍ le̍.

¹¹Kāni̍ fo̍ndōle̍, wānā o̍ wāna̍ he̍e̍lu̍ ndu̍ pi̍la̍ pɛ̍, Mɛ̄lɛ̄ka̍ tūsi̍ ndu̍ tōōlō. Ndu̍yɛ̍, wāna̍ tu̍si̍ ndu̍ pi̍la̍ to̍o̍lōō pɛ̍, Mɛ̄lɛ̄ka̍ hēēlu̍ ndu̍.”

¹²Mi̍ Chi̍i̍sū lo᷅ o̍ ko̍ŋ mbo̍ di̍mūl wāna̍ ve̍e̍lu̍ ndu̍ le̍ nyɛ̄ dīa̍a̍ wo̍ āā, “Tē a̍ to̍o̍si̍a̍a̍ nyɛ̄ dīāā kɔ̄l kɛ̄ndɔ̄ɔ̍ pɛ̍, ō cho̍ ko̍ ndi̍a̍a̍mɔ̍ɔ̍wa̍a̍ nu̍mnda̍, kɛ̄lɛ̄ŋgāā pɔ̄mbūāā nūmnda̍, a̍ bɛ̄ndāā nūmnda̍, kɛ̄lɛ̄ŋgāā wānāā nūmnda̍, kɛ̄lɛ̄ŋgāā wānāā sūlāā nya̍ chīɛ̄ɛ̄li̍āŋ nda̍ le̍ ŋ̄ vēēlū le̍. Tē a̍ ve̍e̍lu̍ ka̍ŋ pɛ̍, nda̍ bɛ̍ɛ̍ ā chō nu̍m vēēlū o̍ nyɛ̄ dīāā wāā le̍nde̍. Tē nda̍ bɛ̍ɛ̍ a̍ ve̍e̍lu̍ yɛ̄ nu̍m le̍nde̍ pɛ̍, mɛ̄ɛ̍ a̍ chi̍i̍ pāāwā nūmndo̍ sɔ̄lā.

¹³Le̍la̍ŋ, tē a̍ to̍o̍si̍a̍a̍ nyɛ̄ dīāā wāā le̍nde̍ pɛ̍, ve̍e̍lu̍ wa̍nāa̍ cho̍ ā tāmbɛ̍i̍ ya̍, a̍ nāmtāa̍, a̍ wānāā bɛ̄vɛ̍i̍ya̍, a̍ wānāā sūmɛ̍i̍ya̍.

¹⁴Tē a̍ to̍sa̍ le̍nde̍ pɛ̍, Mɛ̄lɛ̄ka̍ tōsā mā wa̍ a̍ kɔ̄l kɛ̄ndɛ̄, kāni̍ fo̍ndōle̍, nda̍ nda̍ nɔ̍lā mā mīŋgu̍l nu̍m te̍. O̍ ko̍ŋ kɔ̍ɔ̍lī, bōōndi̍i̍ wānāā sa̍kpūa̍a̍ ā chō mīīŋgū yōōmū ve̍, Mɛ̄lɛ̄ka̍ chō nu̍m pāāwā.”

¹⁵Wānāa̍ wa̍ nyɛ̄ dīa̍a̍ ho̍ō dīo̍o̍ wa̍, wānā pi᷅lɛ̍ wa̍ nda̍ tɛ̍ɛ̄ŋ mɛ̄ɛ̍ o̍ tu̍e̍ī nyɛ̄ Chi̍i̍sū di̍mi̍ wo̍, mbo̍ dīmūl Chi̍i̍sū āā, “Wānāa̍ cha᷅l ni̍ŋ nyɛ̍ dīa̍a̍ dīo̍o̍ o̍ māsāle̍ Mɛ̄lɛ̄ka̍le̍ŋ ni᷄ŋ nda̍ kɔ̄l kɛ̄ndɔ̄ɔ̍ chō le̍ nda̍.”

¹⁶Mi̍ Chi̍i̍sū lo᷅ lo̍ŋ mbo̍ di̍mūl ndu̍ tālo̍o̍ āā, “Pōo̍ chɛ̍ŋ si̍ndɛ̄ ni̍, mbo̍ kɛ̄ɛ̄sīāā le̍ nyɛ̄ dīāā bɛ̄ndōo̍ tōōsīa̍a̍ le̍ mī ndu̍ o̍o̍ ve̍e̍lū wāŋnda̍. Mbo̍ dīmūl wāŋnda̍ ta̍u̍ ta̍u̍ le̍ hūnɔ̄ɔ̍ le̍ nyɛ̄ dīa̍a̍ ho̍ō.

¹⁷Mɛ̄ɛ̍ nyɛ̄ dīa̍a̍ chūū tōōsīāā, mbo̍ vīām bu̍ɛ̍ī ndɔ̄ɔ̍ le̍ mbō kɔ̍ di̍mūl ni̍ko̍ wānāā o̍ ve̍e̍lu̍ wa̍ āā, ‘Lā hu᷄ŋ ni̍ko̍, I̍ chi̍i̍ nyɛ̄ o̍ nyɛ̄ tōōsīāā.’

¹⁸Kɛ̍, mɛ̄ɛ̍ bu̍ɛ̍īyo̍ ho̍ō kɔ̍ di̍mūl nda̍, ma̍ sa̍āŋ ka᷅fɛ̍īla̍ŋ yɔ̄ŋgōo̍ mɛ̄ɛ̍ nda̍ chō fa̍ū. Mi̍ wāna̍ tāso̍o̍ dīmī āā, ‘I̍ la̍ŋga̍ pi̍o̍ndū chīɛ̍i̍. I̍ nɔ̍ le̍ kɔ̄la̍ŋ mi̍ kɔ̍ to̍fā ndi̍. Yāndi̍i̍, ka̍fɛ̍ī ya̍.’

¹⁹Mi̍ wāŋndo̍ ō pīlɔ̍ɔ̍ ndu̍ di̍mī āā, ‘I̍ la̍ŋga̍ pi̍o̍ndū nāūwa̍, nāūwāa̍ wa̍ā ha̍ā wa̍. Ā chō tɔ̍. I̍ nɔ̍ mī kɔ̍ to̍fā nda̍ mɛ̄ɛ̍ kpɛ̍ nda̍ wāā yɛ̍. Le̍la̍ŋ, yāndi̍i̍ ka̍fɛ̍ī ya̍.’

²⁰Mi̍ ō pīlɔ̍ɔ̄ ndu̍ di̍mī āā, ‘I̍ la̍ŋga̍ chu̍ā la̍nɔ̍ɔ̍. Le̍la̍ŋ, I̍ cho̍ hu̍nɔ̄ɔ̄ le̍ pa̍’.

²¹“Mi̍ po̍ bu̍ɛ̍īyo̍ mīīŋgū mbo̍ kɔ̍ do̍u̍nu᷄ŋ ma̍sānɔ̄ ndɔ̄ɔ̍ ko̍na̍. Mɛ̄ɛ̍ o̍ do̍u̍nu̍ŋ ndu̍ ko̍na̍ le̍nde̍, mi̍ wāna̍ chīɛ̄īyo̍ dūāūnu᷄ŋ tu̍mbe̍. Mbo̍ dīmūl bu̍ɛ̍ī ndɔ̄ɔ̍ āā, ‘Kɔ̍ chi̍e̍e̍ chɔ̍ chɔ̍, mā ba̍lu̍ o̍ bɛ̍ɛ̄la̍ŋ a̍ o̍ kōlōkōlo̍la̍ŋ mā hīŋ a̍ wānāā tāmbɛ̍i̍ya̍, a̍ nāmtāa̍, a̍ wānāā sūmɛ̍i̍ya̍, a̍ wānāā bɛ̄vɛ̍i̍ya̍.’

²²Mi̍ po̍ bu̍ɛ̍īyo̍ kūā. Mɛ̄ɛ̍ o̍ mi̍i̍ŋgu̍, mbo̍ dīmūl ma̍sānɔ̄ ndɔ̄ɔ̍ āā, ‘I̍ to̍sa̍ mɛ̄ɛ̍ ŋ̄ dīmu̍l la̍ yɛ̍, fāllo̍. Kɛ̍, fo̍ndāa̍ lo̍ wɔ̄.’

²³Mi̍ ma̍sānɔ̄ ndɔ̄ɔ̍ dīmūl ndu̍ vɛ̄lɛ̄ āā, ‘Kɔ̍ o̍ nɛ̄īla̍ bɛ̍ndūla̍ŋ, a̍ nɛ̄īla̍ pɔ̍mbɔ̄la̍ŋ mā to̍sa̍ mī wāŋnda̍ hīŋ le̍ mī chīɛ̄ī nūu̍ pɛ̄ cha̍.

²⁴Mī di̍mu̍l nu̍m, wānāā ya̍ ve̍e̍lu̍ ki̍nɛ̍i̍ ya̍, ō pīlɛ̍ bɛ̍ɛ̍ wo̍u̍nūŋ nyɛ̍ dīa̍a̍ ho̍ō o̍ sōndō le̍.’ ”

²⁵Wāŋnda̍ fāŋgā bɛ̍ndōo̍ ā wa̍ Chi̍i̍su̍ kɔ̄la̍ŋ kɔ̄ɔ̄lī. O̍ ko̍ŋ, mbo̍ mūli᷄ŋ mbo̍ dīmūl nda̍ āā,

²⁶“Wānā o̍ wāna̍ hɛ̍na̍ŋ mbō hīŋ nāa̍ ya̍ chu̍a̍ le̍ wāa̍ bu̍ɛ̍ī nī pɛ̍, mɛ̄ɛ̍ mbō kāāla̍ ya̍ mbō hīōū mɛ̄ɛ̍ o̍ ka̍a̍la̍ fi̍nyā ndɔ̍ a̍ kāla̍ ndɔ̄ yɛ̍, mbō hīōū mɛ̄ɛ̍ o̍ ka̍a̍la̍ la̍a̍ ndɔ̄ a̍ chūāūwāā ndūa̍a̍ yɛ̄, mbō hīōū mɛ̄ɛ̍ o̍ ka̍a̍la̍ pɔ̄mbūāā ndūa̍a̍, kɛ̄lɛ̄ŋgāā bɛ̄ndāā ndūa̍a̍ a̍ yēmāa̍ ndūa̍a̍ yɛ̍. Ndu̍yɛ̍, mɛ̄ɛ̍ mbō kāāla̍ ya̍, mbō hīōū bɛ̍ɛ̍ mɛ̄ɛ̍ o̍ ka̍a̍la̍ yōōmū ndɔ̍ ndu̍ pi̍la̍a̍ yɛ̍. Tē ō kāāla̍ ya̍ le̍nde̍ le̍, ō ve᷅ bu̍ɛ̍ī nī le̍.

²⁷Wānā o̍ wāna̍ hɛ̍na̍ŋ le̍ ya̍ tōlɔ̄ɔ̍ kɔ̄ɔ̄lī pɛ̍, kɛ̍ mbō ve̍ o̍ chɛ̄lāā lɔ̍ɔ̍ o̍ lɔ̍ɔ̍ le̍ mbō bīī mɔ̍nɛ̍i̍ ndu̍yɛ̍, mbō wa̍ bɛ̍ɛ̍ ō bɛ̄ɛ̄ndīa̍ŋ le̍ mbō vī le̍, wānā wa̍ā le̍nde̍ ō ve᷅ bu̍ɛ̍ī nī le̍.”

²⁸Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ nyūnā āā, “Nya̍ ki̍nɛ̍i̍, tē wānā wa̍ yɛ̄ nya̍ tɛ̄ɛ̄ŋ mbō hɛ̄na̍ŋ le̍ chīɛ̄ī bɛ̄ndōo̍ tāŋgūllo̍, wānā ko̍ŋ ō che᷅l fɛ̍lɛ̍ŋ mbō tūu̍ mɛ̄ɛ̍ kpɛ̍ nyɛ̄ sɔ̄lāa̍ wā mbō wa̍ tūu̍le̍ŋ le̍ tāŋgūl kālāa̍ chīīyo̍ yɛ̍ le̍? Ō tūū fɛ̍lɛ̍ŋ ko̍ ō nɔ̄ nyɛ̄ sɔ̄lāa̍ tūu̍le̍ŋ.

²⁹Tē ō tōsa̍ le̍nde̍ fɛ̍lɛ̍ŋ te̍, kɛ̄lɛ̄ŋgāā chīīye̍ lēbɛ̄ŋgu̍ ko̍ni̍ o̍ chi̍ī tāŋgūl ni̍ mī nyɛ̄ sɔ̄lāa̍ chūū, o̍ ko̍ŋ, mbō būmba̍ ndu̍ chīī tāŋgūl. Ndu̍yɛ̍, wānā o̍ wāna̍ che᷅ yɛ̄ tāŋgūl o̍ ka̍ndu̍ ko̍ŋ ndo̍ pɛ̍, ō ma᷄m ndu̍.

³⁰Mā dīmi̍ āā, ‘Pōo̍ ho̍ō kāndu̍ tāŋgūllo̍, kɛ̍ ō nɔ̄la̍ ndu̍ chīī le̍.’ ”

³¹Mbo̍ dīmī vɛ̄lɛ̄ āā, “Tē māsāa̍ ā ŋīɔ̍ɔ̍ŋ ā sɛ̄ɛ̄ŋgi̍āŋ yɛ̍, mā yēēma̍ le̍ sɔ̍ŋgɔ̄ɔ̍, ndu̍yɛ̍, ho̍ō nɔ̄ so̍vɛ̄i̍ya̍ wāa̍la̍ŋ tɔ̍, mi̍ ho̍ō nɔ̄ nda̍ wāa̍la̍ŋ bi̍di̍i̍ŋ. Mɛ̄ɛ̍ mī wāna̍ nɔ̍ ho̍ō wāa̍la̍ tɔ̍la̍ŋ ndo̍, ō cha᷄l fɛ̍lɛ̍ŋ mbō yīya̍ŋ ko̍ ō nɔ̄lā mbō sɔ̄ŋga̍ a̍ chāa̍ŋ ndɔ̄ ma̍sā kōŋ a̍ so̍vɛ̄i̍ya̍ wāa̍la̍ŋ tɔ̍ ki̍nɛ̍i̍.

³²Tē ō sāālu̍ŋ pɛ̍ māā ō nɔ̍lā le̍, chāa̍ŋ ndɔ̄ lo᷅ la̍nda̍ŋ mbō vēm pɔ̄ɔ̄ ŋ̄wāŋ le̍ mā nyɔ̄ɔ̄lu̍ le̍ ndu̍ mā mīīŋgu̍ dīōm pīlɛ̍.

³³Le̍nde̍ ko̍ni̍ i̍ cho̍ ni̍, wāna̍ fe̍ŋa̍ kɔ᷅llo̍ o̍ nyɛ̄ o̍ nyɛ̄ fe̍e̍ o̍ nɔ̍ wo̍ le̍, ō nɔ̍lā mbō wa̍ bu̍ɛ̍ī ni̍ le̍.”

³⁴“Hɛ᷄lle̍ ī yēēla̍, kɛ̍ tē yēēlāa̍ fūla̍ŋ pɛ̍ o̍ hɛ᷄lle̍ ni᷄ŋ, wānā nɔ̍lā lɛ̍ ndi̍ mīŋgī yēēla̍ le̍.

³⁵Tē yēēlāa̍ fūla̍ŋ pɛ̍, ī ni᷅ŋ ndɛ̍ le̍ nyɛ̄ o̍ nyɛ̄ le̍. Wānā dɔ̍u̍ bɛ̍ɛ̍ ndi̍ lɛ̄ŋ ī nɛ̍ŋī yɛ̍ tɔ̄lɔ̄ɔ̍, mɛ̄ɛ̍ kōo̍ma̍ nda̍ dūāū o̍ tɔ̄lɔ̄ɔ̍ wa̍ŋ mā nɛ̄ŋī tɔ̍lɔ̄ɔ̍ yɛ̍ le̍. Vīōūwɔ̄ɔ̍ ko̍ni̍ nda̍ vīāū ndi̍ ni̍. Le̍la̍ŋ, wānā o̍ wāna̍ nɔ̍ nīla̍ tūɛ̄īyāā īsɔ̄ɔ̍ pɛ̍, lā ya᷄ŋ ni᷅la̍ŋ mī lā tūēī mī lā sīna̍ pɛ̄ŋgu̍.”