Read Southern Kisi Lu̍kū 17 Bible Online

Lu̍kū 17 - Southern Kisi bible

Lu̍kū 17

¹Mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Nyɛ᷄m to̍sā mī wāŋndo̍ tōsa̍ yɔ̄ŋ wɔ̄ɔ̍ŋndo̍ wo̍ŋ ŋ̄ nɔ̄ le̍ yɔ̄nɔ᷄ŋndo̍. Kɛ̍ ndu̍yɛ̍, nyɛ̄ nɛ̄īyāā bɛ̄ndōo̍ chō le̍ wāna̍ to̍sā mī nyɛ̄m mu᷅ŋ ŋ̄ yɔ̄nu̍ŋ ndo̍.

²Ō bɛ̄ndā bɛ̍ɛ̍ mā bāa̍ wānā ko̍ŋ pōū bɛ̄ndōo̍ o̍ lābo̍lō mā ma᷄l ndu̍ o̍ mɛ̄ŋmā yīŋgi̍lɛ̍i̍ya̍ŋ ni᷄ŋ mbo̍ hīāū a̍ wānā ko̍ŋ mbō tōsa̍ mī ā pɔ̄mbūa̍a̍ ha̍ā mā tōsa̍ yɔ̄ŋ wɔ̄ɔ̍ŋndo̍.

³Le̍la̍ŋ, lā pu̍ɛ̍ɛ̍nu᷄ŋ a̍ nya̍ pi̍la̍ le̍. “Tē pɔ̄mbɔ̄ nūm kɛ̄lɛ̄ŋgāā bɛ̄ nūm o̍ to̍sa̍l nu̍m sūɛ̍i̍ wɔ̍ɔ̍ŋnde̍ pɛ̍, di̍mu̍l ndu̍ māā nyɛ̄ o̍ to̍sa̍ a̍ nūm ndo̍ ō ni᷄ŋ te̍. Tē ō dīmu̍l nu̍m le̍ mā ma̍l ndu̍ le̍ nyɛ̄ o̍ to̍sa̍ wo̍ pɛ̍, a̍ ma̍l ndu̍.

⁴Ā yɔ᷄ŋ bɛ̍ɛ̍ mbō tōsa̍l nu̍m sūɛ̍i̍ wɔ̍ɔ̍ŋnde̍ o̍ pāa̍le̍ŋ ni᷄ŋ le̍ ŋɔ̍mmɛ̍ū, kɛ̍ ndu̍yɛ̍, lē ŋɔ᷄mmɛ̍ū kōŋ kpe̍de̍, tē ō nyūna̍ nu̍m le̍ ndu̍ mālɔ̄ɔ̄ pɛ̍, ā nɔ̄ mā ma̍l ndu̍.”

⁵Mi̍ wānāā Chi̍i̍sū ve᷅m māā hɔ̄ltē ndɔ̄ wa̍ dīmūl ndu̍ āā, “Māsānɔ̄ɔ̍, ma̍la̍ na̍a̍ mī ŋ̄ chɔ̄ɔ̄lu̍ tīīnda᷄ŋndo̍ sɔ̄lā.”

⁶Mi̍ Chi̍i̍sū mu̍lūl nda̍ āā, “Tē lā nɔ̄ tīīnda᷄ŋndo̍ pɛ̍, ā yɔ᷄ŋ bɛ̍ɛ̍ mbō wa̍ mɛ̄sɛ̄lāa̍ mɛ̄ɛ̍ ku̍lu̍ mɛ̍sɛ̍lɛ̍i̍ yɔ̄m nda̍ vēēlū ho̍ō āā, Mɔ̍si̍tāā wo̍ chō nu̍a̍ā yɛ̍ pɛ̍, lā dīmūl yɔ̍m si̍m ho̍ō wo̍ āā, ‘Su̍ŋgu̍ŋ mā kɔ̍ tɔ̍lnu᷄ŋ o̍ pēe̍ mɛ̄ŋmā īhɛ᷄llo̍ ni᷄ŋ.’ Ndu̍yɛ̍, tōsāa̍ o̍ to̍sā mɛ̄ɛ̍ nya̍ dīmu̍l ndu̍ yɛ̍ ni̍.”

⁷Mi̍ Chi̍i̍sū hi̍a̍ū lāchī a̍ sūɛ̍i̍ āā, “Nya̍ cho̍ ha̍ā na̍nu᷄ŋ nda̍, tē wānā pi᷅lɛ̍ nɔ̄ pɛ̍ chi̍ɔ̍ɔ̍, mī chɛ̄ kōŋ wa̍ wāa̍ o̍ chīɛ̍i̍ ni᷄ŋ, kɛ̄lɛ̄ŋgāā mbō wa̍ sāa̍ māndāa̍. Tē ō hīŋ pɛ̍ i̍chɔ᷅llo̍ chi̍e̍e̍, bāā dīmūllo̍ ŋ̄ dīmūl chɛ̍ kōŋ ni̍ āā, ‘Hu̍ŋ cha᷅l ni̍ko̍ mā dē nyɛ̄ dīa̍a̍?’

⁸A̍ di̍mī le̍nde̍ le̍. Ā dīmūl ndu̍ mādīmūllāā āā, ‘To̍o̍si̍a̍l la̍ nyɛ̄ dīa̍a̍. A̍ chi̍i̍ pɛ̍, a̍ bɛ̍ɛ̍ndi̍a̍ŋ a̍ hu̍ŋ si᷅m ya̍ īkɛ̄i̍ mbō lo̍ o̍ ko̍ŋ mī chi̍i̍ nyɛ̄ dīa̍a̍ di̍o̍. Tē I̍ chi̍i̍ pɛ̍, ā dē o̍ nu̍mndo̍.’ ”

⁹Mi̍ Chi̍i̍sū nyu̍nā āā, “Bāā chīɔ̍ɔ̍ nɔ̄ kūēē mbō sɔ̄la̍ ni̍wa̍llo̍ mēllo̍ le̍ mɛ̄ɛ̍ o̍ to̍sa̍ wa̍li̍ nda̍ dīmu̍l ndu̍ le̍ tōsāa̍ wo̍ yɛ̍? Ō nɔ̍ mbō sɔ̄la̍ ni̍wa̍li̍ le̍.

¹⁰Le̍nde̍ ko̍ni̍ nya̍ bɛ̍ɛ̍ nya̍ chō ni̍. Tē lā chīi̍ wa̍li̍ o̍ wa̍li̍ nda̍ dīmu̍l nya̍ le̍ tōsāa̍ tōsā pɛ̍, lā dīmi̍ āā, ‘Chīa̍a̍ na̍a̍ ŋ̄ chō ni̍. Ŋ̄ nɔ̍ le̍ ni̍wa̍li̍ sɔ̍lā le̍. Wa̍li̍ na̍a̍ ŋ̄ nɔ̄ le̍ tōsāa̍ wo̍ ndu̍ na̍a̍ ŋ̄ tōsa̍ ni̍.’ ”

¹¹Mɛ̄ɛ̍ Chi̍i̍sū wa̍ kɔ̄la̍ŋ Chūlu̍sɛ̄lɛ̄m, mbo̍ hūŋ o̍ pɛ̄ŋgu̍la̍ lɛ̄ŋndē Sāme̍e̍līāāle̍ŋ a̍ lɛ̄ŋndē Kāli̍līle̍ŋ.

¹²Mɛ̄ɛ̍ o̍ wa̍ fūūlūūwo̍ o̍ sɔ̄ndɔ̄kɔ̍lɔ̍ pīlɛ̍, mbo̍ kōmāl wāŋnda̍ ŋ̄wāŋ tɔ̍ a̍ nāā wɔ̄ɔ̍ŋ pūm lēkɔ̄ɔ̍. Ma̍ sīm la̍nda̍ŋ.

¹³Ma̍ dīmī chōo̍ cho̍o̍ āā, “Māsānɔ̍ɔ̍ Chi̍i̍sū, tūīīnu̍ŋ na̍a̍ īnyīɛ̍ɛ̍ fɔ̍.”

¹⁴Mɛ̄ɛ̍ Chi̍i̍sū che᷅ nda̍, mbo̍ dīmūl nda̍ āā, “Lā kɔ̍ mī wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, ō kɔ̍ mɛ̄ɛ̄ndīa̍ŋ nya̍.” Ma̍ bīī kɔ̄la̍ŋ. Ā lo̍ kɔ̄la̍ŋ, ma̍ sīāŋgū.

¹⁵Ndu̍yɛ̍, o̍ lɛ̄ŋndē Sāme̍e̍līāāle̍ŋ ni᷄ŋ ō pīlɔ̍ɔ̍ ndu̍ o̍o̍ fu̍la̍ ni̍. Ndu̍yɛ̍, mɛ̄ɛ̍ o̍ fu̍la̍ ko̍ŋ o̍ lɛ̄ŋndē Sāme̍e̍līāāle̍ŋ ni᷄ŋ ndo̍ sāālu̍ŋ māā ō sēŋgū a̍ nāā ndɔ̄ɔ̍, mbo̍ mīīŋgū pi̍la̍ nāa̍ Chi̍i̍sū chu̍a̍. Mbo̍ kūā a̍ Mɛ̄lɛ̄ka̍ ba̍li̍ka̍a̍ mēllo̍ chōo̍ cho̍o̍. Mbo̍ kɔ̍ de᷅l Chi̍i̍su̍ o̍ lābɛ̄ŋgu̍ ni̍ŋ mbo̍ mēl ndu̍ ba̍li̍ka̍.

¹⁷Mi̍ Chi̍i̍sū lo᷅ o̍ ko̍ŋ mbo̍ nyūnā āā, “Ŋ̄wāŋ tɔ̍ le̍ ya̍ I̍ si̍ŋgi̍ le̍? Kɛ̍, ɔ̍ɔ̄ ā ŋɔ̄ma̍hīɔ̍ɔ̍lu̍a̍a̍?

¹⁸Nda̍ kpe̍de̍ wānā pi᷅lɛ̍ bɛ̍ɛ̍ hi̍ŋ mbō hu᷄ŋ me᷅l Mɛ̄lɛ̄ka̍ ba̍li̍ka̍ le̍, mɛ̄ɛ̍ wāna̍ lēkāa̍ ho̍ō ndu̍ pīlɛ̍ kpe̍?”

¹⁹O̍ ko̍ŋ kɔ̍ɔ̍lī, mbo̍ dīmūl pōo̍ āā, “Chɔ̍ŋ mā kūɛ̄nu᷄ŋ. Tīīnda᷄ŋ ŋ̄ nɔ̄ wo̍ tōsa̍ ma̍ sɔ̄lā sīōŋgɔ̄ɔ̍.”

²⁰Te̍le̍ŋ pi᷅lɛ̍, mi̍ ku̍ndā Fālīsi̍īya̍ nyūnā Chi̍i̍sū le̍ bōōndi̍i̍ Mɛ̄lɛ̄ka̍ chō kāndɔ̄ɔ̄ wā māsāa̍ wāŋnda̍ chōo̍ ve̍. Mbo̍ mūlūl nda̍ āā, “Mɛ̄lɛ̄ka̍ wā ndɔ̄ɔ̍ wāŋnda̍ chōo̍ ma̍sāa̍ ō cho̍ nyɛ̍ yɔ̍nūŋ mī wāŋnda̍ chē le̍.

²¹Ō cho̍ su̍ɛ̍i̍ wāŋnda̍ chō chɔ̄ mā dīmi̍ āā, ‘Mi̍ che᷄ŋ mi̍ Mɛ̄lɛ̄ka̍ wā māsāa̍ o̍ fo̍ndāa̍ ho̍ō’ kɛ̄lɛ̄ŋgāā mā dīmi̍ āā, ‘Mi̍ che᷄ŋ ndu̍ mbo̍ wā māsāa̍ nda̍’ le̍. Kāni̍ fo̍ndōle̍, yōōmūlā nyāla̍ŋ la̍ŋ Mɛ̄lɛ̄ka̍ ō wā ma̍sāa̍ chōo̍ ni̍.”

²²O̍ ko̍ŋ kɔ̍ɔ̍lī, mbo̍ dīmūl bu̍ɛ̍i̍yāā ndūa̍a̍ āā, “Te̍le̍ŋ cho̍ hūnɔ̄ɔ̄ fūūlūū mī lā yēēma̍ le̍ mī wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō wa̍ vɛ̄lɛ̄ lātūlu̍ a̍ nya̍. Kɛ̍, lā chi᷅ lɛ̍ ni̍ŋ ndu̍ le̍.

²³Wāŋnda̍ dīmūl nya̍ ni̍ŋ āā, ‘Mi̍ che᷄ŋ ndu̍ nda̍,’ Kɛ̄lɛ̄ŋgāā mā dīmi̍ āā, ‘Mi̍ che᷄ŋ ndu̍ na̍nu᷄ŋ.’ Kɛ̍, lā ku̍ā nda̍ kɔ̄ɔ̄lī le̍.

²⁴Kāni̍ fu̍u̍le̍, mɛ̄ɛ̍ nyɔ̄ɔ̍ tōsā nu̍a̍ā ŋu̍āla̍lɛ̍ī o̍ ha̍la̍a̍ ni᷄ŋ mī nyɛ̄ wa̍wo̍ŋndo̍ tīu̍ si̍lɔ̍ cho̍o̍ cho̍o̍ yɛ̍, le̍nde̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chō hūnɔ̄ɔ̄ o̍ pāa̍le̍ o̍ hu᷅ŋ ni̍ŋ nde̍ŋ chōo̍ ni̍.

²⁵Kɛ̍, lɔ̍ɔ̍pa̍ he̍ī yɔ̄nūŋ, mɛ̄ɛ̍ mbō bīī mɔ̍nɛ̍i̍ ta̍u̍, ndu̍yɛ̍ mī wāŋnda̍ te̍le̍ŋndo̍ ho̍ō ā kɛ̄ɛ̍ ndu̍.

²⁶Ndu̍yɛ̍ mɛ̄ɛ̍ wāŋnda̍ ā wa̍ sɔ̄ɔ̍ŋ tōsāa̍ o̍ bōōndi̍i̍ No̍wā wa̍ o̍ chi̍e̍ēŋndo̍ chōo̍ ve̍ yɛ̍, le̍nde̍ ko̍ni̍ wāŋnda̍ lō ni̍ŋ to̍sāa̍ ni̍ mbō lo̍ o̍ ko̍ŋ mī bōōndi̍i̍ Po̍ Wānā Pɔ̍nɔ̍ɔ̍ ō hūŋ ni̍ŋ nde̍ ī fūūlu̍u̍.

²⁷A̍ bōōndi̍i̍ No̍wā ve̍, wāŋnda̍ wa̍ di̍o̍la̍ ndā mā kōlī mu̍ɛ̍īmā ndā. Pūa̍a̍ wa̍ lāāndūa̍a̍ pūwɔ̄ɔ̍, ndu̍yɛ̍ mī wāŋ lāāndūa̍a̍ chūā pi̍a̍a̍ndūa̍a̍. Ā lo̍ mu᷅ŋ tōsāa̍ ha̍a̍a̍, mbo̍ fūūlūū a̍ bōōndi̍i̍ No̍wā lu̍ɛ̍ī o̍ dɛ̄ndɛ̄ bɛ̍ndōo̍ ni᷄ŋ nde̍. Mi̍ pīɔ̍ɔ̍ tūāl. Mi̍ mɛ̄ŋnda̍ŋ mā hūŋ mi̍ mā dīū nda̍ kpo̍u̍.

²⁸Le̍nde̍ ko̍ni̍ i̍ yɔ̍nu̍ŋ o̍ bōōndi̍i̍ Lɔ̍tū wa̍ o̍ chi̍e̍ēŋndo̍ chōo̍ ve̍ ni̍. Wāŋnda̍ wa̍ di̍o̍la̍ ndā, mā kōlī mu̍ɛ̍īmā ndā. Ā wa̍ nyɔ̄ɔ̍ŋ pīīndūūwo̍ a̍ pīsīo̍o̍. Ā wa̍ tɔ̄lɔ̄ɔ̄la̍ŋ a̍ tāŋgūlta̍ŋ.

²⁹Kɛ̍, pāa̍le̍ pa̍a̍le̍ Lɔ̍tū pi̍si̍ pēlēi̍ So̍dɔ̄m chi̍e̍e̍ le̍ŋ, mi̍ yīŋnde̍ŋ lē cha᷄ŋ cho̍o̍ cho̍o̍ lātūlu̍ a̍ pōūtā lēyīŋnda̍ŋ, mi̍ lē hu᷄ŋ di̍ū nda̍ pa̍ku̍.

³⁰Le̍nde̍ ko̍ni̍ i̍ cho̍ wā o̍ pāa̍le̍ Mɛ̄lɛ̄ka̍ chɔ̄m ni̍ŋ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ le̍ŋ chōo̍ ni̍.

³¹“O̍ pāa̍le̍ le̍ŋ chōo̍, wāna̍ cho̍ wā o̍ chīɛ̄īyo̍ chōo̍ mi̍ wōlɔ̄ɔ̄lā ndɔ̄la̍ŋ lā wa̍ chīɛ̄ī ni̍ŋ ndo̍, ō lu̍ɛ̍ī lɛ̄ le̍ la̍ŋ chūā le̍. Le̍nde̍ ko̍ni̍, wāna̍ cho̍ wā o̍ chīɛ̍i̍ ni᷄ŋ ndo̍ ō mi̍i̍ŋgū lɛ̄ nyɛ̄ o̍ nyɛ̄ chūā a̍ mākɔ̄ɔ̄ chi̍e̍e̍ le̍.

³²Lā lōōnu̍ŋ nyɛ̍ yɔ̍nu̍ŋ a̍ la̍nɔ̍ɔ̍ Lɔ̍tū wo̍.

³³Wānā o̍ wāna̍ ki̍ndi̍ le̍ yōōmū ndɔ̄ɔ̍ chīīndīa̍a̍ pɛ̍, yōōmū kālāa̍ chō ndu̍ hīɔ̄lɔ᷄ŋ. Ndu̍yɛ̍ wānā o̍ wāna̍ yōōmū ndɔ̄ɔ̍ hɛ̄lu᷄ŋ yɛ̍ pɛ̍, yōōmū ndɔ̄ɔ̍ chō chīndā.

³⁴Mī di̍mu̍l nya̍, wānāā ŋīɔ̍ɔ̍ŋ ā wā ni̍ŋ i̍hi̍ni̍ o̍ kpēlē nyūmmā māŋ, mī ki̍i̍la̍a̍ Mɛ̄lɛ̄ka̍a̍ chu̍a̍ ō pīlɛ̍, mī ō pīlɔ̍ɔ̍ lo̍.

³⁵Wāŋ lāāndūa̍a̍ nda̍ ŋi̍ɔ̍ɔ̍ŋ ā wā ni̍ŋ chu̍o̍o̍ lātūlu̍, mī ki̍i̍la̍a̍ Mɛ̄lɛ̄ka̍a̍ chu̍a̍ ō pīlɛ̍, mī ō pīlɔ̍ɔ̍ lo̍. [

³⁶Pūa̍a̍ nda̍ ŋi̍ɔ̍ɔ̍ŋ ā wā ni̍ŋ wa̍llo̍ o̍ chīɛ̍i̍ ni᷄ŋ, mī ki̍i̍la̍a̍ Mɛ̄lɛ̄ka̍a̍ chu̍a̍ ō pīlɛ̍, mī ō pīlɔ̍ɔ̄ lo̍.]”

³⁷Mi̍ bu̍ɛ̍i̍yāā ndūa̍a̍ nyūnā ndu̍ āā, “Kūɛ̍ɛ̍nɛ̍ he̍ī chō yɛ̄ yɔ̄nɔ᷄ŋ, Māsānɔ̄ɔ̍?” Mi̍ Chi̍i̍sū mu̍lī o̍ lētāle̍ ni᷄ŋ āā, “Nāa̍ vīsī vīlɛ̍i̍yo̍ wā wa̍, lo̍ŋ yi̍bɛ̍i̍ya̍ ā chūūŋgi̍āŋ ni̍.”