Read Southern Kisi Lu̍kū 18 Bible Online

Lu̍kū 18 - Southern Kisi bible

Lu̍kū 18

¹Mi̍ Chi̍i̍sū di̍mūl bu̍ɛ̍i̍yāā ndūa̍a̍ tālo̍o̍, le̍ nda̍ chɔ̄mndo̍ māā ā nɔ̄ le̍ Mɛ̄lɛ̄ka̍ pīɛ̄īyo̍ lɔ̍ɔ̍ lɔ̍ɔ̍, māā ā wu᷅ ŋ̄dīāl te̍.

²Mbo̍ dīmī āā, “Po̍ ma̍sā pīlɛ̍ wa̍ o̍ chi̍e̍e̍ pu̍m ni̍, ndu̍ o̍o̍ nɔ̍ i̍si̍o̍o̍ŋ le̍ Mɛ̄lɛ̄ka̍ le̍, kɛ̄lɛ̄ŋgāā mbō būūla̍ŋ a̍ wānā.

³Chūā vīi̍ pīlɛ̍ ō pɔ̍nɔ̍ ndɔ̄ ve̍ lɛ̍ īchāli̍ le̍ wo̍ ō wa̍ chi̍e̍e̍ ko̍ŋ ni᷄ŋ. Le̍ lɔ̍ɔ̍ lɔ̍ɔ̍ chūa̍a̍ ho̍ō wa̍ hūnɔ̄ɔ̍ o̍ māsāa̍ ho̍ō lo̍ le̍ sūɛ̍i̍ ndūɛ̍i̍ mbō dīmūl ndu̍ āā, ‘Ke̍ ya̍ di̍ nūu̍ na̍a̍ wāna̍ na̍a̍ ŋ̄ chō kɔ̍ɔ̍sɔ̍ɔ̍ wo̍ tɛ̄ɛ̄ŋ.’

⁴Le̍ te̍le̍ŋ ti̍ŋ māsāa̍ ho̍ō sa̍a̍lāŋ te̍. Kɛ̍ o̍ mɛ̄ɛ̄lu̍la̍ŋ kpɔ̍ŋ, mbo̍ dīmī o̍ kɔ̄l ni᷄ŋ āā, ‘Chūa̍a̍ ho̍ō chō ya̍ kɔ̄llo̍ lɛ̄ndīo̍o̍ bɔ̄ɔ̍. Le̍ he̍ī, mi̍ chē bɛ̍ɛ̍ I̍ nɔ̍ i̍si̍o̍o̍ŋ le̍ Mɛ̄lɛ̄ka̍ le̍, kɛ̄lɛ̄ŋgāā mī nɔ̍ būūla᷄ŋ wāna̍ chi̍e̍e̍, kɛ̍, I̍ cho̍ ndu̍ di̍ ndɔ̄ɔ̍ kē. Ko̍ŋ to̍sā ni̍ mbō kēlu᷄ŋ ya̍ kɔ̄ɔ̄lī.’ ”

⁵

⁶O̍ ko̍ŋ, mi̍ Māsānɔ̄ɔ̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Lā tūe̍i̍ yɔ̍ mɛ̄ɛ̍ māsa̍ lāka̍fāa̍ ho̍ō dīmi̍ yɛ̍.

⁷Bāā Mɛ̄lɛ̄ka̍ yɛ̄, wānāā ndūa̍a̍ o̍ hɛ̍li̍ ma̍ wā ndu̍ pīɛ̄īyo̍ ī dīi̍ a̍ ī chɔ̄l le̍ nda̍ mālāa̍ wa̍, ō ke᷅ nda̍ di̍ ndāa̍ le̍? Bāā mbō tōsa̍ ta̍ma̍la̍a̍ le̍ nda̍ di̍ ndāa̍ kīo̍o̍?

⁸Mī di̍mu̍l nya̍, kīo̍o̍ o̍ ke᷅ nda̍ di̍ ndāa̍ chɔ̍ chɔ̍ ni̍. Kɛ̍ ndu̍yɛ̍, tē wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ hīŋ pɛ̍, bāā ō kōmāl ni̍ŋ pa̍ ŋ̍wa᷅ŋ o̍ chi̍e̍ēŋndo̍ chōo̍ a̍ la̍a̍la̍ŋ a̍ ndu̍ wa̍?”

⁹Mi̍ Chi̍i̍sū di̍mī tālo̍o̍ ho̍ō le̍ wānāa̍ nɔ̍ yīya᷄ŋndo̍ māā ā chō wānāā sa̍kpō Mɛ̄lɛ̄ka̍ o̍ hɔ̄l, ndu̍yɛ̍ ā chi᷅ cha̍a̍ŋāā ndāa̍ nyɛ̄ o̍ nyɛ̄ le̍ wa̍.

¹⁰Mbo̍ dīmī āā, “Pūa̍a̍ pu̍m a̍ wa̍ ni̍, nda̍ ŋi̍ɔ̍ɔ̍ŋ. Fālīsi̍īnɔ̄ɔ̍ ō pīlɔ̍ɔ̄ wa̍ ni̍. Ō pīlɔ̍ɔ̄ kɔ̍sɔ̄ŋnɔ̄ɔ̍. Ma̍ kūā o̍ chīɛ̍i̍ Mɛ̄lɛ̄ka̍a̍, le̍ Mɛ̄lɛ̄ka̍ pīɛ̄īyo̍.

¹¹Mi̍ Fālīsi̍īnɔ̄ɔ̍ sīm Mɛ̄lɛ̄ka̍ pīɛ̄īyo̍. Mbo̍ dīmī o̍ kɔ̄l ni᷄ŋ āā, ‘Mɛ̄lɛ̄ka̍, I̍ me̍l nu̍m ba̍li̍ka̍, kāni̍ fu̍u̍le̍, I̍ cho̍ mɛ̄ɛ̍ wāŋnda̍ ā pūm ā chō yɛ̍ le̍. Nda̍ chō māchūāā wānāa̍ di̍ā nyɛ᷅m pi̍la̍ŋ nda̍, wānāā lāka̍fāa̍, wānāā sūūndɛ̍i̍ya̍. I̍ cho̍ bɛ̍ɛ̍ mɛ̄ɛ̍ po̍ kɔ̍sɔ̄ŋnɔ̄ɔ̍ ho̍ō chō yɛ̍ le̍.

¹²Lē dīi̍ŋ wa̍ŋ ya̍ I̍ bi̍ī su᷅mndo̍ o̍ lɔ̍ɔ̍ bɛ̄ŋgu̍ ni̍. Ndu̍yɛ̍, nyɛ̄ o̍ nyɛ̄ ya̍ I̍ sɔ̍la̍ mɛ̄ɛ̍ mī fa̍ŋa̍ ta̍la̍ma̍ Mɛ̄lɛ̄ka̍a̍ lēchōo̍.’ ”

¹³Mi̍ Chi̍i̍sū hi̍a̍ū lāchī a̍ sūɛ̍i̍ āā, “Kɛ̍, po̍ kɔ̍sɔ̄ŋnɔ̄ɔ̍ ndu̍, mɛ̄ɛ̍ o̍ wa̍ pīɛ̄īle̍ŋ, mbo̍ sīm kɔ̄ɔ̄lī pɔ̍. Hɔ̄lla̍ bɛ̍ɛ̍ ō nɔ̄la̍ chu̍ā chōo̍ mbō tōfa̍ o̍ ha̍la̍ le̍. Mbo̍ bīīnu᷄ŋ kɔ̍mɔ᷄ŋ a̍ mɔ̍nɛ̍i̍. Mbo̍ dīmī āā, ‘Mɛ̄lɛ̄ka̍ tūīīnu̍ŋ ya̍ īnyīɛ̍ɛ̍ fɔ̍. Wāna̍ yɔ̄ŋ wɔ̄ɔ̍ŋndo̍ ya̍ I̍ cho̍ ni̍.’ ”

¹⁴Mi̍ Chi̍i̍sū hi̍a̍ū lāchī a̍ dīmīo̍o̍ āā, “Mī di̍mu̍l nya̍, po̍ kɔ̍sɔ̄ŋnɔ̄ɔ̍ ho̍ō ndu̍ Mɛ̄lɛ̄ka̍ tōsa̍ ni̍ mbo̍ sīmnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l. Mbo̍ mīīŋgu᷄ŋ o̍ ndu̍ lo̍. Kɛ̍, Fālīsi̍īnɔ̄ɔ̍ ho̍ō ndu̍ ī yɔ̄nu̍ŋ le̍nde̍ a̍ ndu̍ le̍. Kāni̍ fu̍u̍le̍, wānā o̍ wāna̍ he̍e̍lu̍ ndu̍ pi̍la̍ pɛ̍, Mɛ̄lɛ̄ka̍ tūsi̍ ndu̍ tōōlō. Kɛ̍, wānā o̍ wāna̍ tu̍si̍ ndu̍ pi̍la̍ tōōlō pɛ̍, Mɛ̄lɛ̄ka̍ hēēlu̍ ndu̍.”

¹⁵Wāŋnda̍ wa̍ hūnɔ̄ɔ̍ a̍ chūāāmbūāā pɔ̄mbūa̍a̍ nāa̍ Chi̍i̍sū chu̍a̍, le̍ mī ndu̍ o̍o̍ ha̍ndu̍ nda̍ bāla̍ŋ chōo̍. Kɛ̍, mɛ̄ɛ̍ bu̍ɛ̍i̍yāā ndūa̍a̍ chē chūāāmbūāā pɔ̄mbūa̍a̍, ma̍ dōōnu᷄ŋ wa᷅ŋnda̍ ha̍ā tu̍mbe̍.

¹⁶O̍ ko̍ŋ kɔ̍ɔ̍lī, mi̍ Chi̍i̍sū ve̍e̍lū chūāāmbūa̍a̍. Mbo̍ dīmī āā, “Lā ma᷄l ndā mā hīŋ nāa̍ yā chu̍a̍. Lā ku̍u̍nā nda̍ le̍. Kāni̍ fo̍ndōle̍, le̍ ha̍ā ndo̍ō māsāle̍ Mɛ̄lɛ̄ka̍le̍ŋ lē chō ni̍.

¹⁷Mī di̍mu̍l nya̍, wānā o̍ wāna̍ chɛ̍l mī Mɛ̄lɛ̄ka̍ wa̍ māsāa̍ ndu̍ chōo̍ māā chūāāmbɔ̄ le̍, ō lu̍e̍ī o̍ māsāle̍ Mɛ̄lɛ̄ka̍le̍ŋ ni᷄ŋ te̍.”

¹⁸Mi̍ wānā bɛ̍ndū pīlɛ̍ nyūnā Chi̍i̍sū āā, “Ti̍chɛ̄i̍nɔ̄ kɛ̄ndɔ̄ɔ̍, ō yɛ̄ɛ̍nɛ̍ ya̍ I̍ to̍sa̍ yɛ̍ mī sɔ̍la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍?”

¹⁹Mi̍ Chi̍i̍sū nyu̍nā ndu̍ āā, “Le̍ yɛ̄ɛ̍nɛ̍ ŋ̄ vēēlu̍ yɛ̄ ya̍ āā, ti̍chɛ̄i̍nɔ̄ kɛ̍ndɔ̄ɔ̍? Wānā o̍ wānā cho̍ o̍ kɛ̍ndɛ̄ le̍ mɛ̄ɛ̍ Mɛ̄lɛ̄ka̍ ndu̍ pīlɛ̍ kpe̍.

²⁰Ā sīnā sa̍wāla̍ Mɛ̄lɛ̄ka̍ ke̍ Mūu̍sē la̍ŋ. Sāwāla̍ŋ nda᷅ŋ lā dīmi̍ āā, ‘Su̍u̍ndā le̍. Di̍ī wāna̍ chi̍o̍o̍ le̍. Yɔ᷅ŋ lēvīī le̍. Tɛ̍ndā se̍īlē lāka̍fā le̍. Ke̍ fi̍nyā nu̍m bɛ̄ɛ̄le̍ŋ a̍ kālā nu̍m.’ ”

²¹Mi̍ pōo̍ mūlūl ndu̍ āā, “I̍ lo̍ ō pɔ̄mbɔ̄ mi̍ ka̍ndū sāwāla̍ŋ nda᷅ŋ kpe̍de̍ chu̍a̍a̍.”

²²Mɛ̄ɛ̍ Chi̍i̍sū tu̍e̍ī nyɛ̄ pōo̍ dīmi̍ wo̍, mbo̍ dīmūl ndu̍ āā, “Ō lo̍ wɔ̄ nu̍m nyɛ̄ pīlɛ̍ le̍ tōsāa̍. Kɔ̍ mā kɔ̍ pi̍sī nyɛ̄ o̍ nyɛ̄ ŋ̄ nɔ̄ mā ke̍ wānāā tāmbɛ̍i̍ya̍ ka̍ni̍ŋ mu̍ŋ. Ā chō sūllo̍ sɔ̄lā o̍ Mɛ̄lɛ̄ka̍ lo̍. Tē a̍ to̍sa̍ he̍ī pɛ̍ ā hīŋ, ā sīmnu᷄ŋ bu̍ɛ̍ī nī.”

²³Ndu̍yɛ̍, pōo̍ ho̍ō ndu̍ o̍o̍ su̍l ta̍u̍. Le̍ he̍ī, mɛ̄ɛ̍ Chi̍i̍sū di̍mi̍ māā ō pīsī nyɛ᷅ o̍ nyɛ̄ o̍ nɔ̍, mbo̍ tāmbū kɔ̄l ta̍u̍.

²⁴Mɛ̄ɛ̍ Chi̍i̍sū che᷅ māā ō tāmbu̍ kɔ̄l, mbo̍ dīmī āā, “Ī chō ī kālā mī wānā su̍lāa̍ lūɛ̄ī o̍ māsāle̍ Mɛ̄lɛ̄ka̍le̍ŋ ni᷄ŋ.

²⁵Ī chō bɛ̍ɛ̍ŋ le̍ vīsī bānā bānā nda̍ vēēlū āā, nyɔ̍mi̍ɔ̍ɔ̍ wo̍ mbō kēēku̍ o̍ tɛ̄ɛ̄ŋgū lēsīɛ̄ndīo̍o̍ ni᷄ŋ mbo̍ hīāū le̍ wānā su̍lāa̍ lūɛ̄īyɔ̄ɔ̍ o̍ māsāle̍ Mɛ̄lɛ̄ka̍le̍ŋ ni᷄ŋ.”

²⁶Mi̍ wānāa̍ tu̍e̍ī nyɛ̄ Chi̍i̍sū di̍mi̍ wo̍ wa̍ nyūnā ndu̍ āā, “Mɛ̄ɛ̍, nɛ̄ɛ̍nɛ̍ pi̍āŋ yɛ̍ ni̍ŋ?”

²⁷Mbo̍ dīmūl nda̍ āā, “Nyɛ̄ wāna̍ chi̍o̍o̍ ō nɔ̍lā to̍sā le̍ wo̍, Mɛ̄lɛ̄ka̍ ndu̍ nɔ̍lā mbō tōsa̍ ndu̍.”

²⁸Mi̍ Pītɛ̍ di̍mūl ndu̍ āā, “Māsānɔ̄ɔ̍, lo̍o̍nu̍ŋ māā ŋ̄ ma᷄l nyɛ̄ o̍ nyɛ̄ na̍a̍ ŋ̄ nɔ̄ mi̍ ŋ̄ tūāl nu̍m kɔ̄ɔ̄lī.”

²⁹Mi̍ Chi̍i̍sū di̍mūl nda̍ āā, “Mī di̍mu̍l nya̍, wānā o̍ wāna̍ ma̍l chīɛ̄ī ndɔ̄ɔ̍ pɛ̍, kɛ̄lɛ̄ŋgāā la̍a̍ ndɔ̄, kɛ̄lɛ̄ŋgāā pɔ̄mbūāā ndūa̍a̍, kɛ̄lɛ̄ŋgāā bɛ̄ndāā ndūa̍a̍, kɛ̄lɛ̄ŋgāā kāla̍ ndɔ̍ kɛ̄lɛ̄ŋgāā fi̍nyā ndɔ̄, kɛ̄lɛ̄ŋgāā chūāūwāā ndūa̍a̍, le̍ tōsāa̍ mī Mɛ̄lɛ̄ka̍ wa̍ māsāa̍ wāŋnda̍ chōo̍ pɛ̍,

³⁰wānā ko̍ŋ chō hūnɔ̄ɔ̄ nyɛ̄ sɔ̄lā o̍ te̍le̍ŋndo̍ ho̍ō ni᷄ŋ, mbō hīōū nyɛ̄ o̍ nyɛ̄ ndu̍ o̍o̍ nɔ̍, ndu̍yɛ̍, mbō hu᷄ŋ sɔ̍lā yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍ fɛ̍ɛ̍ŋ.”

³¹Mi̍ Chi̍i̍sū ku̍ā a̍ bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍, nda̍ kpe̍e̍le̍. Mbo̍ dīmūl nda̍ āā, “Ŋ̄ chō la̍ŋ Chūlu̍sɛ̄lɛ̄m. Ndu̍yɛ̍, nyɛ̄ o̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ pōōnyi̍a̍a̍ a̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ o̍kɔ̄ɔ̄, ō chō yɔ̄nɔ᷄ŋ kpe̍de̍.

³²Ā chō ndu̍ mālɔ̄ɔ̄ wānāa̍ cho̍ a̍ Chu̍ū le̍ wa̍ o̍ ba̍. Ndu̍yɛ̍ o̍ ko̍ŋ kɔ̍ɔ̍lī, mā sīīŋgu̍u̍ ndu̍ nyɛ̄ ndā ma̍māā. Ā chō ndu̍ yīōū mā tūfū ndu̍ lɔ̄lūa̍ŋ chōo̍ mā lɔ̄ɔ̄ ndu̍ lɔ̄ɔ̍ pi̍la̍. Ndu̍yɛ̍ o̍ ko̍ŋ kɔ̍ɔ̍lī, mā dīī ndu̍.

³³Tē ā dīī ndu̍ pɛ̍, o̍ pālɛ̍i̍ yāa̍ ndɔ̄ɔ̍ ō mīīŋgu̍ vɛ̄lɛ̄ yōōmū.”

³⁴Kɛ̍, bu̍ɛ̍i̍yāā ndūa̍a̍, nyɛ᷅ o̍ nyɛ̄ o̍ di̍mi̍, ā sīna̍ ndu̍ pɛ̄ŋgu̍ le̍. Mi̍ ī yɔ̄nu᷄ŋ mɛ̄ɛ̍ nda̍ vīŋ wa̍nā i̍sɔ̍ɔ̍. Ā sīna̍ nyɛ᷅ o̍ wa̍ sūɛ̍i̍ a̍ ndu̍ o̍kɔ̄ɔ̄ wo̍ le̍.

³⁵Mɛ̄ɛ̍ Chi̍i̍sū fu̍u̍lu̍u̍ Chɛ̄lu̍i̍kō i̍kɛ̍i̍, po̍ su̍mɛ̍i̍ pi᷅lɛ̍ wa̍ īchāli̍ o̍ nɛ̄īyo̍ da̍ŋga̍la̍ mbō pīɛ̄ī wa᷅ŋnda̍ nyɔ̄ɔ̍ŋ.

³⁶Mɛ̄ɛ̍ pōo̍ ho̍ō tūēī fāŋgāa̍ hīōūwɔ̄ɔ̍ wɔ̍kɔ̄ wɔ̄kɔ̄, mbo̍ nyūnā āā, “Wɔ̄kɔ̄ wɔ̄kɔ̄ bɛ̄ndū yɛ̄ɛ̍nɛ̍ cho̍ yɛ̄ ho̍ō sūɛ̍i̍?”

³⁷Mi̍ wāŋnda̍ dīmūl ndu̍ āā, “Chi̍i̍sū ho̍ō Na̍a̍sa̍lūɛ̄ī, ndu̍ cho̍ hīōūwɔ̄ɔ̍ ni̍.”

³⁸Mɛ̄ɛ̍ o̍ tu̍e̍ī le̍nde̍, mbo̍ dēŋī chōo̍ cho̍o̍ kpe̍le̍ŋ āā, “Chi̍i̍sū, nūm Po̍ Dēēvi̍o̍o̍, tūīīnu̍ŋ ya̍ īnyīɛ̍ɛ̍ fɔ̍.”

³⁹Kɛ̍, mi̍ wānāa̍ wā lāchī wa̍ kpāā ndu̍ āā, “Pɛ̍ŋgi̍ bɔ̍ɔ̍lūūwo̍.” Kɛ̍, mbo̍ chɔ̄ɔ̄lū dēŋī āā, “Nūm Po̍ Dēēvi̍o̍o̍, tūīīnu̍ŋ ya̍ īnyīɛ̍ɛ̍ fɔ̍.”

⁴⁰Mi̍ Chi̍i̍sū si᷅m. Mbo̍ dīmūl wāŋnda̍ māā ā hu᷄ŋ a̍ ndu̍ nāa̍ ndu̍ chu̍a̍. Mɛ̄ɛ̍ pōo̍ sɔ̄ɔ̄ŋgu̍u̍ Chi̍i̍su̍ īkɛ̄i̍, mi̍ Chi̍i̍sū nyūnā ndu̍ āā,

⁴¹“Ō yɛ̄ɛ̍nɛ̍ ŋ̄ hɛ̄na̍ŋ yɛ̍ mī to̍sa̍l nu̍m?” Mi̍ pōo̍ dīmī āā, “Fāllo̍, I̍ hɛ̍na̍ŋ mī che᷅.”

⁴²O̍ ko̍ŋ, mi̍ Chi̍i̍sū di̍mī āā, “Ka̍ndu̍ vɛ̍lɛ̄ chɔ̄ɔ̍. Tīīnda᷄ŋ ŋ̄ nɔ̄ wo̍ tōsa̍ ma̍ sīāŋgū.”

⁴³O̍ lē pīlɛ̍ ni᷄ŋ kpe̍, mbo̍ chā wa̍la̍ŋ. Mbo̍ tūāl Chi̍i̍su̍ kɔ̄ɔ̄lī, mbō kūā a̍ Mɛ̄lɛ̄ka̍ sāŋgālāa̍. Mɛ̄ɛ̍ wāŋnda̍ chē nyɛ̍ yɔ̍nu̍ŋ ndo̍, nda̍ bɛ̍ɛ̍ ma̍ sāŋgālā Mɛ̄lɛ̄ka̍.