Read Southern Kisi Lu̍kū 19 Bible Online

Lu̍kū 19 - Southern Kisi bible

Lu̍kū 19

¹Mi̍ Chi̍i̍sū fu̍u̍lūū Chɛ̄lu̍i̍kō, ndu̍yɛ̍, mbo̍ wā kēēkōo̍ chi̍o̍o̍ tɛ̄ɛ̄ŋ.

²Po̍ pi᷅lɛ̍ wa̍ lo̍ŋ dīōla̍ŋ āā Sāki̍ɔ̍ɔ̄. Māsa̍ kɔ̍sɔ̄ŋnda̍ o̍ wa̍ ni̍. Ndu̍yɛ̍, ō wa̍ wāna̍ nyɛ̄ sɔ̄lāā.

³Pōo̍ ho̍ō ndu̍ o̍o̍ nɔ̍ yēēmɛ̍i̍ le̍ mī ndu̍ o̍o̍ che᷅ wāna̍ Chi̍i̍sū cho̍ wo̍. Kɛ̍, ō nɔ̄la̍ le̍, kāni̍ fāŋgāa̍ wa̍ ta̍u̍, ndu̍yɛ̍ wānā bi̍ŋgīo̍o̍ o̍ wa̍ ni̍.

⁴Le̍ he̍ī, mbo̍ nyāānu᷄ŋ la̍chi̍ o̍ nɛ̄i̍ Chi̍i̍sū ndu̍ o̍o̍ nɔ̍ le̍ kɔ̄la̍ŋ ndo̍. Mbo̍ kɔ̍ he᷅l o̍ yɔ̄m si̍ka̍mɔ̄ɔ̄, le̍ hāli̍ kpe̍ŋ mbō chē Chi̍i̍sū.

⁵Mɛ̄ɛ̍ Chi̍i̍sū fu̍u̍lu̍u̍ o̍ fo̍ndāŋ kōŋ, mbo̍ tōfā o̍ yɔ̄mndo̍ chōo̍. Mbo̍ dīmūl Sāki̍ɔ̍ɔ̄ āā, “Sāki̍ɔ̍ɔ̄, to̍l chɔ̍ chɔ̍. Mīāl nūm ya̍ I̍ cho̍ hāū ni̍.”

⁶Mi̍ Sāki̍ɔ̍ɔ̄ tu̍āl chɔ̍ chɔ̍. Ma̍ kūā o̍ chīɛ̄ī ndɔ̄ɔ̍. Mbo̍ kɔ̍ yi̍yā Chi̍i̍sū a̍ kɔ̄l kɛ̄ndɛ̄.

⁷Mɛ̄ɛ̍ wāŋnda̍ chē nyɛ̍ yɔ̍nu̍ŋ ndo̍, nda̍ kpe̍de̍ ma̍ kāndū ŋɔ̄ɔ̄chīa̍ŋnda̍ŋ āā, “Ō kūɛ̄ le̍ wāa̍ mīāl wāna̍ yɔ̄ŋ wɔ̄ɔ̍ŋndo̍.”

⁸O̍ ko̍ŋ kɔ̍ɔ̍lī, mi̍ Sāki̍ɔ̍ɔ̄ si᷅m wāŋnda̍ kpe̍de̍ la̍chi̍ mbo̍ dīmī āā, “Fāllo̍, nyɛ̄ o̍ nyɛ̄ ya̍ I̍ nɔ̍, I̍ cho̍ pīɔ̄ū tɛ̍ɛ̄ŋ mī ke̍ wānāā tāmbɛ̍i̍ya̍. Ndu̍yɛ̍, nyɛ̄ o̍ nyɛ̄ ya̍ I̍ de᷅ wānā o̍ wānā o̍ bā a̍ lāka̍fā, I̍ cho̍ ni᷅ŋ mīŋgī wānā ko̍ŋ o̍ bā sālā hīɔ̍ɔ̍lu̍.”

⁹Mi̍ Chi̍i̍sū di̍mūl ndu̍ āā, “Mɛ̄lɛ̄ka̍ pīŋi̍ hāū wa̍nāa̍ cho̍ chīɛ̄ī ni̍ŋ na̍nu᷄ŋ nda̍. Pōo̍ ho̍ō bɛ̍ɛ̍ o̍ pūlāle̍ E̍bīlāha᷅mnde̍ŋ chōo̍ o̍ fu̍la̍ ni̍.

¹⁰Kāni̍ fu̍u̍le̍, wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ hīŋ māhūnāā le̍ mbō nūūvi̍a̍a̍ wānāa̍ cho̍ ā lāāsīa̍ŋ nda̍, ndu̍yɛ̍ mbō pīŋi̍ nda̍.”

¹¹Mɛ̄ɛ̍ wāŋnda̍ wa̍ nīla̍ŋ yāŋɔ̄ɔ̍ o̍ nyɛ̄ Chi̍i̍sū wa̍ dīmīo̍o̍ wo̍, mbo̍ hīāū lāchī a̍ nda̍ tālo̍o̍ dīmūllo̍. Ndu̍yɛ̍, Chi̍i̍sū wa̍ ni᷅ŋ Chūlu̍sɛ̄lɛ̄m i̍kɛ̍i̍. O̍ ko̍ŋ kɔ̍ɔ̍lī, mi̍ wāŋnda̍ wā yīya᷄ŋndo̍ māā, Mɛ̄lɛ̄ka̍ wāa̍ Māsāa̍ wāŋnda̍ chōo̍ ō chō sūɛ̍i̍ yɔ̍nu̍ŋ su̍ŋ su̍ŋ.

¹²Le̍ he̍ī, mi̍ Chi̍i̍sū di̍mūl nda̍ tālo̍o̍ āā, “Po̍ Sa̍la̍ma̍ pi᷅lɛ̍ chɛ̍ŋ ni̍, mbo̍ kɛ̄ɛ̄sīāā le̍ kɔ̄la̍ŋ o̍ lɛ̄ŋndē pīlɛ̍ ni᷄ŋ pɔ̍ le̍ mī nda̍ a̍a̍ kɔ̍ chu̍ā ndu̍ māsāle̍ŋ le̍ mī ndu̍ o̍o̍ hu̍ŋ wa᷅ o̍ lɛ̄ŋndē ndɔ̄le̍ŋ chōo̍. O̍ ko̍ŋ kɔ̍ɔ̍lī, tē nda̍ a̍a̍ chu̍a̍ ndu̍ māsāle̍ŋ pɛ̍, ndu̍ o̍o̍ mi̍i̍ŋgu̍.

¹³Kɛ̍ lɔ̍ɔ̍ pa̍ o̍ ku̍ā mbo̍ vēēlū bu̍ɛ̍i̍yāā ndūa̍a̍ ŋ̄wāŋ tɔ̍. Mbo̍ chūā ka̍ni̍ŋ ŋ̄ko̍o̍līi̍yo̍ŋ[1] tɔ̍, mbo̍ pīɔ̄ū nda̍. Mbo̍ dīmūl nda̍ āā, ‘Lā kōma̍ hi̍ŋnu᷄ŋ a̍ nyɛ̄ sɔ̄lāa̍ ho̍ō, ha̍a̍a̍ mbō lo̍ o̍ ko̍ŋ mī mi̍i̍ŋgu̍.’

¹⁴Kɛ̍, mɛ̄ɛ̍ o̍ ku̍ɛ̄ mi̍ wāŋnda̍ o̍ lɛ̄ŋndē ndɔ̄le̍ŋ ni᷄ŋ a̍ tu᷅l ndu̍ lēyɛ̄. Ma̍ vīām wānā lo̍ŋ āā, ‘Kɔ̍ di̍mūl nda̍ āā, Ŋ̄ hɛ̄na̍ŋ mī lāŋu̍nɔ̄ kōŋ ō wa̍ na̍a̍ chōo̍ ma̍sā le̍.’

¹⁵“Kɛ̍ o̍ ko̍ŋ ni̍ŋ kpo̍u̍, mbo̍ sɔ̍la̍ māsāle̍ŋ ka̍ŋga̍la̍ŋ. Mbo̍ mīīŋgū. Mɛ̄ɛ̍ o̍ mi̍i̍ŋgu̍, mbo̍ vīām wānā ma̍ vēēlū bu̍ɛ̍i̍yāā ndūa̍a̍ ndu̍ o̍o̍ ke̍ nyɛ̄ sɔ̄lāa̍ wa̍. Ndu̍ o̍o̍ hɛ̍na̍ŋ mī ndu̍ o̍o̍ si̍na̍ mɛ̄ɛ̍ kpɛ̍ nda̍ sɔ̄la̍ nyɛ̄ sɔ̄lāa̍ o̍ ka̍ni̍ŋ o̍ ke̍ nda̍ wo̍ŋ ni᷄ŋ yɛ̍.

¹⁶Mi̍ bu̍ɛ̍ī tāso̍o̍ hūŋ. Mbo̍ dīmī āā, ‘Māsānɔ̄ɔ̍, ka̍ni̍i̍ īko̍o̍līi̍ ŋ̄ ke̍ ya̍ ve̍, ka̍ni̍o̍ŋ ŋ̄ de᷄l lēchōo̍ tɔ̍.’

¹⁷Mi̍ ma̍sānɔ̄ ndɔ̄ɔ̍ dīmūl ndu̍ āā, ‘Ni̍wa̍li̍, ā chō bɔ̄ɔ̍ bu̍ɛ̍ī kɛ̄ndɛ̄. Ā chō sa̍na̍a̍ o̍ nyɛ̄m pɔ̄mbɔ᷄ŋ chōo̍. Le̍la̍ŋ, I̍ cho̍ nu̍m sīīŋgūū māsāa̍ chi̍o̍o̍ŋ tɔ̍ cho̍o̍.’

¹⁸Mi̍ bu̍ɛ̍ī dīi̍ŋ ndɔ̄ɔ̍ hūŋ. Mbo̍ hu᷄ŋ di̍mī āā, ‘Māsānɔ̄ɔ̍, ka̍ni̍i̍ īko̍o̍līi̍ ŋ̄ ke̍ ya̍ ve̍, ka̍ni̍o̍ŋ ŋ̄ de᷄l lēchōo̍ ŋ̍ ŋu̍ɛ̍ɛ̍nu̍.’

¹⁹Mi̍ ma̍sānɔ̄ ndɔ̄ɔ̍ lō lo̍ŋ mbo̍ dīmūl ndu̍ āā, ‘Nūm bɛ̍ɛ̍, le̍nde̍ ko̍ni̍. Ī cho̍ nu̍m sīīŋgūū māsāa̍ chi̍o̍o̍ŋ ŋ̄ ŋūɛ̍ɛ̍nu̍ cho̍o̍.’

²⁰“Mi̍ bu̍ɛ̍īyo̍ ō pīlɔ̍ɔ̄ hūŋ, mbo̍ dīmī āā, ‘Māsānɔ̄ɔ̍, ā chē ka̍ni̍i̍ nu̍mnde̍. Mɛ̄ɛ̍ ŋ̄ ke̍ ya̍, mi̍ yi̍ī ndi̍ o̍ yɛ̄ŋgi̍sɛ̄i̍yo̍ ni᷄ŋ po᷅ŋ mi̍ kɛ̍sī kɔ̍dɔ̍.

²¹Kāni̍ fu̍u̍le̍, sīōōŋnde̍ wa̍ ya̍. Kāni̍ fo̍ndōle̍, ā chō bɔ̄ɔ̍ wa̍nā ka̍lā ka̍lā. Nyɛ̄m pi̍la̍ŋ ŋ̍ hɛ̍na̍ŋ nu̍m pōōndīa̍a̍ ni̍. Tɔ̄lɔ̄ɔ̄ ŋ̄ to᷅l te̍ wo̍, ndu̍ ŋ̄ kēndī a̍ ka̍ka̍ ni̍.’

²²Mi̍ ma̍sānɔ̄ ndɔ̄ɔ̍ lō lo̍ŋ mbo̍ dīmūl ndu̍ āā, ‘Mɛ̄ɛ̍ nūm pi̍la̍ di̍mi̍ a̍ ya̍ o̍kɔ̄ɔ̄ yɛ̍, le̍nde̍ ya̍ I̍ cho̍ tōsā a̍ nūm ni̍. Ā chō bɔ̄ɔ̍ bu̍ɛ̍ī kɔ̄l vēsɛ̍i̍ bɛ̍ndū. A̍ si̍na̍ le̍nde̍ cha̍la̍ŋ māā I̍ cho̍ wānā ka̍lā ka̍lā, ndu̍yɛ̍ māā nyɛ̄m pi̍la̍ŋ hɛ̍na̍ŋ ya̍ pōōndīa̍a̍ ni̍ māā tɔ̄lɔ̄ɔ̄ ya̍ I̍ to᷅l te̍ wo̍, ndu̍ ya̍ I̍ ke̍ndī a̍ ka̍ ka̍ ni̍.

²³Vɛ᷅ ni᷅ŋ a̍ do̍u̍ nyɛ̍ nī sɔ̍lāa̍ nāa̍ wāŋnda̍ māndā nyɛ̍ sɔ̄lāa̍ wa̍ le̍? Tē lo̍ŋ ko̍ni̍ nūm o̍o̍ dɔ̍ū ni̍, mɛ̄ɛ̍ ya̍ i̍i̍ hi᷅ŋ nu̍a̍ā yɛ̍, chūa̍a̍ ko̍ni̍ ya̍ i̍i̍ chu̍ā ni᷅ŋ mu̍ŋ a̍ ba̍na̍sīi̍yo̍ lēchōo̍ ni̍.’

²⁴“Mbo̍ lō o̍ ko̍ŋ mbo̍ dīmūl bu̍ɛ̍i̍yāa̍ wa̍ ndu̍ īkɛ̄i̍ ya̍ āā, ‘Lā pūu̍ ndu̍ ka̍ni̍i̍ īko̍o̍līi̍ ke̍ŋ o̍ bā mī lā ke̍ wāna̍ nɔ̍ ka̍ni̍ŋ ŋ̄ko̍o̍līi̍yo̍ŋ tɔ̍ wo̍.’

²⁵Kɛ̍, ma̍ dīmūl ndu̍ āā, ‘Māsānɔ̄ɔ̍, ndu̍ nɔ̍ ni᷅ŋ ka̍ni̍ŋ ŋ̄ko̍o̍līi̍yo̍ŋ tɔ̍, mī ŋ̄ ke̍ ndu̍ vɛ̄lɛ̄?’

²⁶Mbo̍ dīmūl nda̍ āā, ‘Mī dīmu̍l nya̍, wānā o̍ wāna̍ nɔ̍ o̍ bā, Mɛ̄lɛ̄ka̍ chō ndu̍ chɔ̄ɔ̄lū kē. Kɛ̍ wāna̍ nɔ̍ o̍ bā le̍ wo̍, ō pɔ̄mbɔ̄ o̍ nɔ̍ o̍ bā wo̍ bɛ̍ɛ̍, Mɛ̄lɛ̄ka̍ chō ndu̍ pōōndā o̍ bā.

²⁷Ya̍a̍mɔ̍ɔ̍wa̍a̍ nīa̍a̍ a̍ hɛ̍na̍ŋ mī wa̍ nda̍ chōo̍ ma̍sā le̍ wa̍, nda̍ nda̍, lā kɔ̍ hu᷅ŋ a̍ nda̍ mī lā hu᷄ŋ di̍ū nda̍ ya̍ o̍ hɔ̄l.’ ”

²⁸Mɛ̄ɛ̍ Chi̍i̍sū di̍mi̍ dīōmnda̍ŋ nda᷅ŋ, mbo̍ bīī kɔ̄la̍ŋ Chūlu̍sɛ̄lɛ̄m.

²⁹Fūūlūūwo̍ Bɛ̍fēē a̍ Bɛ̍ta̍nī chi̍e̍e̍ i̍kɛ̍i̍ o̍ Pēmbīī Yɔ̄mīī Ɔ̄li̍fīi̍ve̍, mbo̍ vīām bu̍ɛ̍i̍yāā ndūa̍a̍ ā ŋīɔ̍ɔ̍ŋ.

³⁰Mbo̍ dīmūl nda̍ āā, “Lā kɔ̍ o̍ sɔ̄ndɔ̄kɔ̍lɔ̍ɔ̍ nya̍ lāchī. Tē lā fūūlu̍u̍ pɛ̍, lā chō sōfɛ̍lɛ̍ fɔ̍ŋndɔ̍ɔ̍ kōmāl ō bāā. Lē pīlɛ̍ bɛ̍ɛ̍ wānā ku̍e̍ wɔ̍ le̍cho̍o̍ le̍. Lā tīmbi̍ mī lā chūu̍ ya̍ na̍nu᷄ŋ.

³¹Tē wānā o̍ wānā nyu̍na̍ nya̍ pɛ̍ āā, ‘Lā vɛ᷅ ndu̍ tīmbīo̍o̍?’ Lā dīmi̍ āā, ‘Māsānɔ̄ɔ̍ nɔ̄ kpe̍ku̍ a̍ ndu̍.’ ”

³²O̍ ko̍ŋ kɔ̍ɔ̍lī, mi̍ bu̍ɛ̍i̍yāā Chi̍i̍sū ve᷅m nda̍ kūā. Kɔ̄la̍ŋ, ma̍ sāālu᷄ŋ sōfɛ̍lɔ̍ɔ̍ mɛ̄ɛ̍ o̍ di̍mu̍l nda̍ yɛ̍.

³³Mɛ̄ɛ̍ nda̍ wa̍ ndu̍ tīmbīo̍o̍, mi̍ wānāā chɔ̄lūa̍a̍ nyūnā nda̍ āā, “Lā vɛ᷅ sōfɛ̍lɛ̍ ko̍ŋ tīmbīo̍o̍?”

³⁴Ma̍ mūlī āā, “Māsānɔ̄ɔ̍ nɔ̄ kpe̍ku̍ a̍ ndu̍.”

³⁵O̍ ko̍ŋ kɔ̍ɔ̍lī, ma̍ hūŋ a̍ sōfɛ̍lɔ̍ɔ̍ nāa̍ Chi̍i̍sū chu̍a̍. Hūnɔ̄ɔ̍ a̍ ndu̍, ma̍ pɛ̄ŋgɛ̄līāā dōmāla̍ ndāla̍ŋ sōfɛ̍lɔ̍ɔ̍ o̍ kɔ̄ɔ̄. Ma̍ tōsā mi̍ Chi̍i̍sū cha᷅l lēchōo̍.

³⁶Mɛ̄ɛ̍ o̍ wa̍ kɔ̄la̍ŋ lēchōo̍, mi̍ wāŋnda̍ pɛ̄ŋgɛ̄līāā dōmāla̍ ndāla̍ŋ o̍ nɛ̄ī ndu̍ lāchī, le̍ ndu̍ bɛ̄ɛ̄le̍ŋ kīo̍o̍.

³⁷Mi̍ Chi̍i̍sū fu̍u̍lūū Chūlu̍sɛ̄lɛ̄m i̍kɛ̍i̍. Mɛ̄ɛ̍ o̍ he̍l Pēmbīī Yɔ̄mīī Ɔ̄li̍fīi̍ve̍ le̍ tōlɔ̄ɔ̍ ni᷅ŋ chi̍e̍e̍, mi̍ bu̍ɛ̍i̍yāā ndūa̍a̍ ā kāndū kɔ̄l kɛ̄ndɔ̄ɔ̍, mɛ̄ɛ̍ nda̍ chō ku̍ndā bɛ̄ndōo̍ fa̍ū. Ma̍ kāndū Mɛ̄lɛ̄ka̍ sāŋgālāa̍ chōo̍ cho̍o̍, le̍ wa̍li̍ o̍ wa̍li̍ kɔ̄ndɔ̄fi̍li̍ to̍sa̍ŋ ma̍ chā.

³⁸Ma̍ dīmī āā, “Māsānɔ̄ɔ̍ Mɛ̄lɛ̄ka̍, dɔ̍u̍ ma̍sāa̍ ho̍ō sa̍lā o̍ hi᷅ŋ sɔ̍ŋgɔ̍ nu̍mndo̍ wo̍. Kɔ̄l nyūlōo̍ ō wa̍ o̍ fo̍nda᷄ŋ Mɛ̄lɛ̄ka̍a̍. Sāŋgālāa̍ wa̍ o̍ Mɛ̄lɛ̄ka̍ lo̍.”

³⁹O̍ ko̍ŋ, mi̍ ku̍ndā Fālīsi̍īya̍ a̍ wa̍ fāŋgāa̍ ho̍ō tɛ̄ɛ̄ŋ nda̍, dīmūl Chi̍i̍sū āā, “Ti̍chā, di̍mu̍l bu̍ɛ̍i̍yāā nūmnda̍ ā mēi̍.”

⁴⁰Mi̍ Chi̍i̍sū mu̍lī āā, “Mi̍ di̍mu̍l nya̍, tē ha̍ā mēi̍ pɛ̍, pōūtā po̍ūta̍ŋ nda᷅ŋ lā chō dēŋī chōo̍ cho̍o̍.”

⁴¹Mɛ̄ɛ̍ Chi̍i̍sū fu̍u̍lu̍u̍ Chūlu̍sɛ̄lɛ̄m chi̍e̍e̍ le̍kɔ̍ɔ̍, mbo̍ chā chi̍o̍o̍ mbo̍ chāŋ le̍ ndu̍.

⁴²Mbo̍ dīmī āā, “Wāŋnda̍ Chūlu̍sɛ̄lɛ̄m, pāa̍le̍ hāūle᷅ŋ bɛ̍ɛ̍, tē nya̍ a̍a̍ si̍nā ni̍ŋ sɔ̍ɔ̍ŋ to̍sā mī wāna̍ chi̍o̍o̍ ō sɔ̄la̍ kɔ̄l nyūlōo̍ wo̍ŋ pɛ̍. Kɛ̍ pe̍sī bɛ̍ɛ̍ lā nɔ̍lā mī lā sīna̍ sɔ̄ɔ̍ŋ mu̍ŋ te̍.

⁴³Pālɛ̍i̍ nyɛ̄ pālɛ̄i̍ chō o̍ nɛ̄ī le̍ nya̍. A̍ bōōndi̍i̍ ke̍ŋ, ya̍a̍mɔ̍ɔ̍wa̍a̍ nyāa̍ chō sāāsāa̍ tāŋgūl mā bɔ̄ŋa̍ chi̍e̍e̍ nyāa̍ kpɔ̍kɔ̍su̍. Ā chō nya̍ bālɔ̄ɔ̄ mā lūe̍i̍ nya̍ o̍ pi̍ŋndo̍ ni᷄ŋ, lā nɔ̍lā mī lā fūla̍ le̍.

⁴⁴Ā chō chi̍e̍e̍ nyāa̍ tɛ̄ɛ̄mbūū a̍ wānā o̍ wāna̍ cho̍ lēni᷄ŋ. Ndu̍yɛ̍, kpi̍līki̍e̍i̍ ī pīlɛ̍ bɛ̍ɛ̍ ā mɛ̍ī ni̍ŋ, mī ī lo̍ o̍ chāa̍ŋ ndɔ̄ cho̍o̍ le̍. Le̍ sa̍bū he̍ī chō yɔ̄nɔ᷄ŋ ndo̍ cho̍ ni̍, māā lā sīna̍ bo̍o̍ndi̍i̍ Mɛ̄lɛ̄ka̍ hīŋ nāa̍ nya̍ chūā ve̍ pɛ̄ŋgu̍ le̍.”

⁴⁵Mi̍ Chi̍i̍sū lu̍ɛ̍ī o̍ chīɛ̍i̍ Mɛ̄lɛ̄ka̍a̍ ni᷄ŋ. Mbo̍ kāndū wānāa̍ wa̍ nyɔ̄ɔ̍ŋ pīsīo̍o̍ wa̍ tōūwɔ̄ɔ̍.

⁴⁶Mbo̍ dīmūl nda̍ āā, “Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ māā Mɛ̄lɛ̄ka̍ dīmi̍ āā, ‘Wāŋnda̍ vēēlū ni̍ŋ chi̍ɛ̍ī nūu̍ āā, chīɛ̄ī pīɛ̄īyāa̍ Mɛ̄lɛ̄ka̍a̍.’ Kɛ̍ mi̍ nya̍ sīīŋgu̍u̍ ndu̍ fo̍ndāŋ vīīya̍ ā vīāŋnūŋ ndo̍.”

⁴⁷Le̍ lēpāa̍ o̍ lēpāa̍ Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̄ī Chu̍ūwa̍ sōlī sa̍lāa̍ wo̍ ni᷄ŋ. Wānāā bɛ̄ndūāā sōlīāā lāsa̍lāa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍ la̍ŋ nda̍, a̍ wānāa̍ cho̍ wāŋnda̍ bōlle̍ŋ nda̍, ā wa̍ kīndīo̍o̍ le̍ ndu̍ dīyɔ̄ɔ̍.

⁴⁸Kɛ̍ ndu̍yɛ̍, nɛ̄ī o̍ nɛ̄ī ve̍ ō nda̍ a̍a̍ lo̍o̍kū mā dīī ndu̍ le̍. Kāni̍ fo̍ndōle̍, yēēmɛ̍i̍ wa̍ wāŋnda̍ kpe̍de̍ le̍ dīōmndā ndɔ̄la̍ŋ nīla̍ŋ yāŋɔ̄ɔ̍.