Read Southern Kisi Lu̍kū 20 Bible Online

Lu̍kū 20 - Southern Kisi bible

Lu̍kū 20

¹Ō wa̍ a̍ pāa̍le̍ pi᷅lɛ̍, mi̍ Chi̍i̍sū wa᷅ wāŋnda̍ pɛ̄ɛ̄kōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Ndu̍yɛ̍, ō wa̍ nda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍. O̍ ko̍ŋ, mi̍ wānāā bɛ̄ndūāā sōlīāā lāsa̍lāa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ lāŋgba̍ā kālla̍ ma̍ hūŋ nāa̍ ndu̍ chu̍a̍.

²Ma̍ nyūnā ndu̍ āā, “Di̍ yɛ̄ɛ̍nɛ̍ ŋ̄ nɔ̄ yɛ̄ le̍ sɔ̄ɔ̍ŋ ŋ̄ chō mu᷅ŋ tōsāa̍ wo̍ŋ? Nɛ̄ɛ̍nɛ̍ ke̍ yɛ̄ nu̍m di̍ ko̍ŋ?”

³Mi̍ Chi̍i̍sū mu̍lī āā, “Ya̍ bɛ̍ɛ̍ I̍ cho̍ nya̍ nyūnā pīlɛ̍ mī lā mūlu̍l la̍.

⁴Ō nɛ̄ɛ̍nɛ̍ ke̍ yɛ̄ Chɔ᷄ŋ di̍o̍o̍ le̍ wāŋnda̍ pūlɔ̄ɔ̍ Mɛ̄lɛ̄ka̍a̍? Bāā Mɛ̄lɛ̄ka̍ ni̍, bāā wāŋndā chīe̍e̍ya̍?”

⁵Mɛ̄ɛ̍ Chi̍i̍sū nyu̍na̍ nda̍ nyūnāa̍ ho̍ō, ma̍ kɛ̄ɛ̄sīāā ndi̍ nda̍ pi̍la̍ tɛ̄ɛ̄ŋ. Ma̍ dīmu̍la᷅ŋ āā, “Tē ŋ̄ dīmi̍ pɛ̍ āā, ‘Mɛ̄lɛ̄ka̍ ke̍ Chɔ᷄ŋ di̍ ko̍ŋ ni̍,’ ō chō na̍a̍ nyūnā āā, ‘Kɛ̍, vɛ᷅ lā la̍a̍la̍ŋ a̍ nyɛ̄ Chɔ᷄ŋ di̍mi̍ wo̍ le̍?’

⁶Tē ŋ̄ dīmi̍ yɛ̄ vɛ̄lɛ̄ pɛ̍ āā, ‘Wāŋndā chīe̍e̍ya̍ ke̍ Chɔ᷄ŋ di̍ ko̍ŋ ni̍, māā ō cho̍ Mɛ̍lɛ̄ka̍ le̍,’ wāŋnda̍ kpe̍de̍ ā chō na̍a̍ vīī a̍ pōūta̍ŋ. Kāni̍ fo̍ndōle̍, ā lāāla̍ŋ māā wāna̍ su̍a̍ā le̍ Mɛ̄lɛ̄ka̍ wo̍ Chɔ᷄ŋ wa̍ ni̍.”

⁷O̍ ko̍ŋ kɔ̍ɔ̍lī, ma̍ mūlī āā, “Ŋ̄ si̍nā wa᷅na̍ ke̍ ndu̍ di̍ ko̍ŋ ndo̍ le̍.”

⁸Mi̍ Chi̍i̍sū lo᷅ o̍ ko̍ŋ mbo̍ di̍mī āā, “Mɛ̄ɛ̍ ya̍ bɛ̍ɛ̍ I̍ chɔ᷅m nya̍ di̍ ya̍ nɔ̍ le̍ sɔ̄ɔ̍ŋ mu᷅ŋ tōsāa̍ wo̍ le̍.”

⁹O̍ ko̍ŋ kɔ̍ɔ̍lī, mi̍ Chi̍i̍sū di̍mūl wāŋnda̍ tālo̍o̍ ho̍ō āā, “Pōo̍ chɛ̍ŋ ni̍, mbo̍ tōsā kpe̍lo̍o̍. Mbo̍ tūāl yɔ̄mīī kūāmɛ̄i̍ lēni᷄ŋ. Mɛ̄ɛ̍ o̍ tɔ᷅l yɔ̄mnde̍ he̍ī, ma̍ chɛ̄la᷅ŋ nda̍ wāŋnda̍ le̍ mā kōma̍ ma̍ndāl ndu̍ kpe̍le̍ ndɔ̄ɔ̍ ho̍ō. O̍ ko̍ŋ kɔ̍ɔ̍lī, mbo̍ kūānu᷄ŋ o̍ lɛ̄ŋndē chēle̍ŋ ni᷄ŋ. Le̍ te̍le̍ŋ vi̍lɛ̄ī ō chō lo̍ŋ.

¹⁰Mɛ̄ɛ̍ bōōnde̍i̍ fūūlu̍u̍ le̍ tɔ̄lɔ̄ɔ̍ ho̍ō kēndīo̍o̍, mi̍ wāna̍ tɔ̄lɔ̄ɔ̍ vīām bu̍ɛ̍ī ndɔ̄ɔ̍ nāa̍ wāŋnda̍ ha̍ā chūā, le̍ mbō dīmu̍l nda̍ mā ke̍ ndu̍ tɔ̄lɔ̄ɔ̍ o̍ cho̍ le̍ ndu̍ wo̍. Kɛ̍ mɛ̄ɛ̍ bu̍ɛ̍īyo̍ ho̍ō kūɛ̄, mi̍ wāŋnda̍ ha̍ā bīī ndu̍ ma̍ lūāā ndu̍. Ma̍ māl ndu̍ mbo̍ kūā bālā fo̍ndō.

¹¹O̍ ko̍ŋ kɔ̍ɔ̍lī, mbo̍ vīām bu̍ɛ̍ī chēle̍ŋ. Ndu̍ bɛ̍ɛ̍, ma̍ lūāā ndu̍ ma̍ tɛ̄ɛ̄mbūū ndu̍ lābɛ̄ɛ̄. Ma̍ māl ndu̍ mbo̍ kūā bālā fo̍ndō.

¹²Mbo̍ vīām vɛ̄lɛ̄ bu̍ɛ̍īyo̍ yāa̍ ndɔ̄ɔ̍. Ndu̍ ndu̍, ma̍ bōōlūū ndu̍ ma̍ sōlī ndu̍ o̍ kpe̍le̍ ka̍lāa̍ ni᷄ŋ.

¹³O̍ ko̍ŋ kɔ̍ɔ̍lī, mi̍ wāna̍ kpe̍lo̍o̍ dīmī āā, ‘Vɛ̄ɛ̍nɛ̍ ya̍ I̍ yɔ̍ŋ yɛ̍?’ Mbo̍ dīmī āā, ‘I̍ cho̍ po̍ ni̍ ka̍a̍lāa̍ vīōmɔ̄ɔ̄. Kɛ̄lɛ̄ŋgāā dɔ̍ɔ̍ mā nɔ̄ bɛ̄ɛ̄le̍ŋ le̍ ndu̍.’

¹⁴Mbo̍ vīām ndu̍. Kɛ̍ mɛ̄ɛ̍ wānāā nda̍ me᷄l kpe̍lo̍o̍ wa̍ chē ndu̍, ma̍ dīmu̍la᷅ŋ āā, ‘Ho̍ō cho̍ hūnɔ̄ɔ̄ nyɛ̄m ki̍ɔ̍ŋ lōō ni̍, tē fi̍nyā ndɔ̄ vi᷅ pɛ̍. Le̍la̍ŋ, lā hu᷄ŋ ŋ̄ dīīnu᷅ŋ ndu̍ mī nyɛ̄m ki̍ɔ̍ŋ ŋ̄ lo̍ mīāl nāā.’

¹⁵O̍ ko̍ŋ kɔ̍ɔ̍lī, ma̍ bīī ndu̍. Ma̍ sōlī ndu̍ o̍ kpe̍le̍ ka̍lāa̍ ni᷄ŋ ma̍ dīī ndu̍.” Mi̍ Chi̍i̍sū lo᷅ o̍ ko̍ŋ mbo̍ nyūnā wānāā o̍ wa̍ tālo̍o̍ ho̍ō dīmūllo̍ wa̍ āā, “Tē wāna̍ tɔ̄lɔ̄ɔ̍ hīŋ pɛ̍, vɛ̄ɛ̍nɛ̍ o̍ to̍sā yɛ̍?

¹⁶Tē ō hīŋ pɛ̍, ō dīu̍ wānāā kāŋ. O̍ ko̍ŋ kɔ̍ɔ̍lī, ō ke̍ wānāā chēle̍ŋ kpe̍le̍ ndɔ̄ɔ̍ ā mānda̍l ndu̍.” Mɛ̄ɛ̍ wāŋnda̍ tūēī nyɛ̄ Chi̍i̍sū di̍mi̍ wo̍, ma̍ dīmī āā, “Mɛ̄lɛ̄ka̍ tu̍ɛ̍ī bɛ̍ɛ̍ le̍.”

¹⁷Kɛ̍, mi̍ Chi̍i̍sū nu̍ā nda̍ chi̍kɛ̍ŋ mbo̍ nyūnā, āā, “Le̍ yɛ̄ɛ̍nɛ̍ dīōmnda̍ cho̍ la᷅ŋ lā pōōnyīāā la̍ŋ lā si᷄m yɛ̄ ni᷅ŋ? Kāni̍ fo̍ndōle̍, mi̍ Yāu̍ Mɛ̄lɛ̄ka̍a̍ dīmī māā, pōū wānāā tāŋgūlāa̍ kɛ̄ɛ̍ māā ō ni᷄ŋ te̍ wo̍, ndu̍ si̍mnu᷄ŋ ni᷅ŋ pōū kpe̍e̍kpe̍i̍ sa̍a̍ tāŋgūllo̍ wo̍ ni̍.

¹⁸Tē wānā de̍l o̍ pōū kōŋ chōo̍ pɛ̍, ō yīmi̍ nu̍m ŋu̍ɛ̍ ŋu̍ɛ̍. Tē ō de᷄l wānā cho̍o̍ pɛ̍, ō pēsi̍ pe̍si̍ nu̍m wɔ̍ wɔ̍.”

¹⁹O̍ ko̍ŋ kɔ̍ɔ̍lī, mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ wānāā bɛ̄ndūāā sōlīāā lāsa̍lāa̍, ā kīndī le̍ Chi̍i̍su̍ bīyɔ̄ɔ̍ lē pīlɛ̍ kpe̍. Kāni̍ fo̍ndōle̍, ā sīna̍ māā le̍ nda̍ o̍ di̍mi̍ tālo̍o̍ ho̍ō ni̍. Kɛ̍ ndu̍yɛ̍, ma̍ yɔ̄ŋ sīōōŋnde̍ le̍ wāŋnda̍.

²⁰Ma̍ sāā ni̍ko̍ mɛ̍ŋgɛ̄lāa̍ le̍ bōōndi̍i̍ wa᷅ le̍tu̍u̍ le̍ ndu̍ bīyɔ̄ɔ̍ ve̍. Ma̍ hīāū ŋ̄wāŋ kɔ̄ɔ̄lī ma̍ vīām nda̍ nāa̍ Chi̍i̍sū chu̍a̍. Ma̍ dīmūl nda̍ le̍ mā chɔ̄mnu̍ŋ māā ā chō wānāā sa̍kpō, ndu̍yɛ̍ o̍ ko̍ŋ kɔ̍ɔ̍lī, mī nda̍ a̍a̍ ye̍ŋ ndu̍ yāŋɔ̄ɔ̄le̍ŋ a̍ nyūūnīāāla̍ŋ. Mɛ̄ɛ̍ tē ndu̍ o̍o̍ di̍mi̍ sūɛ̍i̍ yɔ̍ŋāā pɛ̍, nda̍ a̍a̍ bi̍ī ndu̍, nda̍ a̍a̍ ma̍l ndu̍ māsa̍ māLu̍o̍ma᷅ŋndo̍ o̍ bā.

²¹O̍ ko̍ŋ kɔ̍ɔ̍lī, mi̍ wānāā nda̍ hīōū ka̍ŋ kɔ̄ɔ̄lī wa̍ dīmūl Chi̍i̍sū āā, “Ti̍chā, ŋ̄ sīnā māā dīōmndā ŋ̄ sūāāla̍ŋ lā chō dīōmndā sa̍kpō. Ndu̍yɛ̍, a̍ bu̍u̍la̍ŋ a̍ wānā bɛ̍ndūyɛ̍ī wānā le̍. Tōnya̍a̍ ndu̍ ŋ̄ pɛ̄ɛ̄kū a̍ nyɛ̄ Mɛ̄lɛ̄ka̍ hɛ̄na̍ŋ mī wāŋnda̍ tōsa̍ wo̍ ni̍.

²²Kɛ̍ ndu̍yɛ̍, chɔ̍m ndɔ̍ na̍a̍, vɛ̄ɛ̍nɛ̍ sa̍wāla̍ Mɛ̄lɛ̄ka̍la̍ŋ lā dīmi̍ yɛ̄? Bāā ŋ̄ nɔ̄ mī ŋ̄ ma᷄l pāāwāa̍ māsā bɛ̍ndū Lu̍o̍ma᷅ŋnda̍ o̍ bā, bāā ŋ̄ nɔ̍ mī ŋ̄ ma᷄l te̍?”

²³O̍ ko̍ŋ kɔ̍ɔ̍lī, mi̍ Chi̍i̍sū si̍nā kāŋgālā ndāa̍ pɛ̄ŋgu̍. Mbo̍ dīmūl nda̍ āā,

²⁴“Lā chūu̍ ya̍ ka̍ni̍e̍i̍.” Mɛ̄ɛ̍ nda̍ chūu̍ ndu̍, mbo̍ nyūnā āā, “Ō nɛ̄ɛ̍nɛ̍ cho̍ yɛ̄ ō tūūlāā o̍ ka̍ni̍e̍i̍ he̍ī? Ndu̍yɛ̍, dīōla̍ nɛ̄ɛ̍nɛ̍ la̍ cho̍ yɛ̄ la᷅ŋ lā dūāūwāā lo̍ŋ?” Ma̍ mūlī āā, “Māsā bɛ̍ndōo̍ le̍ lɛ̄ŋīī Lu̍o̍ma᷅ŋnde̍, ndu̍ cho̍ ō tūūlāā lēchōo̍ ni̍.”

²⁵Mbo̍ dīmūl nda̍ āā, “Mɛ̄ɛ̍ lā pāāwa̍ ma̍sā bɛ̍ndōo̍ nyɛ᷄m cho̍ le̍ ndu̍ wo̍ŋ, mī lā pāāwa̍ Mɛ̄lɛ̄ka̍ nyɛ᷄m cho̍ le̍ Mɛ̄lɛ̄ka̍ wo̍ŋ.”

²⁶Mi̍ yāŋɔ̄ɔ̄lē nda̍ ye᷄ŋ ndu̍ le̍ŋ lē bīōndū fo̍ndō. Kāni̍ fo̍ndōle̍, ō dīmi̍ di̍ōm o̍ dīōm wāŋnda̍ o̍ hɔ̄l ō nda̍ a̍a̍ ho᷅l ndu̍ īsɔ̄ɔ̍ le̍ ndu̍ mɛ̄ɛ̍ nda̍ a̍a̍ kɛ̍ɛ̍si̍a̍a̍ yɛ̍ le̍. Mi̍ kɔ̄ndɔ̄fi̍llo̍ bīī nda̍ a̍ mɛ̄ɛ̍ o̍ mu̍lu̍l nda̍ yɛ̍. Ma̍ mēī do̍ŋ.

²⁷Mi̍ ku̍ndā Sādūsi̍īya̍ a̍ di̍mi̍ māā tē wānā vi᷅ pɛ̍, a̍ mi̍i̍ŋgū yo̍o̍mū le̍ wa̍ ā pūm hūŋ nāa̍ Chi̍i̍sū chu̍a̍ a̍ nyūnāa̍.

²⁸Ma̍ dīmī āā, “Ti̍chā, mi̍ Mūu̍sē po̍o̍nyīāā le̍ na̍a̍ Chu̍ūwa̍ āā, ‘Tē ō wa̍ pɛ̍ mī wāŋndo̍ bɛ̄ ndɔ̄ vi᷅ mbō mɛ̄i̍ la̍nɔ̍ɔ̍, kɛ̍ mbō vīlu̍ ŋ̍chu̍a̍u̍ a̍ ndu̍ le̍.’ Āā, ‘Pɔ̄mbɔ̄ ndɔ̄ nɔ̍ mbō chu̍a̍ chūā kōŋ, mā vēlū chūāūwa̍ le̍ bɛ̄ ndɔ̄.’ ”

²⁹Ma̍ hīāū lāchī a̍ sūɛ̍i̍ āā, “Kɛ̍, pūa̍a̍ pi᷅lɛ̍ ā wa̍ nda̍ ŋɔ̍mmɛ̍ū. Ndu̍yɛ̍, ndi̍a̍ā pi᷄lla̍ nda̍ wa̍ ni̍. Mi̍ o̍ wa̍ wānā ba̍nāa̍ nda̍ chōo̍ kpo̍u̍ wo̍ chūā la̍nɔ̍ɔ̍. Kɛ̍, mbo̍ lō o̍ ko̍ŋ, mbo̍ wū, ō vīlu̍ ŋ̍chu̍a̍u̍ a̍ ndu̍ le̍.

³⁰Mi̍ o̍ wa̍ ndu̍ īkɛ̄i̍ yo̍ chūā chūa̍a̍ ho̍ō. Ndu̍ bɛ̍ɛ̍ mbo̍ wū, ō vīlu̍ a̍ ndu̍ le̍.

³¹Mi̍ yāa̍ ndɔ̄ɔ̍ chūā ndu̍. Mi̍ ndu̍ bɛ̍ɛ̍ o̍ wu᷅, ō vīlu̍ a̍ ndu̍ le̍. Mi̍ chūa̍a̍ ho̍ō kēēkū pūa̍a̍ ŋɔ̍mmɛ̍ūwa̍ ha̍ā kpo̍u̍, o̍ bā. Kɛ̍ nda̍ kpo̍u̍, ō pīlɛ̍ bɛ̍ɛ̍ vi̍lu̍ a̍ ndu̍ le̍.

³²O̍ ko̍ŋ kɔ̍ɔ̍lī mi̍ chūa̍a̍ bɛ̍ɛ̍ o̍ wu᷅.”

³³Mi̍ ku̍ndā Sādūsi̍īya̍ ha̍ā nyūnā Chi̍i̍sū, āā, “Tē ō wa̍ yɛ̄ mī wānāā vīlɛ̍i̍ya̍ hu᷄ŋ mi̍i̍ŋgū yōōmū pɛ̍, mɛ̄ɛ̍ la̍nɔ̍ɔ̍ nɛ̄ɛ̍nɛ̍ chūa̍a̍ ho̍ō ō wā yɛ̍ ni᷅ŋ, kāni̍ nda̍ ŋɔ̍mmɛ̍ū kpo̍u̍ ō kēēku̍ nda̍ o̍ bā o̍ nɔ̄ɔ̍ ni᷄ŋ?”

³⁴Mi̍ Chi̍i̍sū lo᷅ lo̍ŋ mbo̍ mu̍lūl nda̍ āā, “Wāŋ pīāāndūa̍a̍, a̍ wāŋ lāāndūa̍a̍ a̍ cho̍ yōōmū te̍le̍ŋndo̍ ho̍ō wa̍, nda̍ chu̍ā la̍a̍ndūa̍a̍ ɔ̄ɔ̄ pīāāndūa̍a̍ ni̍.

³⁵Kɛ̍, wānāa̍ cho̍ wā ā bɛ̄ndāā Mɛ̄lɛ̄ka̍ o̍ hɔ̄l, le̍ wāa̍ yōōmū te̍le̍ŋ ko̍ŋ nda̍, ko̍ŋ cho̍ ni̍, te̍le̍ŋ wānāa̍ vi᷅ wa̍ ā chō mīīŋgū yōōmū wo̍, nda̍ ā chu̍ē ŋ̍la̍a̍ndū kɛ̄lɛ̄ŋgāā ŋ̄pīāāndū le̍.

³⁶Ā wā ni̍ŋ ma̍wa̍ā mɛ̄ɛ̍ ki̍i̍la̍a̍ Mɛ̄lɛ̄ka̍a̍ chō yɛ̍. Ndu̍yɛ̍, ā vi᷅ le̍. Ndu̍yɛ̍, chūāūwāa̍ Mɛ̄lɛ̄ka̍a̍ nda̍ wā ni̍ŋ ni̍, kāni̍ fo̍ndōle̍, ā mīīŋgu̍ yōōmū.”

³⁷Mi̍ Chi̍i̍sū hi̍a̍ū lāchī a̍ sūɛ̍i̍ āā, “Mi̍ Mūu̍sē chɔ᷅m kpe̍nde̍ke̍le̍ māā wānāa̍ wu᷅ wa̍, ā nɔ̄ mā mīīŋgu̍ yōōmū.” Āā, “Lā lōōnūŋ fo̍ndāŋndo̍ o̍ Yāu̍ Mɛ̄lɛ̄ka̍a̍ ni᷄ŋ nāa̍ bɔ̄ɔ̍ wa̍ ŋɔ̄ɔ̍ wa̍. Mi̍ Mūu̍sē ve̍e̍lū Māsānɔ̄ɔ̍ Mɛ̄lɛ̄ka̍ lo̍ŋ āā, ‘Mɛ̄lɛ̄ka̍ E̍bīlāha᷅m, a̍ Āa̍se̍, a̍ Che̍kɔ̍pū a̍ pi̍ɛ̍ī yo̍.’ ”

³⁸Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ dīmī, āā, “Le̍la̍ŋ, Mɛ̄lɛ̄ka̍ ō cho̍ Mɛ̍lɛ̄ka̍ ŋ̄wāŋ vīlɛ̍i̍ le̍. Wānāa̍ cho̍ yōōmū wa̍ Mɛ̄lɛ̄ka̍ ndāa̍ o̍ cho̍ ni̍. Mɛ̄lɛ̄ka̍ ndu̍ ndu̍ o̍ hɔ̄l, wāŋnda̍ kpo̍u̍ ā chō yōōmū.”

³⁹O̍ ko̍ŋ, mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ ā pūm dīmūl Chi̍i̍su̍ āā, “A̍ mu̍li̍ bɔ̄ɔ̍ nyu̍nāa̍ ho̍ō ō kɛ̄ndɛ̄, Ti̍chā.”

⁴⁰O̍ ko̍ŋ kɔ̍ɔ̍lī, ma̍ wō ni᷅ŋ le̍ ndu̍ nyūnāa̍.

⁴¹Mi̍ Chi̍i̍sū nyu̍nā āā, “Le̍ yɛ̄ɛ̍nɛ̍ wāŋnda̍ dīmi̍ yɛ̄ māā, Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, māā po̍ Dēēvi̍o̍o̍ o̍ cho̍ ni̍?

⁴²Kāni̍ fo̍ndōle̍, mi̍ Dēēve̍ pi̍la̍ di̍mī o̍ yāu̍ Sa᷅m ni᷄ŋ māā, Māsānɔ̍ɔ̍ Mɛ̄lɛ̄ka̍ dīmu̍l Māsānɔ̍ nūu̍ āā, Cha̍l na̍nu᷄ŋ o̍ fo̍ndāŋ lēbīɔ̍ɔ̍ o̍ bā nī kɛ̍ndɔ̄ɔ̍ chōo̍

⁴³mbō lo̍ o̍ ko̍ŋ mī to̍sa̍ mā nɛ̍i̍ ya̍a̍mɔ̍ɔ̍wa̍a̍ nu̍mnda̍ a̍ bɛ̄ŋgu̍.”

⁴⁴Mi̍ Chi̍i̍sū nyu̍nā āā, “Tē Dēēve̍ pi̍la̍ ve̍e̍lu̍ pɛ̍ wa᷅ŋndo̍ ho̍ō āā, Māsānɔ̍ɔ̍, vɛ̄ɛ̍nɛ̍ wānā ko̍ŋ ō sīmnūŋ yɛ̍ vɛ̄lɛ̄ po̍ Dēēvi̍o̍o̍?”

⁴⁵Mɛ̄ɛ̍ wāŋnda̍ kpe̍de̍ a̍ wa̍ nīla̍ŋ yāŋɔ̄ɔ̍, mi̍ Chi̍i̍sū di̍mūl bu̍ɛ̍i̍yāā ndūa̍a̍ āā,

⁴⁶“Lā mānda̍ŋ le̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍. Kāni̍ fo̍ndōle̍, ā kāāla̍ kēlāa̍ o̍ dōmāla̍ vi̍lɛ̄īla̍ŋ ni᷄ŋ le̍ chɔ̄mndo̍ māā ā chō wānāā bɛ̄ndū. Ā hɛ̄nāŋ tē wāŋnda̍ wa̍ nda̍ yīlɔ̄ɔ̍ o̍ lɔ̍ɔ̍la̍ŋ ni᷄ŋ fāŋgāa̍ o̍ hɔ̄l pɛ̍, ā sūŋgu᷄ŋ mɔ̍si̍lta̍ŋ o̍ lēbōl. O̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ bɛ̍ɛ̍, ā kūɛ̄ pɛ̍, o̍ kpe̍ŋgbe̍i̍la̍ hi̍a̍ū la᷅ŋ kpo̍u̍ na̍ŋɔ̄ɔ̄la̍ŋ nda̍ hɛ̄nāŋ chālle̍ ni̍. O̍ bɔ̄ŋa᷅ŋnda̍ŋ ni᷄ŋ bɛ̍ɛ̍ ā kūɛ̄ pɛ̍, o̍ kpe̍ŋgbe̍i̍la̍ tāse̍la̍ŋ nda̍ hɛ̄nāŋ cha̍lle̍ ni̍.

⁴⁷Wāŋnda̍ ha̍ā, wāŋ lāāndūāā pīāāndūāā ndāa̍ wū nu̍a̍ā wa̍, vīi̍ya̍a̍ ka̍ŋ nyɛ̄m nda᷄ŋ dīo̍o̍. Ā chɛ᷄ŋ pɛ̍, ā tōl pīɛ̄īlē vīlɛ̄ī vīlɛ̄īle̍ŋ o̍ Mɛ̄lɛ̄ka̍ lo̍ le̍ chɔ̄mnɔ᷄ŋndo̍ wāŋnda̍ o̍ hɔ̄l. Kɛ̍ ndu̍yɛ̍, nda̍ hi̍a̍ū ni̍ŋ nyɛ̍ pālāa̍ sɔ̄lā a̍ wānā o̍ wānā.”