Read Southern Kisi Lu̍kū 21 Bible Online

Lu̍kū 21 - Southern Kisi bible

Lu̍kū 21

¹Bōōndi̍i̍ pi᷅lɛ̍ Chi̍i̍sū wa̍ īchāli̍ o̍ chīɛ̍i̍ Mɛ̄lɛ̄ka̍a̍ ni᷄ŋ, mbo̍ wā mɛ̄ɛ̄ndīa̍ŋndo̍. O̍ ko̍ŋ kɔ̍ɔ̍lī, mbo̍ chā wānāā sūlāa̍ kēlā nda̍ nɔ̄ le̍ Mɛ̄lɛ̄ka̍ la̍ŋ dɔ̄wɔ̄ɔ̍ o̍ kɔ̍fū nda̍ dūāū ka̍ni̍ŋ Mɛ̄lɛ̄ka̍ŋ ndo̍ ni᷄ŋ.

²Mbo̍ chā mi̍ chūā tāmbɛ̍i̍ pi᷅lɛ̍ ō pɔ̍nɔ̍ ndɔ̄ vi᷅ wo̍ hūŋ. Mbo̍ dūāū ka̍ni̍ŋ pɔ̍mbɔ᷄ŋ ŋ̄ mūu̍ŋ.

³O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Mī di̍mu̍l nya̍, chūā vīi̍ ta̍mbɛ̍i̍yo̍ ho̍ō, ndu̍ hi̍o̍ū ka̍ni̍o̍ŋ dɔ̄wɔ̄ɔ̄ a̍ ha̍ā kpo̍u̍.

⁴Wāŋnda̍ ha̍ā kpo̍u̍ ā nɔ̄ ta̍u̍. Ndu̍yɛ̍, nyɛ̄ nda̍ nɔ̄ wo̍ ō ti᷄ŋ ko̍ni̍ nda̍ dɔ̄ū ni̍. Kɛ̍ chūa̍a̍ ho̍ō ndu̍, a̍ bā ndɔ̄ ha̍vɛ̍i̍ ko̍ŋ kpo̍u̍, mbo̍ dūāū ka̍ni̍ŋ pɔ̍mbɔ̄ŋ o̍ ti̍i̍nda̍ŋ ndo̍ŋ fa̍ū.”

⁵Mi̍ wāŋnda̍ ā pūm ā dīmūl Chi̍i̍sū a̍ chīɛ̍i̍ Mɛ̄lɛ̄ka̍a̍ o̍kɔ̄ɔ̄ āā, “To̍fa̍ wɔ̍ mɛ̄ɛ̍ chīɛ̄īyo̍ ho̍ō chō ō tāŋgūlāā a̍ pōūtā kɛ̄ndɛ̄lā bɛ̄ndūla̍ŋ yɛ̍. To̍fa̍ wɔ̍ nyɛ᷅m kɛ̄ndɛ̄ŋ wāŋnda̍ yɔ̄ŋgu̍ le̍ Mɛ̄lɛ̄ka̍ wo̍ŋ.” Mi̍ Chi̍i̍sū lo᷅ lo̍ŋ mbo̍ di̍mūl nda̍ āā,

⁶“Nyɛ̄ o̍ nyɛ̄ nya̍ chō chɔ̄ɔ̍, bōōndi̍i̍ cho̍ fūūlūū mī wāŋnda̍ pēsi̍ mu̍ŋ wɔ̍ wɔ̍. Pōūwo̍ ō pīlɛ̍ bɛ̍ɛ̍ lo᷅ ni̍ŋ o̍ chāa̍ŋ ndɔ̄ cho̍o̍ le̍.”

⁷Mi̍ wāŋnda̍ lō o̍ ko̍ŋ, ma̍ nyūnā Chi̍i̍su̍ āā, “Ti̍chā, chɔ̍m ndɔ̍ na̍a̍ bōōndi̍i̍ sɔ̄ɔ̍ŋ mu᷅ŋ ŋ̄ chō hūnɔ̄ɔ̄ yɔ̄nɔ᷄ŋ nde̍. Ɔ̍ɔ̄ tāāmāsi̍ yɔ̍nūŋ ni̍ŋ le̍ sīnāa̍ māā te̍le̍ŋndo̍ fūūlu̍u̍ le̍ mī sūɛ̍i̍ he̍ī yɔ̄nu̍ŋ ndo̍?”

⁸Mbo̍ mūlī āā, “Lā mānda̍ŋ, yɔ̍ŋi̍ wānā o̍ wānā hu̍i̍ nya̍. Kāni̍ fo̍ndōle̍, wānāā fāŋgā fa̍ŋgā ā hūŋ ni̍ŋ mā chu̍a̍ dīōlā nīla̍ŋ mā dīmi̍ māā nda̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍. Ndu̍yɛ̍, ā hūŋ hi̍ŋ mā dīmi̍ āā, ‘Te̍le̍ŋndo̍ fūūlu̍u̍.’ Kɛ̍, lā tu̍āl nda̍ kɔ̄ɔ̄lī le̍.

⁹Tē lā tūēī pɛ̍ mī chɔ̄ūla̍ŋ lā wa̍, ndu̍yɛ̍ mī lā tūēī mī wāŋnda̍ sīmu̍l māsāa̍ ndāa̍, lā yɔ᷅ŋ īsīōōŋ te̍. Sɔ̄ɔ̍ŋ mu᷅ŋ fɛ̍lɛ̍ŋ ŋ̍ nɔ̍ le̍ yɔ̄nɔ᷄ŋndo̍. Kɛ̍, mu̍ŋ yɔ̍nu̍ŋ bɛ̍ɛ̍, ko̍ŋ chɔ᷅m māā mɛ̄ɛ̄lu̍la̍ chi̍e̍ēŋndo̍ le̍ la̍ fu̍u̍lu̍u̍ la̍ŋ te̍.”

¹⁰Mbo̍ hīāū lāchī a̍ dīmīo̍o̍ āā, “Māsāa̍ a̍ māsāa̍ ā sɔ̄ŋgā ni̍ŋ mī lɛ̄ŋnde̍ŋ a̍ lɛ̄ŋnde̍ŋ ā sɔ̄ŋga̍.

¹¹Lɛ̄ŋnde̍ŋ lē nyīīya̍ ni̍ŋ ta̍u̍ o̍ fo̍ndāŋndā fāŋgā fa̍ŋgā. Yīa̍a̍ŋ mā dēl ni̍ŋ, ndu̍yɛ̍ mī nāāla̍ ta̍ŋ wa᷅ŋnda̍ la̍ŋ lā kūi̍i̍ o̍ fo̍ndāŋndā fāŋgā fa̍ŋgā. Sɔ̄ɔ̍ŋ ŋ̄sīōōŋndo̍ŋ, ŋ̄ chō yɔ̄nɔ᷄ŋ mī kpālōla̍ bɛ̍ndūla̍ŋ lā yɔ̄nu̍ŋ o̍ ha̍la̍a̍ ni᷄ŋ.

¹²Kɛ̍, lɔ̍ɔ̍pa̍ mu᷅ŋ yɔ̄nūŋ, ā chō nya̍ bīyɔ̄ɔ̄ mā tūsi̍ nya̍ nyɛ̄ pālāa̍ chōo̍. Ā chō lākɔ̄ a̍ nya̍ o̍ tōŋgōla̍ Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ, mā kɔ̄ɔ̄sa̍ a̍ nya̍ mā dɔ̄ū nya̍ o̍ chīɛ̄īlā mānyūmnda̍ŋ ni᷄ŋ. Ndu̍yɛ̍, ā chō lākɔ̄ a̍ nya̍ o̍ māsāā bɛ̍ndūa̍a̍ lo̍ a̍ wānāa̍ cho̍ lɛ̄ŋnde̍ŋ bōlle̍ŋ nda̍ le̍ sa̍bū nūu̍.

¹³Tē ā kūɛ̄ a̍ nya̍ pɛ̍, a̍ bōōndi̍i̍ ke̍ŋ nya̍ sɔ̄lā ni᷅ŋ fo̍ndāa̍ le̍ nda̍ nyɛ̄ nya̍ sīnā a̍ ya̍ o̍kɔ̄ɔ̄ wo̍ dīmūllo̍ ni̍.

¹⁴Ndu̍yɛ̍, lā kɛ̄si̍ŋ su̍ɛ̍i̍ he̍ī o̍ kɔ̄l nyɛ̄ kɛ̄ndɛ̍ī. Tē ā kūɛ̄ le̍ kɔ̍ɔ̍sɔ̍ɔ̍ a̍ nya̍ pɛ̍, lā kɛ̍ɛ̍sīāā pɔ̄ɔ̄ mɛ̄ɛ̍ nya̍ kɔ̄ɔ̄sā yɛ̍ le̍.

¹⁵Kāni̍ fu̍u̍le̍, ya̍ pi̍la̍ I̍ cho̍ nya̍ dīōmndā nya̍ nɔ̄ le̍ dīmīo̍o̍ la̍ŋ dɔ̄wɔ̄ɔ̄ o̍ sōndō, ndu̍yɛ̍ mī I̍ ke̍ nya̍ kɔ̄l kālo̍o̍ mɛ̄ɛ̍ nya̍ kɔ̄ɔ̄sā yɛ̍. O̍ ko̍ŋ, wānāa̍ ku̍ā ka̍ŋ a̍ nya̍ o̍ māsāa̍ lo̍ wa̍, ā nɔ̍lā mā si᷄m nya̍ bɛ̍ɛ̍ o̍ hɔ̄l a̍ kɔ̍ɔ̍sɔ̍ɔ̍ le̍.

¹⁶Ndu̍yɛ̍, wānāa̍ ve̍lū nya̍ wa̍ bɛ̍ɛ̍, a̍ bɛ̄ndāā nyāa̍, a̍ pɔ̄mbūāā nyāa̍, a̍ wānāya᷅ŋ nya᷄ŋ, a̍ ndi̍a̍a̍mɔ̍ɔ̍wa̍a̍ nyāa̍, ā chō nya̍ mālɔ̄ɔ̄ wānāa̍ kɔ̍ɔ̍sā a̍ wāŋnda̍ wa̍ o̍ bā. O̍ ko̍ŋ kɔ̍ɔ̍lī, mī wānāa̍ kɔ̍ɔ̍sā a̍ wāŋnda̍ wa̍ tōsa̍ mī nya̍ pūm nda̍ sɔ̄la̍ pīɔ̍mnda̍ŋ.

¹⁷Wāŋnda̍ kpo̍u̍, ā chō nya̍ yɛ̄le̍ŋ tūl le̍ mɛ̄ɛ̍ nya̍ lāāla̍ŋ a̍ ya̍ yɛ̍.

¹⁸Kɛ̍ ndu̍yɛ̍, nyɛ̄ o̍ nyɛ̄ yɔ̍nūŋ ni̍ŋ nya̍ le̍. Yīīŋnde̍ŋ lē pīlɛ̍ bɛ̍ɛ̍ nya̍ o̍ lēbōl lē yɔ̍nūŋ ni̍ŋ nyɛ̍ le̍.

¹⁹Lā si᷄m a̍ dīāllūŋ kālā. O̍ ko̍ŋ, lā nɔ̄lā mī lā pīŋi̍ yōōmūlā nyāla̍ŋ.”

²⁰Mi̍ Chi̍i̍sū di̍mī āā, “Lā chō chɔ̄ mī wānāā chɔ̄ūwa̍ hu᷄ŋ ba̍lū Chūlu̍sɛ̄lɛ̄m. Tē he̍ī yɔ̄nu̍ŋ pɛ̍, mɛ̄ɛ̍ lā sīna̍ ni̍ko̍ māā te̍le̍ŋndo̍ fūūlu̍u̍ le̍ mā pɛ̄l ndu̍.

²¹Tē he̍ī yɔ̄nu̍ŋ pɛ̍, mɛ̄ɛ̍ wānāa̍ cho̍ o̍ lɛ̄ŋndē Chūdi̍a̍āle̍ŋ ni᷄ŋ nda̍ ā nyāānu̍ŋ o̍ pēmbo᷄ŋ. Wānāa̍ cho̍ Chūlu̍sɛ̄lɛ̄m nda̍ ā ma᷄l mā nyāānu̍ŋ. Ndu̍yɛ̍, wānāa̍ cho̍ o̍ sɔ̄ndɔ̄kɔ̍lta̍ŋ nda̍ ā ku̍ā Chūlu̍sɛ̄lɛ̄m chi̍e̍e̍ le̍.

²²Kāni̍ fo̍ndōle̍, bōōndi̍i̍ ke̍ŋ Mɛ̄lɛ̄ka̍ chō wānāā ndūa̍a̍ I̍sɔ̄lūɛ̄ī nyɛ̄ pālāa̍ tūsī chōo̍ ni̍. Ndu̍yɛ̍ o̍ he̍ī ni᷄ŋ, mī nyɛ̄ o̍ nyɛ̍ cho̍ ō pōōnyīāā o̍ Yāu̍ Mɛ̄lɛ̄ka̍a̍ ni᷄ŋ mbō yɔ̍nu̍ŋ mɛ̄ɛ̍ o̍ cho̍ ō pōōnyīāā yɛ̍.

²³Nyɛ̄ pālāa̍ wā ni̍ŋ bɔ̍ɔ̍ le̍ wānāā lāyo᷄lla̍ a̍ ko̍msa̍a̍ o̍ pālɛ̍i̍ ke̍ŋ ni᷄ŋ. Kāni̍ fo̍ndōle̍, nyɛ̄ kīndīlāā bɛ̄ndōo̍ chō hūnɔ̄ɔ̄ o̍ chi̍e̍ēŋndo̍ ho̍ō chōo̍. Mɛ̄lɛ̄ka̍ chō nyɛ̄ pālāa̍ tūsī wāŋnda̍ ha̍ā chōo̍.

²⁴Ya̍a̍mɔ̍ɔ̍wa̍ chō ā ti᷄ŋ dīyɔ̄ɔ̄ a̍ mɔ̄ɔ̍ŋ, ndu̍yɛ̍ mā kūɛ̄ a̍ ā ti᷄ŋ o̍ bīyɔ̄ɔ̍ ni᷄ŋ o̍ lɛ̄ŋnde̍ ni᷄ŋ ba᷅ o̍ bā fe̍e̍ o̍ chi̍e̍ēŋndo̍ chōo̍. Wāŋnda̍ Chūlu̍sɛ̄lɛ̄m ā chō wā wānāa̍ cho̍ a̍ Chu̍ū le̍ wa̍ o̍ bā bɛ̄ŋgu̍, ndu̍yɛ̍ mā lo̍ nda̍ nyɛ̄ pālāa̍ tūsīo̍o̍ chōo̍, ha̍a̍a̍ mbō lo̍ o̍ ko̍ŋ mī bōōndi̍i̍ Mɛ̄lɛ̄ka̍ yūlū le̍ mī wānāa̍ cho̍ a̍ Chu̍ū le̍ wa̍, ā wa̍ wāŋnda̍ Chūlu̍sɛ̄lɛ̄m chōo̍ ve̍ ī fūūlu̍u̍ o̍ mɛ̄ɛ̄lu̍la̍ŋ.”

²⁵Mi̍ Chi̍i̍sū di̍mī vɛ̄lɛ̄ āā, “Sɔ̄ɔ̍ŋ lākpālo᷄ŋ chō yɔ̄nɔ᷄ŋ o̍ pāa̍le̍ŋ, a̍ pāŋge̍i̍, a̍ lōo̍ŋ. Būūla᷄ŋ bɛ̍ndōo̍ wā ni̍ŋ lɛ᷅ŋnde̍ o̍ chi̍e̍ēŋndo̍ chōo̍, mī kɔ̄lta̍ŋ lā lāāsi̍a̍ŋ wa᷅ŋnda̍ a̍ kpōku̍ kpo᷅ku̍ bɛ̍ndū pēe̍ mɛ̄ŋmā īhɛ᷄llo̍ ō wā ni̍ŋ ndo̍.

²⁶Wāŋnda̍ wōū ni̍ŋ kpa̍nɛ̍i̍ a̍ sīōōŋnde̍. Ā wā ni̍ŋ a̍ kɔ̄ltā lānda᷄ŋnda̍ŋ le̍ nyɛ̍ cho̍ hūnɔ̄ɔ̄ yɔ̄nɔ᷄ŋ o̍ chi̍e̍ēŋndo̍ chōo̍ wo̍. Kāni̍ fo̍ndōle̍, kpāāyāla̍ŋ chōo̍ cho̍o̍ la̍ cho̍ fāŋa᷄ŋ o̍ fo̍ndāŋndā ndāla̍ŋ.

²⁷O̍ ko̍ŋ kɔ̍ɔ̍lī, wāŋnda̍ chō wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ chɔ̄ hūnɔ̄ɔ̍ o̍ yu̍mbu̍ yu̍mbo̍o̍ ni᷄ŋ, a̍ kpāāyāa̍, a̍ nāŋɔ̄ɔ̄ bɛ̄ndōo̍.

²⁸Tē sɔ̄ɔ̍ŋ mu᷅ŋ kāndu̍ yɔ̄nɔ᷄ŋndo̍ pɛ̍, lā wa̍ ni̍ko̍ le̍hɔ̍l o̍ nɛ̄ī, kāni̍ fo̍ndōle̍ māā bōōndi̍i̍ Mɛ̄lɛ̄ka̍ chō nya̍ pīŋī ve̍ ī chō ni᷅ŋ kpɛ̍ɛ̍lūŋ.”

²⁹Mi̍ Chi̍i̍sū di̍mūl nda̍ tālo̍o̍ ho̍ō āā, “Lā lōōnu̍ŋ a̍ yɔ̄m fi̍kīi̍yo̍, a̍ yɔ̄mīī chēle̍ŋnde̍.

³⁰Tē lā chē pɛ̍ mī yɔ̄mnde̍ he̍ī ī kāndu̍ pēī sɛ̍nɛ̄īye̍ sōlīo̍o̍, nya̍ pi̍la̍ sīna̍ dɔ̍ɔ̍ māā sīālte̍ŋ lē chō ni᷅ŋ kpɛ̍ɛ̍lūŋ.”

³¹Mi̍ Chi̍i̍sū di̍mī āā, “Le̍nde̍ ko̍ni̍, i̍ cho̍ ni̍. Tē lā chē pɛ̍ mī sɔ̄ɔ̍ŋ mu᷅ŋ ŋ̄ wa̍ yɔ̄nɔ᷄ŋndo̍, lā sīna̍ ni̍ko̍ māā te̍le̍ŋ Mɛ̄lɛ̄ka̍ chō kāndɔ̄ɔ̄ wāa̍ wāŋnda̍ chōo̍ ma̍sāa̍ wo̍, chō ni᷅ŋ kpɛ̍ɛ̍lūŋ.

³²“Mī di̍mu̍l nya̍, wānāa̍ cho̍ yōōmū te̍le̍ŋndo̍ ho̍ō wa̍, ā cho̍ chu̍wɔ̄ɔ̄ wu̍ le̍ ha̍a̍a̍ mī sɔ̄ɔ̍ŋ mu᷅ŋ kpe̍de̍ ŋ̍ yɔ̍nu̍ŋ.

³³Ha̍la̍a̍ a̍ chi̍e̍ēŋndo̍ ā fāŋāŋ, kɛ̍ dīōmndā nīla̍ŋ lā fe̍ŋāŋ le̍cho̍o̍ le̍.”

³⁴“Lā mānda̍ŋ. Lā yɔ̍ŋgu᷄ŋ nya̍ pi̍la̍ o̍ kūūlīāālā nyɛ̄ dīāā la̍ŋ chōo̍, a̍ o̍ kōlɔ̄ɔ̄ kālā ka̍lāa̍ ni᷄ŋ te̍. Ndu̍yɛ̍, lā yɔ̍ŋgu᷄ŋ o̍ kɔ̄l lānda᷄ŋ nyɛ̄ nu̍u̍wāā chi̍e̍ēŋndo̍ ho̍ō ni᷄ŋ te̍. Tē lā yɔ̄ŋgu̍ŋ o̍ nyɔ̄ɔ̍ŋ mu᷅ŋ ni᷄ŋ pɛ̍, pāa̍le̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ nɔ̄ le̍ hūnɔ̄ɔ̍ le̍ŋ lē chō fūūlūū, ndu̍yɛ̍ mī lē kōma̍l nya̍, lā ve᷅ ni̍ŋ kɔ̍l kpo̍so̍ŋ te̍.

³⁵Kāni̍ fo̍ndōle̍, wāŋnda̍ kpo̍u̍ o̍ chi̍e̍ēŋndo̍ chōo̍, pāa̍le̍ŋ nde᷅ŋ lē wōōlū ni̍ŋ nda̍ ko̍ mɛ̄ɛ̍ yāŋɔ̄ɔ̄le̍ŋ lē sāā vi̍sīo̍o̍ nu̍a̍ā yɛ̍.

³⁶Lā mānda̍ŋ. Ndu̍yɛ̍ mī lā pīɛ̍i̍ Mɛ̄lɛ̄ka̍ le̍ te̍le̍ŋ o̍ te̍le̍ŋ. Lā pīɛ̍i̍ Mɛ̍lɛ̄ka̍ le̍ mī lā sɔ̄la̍ kpāāyāa̍ le̍ hīɔ̄lɔ᷄ŋndo̍ o̍ sɔ̄ɔ̍ŋ cho̍ mu᷅ŋ hūnɔ̄ɔ̄ yɔ̄nɔ᷄ŋndo̍ wo̍ŋ ni᷄ŋ, ndu̍yɛ̍ mbō lo̍ o̍ ko̍ŋ, mī lā si᷄m fɛ̍lɛ̍ŋ wāna̍ nda̍ vēēlū āā, Po̍ wānā Pɔ̍nɔ̍ɔ̍ wo̍ o̍ hɔ̄l.”

³⁷Lēpāa̍ o̍ lēpāa̍, Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Tē nyūmnda̍ŋ mā tōl pɛ̍, ō kūɛ̄ o̍ Pēmbīī Yɔ̄mīī Ɔ̄li̍fīi̍ve̍ ve̍ ō kɔ̍ lɔ̍lnu᷄ŋ lo̍ŋ.

³⁸Ndu̍yɛ̍, dīmīo̍o̍ nu̍a̍ā āā, pāa̍le̍ŋ lē sɛ̄, mī wāŋnda̍ kpo̍u̍ a̍ hi᷅ŋ le̍ ndu̍ nīla̍ŋ yāŋɔ̄ɔ̄ o̍ chīɛ̍i̍ Mɛ̄lɛ̄ka̍a̍ ni᷄ŋ.