Read Southern Kisi Lu̍kū 23 Bible Online

Lu̍kū 23 - Southern Kisi bible

Lu̍kū 23

¹O̍ ko̍ŋ, mi̍ lāŋgba̍ā kālāa̍ ki̍a̍lū ya᷅ma̍ŋ nda̍, a̍ wāŋnda̍ ā tūa̍a̍ kpe̍de̍ a̍ cha̍ŋ ma̍ kūā a̍ ndu̍ o̍ Pa̍i̍lē lo̍.

²Ma̍ kāndū sɔ̄ɔ̍ŋ chɔ̄mndo̍ ndu̍ chōo̍. Ma̍ dīmī āā, “Ŋ̄ sāālu̍ŋ po̍o̍ ho̍ō mbo̍ wā wāŋnda̍ sūɛ̍i̍ o̍ lānī. Ō dīmi̍ māā ŋ̄ ma᷅l pāāwāa̍ Māsa̍ māLu̍o̍ma᷅ŋndo̍ o̍ cho̍ māsāa̍ kpe̍de̍ bo᷅lle̍ŋ le̍ lɛ̄ŋīī Lu̍o̍ma᷅ŋnde̍ wo̍ o̍ bā le̍. Mbo̍ dīmī māā ndu̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ko̍ŋ cho̍ yɛ̄ ni̍, Māsā Bɛ̍ndōo̍.”

³O̍ ko̍ŋ kɔ̍ɔ̍lī, mi̍ Pa̍i̍lē nyu̍nā Chi̍i̍sū āā, “Nu̍m cho̍ māsa̍ Chu̍ūwa̍ ni̍?” Mi̍ Chi̍i̍sū mu̍lī āā, “M̍m̄ nyɛ̄ ŋ̄ dīmi̍ wo̍ chō tōnya̍.”

⁴Mi̍ Pa̍i̍lē lo᷅ o̍ ko̍ŋ, mbo̍ dīmūl wānāā bɛ̄ndūāā sōlīāā lāsa̍lāa̍, a̍ fāŋgāa̍ āā, “I̍ se̍e̍lu̍ŋ nyɛ᷅ o̍ nyɛ̄ o̍ to̍sa̍ ō wānā bi̍ī wa̍nā le̍ ndu̍ le̍.”

⁵Kɛ̍ mi̍ wānāa̍ wa̍ ndu̍ kɔ̄ɔ̄lī a̍ sūɛ̍i̍ ya̍, chɔ̄ɔ̄lū ndi̍ kīndīlā a̍ sɔ̄ɔ̍ŋ ndu̍ chɔ̄mndo̍ chōo̍. Ma̍ dīmī āā, “Ndu̍ cho̍ wāŋnda̍ bōlle̍ kīndīo̍o̍, o̍ lɛ̄ŋndē Chūdi̍a̍āle̍ŋ ni̍ŋ kpe̍de̍ a̍ sɔ̄ɔ̍ŋ o̍ cho̍ nda̍ pɛ̄ɛ̄kōo̍ wo̍ŋ ni̍. Ō kāndu̍ ndi̍ Kāli̍lī. Na̍nū o̍ hi᷅ŋ ni᷅ŋ ni̍.”

⁶Mɛ̄ɛ̍ Pa̍i̍lē tu̍e̍ī he̍ī, mbo̍ nyūnā tē Kāli̍lī Chi̍i̍sū fu̍la̍ ni̍.

⁷Mɛ̄ɛ̍ o̍ sa̍a̍lu̍ŋ māā lɛ̄ŋndē Hɛ̍lɔ̍ɔ̄ cho̍ māsāa̍ chōo̍ le̍ŋ Chi̍i̍sū fu̍la̍ ni̍, ndu̍ yɔ̍nūŋ māā Kāli̍lī ni̍, mbo̍ yɔ̄ŋ ndu̍ nāa̍ ndu̍ Hɛ̍lɔ̄ɔ̄ chu̍a̍. Ndu̍yɛ̍, ndu̍ Hɛ̍lɔ̄ɔ̄ ō wa̍ Chūlu̍sɛ̄lɛ̄m bōōndi̍i̍ ke̍ŋ.

⁸Mɛ̄ɛ̍ Hɛ̍lɔ̄ɔ̄ che᷅ Chi̍i̍sū, mbo̍ nāŋ kɔ̄l ta̍u̍. Kāni̍ fo̍ndōle̍, le̍ te̍le̍ŋ vi̍lɛ̄ī ō wa̍ yēēmɛ̍i̍ le̍ ndu̍ chɔ̄ɔ̍. Ō tūēī a̍ Chi̍i̍sū o̍kɔ̄ɔ̄ wānāā fāŋgā fa̍ŋgā ō sōndō. Ndu̍yɛ̍, ndu̍ o̍o̍ nɔ̍ yēēmɛ̍i̍ le̍ Chi̍i̍su̍ chɔ̄ɔ̍ o̍ ka̍a̍ma̍āla̍ŋ tōsāa̍.

⁹Le̍ he̍ī, mbo̍ nyūūnīāā Chi̍i̍su̍ nyūūnīāālā fāŋgā fa̍ŋgā. Kɛ̍ ndu̍yɛ̍, Chi̍i̍sū mu̍li̍ nyɛ̄ o̍ nyɛ̄ le̍.

¹⁰Wānāā bɛ̄ndūāā sōlīāā lāsa̍lāa̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, ā wa̍ lo̍ŋ. Ma̍ chɔ̄m Chi̍i̍su̍ sɔ̄ɔ̍ŋ chōo̍ ŋ̍ ka̍lā ka̍lā.

¹¹Mi̍ Hɛ̍lɔ̄ɔ̄ nda̍ so̍vɛ̄i̍ya̍a̍ ndūa̍a̍ ā tɛ̄ɛ̄mbūū Chi̍i̍sū lābɛ̄ɛ̄. Ma̍ mām ndu̍. Mi̍ Hɛ̍lɔ̄ɔ̄ to̍sā ma̍ wōū ndu̍ dōmā kɛ̍ndɛ̄ bɛ̄ndū pīlɛ̍ le̍ ndu̍ chɔ̄ɔ̄lū māmɔ̄ɔ̍. O̍ ko̍ŋ kɔ̍ɔ̍lī, mbo̍ mīŋgī ndu̍ nāa̍ Pa̍i̍lē chu̍a̍.

¹²Ya̍a̍mɔ̍ɔ̍le̍ŋ le̍ le̍e̍ wa̍ Hɛ̍lɔ̄ɔ̄ tɛ̍ɛ̄ŋ nda̍ Pa̍i̍lē. Kɛ̍, mi̍ nāŋa᷅ŋndo̍ mīīŋgū nda̍ tɛ̄ɛ̄ŋ pāa̍le̍ le̍ŋ.

¹³Mi̍ Pa̍i̍lē ve̍e̍lū wānāā bɛ̄ndūāā sōlīāā lāsa̍lāa̍, a̍ lāŋgba̍ā kāla̍, a̍ wāŋnda̍ nāa̍ pi᷅lɛ̍.

¹⁴Mbo̍ dīmūl nda̍ āā, “Lā hīŋ a̍ pōo̍ ho̍ō nāa̍ ya̍ chu̍a̍, mi̍ lā dīmī māā ō chō tōsāa̍ mī wāŋnda̍ sīmūl Ma̍sāa̍. I̍ nyu̍u̍ni̍a̍a̍ ndu̍ nya̍ pi̍la̍ o̍ hɔ̄l, kɛ̍, īsɔ̄ɔ̍ o̍ īsɔ̄ɔ̍ nya̍ chɔ᷄m a̍ ndu̍ o̍kɔ̄ɔ̄ ī pīlɛ̍ bɛ̍ɛ̍ I̍ se̍e̍lu̍ŋ mī i̍ wa̍ yɔ̄ŋ ndɔ̄ le̍.

¹⁵Māsāa̍ Hɛ̍lɔ̄ɔ̄ bɛ̍ɛ̍ ō sēēlu̍ŋ nyɛ᷅ o̍ nyɛ̄ wɔ̄ɔ̍ŋ a̍ ndu̍ o̍kɔ̄ɔ̄ le̍. Le̍ he̍ī, o̍ mi̍ŋgi̍ ndu̍ o̍ na̍a̍ nya̍ā lo̍ ni̍. Pōo̍ ho̍ō tōsa̍ nyɛ᷅ o̍ nyɛ̄ wānā di̍ī wānā le̍ ndu̍ le̍.

¹⁶Le̍la̍ŋ, lɔ̄ɔ̍ ko̍ni̍ ya̍ I̍ cho̍ ndu̍ ni̍ mī ma̍l ndu̍.” [

¹⁷Te̍le̍ŋ o̍ te̍le̍ŋ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ ndu̍ o̍o̍ wa̍ pɛ̍, mɛ̄ɛ̍ mī Pa̍i̍lē ndu̍ o̍o̍ ma̍l wānāa̍ cho̍ o̍ bīyɔ̄ɔ̍ ni᷄ŋ nda̍ ō pīlɛ̍ le̍ wānāā lē lēlɛ̄ŋnda̍.]

¹⁸Kɛ̍, ma̍ dēŋī chōo̍ cho̍o̍ mɛ̄ɛ̍ nda̍ chō fa̍ū āā, “Di̍i̍ po̍o̍ ho̍ō. Ba̍lu̍a̍bāā ŋ̄ me᷄l na̍a̍ ni̍.”

¹⁹Ndu̍yɛ̍, nda̍ a̍a̍ dɔ̍ū Ba̍lu̍a̍bāā o̍ chīɛ̄ī mānyūmndo̍ ni᷄ŋ le̍ tōsāa̍ mī wāŋnda̍ chīēī a̍ kɔ̍mɛ̍tīi̍yo̍ a̍ le̍ sūɛ̍i̍ di̍yāā wāna̍ chi̍e̍e̍.

²⁰Pa̍i̍lē ndu̍ o̍o̍ hɛ̍na̍ŋ le̍ Chi̍i̍sū mālɔ̄ɔ̍. Le̍ he̍ī, mbo̍ chɔ̄ɔ̄lū īsɔ̄ɔ̍ nāa̍ nda̍ chūā.

²¹Kɛ̍, ma̍ hīāū lāchī a̍ dēŋīo̍o̍ āā, “Ba̍ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍. Ba̍ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍.”

²²Mi̍ Pa̍i̍lē su̍a̍ā vɛ̄lɛ̄ nāa̍ nda̍ chūā yāa̍ ndɔ̄ɔ̍ āā, “Lā chɔ᷄m ndɔ̍ ya̍ sūɛ̍i̍ wɔ̍ɔ̍ŋ o̍ to̍sa̍ kpe̍e̍kpe̍i̍ ye̍. Ya̍ I̍ se̍e̍lu̍ŋ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ o̍ to̍sa̍ ī wānā di̍ī wānā le̍ ndi̍ le̍. Le̍la̍ŋ, I̍ cho̍ ndu̍ lɔ̄ɔ̄ mī ma̍l ndu̍.”

²³Kɛ̍, ma̍ kɛ̄ɛ̄ Pa̍i̍le̍ dīōm. Ma̍ hīāū lāchī a̍ dēŋīo̍o̍ chōo̍ cho̍o̍ māā Pa̍i̍lē ba̍ŋ Chi̍i̍sū o̍ yɔ̄m sīŋgāfīlāa̍ chōo̍ mbō vī. O̍ mɛ̄ɛ̄lu̍la̍ŋ kpɔ̍ŋ, dīōm ndāa̍ lo̍ lēchōo̍ ni̍.

²⁴O̍ ko̍ŋ, mi̍ Pa̍i̍lē ki̍a̍lū yāmɛ̍i̍ māā ā to̍sa̍ a̍ Chi̍i̍sū mɛ̄ɛ̍ wāŋnda̍ dīmi̍ yɛ̄.

²⁵Mi̍ Pa̍i̍lē to̍sā ma̍ māl wāna̍ nda̍ yēēma̍ wo̍ Ba̍lu̍a̍bāā, ō nda̍ a̍a̍ dɔ̍ū chīɛ̄ī ni̍ŋ le̍ tōsāa̍ mī wāŋnda̍ chīēī a̍ kɔ̍mɛ̍tīi̍yo̍ wo̍, a̍ le̍ sūɛ̍i̍ di̍yāā wāna̍ chi̍e̍e̍ wo̍. Mi̍ Pa̍i̍lē ma᷅l Chi̍i̍su̍ nda̍ o̍ bā le̍ mā tōsa̍ a̍ ndu̍ mɛ̄ɛ̍ nda̍ yēēma̍ yɛ̍.

²⁶Ma̍ kūā a̍ Chi̍i̍sū. Mɛ̄ɛ̍ nda̍ wa̍ kɔ̄la̍ŋ le̍ ndu̍ bāŋɔ̄ɔ̍ o̍ yɔ̄m sīŋgāfīlāa̍ chōo̍, ma̍ kōmāl po̍ pi᷅lɛ̍ dīōla̍ŋ Sa̍i̍mɔ̄ŋ, wānā wa̍ā Sāīlu̍i̍nī chi̍e̍e̍. Ndu̍ o̍o̍ chɛ̍ŋ o̍ chīɔ̍ɔ̍ŋ ni᷄ŋ mbo̍ wā hūnɔ̄ɔ̍ o̍ chi̍e̍e̍ bɛ̍ndōo̍ ni᷄ŋ. Kōmāllo̍ ndu̍, ma̍ bīī pōo̍ ho̍ō. Ma̍ hāndū ndu̍ yɔ̄m sīŋgāfīlāa̍ o̍ īkɛ̄su̍ le̍ mbō tōl Chi̍i̍su̍ kɔ̄ɔ̄lī a̍ ndu̍.

²⁷Mi̍ wāŋnda̍ tūāl Chi̍i̍su̍ kɔ̄ɔ̄lī fāŋgā bɛ̄ndōo̍. Wāŋ lāāndūa̍a̍ wa̍ nda̍ tɛ̄ɛ̄ŋ ma̍ wā cha᷄ŋnda̍ŋ le̍ ndu̍ mā mɛ̄lī yi̍e̍e̍la̍ŋ.

²⁸Mi̍ Chi̍i̍sū mu̍li᷄ŋ mbo̍ dīmūl nda̍ āā, “Wāŋ lāāndūa̍a̍ Chūlu̍sɛ̄lɛ̄m, lā cha᷅ŋ le̍ ya̍ le̍. Lā cha᷄ŋ le̍ nya̍ pi̍la̍ a̍ chūāūwāā nyāa̍.

²⁹Fo̍ndōle̍, pālɛ̍i̍ chō hūnɔ̄ɔ̄, o̍ pālɛ̍i̍ ke̍ŋ ni᷄ŋ wāŋnda̍ dīmī ni̍ŋ āā, ‘Kɔ̄l kɛ̄ndɔ̄ɔ̍ chō le̍ wāŋ lāāndūa̍a̍ sɔ̍la̍ ŋ̍chu̍a̍u̍ le̍ wa̍, a̍ vi̍lu̍ ŋ̍chu̍a̍u̍ mā wɛ̍si̍ ŋ̄chūāū le̍ wa̍.’

³⁰A̍ te̍le̍ŋ ko̍ŋ wāŋnda̍ dīmūl ni̍ŋ pēmbūŋ bɛ̄ndo᷄ŋ āā, ‘Hu̍ŋ de᷅l na̍a̍ chōo̍,’ mā dīmu̍l pēmbūŋ pɔ̄mbɔ᷄ŋ āā, ‘Hu̍ŋ ku̍mbū na̍a̍.’

³¹Nāa̍ wāŋnda̍ tōsa̍ wɔ̄ he̍ī a̍ ya̍ cho̍ māā yɔ᷄m cho̍ yōōmū wo̍, tē yīŋnde̍ŋ lē hīŋ pɛ̍, vɛ̄ɛ̍nɛ̍ nda̍ tōsā yɛ̍ ni̍ŋ a̍ nya̍ cho̍ māā yɔ̄mīī vēsɛ̍i̍ ya̍?”

³²O̍ Chi̍i̍sū kɔ̍ɔ̍lī ma̍ kūā a̍ pūa̍a̍ ŋi̍ɔ̍ɔ̍ŋāā chēle̍ŋ le̍ nda̍ dīyɔ̄ɔ̍ nda̍ nda̍ā. Nda̍ ŋi̍ɔ̍ɔ̍ŋ, wānāā dɛ̍nɛ̍ wɔ̍ɔ̍ŋnda̍ nda̍ wa̍ ni̍.

³³Mɛ̄ɛ̍ nda̍ fūūlu̍u̍ o̍ fo̍ndāŋ nda̍ vēēlū āā, fo̍ndāŋ lākpōkpōo̍ wo̍, ma̍ bāŋ Chi̍i̍su̍ nda̍ pūa̍a̍ dɛ̍nɛ̍ wɔ̍ɔ̍ŋāā ŋīɔ̍ɔ̍ŋnda̍ ha̍ā. Ma̍ bāŋ ō pīlɔ̍ɔ̄ Chi̍i̍sū o̍ bā kɛ̄ndɔ̄ɔ̍ chōo̍. Ma̍ bāŋ ō pīlɔ̍ɔ̄ o̍ bā ndɔ̄ mi̍āllo̍ chōo̍.

³⁴Mɛ̄ɛ̍ nda̍ ba᷄ŋ Chi̍i̍sū, mbo̍ dīmī āā, “Fi̍nyā nūu̍, ma̍l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ, kāni̍ fo̍ndōle̍ ā si̍nā nyɛ᷅ nda̍ chō tōsāa̍ wo̍ pɛ̄ŋgu̍ le̍.” Mɛ̄ɛ̍ nda̍ ba᷄ŋ ndu̍, o̍ ko̍ŋ kɔ̍ɔ̍lī mi̍ so̍vɛ̄i̍ya̍ wūū nyɔ̄ɔ̍ mɛ̄ɛ̍ nda̍ wūū ko̍o̍ŋ yɛ̍, le̍ sīnāa̍ mɛ̄ɛ̍ nda̍ a̍a̍ pīɔ̄ūvi̍āŋ nyɛ̍lā ndɔ̄la̍ŋ yɛ̍.

³⁵Wāŋnda̍ wa̍ īsīsi̍ mā tōfā. Ndu̍yɛ̍, mi̍ lāŋgba̍ā kālāā Chu̍ūwa̍ sa̍āŋ ndu̍ māmɔ̄ɔ̍. Ma̍ dīmī āā, “Ō pīŋī chāāŋnda̍. Tē ndu̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍ ti᷅, mɛ̄ɛ̍ ō pīŋi̍ ni̍ko̍ ndu̍ pi̍la̍.”

³⁶So̍vɛ̄i̍ya̍ bɛ̍ɛ̍ ma̍ mām ndu̍. Ma̍ kē ndu̍ mūɛ̄īmā wāālɛ̍i̍ma̍ pu̍m.

³⁷O̍ ko̍ŋ kɔ̍ɔ̍lī ma̍ dīmī āā, “Tē nu᷄m cho̍ māsāa̍ le̍ Chu̍ūwa̍ ni̍, mɛ̄ɛ̍ pi̍ŋi̍ wɔ̍ nu᷅m pi̍la̍.”

³⁸Ma̍ pōōnyīāā dīōmnda̍ŋ ma̍ hāndū ndu̍ chōo̍ o̍ yɔ̄m sīŋgāfīlāa̍ chōo̍ āā, “Māsā Bɛ̍ndū Chu̍ūwa̍, ndu̍ cho̍ ho̍ō ni̍.”

³⁹Mi̍ pūa̍a̍ nda̍ ba᷄ŋ o̍ yɔ̄mndo̍ wa̍ ō pīlɔ̍ɔ̄ yīōū Chi̍i̍sū ta̍u̍. Mbo̍ dīmūl Chi̍i̍sū āā, “Nūm te̍ cho̍ Ki̍li̍tī wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ le̍? Mɛ̄ɛ̍ pi̍ŋi̍ wɔ̍ nu᷅m pi̍la̍ a̍ na̍a̍.”

⁴⁰Kɛ̍, mi̍ chāa̍ŋ ndɔ̄ kpa̍ā ndu̍. Mbo̍ dīmūl ndu̍ āā, “A̍ nɔ̍ i̍si̍o̍o̍ŋ le̍ Mɛ̄lɛ̄ka̍ le̍? Mɛ̄ɛ̍ o̍ cho̍ ō yūlāā le̍ pīɔ̍mndo̍ yɛ̍, le̍nde̍ ko̍ni̍ na̍a̍ ŋ̄ chō ā yūlāā le̍ pīɔ̍mndo̍ ni̍.

⁴¹Ndu̍yɛ̍, nūm a̍ ya̍, pīɔ̍m nāa̍ ho̍ō ō cho̍ ba̍a̍la᷄ŋ te̍. Ō chō māchūāā pāāwāa̍ le̍ yɔ̄ŋndā wɔ̄ɔ̍ŋndā na̍a̍ ŋ̄ tōsa̍ la̍ŋ. Kɛ̍ lāŋu̍nɔ̄ɔ̍ ho̍ō, ndu̍ to̍sa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍.”

⁴²O̍ ko̍ŋ kɔ̍ɔ̍lī, Mbo̍ dīmūl Chi̍i̍sū āā, “Lo̍o̍nu̍ŋ a̍ ya̍ Chi̍i̍sū, lɔ̍ɔ̍ ŋ̄ chō hūnɔ̄ɔ̄ wā Māsāa̍ wo̍.”

⁴³Mi̍ Chi̍i̍sū di̍mūl ndu̍ āā, “Mī di̍mu̍l nu̍m, na̍a̍ nūm ŋ̄ chō wā Ɛ̄chɛ̍nɛ̄ hāū.”

⁴⁴A̍ bōōndi̍i̍ pāa̍le̍ŋ lē si᷄m o̍ bōlle̍ŋ chōo̍ ve̍ ki̍nɛ̍i̍, mi̍ lē nyūm pɔ̍lī. Mi̍ nyūmnda̍ŋ mā tūāl kpi᷅ŋgbi̍ o̍ lɛ̄ŋndē lēŋ ni᷄ŋ kpo̍u̍. Mi̍ mā lō mā tūālāā ha̍a̍a̍ mbo̍ kūā ha̍vɛ̄i̍la̍ŋ lā yāa̍.

⁴⁵Mi̍ kōlā bɛ̍ndu̍ wa̍ ō lāndāā o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ ō tɛ̄ndā sālā tīɔ̍ɔ̍ŋ kpa̍la̍.

⁴⁶O̍ ko̍ŋ kɔ̍ɔ̍lī, mi̍ Chi̍i̍sū de̍ŋī chōo̍ cho̍o̍ kpe̍le̍ŋ āā, “Fi̍nyā nūu̍, I̍ ma̍l nu̍m nyi̍nā nūu̍ o̍ bā.” Mɛ̄ɛ̍ o̍ di̍mi̍ dīōmnda̍ŋ nda᷅ŋ, mbo̍ mālnu᷄ŋ kɔ̍l.

⁴⁷Mi̍ wānā bɛ̍ndū so̍vɛ̄i̍ya̍a̍ kɛ̍mīa̍a̍ chā nyɛ̍ yɔ̍nu̍ŋ ndo̍. O̍ ko̍ŋ kɔ̍ɔ̍lī mbo̍ dīmī āā, “A̍ tōnya̍, pōo̍ ho̍ō ō wa̍ wānā sa̍kpō.” Ndu̍yɛ̍, mbo̍ sāŋgālā Mɛ̄lɛ̄ka̍.

⁴⁸Wānāā fāŋgā fa̍ŋgā ā wa̍ ā chūūŋgi̍āŋ lo̍ŋ le̍ tōfāa̍. Ndu̍yɛ̍, mɛ̄ɛ̍ nda̍ chē nyɛ̍ yɔ̍nu̍ŋ ndo̍, ma̍ mīīŋgū o̍ lā nda̍ lo̍ a̍ kɔ̄mɔ᷄ŋ, kāni̍ fu̍u̍le̍ a̍ mɔ̍nɛ̍i̍ wa̍ nda̍ ve̍.

⁴⁹Ndi̍a̍a̍mɔ̍ɔ̍wa̍a̍ ndūa̍a̍ kpo̍u̍, a̍ wāŋ lāāndūa̍a̍ chɛ̍ŋ Kāli̍lī ma̍ tūāl ndu̍ kɔ̄ɔ̄lī wa̍, ā wa̍ īsīsi̍ kɔ̍ɔ̍lī kɔ̄ɔ̄lī ma̍ chā nyɛ̄ o̍ nyɛ̍ wa̍ yɔ̄nɔ᷄ŋndo̍.

⁵⁰Po̍ pi᷅lɛ̍ wa̍ dīōla̍ŋ āā, Chōo̍sɛ̍, wānā wa̍ā Ālīmāti̍a̍ā chi̍e̍e̍. Chu̍ūnɔ̄ɔ̍ o̍ wa̍ ni̍. Ō wa̍ wānā kɛ̍ndɛ̄, ndu̍yɛ̍ ō wa̍ wānā sa̍kpō. Ō wa̍ lēhɔ̄l o̍ nɛ̄ī le̍ bōōndi̍i̍ Mɛ̄lɛ̄ka̍ wā ni̍ŋ ma̍sāa̍ wāŋnda̍ chōo̍ ve̍. Nda̍ wa̍ ku̍ndā lāŋgba̍ā kālāa̍ ki̍a̍lū ya᷅ma᷅ŋ nda̍ ni̍. Kɛ̍ ndu̍yɛ̍, ō ve̍ nda̍ kɔ̄ɔ̄lī a̍ nyɛ̄ nda̍ kɛ̄ɛ̄si̍a̍a̍ ma̍ tōsā a̍ Chi̍i̍sū dīyɔ̄ɔ̍ o̍kɔ̄ɔ̄ wo̍ le̍.

⁵¹

⁵²Mi̍ pōo̍ ho̍ō kūā nāa̍ Pa̍i̍lē chu̍a̍ mbo̍ pīɛ̄ī ndu̍ dīāllu᷄ŋ Chi̍i̍so᷄ŋ.

⁵³O̍ ko̍ŋ, mbo̍ tūsī dīāllu᷄ŋ Chi̍i̍so᷄ŋ o̍ yɔ̄m sīŋgāfīlāa̍ chōo̍. Mbo̍ dūāū mu̍ŋ o̍ fe̍ŋgbɔ̍ɔ̍ ni᷄ŋ. Dɔ̄wɔ̄ɔ̍ mu̍ŋ o̍ fe̍ŋgbɔ̍ɔ̍ ni᷄ŋ, mbo̍ wōū o̍ sɛ̄īyo̍ ni᷄ŋ ō nda̍ a̍a̍ to̍ū o̍ pōūwo̍ ni᷄ŋ māā būūlū wo̍. Ndu̍yɛ̍, nda̍ a̍a̍ chɔ̍ wɔ̍ wa̍nā o̍ sɛ̄īyo̍ ho̍ō ni᷄ŋ le̍pi᷅lɛ̍ bɛ̍ɛ̍ le̍.

⁵⁴Wāŋ lāāndūa̍a̍ chɛ̍ŋ Kāli̍lī mi̍ nda̍ a̍a̍ tu̍āl Chi̍i̍su̍ kɔ̄ɔ̄lī wa̍, ā wa̍ hɔ̄lāā tūlu̍ a̍ Chōo̍sɛ̍. O̍ ko̍ŋ kɔ̍ɔ̍lī, mi̍ wāŋ lāāndūa̍a̍ ha̍ā chā sɛ̄īyo̍. Ma̍ chā mɛ̄ɛ̍ nda̍ yāmbu̍ dīāllu᷄ŋ Chi̍i̍so᷄ŋ lēni᷄ŋ yɛ̍. O̍ ko̍ŋ kɔ̍ɔ̍lī, ma̍ mīīŋgū o̍ chīɛ̄īlā ndāla̍ŋ. Ma̍ kɔ̍ to̍o̍fīāā si̍ɛ̍ndīi̍ma̍ nda̍ sūū wa̍nāā vīlɛ̍i̍ya̍ wa̍ŋ a̍ chūɛ̄īmā chūŋ kɛ̄ndīa̍ŋ le̍ mā hu᷄ŋ su̍ū o̍ dīāllu᷄ŋ Chi̍i̍so᷄ŋ. Sɔ̄ɔ̍ŋ mu᷅ŋ ki̍nɛ̍i̍ ŋ̄ yɔ̄nu̍ŋ o̍ pāa̍le̍ Chi̍mɛ̄i̍le̍ŋ chōo̍, pāa̍le̍ bɛ̍ɛ̍ndīa̍ŋ nde̍ŋ le̍ pāa̍le̍ pɛ̍ŋgīāālē Chu̍ūwa̍. Ndu̍yɛ̍, pāa̍le̍ le̍ŋ lē wa̍ ni᷅ŋ le̍ fūūlūūwo̍. Mɛ̄ɛ̍ le̍ fu̍u̍lu̍u̍, ma̍ pɛ̄ŋgī mɛ̄ɛ̍ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ yɛ̍.