Read Southern Kisi Lu̍kū 4 Bible Online

Lu̍kū 4 - Southern Kisi bible

Lu̍kū 4

¹Mi̍ Chi̍i̍sū cha̍ŋ Chɔ̍ɔ̍dāŋ o̍ pēēlo̍ mbo̍ mīīŋgū. Ndu̍yɛ̍, Nyi̍na̍ Mɛ̄lɛ̄ka̍a̍ wa̍ ndu̍ kɔ̄ɔ̄lī ta̍u̍. Mi̍ Nyi̍na̍ Mɛ̄lɛ̄ka̍a̍ tōsā mbo̍ kūā o̍ po̍llo̍ ni᷄ŋ.

²Lo̍ŋ Māsa̍ Nyi̍nāā Wɔ̄ɔ̍ŋnda̍ dɛ̄ɛ̄ni̍a̍a̍ ndu̍ le̍ pālɛ̍i̍ be̍le̍-hi̍ɔ̍ɔ̍lu̍ ni̍ hāli̍ kpe̍ŋ mī ndu̍ o̍o̍ to̍sa̍ yɔ᷅ŋ wɔ̄ɔ̍ŋndo̍. A̍ bōōnde̍i̍ he̍ī fa̍ū nyɛ̄ o̍ nyɛ̄ dīāā bɛ̍ɛ̍ Chi̍i̍sū di᷅ le̍. O̍ ko̍ŋ kɔ̍ɔ̍lī, yīa̍a̍ŋ mā wa̍ ndu̍ ni᷅ŋ nɛ̄īyo̍.

³Mi̍ Māsa̍ Nyi̍nāā Wɔ̄ɔ̍ŋnda̍ di̍mūl ndu̍ āā, “Tē Po̍ Mɛ̄lɛ̄ka̍a̍ ŋ̄ chō ni̍, mɛ̄ɛ̍ di̍mu̍l lɔ̍ po̍ūwo̍ mbō sīmnu᷄ŋ be̍e̍dīi̍.”

⁴Mi̍ Chi̍i̍sū lo᷅ lo̍ŋ, mbo̍ mūlūl ndu̍ āā, “Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, ‘Ō cho̍ nyɛ̍ dīa̍a̍ ko̍ni̍ le̍ to̍sā mī wāna̍ chi̍o̍o̍ ō wa̍ yōōmū le̍.’ ”

⁵Mi̍ Māsa̍ Nyi̍nāā Wɔ̄ɔ̍ŋnda̍ hēēlū ndu̍ nāa̍ te̍māa̍. O̍ te̍le̍ŋ bi̍ŋgīi̍ na̍a̍ bɛ̄ŋgu̍ mbo̍ chɔ̄m ndu̍ lɛ̄ŋnde̍ kpo̍u̍ o̍ chi̍e̍ēŋndo̍ chōo̍.

⁶Mbo̍ dīmūl Chi̍i̍sū āā, “I̍ nɔ̍lā mī to̍sa̍ mā wa̍ māsāa̍ o̍ lɛ̄ŋnde̍ he̍ī chōo̍ kpo̍u̍, ndu̍yɛ̍ mī ke̍ nu̍m nyɛ̄ o̍ nyɛ̄ kɛ̄ndɛ̍ cho̍ lēni᷄ŋ. Kāni̍ fo̍ndōle̍, ya̍ nda̍ ke̍ mu̍ŋ ni̍. Ndu̍yɛ̍, wānā o̍ wānā ya̍ I̍ hɛ̍na̍ŋ ndu̍ ya̍ ke᷅ ni̍.

⁷Tē a̍ so̍o̍lu̍u̍ ya̍ pɛ̍, I̍ ke̍ nu̍m nyɛ̄ nūm.”

⁸Mi̍ Chi̍i̍sū mu̍lūl ndu̍ āā, “Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, ‘Māsānɔ̄ɔ̍ Mɛ̄lɛ̄ka̍ ndu̍ wānā sōōlūū ni̍, ndu̍yɛ̍ ndu̍ pīlɛ̍ kpe̍ wānā sāāŋgīāl ni̍.’ ”

⁹Mi̍ Māsa̍ Nyi̍nāā Wɔ̄ɔ̍ŋnda̍ kūā vɛ̄lɛ̄ a̍ Chi̍i̍su̍ Chūlu̍sɛ̄lɛ̄m chi̍e̍e̍. Mbo̍ hēēlū ndu̍ o̍ chīɛ̍i̍ Mɛ̄lɛ̄ka̍a̍ tūllo̍ pɔ̍ pɔ̍. Hēēlōo̍ ndu̍ lo̍ŋ, mbo̍ dīmūl ndu̍ āā, “Tē Po̍ Mɛ̄lɛ̄ka̍a̍ ŋ̄ chō ni̍, mɛ̄ɛ̍ fu̍la̍ wɔ̍ cho̍o̍ cho̍o̍ na̍nu᷄ŋ mā chi̍cha̍ lɛ̄ŋ.

¹⁰Kāni̍ fu̍u̍le̍, ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, ‘Mɛ̄lɛ̄ka̍ chō ki̍i̍la̍a̍ ndūa̍a̍ dīmūl mā mānda̍ nu̍m.’

¹¹Ndu̍yɛ̍, ī chō ī pōōnyīāā vɛ̍lɛ̄ āā, ‘Ā chō bāla̍ŋ hāū mā sāāla̍ nu̍m. Ko̍ŋ to̍sā pēlēi̍ bɛ̍ɛ̍ a̍ lo̍ō o̍ pōūwo̍ mā yɔ̍ŋu̍lu̍ŋ te̍.’ ”

¹²Mi̍ Chi̍i̍sū lo᷅ o̍ ko̍ŋ, mbo̍ mūlūl ndu̍ āā, “Yāū Mɛ̄lɛ̄ka̍a̍ dīmi̍ āā, ‘Wānā tɔ̍ɔ̍ndāŋ Māsānɔ̄ɔ̍ Mɛ̄lɛ̄ka̍ le̍.’ ”

¹³Mi̍ Māsa̍ Nyi̍nāā Wɔ̄ɔ̍ŋnda̍ chīī Chi̍i̍su̍ tɔ̄ɔ̄nda᷄ŋ o̍ nɛ̄ī o̍ nɛ̄ī ni̍ŋ le̍ mī ndu̍ o̍o̍ to̍sa̍ yɔ̄ŋ wɔ̄ɔ̍ŋndo̍. Chīīyo̍ ndu̍ tɔ̄ɔ̄nda᷄ŋndo̍, mbo̍ fāŋa᷄ŋ ndu̍ kɔ̄ɔ̄lī le̍ te̍le̍ŋ ti̍ŋ.

¹⁴O̍ ko̍ŋ kɔ̍ɔ̍lī, mi̍ Chi̍i̍sū mi̍i̍ŋgū o̍ lɛ̄ŋndē Kāli̍līle̍ŋ ni᷄ŋ. Ndu̍yɛ̍, kpāāya̍ Nyi̍na̍ Mɛ̄lɛ̄ka̍a̍ wa̍ ndu̍ kɔ̄ɔ̄lī. Mi̍ tɔ̍ɔ̍ ndɔ̄ɔ̍ tīū o̍ tāndā kōŋ ni᷄ŋ si̍lɔ̍.

¹⁵Mbo̍ pɛ̄ɛ̄kū wāŋnda̍ o̍ tōŋgōla̍ Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ. Mi̍ wāŋnda̍ kpo̍u̍ a̍ cha̍ndū ndu̍ ta̍u̍.

¹⁶O̍ ko̍ŋ kɔ̍ɔ̍lī, mi̍ Chi̍i̍sū ku̍ā Na̍a̍sa̍lūɛ̄ī chi̍e̍e̍ nāa̍ nda̍ mānda̍ ndu̍ wa̍. Mbo̍ kūā o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ o̍ pāa̍le̍ pɛ̍ŋgīāālē Chu̍ūwa̍ chōo̍ māā pāāndū. Mbo̍ sīm wāŋnda̍ lāchī le̍ tōfāa̍ o̍ yāu̍wo̍ ni᷄ŋ.

¹⁷Ma̍ kē ndu̍ yāu̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā po̍o̍nyi̍a̍a̍ wo̍. Mbo̍ tīmbī. Mbo̍ sāālu᷄ŋ fo̍ndāŋ dīōmnda̍ŋ nda᷅ŋ lā chō lā pōōnyīāā wo̍ āā,

¹⁸“Māsānɔ̄ɔ̍ Mɛ̄lɛ̄ka̍ hɛ̄li̍ ya̍. Le̍ he̍ī, Nyi̍na̍ ndɔ̄ɔ̍ chō ya̍ kɔ̄ɔ̄lī. He̍ī yɔ̄nu̍ŋ le̍ mī di̍mu̍l wānāa̍ cho̍ o̍ kūɛ̍i̍ ni᷄ŋ nda̍ Yōōŋgū Kɛ̄ndɛ̍ Mɛ̄lɛ̄ka̍a̍. Ō vēm ya̍ le̍ mī yo̍nda̍ nāa̍ wānāa̍ cho̍ o̍ bīyɔ̄ɔ̍ ni᷄ŋ nda̍ chu̍a̍ māā ā chō mālɔ̄ɔ̍ sɔ̄lā, ndu̍yɛ̍, mī yo̍nda̍ māā wānāa̍ cho̍ ā sūmɛ̍i̍ya̍ ā chō vɛ̄lɛ̄ chɔ̄. Ō vēm ya̍ le̍ mī to̍sa̍ mī wānāā nda̍ chō kīndīlāa̍ wa̍ ā sɔ̄la̍ bāŋāŋndo̍,

¹⁹ndu̍yɛ̍, mī yo̍nda̍ māā wɔ̄sīī Māsānɔ̄ɔ̍ Mɛ̄lɛ̄ka̍ chō wāŋnda̍ kɛ̄ndɛ̄i̍ ndūɛ̍i̍ tōsāl le̍ ī fūūlu̍u̍.”

²⁰Mbo̍ sīmbūl yāu̍wo̍ mbo̍ kē bu̍ɛ̍i̍ wa̍ wa̍llo̍ o̍ chīɛ̍i̍ Mɛ̄lɛ̄ka̍a̍ wo̍. Mbo̍ kɔ̍ cha᷅l. Mi̍ wānāa̍ wa̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍ kpo̍u̍, a̍ tu̍āl ndu̍ nūa̍a̍ chi̍kɛ̍ŋ.

²¹Mbo̍ dīmūl nda̍ āā, “Yōōŋgū nya̍ tūēī ho̍ō mi̍ I̍ to̍mbōlāl nya̍ ndu̍ wo̍, ō yɔ̄nu̍ŋ ha̍ū mɛ̄ɛ̍ i̍ di̍mi̍ŋ yɛ̍.”

²²Mi̍ wāŋnda̍ kpe̍de̍ a̍ di̍mī sɔ̄ɔ̍ŋ kɛ̍ndɔ᷄ŋ a̍ ndu̍ o̍kɔ̄ɔ̄. Ma̍ dūāūnu᷄ŋ kɔ̄ndɔ̄fi̍li̍ a̍ dīōmndā kɛ̄ndɛ̄la̍ wa̍ ndu̍ fūlāa̍ o̍ sōndō la̍ŋ. Ma̍ dīmī āā, “Ō cho̍ po̍ Chōo̍si̍ɔ̍ɔ̍ le̍ cho̍ ho̍ō le̍?”

²³Mi̍ Chi̍i̍sū di̍mūl nda̍ āā, “I̍ che᷅ māā lā dīmūl ni̍ŋ ya̍ bɛ̍ɛ̍ tālo̍o̍ āā, ‘Wāna̍ chi̍ɔ̍ū wa᷅ŋnda̍ wo̍, si̍ŋgi̍ wɔ̍ nu᷅m pi̍la̍.’ Ko̍ŋ cho̍ ni̍ āā, ‘Wa̍lta̍ ŋ̄ tōsa̍ Kēpa̍a̍nīɔ̄m chi̍e̍e̍ mi̍ ŋ̄ tūɛ̄ī la̍ŋ to̍sa̍ la̍ŋ o̍ nūm ndo̍ chi̍e̍e̍.’

²⁴Mī di̍mu̍l nya̍, wāna̍ su̍a̍ā le̍ Mɛ̄lɛ̄ka̍ wo̍, wāŋnda̍ o̍ ndu̍ lo̍ chi̍e̍e̍ ā chɛ᷅l ndu̍ le̍.”

²⁵Mbo̍ hīāū lāchī a̍ nda̍ dīmūllo̍ āā, “Mī di̍mu̍l nya̍ tōnya̍a̍, a̍ bōōndi̍i̍ Īla̍a̍chā wa̍ īchāli̍ ve̍ mi̍ pīɔ̍ɔ̍ kɛ̄ɛ̄ le̍ sīa̍a̍ le̍ wɔ̄sīla̍ŋ lā yāa̍ a̍ pāŋgo̍ŋ ŋ̄ ŋɔ᷄mpu᷅m. Mi̍ yīmā bɛ̄ndūa̍ŋ mā dēl I̍sɔ̄lūɛ̄ī kpe̍de̍. A̍ bōōndi̍i̍ ke̍ŋ wāŋ lāāndūāā Chu̍ūwa̍ ā pīāāndāā ndāa̍ vī wa̍ ā wa̍ I̍sɔ̄lūɛ̄ī ta̍u̍.

²⁶Kɛ̍, Mɛ̄lɛ̄ka̍ vi᷄m Īla̍a̍chā nāa̍ ō pīlɛ̍ bɛ̍ɛ̍ chu̍a̍ le̍ ndu̍ mālā le̍ mɛ̄ɛ̍ chūā pɔ̍nɔ̍ ndɔ̄ vi᷅ Sa̍lu̍ɛ̍fa̍tī chi̍e̍e̍ o̍ būŋgɛ̄ī Sa̍i̍dɔ̄ŋnde̍ ni᷄ŋ ndo̍, o̍ ve̍ Chu̍ūnɔ̄ le̍ wo̍.

²⁷Ndu̍yɛ̍, a̍ bōōndi̍i̍ wāna̍ su̍a̍ā le̍ Mɛ̄lɛ̄ka̍ wo̍ Īla̍a̍sīā wa̍ īchāli̍ ve̍, wānāā nāā wɔ̄ɔ̍ŋndo̍ ō wa̍ lēkɔ̄ɔ̍ wa̍ ā wa̍ I̍sɔ̄lūɛ̄ī ta̍u̍. Kɛ̍, ō pīlɛ̍ bɛ̍ɛ̍ sɔ̍la̍ si̍o̍ŋgɔ̄ɔ̄ le̍ mɛ̄ɛ̍ Na̍a̍māŋ, wānā wa̍ā lɛ̄ŋndē Si̍i̍lūīāle̍ŋ o̍ ve̍ Chu̍ūnɔ̄ le̍ wo̍.”

²⁸Mɛ̄ɛ̍ wānāa̍ wa̍ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ nda̍ tūēī dīōmnda̍ŋ nda᷅ŋ, nda̍ kpo̍u̍ ma̍ tūūlū kɔ̄l ta̍u̍ a̍ Chi̍i̍sū.

²⁹Ma̍ cha᷄ŋ ma̍ fāŋā ndu̍ chi̍e̍e̍. Ndu̍yɛ̍, o̍ pēmbēi̍ chōo̍ chi̍e̍e̍ ndāa̍ wa̍ ō tāŋgūlāā ni̍. Ma̍ kūā a̍ ndu̍ o̍ pēmbēi̍ lāndɔ᷄ŋndo̍ le̍ mī nda̍ a̍a̍ nyi̍ndū ndu̍ lo̍ŋ mī ndu̍ o̍o̍ kɔ̍ de᷅l.

³⁰Kɛ̍, mi̍ Chi̍i̍sū ke̍e̍ku᷄ŋ fa̍ŋgā ko̍ŋ tɛ̄ɛ̄ŋ mbo̍ kūānu᷄ŋ.

³¹O̍ ko̍ŋ kɔ̍ɔ̍lī, mbo̍ kūā Kēpa̍a̍nīɔ̄m chi̍e̍e̍ o̍ lɛ̄ŋndē Kāli̍līle̍ŋ ni᷄ŋ. Bōōndi̍i̍ pi᷅lɛ̍ ō wa̍ wāŋnda̍ pɛ̄ɛ̄kōo̍ o̍ pāa̍le̍ pɛ̍ŋgīāālē Chu̍ūwa̍ chōo̍.

³²Mi̍ kɔ̄ndɔ̄fi̍llo̍ bīī wāŋnda̍ kpe̍de̍ a̍ pɛ̄ɛ̄kū ndɔ̄ɔ̍, kāni̍, dīōmndā ndɔ̄la̍ŋ lā wa̍ māwāā māā wāna̍ kpāāyā bɛ̍ndū.

³³Po̍ pi᷅lɛ̍ wa̍ o̍ chīɛ̄ī Chu̍ūwa̍ pīɛ̄ī ko̍ŋ Mɛ̄lɛ̄ka̍ wo̍ ni᷄ŋ, nyi̍nā wɔ̄ɔ̍ŋndo̍ wa̍ ndu̍ kɔ̄ɔ̄lī. Mbo̍ dēŋī chōo̍ cho̍o̍ kpe̍le̍ŋ. Mi̍ nyi̍nā wɔ̄ɔ̍ŋ wa̍ ndu̍ kɔ̄ɔ̄lī wo̍ nyūnā Chi̍i̍sū āā,

³⁴“Vɛ᷅ sōndōo̍ wōūwo̍ o̍ sūɛ̍i̍ nyi̍nāā wɔ̄ɔ̍ŋnda̍ ni᷄ŋ mɛ̄ɛ̍ ya̍ cho̍ nu̍a̍ā yɛ̍, nūm Chi̍i̍su̍ fu̍la̍ Na̍a̍sa̍lūɛ̄ī yo̍? Le̍ na̍a̍ tɛ̄ɛ̄mbūūwo̍ ŋ̄ hīŋ ni̍? I̍ si̍nā wāna̍ ŋ̄ chō wo̍. Wāna̍ cho̍ le̍ Mɛ̄lɛ̄ka̍ wo̍ ŋ̄ chō ni̍.”

³⁵Mi̍ Chi̍i̍sū kpa̍ā nyi̍nā wɔ̄ɔ̍ŋ wa̍ pōo̍ ho̍ō kɔ̄ɔ̄lī wo̍ āā, “Me̍i̍, mā fa̍ŋa̍ŋ po̍o̍ ho̍ō kɔ̄ɔ̄lī.” Mi̍ nyi̍nā wɔ̄ɔ̍ŋ kōŋ chūā ndu̍ mbo̍ vīɔ̄l ndu̍ lɛ̄ŋ kpɔ̍l wāŋnda̍ kpe̍de̍ o̍ hɔ̄l. Mbo̍ fa̍ŋa᷄ŋ ndu̍ kɔ̄ɔ̄lī. Kɛ̍, ō yɔ̄ŋu̍l ndu̍ le̍.

³⁶Mi̍ kɔ̄ndɔ̄fi̍llo̍ bīī wāŋnda̍. Ma̍ dīmu̍la᷅ŋ nda̍ pi̍la̍ tɛ̄ɛ̄ŋ āā, “Kāni̍ bɛ̍ɛ̍ ŋ̄ chi̍ wɔ̍ su̍ɛ̍i̍ wa̍ā nu̍a̍ā le̍. Ye̍ē Nyi̍nāā wɔ̄ɔ̍ŋnda̍ bɛ̍ɛ̍ ō nɔ̄ nda̍ kpāāyāa̍ chōo̍, ndu̍yɛ̍ ō nɔ̄ di̍o̍o̍ mbō dīmu̍l nda̍ a̍ ka̍ka̍ āā, ‘Lā fāŋa̍ŋ.’ Ndu̍yɛ̍, mā fāŋa̍ŋ.”

³⁷Mi̍ tɔ̍ɔ̍ ndɔ̄ɔ̍ tīū o̍ tāndā kōŋ ni᷄ŋ si̍lɔ̍.

³⁸Mi̍ Chi̍i̍sū cha̍ŋ mbo̍ fa̍ŋa᷄ŋ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍. Mbo̍ kūā o̍ chīɛ̍i̍ Sa̍i̍mɔ̄ŋndo̍. La̍nɔ̍ɔ̍ Sa̍i̍mɔ̄ŋ, kāla̍ ndɔ̄ wa̍ a̍ dīāllūŋ tūūwo̍ŋ ta̍u̍. Ma̍ dīmūl Chi̍i̍sū le̍ mbō māla̍ ndu̍.

³⁹Mi̍ Chi̍i̍sū ku̍ā mbo̍ sīm o̍ kpēle̍ ndɔ̄ɔ̍ īkɛ̄i̍. Mbo̍ kpāā dīāllūŋ tūūŋ mu᷅ŋ. Mi̍ ŋ̄ pɛ̄ŋgī. O̍ ko̍ŋ kɔ̍ɔ̍lī, mi̍ wɛ̄ɛ̄ŋndo̍ ho̍ō cha᷄ŋ le̍ pi᷅lɛ̍ kpe̍ mbo̍ tōōsīāl nda̍ nyɛ̄ dīa̍a̍.

⁴⁰Mɛ̄ɛ̍ pāa̍le̍ŋ lē de᷄l, mi̍ wānāa̍ nɔ̍ wāŋnda̍ a̍ nāālā yɛ̍ yɛ̍la̍ŋ nda̍ kpe̍de̍ a̍ hu᷅ŋ a̍ nda̍ nāa̍ Chi̍i̍sū chu̍a̍. Ndu̍yɛ̍, mbo̍ hāndū nda̍ bāla̍ŋ chōo̍, mɛ̄ɛ̍ nda̍ chō kpe̍de̍ mbo̍ sīŋgī nda̍.

⁴¹Nyi̍nāā wɔ̄ɔ̍ŋnda̍ bɛ̍ɛ̍ ma̍ fāŋa᷄ŋ wa̍nāā fāŋgā fa̍ŋgā kɔ̄ɔ̄lī a̍ ye̍e̍la̍ŋ mā dīmī āā, “Nu᷄m cho̍ Po̍ Mɛ̄lɛ̄ka̍a̍ ni̍.” Kɛ̍, mbō kpāa̍ nda̍. Ō chɛ᷅l mī nyi̍nāā wɔ̄ɔ̍ŋnda̍ sōō le̍, kāni̍ fo̍ndōle̍, ā sīna̍ māā ndu̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍.

⁴²Mɛ̄ɛ̍ pāa̍le̍ŋ lē sɛ̄, mi̍ Chi̍i̍sū ma᷅l chi̍o̍o̍ mbo̍ kūā nāa̍ do̍ŋ do̍ŋnda̍. Mi̍ wāŋnda̍ kūā ndu̍ nūūvīa̍a̍. Mɛ̄ɛ̍ nda̍ sāālu̍ŋ ndu̍, ma̍ kīndī le̍ ndu̍ kūūnāa̍ yɔ̍ŋi̍ ndu̍ o̍o̍ kɔ̍nu̍ŋ.

⁴³Kɛ̍, mbo̍ dīmūl nda̍ āā, “I̍ nɔ̍ mī ku̍ɛ̄ o̍ chi̍o̍o̍ŋ ŋ̄ pīlɔ᷅ŋ bɛ̍ɛ̍ mī kɔ̍ di̍mī Yōōŋgū Kɛ̄ndɔ̄ɔ̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄. Kāni̍ fo̍ndōle̍, le̍ ke̍ŋ Mɛ̄lɛ̄ka̍ vēm ya̍ ni̍.”

⁴⁴O̍ ko̍ŋ kɔ̍ɔ̍lī, mbo̍ hīāū lāchī a̍ Yōōŋgū Kɛ̄ndɔ̄ɔ̍ dīmīo̍o̍ o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍ la̍ŋ ni᷄ŋ o̍ lɛ̄ŋndē Chūdi̍a̍āle̍ŋ ni᷄ŋ.