Read Southern Kisi Lu̍kū 6 Bible Online

Lu̍kū 6 - Southern Kisi bible

Lu̍kū 6

¹O̍ pāa̍le̍ pi᷅lɛ̍ pɛ̍ŋgīāālē Chu̍ūwa̍ chōo̍, Chi̍i̍sū nda̍ bu̍ɛ̍i̍yāā ndūa̍a̍ ā wa̍ kɔ̄la̍ŋ ma̍ wā kēēkōo̍ o̍ chīɛ̄ī pūm ni᷄ŋ. Tɔ̄lɔ̄ɔ̍ wa̍ o̍ chīɛ̍i̍ he̍ī ni᷄ŋ ndo̍ ā vēēlu̍ ndu̍ āā, wi̍t. Mi̍ bu̍ɛ̍i̍yāā ndūa̍a̍ wā tɔ̄lɔ̄ɔ̍ ho̍ō yōmɔ̄ɔ̍ mā chīīmīāā, mā dīā.

²Kɛ̍, ku̍ndā Fālīsi̍īya̍ ā pūm wa̍ lo̍ŋ. Ma̍ nyūnā āā, “Vɛ᷅ mi̍ lā wā sūɛ̍i̍ wānā to̍sā o̍ pāa̍le̍ nāāle̍ pɛ̍ŋgīāāle̍ŋ chōo̍ le̍ ve̍ tōsāa̍?”

³Mi̍ Chi̍i̍sū mu̍lūl nda̍ āā, “Lā chi̍ wɔ̍ o̍ Yāu̍ Mɛ̄lɛ̄ka̍a̍ ni᷄ŋ a̍ nyɛ̄ Māsāa̍ Dēēve̍ ndu̍ o̍o̍ to̍sa̍ wo̍ o̍kɔ̄ɔ̄ le̍? Bōōndi̍i̍ pi᷅lɛ̍, Dēēve̍ ni̍ nda̍ wānāa̍ wa̍ ndu̍ kɔ̄ɔ̄lī wa̍, mɛ̄ɛ̍ yīa̍a̍ŋ mā wa̍ nda̍ nɛ̄īyo̍

⁴mbo̍ lūɛ̄ī o̍ chīɛ̄ī Mɛ̄lɛ̄ka̍a̍ ni᷄ŋ. Mbo̍ chūā bēe̍dīi̍ wa̍ ō yɔ̄ŋga᷄ŋ le̍ Mɛ̄lɛ̄ka̍ wo̍ mbo̍ dīā. Mbo̍ kē vɛ̄lɛ̄ wānāa̍ wa̍ hɔ̄lāā tūlu̍ a̍ ndu̍ wa̍. Wānā che̍le̍ŋ ndu̍ o̍o̍ nɔ̍ mī ndu̍ o̍o̍ de᷅ bēe̍dīi̍yo̍ ho̍ō le̍, mɛ̄ɛ̍ wānāā sōlīāā lāsa̍lāa̍.”

⁵Mi̍ Chi̍i̍sū di̍mūl nda̍ āā, “Wāna̍ nda̍ vēēlū ho̍ō āā, Po̍ Wānā Pɔ̍nɔ̍ɔ̍ wo̍, ndu̍ cho̍ wāna̍ kɛ̍ɛ̍sīāā nyɛ᷅ wānā to̍sā o̍ pāa̍le̍ nāāle̍ pɛ̍ŋgīāālē chōo̍ wo̍ ni̍ a̍ nyɛ̄ wānā to̍sā le̍cho̍o̍ le̍ wo̍.”

⁶O̍ pāa̍le̍ pɛ̍ŋgīāālē Chu̍ūwa̍ chōo̍, mi̍ Chi̍i̍sū lu̍ɛ̍ī o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ. Mbo̍ wā wāŋnda̍ pɛ̄ɛ̄kōo̍. Pōo̍ wa̍ o̍ chīɛ̄īyo̍ ho̍ō ni᷄ŋ a̍ bā kɛ̄ndɔ̄ɔ̍ ndu̍ ō vēsɛ̍i̍.

⁷Ndu̍yɛ̍, wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍ a̍ ku̍ndā Fālīsi̍īya̍ ā wa̍ nɛ̄īla̍ŋ nūūvīa̍a̍ le̍ Chi̍i̍su̍ sūɛ̍i̍ hōlɔ̄ɔ̍. Ma̍ chāl ndu̍ ni̍ko̍ to̍fāa̍ māā tē ndu̍ o̍o̍ sīŋgī ni̍ŋ pɛ̍ wa᷅ŋnda̍ o̍ pāa̍le̍ ndāle̍ pɛ̍ŋgīāāle̍ŋ chōo̍.

⁸Mi̍ Chi̍i̍sū si̍nā nyɛ̍ wa̍ nda̍ o̍ kɔ̄l lo̍. Mbo̍ lō o̍ ko̍ŋ, mbo̍ dīmūl po̍ bā vēsɛ̍i̍yo̍ āā, “Hu̍ŋ, mā hu̍ŋ si᷅m lāchī na̍nu᷄ŋ.” Mi̍ pōo̍ cha᷄ŋ mbo̍ kɔ̍ si᷅m lāchī.

⁹Mi̍ Chi̍i̍sū di̍mūl nda̍ āā, “I̍ hɛ̍na̍ŋ mī nyu̍na̍ nya̍, yɛ̄ɛ̍nɛ̍ sāwā na̍a̍ dīmi̍ yɛ̄ māā ŋ̄ tōsa̍ o̍ pāa̍le̍ nāāle̍ pɛ̍ŋgīāāle̍ŋ chōo̍? Sūɛ̍i̍ kɛ̍ndɛ̄i̍ wāŋndo̍ tōsāllo̍, bāā sūɛ̍i̍ wɔ̍ɔ̍ŋnde̍ ndu̍ tōsāllo̍?” Mbo̍ nyūnā nda̍ vɛ̄lɛ̄ āā, “Ō nāŋ mī ŋ̄ pīŋi̍ yōōmū wāŋndo̍, bāā ō nāŋ mī ŋ̄ tɛ̄ɛ̄mbu̍u̍ yōōmū ndɔ̄ɔ̍ o̍ pāa̍le̍ŋ nde̍ŋ chōo̍?”

¹⁰Nyūnāa̍ nda̍ le̍nde̍, mbo̍ kēēlā hɔ̄lte̍ŋ mbo̍ tōfā nda̍ kpo̍u̍. Mbo̍ dīmūl pōo̍ āā, “Si̍ɛ̍ndi̍ ba̍ nūmndo̍.” Mi̍ pōo̍ sīɛ̄ndī bāa̍. O̍ ko̍ŋ, mi̍ bā ndɔ̄ɔ̍ mīīŋgū ndu̍ yɔ̄nɔ᷄ŋ nyɛ̍ kɛ̄ndɛ̍ī.

¹¹He̍ī yɔ̄ŋgɔ᷄ŋndo̍, mi̍ wāŋnda̍ ha̍ā tūūlū kɔ̄l ta̍u̍ a̍ Chi̍i̍sū. Ma̍ kāndū kɛ̄ɛ̄sīa̍a̍ le̍ nyɛ̄ nda̍ tōsā a̍ Chi̍i̍sū wo̍.

¹²A̍ bōōndi̍i̍ ke̍ŋ, mi̍ Chi̍i̍sū ku̍ā o̍ pēmbēi̍ chōo̍ le̍ Mɛ̄lɛ̄ka̍ pīɛ̄īyo̍. Le̍ nyūmnda̍ŋ kpu̍lu̍ku̍u̍ ō chō Mɛ̄lɛ̄ka̍ pīɛ̄īyo̍.

¹³Mɛ̄ɛ̍ pāa̍le̍ŋ lē sɛ̄, mbo̍ vēēlū bu̍ɛ̍i̍yāa̍ wa̍ ndu̍ kɔ̄ɔ̄lī wa̍. Mbo̍ hɛ̄lī ŋ̄wāŋ tɔ̍ a̍ wānāā ŋīɔ̍ɔ̍ŋ nda̍ tɛ̍ɛ̄ŋ. Mbo̍ kē nda̍ dīōla̍ŋ āā, wānāā Chi̍i̍sū ve᷅m hɔ̄ltē ndɔ̄ wa̍.

¹⁴Wānāā kāŋ nda̍ cho̍ ha̍ā ni̍, Sa̍i̍mɔ̄ŋ, ō Chi̍i̍sū ke̍ dīōla̍ŋ āā, Pītɛ̍ wo̍, a̍ A̍ndūlū pɔ̍mbɔ̄ ndɔ̄, a̍ Chēmi̍si̍, a̍ Chɔ᷄ŋ, a̍ Fi̍li̍pī, a̍ Bātɔ̄lɔ̍mīū,

¹⁵a̍ Māa̍ti̍u̍, a̍ Tɔ̄mɔ̍si̍, a̍ Chēmi̍si̍, po̍ A̍fa̍a̍sī wo̍, a̍ Sa̍i̍mɔ̄ŋ, ō nda̍ a̍a̍ ve̍e̍lū vɛ̍lɛ̄ āā, Sɛ̍lɔ̄ɔ̄ wo̍, ko̍ŋ cho̍ ni̍, wāna̍ sɔ̍ŋgā le̍ lɛ̄ŋndē nɔ̄la̍ŋ bāŋāa̍ wo̍,

¹⁶a̍ Chu̍dā, po̍ Chēmi̍si̍ wo̍, a̍ Chu̍dā Īsīka̍a̍līɔ̄ɔ̄ o̍ mɛ̍ɛ̍lu̍ Chi̍i̍su̍ pīsī wo̍.

¹⁷Mi̍ Chi̍i̍sū tu̍āl pēmbēi̍ nda̍ wānāā o̍ hɛ̍li̍ le̍ wāa̍ hɔ̄ltē ndɔ̄ wa̍. Mbo̍ sīm o̍ dɛ̍ŋgbɔ̍ɔ̍ ni᷄ŋ. Mi̍ bu̍ɛ̍i̍yāā ndūa̍a̍ ku̍ndā bɛ̄ndōo̍ a̍ wāŋnda̍ fāŋgā bɛ̍ndōo̍ ā bālū ndu̍ si̍lɔ̍ le̍ ndu̍ nīla̍ŋ yāŋɔ̄ɔ̍, ā pūm le̍ nāālā ndāla̍ŋ sīŋgīo̍o̍. Fo̍ndāŋ ndā yɛ̍ yɛ̍la̍ nda̍ fūla̍ la̍ŋ la̍ cho̍ la᷅ŋ ni̍, lɛ̄ŋndē Chūdi̍a̍āle̍ŋ, a̍ Chūlu̍sɛ̄lɛ̄m chi̍e̍e̍, a̍ lɛ̄ŋnde̍ ho̍lnu̍ŋ pe̍e̍ mɛ᷅ŋmā īhɛ᷄llo̍ mi̍ lē bālū Ta̍a̍yā chi̍e̍e̍ le̍ŋ, a̍ Sa̍i̍dɔ̄ŋ.

¹⁸Wānāā nyi̍nāā wɔ̄ɔ̍ŋnda̍ wa̍ kɔ̄ɔ̄lī wa̍ bɛ̍ɛ̍, mi̍ Chi̍i̍sū tu̍a̍ū nyi̍nāā kāŋ mbo̍ si̍ŋgī nda̍.

¹⁹Kpāāyāa̍ wa̍ chɔ̄nɔ᷄ŋndo̍ Chi̍i̍sū o̍ ŋ̄dīāl mbō sīŋgī wa᷅ŋnda̍. Le̍ he̍ī, fāŋgāa̍ kpe̍de̍ ā wa̍ kīndīo̍o̍ le̍ ndu̍ pīla᷄ŋndo̍.

²⁰Mi̍ Chi̍i̍sū chu̍ā hɔ̄lla̍ mbo̍ tōfā bu̍ɛ̍i̍yāā ndūa̍a̍. Mbo̍ dīmī āā, “Nya̍ cho̍ ā tāmbɛ̍i̍ ya̍, lā pɛ̄l tɔ̄nɔ̄ɔ̍. Kāni̍ fo̍ndōle̍ nya̍ nɔ̍ māsāle̍ Mɛ̄lɛ̄ka̍le̍ŋ ni̍.

²¹Nya̍ cho̍ a̍ yīa̍a̍ŋ bōōnde̍i̍ he̍ī ya̍, lā pɛ̄l tɔ̄nɔ̄ɔ̍. Kāni̍ fo̍ndōle̍ lā chō hūnɔ̄ɔ̄ kɔ̄l hīni̍. Nya̍ cho̍ cha᷄ŋndo̍ bōōnde̍i̍ he̍ī ya̍, lā pɛ̄l tɔ̄nɔ̄ɔ̍. Kāni̍ fo̍ndōle̍, lā chō hūnɔ̄ɔ̄ māmɔ̄ɔ̄!

²²“Nya̍ wāŋnda̍ tu᷄l lēyɛ̄, ndu̍yɛ̍, ma̍ kɛ̄ɛ̄ nya̍ wa̍, lā pɛ̄l tɔ̄nɔ̄ɔ̍. Ā yīo̍u̍ nya̍, mā tōsa̍ mī dīōlā nyāla̍ŋ lā sīmnu᷄ŋ di̍o̍lā wɔ̄ɔ̍ŋ wāŋnda̍ o̍ hɔ̄l. Le̍ mɛ̄ɛ̍ nya̍ tōl wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ kɔ̄ɔ̄lī yɛ̍, nda̍ tōsa̍ kēŋ ni̍.

²³Le̍nde̍ ko̍ni̍ fi̍nyāā ndāa̍ tōsa̍ a̍ wānāa̍ su̍a̍ā le̍ Mɛ̄lɛ̄ka̍ wa̍ ni̍. Kɛ̍, lā wa̍ a̍ kɔ̄l kɛ̄ndɛ̄. Lā tōsa̍ kɔ᷅l kɛ̄ndɔ̄ɔ̍ bu̍tē. Kāni̍ fo̍ndōle̍, Mɛ̄lɛ̄ka̍ chō ō bɛ̄ɛ̄ndīa̍ŋ o̍ fo̍ndāŋ ndɔ̄ɔ̍ mbō ke̍ nya̍ nyɛ̄ kɛ̄ndɛ̄ bɛ̄ndū.

²⁴Kɛ̍ ndu̍yɛ̍, nyɛ̄ nɛ̄īyāa̍ chō le̍ nya̍ su̍l la̍, kāni̍ fo̍ndōle̍, lā chīi̍ kɔ̄l kɛ̄ndɔ̄ɔ̍ o̍ nya̍a̍ sɔ̄lā.

²⁵Nyɛ̄ nɛ̄īyāa̍ chō le̍ nya̍ cho̍ ā pūmāā wa̍ kāni̍ fo̍ndōle̍, bōōndi̍i̍ cho̍ fūūlūū mī yīa̍a̍ŋ mā bīī nya̍. Nyɛ̄ nɛ̄īyāa̍ chō le̍ nya̍ cho̍ māmɔ̄ɔ̍ pɛ̄ŋgo̍o̍ ho̍ō wa̍, kāni̍ fo̍ndōle̍, bōōndi̍i̍ cho̍ fūūlūū mī lā kōŋu̍l, ndu̍yɛ̍ mī lā cha᷄ŋ.

²⁶“Nyɛ̄ nɛ̄īyāa̍ chō le̍ nya̍ wāŋnda̍ kpo̍u̍, a̍ cho̍ sɔ̄ɔ̍ŋ kɛ̍ndɔ᷄ŋ dīmīo̍o̍ a̍ nya̍ o̍kɔ̄ɔ̄ wa̍. Kāni̍ fo̍ndōle̍, le̍nde̍ ko̍ni̍ fi̍nyāā ndāā ma̍māa̍ nda̍ a̍a̍ to̍sā ni̍. Le̍nde̍ ko̍ni̍ nda̍ a̍a̍ di̍mī sɔ̍ɔ̍ŋ kɛ̄ndɔ᷄ŋ a̍ wānāā lāchōōwāa̍ ni̍, a̍ di̍mī māā wānāa̍ su̍a̍ā le̍ Mɛ̄lɛ̄ka̍ wa̍ nda̍ chō ni̍ wa̍.”

²⁷Mi̍ Chi̍i̍sū hi̍a̍ū lāchī a̍ sūɛ̍i̍ āā, “Kɛ̍ mī di̍mu̍l nya̍ cho̍ ya̍ nīla̍ŋ yāŋɔ̄ɔ̍ wa̍, lā kāāla̍ ya̍a̍mɔ̍ɔ̍wa̍a̍ nya̍a̍. Lā tōsa̍l wa̍nāa̍ tu̍l nya̍ lēyɛ̄ wa̍ kɛ̄ndɛ̄i̍.

²⁸Lā dɔ̄u̍ wa̍nāa̍ cho̍ nya̍ mēnāa̍ wa̍ sa̍lā. Lā pīɛ̍i̍ Mɛ̍lɛ̄ka̍ le̍ wānāa̍ cho̍ nya̍ yīōūla̍ŋ nda̍.

²⁹Tē wāŋndo̍ lɔ̄ɔ̄ nu̍m pɛ̍ kpa᷅ŋnde̍, mu̍lu̍l ndu̍, ī pīlɛ̍ī vɛ̄lɛ̄. Tē wāŋndo̍ pūu̍ dōmā nu̍mndo̍ pɛ̍, ku̍u̍nā ndu̍ le̍ dōmā nu̍m lēbɛ̄ŋgo̍o̍ bīyɔ̄ɔ̍ le̍.

³⁰Tē wānā o̍ wānā pi̍ɛ̍i̍ nu̍m pɛ̍ nyɔ̍ɔ̍, ke̍ ndu̍. Tē wāŋndo̍ kūɛ̄nu᷄ŋ a̍ nyɛ̄m nūmndo̍ŋ pɛ̍, nyu̍nā lɛ̄ ndu̍ le̍ mu̍ŋ te̍.

³¹Ka̍ā ŋ̄ hɛ̄na̍ŋ māā chāa̍ŋ nūm to̍sa̍l nu̍m ndo̍, nūm bɛ̍ɛ̍ to̍sa̍l chāāŋnda̍ le̍nde̍.

³²“Tē ō wa̍ pɛ̍ māā wa̍nāa̍ ka̍a̍la̍ nu̍m nda̍, nda̍ ko̍ni̍ ŋ̄ kāālā ni̍, mɛ̄ɛ̍ mī yɛ̄ɛ̍nɛ̍ ŋ̄ yēēmā yɛ̍ vɛ̄lɛ̄ mī Mɛ̄lɛ̄ka̍ ke̍ nu̍m le̍ ke̍ŋ? Kāni̍, wānāā yɔ̄ŋ wɔ̄ɔ̍ŋnda̍ bɛ̍ɛ̍ ā kāāla̍ wānāa̍ ka̍a̍la̍ nda̍ wa̍.

³³Ndu̍yɛ̍, tē ō wa̍ pɛ̍ māā wānāa̍ to̍sāl nu̍m tōnya̍a̍ wa̍ nda̍ ko̍ni̍ ŋ̄ tōsāl to᷅nya̍a̍ ni̍, mɛ̄ɛ̍ mī yɛ̄ɛ̍nɛ̍ ŋ̄ yēēmā yɛ̍ vɛ̄lɛ̄ mī Mɛ̄lɛ̄ka̍ ke̍ nu̍m le̍ ke̍ŋ? Kāni̍, wānāā yɔ̄ŋ wɔ̄ɔ̍ŋnda̍ bɛ̍ɛ̍ ā tōsā le̍nde̍.

³⁴Ndu̍yɛ̍, tē a̍ ke̍ wāŋndo̍ kūo̍o̍ pɛ̍ le̍ mbō hu᷄ŋ mi̍ŋgī nu̍m nyɛ̄ ŋ̄ ke̍ ndu̍ ko̍ŋ ndo̍ o̍ bā pɛ̍, mɛ̄ɛ̍ mī yɛ̄ɛ̍nɛ̍ ŋ̄ yēēma̍ yɛ̄ vɛ̄lɛ̄ māā Mɛ̄lɛ̄ka̍ ke̍ nu̍m le̍ ke̍ŋ? Kāni̍, wānāā yɔ̄ŋ wɔ̄ɔ̍ŋnda̍ bɛ̍ɛ̍ ā hōl cha̍a̍ŋāā ndāā wa̍nāā yɔ̄ŋ wɔ̄ɔ̍ŋnda̍ kūēēla̍ŋ le̍ mā hu᷄ŋ mi̍ŋgī nda̍ o̍ bā.

³⁵Le̍la̍ŋ, lā kāāla̍ ya̍a̍mɔ̍ɔ̍wa̍a̍ nya̍a̍, ndu̍yɛ̍, mī lā tōsa̍ tōnya̍a̍ nāa̍ wāŋnda̍ chūā. Lā ke̍ wa᷅ŋnda̍ kūēēla̍ŋ. Ndu̍yɛ̍, tē lā ke̍ nda̍ pɛ̍, lā nɔ᷅ lɛ̄ o̍ kɔ̄l le̍ nyɛ̄ kōŋ sɔ̄lā le̍. Tē lā tōsa̍ le̍nde̍ pɛ̍, mɛ̄ɛ̍ Mɛ̄lɛ̄ka̍ chō nya̍ nyɛ̄ kɛ̄ndɛ̄ kɛ̍ndɛ̄ kē. Ndu̍yɛ̍, lā chō wā chūāūwa̍ le̍ Mɛ̄lɛ̄ka̍ Bɛ̄ndōo̍. Kāni̍ fo̍ndōle̍, Mɛ̄lɛ̄ka̍ ndu̍, wānāa̍ si̍nā i̍kɛ̍ndɛ̄ le̍ wa̍ a̍ wānāā kɔ̄l vēsɛ̍i̍ya̍ bɛ̍ɛ̍, mbō tōsa̍l nda̍ tōnya̍a̍.

³⁶Lā tūīīnu̍ŋ wa᷅ŋnda̍ īnyīɛ̍ɛ̍ mɛ̄ɛ̍ Mɛ̄lɛ̄ka̍ fi̍nyā nyā cho̍ wāna̍ īnyīɛ̍ɛ̍ yɛ̍.”

³⁷Mi̍ Chi̍i̍sū si̍lā āā, “Lā pɛ̍ɛ̍sā wānā le̍. Ko̍ŋ to̍sā ni̍ Mɛ̄lɛ̄ka̍ pɛ̍ɛ̍sā nya̍ le̍. Lā ya̍a̍la̍ wānā le̍. Ko̍ŋ to̍sā ni̍ Mɛ̄lɛ̄ka̍ ya̍a̍lā nya̍ le̍. Lā mēlnu̍ŋ chāāŋnda̍. Ko̍ŋ to̍sā ni̍ mī Mɛ̄lɛ̄ka̍ mēlnu᷅ŋ nya̍.

³⁸Lā ke̍ chāāŋnda̍. Ko̍ŋ to̍sā ni̍ mī Mɛ̄lɛ̄ka̍ ke̍ nya̍. Mɛ̄lɛ̄ka̍ chō bɔ̄lɔ̄la̍ nyāla̍ŋ pēī cha̍. Ō dɔ̄ū pɛ̍, ō dīli̍ŋa̍, ō hīīlu̍u̍, ō pēēlu̍, lā pɛ̄, lā cho᷄ŋ lēkɔ̍ɔ̍lī wa̍ā. Mɛ̄ɛ̍ nūm tūūlūl chāāŋnda̍ yɛ̍, le̍nde̍ ko̍ni̍ Mɛ̄lɛ̄ka̍ tūūlūl nu̍m ni̍.”

³⁹Mi̍ Chi̍i̍sū di̍mūl vɛ̄lɛ̄ nda̍ tālo̍o̍ āā, “Wānā su̍mɛ̍i̍yo̍ nɔ̄lā pa̍ mbō sēe̍ chāa̍ŋ ndɔ̄ wa̍nā su̍mɛ̍i̍yo̍ tīnda̍a̍? Nda̍ nda̍ ŋi̍ɔ̍ɔ̍ŋ fa̍ū ā de᷅l o̍ so̍o̍ŋndo̍ ni᷄ŋ te̍?

⁴⁰Nūm wāna̍ nda̍ chō pɛ̄ɛ̄kōo̍ wo̍ a̍ cho̍ o̍ bɛ̍ndū mā hīōū wāna̍ cho̍ nu̍m pɛ̄ɛ̄kōo̍ wo̍ le̍. Kɛ̍ ndu̍yɛ̍, wānā o̍ wānā, tē a̍ chi̍i̍ pɛ̄ɛ̄kū nūmndo̍ pɛ̍ pa̍ku̍, ā nɔ̄lā mā wa̍ mɛ̄ɛ̍ ma̍sānɔ̄ nūmndo̍ chō yɛ̍.”

⁴¹Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ nyūnā āā, “Vɛ᷅ mā bu̍u̍la̍ŋ a̍ bīlte̍ŋ chāa̍ŋ nu᷄m o̍ lēhɔ̄l, kɛ̍ ndu̍yɛ̍, a̍ bu̍u̍lāŋ a̍ yɔ̄m bɛ̄ndu̍ cho̍ nūm pi̍la̍ o̍ lēhɔ̄l lo̍ le̍?

⁴²Kɛ̄lɛ̄ŋgāā le̍ vɛ̄ɛ̍nɛ̍ ŋ̄ lōōkū yɛ̍ chāa̍ŋ nu᷄m dīmūl āā, ‘Hu̍ŋ I̍ hu᷅l nu̍m bīlte̍ŋ o̍ lēhɔ̄l,’ tē nūm pi̍la̍ bu̍mba̍ le̍ yɔ̄m bɛ̄ndu̍ cho̍ nu̍m o̍ lēhɔ̄l lo̍ chɔ̄ɔ̍ pɛ̍? Ā chō wāna̍ kāŋgālā. So̍li̍ wɔ̍ fɛ̍lɛ̍ŋ yɔ᷅m bɛ̄ndu̍ cho̍ nūm pi̍la̍ o̍ lēhɔ̄l lo̍. O̍ ko̍ŋ, ā nɔ̄lā mā so̍li̍ bīlte̍ŋ chāa̍ŋ nu᷄m o̍ lēhɔ̄l, kāni̍, ā wā ni᷅ŋ chɔ̄ɔ̍ nyɛ̄ kɛ̄ndɛ̄ wa̍la̍ŋ.”

⁴³“Yɔ̄m kɛ̄ndɔ̄ɔ̍ ō ku᷅m ko̍mɔ̄ɔ̄ wɔ̄ɔ̍ŋndo̍ le̍. Le̍nde̍ ko̍ni̍, yɔ̄m wɔ̄ɔ̍ŋndo̍ ō ku᷅m ko̍mɔ̄ɔ̄ kɛ̄ndɛ̄ le̍.

⁴⁴O̍ kōmɔ̄ɔ̍ wānā si̍nā yɔ᷅mnde̍ pɛ̄ŋgu̍la̍ŋ ni̍. Wānā ke̍ndī fi̍kīi̍ya̍ŋ o̍ yɔ̄m ŋ̄yɔ̄ɔ̍ le̍, kɛ̄lɛ̄ŋgāā mī wānā ke̍ndi̍ kīle̍pīi̍ya̍ŋ o̍ yɔ̄m ŋ̄yɔ̄ɔ̍.

⁴⁵Sɔ̄ɔ̍ŋ kɛ̍ndɛ᷄ŋ cho̍ ŋ̄ kɛ̄sīāā o̍ kɔ̄l wānā kɛ̍ndɔ̄ɔ̍ ni᷄ŋ ndo̍ŋ, mu̍ŋ ko̍ni̍ o̍ so̍lī chi̍e̍ēŋ ni̍. Ndu̍yɛ̍, sɔ̄ɔ̍ŋ wɔ̍ɔ̍ŋ cho̍ ŋ̄ kɛ̄sīāā o̍ kɔ̄l wānā wɔ̍ɔ̍ŋndo̍ ni᷄ŋ ndo̍ŋ, mu̍ŋ ko̍ni̍ o̍ so̍lī chi̍e̍ēŋ ni̍. Sɔ̄ɔ̍ŋ wa᷅ ŋ̍ pi̍a̍ā o̍ kɔ̄llo̍ ni᷄ŋ ndo̍ŋ, mu̍ŋ ko̍ni̍ sōndōo̍ dīmī ni̍.”

⁴⁶Mi̍ Chi̍i̍sū hi̍a̍ū lāchī a̍ sūɛ̍i̍ āā, “Vɛ᷅ mī lā vēēlu̍ ya̍ āā, ‘Māsānɔ̄ɔ̍, Māsānɔ̄ɔ̍,’ kɛ̍, lā to̍sā nyɛ᷅ ya̍ I̍ di̍mūl nya̍ wo̍ le̍?

⁴⁷Wānā o̍ wāna̍ hi᷅ŋ nāa̍ ya̍ chu̍a̍ pɛ̍, mbō ya᷄ŋ nīla̍ŋ o̍ nyɛ̄ ya̍ I̍ di̍mī wo̍, ndu̍yɛ̍, mbō tōsa̍ nyɛ̄ ya̍ I̍ di̍mī wo̍ pɛ̍, I̍ cho̍ nya̍ wāna̍ nda̍ vēla᷅ŋ ndo̍ chɔ̄m.

⁴⁸Wānā ko̍ŋ chō māchūāā māā wānā pi᷅lɛ̍ o̍ ta̍ŋgu̍l chīɛ̄īyo̍ wo̍. Mɛ̄ɛ̍ o̍ wa̍ tāŋgūllo̍, mbo̍ bālū so̍o̍ŋndo̍ tōūwɔ̄ɔ̍ nyɛ̄ kɛ̄ndɛ̍ī. Mbo̍ kōmāl lɛ̄ŋndē wɔ̄sɔ̄kɔ̍le̍ŋ. Mbo̍ sīmī chīɛ̄ī ndɔ̄ɔ̍ o̍ lɛ̄ŋndē wɔ̄sɔ̄kɔ̍le̍ lēŋ chōo̍. O̍ ko̍ŋ kɔ̍ɔ̍lī, mi̍ pīɔ̍ɔ̍ sīā. Mi̍ mɛ̄ŋnda̍ŋ mā hūŋ ta̍u̍. Mi̍ mā hu᷄ŋ lɔ̍ɔ̄ chīɛ̄īyo̍ ho̍ō. Kɛ̍, mā nɔ̄lā ndu̍ nyɛ̄ o̍ nyɛ̄ yɔ̄ŋ te̍, kāni̍ fo̍ndōle̍, ō chāa̍ ndu̍ tāŋgūl.

⁴⁹Kɛ̍, wānā o̍ wāna̍ tu̍e̍ī dīōmndā nīla̍ŋ pɛ̍, kɛ̍, mbō kɛ̄ɛ̍ nyɛ̄ dīōmndā lāŋ lā dīmi̍ wo̍ tōsāa̍ pɛ̍, mɛ̄ɛ̍ ō chō māchūāā māā wānā pi᷅lɛ̍ o̍ ta̍ŋgu̍l chīɛ̄īyo̍ wo̍. Mɛ̄ɛ̍ o̍ wa̍ chīɛ̄īyo̍ tāŋgūllo̍, ō chɛ᷄l mbō bālu̍ fɛ̍lɛ̍ŋ so̍o̍ŋndo̍ tōūwɔ̄ɔ̍ mbō fūūlu̍u̍ o̍ lɛ̄ŋndē wɔ̄sɔ̄kɔ̍le̍ŋ te̍. Le̍ he̍ī, mɛ̄ɛ̍ pīɔ̍ɔ̍ si̍a̍, mi̍ mɛ̄ŋnda̍ŋ mā hūŋ mi̍ mā lūāā chīɛ̄īyo̍ ho̍ō. Mbo̍ kōmbā lē pīlɛ̍ kpe̍. Mi̍ nyɛ̄ o̍ nyɛ̄ tāmbū.”