Read Southern Kisi Dītɔ̍nɔ̍mi̍ī 10 Bible Online

Dītɔ̍nɔ̍mi̍ī 10 - Southern Kisi bible

Dītɔ̍nɔ̍mi̍ī 10

¹Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “A̍ te̍le̍ŋ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, ‘Bɛ̍ɛ̍ndi̍a̍a̍ vɛ̍lɛ̄ pōūtā yɛ̍ndɛ̍la̍ŋ lā tīɔ̍ɔ̍ŋ, mɛ̄ɛ̍ lā tāse̍la̍ŋ lā wa̍ yɛ̍, o̍ ko̍ŋ kɔ̍ɔ̍lī, mā ko̍ma̍l la̍ pēmbēi̍ chōo̍ na̍nu᷄ŋ a̍ la̍ŋ. Ndu̍yɛ̍ mā to̍o̍si̍a̍a̍ vɛ̍lɛ̄ kɔ̍fū yɔ̄mndo̍ le̍ pōūtā yɛ̍ndɛ̍la̍ŋ ndāŋ dɔ̄wɔ̄ɔ̍ lēni᷄ŋ.

²Nyɛ̄ o̍ nyɛ̍ wa̍ ō pōōnyīāā o̍ pōūtā yɛ̍ndɛ̍la̍ ti̍ɔ̍ɔ̍ŋndā tāse̍la̍ ŋ̄ pēsi̍ la̍ŋ chōo̍, I̍ cho̍ ndu̍ mīŋgī pōōnyīāā kpo̍u̍ o̍ pōūtā yɛ̍ndɛ̍la̍ ŋ̄ chō la᷅ŋ bɛ̄ɛ̄ndīāā la̍ŋ chōo̍. O̍ ko̍ŋ kɔ̍ɔ̍lī, mā chu̍a̍ pōūtā yɛ̍ndɛ̍la̍ŋ nda᷅ŋ mā dɔ̄ū la̍ŋ o̍ kɔ̍fū ŋ̄ chō ko̍ŋ to̍o̍sīāā wo̍ ni᷄ŋ.’

³“O̍ ko̍ŋ, mi̍ to̍o̍sīāā kɔ̍fōo̍ a̍ yɔ̄m āke̍e̍sīāā wo̍, ndu̍yɛ̍ o̍ ko̍ŋ kɔ̍ɔ̍lī, mi̍ bɛ̍ɛ̍ndīāā pōūtā yɛ̍ndɛ̍la̍ ti̍ɔ̍ɔ̍ŋndā lāŋ mɛ̄ɛ̍ lā tāse̍la̍ŋ lā wa̍ yɛ̍, ndu̍yɛ̍ mi̍ he᷅l a̍ la̍ŋ o̍ bā o̍ pe̍mbēi̍ chōo̍.

⁴O̍ ko̍ŋ kɔ̍ɔ̍lī, nyɛ̄ o̍ nyɛ̍ wa̍ ō pōōnyīāā o̍ pōūtā yɛ̍ndɛ̍la̍ ti̍ɔ̍ɔ̍ŋndā tāse̍la̍ŋ chōo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ mi̍ŋgī ndu̍ pōōnyīāā kpo̍u̍ o̍ pōūtā yɛ̍ndɛ̍la̍ ti̍ɔ̍ɔ̍ŋndā ya̍ I̍ bɛ̍ɛ̍ndi̍a̍a̍ la᷅ŋ nda̍ŋ chōo̍, ndu̍ yɔ̍nūŋ ni̍, māā sāwāla̍ tɔ̍la̍ o̍ to̍mbo̍la̍l nya̍ bōōndi̍i̍ nya̍ wa̍ ā dīīna᷄ŋ ku̍ndāa̍ o̍ pēmbēi̍ bɛ̄ŋgu̍ mi̍ dīōm ndɔ̄ɔ̍ ō wā sūɛ̍i̍ pēmbēi̍ chōo̍ o̍ yīŋndē bɛ̄ŋnde̍ŋ ni᷄ŋ ndo̍ la̍ŋ. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chu̍ā sāwāla̍ la̍ŋ mbo̍ mīŋgī ya̍ la̍ŋ kē.

⁵Mi̍ bi̍ī pōūtā yɛ̍ndɛ̍la̍ sāwāla̍ŋ ndāŋ lā wa̍ lā pōōnyīāā lēchōo̍ la̍ŋ, mi̍ tu̍āl pēmbēi̍ a̍ la̍ŋ. O̍ ko̍ŋ kɔ̍ɔ̍lī, mi̍ du̍a̍ū pōūtā yɛ̍ndɛ̍la̍ nda᷅ŋ o̍ kɔ̍fu̍ ya̍ I̍ to̍o̍si̍a̍a̍ ko̍ŋ ndo̍ ni᷄ŋ, mi̍ lā wā lā kɛ̄sīāā lēni᷄ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ yɛ̍.” (

⁶O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ fa̍ŋa᷄ŋ o̍ so̍o̍ŋnda̍ māmɛ̄ŋndā wāŋnda̍ Cha̍a̍ka᷅ŋ, ma̍ kūā Mo̍sɛ̍lūāā. Lo̍ŋ E̍lɔ̄ŋ vi᷅ ni̍, ndu̍yɛ̍ ma̍ chɔ̄ ndu̍ lo̍ŋ. O̍ ko̍ŋ kɔ̍ɔ̍lī, mi̍ Ɛ̄li̍a̍a̍sā, po̍ ndɔ̄ o̍ mi̍i̍ŋgū māsa̍ wānāā sōlīāā lāsa̍lāa̍ o̍ fōōfo̍ ndɔ̄ɔ̍.

⁷O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ ma᷅l vɛ̄lɛ̄ lo̍ŋ ma̍ kūā Kūdīkɔ̍ndāā. Ma̍ cha᷄ŋ vɛ̍lɛ̄ lo̍ŋ ma̍ kūā o̍ fo̍ndāŋndo̍ dīōla̍ŋ āā Chōtība̍tāā, fo̍nda᷄ŋ nɔ̍ pēēla̍ pɔ̍mbɔ̄la̍ŋ ta̍u̍ ta̍u̍ wo̍.

⁸A̍ te̍le̍ŋ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍lī yu̍ŋgu̍ Li̍va̍īyo̍ māā nda̍ nɔ̍ ni̍ mā wa̍ kɔ̄la̍ŋ a̍ kɔ̍fū kpe̍ma̍ Mɛ̍lɛ̄ka̍ Ya̍a̍wɛ̄ɛ̄ wo̍. Ndu̍yɛ̍ māā nda̍ ko̍ nda̍ a̍a̍ nɔ̍ vɛ̄lɛ̄ ni̍, mī nda̍ a̍a̍ sa̍a̍ŋgi̍a̍l Mɛ̍lɛ̄ka̍ Ya̍a̍wɛ̄ɛ̄, le̍ wāa̍ sa̍lāla̍ŋ sōlīo̍o̍ o̍ ndu̍ lo̍. O̍ ko̍ŋ kɔ̍ɔ̍lī, nda̍ ko̍ni̍ nda̍ a̍a̍ nɔ̍ vɛ̄lɛ̄ ni̍ mi̍ nda̍ a̍a̍ dɔ̍ū wāŋnda̍ sa̍lā a̍ dīōla̍ŋ Mɛ̍lɛ̄ka̍ Ya̍a̍wɛ̄ɛ̄ la̍ŋ. Ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍, wa̍lta̍ ndāla̍ŋ la̍ cho̍ la̍ŋ ni̍.

⁹Nyɛ̄ ko̍ŋ to̍sa̍ ni̍ yu̍ŋgu̍ Li̍va̍īyo̍ nda̍ sɔ̄la̍ le̍lɛ᷅ŋ o̍ lēlɛ̄ŋ māā yu̍ŋgu̍la̍ŋ I̍sɔ̄lūɛ̄ī lā pīlɛ̍ la̍ŋ te̍. Nda̍ nda̍ nyɛ̄m nda̍ŋ ki̍ɔ̍ɔ̍ŋ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, mɛ̄ɛ̍ ndu̍ Mɛ̍lɛ̄ka̍ pīla̍ o̍ chu̍e̍l nda̍ būŋgɛ̄i̍ yɛ̍.)

¹⁰Mi̍ Mūu̍sē o̍ di̍mī āā, “Bōōndi̍i̍ ya̍ I̍ mi̍i̍ŋgu̍ pēmbēi̍ chōo̍ a̍ pōūtā yɛ̍ndɛ̍la̍ di̍i̍ŋ ndɔ̄ la̍ŋ nde̍, le̍ pālɛ̍i̍ vɛ̄lɛ̄ be̍le̍-hi̍ɔ̍ɔ̍lu̍ a̍ nyūmnda̍ŋ be̍le̍-hi̍ɔ̍ɔ̍lu̍ I̍ wa̍ pēmbēi̍ chōo̍ lo̍ŋ, mɛ̄ɛ̍ ya̍ I̍ to̍sa̍ o̍ tāse̍la̍ ndɔ̄ɔ̍ yɛ̍ ko̍ni̍, I̍ wa̍ Mɛ̍lɛ̄ka̍ Ya̍a̍wɛ̄ɛ̍ nyɔ̄ɔ̄lōo̍ le̍ nya̍. Ndu̍yɛ̍ mi̍ Mɛ̄lɛ̄ka̍ tūɛ̄ī vɛ̄lɛ̄ pīɛ̄īlē nīle̍ŋ. Mbo̍ kɛ̄ɛ̄sīāā māā ō cho̍ lɛ̍ nya̍ tɛ̄ɛ̄mbūū le̍.

¹¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄, o̍ di̍mūl la̍ āā, ‘Si̍m wa᷅ŋnda̍ I̍sɔ̄lūɛ̍i̍ lāchī, mī lā hīōū lāchī a̍ kɔ̄la̍ŋ le̍ mī lā kɔ̍ bi̍ī lɛ̄ŋndē ya̍ I̍ chu̍e̍l fi̍nyāā nyāā ma̍māa̍ būŋgɛ̄i̍ le̍ nda̍ kīo̍o̍ le̍ŋ.’ ”

¹²Mi̍ Mūu̍sē o̍ hi̍a̍ū lāchī a̍ sūɛ̍i̍ mbo̍ dīmī āā, “Le̍la̍ŋ wāŋnda̍ I̍sɔ̄lūɛ̄ī, nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō yēēma̍ nya̍ o̍ ŋ̄dīāl tu̍ŋ ndo̍ cho̍ ho̍ō ni̍. Ō yēēma̍ mī lā ke̍ ndu̍ bɛ̄ɛ̄le̍ŋ, ndu̍yɛ̍ mī lā wa̍ o̍ nɛ̄i̍ ndɔ̍ o̍ ye̍e̍ma̍ nya̍ mī lā wa̍ chōo̍ wo̍ chōo̍, o̍ ko̍ŋ kɔ̍ɔ̍lī, mī lā kāāla̍ ndu̍, ndu̍yɛ̍ mī lā sāāŋgi̍a̍l ndu̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ a̍ kɔ̄ltā nyāla̍ŋ kpo̍u̍, ndu̍yɛ̍ mī lā wa̍ yīya᷄ŋndo̍ a̍ ndu̍ o̍kɔ̄ɔ̄ le̍ te̍le̍ŋ o̍ te̍le̍ŋ.

¹³O̍ ko̍ŋ kɔ̍ɔ̍lī, sāwāla̍ ndɔ̄la̍ ya̍ I̍ cho̍ nya̍ la᷅ŋ hāū di̍mu̍llo̍, ndu̍yɛ̍ a̍ pɛ̄ɛ̄kūlā ndɔ̄la̍ŋ le̍ dɛ̍nɛ̍ nyā kɛ̍ndɔ̄ɔ̍ la̍ŋ, o̍ yēēma̍ mī lā wa̍ la̍ŋ chūa̍a̍ le̍ te̍le̍ŋ o̍ te̍le̍ŋ.

¹⁴Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, ha̍la̍a̍ chōo̍ cho̍o̍ bɛ̍ɛ̍, ndu̍yɛ̍ a̍ nyɛ̄ o̍ nyɛ̍ cho̍ lēni᷄ŋ ndu̍ nɔ̍ ni̍. Chi̍e̍ēŋndo̍ ho̍ō kpo̍u̍, ndu̍yɛ̍ a̍ nyɛ̄ o̍ nyɛ̍ cho̍ lēni᷄ŋ, le̍ ndu̍ la̍ cho̍ kpo̍u̍ ni̍.

¹⁵Kɛ̍ a̍ ko̍ŋ kpo̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ cha᷅ fi̍nyāā nyāā ma̍māa̍ nyīnā ta̍u̍ ndu̍yɛ̍ mbo̍ kāālā nda̍ ta̍u̍. Wāŋnda̍ o̍ chi̍e̍ēŋndo̍ ni᷄ŋ tɛ̍ɛ̄ŋ kpo̍u̍ mbo̍ lō o̍ ko̍ŋ mbo̍ hɛ̄lī nya̍ fu̍la̍ o̍ pūlāle̍ fi̍nyāā nyāā ma̍māā kāŋ chōo̍ wa̍ mbo̍ sīīŋgūū nya̍ wānāā ndɔ̄. Ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍, wānāā ndūa̍a̍ nya̍ chō ni̍.

¹⁶Le̍la̍ŋ lā dīndi̍ kɔ᷅ltā nyāla̍ŋ, ndu̍yɛ̍ mī lā ma᷄l bōllē kālāle̍ŋ tōsāa̍.

¹⁷Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ Mɛ̄lɛ̄ka̍ hi̍o̍ū kpo̍u̍ wo̍ o̍ cho̍ ni̍. Māsā hi̍o̍ū māsāa̍ kpo̍u̍, ndu̍yɛ̍ mi̍ kpāāya̍ ndɔ̄ɔ̍ ō hīāū kpāāyā o̍ kpāāyā wo̍, ō wānā o̍ wānā nɔ̍ mā nɔ̄ sīōōŋīī ndūɛ̍i̍ yo̍ o̍ cho̍ ni̍. Mɛ̄lɛ̄ka̍ chɔ᷅m yɛ̍ yɛ̍ ŋ̍wa᷅ŋ tɛ̄ɛ̄ŋ te̍ wo̍ o̍ cho̍ ni̍, Mɛ̄lɛ̄ka̍ bi̍ī lu̍ɛ̍i̍yɔ̄ɔ̄ ni᷄ŋ wa̍nā o̍ bā le̍.

¹⁸Vīi̍ya̍a̍ nɔ̍ lɛ̍ ŋ̄fi̍nyā le̍ wa̍ ni̍, a̍ wāŋ lāāndūāā pīāāndūāā ndāa̍ ā vī, ā nɔ̍ lɛ̍ ŋ̄pīāāndū le̍ wa̍, ndu̍ su̍ŋgū le̍ nda̍ ni̍, mbō tōsa̍ mī wāŋnda̍ ā bīī nda̍ o̍ nɛ̄ī sa̍kpōo̍ chōo̍. Wānāā lēkāa̍wa̍a̍ cho̍ bɛ̍ɛ̍ wa̍nāā ndūa̍a̍ tɛ̄ɛ̄ŋ nda̍, mbō lo̍ o̍ ko̍ŋ mbō kāāla̍ nda̍ mbō ke̍ nda̍ nyɛ̄ dīa̍a̍ a̍ nyɛ̄ chūɛ̄ɛ̄na᷄ŋndo̍ le̍ te̍le̍ŋ o̍ te̍le̍ŋ.

¹⁹Le̍la̍ŋ nya̍ bɛ̍ɛ̍ lā chɔ᷄m wa̍nāā lēkāa̍wa̍a̍ cho̍ nya̍ tɛ̄ɛ̄ŋ nda̍ kāālāa̍, kāni̍ fo̍ndōle̍ nya̍ bɛ̍ɛ̍ le̍nde̍ ko̍ni̍ nya̍ wa̍ sīndɛ̄ mīālla̍ o̍ lɛ̄ŋndē I̍chi̍pīle̍ŋ ni᷄ŋ ni̍.

²⁰Lā ke̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ bɛ̄ɛ̄le̍ŋ, ndu̍yɛ̍ mī lā sāāŋgi̍a̍l ndu̍, ndu̍ pīlɛ̍ kpe̍. Lā wa̍ sa̍kpō ndu̍ o̍ hɔ̄l. Ndu̍yɛ̍ tē lā wa̍ ībūŋgā o̍ ībūŋgā chūā pɛ̍, o̍ dīōlā ndɔ̄la̍ŋ la̍ŋ pīlɛ̍ kpe̍ nya̍ nɔ̄ ni̍ mī lā mēna̍ŋ.

²¹Mɛ̍lɛ̄ka̍ nɔ̄ ni̍ mbō sɔ̄la̍ sāŋgālāa̍. Ndu̍ cho̍ Mɛ̄lɛ̄ka̍ nyāa̍ ni̍. Ndu̍yɛ̍ nya̍ pi̍la̍ lā chē a̍ hɔ̄ltā nyāla̍ŋ pɛ̍ɛ̍ŋ sɔ̍ɔ̍ŋ kɔ̄ndɔ̄fi̍li̍ŋ bɛ̄ndūŋ o̍ to̍sa̍ le̍ nya̍ wo̍ŋ.

²²Fi̍nyāā nyāā ma̍māa̍, a̍ ku̍ɛ̄ sīndɛ̄ I̍chi̍pī wa̍, ŋ̄wāŋ be̍le̍-ŋɔ̍mmɛ̍ū ko̍ni̍ nda̍ wa̍ ni̍. Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tōsā mi̍ lā kūī ni᷅ŋ, to̍fa̍ wɔ̍ ko̍ mɛ̄ɛ̍ lōo̍ŋ ŋ̄ chō nu̍a̍ā o̍ ha̍la̍a̍ ni᷄ŋ cho̍o̍ cho̍o̍ ŋ̄ chu̍ū chɔ᷅m te̍ yɛ̍.”