Read Southern Kisi Dītɔ̍nɔ̍mi̍ī 11 Bible Online

Dītɔ̍nɔ̍mi̍ī 11 - Southern Kisi bible

Dītɔ̍nɔ̍mi̍ī 11

¹Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “Wāŋnda̍ I̍sɔ̄lūɛ̄ī, lā kāāla̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍. Nyɛ̄ o̍ nyɛ̄ sāwāla̍ ndɔ̄la̍ŋ, ndu̍yɛ̍ a̍ pɛ̄ɛ̄kūlā ndɔ̄la̍ŋ lā dīmi̍ le̍ tōsāa̍, lā wa̍ ndu̍ tōsāa̍ le̍ te̍le̍ŋ o̍ te̍le̍ŋ.

²Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ a̍ nya̍ bōōndi̍i̍ o̍ wa̍ nya̍ sīlāa̍ ve̍, lā lōōnu̍ŋ ndu̍ pāa̍le̍ hāūle̍ŋ nde᷅ŋ. Nya̍ ya̍ I̍ cho̍ ha̍ā sūɛ̍i̍ nāa̍ nya̍ chūā wa̍, nya̍ che᷅ sɔ̄ɔ̍ŋ mu̍ŋ o̍ yɔ̄nɔ᷄ŋndo̍ ni̍, ndu̍yɛ̍ mi̍ lā sīnā mu̍ŋ, ō cho̍ chu̍a̍u̍wāā nyāa̍ le̍. Nya̍ pi̍la̍ la̍ chē mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m kpāāya̍ ndɔ̄ bɛ̍ndōo̍ yɛ̍. Lā chē kpāāya̍ ndɔ̄ɔ̍ a̍ dīāllūŋ ndɔ̄ŋ ka̍la᷄ŋ.

³Lā chē sɔ̄ɔ̍ŋ kɔ̄ndɔ̄fi̍li̍ŋ bɛ̄ndo̍ŋ a̍ sɔ̄ɔ̍ŋ ka̍a̍ma᷅ŋ o̍ to̍sa̍ a̍ māsā bɛ̍ndōo̍ I̍chi̍pī, ndu̍yɛ̍ a̍ lɛ̄ŋndē I̍chi̍pīle̍ŋ kpo̍u̍ wo̍ŋ.

⁴Lā chē nyɛ̄ o̍ to̍sa̍ a̍ pūa̍a̍ chɔ̄ūwa̍ I̍chi̍pī ndu̍yɛ̍ a̍ su̍a̍a̍ ndāa̍, o̍ ko̍ŋ kɔ̍ɔ̍lī, a̍ nyɛ̄lā ndāla̍ nya̍a̍na᷄ŋnda̍ su̍a̍a̍ ā nāŋ nda̍ŋ ndo̍. Bōōndi̍i̍ nda̍ wa̍ nya̍ kīlta̍ŋ kɔ̄ɔ̄lī le̍ nya̍ bīyɔ̄ɔ̍ ve̍, lā chē mɛ̄ɛ̍ o̍ to̍sa̍ mi̍ mɛ̄ŋnda̍ŋ o̍ Pēe̍ Mɛ̄ŋmā Īhɛ᷄l si̍a̍ŋāa̍ mā kūmbū nda̍ mu̍lɛ̄ yɛ̍. Mi̍ Mɛ̄lɛ̄ka̍ tūsī lɛ̄ŋndē I̍chi̍pīle̍ŋ nyɛ̄ pālāa̍ chōo̍ mbo̍ tōsā a̍ pāa̍le̍ hāūle̍ŋ nde᷅ŋ bɛ̍ɛ̍, lɛ̄ŋndē I̍chi̍pīle̍ŋ lē nɔ̍ kpa̍a̍yā o̍ kpāāyā le̍.

⁵O̍ ko̍ŋ kɔ̍ɔ̍lī, nyɛ̄ o̍ nyɛ̄ o̍ to̍sa̍l nya̍ chɔ̍ŋ a̍ bōōndi̍i̍ nya̍ wa̍ o̍ lɛ̄ŋndē po̍lte̍ŋ ni᷄ŋ nde̍, ha̍a̍a̍ mi̍ lā fūūlūū o̍ fo̍ndāa̍ ho̍ō, nya̍ pi̍la̍ lā chē.

⁶Nya̍ pi̍la̍ lā lōōnu̍ŋ nyɛ᷅ o̍ to̍sa̍ a̍ De̍tāŋ nda̍ A̍bi̍lūām ndo̍, nda̍ yɔ̍nūŋ ni̍ māā pūa̍a̍ Ɛ̄li̍a̍a̍bī wa̍, wānā wa̍ā o̍ yu̍ŋgu̍ Lūbɛ᷅ŋ ndo̍ chōo̍. Nya̍ I̍sɔ̄lūɛ̍i̍ya̍ kpo̍u̍ o̍ hɔ̄l, mbo̍ tōsā mi̍ lɛ̄ŋnde̍ŋ lē kūmbi᷄ŋ, pūa̍a̍ ŋi̍ɔ̍ɔ̍ŋāā kāŋ ni̍, yu̍ŋgu̍la̍ ndāla̍ŋ ni̍, a̍ tɛ̍ndīi̍la̍ ndāla̍ mālɔ̄ la̍ŋ, a̍ bu̍ɛ̍i̍yāā ndāa̍ lātūlu̍, ndu̍yɛ̍ a̍ chɔ̄lūāā ndāa̍, ma̍ tūāl o̍ lɛ̄ŋnde̍ŋ bɛ̄ŋgu̍, nda̍ kpo̍u̍, mi̍ lɛ̄ŋnde̍ŋ lē kūmbū nda̍.

⁷Sɔ̄ɔ̍ŋ kpāāyāŋ bɛ̍ndūŋ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mu᷅ŋ ndo̍ŋ kpo̍u̍, nya̍ o̍ hɔ̄l o̍ to̍sa̍ mu̍ŋ ni̍, mi̍ lā chā.”

⁸Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “Le̍la̍ŋ sāwāla̍ ya̍ I̍ ke̍ nya̍ la᷅ŋ pāa̍le̍ hāūle̍ŋ nde᷅ŋ ki̍nɛ̍i̍ la̍ŋ, nyɛ̄ o̍ nyɛ̄ la̍ di̍mi̍ le̍ tōsāa̍ lā wa̍ ndu̍ tōsāa̍ le̍ te̍le̍ŋ o̍ te̍le̍ŋ. Ko̍ŋ to̍sā ni̍ mī lā sɔ̄la̍ dīāllūŋ kāla᷄ŋ mī lā ta᷄ŋ Chɔ̍ɔ̍dāŋ nda̍ŋ, le̍ kɔ̄la̍ŋ o̍ lɛ̄ŋndē nya̍ chō kɔ̄la̍ŋ chūa̍a̍ nyɛ̄ nyā le̍ŋ bīyɔ̄ɔ̍.

⁹Ndu̍yɛ̍ ko̍ŋ to̍sā ni̍ mī lā vīōū āchāl o̍ lɛ̄ŋndē lēŋ ni᷄ŋ, lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l le᷅ŋ fi̍nyāā nyāā ma̍māa̍ būŋgɛ̄i̍ le̍ nda̍ kīo̍o̍ nda̍ chūāūwāā ndā kpo̍u̍ le̍ŋ, lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ.

¹⁰Lɛ̄ŋndē nya̍ chō le᷅ŋ kɔ̄la̍ŋ chūa̍a̍ nyɛ̄ nyā le̍ŋ, le̍ cho̍ māā lɛ̄ŋndē I̍chi̍pī le̍ŋ nāa̍ nya̍ fūla̍ wa̍ le̍. Lo̍ŋ ndu̍ ndu̍, tē nya̍ a̍a̍ to̍sa̍ kpe̍le̍la̍ŋ pɛ̍, mɛ̄ɛ̍ mī nya̍a̍ a̍a̍ yɔ̍kpa̍ yɔ̄kpāa̍ pi̍la̍ le̍ la̍ŋ pɔ̄ɔ̄līa̍a̍.

¹¹Kɛ̍ lɛ̄ŋndē nya̍ chō le᷅ŋ kɔ̄la̍ŋ bīyɔ̄ɔ̍ le̍ŋ nde̍ŋ, lɛ̄ŋnde̍ nɔ̍ pēmbo᷄ŋ a̍ dɛ̍ŋgbɛ̍la̍ kɛ̍ndɛ̄ kɛ̍ndɛ̄la̍ŋ, mī pīɔ̍ɔ̍ ō sīā le̍ni̍ŋ le̍ te̍le̍ŋ o̍ te̍le̍ŋ nde̍ŋ le̍ cho̍ ni̍.

¹²Lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ndu̍ pīla̍ o̍ cho̍ māndāa̍ le̍ŋ le̍ cho̍ ni̍. Chɔ̍ŋ a̍ wɔ̄sīo̍o̍ kāndɔ᷄ŋndo̍ ha̍a̍a̍ a̍ mɛ̄ɛ̄lu̍la̍ŋ, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ hɔ̄ltē ndɔ̄le̍ŋ lē chō lɛ̄ŋnde̍ŋ nde᷅ŋ chōo̍ mbō māndā le̍ŋ.

¹³“Ndu̍yɛ̍ sāwāla̍ ya̍ I̍ ke̍ nya̍ la᷅ŋ pāa̍le̍ hāūle̍ŋ nde᷅ŋ nda᷅ŋ, tē lā tōsa̍ nyɛ̄ la̍ di̍mi̍ wo̍ pɛ̍, ndu̍yɛ̍ mī lā kāāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, o̍ ko̍ŋ kɔ̍ɔ̍lī, mī lā sāāŋgi̍a̍l ndu̍ a̍ kɔ̄ltā nyāla̍ŋ, ndu̍yɛ̍ a̍ yīya᷄ŋnda̍ nyāla̍ŋ kpo̍u̍ pɛ̍,

¹⁴Mɛ̄lɛ̄ka̍ Ya̍a̍wɛ̄ɛ̄ o̍ wa᷅ ni̍ŋ pi̍ɔ̍ɔ̍ yɔ̄ŋndo̍ o̍ chīɔ̄ɔ̄ŋ nyāa̍ŋ ni᷄ŋ, a̍ te̍le̍ŋnda̍ nya̍ yēēmā ni̍ŋ pi̍ɔ̍ɔ̍ o̍ chīɔ̄ɔ̄ŋ nyāa̍ŋ ni᷄ŋ nda̍ŋ, pīɔ̄ɔ̄ lāwāīyīa̍a̍, a̍ pīɔ̄ɔ̄ mālūŋ ku̍a̍u̍wāa̍. Mbō tōsa̍ mī lā wa̍ nyɛ̍ dīa̍a̍ sɔ̄lāa̍ a̍ mūɛ̄īya̍ŋ, o̍ ko̍ŋ kɔ̍ɔ̍lī, a̍ chūɛ̄īmā ɔ̄li̍fīi̍ wa̍ŋ o̍ chīɔ̄ɔ̄ŋ nyāa̍ŋ ni᷄ŋ.

¹⁵Ndu̍yɛ̍ mbō tōsa̍ mī lā wa̍ bīl chɔ̄lūāā nyāa̍ ā dīā wo̍ sɔ̄lāa̍. Ō tōsā ni̍ŋ mī lā nɔ̄ nyɛ̄ dīāā nya̍ dīā wo̍ ta̍u̍ ta̍u̍, ndu̍yɛ̍ yīmā bi̍ī nya̍ le̍.

¹⁶Wāŋnda̍ I̍sɔ̄lūɛ̄ī, lā mānda̍ŋ yɔ̄ŋi̍ nya̍ hūi̍ nya̍ pi̍la̍ mī lā mūlu̍l Mɛ̄lɛ̄ka̍ Ya̍a̍wɛ̄ɛ̍ kɔ̄ɔ̍, mī lā mūli̍ŋ nyɛ᷅m chēle̍ŋndo̍ŋ sāāŋgīāllo̍ mī lā sōōlūū mu̍ŋ māā mɛ̄lɛ̄ka̍a̍ nyā.

¹⁷Tē lā tōsa̍ ke̍ŋ pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ tu̍mbe̍ dɔ̍u̍nɔ᷄ŋ a̍ nya̍ o̍ ka̍lā ka̍lā mbō kpāa̍ pīɔ̍ɔ̍, mbō tōsa̍ pīɔ̄ɔ̄ o̍ pīɔ̄ɔ̄ ō se᷅ lɛ̍ o̍ lɛ̄ŋnde̍ nyāle̍ŋ ni᷄ŋ te̍. O̍ ko̍ŋ, chīɔ̄ɔ̄ŋ nyāa̍ŋ kpo̍u̍ mī ŋ̄ vēsa̍, nyɛ̄ o̍ nyɛ̄ ni᷅ŋ ndɛ̍ o̍ chīɔ̍ɔ̍ŋ nyāa̍ŋ ni᷄ŋ te̍. Ndu̍yɛ̍ ō be̍ndū ti᷅ŋ te̍, nya̍ kpo̍u̍ mī lā chūu̍ a̍ yīa̍a̍ŋ o̍ lɛ̄ŋndē kɛ̄ndɛ̄lē Mɛ̄lɛ̄ka̍ Ya̍a̍wɛ̄ɛ̄ o̍ cho̍ le᷅ŋ nya̍ kīo̍o̍ le̍ŋ ni᷄ŋ.

¹⁸“Le̍la̍ŋ lā kɛ̄si̍ŋ di̍ōmnda̍ŋ nda᷅ŋ o̍ lākɔ̄l ndu̍yɛ̍ mī lā wa̍ yīya᷄ŋndo̍ a̍ la̍ŋ o̍kɔ̄ɔ̄ le̍ te̍le̍ŋ o̍ te̍le̍ŋ. Lā pōōnyi̍a̍a̍ la̍ŋ, ndu̍yɛ̍ mī lā yīīnu̍ŋ la̍ŋ o̍ bālā lɔ̄ɔ̄la̍ŋ, ndu̍yɛ̍ a̍ o̍ ŋ̄tēndu̍ le̍ lōōnɔ᷄ŋndo̍ a̍ la̍ŋ.

¹⁹Ndu̍yɛ̍ o̍ ko̍ŋ kɔ̍ɔ̍lī, mī lā wa̍ chūāā nyāa̍ dīōmnda̍ŋ nda᷅ŋ pɛ̄ɛ̄kōo̍ le̍ te̍le̍ŋ o̍ te̍le̍ŋ. Tē lā cha᷄l o̍ la̍ nya̍lo̍ chi̍ɛ̍īla̍ŋ ni᷄ŋ pɛ̍, lā sōo̍ a̍ la̍ŋ o̍kɔ̄ɔ̄. O̍ nɛ̄ī bɛ̍ɛ̍ nya̍ wa̍ kɔ̄la̍ŋ pɛ̍, lā wa̍ su̍ɛ̍i̍ a̍ la̍ŋ o̍kɔ̄ɔ̄. Tē lā wa̍ hīni̍la̍ŋ pɛ̍, lā sōo̍ a̍ la̍ŋ o̍kɔ̄ɔ̄. Tē lā chɛ᷄ŋ pɛ̍, lā sōo̍ a̍ la̍ŋ.

²⁰Lā pōōnyi̍a̍a̍ la̍ŋ o̍ kēe̍do᷄ŋ nyāa̍ŋ chōo̍, ndu̍yɛ̍ a̍ o̍ dīōlā sāāsāla̍ nyāla̍.

²¹Ko̍ŋ to̍sā ni̍, nya̍ ni̍, a̍ chūāūwāā nyāa̍ mī yōōmūlā nyāla̍ŋ lā bāndu̍, mī lā hīōū lāchī a̍ cha᷄lle̍ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l le᷅ŋ fi̍nyāā nyāā ma̍māa̍ būŋgɛ̄i̍, ndu̍yɛ̍ mbo̍ mēnāla᷄ŋ nda̍ le̍ nda̍ kīo̍o̍ le̍ŋ ni᷄ŋ, ha̍a̍a̍ tē ha̍la̍a̍ ō chō wɔ̄ o̍ fo̍ndā ndɔ̄ɔ̍ chōo̍ cho̍o̍ pɛ̍.

²²“Sāwāla̍ ya̍ I̍ ke̍ nya̍ la᷅ŋ ki̍nɛ̍i̍ la̍ŋ, tē lā wa̍ sa̍kpō o̍ nyɛ̄ la̍ di̍mi̍ wo̍ to̍sāa̍ ni᷄ŋ pɛ̍, mī lā kāāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ndu̍yɛ̍ mī lā wa̍ o̍ nɛ̄i̍ ndɔ̍ o̍ ye̍e̍ma̍ nya̍ mī lā wa̍ chōo̍ wo̍ chōo̍, o̍ ko̍ŋ kɔ̍ɔ̍lī, mī lā wa̍ ndu̍ o̍ hɔ̄l sa̍kpō pɛ̍,

²³kāa̍la̍ cho̍ nya̍ īchāli̍ la̍chi̍ ki̍nɛ̍i̍ la̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī lā tōū nda̍ nya̍ lāchī. Kāa̍la̍ cho̍ lā bɛ̄ndū, ndu̍yɛ̍ mi̍ lā nɔ̄ kpāāyāa̍ mi̍ lā hīāū nya̍ la̍ŋ, ō chō tōsā mī lā pōōnda̍ nda̍ lɛ̄ŋndē ndāle̍ŋ o̍ bā, mī lē sīmnu᷄ŋ lɛ̍ŋndē nyā.

²⁴Bā o̍ bā nya̍ bālu̍ o̍ lɛ̄ŋndē lēŋ ni᷄ŋ, nya̍ nɔ᷅ ni̍ŋ ni̍. Pɛ̄ŋgu̍la̍ lɛ̄ŋndē nyāle̍ŋ lā chāŋ ni̍ŋ o̍ po̍llo̍ bā tōūwo̍, mī lā kūɛ̄ o̍ pēmbūŋ Le̍ba̍nɔ̄ŋndo̍ŋ bā lūāŋndo̍. Lā chāŋ ni̍ŋ vɛ̍lɛ̄ o̍ Pēē Bɛ̍ndōo̍ Yūfi̍lu̍a̍tīī bā pāa̍le̍ŋ lē chāŋndo̍ mī lā fūūlu̍u̍ o̍ pēē bɛ̍ndu̍ mɛ̄ŋmā īhɛ᷄llo̍ Mɛ̄dītālu̍e̍e̍nīāā bā pāa̍le̍ŋ lē dēl lo̍.

²⁵Ndu̍yɛ̍ wānā o̍ wānā ō nɔ̍lā ni̍ŋ mbō sīmu̍l nya̍, mbō nɔ̄la̍ nya̍ yōmɔ̄ɔ̄ le̍. Bā o̍ bā nya̍ kūā ni̍ŋ o̍ lɛ̄ŋndē lēŋ ni᷄ŋ a̍ sɔ̍ŋgɔ̍ɔ̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō tōsā mī sīōōŋīī bɛ̄ndūe̍i̍ ī bīī wānāa̍ cho̍ lo̍ŋ nda̍ le̍ nya̍, mɛ̄ɛ̍ o̍ chu̍e̍l nya̍ būŋgɛ̄i̍ yɛ̍.

²⁶“Pāa̍le̍ hāūle̍ŋ nde᷅ŋ, I̍ si̍mi̍ nya̍ sɔ̄ɔ̍ŋ lāchīŋ mūu̍ŋ, mī lā hɛ̄li̍ ī nya̍ yēēma̍ ve̍. Mu̍ŋ yɔ̍nūŋ ni̍ māā sa̍lāa̍ a̍ sēndi̍o̍o̍.

²⁷Sāwāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lā ya̍ I̍ cho̍ nya̍ la᷅ŋ kīo̍o̍ pāa̍le̍ hāūle̍ŋ nde᷅ŋ nda̍ŋ, tē lā tōsa̍ nyɛ̄ la̍ di̍mi̍ wo̍ pɛ̍, sa̍lāa̍ ndu̍ wa᷅ ni̍ŋ le̍ nya̍ ni̍.

²⁸Kɛ̍ ndu̍yɛ̍ tē lā kɛ̄ɛ̍ nyɛ̄ sāwāla̍ŋ nda᷅ŋ lā dīmi̍ wo̍ tōsāa̍ pɛ̍, sāwāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ke̍ ya̍ le̍ nya̍ la̍ŋ, mī lā fāŋa̍ŋ o̍ nɛ̄i̍ ya̍ I̍ cho̍ nya̍ chɔ̄mndo̍ pāa̍le̍ hāūle̍ŋ nde᷅ŋ ndo̍ chōo̍, mī lā mūli̍ŋ nyɛ᷅m chēle̍ŋndo̍ŋ sōōlūūwo̍ ŋ̄ nya̍ a̍a̍ si̍nā bɛ̍ɛ̍ le̍ wo̍ŋ māā mɛ̄lɛ̄ka̍a̍ nyā pɛ̍, sēndi̍o̍o̍ ndu̍ wa᷅ nya̍ chōo̍ ni̍.

²⁹Ndu̍yɛ̍ tē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ ku̍ɛ̄ a̍ nya̍ o̍ lɛ̄ŋndē nya̍ chō kɔ̄la̍ŋ chūa̍a̍ māā nyɛ̄ nyā le̍ŋ ni᷄ŋ pɛ̍, nyɛ̄ nya̍ nɔ̄ mī lā tōsa̍ wo̍, ndu̍ cho̍ ho̍ō ni̍. Lā nɔ̄ mī lā si᷄m mā he᷄l o̍ Pēmbīī Kɛ̍lu̍i̍sīmnde̍ chōo̍, mā yōnda̍l nya̍ a̍ sa̍lālā nya̍ nɔ̄ mī lā sɔ̄la̍ la̍ŋ o̍kɔ̄ɔ̄, tē lā tōsa̍ nyɛ̄ Mɛ̄lɛ̄ka̍ ō dīmu̍l nya̍ wo̍ pɛ̍, ndu̍yɛ̍ mā yōnda̍l nya̍ vɛ̄lɛ̄ o̍ Pēmbīī Ɛ̍bāve̍ chōo̍ a̍ sēndi̍ nɔ̍ mbō wa̍ nya̍ chōo̍ wo̍ o̍kɔ̄ɔ̄, tē lā kɛ̄ɛ̍ nyɛ̄ Mɛ̄lɛ̄ka̍ ō dīmi̍ wo̍ tōsāa̍ pɛ̍, le̍ mī wānā o̍ wānā o̍ tu̍e̍ī. (

³⁰Pēmbūŋ mūu̍ŋ ndo̍ŋ mu᷅ŋ ŋ̄ chō Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍ o̍ lɛ̄ŋndē Ke̍na̍na̍i̍tīi̍ya̍ ni᷄ŋ a̍ cho̍ o̍ dɛ̍ŋgbɛ̍ Chɔ̍ɔ̍dāŋ ndo̍ ni᷄ŋ nda̍. Nɛ̄i̍ cho̍ o̍ yɔ̄mīī tɔ̍ɔ̍mɛ̍i̍ Mo̍lūɛ̄ɛ̄ i̍kɛ̍i̍ yo̍, o̍ nɛ̄ī ko̍ŋ bā pāa̍le̍ŋ lē dēl lo̍ le̍ kɔ̍la̍ŋ Ki̍lkāl, lo̍ŋ pēmbo᷄ŋ mu᷅ŋ ŋ̄ chō ni̍.)

³¹Lā chō hūnɔ̄ɔ̍ Chɔ̍ɔ̍dāŋ nda̍ŋ tāŋɔ̄ɔ̍ le̍ kɔ̄la̍ŋ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ kīo̍o̍ le̍ŋ ni᷄ŋ. Tē lā kɔ̍ chu̍ā lɛ̄ŋnde̍ŋ nde᷅ŋ pɛ̍, mī lā wa̍ ni᷄ŋ īchāli̍ lo̍ŋ,

³²sāwāla̍ŋ nda᷅ŋ ki̍nɛ̍i̍, a̍ pɛ̄ɛ̄kūla̍ŋ nda᷅ŋ, lā ya̍ I̍ cho̍ nya̍ la᷅ŋ kīo̍o̍ pāa̍le̍ hāūle̍ŋ nde᷅ŋ nda̍ŋ, la̍ tōsa̍ o̍ nɛ̄ī o̍ nɛ̄ī ni̍ŋ mī lā tōsa̍ nyɛ̄ o̍ nyɛ̄ la̍ di̍mi̍.”