Read Southern Kisi Dītɔ̍nɔ̍mi̍ī 13 Bible Online

Dītɔ̍nɔ̍mi̍ī 13 - Southern Kisi bible

Dītɔ̍nɔ̍mi̍ī 13

¹“Mī ī yɔ̄nu̍ŋ dɔ̍ɔ̍ mī wāna̍ su̍a̍ā le̍ Mɛ̄lɛ̄ka̍ wo̍ ō pūm, ɔ̄ɔ̄ mī wāna̍ su̍a̍ā le̍ Mɛ̄lɛ̄ka̍ wo̍ ō Mɛ̄lɛ̄ka̍ kē yo̍o̍ŋgūla̍ŋ o̍ lɔ̄mā sɔ̄la᷄ŋ ni᷄ŋ ndo̍ ō pūm ō fūla̍ nya̍ tɛ̄ɛ̄ŋ mbō di̍mūl nya̍ māā sūɛ̍i̍ kɔ̄ndɔ̄fi̍lle̍, ɔ̄ɔ̄ sūɛ̍i̍ ka̍a̍mɛ̍i̍ pūm ī chō yɔ̄nɔ᷄ŋ.

²Ndu̍yɛ̍ mī nyɛ̄ o̍ di̍mi̍ ko̍ŋ ndo̍ ō yɔ̄nu̍ŋ. Ā yɔ᷄ŋ bɛ̍ɛ̍ mī nyɛ̄ wānā ko̍ŋ ō dīmi̍ ko̍ŋ ndo̍ ō yɔ̄nu̍ŋ a̍ tōnya̍, kɛ̍ tē ō dīmu̍l nya̍ pɛ̍ māā nya̍ mūli̍ŋ mɛ̍lɛ̄ka̍ chēle̍ŋnda̍ sōōlūūwo̍, ndu̍yɛ̍ mī lā sāāŋgi̍a̍l nda̍, mɛ̄lɛ̄ka̍a̍ nya̍ a̍a̍ si̍nā bɛ̍ɛ̍ pa̍a̍ndū le̍ wa̍,

³lā ya᷅ŋ ndu̍ lānī le̍. Kāni̍ fo̍ndōle̍, tōfāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō wā nya̍ ni̍ sa̍na̍a̍ a̍ wānā ko̍ŋ le̍ mbō sīna̍ tē lā kāāla̍ ndu̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lēkɛ̍ndɛ̍ī a̍ kɔ̄ltā nyāla̍ŋ ndu̍yɛ̍ a̍ yīya᷄ŋnda̍ nyāla̍ŋ kpo̍u̍ pɛ̍.

⁴Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ nɛ̄i̍ ndɔ̄ɔ̍ nya̍ to᷄l kɔ̄ɔ̄lī ni̍, ndu̍yɛ̍ mī lā ke̍ ndu̍ bɛ̄ɛ̄le̍ŋ. Lā chūa̍ sa̍wāla̍ ndɔ̄la̍ŋ ndu̍yɛ̍ mī lā tūēī ndu̍ dīōm. Lā sāāŋgi̍a̍l ndu̍, ndu̍yɛ̍ mī lā wa̍ sa̍kpō ndu̍ o̍ hɔ̄l.

⁵Kɛ̍ ndu̍yɛ̍ wāna̍ su̍a̍ā ko̍ŋ le̍ Mɛ̄lɛ̄ka̍ wo̍, ɔ̄ɔ̄ wāna̍ su̍a̍ā le̍ Mɛ̄lɛ̄ka̍ wo̍ o̍ sɔ̍lā yo̍o̍ŋgūla̍ŋ o̍ lɔ̄mā sɔ̄la᷄ŋ ni᷄ŋ ndo̍, mbo̍ kīndī le̍ nya̍ fāŋāa̍ o̍ nɛ̄i̍ Mɛ̄lɛ̄ka̍a̍ chōo̍ wo̍, lā nɔ̄ mī lā dīī ndu̍. Kāni̍ fo̍ndōle̍, le̍ mɛ̄ɛ̍ o̍ ki̍ndi̍ le̍ mī lā sīmu̍l Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ yɛ̍, o̍ ba̍ŋa̍ nya̍ mbo̍ sōli̍ nya̍ o̍ chɛ̄le̍ŋ ni᷄ŋ I̍chi̍pī o̍ sāŋgā bɛ̄ndū nya̍ wa̍ ni᷄ŋ ndo̍ wo̍. Le̍ kīndī ō kīndi̍ ko̍ŋ le̍ nya̍ fāŋāa̍ o̍ nɛ̄i̍ Mɛ̄lɛ̄ka̍ nyāa̍ chōo̍ wo̍, lā nɔ̄ mī lā dīī ndu̍ mī lā tōsa̍ mī yɔ̄ŋ wɔ̄ɔ̍ŋndo̍ ō fūla̍ nya̍ tɛ̄ɛ̄ŋ.

⁶“Ā yɔ᷄ŋ bɛ̍ɛ̍ āā wānāyɛ̍ī nūmnde̍, ɔ̄ɔ̄ po̍ nu̍m vīālāa̍ kɛ̄lɛ̄ŋgāā chāa̍ŋ nūm wa̍nā la̍nɔ̍ɔ̍, ɔ̄ɔ̄ la̍a̍ nu̍m ŋ̄ kāāla̍ wo̍, kɛ̄lɛ̄ŋgāā cha᷄ŋ nu̍m nya̍ nāāŋa᷅ŋ ndo̍, tē ō kōma̍l nu̍m pɛ̍ sɔ̍ɔ̍ sɔ̍ɔ̍ mbō dɛ̄ɛ̄ni̍a̍a̍ nu̍m le̍ mī lā mūli̍ŋ mɛ̍lɛ̄ka̍ā chēle̍ŋnda̍ sōōlūūwo̍, mɛ̄lɛ̄ka̍a̍ nya̍ si̍nā bɛ̍ɛ̍ pa̍a̍ndū le̍ wa̍, chɛ᷅la᷅ŋ a̍ ndu̍ le̍. Mɛ̄lɛ̄ka̍a̍ ha̍ā mɛ̄lɛ̄ka̍a̍ chēle̍ŋnda̍ nda̍ chō ni̍, ā nya̍ si̍nā bɛ̍ɛ̍ pa̍a̍ndū le̍ wa̍. Fi̍nyāā nyāā ma̍māa̍ bɛ̍ɛ̍ nda̍ a̍a̍ si̍nā a̍ mɛ̄lɛ̄ka̍ā ha̍ā o̍kɔ̄ɔ̄ le̍. Wānāa̍ cho̍ nya̍ ā bālāā wa̍, a̍ cho̍ nya̍ māchɛ̄lū ɔ̄ɔ̄ la̍nda̍ŋ la̍nda̍ŋ nda̍, a̍ cho̍ o̍ chi̍e̍ēŋndo̍, chɔ̍ŋ kpe̍ŋgēi̍ ī pīlɛ̍i̍ mbo̍ kūā a̍ kpēŋgēi̍ ī pīlɛ̍i̍ ya̍, mɛ̄lɛ̄ka̍a̍ ndāa̍ cho̍ ha̍ā ni̍. Wānāā ya̍ I̍ ve̍e̍lu̍ ha̍ā dīōla̍ŋ nda̍ ki̍nɛ̍i̍, ō pīlɛ̍ bɛ̍ɛ̍ tē ō dīmu̍l nu̍m le̍ mɛ̄lɛ̄ka̍a̍ ha̍ā sōōlūūwo̍ pɛ̍, ya᷅ŋ ndu̍ lānī bɛ̍ɛ̍ le̍. Ndu̍yɛ̍ nyīɛ̍ɛ̍yīī bi̍ī nu̍m le̍ ndu̍ mā vēŋ ndu̍ mā ki̍ndi̍ le̍ ndu̍ c(...)

⁹Lā nɔ̄ mī lā lo̍ wānā ko̍ŋ vīīyo̍ a̍ pōūta̍ŋ mī lā dīī ndu̍. Ndu̍yɛ̍ nūm wānā ko̍ŋ o̍ dɛ̄ɛ̄nīāā ko̍ŋ ndo̍, nu᷄m wa᷅ wa᷅na̍ tāso̍o̍ le̍ pōūwo̍ chūa̍a̍ mā vɛ̄ wānā ko̍ŋ ni̍. O̍ ko̍ŋ kɔ̍ɔ̍lī, mī wāŋnda̍ ā pīli̍a̍a̍ kpo̍u̍ a̍ to᷅l nu̍m ni᷅ŋ kɔ̄ɔ̄lī, mī lā vīi̍ ndu̍ a̍ pōūta̍ŋ. Kāni̍ fo̍ndōle̍, le̍ mɛ̄ɛ̍ o̍ ki̍ndi̍ le̍ nu̍m fāŋāa̍ o̍ nɛ̄i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dīmu̍l nya̍ le̍ wāa̍ lēchōo̍ wo̍ chōo̍ yɛ̍, Mɛ̄lɛ̄ka̍ ba̍ŋa̍ nya̍ mbo̍ sōlī nya̍ o̍ chɛ̄le̍ŋ ni᷄ŋ I̍chi̍pī, o̍ sāŋgā bɛ̄ndōo̍ ni᷄ŋ ndo̍.

¹¹Tē lā vīi̍ wānā ko̍ŋ a̍ pōūta̍ŋ le̍nde̍ pɛ̍ mbō vī, I̍sɔ̄lūɛ̍i̍ya̍a̍ tu̍a̍a̍ kpo̍u̍ ā chō tūēīyɔ̄ɔ̄ nyɛ̍ yɔ̍nu̍ŋ ndo̍ mī sīōōŋnde̍ bīī nda̍. O̍ ko̍ŋ, wānā o̍ wānā de᷅l lɛ̍ kɔ̄l le̍ ī wāā le̍nde̍ to̍sā le̍.

¹²“O̍ ko̍ŋ kɔ̍ɔ̍lī, chi̍e̍e̍ŋ Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ kē le̍ wāa̍ lēni᷄ŋ ndo̍ŋ tē lā tūēī a̍ chi̍e̍e̍ o̍ chi̍e̍e̍ o̍kɔ̄ɔ̄ pɛ̍,

¹³māā wānāā fo̍ndūāā pūm o̍ chi̍e̍e̍ ko̍ŋ ni᷄ŋ ā fāŋa̍ wānāa̍ cho̍ o̍ chi̍e̍e̍ ko̍ŋ nda̍ o̍ nɛ̄i̍ Mɛ̄lɛ̄ka̍a̍ chōo̍, ma̍ to̍sā mi̍ wāŋnda̍ o̍ chi̍e̍e̍ ko̍ŋ ni᷄ŋ a̍ mu̍li᷄ŋ mɛ̍lɛ̄ka̍a̍ chēle̍ŋnda̍ sōōlūūwo̍, mɛ̄lɛ̄ka̍a̍ nya̍ si̍nā bɛ̍ɛ̍ pa̍a̍ndū le̍ wa̍ pɛ̍,

¹⁴lā nyūūni̍a̍a̍ a̍ ndi̍ o̍kɔ̄ɔ̄ fɛ̍sɛ̄ fɛ̍sɛ̄ mī lā sīna̍ nyɛ̍ yɔ̍nu̍ŋ ndo̍. Tē ī bīī tōnya̍ pɛ̍, māā sūɛ̍i̍ wɔ̍ɔ̍ŋīī wāā le̍nde̍ i̍ yɔ̍nu̍ŋ nya̍ tɛ̄ɛ̄ŋ,

¹⁵wāna̍ o̍ wāna̍ cho̍ o̍ chi̍e̍e̍ ko̍ŋ ni᷄ŋ lātūlu̍ a̍ chɔ̄lūāā ndāa̍, lā dīu̍ nda̍ kpo̍u̍. O̍ ko̍ŋ kɔ̍ɔ̍lī, chi̍e̍e̍ ko̍ŋ mī lā tɛ̄ɛ̄mbu̍u̍ ndu̍ kpo̍u̍.

¹⁶Nyɛ̄ o̍ nyɛ̄ wāŋnda̍ nɔ̄ o̍ chi̍e̍e̍ ko̍ŋ ni᷄ŋ lā sōli̍ mu̍ŋ kpo̍u̍ mī lā dīī mu̍ŋ o̍ lu᷅ŋ si̍li̍ŋ. O̍ ko̍ŋ kɔ̍ɔ̍lī, nyɛ̄m mu᷅ŋ ni̍, a̍ chi̍e̍e̍ ka̍lāa̍ lātūlu̍, mī lā ma᷄l mu̍ŋ o̍ yīŋ mī ŋ̄ ŋūɛ̄ māā sa̍lā lūāmāā o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍. Chi̍e̍e̍ ko̍ŋ ō nɔ̄ mbō lo᷄ pɔ̄m le̍ fɛ̍ɛ̍ŋ a̍ fɛ̍ɛ̍ŋ. Lā nɔ̍ mī lā mīŋgi̍ ndu̍ tāŋgūl te̍.

¹⁷Nyɛ̄ o̍ nyɛ̍ cho̍ o̍ chi̍e̍e̍ ko̍ŋ ni᷄ŋ mi̍ lā nɔ̄ le̍ mu̍ŋ tɛ̄ɛ̄mbūūwo̍, lā chu̍ā ō pīlɛ̍ bɛ̍ɛ̍ mī lā kɛ̄si̍ ndu̍ le̍ nya̍ pi̍la̍ le̍. Ko̍ŋ to̍sā ni̍, tu̍mbe̍ bɛ̍ndu̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ a̍ nya̍ wo̍ mbō pɔ̄lu̍l kɔ̄l, ndu̍yɛ̍ mbō tūīīnu̍ŋ nya̍ īnyīɛ̍ɛ̍. Ō chō nya̍ īnyīɛ̍ɛ̍ tūīīnɔ᷄ŋ ndu̍yɛ̍ mbō tōsa̍ mī lā kūi̍ kūīyo̍ pi̍la̍ mɛ̄ɛ̍ o̍ chu̍e̍l fi̍nyāā nyāā ma̍māa̍ būŋgɛ̄i̍ mbo̍ mēnāla᷄ŋ nda̍ yɛ̍.

¹⁸Tē lā tūēī Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm pɛ̍, mī lā tūsi̍ŋ o̍ sāwāla̍ ya̍ I̍ ke̍ nya̍ la᷅ŋ pāa̍le̍ hāūle̍ŋ nde᷅ŋ nda̍ŋ bɛ̄ŋgu̍ pɛ̍, ndu̍yɛ̍ vɛ̍lɛ̄, mī lā tōsa̍ o̍ cho̍ ndu̍ o̍ hɔ̄l sa̍kpō le̍ tōsa̍ wo̍, ō chō nya̍ īnyīɛ̍ɛ̍ tūīīnɔ᷄ŋ.”