Read Southern Kisi Dītɔ̍nɔ̍mi̍ī 15 Bible Online

Dītɔ̍nɔ̍mi̍ī 15 - Southern Kisi bible

Dītɔ̍nɔ̍mi̍ī 15

¹Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “O̍ wɔ̄sīī ŋɔ᷄mmɛ̍ū o̍ wɔ̄sīī ŋɔ᷄mmɛ̍ū mɛ̄ɛ̄lu̍la̍ŋ, wānā o̍ wānā ā nɔ̄ mā ma̍l chāa̍ŋ nūm I̍sɔ̄lūɛ̍i̍nɔ̍ɔ̍ le̍ kūe̍e̍ o̍ bi̍ī nu̍m o̍ bā wo̍.

²Ndu̍yɛ̍ mɛ̄ɛ̍ i̍ nɔ̍ mī ī yɔ̄nu̍ŋ yɛ̍ cho̍ ho̍ō ni̍. Tē chāa̍ŋ nūm I̍sɔ̄lūɛ̍i̍nɔ̍ɔ̍ ɔ̄ɔ̄ wānāyɛ̍ī nūmnde̍ bīī nu̍m kūo̍o̍ o̍ bā pɛ̍, ā nɔ̄ mā ma̍l ndu̍ le̍ kūēē ko̍ŋ, a̍ nyu̍nā lɛ̍ ndu̍ le̍. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ pi̍la̍ ndu̍ dɔ̍ū sāwāa̍ ho̍ō ni̍.

³Tē ō wa̍ pɛ̍ māā wāna̍ lēkāa̍ o̍ bi̍ī nu̍m kūo̍o̍ o̍ bā ni̍, ndu̍ ndu̍ ā nɔ̄ mā nyu̍na̍ ndu̍ mbō pāāwa̍ kūēē nu̍mndo̍. Kɛ̍ tē ō wa̍ pɛ̍, māā chāa̍ŋ nūm I̍sɔ̄lūɛ̍i̍nɔ̍ɔ̍ o̍ bi̍ī nu̍m kūēē ko̍ŋ o̍ bā ni̍, ā nɔ̄ mā ma̍l ndu̍ le̍ kūēē ko̍ŋ o̍ wɔ̄sīī ŋɔ᷄mmɛ̍ūve̍ mɛ̄ɛ̄lu̍la̍ŋ. A̍ nɔ̍ mā nyu̍na̍ lɛ̄ ndu̍ le̍ kūēē ko̍ŋ te̍.

⁴“Tē ō wa̍ pɛ̍ mī lā tūēī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm, sāwāla̍ ndɔ̄la̍ ya̍ I̍ cho̍ nya̍ la᷅ŋ kīo̍o̍ pāa̍le̍ hāūle̍ŋ nde᷅ŋ nda̍ŋ, mī lā wa̍ sa̍kpō o̍ nyɛ̄ o̍ nyɛ̄ la̍ di̍mi̍ tōsāa̍ ni᷄ŋ pɛ̍, wānā o̍ wānā ve᷅ ni̍ŋ I̍sɔ̄lūɛ̄ī mbō wa̍ o̍ tāmbe̍i̍ ni᷄ŋ te̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ chō nya̍ lɛ̄ŋnde̍ŋ nde᷅ŋ kīo̍o̍, ndu̍yɛ̍ mbo̍ chūēl nya̍ būŋgɛ̄i̍ le̍ mbō tōsa̍ mī nyɛ̄ o̍ nyɛ̄ wa̍ ō kɛ̄ndɛ̄ a̍ nya̍ o̍ nyɛ̄ o̍ nyɛ̄ ni᷄ŋ nya̍ tōsa̍ o̍ lɛ̄ŋnde̍ŋ nde᷅ŋ ni᷄ŋ. Mɛ̄lɛ̄ka̍ chō būŋgɛ̄ī ndūɛ̍i̍ o̍ chu̍a̍ he̍ī ve̍ pēēlū. Lā wūū ni̍ŋ wa᷅ŋnda̍ o̍ lɛ̄ŋīī chēle̍ŋnde̍ ni᷄ŋ ku̍e̍ēla̍ŋ, kɛ̍ nya̍ bi̍ī ni̍ŋ wa̍nā o̍ wānā ku̍e̍ē o̍ bā le̍. Lā nɔ̄ ni̍ŋ kpa̍a̍yāa̍ lɛ̄ŋīī chēle̍ŋ chōo̍, kɛ̍ nya̍ ve᷅ ni̍ŋ le̍lɛ᷅ŋ o̍ lēlɛ̄ŋ o̍ bā bɛ̄ŋgu̍ le̍.

⁵

⁶

⁷“Kɛ̍ ndu̍yɛ̍ tē ō wa̍ pɛ̍, mī wānāā tāmbɛ̍i̍ya̍ ā wa̍ nya̍ tɛ̄ɛ̄ŋ o̍ chi̍e̍e̍ŋ nyāa̍ŋ ō pīlɛ̍ ni᷄ŋ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō le᷅ŋ nya̍ kīo̍o̍ le̍ŋ ni᷄ŋ pɛ̍, lā to̍sā ka̍ka̍a̍ a̍ nda̍, mī lā to̍sa̍l nda̍ sɔ̄ŋgbɔ̍ɔ̍ŋndo̍ le̍.

⁸Lā tōsa̍l nda̍ kɛ̄ndɛ̄i̍, ndu̍yɛ̍ nyɛ̄ o̍ nyɛ̄ nda̍ hāu̍ bā mā nyūna̍ nya̍ le̍ nda̍ kūo̍o̍ wūūwo̍ pɛ̍, lā ke̍ nda̍.

⁹Tē ā nyūna̍ nya̍ le̍ kūēēla̍ŋ pɛ̍, lā mānda̍ŋ, yɔ̄ŋi̍ yīya᷄ŋ wɔ̍ɔ̍ŋndo̍ ō de᷄l nya̍ o̍ kɔ̄l a̍ nda̍ mī lā dīmi̍ āā, ‘Wɔ̄sīī ŋɔ᷄mmɛ̍ū na̍a̍ ŋ̄ māl wa᷅ŋnda̍ le̍ kūēēla̍ŋ nde̍ ī chō ni᷅ŋ fūūlūūwo̍. Tē ŋ̄ ke̍ nda̍ kūēēla̍ŋ pɛ̍, ŋ̄ sɔ̍lā lɛ̍ ni̍ŋ nyɛ̍ nāā sɔ̍lāa̍ le̍.’ Lā yi̍ya᷄ŋ dɛ̍nɛ̍ wɔ̍ɔ̍ŋ wāā le̍nde̍ a̍ chāāŋāā nyāā I̍sɔ̄lūɛ̍i̍ya̍, mī lā tōsa̍l nda̍ sɔ̄ŋgbɔ̍ɔ̍ŋndo̍, mī lā tūŋ nda̍ kūēēla̍ŋ te̍. Tē lā tōsa̍ le̍nde̍ pɛ̍, ā chō ŋɔ̄ɔ̄cha᷄ŋ a̍ nya̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, ndu̍yɛ̍ mī Mɛ̄lɛ̄ka̍ Ya̍a̍wɛ̄ɛ̄ o̍ ki̍lu̍l nya̍ yāmɛ̍i̍ māā lā tōsa̍ yɔ̄ŋ wɔ̄ɔ̍ŋndo̍.

¹⁰Lā ke̍ nda̍ a̍ kɔ̄ltā nyāla̍ŋ kpo̍u̍. Lā ke᷅ nda̍ a̍ ŋɔ̄ɔ̄cha᷄ŋ te̍. Ko̍ŋ to̍sā ni̍, mī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dɔ̄ū nya̍ sa̍lā o̍ wa̍li̍ o̍ wa̍li̍ ni̍ŋ nya̍ tōsa̍.

¹¹Kāni̍ fo̍ndōle̍, le̍ te̍le̍ŋ o̍ te̍le̍ŋ wānāā tāmbɛ̍i̍ya̍ nda̍ ā nɔ̄ mā wa̍ nya̍ tɛ̄ɛ̄ŋ o̍ lɛ̄ŋnde̍ŋ nde᷅ŋ ni᷄ŋ. Le̍la̍ŋ I̍ cho̍ nya̍ dīmūllo̍ ō kālā kāla̍ mī lā māla̍ chāāŋāā nyāā I̍sɔ̄lūɛ̍i̍ya̍ ha̍ā, a̍ wa᷅ ni̍ŋ nya̍ tɛ̄ɛ̄ŋ ā tāmbɛ̍i̍ya̍ ni̍, a̍ ā bālā hāvɛ̍i̍ya̍a̍ wa᷅ ni̍ŋ nya̍ tɛ̄ɛ̄ŋ nda̍.”

¹²Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “Tē ō wa̍ pɛ̍, mi̍ chāa̍ŋ nūm I̍sɔ̄lūɛ̍i̍nɔ̍ɔ̍ ō kɔ̍ yɔ̍ŋgu᷄ŋ ndu̍ pi̍la̍ o̍ chɛ̄le̍ŋ ni᷄ŋ nu̍m o̍ bā, chɛ̄ kōŋ ō wa̍ wa᷅na̍ pɔ̍nɔ̍, ō wa̍ wa̍nā la̍nɔ̍, ō nɔ̄ mbō tōsa̍l nu̍m wa̍llo̍ le̍ wɔ̄sīla̍ŋ lā ŋɔ᷄mpu᷅m, o̍ ŋɔ᷄mmɛ̍ū wo̍, ā nɔ̄ mā ma̍l ndu̍ mbō kūɛ̄nu᷄ŋ a̍ nyu̍nā ndu̍ le̍ nyɛ̄ o̍ nyɛ̄ le̍.

¹³Ndu̍yɛ̍ tē a̍ wa̍ ndu̍ mālɔ̄ɔ̍ pɛ̍, a̍ nɔ̍ mā ma̍l ndu̍ bālā fo̍ndō le̍.

¹⁴Ke̍ ndu̍ sāa̍ ā ti᷄ŋ, a̍ chūīŋnda̍ ā ti᷄ŋ, a̍ nyɛ̄ dīa̍a̍, o̍ ko̍ŋ kɔ̍ɔ̍lī, a̍ mūɛ̄īya̍ŋ ndu̍ bɛ̍ɛ̍ mbō ku̍ɛ̄ a̍ mu̍ŋ. Ke̍ ndu̍ mɛ̄ɛ̍ kpɛ̍ Mɛ̄lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ nūmndo̍ ō dɔ̄ū nu̍m sa̍lā yɛ̍.

¹⁵Lā lōōnu̍ŋ māā nya̍ bɛ̍ɛ̍ le̍nde̍ ko̍ni̍ nya̍ wa̍ o̍ chɛ̄le̍ŋ ni᷄ŋ si̍ndɛ̄ I̍chi̍pī ni̍, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō bāŋā nya̍ o̍ chɛ̄lēlēŋ ni᷄ŋ. Le̍ sa̍bū kōŋ ya̍ I̍ cho̍ nya̍ sāwāla̍ŋ nda᷅ŋ dōūwo̍ ō kālā ka̍lā pāa̍le̍ŋ hāūle̍ŋ nde᷅ŋ ni̍.

¹⁶“Kɛ̍ mī ī yɔ̄nu̍ŋ dɔ̍ɔ̍ mī chɛ̄ kōŋ ō kāāla̍ sūɛ̍i̍ nu̍mnde̍ nya̍ yu̍ŋgu̍ nu̍mndo̍, mbō hīni̍ kɔ̄l le̍ mī lā wa̍ lātūlu̍ nya̍ nda̍, mbō yēēma̍ lɛ̍ mbō kūɛ̄ o̍ ndu̍ lo̍ le̍. Tē ī yɔ̄nu̍ŋ le̍nde̍ pɛ̍, nu᷄m nɔ̍ chɛ̄ kōŋ ndo̍,

¹⁷kɔ̍ a̍ ndu̍ mā kɔ̍ si̍mī ndu̍ o̍ dīō chīɛ̍i̍ nūmndo̍ īkɛ̄i̍, mā chu̍a̍ chīli̍ŋi̍i̍ sɛ̍ɛ̍mbīɛ̍i̍ mā bu̍li̍ ndu̍ nīle̍ŋ lē pīlɛ̍ le̍ chɔ̄mndo̍ māā le̍ nūm chɛ̄ kōŋ ō chō ni᷅ŋ le̍ fɛ̍ɛ̍ŋ a̍ fɛ̍ɛ̍ŋ ni̍, ō wa̍ chɛ᷅ wānā pɔ̍nɔ̍, ō wa̍ chɛ᷅ wānā la̍nɔ̍.

¹⁸Wānā o̍ wānā chu̍ā ndi̍ sūɛ̍i̍ ka̍lā ka̍lā le̍ chɛ᷄ cho̍ nu̍m o̍ bā wo̍ mālɔ̄ɔ̍ le̍. Tē ō wa̍ sūɛ̍i̍ pa̍a̍wāā pɛ̍, chɛ̄ kōŋ ō tōsa̍l nu̍m wa̍llo̍ le̍ wɔ̄sīla̍ŋ lā ŋɔ᷄mpu᷅m kpu̍lu̍ku̍u̍. Tē ndu̍ o̍o̍ wa̍ pɛ̍ māā wāŋndo̍ nūm o̍o̍ chu̍a̍ le̍ nu̍m wa̍llo̍ tōsāllo̍ ni̍, wa̍li̍ chɛ̄ kōŋ ō tōsa̍l nu̍m ndo̍, ndu̍ o̍o̍ chu̍ā pa̍a̍wā wānā ko̍ŋ lē dīi̍ŋ. Lēla̍ŋ ā nɔ̄ mā ma̍l chɛ̄ kōŋ mbō kūɛ̄nu᷄ŋ. Tē a̍ to̍sa̍ ke̍ŋ pɛ̍, nyɛ̄ o̍ nyɛ̄ ŋ̄ tōsa̍, sa̍lāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍ ō dūāū nu̍m lēni᷄ŋ ni̍.”

¹⁹Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “Chɔ̄lūāā pīāāndūāā tāsi̍a̍a̍ nāūvāā nyāa̍, a̍ chūīŋāā nyāa̍, a̍ sāa̍ nyāa̍ ā kūām nda̍ ki̍nɛ̍i̍, lā nɔ̄ mī lā yɔ̄ŋgu̍ nda̍ mā wa̍ le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍. Nāūvāā pīāāndūāā tāsi̍a̍a̍ nāūvāā nyāa̍ ā kūām ka̍ŋ nda̍ ā wa̍ā chīɔ̄ɔ̄ŋ nyāa̍ŋ te̍. Sāa̍ nyāa̍ bɛ̍ɛ̍, ā pīāāndūāā tāsi̍a̍a̍ ka̍ŋ lā ki̍lī nda̍ yīīŋnde̍ le̍.

²⁰Īwɔ̄sī o̍ wɔ̄sī, nya̍ ni̍ a̍ yūŋgu̍la̍ nyāla̍ŋ, lā nɔ̄ mī lā kɔ̍ di̍ō chɔ̄lūāā kāŋ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ hɔ̄l, o̍ fo̍ndāŋ o̍ cho̍ hɛ̄lī le̍ ndu̍ sōōlūūwo̍ lo̍ŋ ndo̍.

²¹Kɛ̍ tē ō wa̍ pɛ̍ mī chɔ̄lūāā ya̍ I̍ cho̍ ha̍ā dīmīo̍o̍ wa̍, ō pīlɛ̍ wa̍ nāmtāa̍, ɔ̄ɔ̄ mbō wa̍ ō sūmɛ̍i̍, kɛ̄lɛ̄ŋgāā mbō nɔ̄ sɔ̄ŋ o̍ sɔ̄ŋ chēle̍ŋ o̍ wānā cha᷅ kpe̍nde̍ke̍le̍ pɛ̍, lā nɔ̍ mī lā dīī ndu̍, mī lā sōli̍ ndu̍ sa̍lāa̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍ le̍.

²²Chɔ̄lūāā wāā le̍nde̍, lā nɔ̄ di̍ mī lā dīī nda̍ mī lā dē o̍ chi̍e̍e̍ŋ nyāa̍ŋ. Ndu̍yɛ̍ wānā wa̍ o̍ di̍a̍ndāā Mɛ̄lɛ̄ka̍ o̍ hɔ̄l, wa᷅ ō dīāndāā le̍, wānā o̍ wānā nɔ̍ di̍ mbō dē. Mɛ̄ɛ̍ nya̍ dīā nu̍a̍ā vīsīŋ kīa̍llo̍ŋ ndu̍yɛ̍ a̍ vīsīāā yɔ̄ŋāā chēle̍ŋnda̍ yɛ̍, le̍nde̍ ko̍ni̍ nya̍ chūa̍ vīsīŋ chɔ̄lūāā wāā le̍nde̍ ni̍.

²³Nyɛ̄ nya̍ di̍ā le̍ wo̍ tu̍ŋ cho̍ ni̍, lā di̍ā kōo̍ma̍ nda᷄ŋ te̍. Lā nɔ̄ mī lā chūīŋi̍ ma̍ lɛ̄ŋ, mɛ̄ɛ̍ nya̍ chūīŋī nu̍a̍ā mɛ̄ŋnda̍ŋ yɛ̍.”