Read Southern Kisi Dītɔ̍nɔ̍mi̍ī 18 Bible Online

Dītɔ̍nɔ̍mi̍ī 18 - Southern Kisi bible

Dītɔ̍nɔ̍mi̍ī 18

¹Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “Wānāā sōlīāā lāsa̍lāa̍, a̍ fu̍la̍ o̍ yu̍ŋgu̍ Li̍va̍īyo̍ chōo̍ wa̍ nda̍ nda̍ nɔ̍ mā sɔ̄la̍ lēlɛ̄ŋ o̍ lēlɛ̄ŋ I̍sɔ̄lūɛ̄ī le̍. Nyɛ̄m wāŋnda̍ ā hūŋ le̍ sa̍lālā lūāmāā la̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ wo̍ŋ ŋ̄ ti᷄ŋ, ndu̍yɛ̍ a̍ nyɛ̄m wāŋnda̍ ā nɔ̄ le̍ hūnɔ̄ɔ̍ o̍ Mɛ̄lɛ̄ka̍ lo̍ māā lākē wo̍ŋ, wānāā sōlīāā lāsa̍lāa̍ ha̍ā nda̍ nɔ̍ mu̍ŋ ni̍.

²Kɛ̍ nda̍ nda̍ nɔ̍ mā nɔ̄ nyɛ̄m kɛ᷅ o̍ nyɛ̄m kɛ᷅ māā yu̍ŋgu̍la̍ I̍sɔ̄lūɛ̍i̍la̍ŋ lā pīlɛ̍la̍ŋ te̍. Nda̍ nda̍ nyɛ̄m nda̍ tīīnda̍ŋ māā nyɛ̄m nda̍ ŋ̄kɛ᷅ wo̍ŋ, ndu̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, mɛ̄ɛ̍ ndu̍ Mɛ̍lɛ̄ka̍ pīla̍ o̍ chu̍e̍l nda̍ būŋgɛ̄i̍ yɛ̍.”

³“Tē lā dīī pɛ̍ na̍ūwo̍, kɛ̄lɛ̄ŋgāā sāa̍ le̍ sa̍lāa̍ sōlīo̍o̍ o̍ Mɛ̄lɛ̄ka̍ lo̍, lā nɔ̄ mī lā sōli̍ chōŋgo̍o̍ a̍ ya̍a̍lo̍lā tīɔ̍ɔ̍ŋndā chɔ̄lū kōŋ, ndu̍yɛ̍ a̍ nyɛ̄ o̍ nyɛ̍ cho̍ ndu̍ ni᷄ŋ, mī lā ke̍ wānāā sōlīāā lāsa̍lāa̍. Nda̍ nɔ̍ mu̍ŋ ni̍.

⁴O̍ ko̍ŋ kɔ̍ɔ̍lī, tē lā tōsa̍ chīɔ̍ɔ̍ŋ nyāa̍ŋ pɛ̍, ō tāse̍ nya̍ chō kōūwɔ̄ɔ̄ wo̍ ki̍nɛ̍i̍, a̍ mūɛ̄īmā nya̍ chō kēlēŋā bīyɔ̄ɔ̄ tē lā wa᷄ mūɛ̄īmā nyāa̍ŋ yāūwo̍ pɛ̍ wa̍ŋ, a̍ chūɛ̄īmā ɔ̄li̍fīi̍mā nyāa̍ŋ mā tāsi̍a̍ŋ, a̍ yīīŋīī tāsi̍i̍ nya̍ kīlī sa̍a̍ nyāa̍ le̍ nyɛ̄la̍ŋ tōōsīa̍a̍ a̍ ndi̍ ve̍, mu̍ŋ ki̍nɛ̍i̍, lā nɔ̄ mī lā ke̍ vɛ̄lɛ̄ wānāā sōlīāā lāsa̍lāa̍.

⁵Lā nɔ̄ mī lā ke̍ wānāā sōlīāā lāsa̍lāa̍ ha̍ā nyɔ̄ɔ̍ŋ mu᷅ŋ ki̍nɛ̍i̍, fo̍ndōle̍, yu̍ŋgu̍la̍ŋ I̍sɔ̄lūɛ̄ī tɛ̍ɛ̄ŋ ki̍nɛ̍i̍, nda̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ a̍ pūlālē ndā kɛ᷅ ni̍ le̍ mā wa̍ ndu̍ sāāŋgīāllo̍ mā sōli̍ sa̍lāla̍ŋ o̍ ndu̍ lo̍ o̍ fo̍ndā ndɔ̄ so̍o̍lāa̍ le̍ fɛ̍ɛ̍ŋ a̍ fɛ̍ɛ̍ŋ.”

⁶“Ndu̍yɛ̍ wānāā sōlīāā lāsa̍lāa̍ ha̍ā, tē ō pīlɛ̍ ō yēēma̍ pɛ̍ le̍ mbō fāŋa̍ŋ o̍ chi̍e̍e̍ o̍ cho̍ wo̍ mbō kɔ̍ cha᷅l o̍ fo̍ndā Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ le̍ ndu̍ wāa̍ sōōlūūwo̍ lo̍ŋ ndo̍ pɛ̍, ō chāā la̍kɔ̍ mbō kɔ̍ cha̍lnu᷄ŋ lo̍ŋ.

⁷Ō nɔ̄lā mbō wa᷄ lo̍ŋ mbō sāāŋgi̍a̍l Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ nda̍ chāāŋāā ndūa̍a̍ Li̍va̍īya̍ lātūlu̍ a̍ cho̍ Mɛ̄lɛ̄ka̍ Ya̍a̍wɛ̄ɛ̍ sāāŋgīāllo̍ lo̍ŋ nda̍.

⁸Ndu̍yɛ̍ tē ō kɔ̍ cha᷅l lo̍ŋ pɛ̍, wānāā sōlīāā lāsa̍lāa̍ ā pīli̍a̍a̍ a̍ cho̍ lo̍ŋ nda̍, nyɛ̄ dīa̍a̍ cho̍ le̍ nda̍ wo̍, ndu̍ bɛ̍ɛ̍ ō nɔ̄ mbō sɔ̄la̍ o̍ ndɔ̍ɔ̍ mɛ̄ɛ̍ kpɛ̍ wānā o̍ wānā nɔ̍ le̍ sɔ̄lāa̍ yɛ̍. Ndu̍yɛ̍ o̍ ko̍ŋ kɔ̍ɔ̍lī, tē yu̍ŋgu̍ ndɔ̄ɔ̍ kōma̍ pīsī vɛ̄lɛ̄ nyɛ̄m nda̍ŋ ŋ̄ yu̍ŋgo̍ŋ pɛ̍, mā yɔ᷄ŋ ndu̍ nyɛ̄ ndu̍ nɔ̍ le̍ sɔ̄lāa̍ wo̍, ko̍ŋ ndu̍, o̍ ndɔ̍ɔ̍ yɛ̍ cho̍ ko̍ŋ ni̍.”

⁹O̍ ko̍ŋ kɔ̍ɔ̍lī, mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “Lā chō hūnɔ̄ɔ̍ lūɛ̄īyɔ̄ɔ̍ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ chō nya̍ kīo̍o̍ le̍ŋ ni᷄ŋ. Kɛ̍ ndu̍yɛ̍ ka̍ālā wɔ̄ɔ̍ŋndā kāa̍la̍ŋ lā pīlɛ̍ la̍ŋ lā chō chōo̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu᷅l la̍ŋ yɛ̄le̍ŋ tūl bɛ̄ndōo̍ la̍ŋ lā tu̍āl ka̍ālā lāŋ kɔ̄ɔ̄lī le̍.

¹⁰Lā chɛ᷅l mī wānā o̍ wānā nya̍ tɛ̄ɛ̄ŋ o̍ so̍li̍ po̍ ndɔ̄ɔ̍ kɛ̄lɛ̄ŋgāā chūā ndɔ̄ wa̍nā la̍nɔ̍ɔ̍ sa̍lā lūāmāa̍ le̍. O̍ ko̍ŋ kɔ̍ɔ̍lī, sɔ̄ɔ̍ŋ mu᷅ŋ ki̍nɛ̍i̍, lā chɛ᷅l mī wānā o̍ wānā nya̍ tɛ̄ɛ̄ŋ o̍ wo̍u̍ lābā le̍ni᷄ŋ te̍. Mu̍ŋ yɔ̍nūŋ ni̍ māā kɔ̄la̍ŋ o̍ māndi̍a̍a̍ lo̍, a̍ yāwāla̍ŋ wōmɔ̄ɔ̍, a̍ sɔ̄ɔ̍ŋ wa̍ā lāchīo̍ŋ wāŋnda̍ dīmūllo̍, a̍ kūēēle̍ŋ, a̍ nīīlū pīānda᷄ŋndo̍, o̍ ko̍ŋ kɔ̍ɔ̍lī, a̍ sūɛ̍i̍ o̍ wāŋ vīlɛ̍i̍ya̍ lo̍.

¹¹

¹²Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ tu̍l wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ mu᷅ŋ nda̍ lēyɛ̄. Le̍ sɔ̄ɔ̍ŋ wɔ̍ɔ̍ŋndo̍ŋ mu᷅ŋ tōsāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō tōsā ni̍ mī lā tōū kāa̍la̍ cho̍ īchāli̍ o̍ lɛ̄ŋndē lēŋ ni᷄ŋ nya̍ lāchī la̍ŋ.

¹³Lā kɛ̄si̍ nya̍ pi̍la̍ ā dīāndāā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ hɔ̄l. Lā to̍sā sūɛ̍i̍ o̍ sūɛ̍i̍ dɛ̍nɛ̍ wɔ̍ɔ̍ŋ te̍.”

¹⁴Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Lɛ̄ŋndē nya̍ chō le᷅ŋ kɔ̄la̍ŋ bīyɔ̄ɔ̍ mī lē sīmnu᷄ŋ lɛ̍ŋndē nyā le̍ŋ, kāa̍la̍ cho̍ o̍ lɛ̄ŋndē lēŋ ni᷄ŋ nda̍ŋ, sɔ̄ɔ̍ŋ wɔ̍ɔ̍ŋ nda̍ chō chōo̍ wo̍ŋ, mu̍ŋ cho̍ mu᷅ŋ ni̍, kɔ̄la̍ŋ o̍ māndi̍a̍a̍ lo̍, o̍ ko̍ŋ kɔ̍ɔ̍lī, mā kēī ya̍wāla̍ŋ vīōmɔ̄ɔ̍. Kɛ̍ nya̍ nya̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chɛ᷅l nya̍ mī lā tōsa̍ sɔ̄ɔ̍ŋ wɔ̍ɔ̍ŋ wāā le̍nde̍ le̍.

¹⁵Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, ō chō wāŋndo̍ hɛ̄lī yu̍ŋgu̍la̍ nyāla̍ŋ ō pīlɛ̍ tɛ̄ɛ̄ŋ le̍ mbō wa̍ wāna̍ su̍a̍ā le̍ Mɛ̄lɛ̄ka̍ wo̍, mɛ̄ɛ̍ ya̍ I̍ cho̍ nu̍a̍ā yɛ̍. Ndu̍yɛ̍ nyɛ̄ o̍ nyɛ̄ wānā ko̍ŋ ō dīmūl ni̍ŋ nya̍, lā tūe̍i̍ ndu̍ dīōm.

¹⁶“Bōōndi̍i̍ nya̍ wa̍ ā dīīna᷄ŋ ku̍ndāa̍ o̍ Pēmbīī Sa̍a̍nāīve̍ ve̍, nyɛ̄ nya̍ nyūna̍ māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tōsa̍l nya̍ wo̍, ndu̍ wa̍ ko̍ŋ ni̍. Mi̍ lā dīmūl la̍ āā, yāndi̍i̍ Mūu̍sē, di̍mu̍l Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ndu̍ pi̍la̍ o̍ su̍a̍ā lɛ̍ nāa̍ na̍a̍ chūā mī ŋ̄ tūɛ̄ī di̍ōm ndɔ̄ɔ̍ le̍, kɛ̄lɛ̄ŋgāā le̍, mī chē yīŋndē bɛ̄ndūle̍ chɔ᷅m māā ō chō a̍ na̍a̍ lātūlu̍ le̍ŋ, yɔ̄ŋi̍ na̍a̍ ŋ̄ chūu̍.

¹⁷Ndu̍yɛ̍ mɛ̄ɛ̍ nya̍ dīmi̍ le̍nde̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, ‘Nyɛ̄ wāŋnda̍ ha̍ā ā dīmi̍ wo̍ chō tōnya̍.

¹⁸I̍ cho̍ wāŋndo̍ hɛ̄lī yu̍ŋgu̍la̍ ndāla̍ŋ ō pīlɛ̍ tɛ̄ɛ̄ŋ, le̍ mbō wa̍ wa᷅na̍ su̍a̍ā le̍ ya̍ Mɛ̍lɛ̄ka̍ wo̍ māā nūm Mūu̍sē. Wānā ko̍ŋ, ndu̍ ya̍ I̍ wa᷅ ni̍ŋ di̍ōmndā nīla̍ŋ dɔ̄wɔ̄ɔ̍ o̍ sōndō ni̍, mbō dīmu̍l nda̍ nyɛ̄ o̍ nyɛ̄ ya̍ I̍ di̍mi̍.

¹⁹Wānā ko̍ŋ ndu̍ wa᷅ ni̍ŋ wa᷅na̍ su̍a̍a̍ le̍ ya̍ wo̍ nāa̍ nda̍ chūā ni̍. Wānā o̍ wāna̍ so̍li̍ ndu̍ dīōm pɛ̍, mbō kɛ̄ɛ̍ le̍ nyɛ̄ wānā ko̍ŋ ō dīmi̍ wo̍ nīla̍ŋ yāŋɔ̄ɔ̍, wāna̍ so̍lī ndu̍ ko̍ŋ di̍ōm ndo̍ ya̍ Mɛ̍lɛ̄ka̍ pīla̍ ya̍ tu̍sī ndu̍ nyɛ̄ pālāa̍ chōo̍ ni̍.

²⁰Kɛ̍ ndu̍yɛ̍ wānā o̍ wāna̍ fu̍la̍ pɛ̍ mbō dīmi̍ māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍, ndu̍yɛ̍ mbō dīmu̍l wāŋnda̍ yōōŋgōo̍ māā ya̍ Mɛ̍lɛ̄ka̍ ve᷅m ndu̍ ni̍, kɛ̍ ndu̍yɛ̍ ō ve᷅ ya̍ le̍ ve᷅m ndu̍ le̍ pɛ̍, wānā ko̍ŋ lā nɔ̄ mī lā tōsa̍ mbō sɔ̄la̍ pīɔ̍mndo̍. O̍ ko̍ŋ kɔ̍ɔ̍lī, wānā o̍ wāna̍ di̍mi̍ vɛ̄lɛ̄ pɛ̍ māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍, kɛ̍ ndu̍yɛ̍ mbo̍ wā yōōŋgūlā mɛ̄lɛ̄ka̍a̍ chēle̍ŋnda̍ wāŋnda̍ dīmūllo̍ pɛ̍, wānā ko̍ŋ bɛ̍ɛ̍ lā nɔ̄ mī lā tōsa̍ mbō sɔ̄la̍ pīɔ̍mndo̍.’ ”

²¹“Mī lā nyūna̍ dɔ̍ɔ̍ o̍ kɔ̄ltā nyāla̍ŋ ni᷄ŋ māā, kɛ̍ vɛ̄ɛ̍nɛ̍ na̍a̍ ŋ̄ lōōkū yɛ̍ sīnā māā yōōŋgū wāna̍ su̍a̍ā ho̍ō le̍ Mɛ̄lɛ̄ka̍ wo̍ ō dīmi̍ ho̍ō wo̍, ō cho̍ yo̍o̍ŋgū chɛ̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ le̍ o̍ cho̍ le̍.

²²Kɛ̍ ndu̍yɛ̍ mɛ̄ɛ̍ nya̍ lōōkū si̍nā yɛ̍ cho̍ ho̍ō ni̍. Yōōŋgu̍ o̍ yōōŋgū wāna̍ su̍a̍ā le̍ Mɛ̄lɛ̄ka̍ wo̍ ō dīmu̍l nya̍ pɛ̍ mbō dīmi̍ māā Mɛ̄lɛ̄ka̍ Ya̍a̍wɛ̄ɛ̍ dɔ̍ū ndu̍ ndu̍ o̍ sōndō nī, kɛ̍ mī nyɛ̄ o̍ di̍mi̍ māā ō chō yɔ̄nɔ᷄ŋndo̍ ō yɔ̄nu̍ŋ te̍, mɛ̄ɛ̍ ō cho̍ yo̍o̍ŋgū wāā o̍ Mɛ̄lɛ̄ka̍ Ya̍a̍wɛ̄ɛ̄ lo̍ le̍ o̍ cho̍ le̍. Wāna̍ su̍a̍ā ko̍ŋ le̍ Mɛ̄lɛ̄ka̍ wo̍, mɛ̄ɛ̍ dīōmndā ndɔ̄la̍ ndu̍ pi̍la̍ o̍ kɛ̍ɛ̍si̍a̍a̍ la̍ŋ o̍ di̍mu̍l nya̍ la̍ŋ ni̍. Sīōōŋīī bi̍ī nya̍ le̍ wāna̍ su̍a̍ā le̍ Mɛ̄lɛ̄ka̍ wāā le̍nde̍ le̍.”