Read Southern Kisi Dītɔ̍nɔ̍mi̍ī 19 Bible Online

Dītɔ̍nɔ̍mi̍ī 19 - Southern Kisi bible

Dītɔ̍nɔ̍mi̍ī 19

¹Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Lɛ̄ŋndē nya̍ chō kɔ̄la̍ŋ bīyɔ̄ɔ̍ le̍ŋ kāa̍la̍ cho̍ nya̍ īchāli̍ la̍chi̍ o̍ lɛ̄ŋndē lēŋ ni᷄ŋ nda̍ŋ, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō tōsā mī lā tɛ̄ɛ̄mbu̍u̍ la̍ŋ kpo̍u̍, o̍ ko̍ŋ kɔ̍ɔ̍lī, mī lā chūa̍ chi̍e̍e̍ŋ wāŋnda̍ ha̍ā ndu̍yɛ̍ a̍ chīɛ̄īlā ndāla̍ŋ mī lā cha᷄l lo̍ŋ.

²O̍ ko̍ŋ kɔ̍ɔ̍lī, tē lā chīi̍ lɛ̄ŋnde̍ŋ nde᷅ŋ bīyɔ̄ɔ̄ pɛ̍, lā nɔ̄ mī lā pīɔ̍u̍ le̍ŋ būŋga᷄ŋ ŋ̄gāa̍. Ndu̍yɛ̍ būŋgāŋ ŋ̄gāa̍ wo̍ŋ mu᷅ŋ, o̍ ībūŋgā o̍ ībūŋgā ni᷄ŋ mī lā mūli̍ŋ mī lā hɛ̄li̍ chīo̍o̍ ō pīlɛ̍, mī ndu̍ wa̍ te̍ŋge̍le̍ŋ. Le̍ tē sūlɛ̍i̍ ī fūla̍ wāŋndo̍ o̍ bā pɛ̍, mbō dīi̍ cha᷄ŋ ndɔ̄, wānā ko̍ŋ ō nyāānu̍ŋ o̍ chi̍e̍e̍ ko̍ŋ nāa̍ wānā yɔ᷅ŋ ndu̍ nyɛ̄ le̍ wa̍. Ndu̍yɛ̍ lā nɔ̄ mī lā bɛ̄ɛ̄ndi̍a̍a̍ nɛ̄īla̍ŋ nyɛ̄ kɛ̄ndɛ̄ kɛ̍ndɛ̄ le̍ kɔ̄la̍ŋ o̍ chi̍e̍e̍ŋ nya̍ chō mu̍ŋ hɛ̍lī wo̍ nāa̍ wānā nɔ̍la̍ mā kūɛ̄ chɔ̍ chɔ̍.

⁴Tē wāŋndo̍ sūlɛ̍i̍ fūla̍ ndu̍ o̍ bā pɛ̍ mbō dīī cha᷄ŋ ndɔ̍, mbō ve̍ māā kɛ̄ɛ̄sīāā le̍ o̍ kɛ̍ɛ̍si̍a̍a̍ le̍ ndi̍ tōsā le̍ pɛ̍, wānā ko̍ŋ ō nyāānu̍ŋ o̍ chi̍e̍e̍ŋ mu̍ŋ ō pīlɛ̍ ni᷄ŋ nāa̍ wānā yɔ᷅ŋ ndu̍ nyɛ̄ le̍ wa̍.

⁵Mī ī yɔ̄nu̍ŋ dɔ̍ɔ̍ mī wānāā ŋīɔ̍ɔ̍ŋ ā kūɛ̄ yɔ̄mnde̍ kīōlɔ̄ɔ̍ o̍ būndɔ̍ɔ̍ ni᷄ŋ. Mī ho̍ō ō lo̍ lɔ̄wāa̍, te̍le̍ŋ o̍ he̍e̍lū nu̍a̍ā chūe̍i̍ yo̍, mī chūe̍i̍ ī bɛ̄ŋi̍ŋ mī ī kɔ̍ ba̍ŋnu᷄ŋ wa᷅ŋndo̍ ō pīlɔ̍ɔ̍, mī wānā ko̍ŋ ō de᷄l ō vī. Wāna̍ chūēī kēŋ ī bɛ̄ŋi̍ŋ o̍ bā mī ī dīī cha᷄ŋ ndɔ̍ wo̍, ō nɔ̄ mbō nyāānu̍ŋ o̍ chi̍e̍e̍ŋ nya̍ chō mu̍ŋ hɛ̍lī wo̍ŋ ō pīlɛ̍ ni᷄ŋ nāa̍ nda̍ yɔ᷅ŋ ndu̍ nyɛ̄ le̍ wa̍, yɔ̄ŋi̍ nda̍ dīi̍ ndu̍.

⁶Tē ō cho̍ ko̍ŋ te̍, wāna̍ vi᷅ ko̍ŋ o̍ sūlɛ̍i̍ ni᷄ŋ ndo̍, wāna̍ ndɔ̄ɔ̍ ō nɔ̄lā mbō dɔ̄ɔ̄nu᷄ŋ tu̍mbe̍ mbō tīsa̍ wāna̍ sūlɛ̍i̍ ī fūla̍ ko̍ŋ o̍ bā wo̍ kīlta̍ŋ kɔ̄ɔ̄lī le̍ ndu̍ dīyɔ̄ɔ̍ sɔ̍ŋgɔ̍ ko̍ŋ. Tē ō wa̍ yɛ̄ pɛ̍, māā chīo̍o̍ ō pīlɛ̍ ko̍ni̍ nya̍ hɛ̍li̍ ni̍ le̍ nyāānɔ᷄ŋndo̍ lo̍ŋ, ndu̍yɛ̍ mi̍ chi̍e̍e̍ ko̍ŋ ō wā wāna̍ sūlɛ̍i̍ ī fūla̍ ko̍ŋ o̍ bā wo̍ lēvīl pɛ̍, lɔ̍ɔ̍ pa̍ mbō fūūlu̍u̍ lo̍ŋ, wāna̍ o̍ di̍ī ko̍ŋ ndo̍ wāna̍ ndɔ̄ɔ̍ ō nɔ̄lā mbō bīī ndu̍ mbō dīī ndu̍, mi̍ chē bɛ̍ɛ̍ ō nɔ̍ mbō sɔ̄la̍ pīɔ̍m le̍ ndi̍ le̍ ni̍. Kāni̍ fo̍ndōle̍, sūlɛ̍i̍ fu̍la̍ ndu̍ o̍ bā ni̍, ō ve̍ o̍ le̍ya̍a̍mɔ̍ɔ̍ ni̍ŋ te̍ i̍ yɔ̍nu̍ŋ te̍.

⁷Le̍la̍ŋ I̍ cho̍ nya̍ di̍mūllo̍ mī lā hɛ̄li̍ ni̍ko̍ chi̍o̍o̍ŋ ŋ̄gāa̍ le̍ vīōŋnɔ᷄ŋndo̍ lo̍ŋ.

⁸“Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chūe̍l nya̍ būŋgɛ̄i̍ māā sāwāla̍ ndɔ̄la̍ ya̍ I̍ cho̍ nya̍ la᷅ŋ kīo̍o̍ pāa̍le̍ hāūle̍ŋ nde᷅ŋ nda̍ŋ, tē lā tōsa̍ nyɛ̄ la̍ di̍mi̍ le̍ tōsāa̍ wo̍ pɛ̍, ndu̍yɛ̍ mī lā hīōū lāchī a̍ ndu̍ kāālāa̍, o̍ ko̍ŋ kɔ̍ɔ̍lī, mī lā tōl pɛ̄ɛ̄kūlā ndɔ̄la̍ŋ kɔ̄ɔ̄lī pɛ̍, ō chō nya̍ lɛ̄ŋndē o̍ chu̍e̍l le᷅ŋ fi̍nyāā nyāā ma̍māa̍ būŋgɛ̄i̍ le̍ nda̍ kīo̍o̍ le̍ŋ kē kpo̍u̍. Tē ke̍ŋ i̍ yɔ̍nu̍ŋ pɛ̍, mbō ke̍ nya̍ lɛ̄ŋnde̍ nde᷅ŋ kpo̍u̍, lā chɔ̄ɔ̄lu̍ chi̍o̍o̍ŋ hɛ̄lī ŋ̄gāa̍ mī lā hāndu̍ o̍ ŋ̄ tāse̍ŋ nya̍ hɛ̄li̍ wo̍ŋ chōo̍, le̍ te̍ sūlɛ̍i̍ ī fūla̍ wāŋndo̍ o̍ bā pɛ̍ mbō dīī wāŋndo̍ wānā ko̍ŋ ō nyāānu̍ŋ lo̍ŋ.

⁹

¹⁰Tē lā tōsa̍ le̍nde̍ pɛ̍, ko̍ŋ to̍sā lā di̍ī wa᷅na̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō le᷅ŋ nya̍ kīo̍o̍ le̍ŋ ni᷄ŋ mī tɔ̍ɔ̍ya̍ŋ pīɔ̍m ndɔ̄ɔ̍ ō wa̍ nya̍ chōo̍ le̍.

¹¹“Kɛ̍ tē ō wa̍ pɛ̍ mi̍ wāŋndo̍ ya̍a̍mɔ̍ɔ̍le̍ŋ lē wa̍ nda̍ tɛ̄ɛ̄ŋ nda̍ cha᷄ŋ ndɔ̄ I̍sɔ̄lūɛ̍i̍nɔ̍ɔ̍, mbo̍ kɔ̍ chu᷅m cha᷄ŋ ndɔ̄ ko̍ŋ o̍ nɛ̄ī, mbo̍ dīī ndu̍ le̍ ya̍a̍mɔ̍ɔ̍le̍ cho̍ nda̍ tɛ̄ɛ̄ŋ nde̍ŋ, o̍ ko̍ŋ kɔ̍ɔ̍lī, mbō nyāānu̍ŋ o̍ chi̍e̍e̍ŋ nya̍ chō mu᷅ŋ hɛ̄lī wo̍ŋ ō pīlɛ̍ ni᷄ŋ pɛ̍,

¹²ā nɔ̍ mā chɛ᷄l ndu̍ mbō wa̍ o̍ chi̍e̍e̍ ko̍ŋ ni᷄ŋ te̍. Wāŋ bɛ̄ndūāā chi̍e̍e̍ya̍ o̍ ndu̍ lo̍ chi̍e̍e̍ ā nɔ̄ mā vēm wāŋnda̍ ndu̍ kɔ̄ɔ̄lī mā kɔ̍ hu᷅ŋ a̍ ndu̍, mā hu᷄ŋ yɔ̍ŋgū ndu̍ o̍ wāna̍ o̍ di̍ī ko̍ŋ ndo̍ wāna̍ ndɔ̍ nɔ̍ le̍ māa̍ mīŋgīo̍o̍ wo̍ lo̍. O̍ ko̍ŋ, mī wāna̍ di̍ī ko̍ŋ cha᷅ŋ ndɔ̄ ko̍ŋ ndo̍ bɛ̍ɛ̍ ndu̍ sɔ̍la̍ pīɔ̍mndo̍.

¹³Lā nɔ̍ mī lā tūīīnu̍ŋ wa̍nā ko̍ŋ īnyīɛ̍ɛ̍ mī lā ma᷄l ndu̍ le̍. Lā nɔ̄ mī lā dīī ndu̍, mī lā tōsa̍ mī yɔ̄ŋ wɔ̄ɔ̍ŋ dīyāā wāna̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wo̍ ō fūla̍ I̍sɔ̄lūɛ̍i̍ya̍ tɛ̄ɛ̄ŋ. Tē lā tōsa̍ le̍nde̍ pɛ̍, nyɛ̄ o̍ nyɛ̄ wā o̍ kɛ̍ndɛ̄ a̍ nya̍.”

¹⁴Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Wānā o̍ wānā, fo̍ndā nu᷄m ŋ̄ sɔ̄la̍ ni̍ŋ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ kīo̍o̍ le̍ŋ ni᷄ŋ ndo̍, fa̍ŋā pɛ̄ɛ̄ŋgu̍la̍ wāŋ bɛ̄ndūa̍a̍ ā hāndu̍ nya̍ sīndɛ̄ tɛ̄ɛ̄ŋ nya̍ chāa̍ŋ nu̍m nya̍ chīɛ̄ɛ̄li̍āŋ ndo̍ mā hīōū o̍ fo̍nda̍ cha᷄ŋ nūmndo̍ ni᷄ŋ te̍.”

¹⁵Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Tē sūɛ̍i̍ ī kōma̍l nya̍ pɛ̍ māā wāŋndo̍ ō tɛ̄ɛ̄mbu̍u̍ sāwāa̍ ɔ̄ɔ̄ ō tōsa̍l cha᷄ŋ ndɔ̍ sūɛ̍i̍ wɔ̍ɔ̍ŋnde̍, mī lā wa̍ kɔ̍ɔ̍sɔ̍ɔ̍ a̍ wānā ko̍ŋ, lɔ̍ɔ̍ pa̍ nya̍ kīlūl ndu̍ yāmɛ̍i̍ mī lā yāāla̍ ndu̍, mɛ̄ɛ̍ mī se̍īya̍ ā fūla̍ ndu̍ kɔ̄ɔ̄lī, ā ŋīɔ̍ɔ̍ŋ kɛ̄lɛ̄ŋgāā ā yāa̍ bɛ̍ɛ̍. Kɛ̍ se̍īyo̍ ō pīlɛ̍ ō ve᷅ le̍tu̍u̍ le̍ ndu̍ yāālā le̍.

¹⁶Tē wāŋndo̍ ō wa̍ kīndīo̍o̍ pɛ̍ le̍ chāa̍ŋ ndɔ̄ I̍sɔ̄lūɛ̍i̍nɔ̍ɔ̍ nyɛ̄ pālāa̍ tūsīo̍o̍ chōo̍, mbō ho᷄l ndu̍ sūɛ̍i̍ lāchōōvɛ̄i̍ pɛ̍,

¹⁷wānāā ŋīɔ̍ɔ̍ŋāā kāŋ kpo̍u̍ ā nɔ̄ mā kūɛ̄ Mɛ̄lɛ̄ka̍ Ya̍a̍wɛ̄ɛ̍ lāchī o̍ fo̍ndā ndɔ̍ lāsōōlu̍u̍wo̍. Tē ā kūɛ̄ pɛ̍, ā kɔ̍ si᷅m wānāā sōlīāā lāsa̍lāa̍ a̍ māsāā di̍mīāā ŋ̄sɔ̄ɔ̍ wa̍ lāchī, a̍ nɔ̍ mā wa̍ o̍ fo̍ndā kōŋ a̍ te̍le̍ŋ ko̍ŋ nda̍, le̍ mā kɔ̄ɔ̄sa̍ a̍ nda̍.

¹⁸O̍ ko̍ŋ kɔ̍ɔ̍lī, mī māsāā di̍mīāā ŋ̄sɔ̄ɔ̍ wa̍ ā yāāsi̍a̍a̍ sūɛ̍i̍ ke̍ŋ fɛ̍sɛ̄ fɛ̍sɛ̄ le̍ mā chē tōnya̍a̍ lēni᷄ŋ. Ndu̍yɛ̍ tē ī bīī tōnya̍ pɛ̍, māā chōōla̍ŋ ko̍ni̍ wānā ko̍ŋ ō yēēma̍ le̍ chāa̍ŋ ndɔ̄ I̍sɔ̄lūɛ̍i̍nɔ̍ɔ̍ hāndɔ̄ɔ̍ chōo̍ ni̍, le̍ mbō tūsi̍ ndu̍ nyɛ̄ pālāa̍ chōo̍,

¹⁹wānā ko̍ŋ lā nɔ̄ mī lā tūsi̍ ndu̍ nyɛ̄ pālāa̍ chōo̍. Nyɛ̄ pālāā ndu̍ o̍o̍ tu̍u̍nu̍ŋ o̍ kɔ̄l le̍ chāa̍ŋ ndɔ̍ tūsīo̍o̍ chōo̍ wo̍, lā nɔ̄ mī lā tūsi̍ ndu̍ nyɛ̄ pālāā kōŋ chōo̍. Tē lā tōsa̍ nu̍a̍ā pɛ̍, mɛ̄ɛ̍ lā tōsa̍ mi̍ lɛ̄ŋndē nyāle̍ŋ lē fūlā o̍ yɔ̄ŋ wɔ̄ɔ̍ŋndo̍ ho̍ō bɛ̄ŋgu̍.

²⁰O̍ ko̍ŋ, tē I̍sɔ̄lūɛ̍i̍nɔ̍ o̍ I̍sɔ̄lūɛ̍i̍nɔ̍ o̍ tu̍e̍ī a̍ nyɛ̍ yɔ̍nu̍ŋ a̍ wānā ko̍ŋ ndo̍ o̍kɔ̄ɔ̄ pɛ̍, sīōōŋnde̍ chō ndu̍ bīyɔ̄ɔ̄, o̍ de᷅l kɔ᷅l mī ndu̍ bɛ̍ɛ̍ o̍ to̍sa̍ ī wāā le̍nde̍ le̍.

²¹Te̍ wāŋndo̍ ō tōsa̍ sūɛ̍i̍ wɔ̍ɔ̍ŋnde̍ pɛ̍, lā nɔ̍ mī lā tūīīnu̍ŋ wa̍nā ko̍ŋ īnyīɛ̍ɛ̍ mī lā ma᷄l ndu̍ le̍. Tē dīyɔ̄ɔ̍ wāŋndo̍ ō dīī ni̍, ndu̍ bɛ̍ɛ̍ lā dīi̍ ndu̍. Tē hɔ̄lte̍ŋ o̍ pɛ᷅l chāa̍ŋ ndɔ̍ ni̍, ndu̍ bɛ̍ɛ̍ lā pīɔ̍l ndu̍ hɔ̄lte̍ŋ, tē chīŋnde̍ o̍ bɛ̍ŋi̍ chāa̍ŋ ndɔ̍ ni̍, ndu̍ bɛ̍ɛ̍ lā bɛ̄ŋi̍ ndu̍ chīŋnde̍. Tē bāa̍ o̍ ye᷅m chāa̍ŋ ndɔ̍ ni̍, ndu̍ bɛ̍ɛ̍ lā yo᷄m ndu̍ bāa̍, ndu̍yɛ̍ tē pēlēi̍ o̍ ye᷅m chāa̍ŋ ndɔ̍ ni̍, ndu̍ bɛ̍ɛ̍ lā yo᷄m ndu̍ pēlēi̍.”