Read Southern Kisi Dītɔ̍nɔ̍mi̍ī 20 Bible Online

Dītɔ̍nɔ̍mi̍ī 20 - Southern Kisi bible

Dītɔ̍nɔ̍mi̍ī 20

¹O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl I̍sɔ̄lūɛ̍i̍ya̍ āā, “Tē lā kūɛ̄ le̍ ya̍a̍mɔ̍ɔ̍wa̍a̍ nyāa̍ chīŋa̍la᷅ŋndo̍ a̍ chɔ̄ūwo̍ pɛ̍, lā chɔ̍ bɛ̍ɛ̍ mī ya̍a̍mɔ̍ɔ̍wa̍a̍ nyāa̍ ha̍ā ā nɔ̄ nyɛ̄lā chɔ̄ūlā su̍a̍ā ā nāŋ nda̍ŋ ta̍u̍ ta̍u̍, a̍ su̍a̍ā chɔ̄ūwa̍ mā wa̍ ta̍u̍ ta̍u̍, ndu̍yɛ̍ mī pūa̍a̍ ndāa̍ chɔ̄ūwa̍ ā wa̍ sɛ̍lɛ̍ bɛ̍ndōo̍ hīōūwɔ̄ɔ̍ nya̍, lā yɔ᷅ŋ īsīōōŋ te̍. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, o̍ ba̍ŋa̍ nya̍ o̍ chɛ̄le̍ŋ ni᷄ŋ I̍chi̍pī mbo̍ sōlī nya̍ lo̍ŋ ndo̍ ō chō a̍ nya̍ lātūlu̍.

²Le̍la̍ŋ tē lā kūɛ̄ pɛ̍, lɔ̍ɔ̍ pa̍ mī lā chīŋa̍la᷅ŋ ya̍a̍mɔ̍ɔ̍wa̍a̍ nyāa̍ a̍ sɔ̍ŋgɔ̍ɔ̍, wānāa̍ so̍lī sa̍lāla̍ŋ o̍ Mɛ̄lɛ̄ka̍ lo̍ wa̍, ō pīlɛ̍ nɔ̄ mbō si᷄m pūa̍a̍ nyāa̍ chɔ̄ūwa̍ lāchī, mbō sōō dīōmndā kɔ̄l sīmūlāāla̍ŋ nāa̍ nda̍ chūā.

³Dīōmndā o̍ nɔ̍ mbō dīmu̍l nda̍ la̍ŋ la̍ŋ la̍ cho̍ la᷅ŋ ni̍, āā, ‘Lā ya᷄ŋ ya̍ nīla̍ŋ pūa̍a̍ chɔ̄ūwa̍ I̍sɔ̍lūɛ̄ī. Lā chō kɔ̍la̍ŋ ya̍a̍mɔ̍ɔ̍wa̍a̍ nyāa̍ chīŋa̍la᷅ŋndo̍ a̍ sɔ̍ŋgɔ̄ɔ̍ pāa̍le̍ hāūle̍ŋ nde᷅ŋ. Lā sīmu̍l kɔ᷅lta̍ŋ yi̍, lā yɔ᷅ŋ īsīōōŋ te̍. Sīōōŋīī bi̍ī nya̍ le̍ nda̍ le̍. Kɔ̄ltā nyāla̍ hi̍i̍lu᷄ŋ te̍.

⁴Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ndu̍ si᷅m nya̍ lāchī ni̍, le̍ sɔ̍ŋgɔ̍ɔ̍ a̍ ya̍a̍mɔ̍ɔ̍wa̍a̍ nyāa̍ ndu̍yɛ̍ mbō ke̍ nya̍ kpāāyāa̍ mī lā yēm nda̍.’

⁵“O̍ ko̍ŋ kɔ̍ɔ̍lī, tē ndu̍ chi̍i̍ sūɛ̍i̍ nāa̍ nda̍ chūā pɛ̍, wānāa̍ cho̍ pūa̍a̍ chɔ̄ūwa̍ bōlle̍ wa̍ ā si᷄m pūa̍a̍ chɔ̄ūwa̍ kpo̍u̍ la̍chi̍ ā sōō nāa̍ nda̍ chūā, ā dīmu̍l nda̍ kpo̍u̍ āā, ‘Tē wānā o̍ wānā o̍ wa̍ na̍a̍ tɛ̄ɛ̄ŋ pɛ̍ mbo̍ tāŋgūl chīɛ̄īyo̍, kɛ̍ ō me᷄l lɔ̍ ndu̍ Mɛ̄lɛ̄ka̍ o̍ bā le̍ mɛ̄ɛ̍ wānā ko̍ŋ ō mīīŋgu̍. Kāni̍ fo̍ndōle̍, mī ī yɔ̄nu̍ŋ dɔ̍ɔ̍ mī wānā ko̍ŋ ō lo̍ o̍ chɔ̄ūwo̍. Tē ke̍ŋ i̍ yɔ̍nu̍ŋ pɛ̍, mɛ̄ɛ̍ wānā ko̍ŋ chīɛ̄ī ndɔ̄ ko̍ŋ, wānā che᷅le̍ŋ ma᷅l ni᷅ŋ ndu̍ Mɛ̄lɛ̄ka̍ o̍ bā ni̍.

⁶Ndu̍yɛ̍, tē wānā wa̍ na̍a̍ tɛ̄ɛ̄ŋ pɛ̍, mbo̍ tōsā kpe̍le̍ mākīle̍pīi̍yo̍, kɛ̍ ō kēndu̍ wɔ̍ kpe̍le̍ ndɔ̄ɔ̍ ho̍ō, mūɛ̄īmā ndūa̍ŋ tɔ̄nɔ̄ di̍o̍ le̍, mɛ̄ɛ̍ wānā ko̍ŋ ō mīīŋgu̍ o̍ ndu̍lo̍. Kāni̍ fo̍ndōle̍, mī ī yɔ̄nu̍ŋ dɔ̍ɔ̍ mī wānā ko̍ŋ ō kɔ̍ lo᷅ o̍ chɔ̄ūwo̍, mī wānā che᷅le̍ŋ ō kōma̍ di̍ō kpe̍le̍ ndɔ̄ ko̍ŋ tɔ̄nɔ̄.

⁷Ndu̍yɛ̍ tē wānā wa̍ na̍a̍ tɛ̄ɛ̄ŋ pɛ̍, mbo̍ dūāū wānā la̍nɔ̍ɔ̍ fu̍lo̍o̍ le̍ mā cha᷄l nda̍ ndu̍, kɛ̍ ā che᷄l lɔ̍ le̍, mɛ̄ɛ̍ wānā ko̍ŋ ō mīīŋgu̍. Kāni̍ fo̍ndōle̍, mī ī yɔ̄nu̍ŋ dɔ̍ɔ̍ mī wānā ko̍ŋ ō kɔ̍ lo᷅ o̍ chɔ̄ūwo̍, mī wānā pɔ̍nɔ̍ che᷅le̍ŋ ō kōma̍ chu̍ā chūā kōŋ o̍ nɔ̄ɔ̍ ni᷄ŋ.’

⁸“O̍ ko̍ŋ kɔ̍ɔ̍lī, tē wānāa̍ cho̍ pūa̍a̍ chɔ̄ūwa̍ bōlle̍ wa̍ ā chīi̍ sūɛ̍i̍ nāa̍ pūa̍a̍ chɔ̄ūwa̍ chūā pɛ̍, ā dīmu̍l vɛ̄lɛ̄ pūa̍a̍ chɔ̄ūwa̍ kpe̍nde̍ke̍le̍ āā, ‘Wāna̍ o̍ wāna̍ cho̍ na̍a̍ tɛ̄ɛ̄ŋ na̍nu᷄ŋ mi̍ sīōōŋnde̍ wā nu̍m? Tē wānā wa̍ā le̍nde̍ o̍ wa̍ na̍a̍ tɛ̄ɛ̄ŋ pɛ̍, mi̍ kɔ̄llo̍ wā nu̍m ni᷄ŋ pu̍lāŋ pu̍lāŋ pɛ̍, mɛ̄ɛ̍ ō bɛ̄ndā mā mīīŋgu̍, yɔ̄ŋi̍ ŋ̄ tōsa̍ mī kɔ̄lta̍ŋ lā hīīlu̍ŋ pu̍a̍a̍ chɔ̄ūwa̍ ā pīli̍a̍a̍ a̍ sīōōŋnde̍.’

⁹O̍ ko̍ŋ kɔ̍ɔ̍lī, tē wānāa̍ cho̍ pūa̍a̍ chɔ̄ūwa̍ bōlle̍ wa̍ ā chīi̍ pɛ̍ su̍ɛ̍i̍ nāa̍ nda̍ chūā, ā hɛ̄li̍ ni̍ko̍ so̍vɛ̄i̍ya̍ ā kɛ̄si̍ nda̍ ku̍ndālā yɛ̍ yɛ̍la̍ pūa̍a̍ chɔ̄ūwa̍ bōlle̍.

¹⁰“Ndu̍yɛ̍ tē lā kūɛ̄ le̍ chi̍e̍e̍ o̍ chi̍e̍e̍ chi᷅ŋa̍la᷅ŋndo̍ pɛ̍, lɔ̍ɔ̍ pa̍ nya̍ chīŋa̍la᷅ŋ ndu̍, lā sūūki̍āŋ ndɔ̍ fɛ̍lɛ̍ŋ su̍ūki̍āŋ kɔ̄l nyūlōo̍ a̍ nda̍.

¹¹Tē wāŋnda̍ o̍ chi̍e̍e̍ ko̍ŋ ni᷄ŋ a̍ to̍sa̍ chɛ̄la᷅ŋ kɔ̄l nyūlōo̍ a̍ nya̍ pɛ̍, mɛ̄ɛ̍ lā chi᷅ŋa̍la᷅ŋ nda̍ le̍. Kɛ̍ wāŋnda̍ o̍ chi̍e̍e̍ ko̍ŋ ni᷄ŋ kpo̍u̍, lā nɔ̄ mī lā sīīŋgu̍u̍ nda̍ wānāā nyāa̍ wa̍lla̍ mā sāāŋgi̍a̍l nya̍.

¹²Kɛ̍ tē wāŋnda̍ o̍ chi̍e̍e̍ ko̍ŋ ni᷄ŋ a̍ to̍sa̍ chɛ̍la᷅ŋ kɔ̄l nyūlū a̍ nya̍ le̍, mā yēēma̍ le̍ nya̍ sīmūllo̍ a̍ sɔ̍ŋgɔ̍ɔ̍, lā bālu̍ chi̍e̍e̍ ko̍ŋ mī lā dɔ̄ū ndu̍ o̍ pi̍ŋndo̍ ni᷄ŋ kpɔ̍kɔ̍su̍ le̍ nda̍ chīŋa̍la᷅ŋndo̍.

¹³Ndu̍yɛ̍ tē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ma᷄l nya̍ chi̍e̍e̍ ko̍ŋ o̍ bā pɛ̍ mī lā bīī ndu̍, wānā pɔ̍nɔ̍ o̍ wānā pɔ̍nɔ̍ cho̍ chi̍e̍e̍ ko̍ŋ ni᷄ŋ lā dīu̍ nda̍ kpo̍u̍.

¹⁴Kɛ̍ wāŋ lāāndūa̍a̍ cho̍ lo̍ŋ nda̍ ni̍, a̍ chūāāmbūāā pɔ̄mbūa̍a̍, a̍ chɔ̄lūa̍a̍, ndu̍yɛ̍ a̍ nyɛ̄ o̍ nyɛ̄ chēle̍ŋ cho̍ o̍ chi̍e̍e̍ ko̍ŋ ni᷄ŋ, kpo̍u̍ nya̍ nɔ̍ ni̍. Nyɛ̄ o̍ nyɛ̄ ya̍a̍mɔ̍ɔ̍wa̍a̍ nyāā ka̍ŋ nda̍ a̍a̍ nɔ̍, nya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ke̍ ni̍.

¹⁵Chi̍e̍e̍ŋ bɛ̍ndu᷄ŋ cho̍ la̍nda̍ŋ la̍nda̍ŋ ndo̍ŋ, nu̍a̍ā nya̍ nɔ̄ ni̍ mī lā tōsa̍ a̍ mu̍ŋ. Kɛ̍ chi̍e̍e̍ŋ cho̍ nya̍ māchɛ̄lū wo̍ŋ mu̍ŋ mu̍ŋ lā bi̍ī mu̍ŋ le̍nde̍ le̍.

¹⁶“Kɛ̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō le᷅ŋ nya̍ kīo̍o̍ nyɛ̄ nyā le̍ŋ, chi̍e̍e̍ŋ cho̍ o̍ lɛ̄ŋndē lēŋ ni᷄ŋ ndo̍ŋ, wānā o̍ wāna̍ cho̍ o̍ chi̍e̍e̍ŋ mu̍ŋ ni᷄ŋ lātūlu̍ a̍ nyɛ̄ o̍ nyɛ̄ yōōmāa̍ cho̍ lo̍ŋ, lā nɔ̄ mī lā dīu̍ nda̍ kpo̍u̍, ō pīlɛ̍ bɛ̍ɛ̍ lā mɛ̍ī yōōmū le̍.

¹⁷Kāa̍la̍ cho̍ o̍ lɛ̄ŋndē lēŋ ni᷄ŋ nda̍ŋ ki̍nɛ̍i̍, Hi̍ta̍i̍tīi̍ya̍ ni̍, a̍ A̍mɔ̍lu̍a̍i̍tīi̍ya̍, a̍ Ke̍na̍na̍i̍tīi̍ya̍, a̍ Pɛ̍lu̍i̍sa̍i̍tīi̍ya̍, a̍ Hi̍va̍i̍tīi̍ya̍, a̍ Chɛ̄bu̍sa̍i̍tīi̍ya̍, lā nɔ̄ mī tɛ̄ɛ̄mbu̍u̍ nda̍ kpo̍u̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dīmu̍l nya̍ yɛ̍.

¹⁸Lā dīu̍ nda̍ kpo̍u̍, yɔ̄ŋi̍ nda̍ pɛ̄ɛ̄ku̍ nya̍ a̍ mɛ̄lɛ̄ka̍ā ndāa̍ sōōlūūwo̍, ndu̍yɛ̍ a̍ sɔ̄ɔ̍ŋ wɔ̍ɔ̍ŋ bɛ̄ndūŋ nda̍ tōsā o̍ mɛ̄lɛ̄ka̍ā ndāā ka̍ŋ, sōōlūūwo̍ ni᷄ŋ ndo̍ŋ, mī lā tōl ka̍ālā ndāla̍ŋ kɔ̄ɔ̄lī, o̍ ko̍ŋ mī lā tōsa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍.

¹⁹“Tē lā bālu̍ chi̍o̍o̍ pɛ̍ mī lā dɔ̄ū ndu̍ o̍ pi̍ŋndo̍ ni᷄ŋ kpɔ̍kɔ̍su̍ le̍ ndu̍ chīŋa̍la᷅ŋndo̍, mī lā wa̍ lo̍ŋ le̍ te̍le̍ŋ vi̍lɛ̄ī a̍ sɔ̍ŋgɔ̄ɔ̍ pɛ̍, yɔ̄mīī ndɛ̄i̍ ku̍a̍mɛ̄i̍ ki̍nɛ̍i̍ lā ki̍āŋ ō pīlɛ̍ bɛ̍ɛ̍ le̍. Lā dīo̍ ko̍mɔ̄ɔ̄la̍ cho̍ o̍ yɔ̄mīī kēŋ chōo̍ la̍ŋ, kɛ̍ lā tɛ̍ɛ̍mbūū ndi̍ le̍. Ō cho̍ yɔ̍mīī kēŋ te̍ cho̍ ya̍a̍mɔ̍ɔ̍wa̍a̍ nya̍ mi̍ lā kūā sɔ̍ŋgɔ̄ɔ̍ a̍ ndi̍ le̍.

²⁰Tē lā wa̍ nyɛ̄ o̍ nyɛ̄ tāŋgūl a̍ yɔ̄mnde̍ o̍ sāāsa̍ chi̍e̍e̍ nya̍ bālu̍ ko̍ŋ ndo̍ hōlnɔ᷄ŋndo̍ le̍ mī lā kēēku̍ lēchōo̍ mī lā kɔ̍ bi̍ī chi̍o̍o̍ pɛ̍, yɔ̄mīī yɔ̄ŋɛ̄i̍ chēle̍ŋ, ndi̍ nya̍ nɔ̄ ni̍ mī lā wa̍ kīōlɔ̄ɔ̍ le̍ nyɛ̄ kōŋ tāŋgūllo̍ ha̍a̍a̍ mī lā bīī chi̍e̍e̍ ko̍ŋ.”