Read Southern Kisi Dītɔ̍nɔ̍mi̍ī 23 Bible Online

Dītɔ̍nɔ̍mi̍ī 23 - Southern Kisi bible

Dītɔ̍nɔ̍mi̍ī 23

¹Mi̍ Mūu̍sē hi̍a̍ū lāchī a̍ sūɛ̍i̍ āā, “Wānā pɔ̍nɔ̍ o̍ wānā pɔ̍nɔ̍ nda̍ pɛ̄l bōōsīo̍o̍, kɛ̄lɛ̄ŋgāā mā kēlū ndu̍ tūūwo̍ pɛ̍, ō nɔ̍ mbō wa̍ o̍ chūūŋgi̍āŋ I̍sɔ̄lūɛ̍i̍ya̍ ā chūūŋgi̍āŋ le̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍ wo̍ chōo̍ le̍.

²“O̍ ko̍ŋ kɔ̍ɔ̍lī, wānā o̍ wāna̍ cho̍ wōlɔ̄ɔ̄ sa̍ma̍a̍, ō nɔ̍ mbō wa̍ o̍ chūūŋgi̍āŋ I̍sɔ̄lūɛ̍i̍ya̍ ā chūūŋgi̍āŋ le̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍ wo̍ chōo̍ le̍. Ndu̍yɛ̍ ō cho̍ wɔ̍ ndu̍ pi̍la̍ le̍, kɛ̍ chūāūwāā ndūāā ma̍māa̍ o̍ chūāūwāā ndūāā ma̍māa̍ ni᷄ŋ bɛ̍ɛ̍, mbō kūɛ̄ ā lāchī kɛ᷅, ā nɔ̍ mā wa̍ o̍ chūūŋgi̍āŋ I̍sɔ̄lūɛ̍i̍ya̍ ā chūūŋgi̍āŋ le̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍ wo̍ chōo̍ le̍

³“Wānā o̍ wāna̍ fu̍la̍ o̍ kāa̍le̍ A̍mɔ᷅na̍i̍tīi̍le̍ŋ chōo̍, kɛ̄lɛ̄ŋgāā mbo̍ fūlā o̍ kāa̍le̍ Mo̍wa̍bīle̍ŋ chōo̍, tē I̍sɔ̄lūɛ̍i̍ya̍ ā chūūŋgi̍āŋ le̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍ pɛ̍, ō nɔ̍ mbō wa̍ nda̍ tɛ̄ɛ̄ŋ te̍. Ndu̍yɛ̍ ō cho̍ wɔ̍ nda̍ pi̍la̍ le̍, kɛ̍ chūāūwāā ndāā ma̍māa̍ o̍ chūāūwāā ndāā ma̍māa̍ ni᷄ŋ bɛ̍ɛ̍, mbō kūɛ̄ a̍ lāchī kɛ᷅, ā nɔ̍ mā wa̍ o̍ chūūŋgi̍āŋ kōŋ tɛ̄ɛ̄ŋ te̍.

⁴Le̍ sa̍bū ya̍ I̍ di̍mi̍ le̍nde̍ wo̍ cho̍ ni̍, bōōndi̍i̍ nya̍ fūla̍ o̍ chɛ̄le̍ŋ ni᷄ŋ I̍chi̍pī mi̍ lā wā hūnɔ̄ɔ̍ ve̍, mɛ̄ɛ̍ nya̍ fūūlu̍u̍ o̍ fo̍ndā wāŋnda̍ ha̍ā, ō cho̍ wɔ̍ nyɛ̍ dīa̍a̍ le̍, kɛ̍ mɛ̄ŋndē kōlāāle̍ŋ bɛ̍ɛ̍ ā chɛ᷄l mā ke̍ nya̍ le̍ŋ te̍. Ma̍ lō o̍ ko̍ŋ ma̍ hīāū Be̍la᷅m, pɔ̍ Bi̍ɔ̍ɔ̍ wo̍ kɔ̄ɔ̄lī, wānā wa̍ā Pɛ̍tɔ̄ɔ̄ chi̍e̍e̍, o̍ būŋgɛ̄ī Mɛ̄sōpōte̍e̍mīāā ve̍ ni᷄ŋ le̍ mbō hāndu̍ nya̍ sēndi̍o̍o̍ chōo̍.

⁵Kɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ye᷄ŋ Be̍la᷅m lānī mbō chɛ᷄l mī nyɛ̄ Be̍la᷅m o̍ di̍mi̍ wo̍ ō yɔ̄nu̍ŋ te̍, fo̍ndōle̍, le̍ kāālā ndu̍ Mɛ̍lɛ̄ka̍ ō kāāla̍ nya̍ wo̍. Sēndi̍ Be̍la᷅m o̍ ha̍ndu̍ nya̍ chōo̍ wo̍, mi̍ Mɛ̄lɛ̄ka̍ mūlī sēndi̍ kōŋ sa̍lāa̍ le̍ nya̍.

⁶Le̍la̍ŋ ha̍a̍a̍ tē lā chō yōōmū, lā to̍sā chɛ̄la᷅ŋ o̍ chɛ̄la᷅ŋ kɔ̄l nyūlū a̍ wānāā kāŋ te̍, kɛ̄lɛ̄ŋgāā le̍, mī lā nūūwa̍ lānɛ̄ī le̍ mī dɛ̍nɛ̍ kɛ̍ndɛ̄ ō kōma̍l nda̍.

⁷“Lā tu᷅l I̍dɔ̄ma̍i̍tīi̍ya̍ lēyɛ̄ le̍. Kāni̍ fo̍ndōle̍, nya̍ nda̍ wānāyɛ̍i̍ nya̍ chō ni̍. Ndu̍yɛ̍ lā tu᷅l vɛ̄lɛ̄ I̍chi̍pīāŋnda̍ lēyɛ̄ le̍. Kāni̍ fo̍ndōle̍, lā wa̍ sīndɛ̄ sūmīālīī ndɛ̄i̍ o̍ lɛ̄ŋndē ndāle̍ŋ ni᷄ŋ.

⁸Wānāā ya̍ I̍ di̍mu̍l nya̍ ha̍ā māā lā tu᷅l nda̍ lēyɛ̄ le̍ wa̍, chūāūwāā ndāā ma̍māa̍, a̍ chūāūwāā māmāā chūāūwāā ndāā ka̍ŋ, lā nɔ̄ mī lā chɛ᷄l nda̍ mā wa̍ nya̍ tɛ̄ɛ̄ŋ o̍ chūūŋgi̍āŋ nya̍ chūūŋgi̍āŋ le̍ Mɛ̄lɛ̄ka̍ Ya̍a̍wɛ̄ɛ̄ sōōlūūwo̍ wo̍ chōo̍.”

⁹Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Tē lā kūɛ̄ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ nyāa̍ pɛ̍, mī lā kɔ̍ ki̍o̍lū dɔ̍ɔ̍ŋgɔ̍ɔ̍, nyɛ̄ o̍ nyɛ̍ nɔ̍lā pɛ̍ mbō tōsa̍ mī lā sīmnu᷄ŋ a̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l, lā kpɛ̄kpɛ̍la̍ ndu̍.

¹⁰Tē lā wa̍ o̍ dɔ̍ɔ̍ŋgɔ̍ chɔ̄ūwo̍ ni᷄ŋ pɛ̍, mi̍ so̍vɛ̄i̍ya̍ ō pīlɛ̍ lō o̍ lūa̍ŋ īchɔ̄l mi̍ chīɛ̄ī kɔ̄ɔ̄līo̍o̍ ō hīālu᷄ŋ ndu̍ mbo̍ sīmnu᷄ŋ o̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l pɛ̍, wāna̍ chīɛ̄ī kɔ̄ɔ̄līo̍o̍ o̍ hīālūŋ ko̍ŋ ndo̍ ō nɔ̍ mbō nīīlu̍ o̍ dɔ̍ɔ̍ŋgɔ̍ɔ̍ ni᷄ŋ te̍. Tē pāa̍le̍ŋ lē sɛ̄ pɛ̍, ō nɔ̄ mbō ma᷄l dɔ̍ɔ̍ŋgɔ̍ɔ̍ mbō kɔ̍ wa᷅ īnɛ̍.

¹¹Tē pāa̍le̍ŋ lē yɔ̄ŋgu̍ŋ pɛ̍, ō pūlu᷄ŋ fo̍, o̍ ko̍ŋ kɔ̍ɔ̍lī, a̍ fīti̍līo̍o̍ ō mīīŋgu̍ o̍ dɔ̍ɔ̍ŋgɔ̍ɔ̍ ni᷄ŋ.

¹²“O̍ ko̍ŋ kɔ̍ɔ̍lī, lā nɔ̄ mī lā nɔ̄ fo̍ndāa̍ o̍ dɔ̍ɔ̍ŋgɔ̍ɔ̍ da̍ŋga̍la̍ nāa̍ wānā o̍ wānā o̍ hi̍a̍ū o̍ chīɛ̄ī kɔ̄ɔ̄lī wa̍.

¹³Ndu̍yɛ̍ tē wānā o̍ wānā o̍ wa̍ kɔ̄la̍ŋ sōlɔ̄ɔ̍ pɛ̍, ō kɔ̍ a̍ nyɛ̄ o̍ bā le̍ so̍o̍ŋndo̍ tōūwɔ̄ɔ̍. Ndu̍yɛ̍ nyɛ̄ kōŋ ō nɔ̄ mbō wa̍ o̍ wōlɔ̄ɔ̄lā ndɔ̄la̍ chɔ̄ūla̍ŋ tɛ̄ɛ̄ŋ. Tē wānā ko̍ŋ ō wa̍ sōlɔ̄ɔ̍ pɛ̍, ō nɔ̄ mbō tōū so̍o̍ŋndo̍ ā nyɛ̄ kōŋ mbō sōl lēni᷄ŋ. Tē ō chīi̍ pɛ̍ kpo̍u̍, ō mīŋgi̍ pūūlōo̍ lēcho̍ō.

¹⁴Kāni̍ fo̍ndōle̍, nāa̍ nya̍ chō wā ka̍ŋ o̍ dɔ̍ɔ̍ŋgɔ̍ kōŋ ni᷄ŋ nda̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō wā nya̍ bālɔ̄ɔ̍ chōo̍ o̍ dɔ̍ɔ̍ŋgɔ̍ kōŋ ni᷄ŋ le̍ nya̍ māndāa̍, ndu̍yɛ̍ a̍ le̍ ya̍a̍mɔ̍ɔ̍wa̍a̍ nyāa̍ yōmɔ̄ɔ̍. Le̍la̍ŋ lā nɔ̄ mī lā tōsa̍ mī dɔ̍ɔ̍ŋgɔ̍ nya̍ chɔ̄ūwo̍ ō wa̍ ō dīāndāā ndu̍ Mɛ̍lɛ̄ka̍ o̍ hɔ̄l. Lā to̍sā īsɔ̄ɔ̍ o̍ īsɔ̄ɔ̍ bɛ̄ɛ̄ ta̍mbɛ̍i̍ nya̍ tɛ̄ɛ̄ŋ, ī Mɛ̄lɛ̄ka̍ Ya̍a̍wɛ̄ɛ̄ o̍ cha᷅ mbō tāmbu̍ kɔ̄l mbō mūlu̍l nya̍ kɔ̄ɔ̍ ve̍ le̍.”

¹⁵Mi̍ Mūu̍sē o̍ hi̍a̍ū lāchī a̍ sūɛ̍i̍ mbo̍ dīmī āā, “Tē ō wa̍ pɛ̍ mī chīɔ̍ɔ̍ ō hɛ̄lu᷄ŋ ma̍sānɔ̍ ndɔ̄ɔ̍ mbō kōma̍l nya̍, le̍ mī lā chīɔ̍u̍ yōōmū ndɔ̄ɔ̍, lā mi̍ŋgī chɛ̄ kōŋ o̍ māsānɔ̍ ndɔ̄ɔ̍ lo̍ le̍.

¹⁶Chi̍e̍e̍ o̍ chi̍e̍e̍ chɛ̄ kōŋ ō yēēma̍ pɛ̍ le̍ cha᷄lle̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ, lā ma᷄l ndu̍ mbō cha᷄l lo̍ŋ. Ndu̍yɛ̍ lā bi̍ī ndu̍ bīyɔ̄ɔ̄ wɔ̄ɔ̍ŋ te̍.

¹⁷“Wānā o̍ wāna̍ cho̍ I̍sɔ̄lūɛ̍i̍nɔ̍ɔ̍, ō wa̍ wa̍nā pɔ̍nɔ̍, ō wa̍ wa̍nā la̍nɔ̍, a̍ nɔ̍ mā sīmnu᷄ŋ wa̍nāā tīāmāa̍ wa᷅ ha̍ā o̍ chīɛ̄īlā mɛ̄lɛ̄ka̍ā ndāa̍ mā tīām o̍ mɛ̄lɛ̄ka̍ā ndāa̍ sōōlūūwo̍ wa̍ ni᷄ŋ te̍.

¹⁸Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tu᷄l wānāa̍ pi̍sī ha̍ā dīāllūŋ nda᷄ŋ o̍ tīɔ̄mɔ̄ɔ̍ ni᷄ŋ le̍ nyɛ̄ sɔ̄lāa̍ wa̍ lēyɛ̄, ō wa̍ wa̍nā pɔ̍nɔ̍ ō wa̍ wa̍nā la̍nɔ̍. Le̍la̍ŋ nyɛ̄ o̍ nyɛ̄ sɔ̄lāā wāŋndo̍ sɔ̄la̍ o̍ nɛ̄īla̍ wa̍ā le̍nde̍ ni̍ŋ pɛ̍, ō nɔ̍ mbō hīŋ a̍ ndu̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni᷄ŋ te̍, ā yɔ᷄ŋ bɛ̍ɛ̍ mī wānā ko̍ŋ ndu̍ o̍o̍ chu̍a̍ ībūŋgā le̍ ndu̍ yɔ̄ŋgōo̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍.

¹⁹“Tē chāa̍ŋ nūm I̍sɔ̄lūɛ̍i̍nɔ̍ɔ̍ ō bīī nu̍m kūo̍o̍ o̍ bā pɛ̍, ō wa̍ i̍ka̍ni̍, ō wa̍ nyɛ̍ dīāā, kɛ̄lɛ̄ŋgāā ō wa̍ nyɛ᷅ o̍ nyɛ̄ chēle̍ŋ, ha̍ndū ba̍na̍sīi̍ o̍ nyɛ̄ o̍ bi̍ī ko̍ŋ ndo̍ chōo̍ le̍.

²⁰Tē wāna̍ lēkāa̍ ō bīī nya̍ kūo̍o̍ o̍ bā pɛ̍, ndu̍ ndu̍ lā hēndūl ndu̍ ba̍na̍sīi̍yo̍. Kɛ̍ chāa̍ŋ nūm I̍sɔ̄lūɛ̍i̍nɔ̍ɔ̍ ndu̍ ndu̍, a̍ nɔ̍ mā ha̍ndu̍ ba̍na̍sīi̍ o̍ ba̍na̍sīi̍ o̍ nyɛ̄ o̍ bi̍ī nu̍m o̍ bā wo̍ chōo̍ le̍. Ko̍ŋ to̍sā ni̍, mī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dɔ̄ū nya̍ sa̍lā o̍ nyɛ̄ o̍ nyɛ̄ ni᷄ŋ nya̍ tōsa̍ o̍ lɛ̄ŋndē nya̍ chō kɔ̄la̍ŋ bīyɔ̄ɔ̍ mī lē sīmnu᷄ŋ nyɛ᷅ nyā le̍ŋ ni᷄ŋ.

²¹“Wānā o̍ wānā tē a̍ chu̍a̍ būŋgɛ̄i̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍ pɛ̍, du̍a̍u̍nu᷄ŋ ta̍ma̍la̍ le̍ nyɛ̄ ŋ̄ chūa̍ bu̍ŋgɛ̄i̍ yo̍ tōsāa̍ le̍. Kāni̍ fo̍ndōle̍, tē a̍ chu̍a̍ būŋgɛ̄i̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍ pɛ̍, Mɛ̄lɛ̄ka̍ yēēmā nu̍m mā pe̍e̍lu̍ būŋgɛ̄ī kēŋ. Tā a̍ pe̍e̍lu̍ ndi̍ le̍, mɛ̄ɛ̍ a̍ to̍sa̍ yɔ̄ŋ wɔ̄ɔ̍ŋndo̍.

²²Tē a̍ chu̍e̍ i̍bu̍ŋgā o̍ ībūŋgā kpo̍sōŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ le̍, ko̍ŋ ve᷅ yɔ᷅ŋ wɔ̄ɔ̍ŋ te̍.

²³Kɛ̍ nyɛ̄ o̍ nyɛ̄ ŋ̄ sōli̍ŋ ni᷅ŋ o̍ sōndō pɛ̍ ma̍ chūā būŋgɛ̄i̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, māā ā chō ndu̍ tōsa̍, ki̍ndi̍ ki̍ndi̍ ō nɛ̄ī o̍ nɛ̄ī ni̍ŋ mā to̍sa̍ nyɛ̄ ŋ̄ chūa̍ ko̍ŋ bu̍ŋgɛ̄i̍ le̍ tōsāa̍ wo̍. Kāni̍ fo̍ndōlē, nūm pi̍la̍ chu̍a̍ būŋgɛ̄ī nūmnde̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ hɔ̄l ni̍, wānā o̍ wānā be̍ŋ nu̍m le̍ ndi̍ chūā le̍.

²⁴“Tē a̍ lo̍ bālɔ̄ɔ̍ pɛ̍, mā fu̍u̍lu̍u̍ o̍ kpe̍le̍ mākīle̍pīi̍ chāa̍ŋ nūmndo̍ ni᷄ŋ, ndu̍yɛ̍ yīa̍a̍ŋ mā chō nu̍m nɛ̄īyo̍, ke̍ndi̍ kīle̍pīi̍ma̍ ma̍ŋ mā dē, mɛ̄ɛ̍ mɛ̄ɛ̍ ŋ̄ yēēma̍. Kɛ̍ ke̍ndī mā dɔ̄ū o̍ kāmbɛ̍i̍yo̍ ni᷄ŋ mā kūɛ̄ a̍ ma̍ŋ chi̍e̍e̍ le̍.

²⁵O̍ ko̍ŋ kɔ̍ɔ̍lī, tē a̍ lo̍ kēlāa̍ pɛ̍, mā fu̍u̍lu̍u̍ o̍ chīɛ̄ī ŋ̄wītīi̍ chāa̍ŋ nūmnde̍ ni᷄ŋ, ndu̍yɛ̍ mī yīa̍a̍ŋ mā wa̍ nu̍m nɛ̄īyo̍, yo̍m wi̍tīi̍yo̍ŋ ŋ̄ ti᷄ŋ a̍ bā mā dē. Kɛ̍ si᷅m mu̍ŋ kīōlɔ̄ɔ̄ a̍ mūɛ̄ī kīālāā ŋ̄wi̍tīi̍ye̍ le̍ kɔ̄la̍ŋ a̍ mu̍ŋ chi̍e̍e̍ le̍.”