Read Southern Kisi Dītɔ̍nɔ̍mi̍ī 24 Bible Online

Dītɔ̍nɔ̍mi̍ī 24 - Southern Kisi bible

Dītɔ̍nɔ̍mi̍ī 24

¹Mi̍ Mūu̍sē o̍ hi̍a̍ū lāchī a̍ sūɛ̍i̍ mbo̍ dīmī āā, “Mī ī yɔ̄nu̍ŋ dɔ̍ɔ̍ mī wāŋndo̍ ō yi᷄l la̍nɔ̍ɔ̍. Kɛ̍ mī te̍le̍ŋ o̍ fu̍u̍lu̍u̍ mbō sāālu̍ŋ māā ka̍ā chūa̍a̍ ho̍ō ō bɛ̄nda̍ le̍, mbō kɛ̄ɛ̄si̍a̍a̍ le̍ ndu̍ kīɔ̍ɔ̍. O̍ ko̍ŋ kɔ̍ɔ̍lī, mbō pōōnyi̍a̍a̍ yāu̍ ba̍ŋa᷄ŋndo̍ o̍ chɔ᷅m māā chūa̍a̍ ho̍ō ō cho̍ lɛ̍ la̍a̍ ndɔ̄ le̍ wo̍, mbō ke̍ chūa̍a̍ māā ō yēēma̍ lɛ̍ a̍ ndu̍ le̍. O̍ ko̍ŋ, mī chūa̍a̍ ō mīīŋgu̍ o̍ wānāā ndūa̍a̍ lo̍.

²Kɛ̍ mī ī yɔ̄nu̍ŋ, tē chūa̍a̍ ho̍ō ō mīīŋgu̍ o̍ wānāā ndūa̍a̍ lo̍ pɛ̍, wānā pɔ̍nɔ̍ che᷅le̍ŋ ō kɔ̍ fu̍lā le̍ ndu̍, ō chūa̍ ndu̍ o̍ nɔ̄ɔ̍ ni᷄ŋ.

³Kɛ̍ mī ī yɔ̄nu̍ŋ dɔ̍ɔ̍ vɛ̍lɛ̄ mī wānā pɔ̍nɔ̍ ko̍ŋ bɛ̍ɛ̍ o̍ kɛ̍ɛ̍si̍a̍a̍ le̍ chūā kōŋ mālɔ̄ɔ̍, mī ndu̍ bɛ̍ɛ̍ o̍ ke̍ ndu̍ yāu̍ ba̍ŋa᷄ŋndo̍ o̍ chɔ᷅m māā chūa̍a̍ ho̍ō ō cho̍ lɛ̍ la̍a̍ ndɔ̄ le̍ wo̍, mī chūa̍a̍ ō mīīŋgu̍ o̍ ndu̍ lo̍. Ɔ̄ɔ̄ mī ī yɔ̄nu̍ŋ mī pɔ̍nɔ̍ ndɔ̄ di̍i̍ŋ ndɔ̄ kōŋ ō vī.

⁴O̍ nɛ̄ī o̍ nɛ̄ī ni̍ŋ, chūā kōŋ pɔ̍nɔ̍ ndɔ̄ ta̍se̍ kɛ̍ɛ̍ ndu̍ ko̍ŋ ndo̍ ō nɔ̍ lɛ̍ mbō mīŋgi̍ chūā kōŋ chūā ō nɔ̄ ni̍ŋ te̍. Mɛ̄lɛ̄ka̍ Ya̍a̍wɛ̄ɛ̄ o̍ tu̍l sūɛ̍i̍ wa̍ā le̍nde̍ le̍yɛ̍. Lā to̍sā sūɛ̍i̍ wa̍ā le̍nde̍ le̍, yɔ̄ŋi̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ kīo̍o̍ le̍ wāa̍ nyɛ̄ nyā le̍ŋ lē sīmnu᷄ŋ lɛ᷅ŋndē yɔ̄ŋ wɔ̄ɔ̍ŋ.”

⁵Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Tē wānā pɔ̍nɔ̍ɔ̍ ō chu̍a̍ la̍nɔ̍ɔ̍ sɛ̄nɛ̄ī pɛ̍, lā nɔ̍ mī lā yɔ᷄ŋ ndu̍ o̍ chɔ̄ū o̍ te̍le̍ŋ ko̍ŋ bɛ̄ŋgu̍ le̍. Wa̍li̍ lēlɛ̄ŋ bɛ̍ɛ̍ wānā ko̍ŋ ō nɔ̍ mbō tōsa̍ o̍ te̍le̍ŋ ko̍ŋ bɛ̄ŋgu̍ le̍. Wānā pɔ̍nɔ̍ ko̍ŋ, le̍ wɔ̄sīo̍o̍ ō pīlɛ̍ kpu̍lu̍ku̍u̍ ō nɔ̍ mbō tōsa̍ wa̍li̍ o̍ wa̍li̍ lēlɛ̄ŋ te̍. Ō nɔ̄ mbō wa̍ o̍ ndu̍ lo̍ chi̍ɛ̍ī ni̍ŋ la̍a̍ ndɔ̍ īkɛ̄i̍, mbō nɛ̄ŋi̍ la̍a̍ ndɔ̍ kɔ̄l.

⁶“Tē chāa̍ŋ nūm I̍sɔ̄lūɛ̍i̍nɔ̍ɔ̍ ō bīī nu̍m kūo̍o̍ o̍ bā pɛ̍, pōūtā tīɔ̍ɔ̍ŋndā o̍ chu̍ī wi̍tīi̍ŋ ndɔ᷄ŋ le̍ kōlō to̍o̍sīāā bēe̍dīi̍yo̍ tōōsīa̍a̍ la̍ŋ, bi̍ī ndu̍ ō pīlɛ̍ bɛ̍ɛ̍ o̍ bā o̍ lāndū ni᷄ŋ te̍. Kāni̍ fo̍ndōle̍, pōūtālāŋ la̍ŋ la̍ ma̍lā ndu̍ ni̍ mbō sɔ̄la̍ nyɛ̄ dīa̍a̍ ni̍.

⁷“Tē wāŋndo̍ ō chīīmbu̍u̍ chāa̍ŋ ndɔ̄ I̍sɔ̄lūɛ̍i̍nɔ̍ɔ̍ le̍ ndu̍ sīīŋgūūwo̍ chɛ̄ ndɔ̄ kɛ̄lɛ̄ŋgāā le̍ ndu̍ pīsīo̍o̍ pɛ̍, mī lā bīī ndu̍ a̍ sūɛ̍i̍ ke̍ŋ, wānā ko̍ŋ lā nɔ̄ mī lā tōsa̍ mbō sɔ̄la̍ pīɔ̍mndo̍. O̍ ko̍ŋ, mī yɔ̄ŋ wɔ̄ɔ̍ŋ kōŋ ō fūla̍ nya̍ tɛ̄ɛ̄ŋ.

⁸“Tē wāŋndo̍ ō sɔ̄la̍ nāā wɔ̄ɔ̍ŋ pūm ndu̍ lēkɔ̄ɔ̍ nya̍ tɛ̄ɛ̄ŋ pɛ̍, ō ta᷅ŋ wa̍nā wo̍, lā mānda̍ŋ a̍ sūɛ̍i̍ ndūɛ̍i̍. Wānāā sōlīāā lāsa̍lāa̍, a̍ fūla̍ o̍ yūŋgu̍ Li̍va̍īyo̍ chōo̍ wa̍, nyɛ̄ o̍ nyɛ̄ nda̍ dīmu̍l nya̍ pɛ̍ le̍ tōsāa̍ a̍ wāna̍ nāā wɔ̄ɔ̍ŋ kōŋ o̍kɔ̄ɔ̄, lā tōsa̍ ndu̍. Nyɛ̄ o̍ nyɛ̄ ya̍ I̍ di̍mu̍l nda̍ le̍ tōsāa̍ tē ā dīmu̍l nya̍ ndu̍ pɛ̍, lā tōsa̍ ndu̍.

⁹Bōōndi̍i̍ nya̍ ma᷄l I̍chi̍pī mi̍ lā wā hūnɔ̄ɔ̍ ve̍, lā lōōnu̍ŋ nyɛ᷅ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tōsa̍ a̍ Me̍e̍līām nɛ̍ī tɛ̍ɛ̄ŋ ndo̍.

¹⁰“Tē a̍ wu̍u̍ chāa̍ŋ nūm I̍sɔ̄lūɛ̍i̍nɔ̍ɔ̍ kūo̍o̍ pɛ̍, lu̍ɛ̍ī o̍ ndu̍ lo̍ chi̍ɛ̍ī ni̍ŋ mā kɔ̍ chu̍ā nyɛ̄ o̍ nyɛ̄ ndɔ̄ māā īlāndū le̍.

¹¹Chu̍m ndu̍ o̍ dīō, mī ndu̍ pi̍la̍ lu̍ɛ̍ī mbō kɔ̍ chu̍ā nyɛ̄ nya̍ chɛ̄la᷅ŋ chōo̍ le̍ mbō wa᷄ lāndēi̍ yo̍.

¹²Ndu̍yɛ̍ tē wāna̍ ŋ̄ wūu̍ ho̍ō kūo̍o̍ wo̍ wānā ta̍mbɛ̍i̍yo̍ o̍ cho̍ ni̍, mbo̍ lēndūl nu̍m kōla̍ ndɔ̄ ku̍u̍mba᷄ŋndo̍ pɛ̍, kōlā ko̍ŋ ō lɔ᷅l nu̍m o̍ bā le̍.

¹³Mīŋgi̍ ndu̍ kōlā ko̍ŋ ō bā īchɔ̄llo̍, fo̍ndōle̍, kōlā ko̍ŋ ko̍ni̍ o̍ nɔ̍ ni̍ mbō kūūmbu̍ŋ. Tē ā to̍sa̍ le̍nde̍ a̍ ndu̍ pɛ̍, ō nɔ̄lā mbō dɔ̄ū nu̍m sa̍lā. Ndu̍yɛ̍ nyɛ̍ bɛ̍nda̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ hɔ̄l lo̍, ndu̍ kpe̍e̍kpe̍i̍ ŋ̄ wā ko̍ŋ to̍sāa̍ ni̍.

¹⁴“Tē a̍ chu̍a̍ wānā ta̍mbɛ̍i̍yo̍ kɛ̄lɛ̄ŋgāā wāna̍ bāhāvɛ̍i̍yo̍ le̍ wa̍llo̍ pɛ̍, ō wa̍ chāa̍ŋ nūm I̍sɔ̄lūɛ̍i̍nɔ̍ɔ̍, ō wa̍ wa̍nāā lēkāa̍wa̍a̍ cho̍ o̍ chi̍e̍e̍ŋ nyāa̍ŋ nda̍ ō pīlɛ̍, to̍sāl ndu̍ lāka̍fā le̍.

¹⁵Nyɛ̄ o̍ nyɛ̄ nya̍ chɛ̄la᷅ŋ cho̍o̍ le̍ ndu̍ pāāwāa̍ o̍ pāa̍le̍ŋ ni᷄ŋ pɛ̍, pa̍a̍wa̍ ndu̍ lɔ̍ɔ̍ pa̍ mī pāa̍le̍ŋ le̍ de᷄l. Kāni̍ fo̍ndōle̍, wānā ta̍mbɛ̍i̍yo̍ o̍ cho̍ ni̍, ka̍ni̍i̍ ke̍ŋ o̍ ti̍i̍nda̍ŋ ni̍ le̍ nyɛ̄ ndɔ̄ di̍a̍a̍. Kɛ̍ tē a̍ pa̍a̍wa̍ ndu̍ a̍ te̍le̍ŋ ŋ̄ nɔ̄ le̍ ndu̍ pāāwāa̍ wo̍ le̍, ko̍ŋ to̍sā mbō ŋɔ̄ɔ̄cha̍ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ a̍ ndi̍ o̍kɔ̄ɔ̄, ndu̍yɛ̍ mī Mɛ̄lɛ̄ka̍ chūa̍ ndi̍ māā yɔ̄ŋ wɔ̄ɔ̍ŋ ŋ̄ tōsa̍ ni̍.

¹⁶“Tē chūā vīālāa̍ ō tɛ̄ɛ̄mbu̍u̍ sāwa̍ wāŋndo̍ ō nɔ̄ mbō sɔ̄la̍ pīɔ̍mndo̍ wo̍ pɛ̍, wānāa̍ ve̍lū ndu̍ wa̍ ā nɔ̍ mā sɔ̄la̍ pīɔ̍m le̍ chūā vīālāā kōŋ te̍. Ndu̍yɛ̍ le̍nde̍ ko̍ni̍, te̍ fi̍nyāa̍ a̍ kālāa̍ a̍ tɛ̍ɛ̍mbu̍u̍ sāwa̍ wāŋndo̍ ō nɔ̄ mbō sɔ̄la̍ pīɔ̍mndo̍ wo̍ ni̍, chūāūwāā ndāa̍ ā nɔ̍ mā sɔ̄la̍ pīɔ̍m le̍ nyɛ̄ wānāa̍ ve̍lū nda̍ wa̍ ā tōsa̍ wo̍ le̍. Wāna̍ tɛ̍ɛ̍mbūū sa̍wāa̍ wo̍, ndu̍ nɔ̍ ni̍ mbō sɔ̄la̍ pīɔ̍mndo̍.

¹⁷“Wāna̍ lēkāa̍ ni̍, vīi̍ ni̍, lā to̍sāl nda̍ ka̍fāla̍ŋ o̍ di̍la̍ ndāla̍ŋ chōo̍ mī lā kīlu̍l nda̍ yāma᷅ŋ lāka̍fa᷄ŋ te̍. Ndu̍yɛ̍ tē wānā la̍nɔ̍ vi̍i̍ nɔ̍ lɛ̍ pɔ̍nɔ̍ le̍ wo̍ ō bīī nu̍m kūo̍o̍ o̍ bā pɛ̍, bi̍ī ndu̍ kōla̍ ndɔ̄ ku̍u̍mba᷄ŋndo̍ o̍ bā o̍ lāndēi̍ ni᷄ŋ te̍.

¹⁸Lā lōōnu̍ŋ māā chīa̍a̍ nya̍ wa̍ sīndɛ̄ I̍chi̍pī ni̍, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō bāŋā nya̍ o̍ chɛ̄lē lēŋ ni᷄ŋ. Le̍ sa̍bū kōŋ kpe̍e̍kpe̍i̍ ya̍ I̍ cho̍ nya̍ dīmūllo̍ ni̍ māā lā nɔ̄ mī lā chūa̍ sāwāa̍ ho̍ō.

¹⁹“O̍ ko̍ŋ kɔ̍ɔ̍lī, tē ā kēlū wi̍tīi̍ŋ nu̍mndo̍ŋ pɛ̍ mā wa̍ mu̍ŋ vīlīo̍o̍, kpɔ̄ŋ o̍ kpɔ᷄ŋ ŋ̄wi̍tīi̍ ŋ̄ pūɛ̄ɛ̄nu̍ŋ ni᷅ŋ kɔ̄ɔ̄lī pɛ̍, mi̍i̍ŋgū lɛ̄ ndu̍ nūūwā le̍. Wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, a̍ vīi̍ya̍a̍ nɔ̍ lɛ̍ ŋ̄fi̍nyā le̍ wa̍, a̍ wāŋ lāāndūāā pīāāndāā ndāa̍ ā vī wa̍, nda̍ nɔ̍ ŋ̍ lo᷅ mu̍ŋ kɔ̍ɔ̍lī wo̍ŋ ni̍. Lā nɔ̄ mī lā me᷄l nda̍ mu̍ŋ. Ko̍ŋ to̍sa̍ ni̍ mī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dɔ̄ū nya̍ sa̍lā o̍ nyɛ̄ o̍ nyɛ̄ ni᷄ŋ nya̍ tōsa̍.

²⁰Tē a̍ ke̍ndi̍ ɔ̄li̍fīi̍mā nūmnda̍ŋ o̍ kpe̍le̍ nu̍mndo̍ ni᷄ŋ pɛ̍, mi̍i̍ŋgū lɛ̄ mā pɔ̄mpɔ̍mbɔ̄ma̍ lo̍ kɔ̄ɔ̄lī wa̍ŋ nūūwā le̍. Wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, a̍ vīi̍ya̍a̍ nɔ̍ lɛ̍ ŋ̄fi̍nyā le̍ wa̍, a̍ wāŋ lāāndūāā pīāāndāā ndāa̍ ā vī wa̍, nda̍ nɔ̍ ma̍ŋ ni̍.

²¹Tē a̍ ke̍ndi̍ kīle̍pīi̍ma̍ nu̍mnda̍ŋ o̍ chīɛ̄ī nūmnde̍ ni᷄ŋ pɛ̍, mi̍i̍ŋgū lɛ̄ mā pɔ̄mpɔ̍mbɔ̄ma̍ lo̍ kɔ̄ɔ̄lī wa̍ŋ nūūwā le̍. Wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, a̍ vīi̍ya̍a̍ nɔ̍ lɛ̍ ŋ̄fi̍nyā le̍ wa̍, a̍ wāŋ lāāndūāā pīāāndāā ndāa̍ ā vī wa̍, nda̍ nɔ̍ ma̍ lo̍ ma̍ŋ kɔ̍ɔ̍lī wa̍ŋ ni̍.

²²Lā lōōnu̍ŋ māā nya̍ bɛ̍ɛ̍ chīa̍a̍ nya̍ wa̍ sīndɛ̄ o̍ lɛ̄ŋndē I̍chi̍pīle̍ŋ ni᷄ŋ ni̍. Le̍ sa̍bu̍ kōŋ kpe̍e̍kpe̍i̍ ya̍ I̍ cho̍ nya̍ dīmūllo̍ ni̍ māā lā nɔ̄ mī lā sāwāa̍ ho̍ō.”