Read Southern Kisi Dītɔ̍nɔ̍mi̍ī 25 Bible Online

Dītɔ̍nɔ̍mi̍ī 25 - Southern Kisi bible

Dītɔ̍nɔ̍mi̍ī 25

¹“Mī ī yɔ̄nu̍ŋ dɔ̍ɔ̍ mī wānāā ŋīɔ̍ɔ̍ŋ ā kēla̍ o̍ īsɔ̄ɔ̍ cho̍o̍ mā kūɛ̄ kɔ̍ɔ̍sɔ̍ɔ̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ. O̍ ko̍ŋ, mī māsāa̍ cho̍ le̍ sɔ̄ɔ̍ŋ dīmīo̍o̍ wa̍ ā mɛ̄ɛ̄ndi̍a̍ŋ o̍ sūɛ̍i̍ ke̍ŋ ni᷄ŋ mā sāālu̍ŋ māā wāŋndo̍ ō pīlɔ̍ɔ̍ ō nɔ̍ di̍ le̍ mā yāāla̍ ndu̍.

²Tē ō wa̍ pɛ̍ māā sāwa̍ wānā ko̍ŋ ō tɛ̄ɛ̄mbu̍u̍ ko̍ŋ ndo̍, māā lɔ̄ɔ̍ o̍ nɔ̍ le̍ sɔ̄lāa̍ ni̍, māsa̍ kɔ̍ɔ̍sā a̍ wāŋnda̍ wo̍, ō nɔ̄ mbō dīmu̍l wānā ko̍ŋ mbō hīni̍ lɛ̄ŋ o̍ kɔ̄l chōo̍. O̍ ko̍ŋ, mā lɔ̄ɔ̄ wānā ko̍ŋ māsa̍ kɔ̍ɔ̍sā ko̍ŋ a̍ wāŋnda̍ wo̍ o̍ hɔ̄l lo̍ŋ. Wānā ko̍ŋ ō nɔ̄ mbō sɔ̄la̍ lɔ̄ɔ̍ mɛ̄ɛ̍ i̍ cho̍ ī dīmīāā le̍ lɔ̄ɔ̍ sɔ̄lāa̍ le̍ nyɛ̄ o̍ to̍sa̍ ko̍ŋ ndo̍ yɛ̍.

³Kɛ̍ mɛ̄ɛ̍ mɛ̄ɛ̍ wāna̍ ko̍ŋ ō sɔ̄la̍ lɔ̄ɔ̍, ō nɔ̍ mbō sɔ̄la̍ lɔ̄ɔ̍ mbō hīōū be̍le̍-hi̍ɔ̍ɔ̍lu̍ le̍. Tē ō hīōū be̍le̍ hi̍ɔ̍ɔ̍lo̍o̍ chōo̍ pɛ̍, mɛ̄ɛ̍ bɛ̄ɛ̄la̍ŋ nda̍ wā ndu̍ la̍ŋ tɛ̍ɛ̍mbūūwo̍ wāŋnda̍ o̍ hɔ̄l ni̍.

⁴“Wānā o̍ wānā, si̍mī na̍ūwo̍ wi̍tīi̍ŋ nu̍mndo̍ŋ nɛ̄īyo̍ mā yi̍i̍ nyɔ̄ɔ̍ ndu̍ o̍ sōndō māā ō di̍ā nyɛ̄ dīāā le̍ le̍.”

⁵Mi̍ Mūu̍sē o̍ hi̍a̍ū lāchī a̍ sūɛ̍i̍ mbo̍ dīmī āā, “Tē ō wa̍ pɛ̍ mi̍ pɔ̄mbɔ̄ɔ̍ a̍ bɛ̄ndōo̍ ā wā nāa̍ pi᷅lɛ̍, mi̍ ī yɔ̄nu᷄ŋ mi̍ o̍ cho̍ wānā ba̍nāa̍ wo̍ ō vī, kɛ̍ ndu̍yɛ̍ mbō vīlu̍ po̍ a̍ la̍nɔ̍ ko̍ŋ te̍, la̍a̍ ndɔ̄ ko̍ŋ, ō nɔ̍ mbō cha᷄l wānā che᷅le̍ŋ o̍ bā ō nɔ̄ ni̍ŋ te̍. Pɔ̍nɔ̍ ndɔ̄ ko̍ŋ, pɔ̄mbɔ̄ ndɔ̄ ndu̍ nɔ̍ ni̍ mbō chūa̍ ndu̍ o̍ nɔ̄ɔ̍ ni᷄ŋ. Ndu̍ i̍ cho̍ kūēē ni̍ le̍ ndu̍ chūa̍a̍ o̍ nɔ̄ɔ̍ ni᷄ŋ.

⁶Ndu̍yɛ̍ tē ō chu̍a̍ ndu̍ o̍ nɔ̄ɔ̍ ni᷄ŋ pɛ̍, po̍ tāse̍ chūā kōŋ ō chō ndu̍ vīlūl lo̍, bɛ̄ ndɔ̍ vi᷅ ko̍ŋ ndo̍, dīōlā ndɔ̄la̍ŋ o̍ nɔ̍ ni̍ mbō hāndu̍ po᷄ ko̍ŋ chōo̍. Ko̍ŋ to̍sā ni̍, mī dīōla̍ bɛ̄ ndɔ̄ ko̍ŋ lā hīōū lāchī a̍ wāa̍ I̍sɔ̄lūɛ̍i̍ya̍ tɛ̍ɛ̍ŋ.

⁷Kɛ̍ te̍ po̍ vi᷅ ko̍ŋ ndo̍ pɔ̄mbɔ̄ ndɔ̄ ko̍ŋ ō kɛ̄ɛ̍ le̍ chūa̍a̍ ho̍ō chūa̍a̍ o̍ nɔ̄ɔ̍ ni᷄ŋ pɛ̍, chūā kōŋ ō nɔ̄ mbō kōma̍l wāŋ bɛ̄ndūāā chīe̍e̍ya̍ o̍ dīō sāāsa̍ chīo̍o̍ sōndōo̍. Tē ō kūɛ̄ pɛ̍ ō kɔ̍ di̍mūl wāŋ bɛ̄ndūāā chi̍e̍e̍ya̍ āā, ‘Pɔ̍nɔ̍ ni̍ vi᷅ wo̍, pɔ̄mbɔ̄ ndɔ̍ nɔ̍ le̍ ya̍ lōōwo̍ mbō tōsa̍ mī dīōla̍ bɛ̄ ndɔ̄la̍ŋ lā hīōū lāchī a̍ wāa̍ I̍sɔ̄lūɛ̍i̍ya̍ tɛ̄ɛ̄ŋ ndo̍ ō kɛ̄ɛ̍ le̍ ya̍ lōōwo̍. Ndu̍yɛ̍ ndu̍ i̍ cho̍ kūēē ni̍ mbō lōo̍ ya̍ kɛ̍ ō kɛ̄ɛ̍.’

⁸O̍ ko̍ŋ kɔ̍ɔ̍lī, mī wāŋ bɛ̄ndūāā chi̍e̍e̍ya̍ ā vēēlu̍ po̍ vi᷅ ko̍ŋ ndo̍ pɔ̄mbɔ̄ ndɔ̄, mā nyūna̍ ndu̍. Tē ō kɛ̄ɛ̍ nda̍ o̍ hɔ̄l pɛ̍ mbō dīmi̍ māā ō cho̍ chu̍a̍a̍ ho̍ō lōō le̍,

⁹chūa̍a̍ chɛ᷄ŋ ō kūɛ̄ nāa̍ pōo̍ ho̍ō ō chō īsīsi̍ wa᷅ŋ bɛ̄ndūāā chi̍e̍e̍ya̍ lāchī wa̍. Tē ō kūɛ̄ pɛ̍, ō kɔ̍ so̍lī pōo̍ kɔ̄vɛ̄i̍yo̍ o̍ īpēlū, o̍ ko̍ŋ kɔ̍ɔ̍lī, ō tūfū pōo̍ lɔ̄lūa̍ŋ o̍ hɔ̄l. Ō lo̍ ko̍ŋ ō dīmu̍l pōo̍ wāŋ bɛ̄ndūa̍a̍ o̍ hɔ̄l lo̍ŋ āā, ‘Wānā pɔ̍nɔ̍ kɛ̍ɛ̄ le̍ bɛ̄ ndɔ̍ vi᷅ wo̍ chīɛ̄ī ndɔ̄ɔ̍ sīmīo̍o̍ wo̍, nu̍a̍ā nda̍ nɔ̄ ni̍ mā bīī ndu̍.’

¹⁰Ndu̍yɛ̍, po̍ kɛ̍ɛ̄ ko̍ŋ le̍ chūā kōŋ lōōwo̍ wo̍, o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍, nu̍a̍ā wāŋnda̍ ā nɔ̄ ni̍ mā vēēlu̍ yu̍ŋgu̍ ndɔ̄ɔ̍ āā, ‘Po̍ kɛ̍ɛ̍ le̍ la̍nɔ̍ɔ̍ bɛ̄ ndɔ̍ lōōwo̍ ma̍ sōlī ndu̍ kɔ̄vɛ̄i̍yo̍ o̍ īpēlū wo̍, yu̍ŋgu̍ ndɔ̄ɔ̍.’ ”

¹¹Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Tē pūa̍a̍ ā ŋīɔ̍ɔ̍ŋ ā wa̍ sɔ̍ŋgɔ̄ɔ̍ pɛ̍, mī pōo̍ ō pīlɔ̍ɔ̍ la̍a̍ ndɔ̄ o̍ sɔ̍ɔ̍ŋgu̍u̍ le̍ pɔ̍nɔ̍ ndɔ̍ mālāa̍, mbō lo̍ o̍ ko̍ŋ mbō sāa̍ po̍ cho̍ sɔ̍ŋgɔ̄ɔ̍ a̍ pɔ̍nɔ̍ ndɔ̄ wo̍ tūūwo̍ pɛ̍,

¹²chūā kōŋ lā nɔ̄ mī lā kēlū ndu̍ bāa̍. Īnyīɛ̍ɛ̍ o̍ īnyīɛ̍ɛ̍ bi̍ī nya̍ le̍ ndu̍ le̍.

¹³“Wānā o̍ wānā tē a̍ wa̍ chāa̍ŋ nu̍m wɔ̄ŋgūla̍ŋ lēndūllo̍ o̍ sēke̍lēi̍yo̍ pɛ̍, a̍ nɔ̍ mā to̍sa̍l ndu̍ lāka̍fā le̍. Ā nɔ̄ mā wa̍ sa̍kpō a̍ ndu̍ o̍ wɔ̄ŋgūlālāŋ ni᷄ŋ.

¹⁴A̍ nɔ̍ mā nɔ̄ nyɛ̄lā ŋ̄ tūūlūl wa᷅ŋnda̍ wɔ̄ŋgūla̍ŋ lēni᷄ŋ nda̍ŋ lā tīɔ̍ɔ̍ŋ o̍ nūmndo̍ chi̍ɛ̍ī ni̍ŋ, ō bɛ̄ndōo̍ lē pīōndɔ̄ɔ̍ lēni᷄ŋ, a̍ ō pɔ̄mbɔ̄ɔ̍ le̍ pēsīo̍o̍ lēni᷄ŋ te̍.

¹⁵Sēke̍lēi̍ ŋ̄ nɔ̄ le̍ wɔ̄ŋgūla̍ŋ hāndɔ̄ɔ̍ lēchōo̍ wo̍, ō nɔ̄ mbō wa̍ sēke̍lēi̍ kpe̍e̍kpe̍i̍yo̍, ō wānā to̍sā la̍ka̍fā o̍ lāka̍fā a̍ ndu̍ le̍ wo̍. Ndu̍yɛ̍ nyɛ̄ tūwāā ŋ̄ nɔ̄ mā tu̍u̍lu̍l wāŋnda̍ wɔ̄ŋgūla̍ŋ lēni᷄ŋ ndo̍ bɛ̍ɛ̍ ō nɔ̍ mbō wa̍ nyɛ̄ tūwāā lāka̍fā le̍. Tē lā tōsa̍ wɔ̄ŋgūla̍ŋ o̍ nɛ̄ī sa̍kpō wāā nu̍a̍ā ni᷄ŋ pɛ̍, vīōūwɔ̄ɔ̍ nya̍ vīāū yo̍o̍mū o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ kīo̍o̍ le̍ŋ ni᷄ŋ ni̍.

¹⁶Wānā o̍ wāna̍ cho̍ wāna̍ lāka̍fā, mbō tōsāl wa᷅ŋnda̍ ka̍fāla̍ŋ o̍ wɔ̄ŋgūla̍ŋ tūūwo̍ ni᷄ŋ, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tu᷄l ndu̍ lēyɛ̄.”

¹⁷Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Wāŋnda̍ I̍sɔ̄lūɛ̍i̍, lā lōōnu̍ŋ nyɛ᷅ Āma̍la̍kāi̍tīi̍ya̍ ā to̍sa̍ a̍ nya̍ bōōndi̍i̍ nya̍ ma᷄l I̍chi̍pī mi̍ lā wā hūnɔ̄ɔ̍ ve̍.

¹⁸Bōōndi̍i̍ nya̍ ma᷄l I̍chi̍pī mi̍ lā wā hūnɔ̄ɔ̍ ve̍, lā wa̍ ā sa̍ŋgɛ̍i̍ya̍ a̍ kɔ̄la̍ŋ, yōōmūle̍ŋ bɛ̍ɛ̍ nya̍ a̍a̍ nɔ̍ le̍ŋ te̍, mi̍ wāŋnda̍ ha̍ā ā bīī kɔ̄llo̍, īsīōōŋ bɛ̍ɛ̍ ā yɔ᷄ŋ le̍ Mɛ̄lɛ̄ka̍ Ya̍a̍wɛ̄ɛ̄ le̍, ma̍ chīŋa̍la᷅ŋ nya̍ a̍ ma̍kɔ̄ɔ̄. I̍sɔ̄lūɛ̍i̍ya̍a̍ nda̍ a̍a̍ lo̍ nu̍a̍ā kɔ̄ɔ̄lī, ā wa᷄ hūnɔ̄ɔ̍ le̍nde̍ a̍ sa̍ŋgɛ̍i̍ya̍ wa̍, mi̍ wāŋnda̍ ha̍ā ā dīū nda̍ kpo̍u̍.

¹⁹Le̍la̍ŋ te̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ke̍ nya̍ lɛ̄ŋndē o̍ chu̍e̍l nya̍ būŋgɛ̄i̍ le̍ nya̍ kīo̍o̍ le̍ŋ pɛ̍, ndu̍yɛ̍ mbō tōsa̍ mī lā pɛ̄ŋgi̍ a̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ nyāa̍ cho̍ nya̍ ā bālāā wa̍, mī lā wānu̍ŋ ni᷅ŋ o̍ kɔ̄l nyūlū ni᷄ŋ pɛ̍, Āma̍la̍kāi̍tīi̍ya̍ ha̍ā, lā dīu̍ nda̍ mī lā bāsu̍ nda̍ tɛ̍ɛ̍, mī lā tōsa̍ wānā o̍ wānā yi̍yāŋ ndɛ̍ bɛ̍ɛ̍ a̍ nda̍ o̍kɔ̄ɔ̄ o̍ chi̍e̍ēŋndo̍ chōo̍ le̍. Lā pu̍ɛ̍ɛ̍nu᷄ŋ nyɛ᷅ ya̍ I̍ di̍mu̍l nya̍ ho̍ō wo̍ le̍.”