Read Southern Kisi Dītɔ̍nɔ̍mi̍ī 26 Bible Online

Dītɔ̍nɔ̍mi̍ī 26 - Southern Kisi bible

Dītɔ̍nɔ̍mi̍ī 26

¹Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Tē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō hu᷄ŋ ke᷅ nya̍ lɛ̄ŋnde̍ŋ nde᷅ŋ pɛ̍, mī lā bīī le̍ŋ mī lā wa̍ ni᷅ŋ īchāli̍ lo̍ŋ,

²ndu̍yɛ̍ mī lā kāndu̍ chīɔ̄ɔ̄ŋ nyāa̍ŋ a̍ kpe̍le̍la̍ nyāla̍ŋ tōsāa̍ pɛ̍, wānā o̍ wānā ō tāse̍ ŋ̄ chō kōūwɔ̄ɔ̄ o̍ chīɛ̄ī nūmnde̍ ni᷄ŋ kɛ̄lɛ̄ŋgāā mā ke̍ndi̍ o̍ kpe̍le̍ nu̍mndo̍ ni᷄ŋ ndo̍, ā nɔ̄ mā dɔ̄ū ndu̍ o̍ kāmbɛ̍i̍yo̍ ni᷄ŋ mā kūɛ̄ a̍ ndu̍ o̍ fo̍ndā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō hɛ̄lī ni̍ŋ le̍ ndu̍ sōōlūūwo̍ lo̍ŋ ndo̍.

³Tē ā kūɛ̄ a̍ ndu̍ lo̍ŋ pɛ̍, a̍ kɔ̍ ke᷅ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍, o̍ cho̍ wā wa̍llo̍ lo̍ŋ a̍ te̍le̍ŋ ko̍ŋ ndo̍. A̍ di̍mu̍l ndu̍ āā, ‘I̍ hi᷅ŋ a̍ tɔ̄lɔ̄ɔ̍ ho̍ō le̍ mī di̍mu̍l Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, māā I̍ fu̍u̍lu̍u̍ o̍ lɛ̄ŋndē o̍ chu̍e̍l fi̍nyāā nāā ma̍māa̍ būŋgɛ̄i̍ sīndɛ̄ le̍ na̍a̍ kīo̍o̍ le̍ŋ ni᷄ŋ.’

⁴“O̍ ko̍ŋ, mī wāna̍ so̍lī ko̍ŋ sa̍lāa̍ o̍ Mɛ̄lɛ̄ka̍ lo̍ wo̍ ō bīī tɔ̄lɔ̄ɔ̄ kōŋ nu̍m o̍ bā o̍ kāmbɛ̍i̍yo̍ ni᷄ŋ, mbō kɛ̄si̍ ndu̍ ma̍āŋ Mɛ̄lɛ̄ka̍ Ya̍a̍wɛ̄ɛ̄ wo̍ lāchī, Mɛ̄lɛ̄ka̍ nyāa̍.

⁵O̍ ko̍ŋ kɔ̍ɔ̍lī, nu̍m ku̍ɛ̄ ko̍ŋ a̍ tɔ̄lɔ̄ɔ̄ kōŋ ndo̍ mā si̍m ma̍āŋ Mɛ̄lɛ̄ka̍ Ya̍a̍wɛ̄ɛ̄ wo̍ lāchī lo̍ŋ, Mɛ̄lɛ̄ka̍ nyāa̍, mā di̍mi̍ dīōmnda̍ŋ nda᷅ŋ āā, ‘A̍lūāme̍ēnɔ̄ɔ̍ ō ndu̍ o̍o̍ nɔ̍ na̍a̍ cha̍lāā le̍ wo̍ fi̍nyā nī ma̍māa̍ o̍ wa̍ ni̍, bālɔ̄ɔ̍ o̍ fo̍ndāŋnda̍ŋ. Mbo̍ lō o̍ ko̍ŋ mbo̍ tūūsū mbo̍ kūā o̍ lɛ̄ŋndē I̍chi̍pīle̍ŋ ni᷄ŋ mbo̍ kɔ̍ cha᷅l lo̍ŋ māā wāna̍ lēkāa̍. Wānāā o̍ ku̍ɛ̄ a̍ nda̍ kɔ̍ɔ̍lī, fūlāa̍ o̍ yu̍ŋgu̍ ndɔ̄ɔ̍ chōo̍ ma̍ kɔ̍ cha᷅l lo̍ŋ nda̍, ā ve̍ bɛ̍ɛ̍ ku̍ndā bɔ̄ɔ̍ le̍. Kɛ̍ ma̍ sīmnu᷄ŋ ka̍a̍le̍ bɛ̍ndū ndu̍yɛ̍ ma̍ wā kāa̍le̍ kpāāyāle̍ bɛ̄ndū.

⁶Mi̍ wāŋnda̍ I̍chi̍pī a̍ lo᷅ o̍ ko̍ŋ ma̍ bīī na̍a̍ bīyɔ̄ɔ̄ wɔ̄ɔ̍ŋndo̍, ma̍ yɔ̄ɔ̄kpīāā na̍a̍ yɔ̄ɔ̄kpīa̍a̍ pīla̍ a̍ nda̍ wa̍lta̍ŋ tōsāllo̍, ma̍ hāndū na̍a̍ wōlɔ̄ɔ̄lā lūsu̍lɛ̍i̍la̍ bɛ̍ndūla̍ŋ chōo̍.

⁷Mi̍ ŋ̄ lō o̍ ko̍ŋ mi̍ ŋ̄ kōŋūl nāa̍ nūm Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā nāā ma̍māa̍ nda̍ a̍a̍ pi̍ɛ̍īyo̍ chūā le̍ mālāa̍, ndu̍yɛ̍ mi̍ nūm Mɛ̄lɛ̄ka̍ Ya̍a̍wɛ̄ɛ̄ tu̍ɛ̍ī pīɛ̄īlē nāāle̍ŋ, ma̍ chā sāŋgā nda̍ wa̍ na̍a̍ tūsīo̍o̍ chōo̍ wo̍, a̍ yɔ̄ɔ̄kpīāā nda̍ wa̍ na̍a̍ wo̍, ndu̍yɛ̍ a̍ nyɛ̄ pālāā nda̍ wa̍ na̍a̍ hāndɔ̄ɔ̍ chōo̍ wo̍.

⁸Ndu̍yɛ̍ a̍ kpāāyā nu̍m bɛ̄ndōo̍, mi̍ nūm Mɛ̄lɛ̄ka̍ Ya̍a̍wɛ̄ɛ̄ to̍sā sɔ̄ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ, a̍ sɔ̄ɔ̍ŋ lākpālo᷄ŋ, ndu̍yɛ̍ a̍ sɔ̄ɔ̍ŋ ŋ̄sīōōŋ bɛ̄ndo᷄ŋ le̍ sa̍bū nāa̍, ma̍ lō o̍ ko̍ŋ ma̍ bāŋā na̍a̍ o̍ chɛ̄lēlēŋ ni᷄ŋ I̍chi̍pī.

⁹O̍ ko̍ŋ kɔ̍ɔ̍lī, ma̍ hūŋ a̍ na̍a̍ o̍ fo̍ndāa̍ ho̍ō, ma̍ hu᷄ŋ ke᷅ na̍a̍ lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ.

¹⁰Le̍la̍ŋ Mɛ̄lɛ̄ka̍ Ya̍a̍wɛ̄ɛ̄, tɔ̄lɔ̄ɔ̄lā ŋ̄ ke̍ ya̍ o̍ lɛ̄ŋnde̍ŋ nde᷅ŋ ni᷄ŋ nda̍ŋ, nūm ya̍ I̍ chu̍u̍ lā tāse̍la̍ŋ nda᷅ŋ ni̍ māā kē.’ “O̍ ko̍ŋ kɔ̍ɔ̍lī, nu̍m ku̍ɛ̄ ko̍ŋ a̍ tɔ̄lɔ̄ɔ̄lā lāŋ ndo̍, mā kɛ̍si̍ la̍ŋ ma̍āŋ Mɛ̄lɛ̄ka̍ Ya̍a̍wɛ̄ɛ̄ wo̍ lāchī, Mɛ̄lɛ̄ka̍ nyāa̍, ndu̍yɛ̍ mā so̍o̍lu̍u̍ ndu̍ o̍ ma̍āŋ kōŋ lāchī lo̍ŋ.

¹¹O̍ ko̍ŋ kɔ̍ɔ̍lī, nu̍m ku̍ɛ̄ ko̍ŋ a̍ tɔ̄lɔ̄ɔ̄lā lāŋ ndo̍ nya̍ yu̍ŋgu̍ nu̍mndo̍ mī lā tōsa̍ kɔ̄l kɛ̄ndɛ̄ bɛ̄ndōo̍ lo̍ŋ, lātūlu̍ a̍ Li̍va̍īya̍ ndu̍yɛ̍ a̍ wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, fo̍ndōle̍, le̍ sɔ̄ɔ̍ŋ kɛ̍ndɛ̄ŋ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ to̍sa̍l nu̍m nya̍ yu̍ŋgu̍ nu̍mndo̍ wo̍ŋ.

¹²“O̍ ko̍ŋ kɔ̍ɔ̍lī, te̍ wɔ̄sīlā tīɔ̍ɔ̍ŋ o̍ wɔ̄sīlā tīɔ̍ɔ̍ŋ lā hīōū pɛ̍, o̍ yāa̍ ndɔ̄ɔ̍, nyɛ̄ o̍ nyɛ̄ nya̍ chō kē lēbōllo̍ sōlī o̍ chīɔ̄ɔ̄ŋ nyāa̍ŋ ni᷄ŋ, a̍ o̍ kpe̍le̍la̍ nyāla̍ŋ ni᷄ŋ, lā nɔ̄ mī lā ke̍ Li̍va̍īya̍ a̍ wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, a̍ vīi̍ya̍a̍ nɔ̍ lɛ̍ ŋ̄fi̍nyā le̍ wa̍, ndu̍yɛ̍ a̍ wāŋ lāāndūāā pīāāndūāā ndāa̍ ā wū wa̍. Wāŋnda̍ ha̍ā o̍ chi̍e̍e̍ o̍ chi̍e̍e̍ nda̍ chō nya̍ tɛ̄ɛ̄ŋ, ā nɔ̄ mā sɔ̄la̍ nyɛ̄ dīa̍a̍ mɛ̄ɛ̍ kpɛ̍ nda̍ yēēmā le̍ dīo̍o̍ yɛ̍. Ndu̍yɛ̍ tē lā chīi̍ kēlā lēbōlta̍ŋ nda᷅ŋ sōlī pɛ̍, mī lā ke̍ nda̍,

¹³wānā o̍ wānā si̍m Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ hɔ̄l ō dīmi̍ āā, ‘Kē lēbo᷄l cho̍ ō yɔ̄ŋga᷄ŋ o̍ nūmndo̍ mbo̍ wā ya̍ bā wo̍, I̍ chi̍i̍ ndu̍ sōlī o̍ ya̍lo̍ chi̍ɛ̍ī ni̍ŋ ndu̍yɛ̍ mi̍ ke᷅ Li̍va̍īya̍, a̍ wānāā lēkāa̍wa̍a̍ cho̍ na̍a̍ tɛ̍ɛ̍ŋ nda̍, a̍ vīi̍ya̍a̍ nɔ̍ lɛ̍ ŋ̄fi̍nyā le̍ wa̍, o̍ ko̍ŋ kɔ̍ɔ̍lī, a̍ wāŋ lāāndūāā pīāāndāā ndāa̍ ā wū wa̍, mɛ̄ɛ̍ ŋ̄ dīmu̍l la̍ le̍ tōsāa̍ yɛ̍. Nyɛ̄ o̍ nyɛ̄ ŋ̄ dīmu̍l la̍ a̍ kē lēbōllo̍ yɔ̄ŋgōo̍ o̍kɔ̄ɔ̄, I̍ so̍li̍ nu̍m dīōm kɛ̄lɛ̄ŋgāā mī pu̍ɛ̍ɛ̍nu̍ŋ le̍ ndu̍ tōsāa̍ le̍.

¹⁴Bīīsi̍ kōma̍l la̍ mī fa̍ŋa̍ kē lēbōl nu̍mndo̍ o̍ ti᷄ŋ mī hi̍vi̍ o̍ bīīsi̍ kōŋ ni᷄ŋ te̍. I̍ so̍li̍ bɛ̍ɛ̍ ke᷅ lēbōl kālāa̍ o̍ ya̍lo̍ chi̍ɛ̍ī ni̍ŋ bōōndi̍i̍ ya̍ I̍ si̍mnu᷄ŋ o̍ nɔ̍ɔ̍lɛ̍i̍ nu᷅m Mɛ̄lɛ̄ka̍ o̍ hɔ̄l lo̍ le̍, kɛ̄lɛ̄ŋgāāle̍ mī chu̍a̍ bɛ̍ɛ̍ o̍ ti̍ŋ mī yɔ̍ŋgu̍ ndu̍ o̍ ŋ̄wāŋ vīlɛ̍i̍ya̍ lo̍. Nyɛ̄ o̍ nyɛ̄ ŋ̄ dīmu̍l la̍ a̍ kē lēbōl nūmndo̍ o̍kɔ̄ɔ̄, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, ō pīlɛ̍ bɛ̍ɛ̍ I̍ me̍l ndu̍ lɛ̄ŋ te̍. I̍ chi̍i̍ nyɛ̄ o̍ nyɛ̄ ŋ̄ dīmu̍l la̍ tōsā.

¹⁵Le̍la̍ŋ, to̍fa̍ lɛ᷅ŋ na̍nu᷄ŋ Mɛ̄lɛ̄ka̍ nūu̍, nāa̍ ŋ̄ chō īchāli̍ o̍ cha᷄lta̍ nu̍mndā dīāndāāla̍ŋ chōo̍ cho̍o̍ wa̍, mā dɔ̄ū wānāā nūmnda̍ I̍sɔ̄lūɛ̍i̍ sa̍lā, ndu̍yɛ̍ mā dɔ̄ū vɛ̄lɛ̄ lɛ̄ŋnde̍ŋ sa̍lā, lɛ̄ŋndē ŋ̄ chūe̍l le᷅ŋ fi̍nyāā nāā ma̍māa̍ būŋgɛ̄i̍ ma̍ kē na̍a̍ le̍ŋ, le̍ŋ le̍ yɔ̍nūŋ ni̍ māā lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ.’ ”

¹⁶Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, ō chīi̍ nya̍ pāa̍le̍ hāūle̍ŋ nde᷅ŋ dīmūl māā nyɛ̄ o̍ nyɛ̄ sāwāla̍ ndɔ̄la̍ŋ a̍ pɛ̄ɛ̄kūlā ndɔ̄la̍ŋ lā dīmi̍ le̍ to̍sāa̍, lā mānda̍ŋ mī lā tōsa̍ ndu̍ o̍ nɛ̄i̍ sa̍kpōo̍ chōo̍ a̍ kɔ̄ltā nyāla̍ŋ ndu̍yɛ̍ a̍ yīya᷄ŋnda̍ nyāla̍ŋ kpo̍u̍.

¹⁷Ndu̍yɛ̍ nya̍ pi̍la̍ bɛ̍ɛ̍ lā dīmi̍ a̍ sōndōlā nyāla̍ŋ pāa̍le̍ hāūle̍ŋ nde᷅ŋ kpe̍nde̍ke̍le̍ māā Mɛ̄lɛ̄ka̍ Ya̍a̍wɛ̄ɛ̄, ndu̍ cho̍ Mɛ̄lɛ̄ka̍ nyāa̍ ni̍. Ndu̍yɛ̍ mi̍ lā chūā būŋgɛ̄i̍, māā lā chō nɛ̄i̍ ndɔ̄ɔ̍ tōlɔ̄ɔ̄ kɔ̄ɔ̄lī, mī lā tōsa̍ nyɛ̄ o̍ nyɛ̄ sāwāla̍ ndɔ̄la̍ŋ a̍ pɛ̄ɛ̄kūlā ndɔ̄la̍ŋ lā dīmi̍ le̍ tōsāa̍, ndu̍yɛ̍ mī lā tūēī ndu̍ dīōm mī lā tōsa̍ nyɛ̄ o̍ nyɛ̄ o̍ di̍mu̍l nya̍ le̍ to̍sāa̍.

¹⁸Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ chɛ̍l nya̍ pāa̍le̍ hāūle̍ŋ nde᷅ŋ mɛ̄ɛ̍ o̍ chu̍e̍l nya̍ būŋgɛ̄i̍ yɛ̍, māā nya̍ cho̍ wānāā ndūāā kpe̍e̍kpe̍i̍ya̍ ni̍, ndu̍yɛ̍ mbo̍ wā nya̍ dīmūllo̍ māā nyɛ̄ o̍ nyɛ̄ sāwāla̍ ndɔ̄la̍ŋ lā dīmi̍ le̍ to̍sāa̍ māā nya̍ wa̍ ndu̍ tōsāa̍.

¹⁹Ō dīmi̍ māā tē nya̍ tōsa̍ ke̍ŋ pɛ̍, ō chō nya̍ hēēlū te̍mā, hēēlōo̍ nya̍ mbō hīōū kāa̍la̍ o̍ to̍o̍si̍a̍a̍ o̍ chi̍e̍ēŋndo̍ chōo̍ la̍ŋ kpo̍u̍, ndu̍yɛ̍ mbō tōsa̍ mī lā wa̍ wānāā wāŋnda̍ ā sāŋga̍la̍ o̍ ko̍ŋ kɔ̍ɔ̍lī, mī lā wa̍ wānāā tɔ̍ɔ̍, ndu̍yɛ̍ mī wāŋnda̍ kpo̍u̍ ā ke̍ nya̍ bɛ̄ɛ̄le̍ŋ. O̍ ko̍ŋ kɔ̍ɔ̍lī vɛ̍lɛ̄, ō chō tōsā mɛ̄ɛ̍ o̍ chu̍e̍l nya̍ būŋgɛ̄i̍ yɛ̍, mbō tōsa̍ mī lā wa̍ wānāā dīāndāā ndu̍ Mɛ̍lɛ̄ka̍ o̍ hɔ̄l, Mɛ̄lɛ̄ka̍ nyāa̍.”