Read Southern Kisi Dītɔ̍nɔ̍mi̍ī 27 Bible Online

Dītɔ̍nɔ̍mi̍ī 27 - Southern Kisi bible

Dītɔ̍nɔ̍mi̍ī 27

¹O̍ ko̍ŋ kɔ̍ɔ̍lī, mi̍ Mūu̍sē nda̍ wāŋ bɛ̄ndūāā I̍sɔ̄lūɛ̍i̍ya̍ ā sīm le̍ mā sīla̍ I̍sɔ̄lūɛ̍i̍ya̍ kpo̍u̍. Mi̍ Mūu̍sē o̍ lo᷅ o̍ ko̍ŋ mbo̍ sīlā I̍sɔ̄lūɛ̍i̍ya̍ āā, “Sāwā o̍ sāwā ya̍ I̍ cho̍ nya̍ kīo̍o̍ pāa̍le̍ hāūle̍ŋ nde᷅ŋ, lā tōsa̍ nyɛ᷅ o̍ nyɛ̄ la̍ di̍mu̍l nya̍ le̍ tōsāa̍.

²Lā chō hūnɔ̄ɔ̍ Chɔ̍ɔ̍dāŋ nda̍ŋ tāŋɔ̄ɔ̍ le̍ kɔ̄la̍ŋ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ kɔ̄la̍ŋ kīo̍o̍ le̍ŋ ni᷄ŋ. Lɛ̄ŋnde̍ŋ nde᷅ŋ, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā nyāā ma̍māa̍ nda̍ a̍a̍ pi̍ɛ̍īyo̍ ō chu̍e̍l nya̍ būŋgɛ̄i̍ le̍ nya̍ kīo̍o̍ ni̍, lɛ̄ŋnde̍ cho̍ lē pīāā a̍ nyɛ̄m kɛ̄ndɔ᷄ŋ, ndu̍yɛ̍ mi̍ lē nɔ̄ fo̍ndāŋndā kɛ̄ndɛ̄lā tɔ̄lɔ̄ɔ̄la̍ŋ lā nāŋ nda̍ŋ nde̍ŋ. Tē lā ta᷄ŋ o̍ lɛ̄ŋnde̍ŋ nde᷅ŋ ni᷄ŋ pɛ̍, mī lā fūūlu̍u̍ o̍ Pēmbīī Ɛ̍bāve̍, lā nɔ̄ mī lā chūa̍ pōūtā bɛ̄ŋnda̍ŋ mī lā kɛ̄si̍ la̍ŋ o̍ pēmbīī kēŋ chōo̍, o̍ ko̍ŋ kɔ̍ɔ̍lī, mī lā yīkpa̍ la̍ŋ lēchōo̍ ve̍llāa̍ vēllē. Mī lā lo̍ o̍ ko̍ŋ mī lā pōōnyi̍a̍a̍ sāwāla̍ŋ nda᷅ŋ kpo̍u̍ o̍ pōūtā tīɔ̍ɔ̍ŋ nda̍ŋ chōo̍, la̍ŋ la̍ yɔ̍nūŋ ni̍, māā sāwāla̍ ya̍ I̍ cho̍ nya̍ la᷅ŋ kīo̍o̍ pāa̍le̍ hāūle̍ŋ nde᷅ŋ nda̍ŋ.

⁴

⁵O̍ ko̍ŋ kɔ̍ɔ̍lī, mi̍ lā tāŋgu̍l ma̍āŋndo̍ a̍ pōūta̍ŋ o̍ fo̍ndāa̍ ho̍ō, le̍ sa̍lāla̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍. Kɛ̍ pōūtā nya̍ nɔ̄ mī lā ta̍ŋgu̍l ma̍āŋndo̍ ho̍ō a̍ la̍ŋ nda̍ŋ lā nɔ̍ mī lā wa̍ lā kīālāā a̍ īchīli̍ŋ te̍.

⁶Pōūta̍ cho̍ kpu̍lu̍ku̍u̍ kpu̍lu̍ku̍u̍ la̍ ve᷅ la̍ si̍a̍lāā le̍ la̍ŋ, a̍ la̍ŋ nya̍ nɔ̄ ni̍ mī lā tāŋgu̍l ma̍āŋndo̍ le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍. O̍ ko̍ŋ kɔ̍ɔ̍lī, te̍ lā tāŋgu̍l ma̍āŋndo̍ ho̍ō pɛ̍, lā sōli̍ sa̍lālā lūāmāāla̍ŋ a̍ sa̍lālā kɔ̄l nyūlūla̍ŋ lēcho̍ō o̍ Mɛ̄lɛ̄ka̍ Ya̍a̍wɛ̄ɛ̄ Mɛ̄lɛ̄ka̍ nyāa̍ lo̍. Tē lā sōli̍ sa̍lālā kɔ̄l nyūlūla̍ŋ nda᷅ŋ pɛ̍, lā dē la̍ŋ ndo̍ŋ, o̍ ko̍ŋ kɔ̍ɔ̍lī, lā tōsa̍ kɔ̄l kɛ̄ndɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ hɔ̄l lo̍ŋ.

⁷

⁸Sāwāla̍ ya̍ I̍ cho̍ nya̍ la᷅ŋ kīo̍o̍ la̍ŋ lā nɔ̄ mī lā pōōnyi̍a̍a̍ la̍ŋ kpo̍u̍ o̍ pōūta̍ŋ nda᷅ŋ chōo̍, ndu̍yɛ̍ mī lā pōōnyīa̍a̍ la̍ŋ nyɛ̄ kɛ̄ndɛ̄ wa̍la̍ŋ le̍ mī wāŋnda̍ sīna̍ la̍ŋ pɛ̄ŋgu̍.”

⁹O̍ ko̍ŋ kɔ̍ɔ̍lī, mi̍ Mūu̍sē nda̍ wānāā sōlīāā lāsa̍lāa̍ a̍ fu̍la̍ o̍ pūlāle̍ Li̍va̍īle̍ŋ chōo̍ wa̍ ā hīāū lāchī a̍ sūɛ̍i̍ nāa̍ I̍sɔ̄lūɛ̍i̍ya̍ chūā. Mi̍ Mūu̍sē o̍ dīmūl I̍sɔ̄lūɛ̍i̍ya̍ āā, “Lā ya᷄ŋ ya̍ nīla̍ŋ wāŋnda̍ I̍sɔ̄lūɛ̄ī, mī lā tūēī nyɛ̄ ya̍ I̍ cho̍ nya̍ dīmūllo̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō sīīŋgu̍u̍ nya̍ wānāā ndɔ̄ pāa̍le̍ hāūle̍ŋ nde᷅ŋ.

¹⁰Le̍la̍ŋ, lā tūe̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm, mī lā tōsa̍ nyɛ̄ o̍ nyɛ̄ sāwāla̍ ndɔ̄la̍ŋ a̍ pɛ̄ɛ̄kūlā ndɔ̄la̍ŋ lā dīmi̍ le̍ to̍sāa̍, lā ya̍ I̍ cho̍ nya̍ tōmbōlāl pāa̍le̍ hāūle̍ŋ nde᷅ŋ nda̍ŋ.”

¹¹O̍ pāa̍le̍ pi᷅lɛ̍lē lēŋ chōo̍ kpe̍ mi̍ Mūu̍sē o̍ si̍lā wāŋnda̍ I̍sɔ̄lūɛ̄ī, mbo̍ dīmūl nda̍ āā,

¹²“Tē lā ta᷄ŋ Chɔ̍ɔ̍dāŋ nda̍ŋ pɛ̍, mī lā lūɛ̄ī o̍ lɛ̄ŋndē nya̍ chō kɔ̄la̍ŋ ni᷄ŋ nde᷅ŋ, yu̍ŋgu̍ Si̍mīɔ̄ŋ ndo̍ ni̍, a̍ yu̍ŋgu̍ Li̍va̍īyo̍, a̍ yu̍ŋgu̍ Chu̍dā wo̍, a̍ yu̍ŋgu̍ I̍sa̍a̍kā wo̍, a̍ yu̍ŋgu̍ Chōo̍sīɔ̍ɔ̍, a̍ yu̍ŋgu̍ Bɛ̍ŋnja̍mīŋ ndo̍, ā nɔ̄ mā he᷄l o̍ Pēmbīī Kɛ̍lu̍i̍sīmnde̍ chōo̍ le̍ mā dɔ̄ū wāŋnda̍ sa̍lā.

¹³O̍ ko̍ŋ kɔ̍ɔ̍lī, yu̍ŋgu̍ Lūbɛ᷅ŋ ndo̍ ni̍, a̍ yu̍ŋgu̍ Ka̍a̍dī wo̍, a̍ yu̍ŋgu̍ A̍sīɛ̄ɛ̄ wo̍, a̍ yu̍ŋgu̍ Sɛ̍bu̍lɔ̄ŋ ndo̍, a̍ yu̍ŋgu̍ Da᷅ŋ ndo̍, a̍ yu̍ŋgu̍ Nāfi̍ta̍lī wo̍, mī nda̍ he᷄l o̍ Pēmbīī Ɛ̍bāve̍ cho̍o̍, le̍ mā yōnda̍ sēndi̍lā Mɛ̄lɛ̄ka̍ nɔ̄ le̍ wāŋnda̍ hāndɔ̄ɔ̍ chōo̍ la̍ŋ.

¹⁴O̍ ko̍ŋ kɔ̍ɔ̍lī, mī Li̍va̍īya̍ ā yōnda̍l I̍sɔ̄lūɛ̍i̍ya̍ dīōmnda̍ŋ nda᷅ŋ chōo̍ cho̍o̍ kpe̍le̍ŋ āā,

¹⁵“ ‘Nyɛ̄m Mɛ̄lɛ̄ka̍ Ya̍a̍wɛ̄ɛ̄ o̍ tu̍l mu᷅ŋ yɛ̄le̍ŋ tūl bɛ̄ndōo̍ wo̍ŋ ki̍nɛ̍i̍, mu̍ŋ yɔ̍nūŋ māā nyɛ̄m wāŋndā chīe̍e̍ya̍ ā tōōsīāā mu᷅ŋ a̍ pōūta̍ŋ, kɛ̄lɛ̄ŋgāā a̍ yɔ̄mnde̍, ɔ̄ɔ̄ a̍ chīli̍ŋnde̍ mā sōōlūū mu̍ŋ sɔ̍ɔ̍ sɔ̍ɔ̍ māā mɛ̄lɛ̄ka̍ā ndā wo̍ŋ pɛ̍, wānā o̍ wāna̍ to̍o̍si̍a̍a̍ mu̍ŋ ō pīlɛ̍ bɛ̍ɛ̍ pɛ̍ le̍ ndu̍ sōōlūūwo̍, sēndi̍o̍o̍ ō chō wānā ko̍ŋ chōo̍.’ “O̍ ko̍ŋ kɔ̍ɔ̍lī, mī wāŋnda̍ kpo̍u̍ a̍ chɛ̍l lēbɛ̄ŋgu̍ āā, ‘Āmi̍i̍nā!’

¹⁶“O̍ ko̍ŋ kɔ̍ɔ̍lī, mā yōnda̍ vɛ̄lɛ̄ chōo̍ cho̍o̍ āā, ‘Wānā o̍ wāna̍ kɛ̍ɛ̍ le̍ fi̍nyā ndɔ̍ kɛ̄lɛ̄ŋgāā kāla̍ ndɔ̍ bɛ̄ɛ̄le̍ŋ kīo̍o̍ pɛ̍, sēndi̍o̍o̍ ō wa̍ ndu̍ chōo̍.’ “Mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’

¹⁷“O̍ ko̍ŋ kɔ̍ɔ̍lī, mā yōnda̍ vɛ̄lɛ̄ āā, ‘Wānā o̍ wāna̍ hi̍o̍ū pɛ̄ŋgu̍ cho̍ nda̍ tɛ̄ɛ̄ŋ nda̍ chāa̍ŋ ndɔ̄ wo̍ pɛ̍, mbō chūa̍ fo̍ndā pi̍la̍a̍ a̍ lēdīɔ̄ɔ̄mū, sēndi̍o̍o̍ chō wānā ko̍ŋ chōo̍.’ “Mi̍ wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’

¹⁸“O̍ ko̍ŋ kɔ̍ɔ̍lī, mā yōnda̍ vɛ̄lɛ̄ āā, ‘Mā yōnda̍ vɛ̄lɛ̄ māā, wānā o̍ wāna̍ chɔ̍m wānā su̍mɛ̍i̍yo̍ nɛ̄ī wɔ̍ɔ̍ŋndo̍ pɛ̍, sēndi̍o̍o̍ ō wa̍ ndu̍ chōo̍ fɔ̍.’ “Mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ māā, ‘Āmi̍i̍nā!’

¹⁹“O̍ ko̍ŋ kɔ̍ɔ̍lī, mā yōnda̍ vɛ̄lɛ̄ chōo̍ cho̍o̍ āā, ‘Wāna̍ lēkāa̍ pɛ̍, vīi̍ nɔ̍ lɛ̍ fi̍nyā le̍ wo̍ pɛ̍, wānā la̍nɔ̍ vi̍i̍ku̍u̍ pɔ̍nɔ̍ɔ̍ wo̍ pɛ̍, wānā o̍ wāna̍ to̍sa̍ a̍ sa̍bū pɛ̍, mī wāŋnda̍ ha̍ā ō pīlɛ̍ ō kɛ̄ɛ̍ di̍ ndɔ̄ɔ̍ sɔ̄lāa̍ pɛ̍, wāna̍ to̍sā su̍ɛ̍i̍ ke̍ŋ ndo̍, sēndi̍o̍o̍ ō wa̍ ndu̍ chōo̍.’ “O̍ ko̍ŋ kɔ̍ɔ̍lī, mī wāŋnda̍ kpo̍u̍ a̍ chɛ̍l lēbɛ̄ŋgu̍ āā, ‘Āmi̍i̍nā!’

²⁰“O̍ ko̍ŋ kɔ̍ɔ̍lī, mā yōnda̍ vɛ̄lɛ̄ chōo̍ cho̍o̍ āā, ‘Wānā o̍ wāna̍ wa̍ a̍ la̍nɔ̍ɔ̍ fi̍nyā ndɔ̄ pɛ̍, wānā ko̍ŋ sēndi̍o̍o̍ ō wa̍ ndu̍ chōo̍, kāni̍ fo̍ndōle̍, le̍ mɛ̄ɛ̍ o̍ tɛ̍ɛ̍mbu̍u̍ fi̍nyā ndɔ̍ lābɛ̄ɛ̄ yɛ̍.’ “Mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’

²¹“Mā yōnda̍ vɛ̄lɛ̄ chōo̍ cho̍o̍ āā, ‘Wānā o̍ wāna̍ wa̍ a̍ chɔ̄lōo̍ ō su̍u̍ o̍ su̍u̍ pɛ̍, wānā ko̍ŋ sēndi̍o̍o̍ ō wa̍ ndu̍ chōo̍.’ “Ndu̍yɛ̍ mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’

²²“Mā yōnda̍ vɛ̄lɛ̄ chōo̍ cho̍o̍ āā, ‘Wānā o̍ wāna̍ wa̍ a̍ yēma̍ ndɔ̄ pɛ̍, ō wa̍ ye̍ma̍ ndɔ̍ fi̍nyā pīlɛ̍, ō wa̍ ye̍ma̍ ndɔ̍ kālā pi᷅lɛ̍, wānā ko̍ŋ sēndi̍o̍o̍ ō wa̍ ndu̍ chōo̍.’ “Mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’

²³“O̍ ko̍ŋ kɔ̍ɔ̍lī, mā yōnda̍ vɛ̄lɛ̄ chōo̍ cho̍o̍ āā, ‘Wānā o̍ wāna̍ wa̍ a̍ lēfū ndɔ̄ la̍a̍ndōo̍ pɛ̍, wānā ko̍ŋ sēndi̍o̍o̍ ō wa̍ ndu̍ chōo̍.’ “Ndūyɛ̍ mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’

²⁴“O̍ ko̍ŋ kɔ̍ɔ̍lī, mā yōnda̍ vɛ̄lɛ̄ chōo̍ cho̍o̍ āā, ‘Wānā o̍ wāna̍ di̍ī chāa̍ŋ ndɔ̄ wa̍nā chi̍o̍o̍ o̍ sɔ̍ɔ̍ sɔ̍ɔ̍ ni̍ŋ pɛ̍, mī sūɛ̍i̍ ke̍ŋ ī lo̍ le̍nde̍ wānā si̍na̍ a̍ ndi̍ o̍kɔ̄ɔ̄ le̍, wānā ko̍ŋ sēndi̍o̍o̍ ō wa̍ ndu̍ chōo̍.’ “Mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’

²⁵“Mā yōnda̍ vɛ̄lɛ̄ chōo̍ cho̍o̍ āā, ‘Wānā o̍ wāna̍ bi̍ī lūɛ̄īyɔ̄ɔ̄ ni᷄ŋ ndo̍ le̍ wāna̍ tɛ̍ɛ̍mbu̍u̍ i̍sɔ̍ɔ̍ le̍ wo̍ dīyɔ̄ɔ̍ pɛ̍, wānā ko̍ŋ sēndi̍o̍o̍ ō wa̍ ndu̍ chōo̍.’ “Ndu̍yɛ̍ mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’

²⁶“O̍ ko̍ŋ kɔ̍ɔ̍lī, mā yōnda̍ vɛ̄lɛ̄ āā, ‘Sāwāla̍ Mɛ̄lɛ̄ka̍ la̍ŋ nda᷅ŋ ki̍nɛ̍i̍, ndu̍yɛ̍ a̍ pɛ̄ɛ̄kūlā ndɔ̄la̍ŋ, nyɛ̄ o̍ nyɛ̄ la̍ di̍mi̍ le̍ to̍sāa̍, wānā o̍ wāna̍ kɛ̍ɛ̍ le̍ ndu̍ tōsāa̍ pɛ̍, sēndi̍o̍o̍ ō wa̍ wa̍nā ko̍ŋ chōo̍.’ “Mī wāŋnda̍ kpo̍u̍ a̍ chɛ̍l vɛ̄lɛ̄ lēbɛ̄ŋgu̍ āā, ‘Āmi̍i̍nā!’ ”