Southern Kisi bible online

Dītɔ̍nɔ̍mi̍ī 28

¹Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Tē lā tūēī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm pɛ̍, ndu̍yɛ̍ o̍ ko̍ŋ kɔ̍ɔ̍lī, sāwāla̍ ndɔ̄la̍ ya̍ I̍ ke̍ nya̍ la᷅ŋ pāa̍le̍ hāūle̍ŋ nde᷅ŋ nda̍ŋ mī lā tōsa̍ nyɛ̄ la̍ di̍mi̍ wo̍ a̍ kɔ̄ltā nyāla̍ŋ kpo̍u̍ pɛ̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ hēēlū mī lā wa̍ wānāā kpāāyā, mī lā hīōū lɛ̄ŋnde̍ kpo̍u̍ o̍ chi̍e̍ēŋndo̍ ni᷄ŋ.

²Tē lā tūēī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm pɛ̍, sa̍lālā Mɛ̄lɛ̄ka̍ dūāū ni̍ŋ nya̍ ndu̍yɛ̍ mī lā wa̍ nya̍ chōo̍ le̍ te̍le̍ŋ o̍ te̍le̍ŋ nda̍ŋ, la̍ŋ la̍ wa᷅ ni̍ŋ la᷅ŋ ni̍.

³“Ō chō nya̍ sa̍lā dɔ̄wɔ̄ɔ̄ chi̍e̍e̍, ndu̍yɛ̍ mbō dɔ̄ū vɛ̄lɛ̄ wa̍lta̍ nyāla̍ ŋ̄chīɛ̄ɛ̄la̍ŋ sa̍lā.

⁴“Ō chō nya̍ sa̍lā dɔ̄wɔ̄ɔ̄ mī lā vēlū chūāūwa̍ ta̍u̍ ta̍u̍, ndu̍yɛ̍ mbō tōsa̍ mī tɔ̄lɔ̄ɔ̄la̍ŋ o̍ chīɔ̄ɔ̄ŋ nyāa̍ŋ ni᷄ŋ la̍ kōm ta̍u̍ ta̍u̍. Chɔ̄lūāā nyāa̍ bɛ̍ɛ̍, nda̍ yɔ̍nūŋ māā nāūwāā nyāa̍ a̍ sāa̍ nyāa̍, a̍ chūīŋāā nyāa̍ ni̍, ō chō tōsā mā kūi̍ ta̍u̍ ta̍u̍.

⁵“Ō chō ko̍nda̍la̍ nyāla̍ŋ sa̍lā dɔ̄wɔ̄ɔ̄ ndu̍yɛ̍ a̍ fo̍ndāŋ nyāla̍ nya̍ bɛ̄ɛ̄ndīāā nyɛ̍ dīa̍a̍ la̍ŋ.

⁶“Ō chō nya̍ sa̍lā dɔ̄wɔ̄ɔ̄ o̍ nyɛ̄ o̍ nyɛ̄ ni̍ŋ nya̍ tōsa̍, o̍ lā nya̍lo̍ chi̍ɛ̍ī ni̍ŋ ni̍, a̍ o̍ fo̍ndāŋndā nyāla̍ wa̍lta̍ŋ.

⁷“O̍ ko̍ŋ kɔ̍ɔ̍lī, tē ya̍a̍mɔ̍ɔ̍wa̍ ā sāa̍ nya̍ a̍ sɔ̍ŋgɔ̄ɔ̍ pɛ̍, ō nɔ̄lā mbō ke̍ nya̍ kpāāyāa̍ mī lā yēm nda̍. Ya̍a̍mɔ̍ɔ̍wa̍a̍ nyāā ka̍ŋ ā fūlā ni̍ŋ ku̍mbūe̍i̍ ī pīlɛ̍ le̍ nya̍ chīŋa̍la᷅ŋndo̍, kɛ̍ ō chō nya̍ kpāāyāa̍ kē mī lā pūūsi̍a̍a̍ nda̍, mā sɛ̍ŋi̍ŋ a̍ pi̍lɛ̍ŋ pi̍lɛ̍ŋ nda̍, mī wānā o̍ wānā o̍ chu̍a̍ nɛ̄īyo̍ o̍ ndɔ̍ a̍ kīlta̍ŋ.

⁸“Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ sa̍lā dɔ̄wɔ̄ɔ̄ o̍ nyɛ̄ o̍ nyɛ̄ ni̍ŋ nya̍ tōsa̍ o̍ lɛ̄ŋndē o̍ cho̍ le᷅ŋ nya̍ kīo̍o̍ le̍ŋ ni᷄ŋ. Ō chō nya̍ sa̍lā dɔ̄wɔ̄ɔ̄ a̍ nyɛ̄ dīa̍a̍ mbō tōsa̍ mī ko̍nda̍la̍ nyāla̍ŋ lā wa̍ lā pīāā cha̍ cha̍.

⁹“Tē lā tūēī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm pɛ̍, ndu̍yɛ̍ mī lā tōsa̍ nyɛ̄ o̍ nyɛ̄ sāwāla̍ ndɔ̄la̍ŋ lā dīmi̍ le̍ tōsāa̍ pɛ̍, būŋgɛ̄ī ndūɛ̍i̍ o̍ chu̍e̍l nya̍ ī kālā ka̍lā le̍ nya̍ sīīŋgūūwo̍ wānāa̍ cho̍ ā yɔ̄ŋga᷄ŋ o̍ ndu̍ lo̍ wa̍ ve̍, ō chō būŋgɛ̄ī kēŋ pēēlū.

¹⁰O̍ ko̍ŋ, wānā o̍ wāna̍ cho̍ o̍ chi̍e̍ēŋndo̍ ni᷄ŋ, mā chē māā wāŋnda̍ I̍sɔ̄lūɛ̄ī, wānāā Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ mbo̍ sīīŋgūū nda̍ wānāā ndɔ̄ wa̍ nda̍ chō ni̍. O̍ ko̍ŋ, nda̍ kpo̍u̍ mī sīōōŋnde̍ ī bīī nda̍ a̍ nya̍.

¹¹Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī dɛ̍nɛ̍ kɛ̍ndɛ̄ bɛ̄ndōo̍ ō wa̍ le̍ nya̍ o̍ lɛ̄ŋnde̍ŋ nde᷅ŋ ni᷄ŋ, lɛ̄ŋndē o̍ chu̍e̍l le᷅ŋ fi̍nyāā nyāā ma̍māa̍ būŋgɛ̄i̍ sīndɛ̄ ī kālā ka̍lā le̍ nda̍ kīo̍o̍ le̍ŋ. Ō chō tōsā mī lā vēlū chūāūwa̍ ta̍u̍ ta̍u̍, ndu̍yɛ̍ chɔ̄lūāā nyāa̍ bɛ̍ɛ̍ mā kūi̍ ta̍u̍ ta̍u̍, o̍ ko̍ŋ kɔ̍ɔ̍lī, tɔ̄lɔ̄ɔ̄la̍ŋ o̍ chīɔ̄ɔ̄ŋ nyāa̍ŋ ni᷄ŋ bɛ̍ɛ̍ mī lā na᷄ŋ ta̍u̍ ta̍u̍.

¹²Mɛ̄lɛ̄ka̍ Ya̍a̍wɛ̄ɛ̄, o̍ cho̍ pīɔ̍ɔ̍ yɔ̄ŋ o̍ chīɔ̄ɔ̄ŋ nyāa̍ŋ chōo̍ a̍ bōōndi̍i̍ kpe̍e̍kpe̍i̍ pi̍ɔ̍ɔ̍ nɔ̄ le̍ sīa̍a̍ o̍ chīɔ̄ɔ̄ŋ nyāa̍ŋ chōo̍ ve̍, chɔ̄nɔ᷄ŋndo̍ o̍ ha̍la̍a̍ ni̍ŋ cho̍o̍ cho̍o̍ le̍ mbō tōsa̍ mī tɔ̄lɔ̄ɔ̄la̍ŋ o̍ chīɔ̄ɔ̄ŋ nyāa̍ŋ ni᷄ŋ lā na̍ŋ ta̍u̍ ta̍u̍. Ndu̍yɛ̍ nyɛ̄ o̍ nyɛ̄ nya̍ to̍sa̍ a̍ bālā nyāla̍ŋ mbō dɔ̄ū ndu̍ sa̍lā. Ō chō nya̍ sa̍lā dɔ̄wɔ̄ɔ̄ ha̍a̍a̍ lɛ̄ŋīī bɔ̄ɔ̍ bɔ̍ɔ̍ ī bīī ni̍ŋ nya̍ kūēēla̍ŋ o̍ lābā, kɛ̍ nya̍ bi̍ī ni̍ŋ wa̍nā o̍ wānā ku̍e̍ē o̍ bā le̍.

¹³Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ sāwāla̍ ndɔ̄la̍ŋ nda᷅ŋ ki̍nɛ̍i̍, a̍ pɛ̄ɛ̄kūlā ndɔ̄la̍ŋ nda᷅ŋ, lā ya̍ I̍ cho̍ la᷅ŋ nya̍ kīo̍o̍ pāa̍le̍ hāūle̍ŋ nde᷅ŋ nda̍ŋ, nyɛ̄ o̍ nyɛ̄ lā di̍mi̍ le̍ to̍sāa̍, tē lā tōsa̍ ndu̍ pɛ̍, le̍ te̍le̍ŋ o̍ te̍le̍ŋ tōsāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tōsā ni̍ŋ ni̍, mī lā wa̍ wānāā wāā lāchī o̍ īsɔ̄ɔ̍ o̍ īsɔ̄ɔ̍ ni̍ŋ, lā ve᷅ wāna̍ o̍ bā bɛ̄ŋgu̍ le̍, mī lā wa̍ wānāā sɔ̄lāā nyɛ̄, lā ve᷅ wa̍nāā bāhāvɛ̍i̍ le̍.

¹⁴Le̍la̍ŋ nyɛ̄ o̍ nyɛ̄ ya̍ I̍ cho̍ nya̍ dīmūllo̍ pāa̍le̍ hāūle̍ŋ nde᷅ŋ, lā fa̍ŋā ndu̍ lēchōo̍ mī lā kɛ̄ɛ̍ ndu̍ tōsā le̍. Lā tōsa̍ ndu̍ mɛ̄ɛ̍ ya̍ I̍ di̍mu̍l nya̍ yɛ̍. Lā so̍o̍lūū nyɛ̄ o̍ nyɛ̄ chēle̍ŋ māā mɛ̄lɛ̄ka̍ nyā le̍, kɛ̄lɛ̄ŋgāāle̍ mī lā sāāŋgi̍a̍l ndu̍.”

¹⁵Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Kɛ̍ tē lā sōli̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm pɛ̍, sāwāla̍ ndɔ̄la̍ ya̍ I̍ cho̍ nya̍ la᷅ŋ kīo̍o̍ pāa̍le̍ hāūle̍ŋ nde᷅ŋ a̍ pɛ̄ɛ̄kū ndɔ̄la̍ŋ nda̍ŋ, mī lā tōsa̍ nyɛ᷅ la̍ di̍mi̍ wo̍ a̍ kɔ̄ltā nyāla̍ŋ kpo̍u̍ le̍, sēndi̍lā nya̍ sɔ̄lā ni̍ŋ ndu̍yɛ̍ mī lā wa̍ nya̍ chōo̍ la̍ŋ, la̍ŋ la̍ wa᷅ ni̍ŋ la᷅ŋ ni̍.

¹⁶“Mɛ̄lɛ̄ka̍ Ya̍a̍wɛ̄ɛ̄, o̍ cho̍ nya̍ sēndi̍o̍o̍ hāndɔ̄ɔ̄ chōo̍ nāa̍ nya̍ chō wā o̍ chi̍e̍e̍ŋ nyāa̍ŋ nda̍, ndu̍yɛ̍ mbō hāndu̍ vɛ̄lɛ̄ wa̍lta̍ nyāla̍ ŋ̄chīɛ̄ɛ̄la̍ŋ sēndi̍o̍o̍ chōo̍.

¹⁷“Ō chō tōsā mī sēndi̍o̍o̍ wa̍ o̍ ko̍nda̍la̍ nyāla̍ŋ chōo̍, ndu̍yɛ̍ a̍ o̍ fo̍ndāŋndā nyāla̍ nya̍ bɛ̄ɛ̄ndīāā nyɛ̍ dīa̍a̍ la̍ŋ chōo̍.

¹⁸“Ō chō nya̍ sēndi̍o̍o̍ hāndɔ̄ɔ̄ chōo̍ lā ku̍ī le̍, ndu̍yɛ̍ mbō hāndu̍ tɔ̄lɔ̄ɔ̄lā nyāla̍ŋ o̍ chīɔ̄ɔ̄ŋ nyāa̍ŋ ni᷄ŋ se᷅ndi̍o̍o̍ chōo̍, a̍ chɔ̄lūāā nyāa̍, nda̍ yɔ̍nūŋ ni̍ māā nāūwāā nyāa̍, a̍ sāa̍ nyāa̍, o̍ ko̍ŋ kɔ̍ɔ̍lī, a̍ chūīŋāā nyāa̍, mbō tōsa̍ ā ku̍ī le̍.

¹⁹“Nyɛ̄ o̍ nyɛ̄ nya̍ tōsa̍ ō chō ndu̍ sēndi̍o̍o̍ hāndɔ̄ɔ̄ chōo̍, o̍ lā nya̍lo̍ chi̍ɛ̍ī ni̍ŋ ni̍, a̍ o̍ fo̍ndāŋndā nyāla̍ wa̍lta̍ŋ.

²⁰“Tē lā tōsa̍ yɔ̄ŋ wɔ̄ɔ̍ŋndo̍ pɛ̍, ndu̍yɛ̍ mī lā kɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, ō chō tōsā mī sɔ̄ɔ̍ŋ kɔ̄l tāmbɛ̍i̍yo̍ŋ, a̍ sɔ̄ɔ̍ŋ hɔ̄lāā hīŋa᷄ŋ ŋ̄ kōma̍l nya̍, o̍ nyɛ̄ o̍ nyɛ̄ ni̍ŋ nya̍ tōsa̍. Ō chō tōsā mī dɛ̍nɛ̍ pa̍lāā bɛ̄ndōo̍ ō kōma̍l nya̍, ndu̍yɛ̍ mbō tōsa̍ mī ya̍a̍mɔ̍ɔ̍wa̍a̍ nyāa̍ ā tɛ̄ɛ̄mbu̍u̍ nya̍ kpo̍u̍ o̍ lēpīlɛ̍ ni᷄ŋ.

²¹Ō chō tōsā mī nāālā wɔ̄ɔ̍ŋ wɔ̍ɔ̍ŋndā bɛ̄ŋnda̍ŋ lā de᷄l nya̍ tɛ̄ɛ̄ŋ ndu̍yɛ̍ mbō tōsa̍ mī nāālā lāŋ lā chīi̍ nya̍ kpo̍u̍ o̍ lɛ̄ŋndē nya̍ chō le᷅ŋ kɔ̄la̍ŋ bīyɔ̄ɔ̍ mī lē sīmnu᷄ŋ nyɛ̍ nyā le̍ŋ ni᷄ŋ.

²²Ō chō nya̍ nyɛ̄ pālāa̍ tūsī chōo̍ a̍ nāālā yɛ̍ yɛ̍la̍ wɔ̍ɔ̍ŋndā bɛ̄ŋnda̍ŋ, nāāla̍ ta᷅ŋ wa̍nā la̍ŋ, a̍ nāā hīīndāa̍, ndu̍yɛ̍ a̍ dīāllūŋ tūū kālā ka̍la᷄ŋ. Ō chō tōsā mī wɔ̄ɔ̄lē kālā ka̍lālē bɛ̄ŋnde̍ŋ lē si᷄m o̍ lɛ̄ŋndē nyāle̍ŋ ni᷄ŋ, ndu̍yɛ̍ mbō yɔ᷄ŋ hāŋgu̍l tūū bɛ̄ndōo̍ o̍ lɛ̄ŋndē nyāle̍ŋ ni᷄ŋ, ndu̍yɛ̍ a̍ kɛ̍ŋgɛ̍ŋgu̍lu̍ma̍a̍ le̍ tɔ̄lɔ̄ɔ̄lā nyāla̍ŋ tɛ̄ɛ̄mbūūwo̍ o̍ chīɔ̄ɔ̄ŋ nyāa̍ŋ ni᷄ŋ kpo̍u̍. Wɔ̄ɔ̄le̍ŋ lē chō hūnɔ̄ɔ̄ kālu̍ kpo᷅ke̍, ndu̍yɛ̍ mī lɛ̄ŋndē nya̍ chō nɛ̄īyo̍ chōo̍ le̍ŋ lē kēndū kpo᷅ke̍ bɛ̍ndū. Ndu̍yɛ̍ kpūndɛ̍la̍ŋ nda᷅ŋ lā chō nya̍ lō chōo̍ ha̍a̍a̍ mī lā chūu̍ kpo̍u̍.

²³

²⁴Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī chu̍ndo̍o̍ ō wa᷄ chɔ̄nɔ᷄ŋndo̍ chōo̍ cho̍o̍ sɔ̍ŋgɔ̍ pīɔ̍ɔ̍ mbō chūchu᷄ŋ lɛ᷅ŋ a̍ si̍o̍ōŋnde̍ lātūlu̍, ha̍a̍a̍ mbō lo̍ o̍ ko̍ŋ mbō tɛ̄ɛ̄mbu̍u̍ nya̍ kpo̍u̍.

²⁵“Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā, ā yɔ᷄ŋ bɛ̍ɛ̍ mī lā sāa̍ ya̍a̍mɔ̍ɔ̍wa̍a̍ nyāa̍ a̍ sɔ̍ŋgɔ̄ɔ̍ yōmɔ̄ɔ̍ nda̍ yām nya̍ ni̍. Lā fūlā ni̍ŋ ku̍mbūe̍i̍ ī pīlɛ̍ le̍ nda̍ chīŋa̍la᷅ŋndo̍, kɛ̍ mā yēm nya̍ mī lā sɛ̄ŋi̍ŋ mī wānā o̍ wānā o̍ chu̍a̍ nɛ̄ī yo̍ o̍ ndɔ̍ a̍ kīlta̍ŋ. Wāŋnda̍ kpo̍u̍ o̍ chi̍e̍ēŋndo̍ ni᷄ŋ tē ā chē nyɛ̍ yɔ̍nūŋ ni̍ŋ a̍ nya̍ wo̍ pɛ̍, sīōōŋīī bɛ̄ndūe̍i̍ ī chō nda̍ bīyɔ̄ɔ̄.

²⁶Yōūwa̍ a̍ vīsīāā yōndūa̍a̍, di̍a̍llūŋ nyāŋ vi̍lɛ̍i̍yo̍ŋ mu̍ŋ wa᷅ ni̍ŋ nyɛ̍ ndā di̍a̍a̍ ni̍. Ndu̍yɛ̍ wānā o̍ wānā o̍ ve᷅ ni̍ŋ mbō tōū nda̍ o̍ dīāllūŋ mu᷅ŋ dīo̍o̍ le̍.

²⁷Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ nyɛ̄ pālāa̍ tūsī chōo̍ a̍ hīndɔ̄ɔ̄la̍ŋ mbō tōsa̍ mī lā tīu̍ nya̍ lēkɔ̄ɔ̍ kpo̍u̍, mɛ̄ɛ̍ o̍ to̍sa̍ a̍ wāŋnda̍ I̍chi̍pī yɛ̍. Ō chō tōsā mī nāā būūlūa̍a̍ ō tīu̍ nya̍ lēkɔ̄ɔ̍, ndu̍yɛ̍ mbō tōsa̍ mī pāūve̍ ī fūla̍ nya̍ lēkɔ̄ɔ̍, o̍ ko̍ŋ kɔ̍ɔ̍lī, mbō tōsa̍ mī nyāŋgāfōo̍ ō fūla̍ nya̍ mbō tīu̍ nya̍ lēkɔ̄ɔ̍ kpo̍u̍. Ndu̍yɛ̍ lā sɔ̍lā ni̍ŋ ma̍ko̍ŋgo̍ o̍ mākōŋgo̍ mī mā nɔ̄la̍ nya̍ chīɔ̄ū le̍.

²⁸Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsa̍ mī lā sēēma̍, ndu̍yɛ̍ mbō tōsa̍ mī lā sūma̍ kpu̍lūku̍. Ō chō tōsā mī kɔ̄lta̍ŋ lā lāāsi̍a̍ŋ nya̍ ni᷄ŋ lā si̍nā ni̍ŋ nyɛ᷅ o̍ nyɛ̄ nya̍ yɔ̄ŋ te̍.

²⁹Ō chō tōsa̍ mī lā wa̍ bālɔ̄ɔ̍ ītāmu̍ ta̍mu̍e̍i̍ a̍ bāla̍ŋ kēēlīa̍a̍ īpāla̍ nde̍ŋ, mɛ̄ɛ̍ wānā su̍mɛ̍i̍yo̍ ō bālū nu̍a̍ā yɛ̍. Ndu̍yɛ̍ nyɛ̄ o̍ nyɛ̄ nya̍ yɔ̄ɔ̍ bāa̍ le̍ tōsāa̍, lā chi᷅ ni̍ nɛ̍ī o̍ nɛ̄ī le̍ni̍ŋ te̍. Le̍ te̍le̍ŋ o̍ te̍le̍ŋ wāŋnda̍ ā wa̍ ni̍ŋ nya̍ nyɛ̄ pālāa̍ tūsīo̍o̍ chōo̍ ndu̍yɛ̍ mā chīīmbūū nyɛ᷅m nyāa̍ŋ. Kɛ̍ a̍ ko̍ŋ kpo̍u̍, wānā o̍ wānā ve᷅ ni̍ŋ mbō māla̍ nya̍ le̍.

³⁰“Wāŋndo̍ ō dūāū ni̍ŋ wa̍nā la̍nɔ̍ɔ̍ fu̍lu̍ le̍ mā cha᷄l nda̍ ndu̍, mī wānā pɔ̍nɔ̍ che᷅le̍ŋ ō kpūwa̍ chūā kōŋ. Wāŋndo̍ ō tāŋgūl ni̍ŋ chi̍ɛ̍īyo̍, mā pōōnda̍ ndu̍ chīɛ̄ī kōŋ o̍ bā, o̍ lu̍e̍ī le̍ni̍ŋ te̍. Wāŋndo̍ ō tōsā ni̍ŋ kpe̍le̍ mākīle̍pīi̍yo̍, kɛ̍ ō di᷅ ni̍ŋ ndu̍ tɔ̄nɔ̄ le̍.

³¹Ya̍a̍mɔ̍ɔ̍wa̍a̍ nyāa̍ ā dīū ni̍ŋ na̍u̍vāā nyāa̍ nya̍ o̍ hɔ̄l, kɛ̍ lā di᷅ ni̍ŋ vi̍sīŋ mu᷅ŋ ī pīlɛ̍ bɛ̍ɛ̍ le̍. Ā chō hūnɔ̄ɔ̄ sōfɛ̍li̍a̍a̍ nyāa̍ bīyɔ̄ɔ̄ nya̍ o̍ hɔ̄l nde̍ŋ mā kūɛ̄nu᷄ŋ a̍ nda̍, lā sɔ̍lā lɛ̍ nda̍ le̍. O̍ ko̍ŋ kɔ̍ɔ̍lī, ā chō hūnɔ̄ɔ̄ sāa̍ nyāa̍ bīū mā ke̍ ya̍a̍mɔ̍ɔ̍wa̍a̍ nyāa̍ mā kūɛ̄nu᷄ŋ a̍ nda̍. Ndu̍yɛ̍ wānā o̍ wānā ve᷅ ni̍ŋ mbō māla̍ nya̍ le̍.

³²Chūāūwāā nyāā wa᷅ŋ lāāndūa̍a̍ a̍ chūāūwāā nyāā wa᷅ŋ pīāāndūa̍a̍, wāŋnda̍ ā bīū ni̍ŋ nda̍ mā yɔ̄ŋgu̍ nda̍ o̍ lɛ̄ŋīī chēle̍ŋ ni̍ŋ māā lāchɛ̄. Lā tōfā ni̍ŋ o̍ nɛ̄ī le̍ nda̍ le̍ īdīi̍ a̍ īchɔ̄l, kɛ̍ ō pīlɛ̍ bɛ̍ɛ̍ o̍ mi̍i̍ŋgu̍ ni̍ŋ nya̍ o̍ ībūŋ te̍. Ndu̍yɛ̍ lā nɔ᷅ ni̍ŋ kpa̍a̍yā o̍ kpāāyā mī lā tōsa̍ mā mīīŋgu̍ nya̍ o̍ ībūŋ te̍.

³³Sāŋgā o̍ sāŋgā nya̍ sāŋgā ni̍ŋ o̍ chīɔ̄ɔ̄ŋ nyāa̍ŋ ni᷄ŋ, lɛ̄ŋndē nya̍ si̍nā bɛ̍ɛ̍ pa̍a̍ndū le̍ le̍ŋ, le̍ŋ le̍ di̍ā ni̍ŋ Sa̍ŋgā nyā ko̍ŋ tɔ̄nɔ̄ ni̍. Ndu̍yɛ̍ le̍ te̍le̍ŋ o̍ te̍le̍ŋ nyɛ̄ pālāa̍ ko̍ nda̍ wā ni̍ŋ nya̍ tūsīo̍o̍ chōo̍ ni̍, mā bīī nya̍ bīyɔ̄ɔ̄ wɔ̄ɔ̍ŋndo̍.

³⁴Sɔ̄ɔ̍ŋ pa̍lāŋ nya̍ chā ni̍ŋ a̍ hɔ̄ltā nyāla̍ŋ ki̍nɛ̍i̍ yo̍ŋ, ŋ̄ tōsā ni̍ŋ mī bōlle̍ ī hīŋnu̍ŋ nya̍.

³⁵Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī hīndɔ̄ɔ̄la̍ nɛ̍ī nɛ̍ī bɛ̄ndōo̍, ndu̍yɛ̍ lā si̍ŋgū le̍ la̍ŋ mī lā fūla̍ nya̍ o̍ pēlo̍ŋ, ndu̍yɛ̍ mī lā tīu̍ nya̍ kɔ̄ɔ̍le̍ŋ kpo̍u̍, chɔ̍ŋ o̍ pēlo̍ŋ mbō he᷄l a̍ bōlle̍ŋ di̍.

³⁶“Nya̍ ni̍, māsa̍ nyā bɛ̍ndū nya̍ chūā ni̍ŋ mbō wa̍ nya̍ chīla̍ŋndo̍ ni̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mā kūɛ̄ a̍ nya̍ o̍ lɛ̄ŋndē nya̍ si̍nā bɛ̍ɛ̍ pa̍a̍ndū le̍ le̍ŋ ni᷄ŋ, lɛ̄ŋndē fi̍nyāā nyāā ma̍māa̍ bɛ̍ɛ̍ nda̍ a̍a̍ si̍nā bɛ̍ɛ̍ le̍ le̍ŋ. Lo̍ŋ nya̍ wā ni̍ŋ nyɛ᷅m wāŋnda̍ tōōsīāā a̍ yɔ̄mnde̍, ndu̍yɛ̍ a̍ pōūta̍ŋ ndo̍ŋ sāāŋgīāllo̍ ni̍, mī lā sōōlūū mu̍ŋ māā mɛ̄lɛ̄ka̍a̍ nyā.

³⁷Lɛ̄ŋīī Mɛ̄lɛ̄ka̍ Ya̍a̍wɛ̄ɛ̄ o̍ sɛ̍ŋī ni̍ŋ nya̍ ni᷄ŋ nde̍, wāŋnda̍ o̍ lɛ̄ŋīī kēŋ ni᷄ŋ, tē ā hu᷄ŋ chi̍ī nyɛ̍ yɔ̍nūŋ ni̍ŋ a̍ nya̍ wo̍ chɔ̄ pɛ̍ kpo̍u̍, kɔ̄ndɔ̄fi̍llo̍ chō nda̍ bīyɔ̄ɔ̄. Ā chō nya̍ sīīŋgūū nyɛ̄ māmāā, ndu̍yɛ̍ mā chē nya̍ nyɛ̄ fo̍ndō fu̍u̍.

³⁸“Lā wāā ni̍ŋ yɛ̍i̍ye̍ ta̍u̍ ta̍u̍ o̍ chīɔ̄ɔ̄ŋ nyāa̍ŋ ni᷄ŋ, kɛ̍ nyɛ̄ dīa̍a̍ nyɛ̄ pɔ̄mbɔ̄ ko̍ni̍ nya̍ sɔ̄lā ni̍ŋ o̍ chīɔ̄ɔ̄ŋ nyāa̍ŋ mu̍ŋ ni᷄ŋ ni̍, kāni̍ fo̍ndōle̍, so̍o̍nu̍a̍a̍ ā chīī ni̍ŋ tɔ̍lɔ̄ɔ̄la̍ŋ o̍ chīɔ̄ɔ̄ŋ mu᷅ŋ ni᷄ŋ kpo̍u̍.

³⁹Lā tōsā ni̍ŋ kpe̍le̍la̍ yɔ̄mīī mākīle̍pīi̍ye̍, ndu̍yɛ̍ mī lā dē kūɛ̍i̍ le̍ yɔ̄mīī kēŋ sōlīo̍o̍ lēni᷄ŋ, kɛ̍ lā ke̍ndī ni̍ŋ ma̍kīle̍pīi̍ o̍ mākīle̍pīi̍ o̍ kpe̍le̍la̍ la̍ŋ ni᷄ŋ te̍, kɛ̄lɛ̄ŋgāāle̍, mī lā ko᷄l mūɛ̄īmā kīle̍pīi̍ma̍ ma̍ŋ, fo̍ndōle̍, dɛ̄lūa̍a̍ ā chō yɔ̄mīī mākīle̍pīi̍ ke̍ŋ tɛ̄ɛ̄mbūū kpo̍u̍.

⁴⁰Lā nɔ̄ ni̍ŋ yɔ̍mīī ɔ̄li̍fīi̍ve̍ ī tūālāā o̍ lɛ̄ŋndē lēŋ ni᷄ŋ kpo̍u̍, kɛ̍ lā sɔ̍lā ni̍ŋ chu̍ɛ̍i̍mā ɔ̄li̍fīi̍mā nya̍ sūūnūŋ ni̍ŋ te̍, kāni̍ fo̍ndōle̍, ɔ̄li̍fīi̍mā nyāa̍ŋ mā di̍ū ni̍ŋ te̍ mī mā chīɛ̄ɛ̄lu̍ŋ kpo̍u̍.

⁴¹Lā vīālū ni̍ŋ chu̍a̍u̍wāā wāŋ pīāāndūa̍a̍ a̍ chūāūwāā wāŋ lāāndūa̍a̍, kɛ̍ ā ve᷅ ni̍ŋ nya̍ o̍ bā le̍, kāni̍ fo̍ndōle̍, ya̍a̍mɔ̍ɔ̍wa̍a̍ nyāa̍ ā kūā ni̍ŋ a̍ nda̍ kpo̍u̍ o̍ bīyɔ̄ɔ̍ ni᷄ŋ.

⁴²Yɔ̄mīī nyɛ̄ī pu̍i̍yɛ̄i̍ kpo̍u̍, so̍o̍nu̍a̍a̍ ā chō ndi̍ hūnɔ̄ɔ̄ tɛ̄ɛ̄mbūū, ndu̍yɛ̍ a̍ tɔ̄lɔ̄ɔ̄ o̍ tɔ̄lɔ̄ɔ̍ wa᷅ ni̍ŋ o̍ chīɔ̄ɔ̄ŋ nyāa̍ŋ ni᷄ŋ.

⁴³“Wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, ā wā ni̍ŋ kpa̍a̍yāa̍ sɔ̄lāa̍ nya̍ chōo̍, kɛ̍ nya̍ nya̍ mī kpāāyā nya̍a̍ ō dɔ̄ɔ̄nāŋ.

⁴⁴Wānāā lēkāa̍wa̍a̍ ka̍ŋ, nda̍ wu̍ū ni̍ŋ nya̍ kūēēla̍ŋ ni̍, kɛ̍ nda̍ bi̍ī ni̍ŋ nya̍ lākūēē o̍ bā le̍. Nda̍ wa᷅ ni̍ŋ lāchi̍ o̍ īsɔ̄ɔ̍ o̍ īsɔ̄ɔ̍ ni̍ŋ ni̍, mī nya̍ wa̍ wānāā wāā kɔ̄ɔ̄lī.

⁴⁵“Sāwāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ke̍ nya̍ la᷅ŋ a̍ pɛ̄ɛ̄kūla̍ŋ nda᷅ŋ nda̍ŋ, nyɛ̄ o̍ nyɛ̄ la̍ di̍mi̍ le̍ to̍sāa̍, tē lā kɛ̄ɛ̍ ndu̍ tōsāa̍ pɛ̍, kpūndɛ̍lā Mɛ̄lɛ̄ka̍ Ya̍a̍wɛ̄ɛ̄ o̍ tu̍si̍ ni̍ŋ nya̍ chōo̍ la̍ŋ, la̍ŋ la̍ wa᷅ ni̍ŋ la̍ŋ ni̍. Ndu̍yɛ̍ kpūndɛ̍la̍ŋ nda᷅ŋ, lā hīāū ni̍ŋ la̍chi̍ a̍ nya̍ dēlɔ̄ɔ̍ chōo̍, ha̍a̍a̍ mbō lo̍ o̍ ko̍ŋ, mī lā tɛ̄ɛ̄mbu̍u̍ nya̍ kpo̍u̍.

⁴⁶Nya̍ ni̍, ndu̍yɛ̍ a̍ wānā o̍ wāna̍ fu̍lā ni̍ŋ o̍ pūlālē nyāle̍ŋ chōo̍, kpūndɛ̍la̍ŋ ndāŋ la̍ŋ la̍ wa᷅ ni̍ŋ nya̍ chōo̍ le̍ fɛ̍ɛ̍ŋ a̍ fɛ̍ɛ̍ŋ ni̍, māā lātāāmāsi̍ le̍ chɔ̄mndo̍ māā Mɛ̄lɛ̄ka̍ Kpe̍e̍kpe̍i̍ cho̍ nya̍ nyɛ̄ pālāa̍ tūsīo̍o̍ chōo̍ ni̍.

⁴⁷Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō lo̍ o̍ ko̍ŋ mbo̍ dūāū nya̍ sa̍lā, mi̍ lā sɔ̄lā ta̍u̍ ta̍u̍. Kɛ̍ lā chɛ᷄l mī lā sāāŋgi̍a̍l ndu̍ a̍ kɔ̄ltā kɛ̄ndɛ̄la̍ŋ, ndu̍yɛ̍ a̍ nya̍a̍lo̍o̍ le̍.

⁴⁸Le̍ he̍ī, ō chō ya̍a̍mɔ̍ɔ̍wa̍ mālɔ̄ɔ̄ mā hu᷄ŋ chi᷅ŋa̍la᷅ŋ nya̍ a̍ sɔ̍ŋgɔ̄ɔ̍, ndu̍yɛ̍ mā yēm nya̍, mī lā sāāŋgi̍a̍l nda̍ māā lāchɛ̄. Yīa̍a̍ŋ mā chō nya̍ bīyɔ̄ɔ̄, ndu̍yɛ̍, mī kōlɔ̄ɔ̍ ō bīī nya̍ o̍ ko̍ŋ kɔ̍ɔ̍lī, mī fɛ̍li̍o̍o̍ ō bīī nya̍. Le̍ te̍le̍ŋ o̍ te̍le̍ŋ o̍ tāmbe̍i̍ ni᷄ŋ nya̍ wā ni̍ŋ ni̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ lō nya̍ nyɛ̄ pālāa̍ tūsīo̍o̍ chōo̍ ha̍a̍a̍ mbō lo̍ o̍ ko̍ŋ mbō tɛ̄ɛ̄mbu̍u̍ nya̍ kpo̍u̍.

⁴⁹Mɛ̄lɛ̄ka̍ Ya̍a̍wɛ̄ɛ̄, o̍ cho̍ tōsā mī ya̍a̍mɔ̍ɔ̍wa̍ ā chɛ᷄ŋ o̍ lɛ̄ŋndē lēvīltē bɛ̄ŋnde̍ŋ ni᷄ŋ pɔ̍, lɛ̄ŋnde̍ cho̍ o̍ chi̍e̍ēŋndo̍ mɛ̄ɛ̄lu̍la̍ŋ nde̍ŋ, lɛ̄ŋndē nya̍ si̍nā bɛ̍ɛ̍ su̍ɛ̍i̍ ndɛ̄i̍ ma̍ŋgālɛ̄i̍ pɛ̄ŋgu̍ le̍ le̍ŋ, mā hu᷄ŋ chi᷅ŋa̍la᷅ŋ nya̍ a̍ sɔ̍ŋgɔ̄ɔ̍. Ya̍a̍mɔ̍ɔ̍wa̍ ha̍ā ā dēl ni̍ŋ nya̍ chōo̍ o̍ lē pīlɛ̍ ni̍ŋ, to̍fa̍ wɔ̍ ko̍ mɛ̄ɛ̍ kōwɔ̍ɔ̍ ō dēl nu̍a̍ā nyɔ̄ɔ̍ chōo̍ o̍ lēpīlɛ̍ ni᷄ŋ le̍ ndu̍ bīyɔ̄ɔ̍ yɛ̍.

⁵⁰Ya̍a̍mɔ̍ɔ̍wa̍a̍ de᷅l ni̍ŋ nya̍ ha̍ā chōo̍ wa̍, tē wānā mɛ̍ɛ̍nda̍ŋ nda̍ hɔ̄lla̍ pɛ̍, sīōōŋnde̍ bi̍ī nu̍m ni̍. Ā yɔ᷄ŋ bɛ̍ɛ̍ āā bɛ̄ndū yūwo̍, ā nɔ᷅ ni̍ŋ le̍bɛ̍ɛ̍ le̍ ndu̍ le̍, kɛ̄lɛ̄ŋgāāle̍, mā nɔ̄ nyīɛ̍ɛ̍ye̍ le̍ wānā o̍ wānā.

⁵¹Nāūwāā nyāa̍ kpo̍u̍ ā chō nda̍ hūnɔ̄ɔ̄ dīo̍, o̍ ko̍ŋ kɔ̍ɔ̍lī, nyɛ̄ o̍ nyɛ̄ dīāā nya̍ nɔ̄ mā pōōndi̍a̍a̍ nya̍ o̍ lābā, mā lo̍ nya̍ tāūwo̍ ha̍a̍a̍, mī lā chūu̍ kpo̍u̍. Nyɛ̄ o̍ nyɛ̄ nya̍ nɔ̄, nyɛ̄ dīāā ni̍, māmūɛ̄ī ni̍, chūɛ̄īmā ɔ̄li̍fīi̍ma̍ ni̍, nāū ni̍, sāā ni̍, chūīŋ ni̍, ā chō nya̍ pōōndīāā o̍ lābā kpo̍u̍ mā mɛ̄i̍ nya̍ bālā fo̍ndō. Ko̍ŋ cho̍ tōsā ni̍, nya̍ kpo̍u̍ mī lā chūu̍ pa̍ku̍.

⁵²Chi̍e̍e̍ŋ nyāa̍ŋ nɔ᷅ ni̍ŋ sa̍a̍sāla̍ŋ ndo̍ŋ kpo̍u̍ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ kīo̍o̍ le̍ŋ ni̍ŋ, ā chō mu̍ŋ hūnɔ̄ɔ̄ bālɔ̄ɔ̄ kpɔ̍kɔ̍su̍ le̍ nya̍ chīŋa̍la᷅ŋndo̍. Lā yīyāŋ ni̍ŋ le̍ mɛ̄ɛ̍ chi̍e̍e̍ŋ mu̍ŋ ŋ̄ nɔ̄ ni̍ŋ sāāsāla̍ vi̍lɛ̄īlā bɛ̄ndūla̍ŋ, ndu̍yɛ̍ mī lā wa̍ sāāsāla̍ ka̍lā ka̍lālā bɛ̄ndū yɛ̍, māā nyɛ̄ o̍ nyɛ̄ nɔ̍lā mbō yɔ̄nu̍ŋ nya̍ o̍ chi̍e̍e̍ŋ mu̍ŋ ni᷄ŋ te̍, kɛ̍ ya̍a̍mɔ̍ɔ̍wa̍a̍ nyāa̍ ā chō sāāsāla̍ la̍ŋ pēsī pēsī kpo̍u̍.

⁵³“Bōōndi̍i̍ ya̍a̍mɔ̍ɔ̍wa̍ ā bālū ni̍ŋ chi̍e̍e̍ŋ nyāa̍ŋ mā dɔ̄ū mu̍ŋ o̍ pi̍ŋndo̍ ni᷄ŋ kpɔ̍kɔ̍su̍ le̍ nya̍ chīŋa̍la᷅ŋndo̍ ve̍, sāŋga̍ wa᷅ ni̍ŋ nya̍ chōo̍ wo̍, ō wā ni̍ŋ o̍ bɔ̍ɔ̍. Nyɔ̄ɔ̍ ō kīndīlā ni̍ŋ nya̍ ha̍a̍a̍ chūāūwāā wāŋ pīāāndūāā a̍ chūāūwāā wāŋ lāāndūāā, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ke̍ nya̍ wa̍, vīsīŋ nda̍ŋ mu̍ŋ nya̍ wā ni̍ŋ di̍o̍o̍ ni̍.

⁵⁴Wāna̍ kɔ̄l kālo̍o̍, o̍ nɔ̍ kɔ̄l kūmbīa̍ŋndo̍ le̍ wānā o̍ wānā wo̍, nyɔ̄ɔ̍ ō ŋūāū ni̍ŋ ndu̍ te̍i̍, chūāūwāā ndūa̍a̍ nda̍ o̍ di̍ū ni̍ŋ le̍ di̍o̍o̍ ni̍. Kāni̍ fo̍ndōle̍, ō nɔ᷅ ni̍ŋ nyɛ᷅ o̍ nyɛ̄ o̍ yɔ᷅ŋ te̍, ō nɔ᷅ ni̍ŋ nyɛ᷅ o̍ nyɛ̄ o̍ de᷅ le̍. Ndu̍yɛ̍ tē ō wa̍ vīsīŋ chūāūwāā ndūāā ka̍ŋ dīo̍o̍ pɛ̍, wānāyɛ̍ī ndūɛ̍i̍ bɛ̍ɛ̍ kɛ̍sɛ̍ kɛ̍sɛ̍, kɛ̄lɛ̄ŋgāā la̍a̍ ndɔ̍ o̍ ka̍a̍la̍ wo̍, ɔ̄ɔ̄ chūāūwāā ndūa̍a̍ lo̍ yōōmū wa̍, ō ke᷅ ni̍ŋ nda̍ vīsīŋ mu᷅ŋ te̍.

⁵⁵

⁵⁶Wānā la̍nɔ̍ kɔ̄l kālo̍o̍ kpo᷅ke̍, o̍ nɔ̍ kɔ̄l kūmbīa̍ŋndo̍ le̍ wāŋndā chīe̍e̍ya̍, ndu̍yɛ̍ mbo̍ sūl ha̍a̍a̍ ō ye̍e̍mā bɛ̍ɛ̍ mbō pīla̍ pēlēi̍ lɛ̄ŋ te̍ wo̍, nyɔ̄ɔ̍ ō ŋūā ni̍ŋ ndu̍ ha̍a̍a̍ ndu̍ bɛ̍ɛ̍ le̍nde̍ ko̍ni̍ o̍ to̍sā ni̍ŋ ni̍. A̍ bōōndi̍i̍ ya̍a̍mɔ̍ɔ̍wa̍ ā bālū ni̍ŋ chi̍e̍e̍ŋ nyāa̍ŋ le̍ mu̍ŋ chīŋa̍la᷅ŋndo̍ ve̍, wānā la̍nɔ̍ wa̍ā nu̍a̍ā, nyɔ̄ɔ̍ ō ŋūāū ndu̍ ni̍ŋ le̍ nyɛ̄ dīa̍a̍ ha̍a̍a̍, chɛ̄lɛ̄kpɛ̍ le̍nde̍ o̍ ve̍lū sɛ̄nɛ̄īyo̍, ndu̍ o̍ di̍ā ni̍ŋ sɔ̍ɔ̍sɔ̍ɔ̍ ni̍, lātūlu̍ a̍ kɔ̄ɔ̄līma̍ ma̍ŋ kpo̍u̍. Ndu̍yɛ̍ pɔ̍nɔ̍ ndɔ̍ o̍ ka̍a̍la̍ kpe̍e̍kpe̍i̍yo̍ bɛ̍ɛ̍, ā chūāūwāā ndūa̍a̍ ō ke᷅ ni̍ŋ nda̍ nyɛ̄ o̍ nyɛ̄ le̍.

⁵⁷

⁵⁸“Le̍la̍ŋ nyɛ̄ o̍ nyɛ̄ sāwāla̍ŋ nda᷅ŋ lā dīmi̍ le̍ tōsāa̍, mbo̍ wā ō pōōnyīāā o̍ yāu̍ lāsāwāa̍ ho̍ō ni᷄ŋ, tē lā kɛ̄ɛ̍ le̍ ndu̍ tōsāa̍ pɛ̍, ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, dīōlā ndɔ̄la̍ cho̍ la᷅ŋ dīōlā kɔ̄ndɔ̄fi̍ltā bɛ̄ndū, ndu̍yɛ̍ mi̍ lā wā dīōlā īsīōōŋ nda̍ŋ, te̍ lā ke̍ la̍ŋ bɛ̄ɛ̄le̍ŋ te̍,

⁵⁹nya̍ ni̍, a̍ chūāūwāā nyāa̍ lēpūlā kɛ᷅, Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī sɔ̄ɔ̍ŋ kpūndɛ̍ŋ bɛ̄ndo᷄ŋ, ŋ̍ yɔ̍nūŋ mī sīōōŋnde̍ ī bīī wānā o̍ wānā wo̍ŋ ŋ̄ kōma̍l nya̍, mī ŋ̄ wa̍ nya̍ chōo̍ le̍ fɛ̍ɛ̍ŋ a̍ fɛ̍ɛ̍ŋ. O̍ chō tōsā mī nāālā wɔ̄ɔ̍ŋ wɔ̍ɔ̍ŋndā bɛ̄ŋnda̍ŋ lā bīī nya̍, mī lā sīmnu᷄ŋ na̍a̍lā ŋ̄kɔ̄ŋnja̍.

⁶⁰Nāālā nya̍ chē mbo̍ tūsī wāŋnda̍ I̍chi̍pi̍ chōo̍, mi̍ sīōōŋnde̍ bīī nya̍ bīyɔ̄ɔ̄ bɛ̄ndōo̍ le̍ la̍ŋ nda̍ŋ, la̍ŋ o̍ cho̍ nya̍ tūsī chōo̍ kpo̍u̍ ni̍. Ndu̍yɛ̍ lē fɛ̍ɛ̍ŋ a̍ fɛ̍ɛ̍ŋ lā si̍ŋgū ni̍ŋ a̍ la̍ŋ te̍.

⁶¹Ō chō nya̍ nāālā yɛ̍ yɛ̍la̍ che᷅le̍ŋ tūsī chōo̍, la̍ chō bɛ̍ɛ̍ la̍ tūwāā o̍ yāūwo̍ ho̍ō ni᷄ŋ te̍ la̍ŋ, ha̍a̍a̍ mbō lo̍ o̍ ko̍ŋ mbō tɛ̄ɛ̄mbu̍u̍ nya̍ kpo̍u̍.

⁶²Mi̍ chē bɛ̍ɛ̍ mi̍ lā kūī ha̍a̍a̍, mɛ̄ɛ̍ lōo̍ŋ ŋ̄ chō nu̍a̍ā chōo̍ cho̍o̍ ŋ̄ chu̍ū chɔ᷅m te̍ yɛ̍ ni̍, kɛ̍ ō chō tōsā mī lā vī ta̍u̍ ta̍u̍, wānāa̍ lo᷅ ni̍ŋ yo̍o̍mū wa̍, ā ve᷅ ni̍ŋ a̍ bɔ̍ɔ̍ le̍, kāni̍ fo̍ndōle̍, le̍ mɛ̄ɛ̍ nya̍ kɛ̄ɛ̍ le̍ ndu̍ Mɛ̍lɛ̄ka̍ Ya̍a̍wɛ̄ɛ̍, Mɛ̄lɛ̄ka̍ nyāa̍ dīōmndo̍ tūēīyɔ̄ɔ̍ yɛ̍.

⁶³Ndu̍yɛ̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, ndu̍ o̍o̍ na̍ŋ nu̍a̍ā kɔ̄l le̍ nya̍ sɔ̄ɔ̍ŋ kɛ̍ndɔ᷄ŋ tōsāllo̍ ndu̍yɛ̍ a̍ le̍ tōsāa̍ mī lā kūi̍ ta̍u̍ ta̍u̍ yɛ̍, le̍nde̍ o̍ na᷅ŋ ni̍ŋ vɛ̍lɛ̄ kɔ̄l le̍ nya̍ tɛ̄ɛ̄mbūūwo̍, ndu̍yɛ̍ mbō chīi̍ a̍ nya̍ ni̍. Ō chō nya̍ hūnɔ̄ɔ̄ fāŋā ba̍ū o̍ lɛ̄ŋndē nya̍ chō le᷅ŋ kɔ̄la̍ŋ bīyɔ̄ɔ̍ le̍ŋ ni᷄ŋ.

⁶⁴“Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ sɛ̄ŋī kpo̍u̍ o̍ chi̍e̍ēŋndo̍ ni᷄ŋ, mī lā tīu̍ bā o̍ bā fe̍e̍. O̍ lɛ̄ŋīī kēŋ ni᷄ŋ nya̍ chō lākɔ̄ nyɛ̄m chēle̍ŋndo̍ŋ sāāŋgīāl ni̍ mī lā sōōlūū mu̍ŋ māā mɛ̄lɛ̄ka̍ā nyā, nyɛ̄m wāŋnda̍ ā tōōsīāā a̍ yɔ̄mnde̍, ndu̍yɛ̍ a̍ pōūta̍ŋ mā sōōlūū mu̍ŋ ndo̍ŋ, nyɛ̄m nya̍, ɔ̄ɔ̄ fi̍nyāā nyāā ma̍māa̍ bɛ̍ɛ̍ nda̍ a̍a̍ si̍nā pa̍a̍ndū le̍ wo̍ŋ.

⁶⁵Ndu̍yɛ̍ lā wā ni̍ŋ o̍ lɛ̄ŋnde̍ he̍ī ni᷄ŋ, lā sɔ̍lā ni̍ŋ pɛ̍ŋgī o̍ pɛ̄ŋgī o̍ yōōmūlā nyāla̍ŋ ni᷄ŋ te̍, ndu̍yɛ̍ lā sɔ̍lā ni̍ŋ fo̍ndā o̍ fo̍ndā chālāā nāa̍ nya̍ wā mī lā wa̍ a̍ kɔ̄l nyūlū le̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā le̍ te̍le̍ŋ o̍ te̍le̍ŋ mī būūla᷄ŋnda̍ŋ lā wa̍ o̍ kɔ̄ltā nyāla̍ŋ ni᷄ŋ. Lā tōfā ni̍ŋ o̍ nɛ̄ī ha̍a̍a̍ le̍ mālāa̍, mī hɔ̄lta̍ŋ lā sāŋga̍ nya̍ a̍ tōfāa̍ lā sɔ̍lā ni̍ŋ ma̍lā le̍. Le̍ te̍le̍ŋ o̍ te̍le̍ŋ kɔ̄lta̍ŋ lā wā ni̍ŋ nya̍ lā tāmbɛ̍i̍.

⁶⁶Le̍ te̍le̍ŋ o̍ te̍le̍ŋ, yōōmūlā nyāla̍ŋ lā wā ni̍ŋ o̍ kpūndɔ̍ɔ̍ ni᷄ŋ. Le̍ īdīi̍ a̍ īchɔ̄l, lā wā ni̍ŋ o̍ sīōōŋīī bɛ̄ndūe̍i̍ ni᷄ŋ. Lā wā ni̍ŋ yi̍ya᷄ŋndo̍ māā ō lānda᷄ŋ ko̍ni̍ yōōmūlā nyāla̍ŋ lā chō ni̍.

⁶⁷Lēpāa̍ o̍ lēpāa̍, lā wā ni̍ŋ sɔ̍ɔ̍ŋ ŋ̄sīōōŋ bɛ̄ndo᷄ŋ chɔ̄ɔ̍ a̍ hɔ̄ltā nyāla̍ŋ. Sīōōŋnde̍ ī wā ni̍ŋ nya̍ ha̍a̍a̍, pāa̍le̍ŋ le̍ sīā ni̍ŋ i̍di̍i̍ mī lā yēēma̍ māā nyūmnda̍ŋ mā kēle̍ŋa̍ to̍lɔ̄ɔ̄. Ndu̍yɛ̍ tē nyūmnda̍ŋ mā tōl vɛ̄lɛ̄ pɛ̍, lā yēēmā ni̍ŋ māā pāa̍le̍ŋ lē kēle̍ŋa̍ ko̍ si̍ɔ̄.

⁶⁸Mi̍ chē bɛ̍ɛ̍ mi̍ Mɛ̄lɛ̄ka̍ Ya̍a̍wɛ̄ɛ̄, ndu̍ o̍o̍ di̍mu̍l nya̍ māā fɛ̍ɛ̍ŋ a̍ fɛ̍ɛ̍ŋ lā mi̍i̍ŋgū lɛ̍ I̍chi̍pī le̍ ni̍, kɛ̍ tē lā sōli̍ ndu̍ dīōm pɛ̍, ō chō tōsā mā mīīŋgu̍ a̍ nya̍ I̍chi̍pī o̍ dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ ni᷄ŋ. Ndu̍yɛ̍ mɛ̄ɛ̍ nya̍ chō kpo̍u̍, wānā pɔ̍nɔ̍ ni̍, wānā la̍nɔ̍ ni̍, lā yēēmā ni̍ŋ le̍ nya̍ pi̍la̍ pīsīo̍o̍ wāŋnda̍ I̍chi̍pī o̍ bā o̍ chɛ̄le̍ŋ ni᷄ŋ, kɛ̍ wānā o̍ wānā o̍ ye̍e̍mā ni̍ŋ mbō pēndū nya̍ le̍.”

Read Southern Kisi Dītɔ̍nɔ̍mi̍ī 28 Bible Online

Dītɔ̍nɔ̍mi̍ī 28 - Southern Kisi bible

Dītɔ̍nɔ̍mi̍ī 28