Read Southern Kisi Dītɔ̍nɔ̍mi̍ī 29 Bible Online

Dītɔ̍nɔ̍mi̍ī 29 - Southern Kisi bible

Dītɔ̍nɔ̍mi̍ī 29

¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē le̍ mī Mūu̍sē o̍ to̍sa̍ mī ndu̍ Mɛ̍lɛ̍ka̍ Ya̍a̍wɛ̄ɛ̄ o̍ yi̍i̍ kpe̍ma̍a̍ che᷅le̍ŋ a̍ wāŋnda̍ I̍sɔ̄lūɛ̄ī o̍ lɛ̄ŋndē Mo̍wa̍bīle̍ŋ ni᷄ŋ, ō fūla̍ o̍ kpe̍ma̍ ndu̍ Mɛ̍lɛ̄ka̍ yīi̍ a̍ nda̍ o̍ Pēmbīī Sa̍a̍nāīve̍ wo̍ kɔ̄ɔ̄lī. Dīōmndā kpe̍ma̍ ko̍ŋ ō yīīnu̍ŋ chōo̍ la̍ŋ la̍ cho̍ la᷅ŋ ni̍.

²Mi̍ Mūu̍sē o̍ lo᷅ o̍ ko̍ŋ mbo̍ chūūŋgīāā I̍sɔ̄lūɛ̍i̍ya̍ kpo̍u̍ nāa̍ pi᷅lɛ̍. Mbo̍ dīmūl nda̍ āā, “Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ I̍chi̍pī, le̍ māsā bɛ̍ndōo̍ I̍chi̍pī nda̍ lāŋgba̍ā ndūāā ka᷅lla̍ ndu̍yɛ̍ a̍ wāŋnda̍ I̍chi̍pī kpo̍u̍ nyɛ᷅ pālāa̍ tūsīo̍o̍ chōo̍, nya̍ pi̍la̍ o̍ hɔ̄l o̍ to̍sa̍ ndu̍ ni̍.

³Kpūndɛ̍lā o̍ to̍sa̍ mi̍ lā yɔ̄nu᷄ŋ lo̍ŋ nda̍ŋ ni̍, a̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ o̍ to̍sa̍ wo̍ŋ, ndu̍yɛ̍ a̍ ka̍a̍ma̍ālā bɛ̄ŋndā o̍ to̍sa̍ la̍ŋ, nya̍ pi̍la̍ lā chē kpo̍u̍.

⁴Kɛ̍ nyɛ̄ o̍ nyɛ̄ nya̍ chē lo̍ŋ a̍ hɔ̄ltā nyāla̍ŋ, ndu̍yɛ̍ mi̍ lā tūɛ̄ī a̍ nīlā nyāla̍ŋ, a̍ pāa̍le̍ hāūle̍ŋ nde᷅ŋ bɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ke̍ wɔ̍ nya̍ sīnā pɛ̄ŋgu̍ ko̍ŋ mī lā sīna̍ ndu̍ pɛ̄ŋgu̍ le̍.

⁵Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘Lē wɔ̄sīla̍ŋ be̍le̍ hi̍ɔ̍ɔ̍lu̍, ya̍ Mɛ̍lɛ̄ka̍ Ya̍a̍wɛ̄ɛ̄, I̍ cho̍ hūnɔ̄ɔ̍ a̍ nya̍ o̍ lɛ̄ŋndē po̍lte̍ŋ ni᷄ŋ. Ndu̍yɛ̍ a̍ te̍le̍ŋ vi̍lɛ̄ī nya̍ chīi̍ ko̍ŋ o̍ ti᷅ŋndo̍ tɛ̍ɛ̍ŋ ndo̍ kpo̍u̍, nyɛ̄ chūɛ̄ɛ̄na᷄ŋ si̍ɔ̍ŋ nya̍ lēkɔ̄ɔ̍ le̍, kɔ̄vɛ̄i̍ si̍ɔ̍ŋ nya̍ o̍ ŋ̄pēlū le̍. Ndu̍yɛ̍ o̍ ko̍ŋ kɔ̍ɔ̍lī, o̍ hūnɔ̄ɔ̄ nyā ko̍ŋ ni᷄ŋ, nya̍ a̍a̍ nɔ̍ be̍e̍dīi̍ le̍ dīo̍ le̍, nya̍ a̍a̍ nɔ̍ vɛ̄lɛ̄ māmūɛ̄ī le̍ kōlɔ̄ɔ̄ le̍, kɛ̄lɛ̄ŋgāāle̍, mī nya̍ a̍a̍ nɔ̍ mūɛ̄īmā kālā ka̍lā. Ya̍ wa̍ nya̍ nyɛ̄ dīa̍a̍ kīo̍o̍ a̍ te̍le̍ŋ ko̍ŋ ni̍. Le̍ sa̍bū ya̍ I̍ to̍sa̍ mu᷅ŋ kpo̍u̍ wo̍ cho̍ ni̍, māā le̍ mī lā sīna̍ māā ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍.’

⁶

⁷Ndu̍yɛ̍ mɛ̄ɛ̍ na̍a̍ ŋ̄ fūūlu̍u̍ o̍ fo̍ndā na̍a̍ ŋ̄ chō ho̍ō wo̍, mi̍ Si̍hɔ̄ŋ, māsāa̍ le̍ Hɛ̍si̍bɔ̄ŋ, a̍ Ɔ̍kū, māsāa̍ le̍ Ba̍a̍sīāŋ, a̍ hu̍ŋ sa̍ā na̍a̍ a̍ sɔ̍ŋgɔ̄ɔ̍. Kɛ̍ mi̍ ŋ̄ nɔ̄lā mi̍ ŋ̄ yām nda̍,

⁸ndu̍yɛ̍ mi̍ ŋ̄ bīī lɛ̄ŋndē ndāle̍ŋ. Lɛ̄ŋndē lēŋ na̍a̍ ŋ̄ ke̍ le᷅ŋ yu̍ŋgu̍ Lūbɛ᷅ŋndo̍ ni̍, a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ tɛ̄ndāa̍ tɛ̄ɛ̄ŋ, māā nyɛ̄ ndā.

⁹Le̍la̍ŋ, kpe̍ma̍ cho̍ ho̍ō hūnɔ̄ɔ̄ yīīnɔ᷄ŋndo̍, nyɛ̄ o̍ nyɛ̍ cho̍ dīmi᷄ŋ o̍ kpe̍ma̍ ko̍ŋ ni᷄ŋ, mi̍ lā nɔ̄ le̍ ndu̍ tōsāa̍ kūmbū nyāa̍, lā wa̍ sa̍kpō o̍ ndu̍ tōsāa̍ ni᷄ŋ. Ko̍ŋ to̍sa̍ ni̍ mī nyɛ̄ o̍ nyɛ̄ ō wa̍ ō kɛ̄ndɛ̄ a̍ nya̍ o̍ nyɛ̄ o̍ nyɛ̄ ni̍ŋ nya̍ tōsa̍.

¹⁰“Nya̍ I̍sɔ̄lūɛ̍i̍ya̍ kpo̍u̍, chɔ̍ŋ a̍ wānāa̍ cho̍ nya̍ chīla̍ŋnda̍, mbo̍ kūā a̍ lāŋgba̍ā nyāā ka᷅lla̍, a̍ wānāā nyāā bɛ̍ndūa̍a̍, a̍ wānā pɔ̍nɔ̍ o̍ wānā pɔ̍nɔ̍ cho̍ I̍sɔ̄lūɛ̄ī, lātūlu̍ a̍ chūāūwāā nyāa̍, a̍ lāāndāā nyāa̍, a̍ wānāā lēkāa̍wa̍a̍ cho̍ nya̍ tɛ̄ɛ̄ŋ mā tīŋgūl nya̍ yɔ̄mnde̍, ndu̍yɛ̍ mā vīlūl nya̍ mɛ̄ŋnda̍ŋ nda̍, nya̍ kpo̍u̍ lā chō īsīsi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ hɔ̄l pāa̍le̍ hāūle̍ŋ nde᷅ŋ.

¹¹

¹²Lā lo̍ i̍si̍si̍ na̍nu᷄ŋ pa̍a̍le̍ hāūle̍ŋ nde᷅ŋ le̍ mī lā lūɛ̄ī o̍ kpe̍ma̍a̍ bɛ̄ŋgu̍, kpe̍ma̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō yīī a̍ nya̍ wo̍, ndu̍yɛ̍ mī lā chūa̍ būŋgɛ̄i̍ māā lā tōsā ni̍ŋ pɛ᷄llo̍ o̍ nya̍a̍ o̍ kpe̍ma̍a̍ ho̍ō ni᷄ŋ.

¹³Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍ma̍ ha̍ū mbō pēēlu̍ būŋgɛ̄ī ndūɛ̍i̍ mbō sīīŋgu̍u̍ nya̍ wānāā ndɔ̄, ndu̍yɛ̍ mī ndu̍ bɛ̍ɛ̍ o̍ wa̍ Mɛ̄lɛ̄ka̍ nyā. Būŋgɛ̄ī ndūɛ̍i̍ o̍ chu̍e̍l nya̍, ndu̍yɛ̍ mbo̍ chūēl vɛ̄lɛ̄ fi̍nyāā nyāā ma̍māa̍ E̍bīlāha᷅m, a̍ Āa̍se̍ a̍ Che̍kɔ̍pū ndu̍yɛ̍ mbo̍ mēnāla᷄ŋ nda̍ ve̍ ndi̍ cho̍ ke̍ŋ ni̍.

¹⁴Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘Wāŋnda̍ I̍sɔ̄lūɛ̄ī, nya̍ si̍m ha̍ā na̍nu᷄ŋ ya̍ o̍ hɔ̄l pāa̍le̍ hāūle̍ŋ nde᷅ŋ nda̍, ō cho̍ ko̍ a̍ nya̍ le̍ ya̍ I̍ cho̍ kpe̍ma̍a̍ ho̍ō yīīyo̍, ndu̍yɛ̍ mi̍ wa᷅ nya̍ nyɛ̄ o̍ nyɛ̄ nya̍ nɔ̄ le̍ tōsāa̍ o̍ kpe̍ma̍a̍ ho̍ō ni᷄ŋ chɔ̄mndo̍ le̍. Kpe̍ma̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō ho̍ō yīīyo̍ a̍ nya̍ wo̍, I̍ cho̍ ndu̍ vɛ̄lɛ̄ yīīyo̍ a̍ wānā o̍ wāna̍ fu̍la̍ ni̍ŋ o̍ pūlāle̍ nyāle̍ŋ chōo̍.’

¹⁵

¹⁶“Wāŋnda̍ I̍sɔ̄lūɛ̄ī, lā lōōnu̍ŋ ndɔ̍ mɛ̄ɛ̍ na̍a̍ ŋ̄ wa̍ I̍chi̍pī yɛ̍. Mālɔ̄ɔ̄ na̍a̍ ŋ̄ ma᷄l le̍ hūnɔ̄ɔ̍ wo̍, kāa̍la̍ wa̍ na̍a̍ īchāli̍ lāchi̍ mi̍ kēēkū o̍ lɛ̄ŋīī ndɛ̄i̍ ni᷄ŋ nda̍ŋ, lā sīnā mɛ̄ɛ̍ na̍a̍ ŋ̄ lōōku̍ nda̍ kēēkū tɛ̄ɛ̄ŋ mi̍ ŋ̄ hīāū yɛ̍. Wāŋnda̍ I̍chi̍pī ni̍, a̍ kāa̍la̍ na̍a̍ ŋ̄ kēēku̍ la᷅ŋ tɛ̄ɛ̄ŋ mi̍ ŋ̄ hīāū la̍ŋ, lā chē nyɛ̄m nda̍ sōōlūū māā mɛ̄lɛ̄ka̍ā ndā wo̍ŋ. Nyɛ̄m nda̍ tōōsīāā a̍ yɔ̄mnde̍, ndu̍yɛ̍ a̍ pōūta̍ŋ, o̍ ko̍ŋ kɔ̍ɔ̍lī, a̍ ka̍ni̍i̍ hu̍mbūe̍i̍, ndu̍yɛ̍ a̍ ka̍ni̍i̍ si̍a̍ŋɛ̄i̍, mi̍ Mɛ̄lɛ̄ka̍ tūl mu̍ŋ yɛ̄le̍ŋ tūl bɛ̄ndōo̍ wo̍ŋ, mu̍ŋ wāŋnda̍ ha̍ā ā sōōlūū ni̍.

¹⁷

¹⁸Le̍ sa̍bōo̍ ho̍ō Mɛ̄lɛ̄ka̍ Ya̍a̍wɛ̄ɛ̄ o̍ cho̍ hāū kpe̍ma̍a̍ ho̍ō yīīyo̍ a̍ nya̍ ni̍. Nya̍ cho̍ ha̍ā na̍nu᷄ŋ pa̍a̍le̍ hāūle̍ŋ nde᷅ŋ nda̍ ki̍nɛ̍i̍, wānā pɔ̍nɔ̍ ni̍, wānā la̍nɔ̍ ni̍, a̍ chīɛ̄īlā nyāla̍ŋ, ndu̍yɛ̍ a̍ yu̍ŋgu̍la̍ nyāla̍ŋ kpo̍u̍, lā mu̍lūl Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ kɔ̄ɔ̍, mī lā mūli̍ŋ nyɛ᷅m wāŋnda̍ ha̍ā ā sōōlūū mu᷅ŋ ndo̍ŋ sōōlūūwo̍ le̍. Tē wānā o̍ wānā o̍ wa̍ nya̍ tɛ̄ɛ̄ŋ pɛ̍, mbo̍ mūli᷄ŋ nyɛ᷅m mu᷅ŋ sōōlūūwo̍, wānā ko̍ŋ ō wā ma̍wa̍ā nya̍ tɛ̄ɛ̄ŋ mɛ̄ɛ̍ tɔ̄lɔ̄ɔ̄ wɔ̄ɔ̍ŋndo̍ ō sīm nu̍a̍ā o̍ tɔ̄lɔ̄ɔ̍ tɛ̄ɛ̄ŋ mbō kūām ko̍mɔ̄ɔ̄ lōlɛ̍i̍yo̍, tē wānā de᷅ ndu̍ pɛ̍ ā vī yɛ̍.

¹⁹Ndu̍yɛ̍ wānāā wāā nu̍a̍ā ā tūe̍i̍ bɛ̍ɛ̍ se̍ndi̍la̍ cho̍ la᷅ŋ lā pōōnyīāā o̍ yāu̍ kpe̍ma̍a̍ ho̍ō ni᷄ŋ nda̍ŋ, ā sa̍a̍lāŋ bɛ̍ɛ̍ le̍, yīya᷄ŋndo̍ nda̍ yīyāŋ o̍ kɔ̄ltā ndāla̍ŋ ni᷄ŋ ni̍ māā a̍ bōllē kālālē le̍ŋ to̍sāa̍ le̍ŋ fa̍ū, māā nyɛ̄ o̍ nyɛ̄ chō wā ō kɛ̄ndɛ̄ a̍ nda̍. Ndu̍yɛ̍ yīya᷄ŋ ko̍ŋ ndu̍ to̍sā ni̍ŋ ni̍ mī lā wa̍ ā tɛ̄ɛ̄mbāā mɛ̄ɛ̍ nya̍ chō kpo̍u̍, wānā kɛ̍ndɛ̄ ni̍, wānā wɔ̍ɔ̍ŋ ni̍. Le̍la̍ŋ lā chɛ᷅l mī wānāā wāā nu̍a̍ā ā wa̍ nya̍ tɛ̄ɛ̄ŋ te̍.

²⁰Ndu̍yɛ̍ wānāā wāā nu̍a̍ā, Mɛ̄lɛ̄ka̍ Ya̍a̍wɛ̄ɛ̄ o̍ nɔ̍lā mbō ma᷄l nda̍ le̍ nyɛ̄ nda̍ tōsa̍ wo̍ le̍. Tu̍mbo̍o̍ o̍ du̍a̍u̍nūŋ a̍ nda̍ o̍ ka̍lā ka̍lā ni̍, mbō tɛ̄ɛ̄mbu̍u̍ nda̍, mɛ̄ɛ̍ yīŋndē bɛ̄ŋnde̍ŋ lē tɛ̄ɛ̄mbūū nu̍a̍ā nyɔ̄ɔ̍ yɛ̍. Ndu̍yɛ̍ o̍ ko̍ŋ kɔ̍ɔ̍lī, sēndi̍ o̍ sēndi̍ cho̍ o̍ yāu̍wo̍ ho̍ō ni᷄ŋ, tōsāa̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā ni̍ mī lā tōl nda̍ chōo̍ ha̍a̍a̍ mbō lo̍ o̍ ko̍ŋ, mbō tɛ̄ɛ̄mbu̍u̍ nda̍ mbō bāsu̍ nda̍ tɛ̍ɛ̍ o̍ chi̍e̍ēŋndo̍ chōo̍.

²¹Wānāa̍ to̍sā yɔ᷅ŋ wɔ̄ɔ̍ŋ wāā le̍ndo̍o̍ wa̍, sōlīo̍o̍ Mɛ̄lɛ̄ka̍ Ya̍a̍wɛ̄ɛ̄ o̍ so̍lī nda̍ yu̍ŋgu̍la̍ŋ I̍sɔ̄lūɛ̍i̍ tɛ̄ɛ̄ŋ po̍ ni̍, mbō tōsa̍ mī sēndi̍la̍ŋ ndāŋ kpo̍u̍ lā tōl nda̍ chōo̍, sēndi̍la̍ cho̍ la᷅ŋ lā pōōnyīāā o̍ yāu̍ lāsāwāa̍ ho̍ō ni᷄ŋ nda̍ŋ, le̍ mī I̍sɔ̄lūɛ̍i̍ya̍a̍ tu̍a̍a̍ ā chē māā tāāmāsi̍.

²²“Tē lā sōli̍ Mɛ̄lɛ̄ka̍ dīōm pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mī nāāla̍ŋ a̍ kpūndɛ̍lā bɛ̄ŋnda̍ŋ lā tōl lɛ̄ŋndē nyāle̍ŋ chōo̍. Chūāūwāā nyāā ma̍māa̍ a̍ wānāā lēkāa̍wa̍a̍ fu̍lā ni̍ŋ o̍ lɛ̄ŋīī lēvīlle̍ ni᷄ŋ nda̍, ā hūŋ ni̍ŋ mā hu᷄ŋ chɔ᷅ nyɛ̄ pālāa̍ wa᷅ ni̍ŋ nya̍ chōo̍ o̍ sīɔ̄dīi̍ lāchīo̍o̍ ni̍ŋ ndo̍.

²³Lɛ̄ŋnde̍ŋ kpo̍u̍ lē chō vēsā mī lē sīmnu᷄ŋ po̍llo̍. Pōūtā tūūlā bɛ̄ŋnda̍ŋ lā chō le̍ŋ hūnɔ̄ɔ̄ chūā kpo̍u̍, ndu̍yɛ̍ a̍ sūŋgbu̍ma̍ īhɛ᷄lla̍ŋ. Lē chō hūnɔ̄ɔ̄ sīmnɔ᷄ŋ na̍a̍ wānā to᷅l lɛ̍ nyɛ̄ o̍ nyɛ̄ le̍ wa̍, nāa̍ bīl o̍ bīl vi᷅l lɛ̍ le̍ wa̍. Lē chō hūnɔ̄ɔ̄ ī tāmbu̍ mɛ̄ɛ̍ i̍ yɔ̍nu̍ŋ a̍ So̍dɔ̄m, ndu̍yɛ̍ a̍ Kōmo̍o̍lūā, a̍ A̍di̍māā, a̍ Sɛ̄bo̍yīm yɛ̍, chi̍e̍e̍ŋ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ tu̍mbe̍ a̍ mu̍ŋ o̍ ka̍lā ka̍lā mbo̍ tɛ̄ɛ̄mbūū mu̍ŋ ndo̍ŋ.

²⁴Wāŋnda̍ o̍ lɛ̄ŋnde̍ ni᷄ŋ kpo̍u̍ ā nyūnā ni̍ŋ āā, ‘Vɛ᷅ mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā he̍ī a̍ lɛ̄ŋnde̍ŋ nde᷅ŋ? Vɛ᷅ mbo̍ tūūlū kɔ̄llo̍ ho̍ō a̍ lɛ̄ŋnde̍ŋ nde᷅ŋ?’

²⁵O̍ ko̍ŋ, mī wāŋnda̍ ā dīmu̍l nda̍ āā, ‘Ō cho̍ fu̍u̍le̍ Mɛ̄lɛ̄ka̍ ō tōsa̍ he̍ī a̍ nda̍ le̍. Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ wāŋnda̍ ha̍ā fi̍nyāā ndāā ma̍māa̍ nda̍ a̍a̍ pi̍ɛ̍īyo̍ ō sōli̍ nda̍ o̍ chɛ̄le̍ŋ ni᷄ŋ I̍chi̍pī ve̍, mbo̍ lō o̍ ko̍ŋ mbo̍ yīī kpe̍ma̍a̍ a̍ wāŋnda̍ ha̍ā. Kɛ̍ mi̍ wāŋnda̍ ha̍ā ā lō o̍ ko̍ŋ ma̍ tɛ̄ɛ̄mbūū kpe̍ma̍ ko̍ŋ,

²⁶ma̍ mūli᷄ŋ nyɛ᷅m chēle̍ŋndo̍ŋ sāāŋgīāllo̍, ndu̍yɛ̍ mā sōōlūū mu̍ŋ māā mɛ̄lɛ̄ka̍ā nda̍, nyɛ̄m nda̍ a̍a̍ si̍nā bɛ̍ɛ̍ pa̍a̍ndū le̍ wo̍ŋ, ŋ̄ Mɛ̄lɛ̄ka̍ Ya̍a̍wɛ̄ɛ̄ o̍ ku̍u̍na̍ nda̍ māā ā so̍o̍lūū mu̍ŋ kpo̍so̍ŋ te̍ wo̍ŋ.

²⁷Le̍ sābū ko̍ŋ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍nu᷄ŋ tu̍mbe̍ a̍ lɛ̄ŋnde̍ŋ nde᷅ŋ ni̍, mbo̍ lō o̍ ko̍ŋ mbo̍ hāndū lɛ̄ŋnde̍ŋ nde᷅ŋ sēndi̍la̍ cho̍ lā pōōnyīāā o̍ yāu̍ ndɔ̍ lāsāwāa̍ ni᷄ŋ nda̍ŋ kpo̍u̍ cho̍o̍.

²⁸Nyɛ̄ ko̍ŋ to̍sa̍ ni̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ o̍ ka̍lā ka̍lā a̍ wāŋnda̍ ha̍ā. O̍ tu̍mbe̍ ka̍lā ka̍lā o̍ dɔ̍u̍nu᷄ŋ ko̍ŋ ndo̍ ni᷄ŋ, mbo̍ lō o̍ ko̍ŋ mbo̍ fāŋā nda̍ ba̍ū o̍ lɛ̄ŋnde̍ŋ nde᷅ŋ ni᷄ŋ mbo̍ yɔ̄ŋ nda̍ o̍ lɛ̄ŋndē chēle̍ŋ ni᷄ŋ o̍ chɛ̄le̍ŋ ni᷄ŋ. O̍ chɛ̄lēlēŋ ni᷄ŋ nda̍ chō hāū ni̍.’

²⁹“Wāŋnda̍ I̍sɔ̄lūɛ̄ī, sɔ̄ɔ̍ŋ sɔ̍ɔ̍ sɔ̍ɔ̍ cho̍ ŋ̄ si̍nā mu̍ŋ pɛ̄ŋgu̍ le̍ wo̍ŋ, mu̍ŋ mu̍ŋ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ndu̍ nɔ̍ mu̍ŋ ni̍. Kɛ̍ sāwāla̍ ndɔ̄la̍ o̍ chɔ̍m na̍a̍ la᷅ŋ kpe̍nde̍ke̍le̍ la̍ŋ, nda̍ŋ la̍ŋ, na̍a̍ ni̍, a̍ chūāūwāā nāa̍, le̍ na̍a̍ la̍ cho̍ le̍ fɛ̍ɛ̍ŋ fɛ̍ɛ̍ŋ ni̍. Ŋ̄ nɔ̄ mī ŋ̄ wa̍ nyɛ̄ la̍ di̍mi̍ wo̍ tōsāa̍ le̍ fɛ̍ɛ̍ŋ a̍ fɛ̍ɛ̍ŋ.”