Read Southern Kisi Dītɔ̍nɔ̍mi̍ī 3 Bible Online

Dītɔ̍nɔ̍mi̍ī 3 - Southern Kisi bible

Dītɔ̍nɔ̍mi̍ī 3

¹“Mi̍ Mūu̍sē hi̍a̍ū lāchī a̍ sūɛ̍i̍, mbo̍ dīmī āā, ‘O̍ ko̍ŋ kɔ̍ɔ̍lī, mi̍ ŋ̄ mūli᷄ŋ, mi̍ ŋ̄ hēēlū kūmbū būŋgɛ̄ī Ba̍a̍sīāŋnde̍.’ O̍ ko̍ŋ, mi̍ Māsā Bɛ̍ndōo̍ Ɔ̍kū, o̍ wa̍ Ba̍a̍sīāŋ ndo̍ ō chūā pūa̍a̍ ndūa̍a̍ chɔ̄ūwa̍ kpo̍u̍, ma̍ hu᷄ŋ sa̍ā na̍a̍ a̍ sɔ̍ŋgɔ̄ɔ̍ I̍du̍lūēī chi̍e̍e̍ i̍kɛ̍i̍.

²Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ āā, ‘Sīōōŋīī bi̍ī nu̍m le̍ Māsāa̍ Ɔ̍kū le̍. I̍ ma̍l ndu̍ nu̍m o̍ bā a̍ wānāā ndūa̍a̍ kpo̍u̍, ndu̍yɛ̍ a̍ lɛ̄ŋndē ndɔ̄le̍ŋ. Lā tōsa̍ a̍ Ɔ̍kū, mɛ̄ɛ̍ nya̍ tōsa̍ a̍ Si̍hɔ̄ŋ yɛ̍, māsa̍ A̍mɔ᷅na̍i̍tīi̍ya̍, o̍ wa̍ īchāli̍ Hɛ̍si̍bɔ̄ŋ chi̍e̍e̍ wo̍.’

³“O̍ ko̍ŋ, Māsāa̍ Bɛ̍ndōo̍ Ɔ̍kū bɛ̍ɛ̍, o̍ wa̍ Ba̍a̍sīāŋndo̍, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō māl ndu̍ na̍a̍ o̍ bā, a̍ wānāā ndūa̍a̍ kpo̍u̍. Mi̍ ŋ̄ yām nda̍, ndu̍yɛ̍ mi̍ ŋ̄ dīū nda̍, ō pīlɛ̍ bɛ̍ɛ̍ ŋ̄ mɛ̄i̍ le̍.

⁴O̍ ko̍ŋ kɔ̍ɔ̍lī, chi̍e̍e̍ŋ Māsāa̍ Ɔ̍kū o̍ wa̍ māsāa̍ chōo̍ wo̍ŋ kpo̍u̍, chi̍o̍o̍ŋ be̍le̍-ŋɔ̍mpu᷅m, mi̍ ŋ̄ bīī mu̍ŋ kpo̍u̍. Tāndā A̍ko̍bī wo̍ kpo̍u̍, ō Māsāa̍ Ɔ̍kū ō wa̍ chōo̍ wo̍ mi̍ ŋ̄ bīī ndu̍.

⁵Ndu̍yɛ̍ chi̍o̍o̍ŋ mu᷅ŋ kpo̍u̍ ŋ̄ wa̍ ŋ̄ bālāā kpɔ̍kɔ̍su̍ a̍ sāāsāla̍ vi̍lɛ̄īlā kālā ka̍lālā bɛ̄ŋnda̍ŋ, ndu̍yɛ̍ a̍ dīōla̍ŋ a̍ su̍lu̍ku̍la̍ŋ le̍ la̍ŋ kīīndīa̍a̍. Ō fūla̍ o̍ chi̍o̍o̍ŋ mu᷅ŋ kɔ̄ɔ̄lī, mi̍ ŋ̄ bīī vɛ̄lɛ̄ chi̍e̍e̍ŋ pɔ̍mbɔ̄ŋ chēle̍ŋ ta̍u̍ ta̍u̍, ŋ̍ ve̍ ŋ̍ ba̍lāā a̍ lāsāāsā le̍ wo̍ŋ.

⁶Chi̍o̍o̍ŋ mu᷅ŋ kpo̍u̍, mi̍ ŋ̄ tɛ̄ɛ̄mbūū mu̍ŋ kpo̍u̍ mɛ̄ɛ̍ na̍a̍ ŋ̄ tōsa̍ a̍ chi̍e̍e̍ŋ Māsāa̍ Si̍hɔ̄ŋ ndo̍ŋ yɛ̍, o̍ wa̍ Hɛ̍si̍bɔ̄ŋ chi̍e̍e̍ wo̍. Ndu̍yɛ̍ wānā o̍ wāna̍ wa̍ lo̍ŋ, wānā pɔ̍nɔ̍ ni̍, wānā la̍nɔ̍ ni̍, chūāāmbɔ̄ pɔ̄mbɔ̄ ni̍, nda̍ bɛ̍ɛ̍ mi̍ ŋ̄ dīū nda̍ kpo̍u̍.

⁷Kɛ̍ lo̍ŋ bɛ̍ɛ̍, chɔ̄lūa̍a̍ wa̍ lo̍ŋ nda̍ ki̍nɛ̍i̍, a̍ nyɛ̄m kɛ̄ndɛ᷄ŋ wa̍ lo̍ŋ ndo̍ŋ, mi̍ ŋ̄ pūŋgā mu̍ŋ mi̍ ŋ̄ kūānu᷄ŋ a̍ mu̍ŋ.

⁸“O̍ ko̍ŋ, lɛ̄ŋndē Māsāa̍ māA̍mɔ̍lu̍a̍i̍tīi̍ya̍a̍ ŋi̍ɔ̍ɔ̍ŋ nda̍ ha̍ā ā wa̍ māsāa̍ chōo̍ Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋndo̍ le̍ŋ ki̍nɛ̍i̍, chɔ̍ŋ o̍ Pēē Bɛ̍ndōo̍ A̍nɔ̄ŋ, mbo̍ kūā a̍ Pēmbīī Ha̍mɔ̄ŋnde̍, mi̍ ŋ̄ bīī le̍ŋ kpo̍u̍ o̍ te̍le̍ŋ ko̍ŋ bɛ̄ŋgu̍. (

⁹Sa̍i̍dɔ̄ŋnda̍, nda̍ vēēlū pe̍mbīī Ha̍mɔ̄ŋnde̍ he̍ī āā Si̍līɔ̄ŋ, mi̍ A̍mɔ̍lu̍a̍i̍tīi̍ya̍ nda̍ vēēlū ndi̍ āā Sɛ̍nīɛ̄ɛ̄.)

¹⁰Mi̍ ŋ̄ bīī chi̍e̍e̍ŋ wa̍ o̍ lɛ̄ŋndē dɛ̍ŋgbɛ̍le̍ŋ o̍ pēmbēi̍ chōo̍ wo̍ŋ kpo̍u̍, ndu̍yɛ̍ a̍ būŋgɛ̄ī Ki̍li̍a̍a̍dīve̍ kpo̍u̍, mbo̍ kūā a̍ Sa̍lɛ̍kāā chīe̍e̍, ndu̍yɛ̍ a̍ I̍du̍lūēī chi̍e̍e̍ di̍. Ndu̍yɛ̍ chi̍e̍e̍ŋ Māsāa̍ Bɛ̍ndōo̍ Ɔ̍kū, māsāa̍ Ba̍a̍sīāŋ o̍ wa̍ chōo̍ wo̍ŋ bɛ̍ɛ̍ mbo̍ bīī mu̍ŋ.” (

¹¹Ndu̍yɛ̍ Ɔ̍kū, o̍ wa̍ māsāa̍ Ba̍a̍sīāŋ ndo̍, ndu̍ wa̍ ni᷅ŋ wānā mɛ̍ɛ̍lāa̍ kpɔ̍ŋ fūlāa̍ o̍ yu̍ŋgu̍ Lu̍ɛ̍fēm ndo̍ chōo̍ ni̍. Kpēle̍ ndɔ̍ ndu̍ o̍o̍ lɔ᷅l cho̍o̍ wo̍, a̍ chīli̍ŋndo̍ŋ kpo̍so̍ŋ o̍ wa̍ ō tōōsīāā ni̍. Kpēlōo̍ ho̍ō, bāndi̍i̍ ndūɛ̍i̍ ndi̍ i̍i̍ hi̍o̍ū nɛ̄īyo̍ tɔ̍ a̍ lē yāa̍, bu̍o̍o̍ nɛ̄īyo̍ lē ŋɔ᷄mpu᷅m, mɛ̄ɛ̍ nda̍ a̍a̍ chɛ̍la᷅ŋ le̍ nɛ̄īyo̍ yɛ̍. Kpēlōo̍ ho̍ō a̍ pāa̍le̍ hāūle̍ŋ nde᷅ŋ bɛ̍ɛ̍ ō chō wɔ̄ Lu̍a̍bā chi̍e̍e̍, chi̍e̍e̍ A̍mɔ᷅na̍i̍tīi̍ya̍.)

¹²Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “Mɛ̄ɛ̍ na̍a̍ ŋ̄ bīī lɛ̄ŋnde̍ŋ nde᷅ŋ a̍ te̍le̍ŋ ko̍ŋ, mi̍ ke᷅ yu̍ŋgu̍ Lūbɛ᷅ŋ ndo̍ a̍ yu̍ŋgu̍ Ka̍a̍dī wo̍, būŋgɛ̄i̍ i̍ ndɛ̍i̍ o̍ lɛ̄ŋnde̍ŋ nde᷅ŋ ni᷄ŋ. Būŋgɛ̄ī ndɛ̄i̍, ndi̍ wa̍ A̍lo̍yā chi̍e̍e̍ ba᷅ lūāŋndo̍ ni̍, o̍ Pēē Bɛ̍ndōo̍ A̍nɔ̄ŋ i̍kɛ̍i̍. Ndu̍yɛ̍ lɛ̄ŋndē īpēmbūlē Ki̍li̍a̍a̍dīle̍ŋ kūmbōo̍ pīlɔ̍ɔ̍ ki̍nɛ̍i̍, a̍ chi̍e̍e̍ŋ ndɔ᷄ŋ lātūlu̍, būŋgɛ̄ī ndɛ̄i̍ ndi̍ ku̍ɛ̄ ke̍ŋ ni̍.

¹³O̍ ko̍ŋ kɔ̍ɔ̍lī, lɛ̄ŋndē īpēmbūle̍ŋ Ki̍li̍a̍a̍dī kūmbōo̍ pīlɔ̍ɔ̍ ki̍nɛ̍i̍, a̍ būŋgɛ̄ī Ba̍a̍sīāŋnde̍ kpo̍u̍, būŋgɛ̄ī Māsāa̍ Ɔ̍kū o̍ wa̍ chōo̍ ve̍, ndu̍ yɔ̍nūŋ ni̍ māā tāndā A̍ko̍bī wo̍, mi̍ ke᷅ yu̍ŋgu̍ Mānāa̍sē wo̍ ku̍ndāa̍ ō pīlɔ̍ɔ̍ būŋgɛ̄i̍ kēŋ.” (Ndu̍yɛ̍ tāndā A̍ko̍bī wo̍ kpo̍u̍, o̍ būŋgɛ̄ī Ba̍a̍sīāŋnde̍ ni᷄ŋ, nu̍a̍ā nda̍ a̍a̍ ve̍e̍lū ni̍ āā Lu̍ɛ̍fēm.

¹⁴Tāndā A̍ko̍bī wo̍ kpo̍u̍, ndu̍ yɔ̍nūŋ māā būŋgɛ̄ī Ba̍a̍sīāŋnde̍ ni̍, mbo̍ fūūlūū le̍nde̍ o̍ pɛ̄ŋgu̍la̍ŋ a̍ Kɛ̄sīɔ̄lu̍a̍i̍tīi̍ya̍ ndu̍yɛ̍ a̍ Ma̍a̍ka̍a̍tīi̍ya̍ di̍, lo̍ŋ kpo̍u̍, mi̍ Cha̍ā ō chu̍ā māā fo̍ndā ndɔ̄, wānāa̍ fu̍la̍ o̍ pūlāle̍ Mānāa̍sēle̍ŋ chōo̍ wa̍ ō pīlɛ̍. Ndu̍yɛ̍ mbo̍ hāndū būŋgɛ̄ī kēŋ dīōla̍ŋ ndɔ̄la̍ŋ chōo̍ āā, Sɔ̄ndɔ̄kɔ̍lta̍ Cha̍ā la̍ŋ. Ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍ le̍nde̍ wāŋnda̍ chō wɔ̄ sɔ̄ndɔ̄kɔ̍ltā lāŋ vēēlōo̍ ni̍.)

¹⁵“O̍ ko̍ŋ kɔ̍ɔ̍lī, mi̍ ke᷅ Māka̍yā, fūlāa̍ o̍ yu̍ŋgu̍ Mānāa̍sē wo̍ chōo̍ būŋgɛ̄ī Ki̍li̍a̍a̍dīve̍ ki̍nɛ̍i̍ māā ndu̍ nɔ̍ ke̍ŋ ni̍.

¹⁶Yu̍ŋgu̍ Lūbɛ᷅ŋ ndo̍ ni̍, a̍ yu̍ŋgu̍ Ka̍a̍dī wo̍, būŋgɛ̄ī ya̍ I̍ ke̍ nda̍ ve̍, ndi̍ chɛ̍ŋ a̍ būŋgɛ̄ī Ki̍li̍a̍a̍dīve̍ ni̍, mi̍ ī kūā a̍ Pēē Bɛ̍ndōo̍ A̍nɔ̄ŋ. Pēē bɛ̄ndū kōŋ chɛ̍ chɛ̍, ndu̍ wa̍ pɛ̄ŋgu̍la̍ būŋgɛ̄ī ndɛ̄i̍ bā tōūwo̍ ni̍. O̍ ko̍ŋ kɔ̍ɔ̍lī, pɛ̄ŋgu̍la̍ būŋgɛ̄ī ndɛ̄i̍ bā lūāŋndo̍ la̍ŋ la̍ wa̍ Pīo̍o̍ Cha̍bɔ̍kī ni̍. Ndu̍yɛ̍ pēē bɛ̍ndū kōŋ ndu̍ wa̍ pɛ̄ŋgu̍la̍ŋ nda̍ tɛ̄ɛ̄ŋ nda̍ A̍mɔ᷅na̍i̍tīi̍ya̍ ni̍.

¹⁷Chɔ̍ɔ̍dāŋ nda̍ŋ ma̍ wa̍ pɛ̄ŋgu̍la̍ būŋgɛ̄ī ndɛ̄i̍ bā pāa̍le̍ŋ lē dēllo̍ ni̍. O̍ ko̍ŋ kɔ̍ɔ̍lī, mi̍ pɛ̄ŋgu̍la̍ būŋgɛ̄ī ndɛ̄i̍ lā cha᷄ŋ o̍ pēe̍ Mɛ̄ŋmā Ībūŋga᷄ŋ Kāli̍lī, mi̍ lā kūā o̍ Pēe̍ Mɛ̄ŋmā Īhɛ᷄l nɔ̍ nya̍ā yōōmāā lēni᷄ŋ te̍ wo̍, o̍ Pēmbīī Pi̍si̍kāve̍ ba̍ pāa̍le̍ŋ lē chāŋndo̍.

¹⁸“A̍ te̍le̍ŋ ko̍ŋ, mi̍ di̍mūl yu̍ŋgu̍ Lūbɛ᷅ŋ ndo̍, a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ ku̍ndāa̍ ō pīlɔ̍ɔ̍ a̍a̍, ‘Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō chīi̍ nya̍ lɛ̄ŋnde̍ŋ nde᷅ŋ kē Chɔ̍ɔ̍dāŋ le̍e̍lōo̍ na̍nu᷄ŋ māā nyɛ̄ nyā. Le̍la̍ŋ lā mɛ̄i̍ ni̍ko̍ la̍a̍ndāā nyāa̍, a̍ chūāūwāā nyāa̍, a̍ chɔ̄lūāā nyāa̍ o̍ lɛ̄ŋndē ya̍ I̍ ke̍ nya̍ le᷅ŋ Chɔ̍ɔ̍dāŋ le̍e̍lōo̍ na̍nu᷄ŋ nde̍ŋ ni᷄ŋ. I̍ si̍nā māā lā nɔ̄ chɔ̄lūa̍a̍ ta̍u̍ ta̍u̍, kɛ̍ lā mɛ̄i̍ nda̍ o̍ chi̍e̍e̍ŋ ya̍ I̍ ke̍ nya̍ mu᷅ŋ ndo̍ŋ, mī nya̍ pūa̍a̍ bɛ̍nda̍ le̍ kɔ̄lā wāā o̍ chɔ̄ū wa̍ lā chūa̍ wōlɔ̄ɔ̄lā nyāla̍ chɔ̄ūla̍ŋ mī lā ta᷄ŋ chāāŋāā nyāā I̍sɔ̄lūɛ̍i̍ya̍ lāchī.

¹⁹

²⁰Nya̍ cho̍ nda̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ nāa̍ o̍ cho̍ nda̍ kīo̍o̍ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍ le̍ŋ mālā bīyɔ̄ɔ̄ ni̍. Tē Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ I̍sɔ̄lūɛ̍i̍ya̍a̍ tu̍a̍a̍ nāa̍ cha̍lāa̍ kē pɛ̍ kpo̍u̍, lā mīīŋgu̍ ni̍ko̍ na̍nu᷄ŋ o̍ lɛ̄ŋndē ya̍ I̍ ke̍ le᷅ŋ nya̍ le̍ŋ ni᷄ŋ, wānā o̍ wānā ku̍ɛ̄ o̍ fo̍ndā ndɔ̍ ya̍ I̍ ke̍ ndu̍ wo̍ ō kɔ̍ cha᷅l lo̍ŋ.’

²¹“Mi̍ lo᷅ o̍ ko̍ŋ mi̍ di̍mūl Chɔ̄ɔ̍sūāā a̍a̍, ‘Nūm pi̍la̍ che᷅ a̍ hɔ̄ltē nūmnde̍ŋ pɛ̍ɛ̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tōsa̍ ki̍nɛ̍i̍ a̍ māsāā bɛ̍ndūāā ŋīɔ̍ɔ̍ŋ nda̍ ha̍ā wo̍, nda̍ yɔ̍nūŋ ni̍ māā Māsāa̍ Si̍hɔ̄ŋ nda̍ Māsāa̍ Ɔ̍kū. Nu̍a̍ā Mɛ̄lɛ̄ka̍ Ya̍a̍wɛ̄ɛ̄ o̍ to̍sā ni̍ŋ a̍ māsāa̍ cho̍ nya̍ lāchī ki̍nɛ̍i̍ o̍ lɛ̄ŋndē nya̍ chō kɔ̄la̍ŋ ni᷄ŋ nde̍ŋ ni̍.

²²Sīōōŋīī bi̍ī nu̍m le̍ nda̍ le̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō sɔ̍ŋgā le̍ nya̍.’ ”

²³Mi̍ Mūu̍sē o̍ hi̍a̍ū lāchī a̍ sūɛ̍i̍ nāa̍ I̍sɔ̄lūɛ̍i̍ya̍ chūā, mbo̍ dīmūl nda̍ āā, “A̍ te̍le̍ŋ ko̍ŋ, mi̍ nyɔ̍ɔ̍lū Mɛ̄lɛ̄ka̍ Ya̍a̍wɛ̄ɛ̄, mi̍ di̍mūl ndu̍ a̍a̍,

²⁴‘O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, a̍ ka̍ndu̍ ya̍ bu̍ɛ̍ī nūmndo̍ chɔ̄mndo̍ mɛ̄ɛ̍ ŋ̄ chō ō bɛ̄ndū yɛ̍. O̍ chi̍e̍ēŋndo̍ chōo̍ ni̍, o̍ ha̍la̍a̍ ni᷄ŋ cho̍o̍ cho̍o̍ ni̍, mɛ̄lɛ̄ka̍ o̍ mɛ̄lɛ̄ka̍ cho̍ mbō nɔ̄la̍ sɔ̄ɔ̍ŋ kpāāyāŋ bɛ̍ndūŋ ŋ̄ tōsa̍ mu᷅ŋ ndo̍ŋ tōsā le̍.

²⁵Le̍la̍ŋ yāndi̍i̍ Mɛ̄lɛ̄ka̍, chɛ̍l la̍ mī kɔ̍ chɔ᷅ lɛ̄ŋndē kɛ̄ndɛ̄lē bɛ̄ŋnde̍ŋ nde᷅ŋ Chɔ̍ɔ̍dāŋ le̍e̍lōo̍, lɛ̄ŋndē īpēmbūlē kɛ̄ndɛ̄ kɛ̍ndɛ̄lē lēŋ, ndu̍yɛ̍ a̍ pēmbūŋ kɛ̄ndɛ̄ kɛ̍ndɔ᷄ŋ Le̍ba̍nɔ̄ŋ.’

²⁶“Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ye̍ŋ ya̍ bɛ̍ɛ̍ la̍nī le̍, fo̍ndōle̍, ō wa̍ a̍ tu̍mbo̍o̍ a̍ ya̍ le̍ sa̍bū nyāa̍. Mbo̍ dīmūl la̍ āā, ‘Ō mɛ̄ɛ̄lu̍ le̍nde̍ ki̍nɛ̍i̍, mɛ̄ɛ̍ ŋ̄ dīmi̍ nu̍a̍ā yɛ̍. I̍ ye̍e̍ma̍ lɛ̍ pɛ̍ɛ̍ŋ mā sōō nāa̍ ya̍ chu̍a̍ a̍ ndi̍ a̍ o̍kɔ̄ɔ̄ le̍.

²⁷He̍l lɔ̍ o̍ Pēmbīī Pi̍si̍kā ve̍ bōlle̍ŋ, mā mɛ̍ɛ̍nda̍ŋ lɛ᷅ŋndē kālā le̍ŋ kɔ̄ɔ̄lī kɔ̄ɔ̄lī nyɛ̄ kɛ̄ndɛ̄ kɛ̍ndɛ̄, a̍ mɛ̍ɛ̍nda̍ŋ pɛ̍ ba᷅ lūāŋndo̍, a̍ mɛ̍ɛ̍nda̍ŋ ba᷅ tōūwo̍, a̍ mɛ̍ɛ̍nda̍ŋ ba᷅ pāa̍le̍ŋ lē chāŋndo̍, a̍ mɛ̍ɛ̍nda̍ŋ ba᷅ le̍ de᷅llo̍. Ā chō le̍ŋ chɔ̄ kɔ̄ɔ̄lī kɔ̄ɔ̄lī, kɛ᷅ a̍ cho̍ Chɔ̍ɔ̍dāŋ nda̍ŋ tāŋɔ̄ɔ̍ mā kūɛ̄ lo̍ŋ te̍.

²⁸Chɔ̄ɔ̍sūāā, ndu̍ cho̍ I̍sɔ̄lūɛ̍i̍ya̍ īsīsi̍ la̍chi̍ ni̍, mbō ta᷄ŋ Chɔ̍ɔ̍dāŋ nda̍ŋ a̍ nda̍ le̍ mā kɔ̍ bi̍ī lɛ̄ŋndē ŋ̄ chō le̍ŋ chɔ̄nɔ᷄ŋ nu̍m lāchī le̍ŋ. Le̍la̍ŋ ma̍la̍ ndu̍ mbō sɔ̄la̍ dīāllūŋ kāla᷄ŋ ndu̍yɛ̍ a̍ kɔ̄l sīmūlāa̍ ndu̍yɛ̍ mā chɔ̍m ndu̍ nyɛ̄ o̍ nɔ̍ le̍ tōsāa̍ wo̍.’

²⁹“O̍ ko̍ŋ kɔ̍ɔ̍lī, mi̍ ŋ̄ hīāū lāchī a̍ cha᷄lle̍ o̍ lɛ̄ŋndē dɛ̍ŋgbɛ̍le̍ŋ Bɛ̄tīpi̍ɔ̍ɔ̄ chi̍e̍e̍ i̍kɛ̍i̍.”