Read Southern Kisi Dītɔ̍nɔ̍mi̍ī 30 Bible Online

Dītɔ̍nɔ̍mi̍ī 30 - Southern Kisi bible

Dītɔ̍nɔ̍mi̍ī 30

¹Mi̍ Mūu̍sē o̍ hi̍a̍ū lāchī a̍ sūɛ̍i̍ āā, “Wāŋnda̍ I̍sɔ̄lūɛ̄ī, I̍ cho̍ nya̍ sɔ̄ɔ̍ŋ sīmī lāchī ŋ̄ mūu̍ŋ. Sɔ̄ɔ̍ŋ mu̍ŋ mu̍ŋ cho̍ mu᷅ŋ ni̍. Mɛ̄lɛ̄ka̍ Ya̍a̍wɛ̄ɛ̍ nya̍ sa̍lāa̍ dɔ̄wɔ̄ɔ̍, a̍ Mɛ̄lɛ̄ka̍ Ya̍a̍wɛ̄ɛ̍ nya̍ sēndi̍o̍o̍ hāndɔ̄ɔ̍ chōo̍. Sɔ̄ɔ̍ŋ ya̍ I̍ cho̍ nya̍ mu᷅ŋ dīmūllo̍ wo̍ŋ, tē ŋ̄ hu᷄ŋ yɔ̄nu᷄ŋ pɛ̍, mī lā hu᷄ŋ wa᷅ o̍ lɛ̄ŋīī lēvīlle̍ ni᷄ŋ o̍ chɛ̄le̍ŋ ni᷄ŋ, lɛ̄ŋīī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō sɛ̄ŋī ni̍ŋ nya̍ ve̍, o̍ ko̍ŋ nya̍ chō lōōnɔ᷄ŋ a̍ sɔ̄ɔ̍ŋ ya̍ I̍ si̍mi̍ nya̍ mu᷅ŋ lāchī wo̍ŋ ni̍.

²Ndu̍yɛ̍ nya̍ ni̍, a̍ wānā o̍ wāna̍ fu̍lā ni̍ŋ o̍ yu̍ŋgu̍la̍ nyāla̍ŋ chōo̍, tē lā mīŋgi̍ kɔ̄ltā nyāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍ pɛ̍, ndu̍yɛ̍ o̍ ko̍ŋ kɔ̍ɔ̍lī, nyɛ̄ o̍ nyɛ̄ ya̍ I̍ cho̍ nya̍ dīmūllo̍ pāa̍le̍ hāūle̍ŋ nde᷅ŋ mī lā tōsa̍ ndu̍ a̍ kɔ̄ltā nyāla̍ŋ ndu̍yɛ̍ a̍ yīya᷄ŋnda̍ nyāla̍ŋ kpo̍u̍ pɛ̍,

³Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō tōsā mī nyɛ̄ o̍ nyɛ̄ ō wa̍ vɛ̄lɛ̄ ō kɛ̄ndɛ̄ a̍ nya̍. Ō chō nya̍ īnyīɛ̍ɛ̍ tūīīnɔ᷄ŋ ndu̍yɛ̍ bā o̍ bā o̍ to̍sa̍ ma̍ sɛ̄ŋi᷄ŋ a̍ nya̍ o̍ chɛ̄le̍ŋ ni᷄ŋ, mbō sōli̍ nya̍ kpo̍u̍ o̍ lɛ̄ŋīī kēŋ ni᷄ŋ, mbō mīŋgi̍ nya̍ o̍ lɛ̄ŋndē nyāle̍ŋ ni᷄ŋ.

⁴Ā yɔ᷄ŋ bɛ̍ɛ̍ mā sɔ̄ɔ̄ŋi̍a̍a̍ nya̍ o̍ chi̍e̍ēŋndo̍ mɛ̄ɛ̄lu̍la̍ŋ pɔ̍, sōlīo̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō sōlī nya̍ lo̍ŋ po̍ ni̍,

⁵mbo̍ hīŋ a̍ nya̍ o̍ lɛ̄ŋndē o̍ ke̍ fi̍nyāā nyāā ma̍māa̍ le̍ŋ ni᷄ŋ, mī lā hu᷄ŋ mi̍ŋgī vɛ̄lɛ̄ le̍ŋ chūā māā lɛ̄ŋndē nyā. Ndu̍yɛ̍ o̍ ko̍ŋ kɔ̍ɔ̍lī, mbō dɔ̄ū nya̍ vɛ̄lɛ̄ sa̍lā, mī nyɛ̄ o̍ nyɛ̄ ō wa̍ ō kɛ̄ndɛ̄ a̍ nya̍, ndu̍yɛ̍ mbō tōsa̍ mī lā kūi̍ ta̍u̍ ta̍u̍ mbō hīōū bɛ̍ɛ̍ mɛ̄ɛ̍ fi̍nyāā nyāā ma̍māa̍ nda̍ a̍a̍ ku̍i̍ yɛ̍.

⁶Ndu̍yɛ̍ nya̍ ni̍, a̍ wānā o̍ wāna̍ fu̍la̍ o̍ yu̍ŋgu̍la̍ nyāla̍ŋ chōo̍, tōsāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tōsā ni̍ mī lā nɔ̄ kɔ̄ltā dīāndāā la̍ŋ le̍ mī lā lo̍ o̍ ko̍ŋ mī lā kāāla̍ ndu̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ a̍ kɔ̄ltā nyāla̍ŋ ndu̍yɛ̍ a̍ yīya᷄ŋnda̍ nyāla̍ŋ kpo̍u̍, ko̍ŋ to̍sā ni̍ mī lā hīōū lāchī a̍ wāa̍ yōōmū o̍ lɛ̄ŋnde̍ŋ nde᷅ŋ ni᷄ŋ.

⁷O̍ ko̍ŋ kɔ̍ɔ̍lī, sēndi̍la̍ cho̍ la᷅ŋ lā pōōnyīāā o̍ yāu̍ lāsāwāa̍ ho̍ō ni᷄ŋ nda̍ŋ ki̍nɛ̍i̍, ya̍a̍mɔ̍ɔ̍wa̍a̍ nyāa̍ tu̍l nya̍ yɛ̄le̍ŋ ndu̍yɛ̍ ma̍ wā nya̍ nyɛ̄ pālāa̍ tūsīo̍o̍ chōo̍ wa̍, nda̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō mīŋgī ni̍ŋ nda̍ŋ chōo̍ kpo̍u̍ ni̍.

⁸Lā mīīŋgū ni̍ŋ vɛ̍lɛ̄ Mɛ̄lɛ̄ka̍ Ya̍a̍wɛ̄ɛ̍ dīōmndo̍ tūēīyɔ̄ɔ̍, ndu̍yɛ̍ o̍ ko̍ŋ kɔ̍ɔ̍lī, nyɛ̄ o̍ nyɛ̄ sāwāla̍ ndɔ̄la̍ŋ lā dīmi̍ le̍ tōsāa̍, sāwāla̍ ya̍ I̍ ke̍ nya̍ la᷅ŋ pāa̍le̍ hāūle̍ŋ nde᷅ŋ nda̍ŋ mī lā wa̍ ndu̍ tōsāa̍ kpo̍u̍.

⁹Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ sa̍lā dɔ̄wɔ̄ɔ̄ o̍ nyɛ̄ o̍ nyɛ̄ ni̍ŋ nya̍ tōsa̍ mī dɛ̍nɛ̍ kɛ̍ndɛ̄ bɛ̄ndōo̍ ō wa̍ le̍ nya̍. Ō tōsā ni̍ŋ mī lā sɔ̄la̍ chūāūwa̍ ta̍u̍ ta̍u̍, ndu̍yɛ̍ mī chɔ̄lūāā nyāa̍ bɛ̍ɛ̍ ā kūi̍ kūīyo̍ pīla̍ o̍ ko̍ŋ kɔ̍ɔ̍lī, mī lā sɔ̄la̍ nyɛ̄ dīa̍a̍ o̍ chīɔ̄ɔ̄ŋ nyāa̍ŋ ni᷄ŋ ta̍u̍ ta̍u̍. Mɛ̄lɛ̄ka̍ Ya̍a̍wɛ̄ɛ̄ o̍ wa᷅ ni̍ŋ vɛ̍lɛ̄ a̍ kɔ̄l kɛ̄ndɛ̄ le̍ nya̍ sɔ̄ɔ̍ŋ kɛ̍ndɔ̍ŋ tōsāllo̍, mɛ̄ɛ̍ o̍ wa̍ a̍ kɔ̄l kɛ̄ndɛ̄ a̍ te̍le̍ŋ ko̍ŋ le̍ fi̍nyāā nyāā ma̍māa̍ sɔ̄ɔ̍ŋ kɛ̍ndɔ̍ŋ tōsāllo̍ yɛ̍.

¹⁰Kɛ̍ lā nɔ̄ mī lā tūēī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm, nyɛ̄ o̍ nyɛ̄ sāwāla̍ ndɔ̄la̍ŋ a̍ pɛ̄ɛ̄kūlā ndɔ̄la̍ŋ lā dīmi̍ le̍ tōsāa̍ la̍ cho̍ la᷅ŋ lā pōōnyīāā o̍ yāu̍ lāsāwāa̍ ho̍ō ni᷄ŋ nda̍ŋ, mī lā tōsa̍ ndu̍ kpo̍u̍. Lā nɔ̄ mī lā mīŋgi̍ kɔ̄ltā nyāla̍ŋ ndu̍yɛ̍ a̍ yīya᷄ŋnda̍ nyāla̍ŋ kpo̍u̍ o̍ ndu̍ lo̍.

¹¹“Sāwāla̍ ya̍ i̍ cho̍ nya̍ la᷅ŋ kīo̍o̍ pāa̍le̍ hāūle̍ŋ nde᷅ŋ nda̍ŋ, lā cho̍ sa̍wāla̍ ka̍lā ka̍lā nya̍ būmba̍ pɛ̄ŋgu̍ si̍nā le̍. Lā cho̍ sa̍wāla̍ nya̍ būmba̍ chūā le̍.

¹²Lā cho̍ sa̍wāla̍ wa̍ā chōo̍ cho̍o̍ o̍ fo̍nda᷄ŋ Mɛ̄lɛ̄ka̍a̍ pɔ̍, mī lā dīmi̍ āā, ‘Ō nɛ̄ɛ̍nɛ̍ he᷅l lɛ̍ ni̍ŋ cho̍o̍ cho̍o̍ mbō kɔ̍ chu̍ū na̍a̍ la̍ŋ lɛ̄ŋ na̍ŋ, mbō hu᷄ŋ to̍mbōlāl na̍a̍ la̍ŋ, mī ŋ̄ tōsa̍ nyɛ̄ la̍ di̍mi̍ wo̍ le̍?’

¹³Lā cho̍ nyɛ᷅ wāā o̍ pēe̍ mɛ̄ŋmā īhɛ᷄llo̍ kɔ̄ŋgɔ̍ɔ̍ o̍ pīlɔ̍ɔ̍, mī lā dīmi̍ āā, ‘Ō nɛ̄ɛ̍nɛ̍ ta᷅ŋ yɛ̍ ni̍ŋ pe̍e̍ mɛ̄ŋmā īhɛ᷄llo̍ lēe̍lo̍ō mbō kɔ̍ chu̍ū na̍a̍ la̍ŋ mbō hu᷄ŋ to̍mbōlāl na̍a̍ la̍ŋ mī ŋ̄ tōsa̍ nyɛ̄ la̍ di̍mi̍ wo̍ le̍?’

¹⁴Lā chō nya̍ īkɛ̄i̍ kpɛ̍ɛ̍lūŋ. Lā chō wāŋnda̍ dīmūllo̍ a̍ la̍ŋ o̍kɔ̄ɔ̄. Ndu̍yɛ̍ lā chō nya̍ o̍ lākɔ̄l. Le̍la̍ŋ lā tōsa̍ nyɛ᷅ la̍ di̍mu̍l nya̍ wo̍.

¹⁵“Pāa̍le̍ hāūle̍ŋ nde᷅ŋ, I̍ cho̍ nya̍ sɔ̄ɔ̍ŋ sīmī lāchī mī lā hɛ̄li̍ ŋ̄ nya̍ yēēma̍ le̍ hɛ̄līo̍o̍ wo̍ŋ. I̍ cho̍ nya̍ sɔ̄ɔ̍ŋ nya̍ tōsā mī lā sɔ̄la̍ dɛ̍nɛ̍ kɛ̍ndɔ̄ɔ̍ wo̍ŋ a̍ sɔ̄ɔ̍ŋ nya̍ tōsā mī lā sɔ̄la̍ dɛ̍nɛ̍ pa̍lāa̍ wo̍ŋ sīmī lāchī mī lā hɛ̄li̍. Ndu̍yɛ̍ mī si̍mi̍ vɛ̄lɛ̄ nya̍ sɔ̄ɔ̍ŋ nya̍ tōsā mī lā wa̍ yōōmū wo̍ŋ, a̍ sɔ̄ɔ̍ŋ nya̍ tōsā mī lā sɔ̄la̍ pīɔ̍mndo̍ wo̍ŋ lāchī mī lā hɛ̄li̍ vɛ̄lɛ̄.

¹⁶Tē ō wa̍ pɛ̍ mī lā kāāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, mī lā wa̍ o̍ nɛ̄i̍ ndɔ̄ɔ̍ chōo̍, o̍ ko̍ŋ kɔ̍ɔ̍lī, mī lā tōsa̍ nyɛ̄ o̍ nyɛ̄ sāwāla̍ ndɔ̄la̍ŋ a̍ pɛ̄ɛ̄kūlā ndɔ̄la̍ŋ lā dīmi̍ le̍ tōsāa̍ ndu̍yɛ̍ a̍ nyɛ̄ o̍ nyɛ̄ o̍ di̍mu̍l nya̍, lā chō wā yōōmū, ndu̍yɛ̍ mī lā kūi̍ ta̍u̍ ta̍u̍. O̍ ko̍ŋ kɔ̍ɔ̍lī, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ chō nya̍ sa̍lā dɔ̄wɔ̄ɔ̄ o̍ lɛ̄ŋndē nya̍ chō kɔ̄la̍ŋ bīyɔ̄ɔ̍ mī lē wa̍ lɛ̄ŋndē nyāle̍ŋ ni᷄ŋ.

¹⁷Kɛ̍ tē lā kɛ̄ɛ̍ pɛ̍ Mɛ̄lɛ̄ka̍ Ya̍a̍wɛ̄ɛ̄, mī lā tūi̍i̍ ndu̍ dīōm te̍, mī wāŋnda̍ ā fāŋa̍ nya̍ o̍ nɛ̄i̍ ndɔ̄ɔ̍ chōo̍ mā tōsa̍ mī lā mūli̍ŋ nyɛ᷅m chēle̍ŋndo̍ŋ sōōlūūwo̍ ndu̍yɛ̍ mī lā sāāŋgīāl mu̍ŋ māā mɛ̄lɛ̄ka̍a̍ nyā pɛ̍,

¹⁸I̍ cho̍ nya̍ sīlāa̍ pāa̍le̍ hāūle̍ŋ nde᷅ŋ kpe̍nde̍ke̍le̍, māā pīɔ̍mndo̍ ndu̍ wa᷅ ni̍ŋ le̍ nya̍ ni̍. Lɛ̄ŋndē nya̍ chō le᷅ŋ Chɔ̍ɔ̍dāŋ ndāŋ tāŋɔ̄ɔ̍ mi̍ lā wā le̍ŋ kɔ̄la̍ŋ bīyɔ̄ɔ̍ le̍ŋ, lā vi̍ū o̍ lɛ̄ŋndē lēŋ ni᷄ŋ te̍.

¹⁹Sɔ̄ɔ̍ŋ mu᷅ŋ mu̍ŋ ya̍ I̍ si̍mi̍ nya̍ pāa̍le̍ hāūle̍ŋ nde᷅ŋ lāchī ni̍. Mu̍ŋ yɔ̍nūŋ ni̍ māā sɔ̄ɔ̍ŋ nya̍ tōsā mī lā sɔ̄la̍ pīɔ̍mndo̍ wo̍ŋ, o̍ ko̍ŋ kɔ̍ɔ̍ī, a̍ sɔ̄ɔ̍ŋ nya̍ tōsā mī Mɛ̄lɛ̄ka̍ dɔ̄ū nya̍ sa̍lā wo̍ŋ, a̍ sɔ̄ɔ̍ŋ nya̍ tōsā mī Mɛ̄lɛ̄ka̍ tūsi̍ nya̍ nyɛ̍ pālāa̍ chōo̍ wo̍ŋ. Ndu̍yɛ̍ I̍ si̍m mi̍ di̍mūl ha̍la̍a̍ chōo̍ cho̍o̍ a̍ chi̍e̍ēŋndo̍ le̍ mā wa̍ māā se̍i̍yāā nī pāa̍le̍ hāūle̍ŋ nde᷅ŋ, māā I̍ si̍mi̍ nya̍ sɔ̄ɔ̍ŋ mu᷅ŋ lāchī le̍ mī lā hɛ̄li̍ ŋ̄ nya̍ yēēma̍ le̍ hɛ̄līo̍o̍ wo̍ŋ. Kɛ̍ ya̍ I̍ cho̍ nya̍ dīmūllo̍ le̍ mī lā hɛ̄li̍ sɔ̄ɔ̍ŋ nya̍ tōsā mī lā wa̍ yōōmū wo̍ŋ. Ko̍ŋ to̍sā ni̍ nya̍ ni̍ a̍ wānāa̍ fu̍la̍ o̍ pūlālē nyāle̍ŋ chōo̍ wa̍ mā wa̍ yōōmū.

²⁰Lā kāāla̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ mī lā tūēī ndu̍ dīōm, ndu̍yɛ̍ mī lā wa̍ a̍ ndu̍ kpɛ̍ɛ̍lūŋ. Ko̍ŋ to̍sā ni̍, mī lā sɔ̄la̍ yōōmūlā vīlɛ̄īla̍ŋ, mī lā vīōū āchāl o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, o̍ chu̍e̍l fi̍nyāā nyāā ma̍māa̍ būŋgɛ̄i̍ le̍ nda̍ kīo̍o̍ le̍ŋ ni᷄ŋ, nda̍ yɔ̍nūŋ ni̍ māā E̍bīlāha᷅m, a̍ Āa̍se̍, a̍ Che̍kɔ̍pū.”