Read Southern Kisi Dītɔ̍nɔ̍mi̍ī 32 Bible Online

Dītɔ̍nɔ̍mi̍ī 32 - Southern Kisi bible

Dītɔ̍nɔ̍mi̍ī 32

¹“Ha̍la̍a̍ a̍ chi̍e̍ēŋndo̍ lā ya᷄ŋ ya̍ nīla̍ŋ. Lā ya᷄ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄, mī lā tūēī nyɛ̄ ya̍ I̍ cho̍ dīmī wo̍.

²Mbɔ̄ māā pɛ̄ɛ̄kūlā nīla̍ŋ lā dēli̍ wa᷅ŋnda̍ o̍ lānī mɛ̄ɛ̍ pīɔ̍ɔ̍ ō dēlī nu̍a̍ā yɛ̍, Mbɔ̄ māā dīōmndā nīla̍ŋ lā chūchu̍ŋ wa᷅ŋnda̍ o̍ lānī mɛ̄ɛ̍ mɔ᷄mndo̍ ō chūchūŋ nu̍a̍ā yɛ̍. Lā chūchu̍ŋ wa᷅ŋnda̍ o̍ lānī mɛ̄ɛ̍ pīɔ̄ɔ̄ yu̍u̍yu̍u̍ wo̍ ō chūchūŋ nu̍a̍ā o̍ bīl pūīyāā tɛ̍ɛ̍ tɛ̍ɛ̍ wo̍ chōo̍ yɛ̍. Lā dēli̍ wa᷅ŋnda̍ o̍ lānī mɛ̄ɛ̍ pīɔ̍ɔ̍ ō sīā nu̍a̍ā o̍ tɔ̄lɔ̄ɔ̄lā pūīyāā la̍ŋ chōo̍ yɛ̍.

³I̍ cho̍ wāŋnda̍ dīmūl a̍ mɛ̄ɛ̍ dīōla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ lā chō lā bɛ̄ndū yɛ̍. Wāŋnda̍ lā sāŋga̍la̍ Mɛ̄lɛ̄ka̍ nyāa̍ māā ō chō ō bɛ̄ndū.

⁴“Ndu̍ chō pōū kpo̍o̍wa̍ bɛ̍ndōo̍ ni̍. Ndu̍yɛ̍ wa̍lta̍ ndɔ̄la̍ŋ lā chō sa̍kpō. Ndu̍yɛ̍ ō chō sa̍kpō o̍ nɛ̄ī o̍ nɛ̄ī ni̍ŋ. Mɛ̄lɛ̄ka̍ lo᷅ o̍ lēdīōm, ndu̍yɛ̍ o̍ to̍sā yɔ᷅ŋ wɔ̄ɔ̍ŋ te̍ wo̍ o̍ cho̍ ni̍. Mɛ̄lɛ̄ka̍ cho̍ sa̍kpō wo̍ cho̍ ni̍, o̍ to̍sā la̍ka̍fā o̍ lāka̍fā le̍ wo̍.

⁵Wāŋnda̍ ā kɛ̄ɛ̍ wāa̍ sa̍kpō a̍ ndu̍, Ndu̍yɛ̍ ā cho̍ lɛ̍ chūāūwāā ndɔ̄ le̍, fo̍ndōle̍, le̍ mɛ̄ɛ̍ nda̍ kɛ̄ɛ̍ wāa̍ sa̍kpō ndu̍ o̍ hɔ̄l lɛ̍. Wānāā hūīyāa̍ wāŋnda̍ ha̍ā ā chō ni̍, ā sēndu̍ le̍.

⁶Kɛ̄ndɛ̄i̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍l nya̍ ve̍, kɛ̄ndɛ̄ī ke̍ŋ nya̍ mīŋgu̍l ndu̍ he̍ī ni̍, nya̍ dīɔ̄mnda̍ ha̍ā, nya̍ si̍nā ha̍ā nyɛ̄ o̍ nyɛ̄ le̍ wa̍? Ō cho̍ Mɛ̍lɛ̄ka̍ le̍ cho̍ fi̍nyā nyā, wāna̍ to̍o̍si̍a̍a̍ nya̍, ndu̍yɛ̍ mbo̍ sīīŋgūū nya̍ ŋ̄wāŋ te̍?

⁷“Lā lōōnu̍ŋ ndɔ̍ a̍ pālɛ̍i̍ māsīndɛ̄i̍. Lā yīya̍ŋ ndɔ̍ a̍ wɔ̄sīla̍ hi̍o̍ū la̍ŋ. Lā nyūna̍ wɔ̍ wa̍nāa̍ ve̍lū nya̍ wa̍, ā chō nya̍ chɔ̄m nyɛ̍ yɔ̍nu̍ŋ ndo̍. Lā nyūna̍ wɔ̍ bɛ̍ndūāā māsīndīa̍a̍, ā chō nya̍ chɔ̄m sɔ̄ɔ̍ŋ yɔ̍nu̍ŋ a̍ te̍le̍ŋ ko̍ŋ ndo̍ŋ

⁸Mɛ̄lɛ̄ka̍ nɔ̍ kpāāyāa̍ kpo̍u̍ wo̍, mbo̍ lō o̍ ko̍ŋ mbo̍ pīɔ̄ū kāa̍la̍ŋ lɛ̄ŋnde̍ kpɛ̍ kpɛ̍. Mbo̍ lō o̍ ko̍ŋ mbo̍ pīɔ̄ū wāŋndā chīe̍e̍ya̍ a̍ su̍u̍la̍ŋ le̍nde̍ mbo̍ kɛ̄sī nda̍ o̍ fo̍ndāŋnda̍ŋ le̍nde̍ kpɛ̍ kpɛ̍, mi̍ lēkāa̍ o̍ lēkāa̍ le̍ nɔ᷅ mɛ̄lɛ̄ka̍ nda̍ nda̍ hɛ̄li̍ wo̍, ndu̍yɛ̍ mbo̍ yāmbū nda̍ pɛ̄ŋgu̍la̍ŋ tɛ̄ɛ̄ŋ le̍nde̍ kpɛ̍ kpɛ̍.

⁹Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo̍ o̍ ko̍ŋ, mbo̍ chūā wāŋnda̍ I̍sɔ̄lūɛ̄ī māā ndu̍ ndu̍ a̍ ndūa̍a̍ cho̍ ka̍ŋ ni̍. Mbo̍ chūā yu̍ŋgu̍ Che̍kɔ̍pū ko̍ŋ māā nda̍ cho̍ nyɛ̄m ndɔ̍ŋ ŋ̄ki̍ɔ̍ɔ̍ŋ ni̍.

¹⁰“Wāŋnda̍ I̍sɔ̄lūɛ̄ī a̍ wa̍ bālɔ̄ɔ̍ o̍ po̍llo̍ ni᷄ŋ, o̍ fo̍ndāŋ kpa̍nda̍ma̍la̍ŋ bɛ̍ndōo̍, nāa̍ wānā se̍e̍lūŋ nyɛ᷅ o̍ nyɛ̄ le̍ mɛ̄ɛ̍ hūēīye̍ mi̍ ī wā hɔ̄ŋndo̍ wa̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ sāālu᷄ŋ nda̍ lo̍ŋ. Mbo̍ māndā nda̍ mbo̍ bīī nda̍ nyɛ̄ kɛ̄ndɛ̄ kɛ̍ndɛ̄, māndāa̍ nda̍ mɛ̄ɛ̍ o̍ ma̍ndā nu̍a̍ā hɔ̄ltē ndɔ̄le̍ ku̍lu̍le̍ŋ yɛ̍.

¹¹Mɛ̄ɛ̍ kōwɔ̍ɔ̍ ō bīī nu̍a̍ā chūāūwāā ndūa̍a̍, māndāa̍ nda̍ nyɛ̄ kɛ̄ndɛ̄ kɛ̍ndɛ̄ yɛ̍, le̍nde̍ o̍ bi̍ī nda̍ ni̍. Tē ō bīī pɛ̍, ō tāŋgu̍l wāa̍ŋndē ndɔ̄le̍ŋ ō kūūmbu̍ŋ chu̍a̍u̍wāā ndūa̍a̍ chōo̍ o̍ wāa̍ŋndē lēŋ ni᷄ŋ. Tē ā hɛ̄lu᷄ŋ pɛ̍ le̍ dēlɔ̄ɔ̍, ō tōl a̍ kūmba᷅ŋndā ndɔ̄la̍ŋ fɛ̍ɛ̄ o̍ kɔ̍ sa̍a̍līāā nda̍ ō kūɛ̄ a̍ nda̍.

¹²Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ si̍m wānāā ndūa̍a̍ lāchī ni̍ mbo̍ kūā a̍ nda̍. Mɛ̄lɛ̄ka̍ o̍ mɛ̄lɛ̄ka̍ che̍le̍ŋ ō māla̍ ndu̍ lākɔ̄ a̍ nda̍ le̍.

¹³“Mbo̍ kūā a̍ nda̍ na̍a̍ te̍māā bɛ̄ndūa̍a̍ o̍ chi̍e̍ēŋndo̍ ni᷄ŋ, ndu̍yɛ̍ ma̍ kɔ̍ di̍ō tɔ̄lɔ̄ɔ̄lā wāā o̍ fo̍ndāŋ ko̍ŋ. O̍ pōūta̍ŋ tɛ̄ɛ̄ŋ nda̍ so̍lī li̍a̍a̍ŋ ni̍. O̍ ko̍ŋ kɔ̍ɔ̍lī, yɔ̄mīī ndɛ̄i̍ ɔ̄li̍fīi̍ve̍ o̍ pōūta̍ŋ bɛ̍ɛ̍ wūlɔ̄ɔ̍.

¹⁴Nāūwāā ndāa̍ a̍ chūīŋāā ndāa̍ ā wa̍ nda̍ nɔ̍nu̍a̍ŋ kīo̍o̍ ta̍u̍ ta̍u̍. Nda̍ nda̍ a̍a̍ nɔ̍ sāā che̍lu̍lɛ̍i̍ya̍a̍ kɛ̍ndɛ̄ kɛ̍ndīa̍a̍, ā chūīŋnda̍, a̍ nāūwa̍, o̍ ko̍ŋ kɔ̍ɔ̍lī, a̍ wi̍tīi̍ŋ kɛ̍ndɛ̄ kɛ̍ndɛ̄ŋ bɛ̄ndo᷄ŋ, ndu̍yɛ̍ a̍ mūɛ̄īmā kɛ̄ndɛ̄ kɛ̍ndīa̍ŋ ni̍.

¹⁵“Mi̍ wāŋnda̍ I̍sɔ̄lūɛ̄ī a̍ su᷅l sūllo̍ pīla̍. Kɛ̍ ma̍ lō o̍ ko̍ŋ ma̍ sīmūl Mɛ̄lɛ̄ka̍. Ma̍ chēlūl pɔ̍ŋ pɔ̍ŋ ndu̍yɛ̍ ma̍ yɔ̄nu᷄ŋ pi̍mbi̍li̍ŋ pi̍mbi̍li̍ŋ bɛ̍ndū a̍ nyɛ̄ dīāā nda̍ wa̍ dīo̍o̍ wo̍.

¹⁶Ma̍ lō o̍ ko̍ŋ ma̍ kɛ̄ɛ̄ Mɛ̄lɛ̄ka̍, ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍a̍ nda̍. O̍ ko̍ŋ, mi̍ Mɛ̍lɛ̄ka̍ mūli᷄ŋ nda̍ pāŋālāa̍. Ma̍ tōsā mi̍ Mɛ̄lɛ̄ka̍ ō dūāūnu᷄ŋ tu̍mbe̍ a̍ nda̍ a̍ sɔ̄ɔ̍ŋ wɔ̍ɔ̍ŋ nda̍ wa̍ tōsāa̍ wo̍ŋ, sɔ̄ɔ̍ŋ Mɛ̄lɛ̄ka̍ tu᷄l yɛ̄le̍ŋ tūl bɛ̄ndōo̍ wo̍ŋ.

¹⁷Yɔ̄ŋi̍ nda̍ a̍a̍ so̍li̍ sa̍lāla̍ŋ o̍ Mɛ̄lɛ̄ka̍ kpe̍e̍kpe̍i̍yo̍ lo̍ yɛ̍, o̍ nyi̍nāā yɛ̍ yi̍a̍a̍ lo̍ nda̍ a̍a̍ so̍lī sa̍lāla̍ŋ ni̍ māā mɛ̄lɛ̄ka̍a̍ ndā. Mɛ̄lɛ̄ka̍a̍ sɛ̄nɛ̄īyāā nda̍ sāālu̍ŋ nda̍, ā fi̍nyāā ndāā ma̍māa̍ nda̍ a̍a̍ so̍o̍lūū bɛ̍ɛ̍ le̍ wa̍, nda̍ nda̍ a̍a̍ so̍o̍lūū ni̍.

¹⁸Mi̍ lā lō o̍ ko̍ŋ mi̍ lā mūlūl pōū kpo̍o̍wa̍ bɛ̍ndōo̍ kɔ̄ɔ̍, o̍ si̍mnu᷄ŋ fi̍nyā nyā wo̍. Mɛ̄lɛ̄ka̍ ve̍lū nya̍ kɛ̍sɛ̍ kɛ̍sɛ̍ wo̍ mi̍ ā lō o̍ ko̍ŋ mi̍ lā kɛ̄ɛ̄ ndu̍.

¹⁹“Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ che᷅ he̍ī, mi̍ chē bɛ̍ɛ̍ chūāā ndūa̍a̍ nda̍ chō ni̍, kɛ̍ le̍ kɔ̄l nda̍ tɛ̄ɛ̄mbu̍u̍ ndu̍ wo̍, mbo̍ kɛ̄ɛ̄ nda̍ o̍ vīōlɔ̄ɔ̍ ni᷄ŋ māā ā cho̍ lɛ̍ chūāūwāā ndɔ̄ le̍.

²⁰Mi̍ Mɛ̄lɛ̄ka̍ lō o̍ ko̍ŋ mbo̍ dīmī āā, ‘I̍ cho̍ nda̍ hɔ̄lte̍ŋ fāŋā chōo̍ ba̍ū, mī che᷅ wɔ̄ mɛ̄ɛ̍ mɛ̄ɛ̄lu̍la̍ ndāla̍ŋ lā wā ni̍ŋ yɛ̍. Kāni̍ fo̍ndōle̍, wāŋnda̍ ha̍ā ā cho̍ wa̍nāā sa̍ndu̍ le̍, ā cho̍ chu̍a̍u̍wāā wānā dɔ̍ū tīīnda᷄ŋ o̍ nda̍ ni᷄ŋ te̍.

²¹Ma̍ lō o̍ ko̍ŋ ma̍ mūli᷄ŋ nyɛ᷅m fo̍ndō fo̍ndo̍ŋ sōōlūūwo̍ māā mɛ̄lɛ̄ka̍a̍ ndā, o̍ ko̍ŋ, ma̍ tōsā mi̍ mu̍li᷄ŋ nda̍ pāŋālāa̍, ndu̍yɛ̍ mi̍ du̍a̍u̍nu᷄ŋ tu̍mbe̍ a̍ nda̍. Le̍la̍ŋ, I̍ cho̍ tōsā mī kāa̍le̍ cho̍ nyɛ᷅ o̍ nyɛ̄ kpo̍so̍ŋ te̍ le̍ŋ lē tōsa̍ mī nda̍ wāŋnda̍ I̍sɔ̄lūɛ̄ī a̍ mu̍li̍ŋ nde̍ŋ pāŋālāa̍. I̍ cho̍ tōsā mī kāa̍le̍ si̍nā nyɛ᷅ o̍ nyɛ̄ le̍ le̍ŋ lē tōsa̍ mī nda̍ wāŋnda̍ I̍sɔ̄lūɛ̄ī a̍ dɔ̍u̍nu᷄ŋ tu̍mbe̍.

²²I̍ dɔ̍u̍nu᷄ŋ tu̍mbe̍ a̍ nda̍ o̍ ka̍lā ka̍lā. Tu̍mbe̍ ya̍ I̍ dɔ̍u̍nu᷄ŋ a̍ nda̍ wo̍ ō chō māchūāā mɛ̄ɛ̍ yīŋndē wūle̍ wu᷅le̍le̍ bɛ̍ndūle̍ŋ lē sāndū nu̍a̍ā yɛ̍, yīŋnde̍ tɛ̍ɛ̍mbūū ni̍ŋ nda̍, mī lē lūɛ̄ī chi̍e̍e̍ pīɔ̍m di̍ a̍ nda̍ tɛ̄ɛ̄mbūūwo̍ le̍ŋ, yīŋnde̍ cho̍ chi̍e̍ēŋndo̍ tɛ̄ɛ̄mbūū a̍ tɔ̄lɔ̄ɔ̄ o̍ tɔ̄lɔ̄ɔ̍ cho̍ lēni᷄ŋ nde̍ŋ. Chīyūŋ lūāŋūŋ bɛ̄ndo᷄ŋ ŋ̄ si᷄m chōo̍ wo̍ŋ bɛ̍ɛ̍ kpo̍u̍ yīŋndē lēŋ lē chō mu̍ŋ tɛ̄ɛ̄mbūū, le̍ŋ le̍ yɔ̍nūŋ ni̍ māā tu̍mbe̍ ya̍ I̍ dɔ̍u̍nu᷄ŋ ndo̍.

²³“ ‘I̍ cho̍ nda̍ sɔ̄ɔ̍ŋ pa̍lāŋ bɛ̄ndo̍ŋ dēŋgēlā chōo̍, mī vi̍i̍ vi̍i̍ nda̍ a̍ chīŋɔ̍ma̍ nīa̍ŋ.

²⁴I̍ cho̍ tōsā mī yīa̍a̍ŋ mā bīī nda̍, ndu̍yɛ̍ mī tu̍si̍ nda̍ nāā dīāllūŋ tūūwo̍ chōo̍ mā sɔ̄la̍ pīɔ̍mnda̍ŋ. Nāālā wɔ̄ɔ̍ŋ wɔ̄ɔ̍ŋndā bɛ̄ŋnda̍ŋ lā chō nda̍ bīyɔ̄ɔ̄ mā sɔ̄la̍ pīɔ̍mnda̍ŋ. I̍ cho̍ vīsīāā bīyāa̍ yɔ̄ŋ mā chīŋa̍la᷅ŋ nda̍, ndu̍yɛ̍ mī to̍sa̍ mī kɛ̄ūwāā wɔ̄ɔ̍ŋ wɔ̄ɔ̍ŋāā bɛ̄ndūa̍a̍ ā lɔ̄ɔ̄vi̍a̍a̍ nda̍.

²⁵Chūā pīāāndū ni̍, chūā lāāndū ni̍, wānā la̍nɔ̍ ni̍, chɛ̄lɛ̄kpɛ̍ le̍nde̍ ni̍, bɛ̄ndū yūū ni̍, ā wā ni̍ŋ nda̍ dīūwo̍ o̍ bɛ̍ɛ̄la̍ŋ a̍ mɔ̄ɔ̄ŋ fāŋndo̍ŋ, o̍ ko̍ŋ kɔ̍ɔ̍lī, mī sīōōŋīī bɛ̄ndūe̍i̍ ī dīu̍ ā bɔ̄ɔ̍ bɔ̍ɔ̍ chi̍ɛ̍īla̍ŋ ni᷄ŋ.

²⁶Ya̍ i̍i̍ di̍mi̍ māā I̍ cho̍ nda̍ sɛ̄ŋī o̍ fo̍ndāŋndā la̍nda̍ŋ la̍nda̍ŋ nda̍ŋ, mī ya̍ i̍i̍ to̍sa̍ wānā o̍ wānā ndu̍ o̍o̍ yi̍ya̍ŋ ndɛ̍ bɛ̍ɛ̍ a̍ nda̍ o̍kɔ̄ɔ̄ le̍.

²⁷Kɛ̍ mi̍ yi̍ya̍ŋ māā tē I̍ to̍sa̍ ke̍ŋ pɛ̍, ya̍a̍mɔ̍ɔ̍wa̍a̍ ndāa̍ ā wā ndi̍ sīnā pɛ̄ŋgu̍ o̍ nɛ̄ī che᷅le̍ŋ ni᷄ŋ yɛ̍. Ā wa̍ dīmī māā nda̍ ye᷅m wānāā nīa̍a̍ ni̍, māā ō cho̍ ya̍ Mɛ̍lɛ̄ka̍ Ya̍a̍wɛ̄ɛ̄ le̍ to̍sa̍ ndi̍ le̍.’

²⁸“Wāŋnda̍ I̍sɔ̄lūɛ̄ī a̍ cho̍ ka̍a̍le̍ nɔ̍ kɔ̄l kālu̍ le̍. A̍ nɔ̍ si̍nā pɛ̄ŋgu̍ o̍ sīnā pɛ̄ŋgu̍ le̍.

²⁹Tē nda̍ a̍a̍ wa̍ wānāā kɔ̄l kālu̍ pɛ̍, ā wa̍ nyɛ̍ yɔ̍nu̍ŋ nda̍ wo̍ sīnā pɛ̄ŋgu̍, ndu̍yɛ̍ ā wa̍ sīnā nyɛ̍ yɔ̍nūŋ ni̍ŋ nda̍ o̍ mɛ̄ɛ̄lu̍la̍ŋ ndo̍.

³⁰Tē ō cho̍ ko̍ŋ te̍, vɛ̄ɛ̍nɛ̍ wāŋndo̍ ndu̍ pīlɛ̍, ō nɔ̄lā yɛ̍ mbō yēm wāŋnda̍ wāa̍ ō pīlɛ̍? Vɛ̄ɛ̍nɛ̍ wāŋnda̍ nda̍ ŋi̍ɔ̍ɔ̍ŋ ā yām yɛ̍ wāŋnda̍ wāa̍la̍ŋ tɔ̍? Ī yɔ̍nūŋ te̍, mɛ̄ɛ̍ mī wānāā nda̍ yēm ka̍ŋ nda̍ wāna̍ cho̍ nda̍ māndāa̍ māā pōū kpo̍o̍wa̍ bɛ̍ndū wo̍ ō pīsi̍ nda̍. Mɛ̄ɛ̍ mbō wa̍ māā Mɛ̄lɛ̄ka̍ Ya̍a̍wɛ̄ɛ̄ ndu̍ ma̍l wānāā nda̍ yēm ka̍ŋ nda̍ ya̍a̍mɔ̍ɔ̍wa̍a̍ ndāa̍ o̍ bā ni̍.

³¹Kāni̍ fu̍u̍le̍, ya̍a̍mɔ̍ɔ̍wa̍a̍ ye᷅m ha̍ā I̍sɔ̄lūɛ̍i̍ya̍ wa̍, wāna̍ cho̍ nda̍ māndāa̍ māā pōū kpo̍o̍wa̍ wo̍, ō nɔ̍ kpa̍a̍yā māā pōū kpo̍o̍wa̍ nāā bɛ̍ndōo̍ le̍. Ya̍a̍mɔ̍ɔ̍wa̍a̍ nāa̍ bɛ̍ɛ̍ kɛ̍sɛ̍ kɛ̍sɛ̍ ā sīnā he̍ī.

³²Ya̍a̍mɔ̍ɔ̍wa̍a̍ nāa̍ ā chō māchūāā māā yɔ̄mīī mākīle̍pīi̍ye̍, ī nda̍ tɔ̄l o̍ chīɔ̍ɔ̍ŋ ni᷄ŋ So̍dɔ̄m a̍ Kōmo̍o̍lūā ve̍. Kīle̍pīi̍ma̍ nda̍ŋ mā lōlɛ̍i̍ kpa̍li̍ ndu̍yɛ̍ tē wānā de᷅ ma̍ŋ pɛ̍, wūo̍o̍ ŋ̄ wū ni̍.

³³Mūɛ̄īmā nda̍ tōōsīāā a̍ kōmɔ̄ɔ̄ kīle̍pīi̍ya̍ŋ māŋ nda̍ŋ, mɛ̄ɛ̍ yɛ̍īmā kɛ̄ūwo̍ mā chō nu̍a̍ā yɛ̍, le̍nde̍ ma̍ cho̍ ni̍, mɛ̄ɛ̍ yɛ̍īmā yɛ̍lɔ̄ɔ̍ mā dīī nu̍a̍ā yɛ̍, le̍nde̍ ma̍ di̍ī ni̍.

³⁴“Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ lo̍o̍nu̍ŋ a̍ nyɛ̄ ya̍a̍mɔ̍ɔ̍wa̍a̍ ndūa̍a̍ ā tōsa̍ wo̍. Ō chō chūmndo̍ le̍ te̍le̍ŋ kpe̍e̍kpe̍i̍yo̍ le̍ mbō hu᷄ŋ tu̍sī nda̍ nyɛ̄ pālāa̍ chōo̍.

³⁵Ya̍ Mɛ̍lɛ̄ka̍ ya̍ mi̍ŋgī ma̍a̍ ni̍. I̍ cho̍ nda̍ hūnɔ̄ɔ̄ nyɛ̄ pālāa̍ tūsī chōo̍, le̍ nyɛ̄ nda̍ tōsa̍ wo̍. O̍ lēpīlɛ̍ ni᷄ŋ kpe̍, ā chō sīɛ̄ɛ̄lā mī pēlo̍ŋ ŋ̄ fāŋa̍ŋ nda̍ ba̍ū. Te̍le̍ŋ kpūndɛ̍lā yɛ̍ yɛ̍la̍ŋ lā chō nda̍ kōmāllo̍, ō chō ni᷅ŋ kpɛ̍ɛ̍lūŋ, ō bēndu̍ lɛ̍ ni̍ŋ ti᷅ŋ te̍.

³⁶Tē Mɛ̄lɛ̄ka̍ Ya̍a̍wɛ̄ɛ̄ o̍ che᷅ pɛ̍ māā kpāāya̍ wānāā ndūa̍a̍ ō chūu̍, ō chō wānāā ndūa̍a̍ chīīndīāā. Wānāa̍ so̍o̍lūū ndu̍ wa̍ ō chō nda̍ īnyīɛ̍ɛ̍ tūīīnɔ᷄ŋ, tē ō chē pɛ̍ māā ā nɔ̍ wa̍nā o̍ wa᷅na̍ ma̍la̍ nda̍ le̍.

³⁷Mɛ̄lɛ̄ka̍ Ya̍a̍wɛ̄ɛ̄ o̍ cho̍ wānāā ndūa̍a̍ nyūnā āā, ‘Mɛ̄lɛ̄ka̍a̍ nya̍ wa̍ ha̍ā pīɛ̄īyo̍ wa̍, ā nya̍ a̍a̍ yi̍ya̍ŋ ha̍ā māā nda̍ cho̍ pōū kpo̍o̍wa̍ bɛ̍ndōo̍ le̍ nya̍ māndāa̍ ni̍ wa̍, kūɛ̍ɛ̍nɛ̍ nda̍ chō yɛ̄?

³⁸Mɛ̄lɛ̄ka̍ā nyāa̍ ha̍ā, tē nya̍ a̍a̍ di̍ī chɔ̄lūa̍a̍ le̍ sa̍lāla̍ŋ sōlīo̍o̍ o̍ nda̍ lo̍ pɛ̍, chūɛ̄īmā chɔ̄lūāā kāŋ, mā kɛ̄ndɛ̄ kɛ̍ndīa̍ŋ, ma̍ŋ nya̍ a̍a̍ so̍lī sa̍lāla̍ŋ o̍ nda̍ lo̍ ni̍, o̍ ko̍ŋ kɔ̍ɔ̍lī, mī nya̍ a̍a̍ so̍li̍ vɛ̄lɛ̄ mūɛ̄īya̍ŋ sa̍lāla̍ŋ o̍ nda̍ lo̍. Vɛ᷅ ni̍ko̍ mɛ̄lɛ̄ka̍a̍ nyāā ka̍ŋ ā ma̍lā nya̍ le̍? Ā chɔ᷄ŋ ni̍ko̍ wa̍, ā māla̍ nya̍. Ā hu᷄ŋ ni̍ko̍ ā hu᷄ŋ chi̍i̍ndīāā nya̍.

³⁹“ ‘Kɛ̄ lā hīŋ chɔ̄ māā ya̍ Mɛ̄lɛ̄ka̍, ya̍ pīlɛ̍ kpe̍ cho̍ ni̍, māā mɛ̄lɛ̄ka̍ chēle̍ŋ ō cho̍ o̍ ya̍ kɔ̍ɔ̍lī le̍. Ya̍ Mɛ̍lɛ̄ka̍ I̍ nɔ̍ kpāāyāa̍ mī di̍ī ndu̍yɛ̍ I̍ nɔ̍ kpāāyāa̍ mī mi̍ŋgi̍ yōōmū. I̍ nɔ̍ kpāāyāa̍ mī yɔ̍ŋu̍l, ndu̍yɛ̍ I̍ nɔ̍ kpāāyāa̍ mī si̍ŋgi̍ vɛ̄lɛ̄. Ndu̍yɛ̍ tē I̍ di̍mi̍ le̍ wānā o̍ wānā nyɛ̍ pālāa̍ tūsī chōo̍ pɛ̍, wānā cho̍ mbō sōli̍ wānā ko̍ŋ ya̍ o̍ bā, mbō bāŋa̍ ndu̍ le̍.

⁴⁰I̍ he̍e̍lu̍ bāa̍ o̍ ha̍la̍ mi̍ ti̍a̍ŋnu᷄ŋ. Ha̍a̍a̍ ya̍ Mɛ̍lɛ̄ka̍ mi̍ wa᷅ yōōmū le̍ fɛ̍ɛ̍ŋ fɛ̍ɛ̍ŋ,

⁴¹I̍ cho̍ mūɛ̄ī nīi̍ fāŋnde̍ yīkpā mī ī lūɛ̄ī ŋɛ̍le̍ ŋɛ̍le̍. I̍ cho̍ ndi̍ chūā ka̍ū, le̍ wāŋnda̍ yāmɛ̍i̍ kīlūllo̍, mī tu̍si̍ nda̍ nyɛ̄ pālāa̍ chōo̍ a̍ ndi̍. Mɛ̄ɛ̍ mī mi̍ŋgu̍l ya̍a̍mɔ̍ɔ̍wa̍a̍ nīa̍a̍ māa̍. Wānāa̍ tu̍l la̍ lēyɛ̄ wa̍, mɛ̄ɛ̍ mī mi̍ŋgu̍l nda̍ māa̍ ko̍ŋ.

⁴²Chīŋɔ̍ma̍ nīa̍ŋ mā chō hūnɔ̄ɔ̄ dīūwɔ̄ɔ̄ wa᷅ŋ a̍ kōo̍ma̍ nda̍ŋ. Mūɛ̄ī ni̍i̍ fāŋnde̍ ī chō hūnɔ̄ɔ̄ vīsīŋ nda̍ŋ dīo̍. A̍ cho̍ bɛ̍ɛ̍ o̍ chɛ̄le̍ŋ ni᷄ŋ nda̍, I̍ cho̍ nda̍ hūnɔ̄ɔ̄ dīū. Kōo̍ma̍ wānāā ya̍ I̍ di̍ū ni̍ŋ nda̍ mā kūā ni̍ŋ ko̍ŋgi̍la̍ŋ lɛ̄ŋ. Ya̍a̍mɔ̍ɔ̍wa̍a̍ nɔ̍ ha̍ā sīɛ̄īyu̍ŋ vi̍lɛ̄ɛ̄ŋ bɛ̄ndo̍ŋ nda̍, I̍ cho̍ hūnɔ̄ɔ̄ nda̍ bōlle̍ kīlī.’

⁴³“Wāŋnda̍ o̍ lɛ̄ŋnde̍ ni᷄ŋ, lā sāŋga̍la̍ wa̍nāa̍ Mɛ̄lɛ̄ka̍ Ya̍a̍wɛ̄ɛ̄ wa̍. Ya̍a̍mɔ̍ɔ̍wa̍a̍ di̍u̍ bu̍ɛ̍i̍yāā ndūa̍a̍ wa̍, Mɛ̄lɛ̄ka̍ mīŋgu̍l ya̍a̍mɔ̍ɔ̍wa̍a̍ ka̍ŋ māa̍. Ō tūsi̍ ya̍a̍mɔ̍ɔ̍wa̍a̍ ndūa̍a̍ nyɛ̄ pālāa̍ chōo̍. Ō ma᷄l I̍sɔ̄lūɛ̍i̍ya̍ le̍ yɔ̄ŋndā wɔ̄ɔ̍ŋndā nda̍ tōsa̍ la̍ŋ, ndu̍yɛ̍ mbo̍ dīndī lɛ̄ŋndē ndāle̍ŋ.”

⁴⁴O̍ ko̍ŋ kɔ̍ɔ̍lī, mi̍ Mūu̍sē chu̍ā Chɔ̄ɔ̍sūāā po̍ Nu᷅ŋ ndo̍ ma̍ kūā I̍sɔ̄lūɛ̍i̍ya̍ lāchī. Mi̍ Mūu̍sē o̍ lo᷅ o̍ ko̍ŋ, mbo̍ tōmbōlāl I̍sɔ̄lūɛ̍i̍ya̍ dīōmnda̍ wa̍ o̍ chōnde̍i̍ he̍ī ni᷄ŋ nda᷄ŋ kpo̍lo̍to̍to̍, chɔ̍ŋ o̍ kāndɔ᷄ŋndo̍ mbo̍ fūūlūū o̍ mɛ̄ɛ̄lu̍la̍ŋ di̍, I̍sɔ̄lūɛ̍i̍ya̍ kpo̍u̍ mā yāŋ ni᷅la̍ŋ.

⁴⁵Mɛ̄ɛ̍ Mūu̍sē o̍ chi̍i̍ I̍sɔ̄lūɛ̍i̍ya̍ dīōmnda̍ŋ ndāŋ tōmbōlāl kpo̍u̍,

⁴⁶mbo̍ dīmūl nda̍ āā, “Dīōmndā ya̍ I̍ di̍mu̍l nya̍ la᷅ŋ pāa̍le̍ hāūle̍ŋ nde᷅ŋ nda̍ŋ, lā kɛ̍si̍ŋ nda̍ŋ o̍ lākɔ̄l ndu̍yɛ̍ mī lā tōsa̍ nyɛ̄ o̍ nyɛ̄ la̍ di̍mi̍ le̍ tōsāa̍. Lā dīmu̍l chu̍a̍a̍ nyāa̍ dīōmnda̍ŋ ndāŋ le̍ mī nda̍ bɛ̍ɛ̍ a̍ hi̍o̍ū lāchī a̍ nyɛ̄ o̍ nyɛ̄ sāwāla̍ Mɛ̄lɛ̄ka̍ la̍ŋ ndāŋ lā dīmi̍ le̍ tōsāa̍.

⁴⁷Sāwāla̍ŋ ndāŋ lā cho̍ di̍ōmndā fo̍ndō fu̍u̍ le̍, la̍ŋ la̍ cho̍ yōōmūlā nyāla̍ŋ ni̍. Lā tōsa̍ nyɛ᷅ o̍ nyɛ̄ sāwāla̍ŋ ndāŋ lā dīmi̍ le̍ tōsāa̍, ko̍ŋ to̍sā ni̍ mī lā vīōū yōōmū o̍ lɛ̄ŋndē nya̍ chō le᷅ŋ kɔ̄la̍ŋ chūa̍a̍ Chɔ̍ɔ̍dāŋ le̍e̍lōo̍ le̍ŋ ni᷄ŋ.”

⁴⁸O̍ pāa̍le̍ pi᷅lɛ̍lē lēŋ chōo̍ kpe̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

⁴⁹“Kɔ̍ o̍ pēmbūŋ A̍ba̍lūīmndo᷄ŋ, o̍ lɛ̄ŋndē Mo̍wa̍bīle̍ŋ nde᷅ŋ ni᷄ŋ na̍ŋ, Chɛ̄lu̍i̍kō i̍kɛ̍i̍, mā kɔ̍ he᷅l o̍ Pēmbīī Ni̍bɔ̄ve̍ cho̍o̍, mā mɛ̄ɛ̄nda̍ŋ lɛ᷅ŋndē Ke̍nāŋnde̍ŋ kɔ̄ɔ̄lī kɔ̄ɔ̄lī kpo̍u̍, lɛ̄ŋndē ya̍ I̍ cho̍ I̍sɔ̄lūɛ̍i̍ya̍ kīo̍o̍ nyɛ̄ ndā le̍ŋ.

⁵⁰Hēlɔ̄ɔ̄ ŋ̄ chō o̍ pēmbīī kēŋ chōo̍ wo̍, a̍ cho̍ lɛ̍ tōlɔ̄ɔ̄ le̍, lo̍ŋ ŋ̄ chō wu᷄ ni̍, mā kūɛ̄ nāa̍ fi̍nyāā nūm a̍ ma̍māa̍ ā kūɛ̄ wa̍, mɛ̄ɛ̍ E̍lɔ̄ŋ bɛ̍ nūm o̍ vi᷅ o̍ Pēmbīī Hɔ̍ɔ̄ve̍ mbo̍ kūā nāa̍ fi̍nyāā ndūāā ma̍māa̍ ā kūɛ̄ wa̍ yɛ̍.

⁵¹Le̍ sa̍bū he̍ī ī chō yɔ̄nɔ᷄ŋndo̍ cho̍ ni̍, le̍ mɛ̄ɛ̍ nya̍ sōli̍ ya̍ dīōm, nya̍ E̍lɔ̄ŋ bɛ̍ nūm I̍sɔ̄lūɛ̍i̍ya̍ o̍ hɔ̄l lɛ̍. Mɛ̄ɛ̍ nya̍ fūūlu̍u̍ Mɛ̍lu̍i̍bā, le̍ hūnɔ̄ɔ̍ Ka̍dɛ̍sī chi̍e̍e̍, o̍ lɛ̍ŋndē po̍lte̍ŋ ni᷄ŋ, nāa̍ mɛ̄ŋnda̍ŋ mā fūla̍ o̍ pōūwo̍ ni᷄ŋ le̍ mī wāŋnda̍ ā ko᷄l la̍, lā ke̍ ya̍ lēbɛ̄ɛ̄ I̍sɔ̄lūɛ̍i̍ya̍ o̍ hɔ̄l lo̍ŋ, mī lā chɔ᷄m I̍sɔ̄lūɛ̍i̍ya̍ māā Mɛ̄lɛ̄ka̍ dīāndāa̍ le̍ ya̍ I̍ cho̍ le̍.

⁵²Le̍la̍ŋ, lɛ̄ŋndē ya̍ I̍ cho̍ le᷅ŋ I̍sɔ̄lūɛ̍i̍ya̍ kɔ̄la̍ŋ kīo̍o̍ le̍ŋ, ā chō le̍ŋ chɔ̄ kɔ̄ɔ̄lī kɔ̄ɔ̄lī pɛ̍ɛ̍ŋ a̍ lēhɔ̄l, kɛ̍ a̍ lu̍e̍ī le̍ni̍ŋ te̍.”