Read Southern Kisi Dītɔ̍nɔ̍mi̍ī 33 Bible Online

Dītɔ̍nɔ̍mi̍ī 33 - Southern Kisi bible

Dītɔ̍nɔ̍mi̍ī 33

¹O̍ ko̍ŋ kɔ̍ɔ̍lī, lɔ̍ɔ̍ pa̍ mi̍ Mūu̍sē, wāna̍ Mɛ̄lɛ̄ka̍a̍ ō wu᷄, mbo̍ dūāū I̍sɔ̄lūɛ̍i̍ya̍ sa̍lā.

²Mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ o̍ fu̍la̍ o̍ Pēmbīī Sa̍a̍nāīve̍ chōo̍ mbo̍ hūŋ. Ō fūla̍ I̍dɔ̄m mbo̍ wā hūnɔ̄ɔ̍ mɛ̄ɛ̍ pāa̍le̍ŋ lē fūlā nu̍a̍ā īdīi̍ mī lē wa̍ hēlɔ̄ɔ̍ sɛ̍ɛ̄ bɛ̄ndū yɛ̍. Pa̍ŋgēle̍ ndɔ̄ɔ̍ ō chō dīōndɔ̄ɔ̍ kpe̍e̍kpe̍i̍ fūlāa̍ o̍ Pēmbīī Pa̍lūāŋnde̍ chōo̍. Ō hīŋ a̍ ki̍i̍la̍a̍ ndūa̍a̍ kɔ̄ɔ̄lī o̍ wāa̍la̍ŋ ni᷄ŋ, ndu̍yɛ̍ mi̍ yīŋndē wūle̍ wu᷅le̍le̍ bɛ̍ndūle̍ŋ lē wā ndu̍ o̍ bā kɛ̄ndɔ̄ɔ̍.

³Tōnya̍ kpe̍e̍kpe̍i̍, Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍la̍ wānāā ndūa̍a̍. Wānāā ndūa̍a̍ cho̍ le̍ ndu̍ wa̍ kpo̍u̍, ō chō nda̍ māndāa̍ le̍ te̍le̍ŋ o̍ te̍le̍ŋ. Le̍ he̍ī, nda̍ kpo̍u̍ ā chō ndu̍ tūndɔ᷄ŋndo̍ o̍ lābɛ̄ŋgu̍ ni̍ŋ mā sōōlūū ndu̍, ndu̍yɛ̍ mā yāŋ ni᷅la̍ŋ o̍ sīlālā ndɔ̄la̍ŋ.

⁴Mɛ̄ɛ̍ nya̍ wāŋnda̍ I̍sɔ̄lūɛ̄ī a̍ chu̍u̍ŋgi̍āŋ kpo̍u̍ na̍a̍ pi᷅lɛ̍, lātūlu̍ a̍ wānāa̍ cho̍ nya̍ bōlle̍ŋ nda̍, mi̍ ya̍ Mūu̍sē lo᷅ o̍ ko̍ŋ mi̍ ke᷅ nya̍ sāwāla̍ Mɛ̄lɛ̄ka̍ la̍ŋ, la̍ cho̍ la᷅ŋ nyɛ̄m ki̍ɔ̍ɔ̍ŋ le̍ kāa̍le̍ nāāle̍ I̍sɔ̄lūɛ̍i̍le̍ŋ nda̍ŋ. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ si̍mnu᷄ŋ Ma̍sā bɛ̍ndōo̍ le̍ na̍a̍ I̍sɔ̄lūɛ̍i̍ya̍ kpo̍u̍.”

⁵

⁶Mi̍ Mūu̍sē o̍ ka̍ndū ni̍ko̍ I̍sɔ̄lūɛ̍i̍ya̍ sa̍lāa̍ dɔ̄wɔ̄ɔ̍ a̍ yu̍ŋgu̍la̍ŋ, mbo̍ kāndū a̍ yu̍ŋgu̍ Lūbɛ᷅ŋ ndo̍. Mbo̍ dūāū nda̍ sa̍lā āā, “Mbɔ̄ māā Mɛ̄lɛ̄ka̍ tōsa̍ yu̍ŋgu̍ nyāa̍ ō ki̍o̍lū o̍ chi̍e̍ēŋndo̍ chōo̍ le̍ fɔ̍. Kɛ̍ ndu̍yɛ̍ vɛ̍lɛ̄, mbō māā lā wa᷅ fāŋgā o̍ yu̍ŋgu̍ nyāa̍ chōo̍ le̍ fɔ̍.”

⁷O̍ ko̍ŋ kɔ̍ɔ̍lī, mbo̍ dūāū vɛ̄lɛ̄ yu̍ŋgu̍ Chu̍dā wo̍ sa̍lā, mbo̍ dīmī āā, “Ōo̍ Mɛ̄lɛ̄ka̍ Ya̍a̍wɛ̄ɛ̄, tu̍e̍i̍ pi̍ɛ̍īle̍ yu̍ŋgu̍ Chu̍dā wo̍. To̍sa̍ a̍ sa̍bū, mā mīīŋgu̍ yu̍ŋgu̍la̍ I̍sɔ̄lūɛ̍i̍la̍ŋ lā pīlɛ̍la̍ŋ chōo̍ Mɛ̄lɛ̄ka̍. Ke̍ nda̍ dīāllūŋ kāla᷄ŋ Mɛ̄lɛ̄ka̍ le̍ mā sɔ̄ŋga̍ mā chīɔ̍u̍ yōōmūlā ndāla̍ŋ. Ma̍la̍ nda̍ mā yēm ya̍a̍mɔ̍ɔ̍wa̍a̍ ndāa̍ Mɛ̄lɛ̄ka̍.”

⁸O̍ ko̍ŋ kɔ̍ɔ̍lī, mbo̍ pīɛ̄ī Mɛ̄lɛ̄ka̍ le̍ yu̍ŋgu̍ Li̍va̍īyo̍ mbo̍ dīmī āā, “Mɛ̄lɛ̄ka̍ Ya̍a̍wɛ̄ɛ̄, yu̍ŋgu̍ Li̍va̍īyo̍, yu̍ŋgu̍ nu̍m ŋ̄ kāāla̍ wo̍, nda̍ ŋ̄ ke̍ nyɛ̄m nu̍m cho̍ le̍ nu̍m dīōmndo̍ nyūnāa̍ wo̍ŋ ni̍, mu̍ŋ yɔ̍nūŋ ni̍ māā Yu̍lūīm a̍ Tu̍mīm.[1] Ma̍ lō o̍ ko̍ŋ ma̍ tɔ̄ɔ̄nda᷄ŋ wa᷅ŋnda̍ ha̍ā o̍ fo̍ndāa̍ dīōla̍ŋ āā, Ma̍sāā le̍ mā si̍na̍ wānāā su̍u̍ nda̍ chō wa̍. Ma̍ chīŋa̍la᷅ŋ nda̍ kɛ̍sɛ̍ kɛ̍sɛ̍ o̍ pēēla̍ pɔ̍mbɔ̄la̍ŋ Mɛ̍lu̍i̍bā le̍ mā chē tīīnda᷄ŋ ndāa̍ o̍ nūm ni̍ŋ.

⁹Mi̍ wāŋnda̍ ha̍ā ā tūsi᷄ŋ o̍ dīōm nūmndo̍ bɛ̄ŋgu̍, ndu̍yɛ̍ kpe̍ma̍ ŋ̄ yīi̍ a̍ nda̍ wo̍, ma̍ lō o̍ ko̍ŋ ma̍ hīāū lāchī a̍ wāa̍ o̍ kpe̍ma̍ ko̍ŋ bɛ̄ŋgu̍. Ma̍ chūā dīōm nūmndo̍ a̍ kpe̍ma̍ ko̍ŋ nyɛ̄ kpe̍e̍kpe̍i̍, mbo̍ hīāū bɛ̍ɛ̍ mɛ̄ɛ̍ nda̍ chūa̍ fi̍nyāā ndāa̍, kɛ̄lɛ̄ŋgāā kālāa̍ ndāa̍ kɛ̄lɛ̄ŋgāā bɛ̄ndāā ndāa̍ ɔ̄ɔ̄ pɔ̄mbūāā ndāa̍ kɛ̄lɛ̄ŋgāā yēmāa̍ ndāa̍, kɛ̄lɛ̄ŋgāā chūāūwāā ndāā vi̍a̍lāa̍ yɛ̍.

¹⁰Wāŋnda̍ ha̍ā, nda̍ pɛ̍ɛ̍kū wa᷅ŋnda̍ I̍sɔ̄lūɛ̍i̍ sāwāla̍ nu̍mnda̍ŋ a̍ pɛ̄ɛ̄kūlā nūmnda̍ŋ ni̍. Nda̍ lu̍ām nyɛ᷅m chūŋ kɛ̄ndɔ̍ŋ o̍ nūmndo̍ ni̍, ndu̍yɛ̍ mā sōlī vɛ̍lɛ̄ sa̍lālā lūāmāā la̍ŋ o̍ ma̍āŋ nūmndo̍ chōo̍.

¹¹Le̍la̍ŋ ke̍ wa᷅ŋnda̍ ha̍ā kpāāyāa̍ Mɛ̄lɛ̄ka̍ Ya̍a̍wɛ̄ɛ̄. Hi̍ni̍ kɔ᷅l a̍ wa̍li̍ wāŋnda̍ ha̍ā ā chō tōsāa̍ wo̍ Mɛ̄lɛ̄ka̍. Tɛ̍ɛ̍mbu̍u̍ ya̍a̍mɔ̍ɔ̍wa̍a̍ ndāa̍ mā to̍sa̍ fɛ̍ɛ̍ŋ a̍ fɛ̍ɛ̍ŋ ā si̍mūl lɛ̍ nda̍ le̍.”

¹²O̍ ko̍ŋ kɔ̍ɔ̍lī, mi̍ Mūu̍sē o̍ du̍a̍ū vɛ̄lɛ̄ yu̍ŋgu̍ Bɛ̍ŋnja̍mīŋ ndo̍ sa̍lā, mbo̍ dīmī āā, “Yu̍ŋgu̍ Bɛ̍ŋnja̍mīŋ ndo̍, yu̍ŋgu̍ Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍la̍ wo̍ o̍ cho̍ ni̍. Mbɔ̄ māā yu̍ŋgo̍o̍ ho̍ō ā hīo̍u̍ la̍chi̍ a̍ wānɔ᷄ŋndo̍ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍ nyɛ̄ o̍ nyɛ̄ yɔ̍nūŋ a̍ nda̍ le̍ fɔ̍. Kāni̍ fo̍ndōle̍, Mɛ̄lɛ̄ka̍ chō nda̍ māndāa̍ le̍ te̍le̍ŋ o̍ te̍le̍ŋ. Wānāā Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍la̍ wa̍ wāŋnda̍ ha̍ā ā chō ni̍, ā chō māchūāā Mɛ̄lɛ̄ka̍ o̍ bā mɛ̄ɛ̍ wānā bi̍ī nu̍a̍ā chɛ̄lɛ̍kpɛ̍ le̍ndōo̍ o̍ bāla̍ŋ chōo̍ yɛ̍.”

¹³O̍ ko̍ŋ kɔ̍ɔ̍lī, mi̍ Mūu̍sē o̍ du̍a̍ū yu̍ŋgu̍ Chōo̍si̍ɔ̍ɔ̍ sa̍lā, mbo̍ dīmī āā, “Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍ lɛ᷅ŋndē wāŋnda̍ ha̍ā sa̍lā, mbō tōsa̍ mī mɔ᷄mndo̍ ō wa̍ chūchɔ̄ɔ̍ o̍ tɔ̄lɔ̄ɔ̄lā ndāla̍ŋ chōo̍ o̍ ko̍ŋ kɔ̍ɔ̍lī, mī mɛ̄ŋnda̍ŋ mā būli̍ lɛ̄ŋ le̍ tɔ̄lɔ̄ɔ̄lā ndāla̍ŋ pɔ̄ɔ̄līa̍a̍ fɔ̍.

¹⁴Mbɔ̄ māā wāŋnda̍ ha̍ā ā wa̍ ko̍mɔ̄ɔ̄lā kɛ̄ndɛ̄ kɛ̍ndɛ̄la̍ŋ kēndīo̍o̍ o̍ chīɔ̄ɔ̄ŋ nda᷄ŋ ni᷄ŋ, kōmɔ̄ɔ̄lā pāa̍le̍ŋ lē tōsā mī lā na᷄ŋ nāŋɔ̄ɔ̄ bɛ̄ndōo̍ la̍ŋ, la̍ wa᷅ di̍u̍wɔ̄ɔ̍ ī pāŋgu̍ o̍ ī pāŋgu̍ la̍ŋ.

¹⁵Mbɔ̄ māā yɔ̄mīī ndɛ̄i̍ ku̍a̍mɛ̄i̍ o̍ pēmbūŋ nda̍ŋ māsīndɛ̄ si̍ndɔ᷄ŋ chōo̍, ī wa̍ ko̍mɔ̄ɔ̍ lɔ̍pī lɔ̍pī fɔ̍.

¹⁶Mbɔ̄ māā lɛ̄ŋndē ndāle̍ŋ lē wa̍ le̍ du̍a̍u̍wa᷄ŋ sa̍lā a̍ tɔ̄lɔ̄ɔ̄ o̍ tɔ̄lɔ̄ɔ̄ kɛ̄ndɛ̍ wu᷅l o̍ lɛ̄ŋnde̍ŋ chōo̍ fɔ̍. Mbɔ̄ māā Mɛ̄lɛ̄ka̍ Ya̍a̍wɛ̄ɛ̄, o̍ so̍ō nāa̍ ya̍ Mūu̍sē chu̍a̍ o̍ bɔ̄ɔ̄ ŋūālɛ̍i̍yo̍ ni᷄ŋ ndo̍, ō chɔ̍ lɛ᷅ŋndē ndāle̍ŋ nyīnā fɔ̍. Sɔ̄ɔ̍ŋ kɛ̍ndɛ̄ŋ ya̍ I̍ di̍mi̍ mu᷅ŋ ki̍nɛ̍i̍ le̍ yu̍ŋgu̍ Chōo̍si̍ɔ̍ɔ̍ wo̍ŋ, mbɔ̄ māā ī pīlɛ̍ bɛ̍ɛ̍ ī lo᷅ kɔ̄ɔ̄lī le̍ yɔ̄nɔ᷄ŋndo̍ le̍ fɔ̍. Kāni̍ fo̍ndōle̍, Chōo̍sɛ̍, ndu̍ wa̍ bɛ̄ndāā ndūa̍a̍ chīla̍ŋ ni̍.

¹⁷Chōo̍sɛ̍ nɔ̍ mānūāā bɛ̄ɛ̄le̍ŋ o̍ yu̍ŋgu̍ ndāa̍ chōo̍ mɛ̄ɛ̍ nāū tōōyē ta̍se̍ wāŋndo̍ nāū ndɔ̄ɔ̍ ō kūām ndo̍ ō nɔ̄ nu̍a̍ā bɛ̄ɛ̄le̍ŋ nāūwāā tūa̍a̍ tɛ̄ɛ̄ŋ yɛ̍. Ndu̍yɛ̍ mɛ̄ɛ̍ chīi̍yo̍ ō nɔ̄ nu̍a̍ā dīāllūŋ kāla᷄ŋ yɛ̍, le̍nde̍ Chōo̍sɛ̍ o̍ nɔ̍ dīāllūŋ kāla᷄ŋ ni̍. Po̍ Chōo̍si̍ɔ̍ɔ̍ ō pīlɔ̍ɔ̍, Mānāa̍sē, yu̍ŋgu̍ ndɔ̄ɔ̍ so̍vɛ̄i̍ya̍a̍ ndāa̍ cho̍ o̍ wāa̍la̍ŋ ni᷄ŋ nda̍ nda̍ cho̍ kpāāya̍ Chōo̍si̍ɔ̍ɔ̍ ō pīlɔ̍ɔ̍ ni̍. O̍ ko̍ŋ kɔ̍ɔ̍lī, yu̍ŋgu̍ E̍fi̍lūēmndo̍, ndu̍ yɔ̍nūŋ māā Chōo̍sɛ̍ po̍ ndɔ̄ɔ̍ ō pīlɔ̍ɔ̍ ni̍, so̍vɛ̄i̍ya̍a̍ ndāa̍ cho̍ wāa̍la̍ŋ o̍ wāa̍la̍ŋ ni᷄ŋ nda̍ cho̍ vɛ̄lɛ̄ kpāāya̍ Chōo̍si̍ɔ̍ɔ̍ ni̍. A̍ so̍vɛ̄i̍ya̍a̍ ka̍ŋ Chōo̍sɛ̍ cho̍ wāŋnda̍ o̍ lɛ̄ŋnde̍ ni᷄ŋ yo̍mɔ̄ɔ̄ ni̍, ndu̍yɛ̍ mbō kūɛ̄ a̍ nda̍ nyīndɔ̄ɔ̍ kɛ᷅ kɛ᷅.”

¹⁸O̍ ko̍ŋ kɔ̍ɔ̍lī, mi̍ Mūu̍sē o̍ du̍a̍ū vɛ̄lɛ̄ yu̍ŋgu̍ Sɛ̍bu̍lɔ̄ŋndo̍ a̍ yu̍ŋgu̍ I̍sa̍a̍kā wo̍ sa̍lā. Mbo̍ dīmī āā, “Mbɔ̄ māā yu̍ŋgu̍ Sɛ̍bu̍lɔ̄ŋ ndo̍, ā su᷄l o̍ yākōle̍ nda̍ chō o̍ pēe̍ mɛ̄ŋmā īhɛ᷄llo̍ chōo̍ le̍ŋ ni̍ŋ fɔ̍. Ndu̍yɛ̍ mbɔ̄ māā yu̍ŋgu̍ I̍sa̍a̍kā wo̍, sūl ndāa̍ ō hīo̍u̍ la̍chi̍ a̍ chɔ̄ɔ̄lɔ᷄ŋndo̍ nāa̍ nda̍ chō o̍ cha᷄lta̍ ndāla̍ŋ nda̍ fɔ̍.

¹⁹Wāŋnda̍ ha̍ā ā vēēlū ni̍ŋ wa᷅ŋnda̍ o̍ bɔ̄ŋa᷅ŋnda̍ŋ o̍ pēmbīī ndɛ̄i̍ chōo̍, ndu̍yɛ̍ mā lo̍ o̍ ko̍ŋ mā sōli̍ sa̍lālā kpe̍e̍kpe̍i̍la̍ŋ ndo̍ŋ o̍ Mɛ̄lɛ̄ka̍ lo̍. Kāni̍ fo̍ndōle̍, pēe̍ mɛ̄ŋmā īhɛ᷄llo̍ ō tōsā ni̍ŋ mī wāŋnda̍ ha̍ā ā su᷄l. Ndu̍yɛ̍, si̍o̍ōŋnde̍ o̍ pēe̍ mɛ̄ŋmā īhɛ᷄llo̍ kɔ̄ŋgɔ̍ i̍ to̍sā ni̍ŋ mā su᷄l ta̍u̍ a̍ nyɔ̄ɔ̍ŋ.”

²⁰O̍ ko̍ŋ kɔ̍ɔ̍lī, mi̍ Mūu̍sē o̍ sa̍ŋgālā Mɛ̄lɛ̄ka̍ le̍ yu̍ŋgu̍ Ka̍a̍dī wo̍, mbo̍ dīmī āā, “Sāŋgālāa̍ chō le̍ Mɛ̄lɛ̄ka̍, kāni̍ fo̍ndōle̍, ō chɔ̄ɔ̄lu̍ yu̍ŋgu̍ Ka̍a̍dī wo̍ lɛ̄ŋnde̍ŋ kē. Yu̍ŋgu̍ ka̍a̍dī wo̍ ā chō māchūāā o̍ lɛ̄ŋndē ndāle̍ŋ ni᷄ŋ mɛ̄ɛ̍ kpɔ̍kūŋndo̍ ō chāl nu̍a̍ā mɛ̄ŋgɛ̄lāa̍ le̍ vīsī o̍ cho̍ chɔ̄ mbō de᷄l ndu̍ chōo̍ mbō sɛ̄ɛ̄si̍a̍a̍ ndu̍ bāla̍ŋ o̍ ko̍ŋ kɔ̍ɔ̍lī, mbō sūŋgū ndu̍ bōlle̍ŋ ndo̍.

²¹Wāŋnda̍ ha̍ā, nda̍ pi̍la̍ hɛ̍li̍ lɛ̄ŋndē kɛ̄ndɛ̄ kɛ̍ndɛ̄lē nda̍ yēēma̍ le̍ŋ ni̍. Nda̍ nda̍ ke̍ būŋgɛ̄ī lēmāsɛ̄i̍ ni̍. Bōōndi̍i̍ wāŋ bɛ̄ndūāā I̍sɔ̄lūɛ̍i̍ya̍ chūūŋgi̍āŋ nde̍, mi̍ wāŋnda̍ ha̍ā ā lō o̍ ko̍ŋ ma̍ tōsā nyɛ̍ hi̍ni̍ Mɛ̄lɛ̄ka̍ Ya̍a̍wɛ̄ɛ̍ kɔ̄llo̍ wo̍ wāŋnda̍ tɛ̄ɛ̄ŋ. Ma̍ tōsā mɛ̄ɛ̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ lā dīmi̍ yɛ̍.”

²²O̍ ko̍ŋ kɔ̍ɔ̍lī, mi̍ Mūu̍sē di̍mī a̍ yu̍ŋgu̍ Da᷅ŋ ndo̍ o̍kɔ̄ɔ̄ āā, “Yu̍ŋgu̍ Da᷅ŋ ndo̍, nda̍ nda̍ chō māchūāā mɛ̄ɛ̍ kpɔ̍kūŋ fɔ̍ŋndɔ̍ɔ̍ ō chō nu̍a̍ā yɛ̍. Mɛ̄ɛ̍ kpɔ̍kūŋndo̍ ō fūlā nu̍a̍ā fa̍ŋ a̍ hūūlōo̍ le̍ kɔ̄la̍ŋ vīsīo̍o̍ dēlɔ̄ɔ̍ chōo̍ yɛ̍, le̍nde̍ yu̍ŋgu̍ Da᷅ŋ ndo̍ ā fūla̍ Ba̍a̍sīāŋ fa̍ŋ le̍ ya̍a̍mɔ̍ɔ̍wa̍a̍ ndāa̍ kɔ̄la̍ŋ chīŋa̍la᷅ŋndo̍ ni̍.”

²³O̍ ko̍ŋ kɔ̍ɔ̍lī, mbo̍ dīmī a̍ yu̍ŋgu̍ Nāfi̍ta̍lī wo̍ o̍kɔ̄ɔ̄ āā, “Yu̍ŋgu̍ Nāfi̍ta̍lī wo̍ ndu̍, yu̍ŋgu̍ Mɛ̄lɛ̄ka̍ Ya̍a̍wɛ̄ɛ̄ o̍ che᷅ nyīnā ndu̍yɛ̍ mbo̍ dūāū sa̍lā ta̍u̍ ta̍u̍ wo̍ o̍ cho̍ ni̍. Ā chō lɛ̄ŋnde̍ cho̍ bā tōūwo̍ mi̍ lē fūūlūū o̍ pēe̍ mɛ̄ŋmā ībūŋga᷄ŋ nde̍ŋ chūā mī lē wa̍ le̍ nda̍.”

²⁴O̍ ko̍ŋ kɔ̍ɔ̍lī, mbo̍ dūāū yu̍ŋgu̍ A̍sīɛ̄ɛ̄ wo̍ sa̍lā, mbo̍ dīmī āā, “Mbɔ̄ māā Mɛ̄lɛ̄ka̍ dɔ̄u̍ yu̍ŋgu̍ A̍sīɛ̄ɛ̄ wo̍ sa̍lā mbō hīōū yu̍ŋgu̍la̍ŋ lā pīlɛ̍ la̍ŋ kpo̍u̍. Mbɔ̄ māā Mɛ̄lɛ̄ka̍ ō chɔ̍ yu̍ŋgo̍o̍ ho̍ō nyīnā mbō hīōū yu̍ŋgu̍la̍ŋ lā pīlɛ̍ la̍ŋ kpo̍u̍. Ndu̍yɛ̍ mbɔ̄ māā yɔ̄mīī ndɛ̄i̍ ɔ̄li̍fīi̍ye̍ ī wa̍ ko̍mɔ̄ɔ̍ lɔ̍pī lɔ̍pī mā nɔ̄ chūɛ̄īmā ɔ̄li̍fīi̍ya̍ŋ ta̍u̍ ta̍u̍ fɔ̍.

²⁵Wāŋnda̍ A̍sā, mbɔ̄ māā dīōla̍ŋ o̍ sāāsāla̍ chi̍e̍e̍ŋ nyāa̍ŋ lā wa̍ la̍ ki̍i̍ndīāā a̍ chīli̍ŋndo̍ŋ, ndu̍yɛ̍ a̍ chīli̍ŋu̍ŋ būlɔ̍ŋsīi̍yo̍ŋ fɔ̍. Ndu̍yɛ̍ mbō māā yu̍ŋgu̍ nyāa̍ ō wa̍ yu̍ŋgu̍ kpāāyā ha̍a̍a̍ a̍ mɛ̄ɛ̄lu̍la̍ ndāla̍ŋ fɔ̍.”

²⁶“Wāŋnda̍ I̍sɔ̄lūɛ̄ī, mɛ̄lɛ̄ka̍ o̍ mɛ̄lɛ̄ka̍ cho̍ māā Mɛ̄lɛ̄ka̍ nyāa̍ le̍. Mɛ̄lɛ̄ka̍ chō hūnɔ̄ɔ̍ o̍ yu̍mbu̍ yu̍mbo̍o̍ ni̍ŋ cho̍o̍ cho̍o̍, ō chō hūnɔ̄ɔ̍ o̍ ha̍la̍ hūmbōo̍ chōo̍ le̍ nya̍ mālāa̍. Ō chō hūnɔ̄ɔ̍ o̍ ha̍la̍a̍ ni̍ŋ a̍ kpāāyā bɛ̍ndōo̍.

²⁷Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, ndu̍ cho̍ nāa̍ nya̍ vīāŋnūŋ le̍ yōōmūlā nyāla̍ŋ chīīndīa̍a̍ wo̍ ni̍, ndu̍ cho̍ nya̍ māndāa̍ mɛ̄ɛ̍ kāla̍ chūa̍a̍ ō bīī nu̍a̍ā chūā ndɔ̄ɔ̍ o̍ bāla̍ŋ chōo̍ mbō wa̍ ndu̍ dɛ̄ɛ̄nīa̍a̍ yɛ̍ ni̍. Ya̍a̍mɔ̍ɔ̍wa̍a̍ nyāa̍ wa̍ nya̍ lāchī wa̍ mbo̍ tūāū nda̍ nya̍ lāchī, mbo̍ dīmūl nya̍ āā, ‘Lā tɛ̄ɛ̄mbu̍u̍ nda̍.’

²⁸Nyɛ̄ ko̍ŋ to̍sa̍ ni̍ mi̍ I̍sɔ̄lūɛ̄ī o̍ wa̍nu᷄ŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍ nyɛ̄ o̍ nyɛ̄ ō yɔ̍nūŋ a̍ ndu̍ le̍. Nyɛ̄ ko̍ŋ to̍sa̍ ni̍ mi̍ yu̍ŋgu̍ Che̍kɔ̍pū wo̍ ō wānu᷄ŋ o̍ lɛ̄ŋnde̍ nɔ̍ le᷅ŋ nyɛ̄ dīa̍a̍ a̍ mūɛ̄īya̍ŋ nde̍ŋ ni᷄ŋ, ndu̍yɛ̍ ma̍ wānu᷄ŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ ō yɔ̍nūŋ a̍ nda̍ le̍. Le̍ te̍le̍ŋ o̍ te̍le̍ŋ mɔ᷄mndo̍ chō chɔ̄nɔ᷄ŋndo̍ o̍ ha̍la̍a̍ ni᷄ŋ mbō pɔ̄ɔ̄līāā lɛ̍ŋndē ndāle̍ŋ.

²⁹Wāŋnda̍ I̍sɔ̄lūɛ̄ī, lā pɛ̄l tɔ̄nɔ̄ɔ̍. Lēkāa̍ o̍ lēkāa̍ le̍ cho̍ māā nya̍ le̍, nya̍ wānāā Mɛ̄lɛ̄ka̍ pīla̍ o̍ chi̍i̍ndi̍a̍a̍ ha̍ā wa̍. Mɛ̄lɛ̄ka̍ Ya̍a̍wɛ̄ɛ̄ pi̍la̍ ndu̍ ma̍ndā nya̍ ni̍, mɛ̄ɛ̍ nyɛ̄ kālā ka̍lā cho̍ māā bōo̍ bɛ̍ndū wo̍ ō māndā nu̍a̍ā pūa̍a̍ chɔ̄ūwa̍ yɛ̍. Ndu̍ cho̍ wāna̍ ma̍lā nya̍ wo̍ ni̍. Ndu̍ cho̍ mūɛ̄ī nyɛ̄i̍ chɔ̄ū ve̍ le̍ ya̍a̍mɔ̍ɔ̍wa̍a̍ nyāa̍ yōmɔ̄ɔ̍ ni̍. Ya̍a̍mɔ̍ɔ̍wa̍a̍ nyāa̍ ā hūŋ ni̍ŋ a̍ nyīīyāa̍ mā hu᷄ŋ tu̍ndu᷄ŋ nya̍ o̍ lābɛ̄ŋgu̍ ni̍ŋ le̍ mī lā tūīīnu̍ŋ nda̍ īnyīɛ̍ɛ̍. Lā yām ni̍ŋ nda̍ ndu̍yɛ̍ mī lā nīɔ̄ū ni̍ɔ̍u̍ nda̍ fɔ᷅ fɔ̄.”