Read Southern Kisi Dītɔ̍nɔ̍mi̍ī 34 Bible Online

Dītɔ̍nɔ̍mi̍ī 34 - Southern Kisi bible

Dītɔ̍nɔ̍mi̍ī 34

¹O̍ ko̍ŋ kɔ̍ɔ̍lī, mi̍ Mūu̍sē cha̍ŋ nāa̍ nda̍ wa̍ o̍ lɛ̄ŋndē dɛ̍ŋgbɛ̍le̍ŋ Mo̍wa̍bī wa̍ mbo̍ hēl o̍ Pēmbīī Ni̍bɔ̄ve̍ chōo̍, mbo̍ fūūlūū o̍ Pēmbīī Pi̍si̍kā ve̍ bōlle̍ŋ di̍, pēmbīi̍ cho̍ Chɛ̄lu̍i̍kō bā pāa̍le̍ŋ lē cha᷄ŋndo̍ ve̍. Ō lo̍ o̍ pēmbīī kēŋ chōo̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m ndu̍ lɛ̄ŋndē I̍sɔ̄lūɛ̍i̍ya̍ ā wa̍ kɔ̄la̍ŋ bīyɔ̄ɔ̍ le̍ŋ kpo̍u̍, chɔ̍ŋ o̍ būŋgɛ̄ī Ki̍li̍a̍a̍dī ve̍ mbo̍ fūūlūū Da᷅ŋ chi̍e̍e̍ di̍.

²Lɛ̄ŋndē le̍ŋ le̍ wa̍ le᷅ŋ ki̍nɛ̍i̍ ni̍. Būŋgɛ̄ī Nāfi̍ta̍lī ve̍ ki̍nɛ̍i̍, a̍ būŋgɛ̄ī E̍fi̍lūēm nde̍ ndu̍yɛ̍ a̍ būŋgɛ̄ī Mānāa̍sē ve̍, a̍ būŋgɛ̄ī Chu̍dā ve̍ mbo̍ kūā le̍nde̍ a̍ bā pāa̍le̍ŋ lē dēl lo̍, mbo̍ fūūlu̍u̍ o̍ pēe̍ mɛ̄ŋmā īhɛ᷄llo̍ Mɛ̄dītālu̍e̍e̍nīāā.

³Mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m ndu̍ vɛ̄lɛ̄ lɛ̄ŋndē lēŋ kūmbū bā tōūwo̍ ki̍nɛ̍i̍, chɔ̍ŋ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Chɛ̄lu̍i̍kō i̍kɛ̍i̍, chi̍e̍e̍ nɔ̍ vɛ̄lɛ̄ dīōla̍ŋ āā chi̍e̍e̍ māwāūwo̍ wo̍, mbo̍ tūūsū le̍nde̍ a̍ So̍wā chi̍e̍e̍.

⁴O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā, “Lɛ̄ŋnde̍ŋ nde᷅ŋ ya̍ I̍ chu̍e̍l E̍bīlāha᷅m, a̍ Āa̍se̍, a̍ Che̍kɔ̍pū būŋgɛ̄i̍ ī kālā ka̍lā ni̍ mi̍ di̍mūl nda̍ māā I̍ cho̍ le̍ŋ chūāā ndāā ma̍māa̍ kē. I̍ chɔ̍m nu̍m nde̍ŋ ma̍ chā le̍ŋ a̍ hɔ̄ltē nūmnde̍ŋ pɛ̍ɛ̍ŋ kɛ̍ a̍ cho̍ ta̍ŋɔ̄ɔ̄ mā lūɛ̄ī lēni᷄ŋ te̍.”

⁵O̍ ko̍ŋ, mi̍ Mūu̍sē bu̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ō wū o̍ lɛ̄ŋndē Mo̍wa̍bīle̍ŋ ni᷄ŋ ndo̍ŋ, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ di̍mi̍ māā ī chō yɔ̄nɔ᷄ŋ yɛ̍.

⁶Mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅ ndu̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Mo̍wa̍bī lo̍ŋ, Bɛ̄tīpi̍ɔ̍ɔ̄ chi̍e̍e̍ i̍kɛ̍i̍. Kɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍ wānā si̍nā fo̍ndāŋ kpe̍e̍kpe̍i̍ sɛ̄i̍ Mūu̍sē wo̍ ō chō wo̍ le̍.

⁷Mūu̍sē wa̍ wɔ̄sīla̍ŋ kɛ̄mɛ̄ a̍ bi̍di̍i̍ŋ (120) mbo̍ wū. Ndu̍yɛ̍ ō vī le̍nde̍ ō wa̍ chɔ̄ɔ̍ nyɛ̄ kɛ̄ndɛ̄ wa̍la̍ŋ, ndu̍yɛ̍ kpāāya̍ ndɔ̄ɔ̍ bɛ̍ɛ̍ ō fēŋa̍ŋ le̍cho̍ō le̍.

⁸O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ cha᷅ŋ Mūu̍sē o̍ lɛ̄ŋndē dɛ̍ŋgbɛ̍le̍ŋ Mo̍wa̍bī le̍ pālɛ̍i̍ be̍le̍-ya̍a̍. Mɛ̄ɛ̍ na̍a̍mu̍ ndāa̍ ō dīmi̍ yɛ̍.

⁹Ndu̍yɛ̍ lɔ̍ɔ̍ pa̍ mi̍ Mūu̍sē o̍ wu᷅, mbo̍ hāndū Chɔ̄ɔ̍sūāā bāa̍ o̍ lēbōl, le̍ mbō hɛ̄li̍ ndu̍ le̍ mbō mīīŋgu̍ o̍ fōōfo̍ ndɔ̄ɔ̍. Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ Chɔ̄ɔ̍sūāā kɔ̄l kālo̍o̍ ta̍u̍ ta̍u̍. Mi̍ wāŋnda̍ I̍sɔ̄lūɛ̄ī a̍ tu̍ɛ̍ī Chɔ̄ɔ̍sūāā dīōm, ndu̍yɛ̍ ma̍ tōsā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ le̍ tōsāa̍ sa̍na̍a̍ a̍ Mūu̍sē.

¹⁰Ndu̍yɛ̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ki̍nɛ̍i̍, wāna̍ su̍a̍ā le̍ Mɛ̄lɛ̄ka̍ wo̍ ō pīlɛ̍ bɛ̍ɛ̍ sɔ̍la̍ŋ ndɔ̍ māā Mūu̍sē le̍. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍ūki̍āŋ a̍ Mūu̍sē kpe̍nde̍ke̍le̍.

¹¹Mi̍ Mɛ̄lɛ̄ka̍ vīām ndu̍ mbo̍ kɔ̍ to̍sā sɔ̄ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ a̍ sɔ̄ɔ̍ŋ lākpālūŋ bɛ̄ndo̍ŋ o̍ lɛ̄ŋndē I̍chi̍pīle̍ŋ ni᷄ŋ le̍ mbō tūsi̍ Māsāa̍ I̍chi̍pī a̍ lāŋgba̍ā ndūāā ka᷅lla̍, ndu̍yɛ̍ a̍ lɛ̄ŋnde̍ŋ kpo̍u̍ nyɛ᷅ pālāa̍ chōo̍. O̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ki̍nɛ̍i̍, wānā o̍ wāna̍ su̍a̍ā le̍ Mɛ̄lɛ̄ka̍, ō pīlɛ̍ bɛ̍ɛ̍ ō tōsa̍ wɔ̍ sɔ̍ɔ̍ŋ kɔ̄ndɔ̄fi̍li̍ŋ wāā le̍nde̍ le̍.

¹²Wāna̍ su̍a̍ā le̍ Mɛ̄lɛ̄ka̍ wo̍, ō pīlɛ̍ bɛ̍ɛ̍ ō tōsa̍ wɔ̍ sɔ̍ɔ̍ŋ ŋ̄sīōōŋ bɛ̄ndūŋ Mūu̍sē o̍ to̍sa̍ I̍sɔ̄lūɛ̍i̍ya̍ o̍ hɔ̄l kpo̍u̍ ma̍ chā wo̍ŋ le̍.