Read Southern Kisi Dītɔ̍nɔ̍mi̍ī 4 Bible Online

Dītɔ̍nɔ̍mi̍ī 4 - Southern Kisi bible

Dītɔ̍nɔ̍mi̍ī 4

¹O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl wāŋnda̍ I̍sɔ̄lūɛ̄ī āā, “Wāŋnda̍ I̍sɔ̄lūɛ̄ī, lā ya᷄ŋ ni᷅la̍ŋ mī lā tūēī sāwāla̍ ya̍ I̍ cho̍ nya̍ pɛ̄ɛ̄kū la̍ŋ, ndu̍yɛ̍ a̍ nyɛ̄ o̍ nyɛ̄ ya̍ I̍ cho̍ nya̍ dīmūl le̍ tōsāa̍. Ko̍ŋ to̍sā ni̍ mī lā wa̍ yōōmū, ndu̍yɛ̍ mī lā nɔ̄la̍ mī lā kɔ̍ bi̍ī lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā nyāā ma̍māa̍ nda̍ a̍a̍ pi̍ɛ̍īyo̍, ō chō nya̍ kīo̍o̍ nyɛ̄ nyā le̍ŋ.

²Nyɛ̄ o̍ nyɛ̄ ya̍ I̍ cho̍ nya̍ dīmūl le̍ tōsāa̍, lā ha̍ndū nyɛ̄ o̍ nyɛ̄ lēchōo̍ le̍, ndu̍yɛ̍ lā fa̍ŋā nyɛ̄ o̍ nyɛ̄ lēchōo̍ mī lā kɛ̄ɛ̍ ndu̍ tōsā le̍. Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dīmu̍l la̍ mi̍ di̍mūl nya̍ ndu̍ le̍ tōsāa̍, lā tōsa̍ ndu̍ kpo̍u̍.

³Nya̍ pi̍la̍ lā chē a̍ hɔ̄ltē nyāle̍ŋ pɛ̍ɛ̍ŋ, nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ o̍ Pēmbīī Pi̍ɔ̍ɔ̄ve̍ wo̍. Wānāa̍ wa̍ mɛ̄lɛ̄ka̍ Ba̍a̍l sōōlūūwo̍ nya̍ tɛ̄ɛ̄ŋ nda̍ ki̍nɛ̍i̍, mbo̍ dīū nda̍ o̍ pēmbīī kēŋ kpo̍u̍.

⁴Kɛ̍ nya̍ hi̍o̍ū lāchī a̍ tīīnda᷄ŋ nyāa̍ dɔ̄wɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni᷄ŋ nda̍ ki̍nɛ̍i̍, lā chō wɔ̄ hāū yo̍o̍mū.

⁵I̍ chi̍i̍ nya̍ sāwāla̍ŋ pɛ̄ɛ̄kū, ndu̍yɛ̍ a̍ nyɛ̄ o̍ nyɛ̄ nya̍ nɔ̄ le̍ tōsāa̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍ ō dīmu̍l la̍ yɛ̍. Nyɛ̄ o̍ nyɛ̄ sāwāla̍ la̍ŋ lā dīmi̍ le̍ tōsāa̍, lā wa̍ ndu̍ tōsāa̍ o̍ lɛ̄ŋndē nya̍ chō hūnɔ̄ɔ̍ kɔ̄la̍ŋ ni᷄ŋ nde̍ŋ ni᷄ŋ.

⁶“Lā tūsi̍ŋ o̍ sāwāla̍ŋ nda᷅ŋ bɛ̄ŋgu̍, ndu̍yɛ̍ mī lā wa̍ sa̍kpō o̍ nyɛ̄ la̍ di̍mi̍ wo̍ tōsāa̍ ni᷄ŋ. O̍ nɛ̄īyo̍ ho̍ō ni᷄ŋ, wāŋnda̍ o̍ lɛ̄ŋīī chēle̍ŋnde̍ ni᷄ŋ ā chō nya̍ chɔ̄ māā lā chō wānāā kɔ̄l kālu̍a̍a̍ bɛ̍ndū, ndu̍yɛ̍ mi̍ lā wā wānāā tāāsi̍. Tē ā tūēī a̍ sāwāla̍ nya̍ chō la̍ŋ bɛ̍ŋgu̍ la̍ŋ o̍kɔ̄ɔ̄ pɛ̍ kpo̍u̍, ā chō dīmī āā, ‘Wānāa̍ fu̍la̍ ha̍ā o̍ kāa̍le̍ kpāāyāle̍ bɛ̄ŋnde̍ŋ chōo̍ wa̍, ā chō wānāā kɔ̄l kālu̍a̍a̍ bɛ̍ndū, ndu̍yɛ̍ ma̍ wā wānāā tāāsi̍.’

⁷“Lēlɛ̄ŋ o̍ lēlɛ̄ŋ lē cho̍ o̍ chi̍e̍ēŋndo̍ chōo̍, mī lē nɔ̄ mɛ̄lɛ̄ka̍ o̍ wa᷅ nda̍ īkɛ̄i̍ kpɛ̍ɛ̍lūŋ māā na̍a̍ wo̍ le̍, mɛ̄ɛ̍ o̍ mɛ̄ɛ̍ lɛ̄ŋndē lēŋ lē wa̍ lɛ᷅ŋndē bɛ̄ndū. Kɛ̍ na̍a̍ na̍a̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, ō chō na̍a̍ māchɛ̄lū kpɛ̍ɛ̍lūŋ. Tē ŋ̄ nyūna̍ ndu̍ dīōm le̍ īsɔ̄ɔ̍ o̍ īsɔ̄ɔ̍ o̍ pīɛ̄īle̍ŋ ni᷄ŋ pɛ̍, mūlīo̍o̍ o̍ mu̍lī na̍a̍ dīōm ni̍, mbō māla̍ na̍a̍.

⁸Lēlɛ̄ŋ o̍ lēlɛ̄ŋ lē cho̍ mī lē nɔ̄ sāwāla̍ŋ, ndu̍yɛ̍ a̍ pɛ̄ɛ̄kūla̍ŋ a̍ nyɛ̄ nda̍ nɔ̄ le̍ tōsāa̍ wo̍ o̍kɔ̄ɔ̄, la̍ cho̍ o̍ nɛ̄ī sa̍kpō la̍ŋ, māā lā ya̍ I̍ chō nya̍ pāa̍le̍ hāūle̍ŋ nde᷅ŋ pɛ̄ɛ̄kōo̍ la̍ŋ te̍, mɛ̄ɛ̍ o̍ mɛ̄ɛ̍ lɛ̄ŋndē lēŋ lē wa̍ lɛ᷅ŋndē kpāāyā bɛ̍ndū.

⁹Kɛ̍ ndu̍yɛ̍ lā mānda̍ŋ. Lā wa̍ nyɛ᷅ kɛ̄ndɛ̄ ye̍ke̍ŋ, yɔ̄ŋi̍ nya̍ pūɛ̄ɛ̄nu̍ŋ nyɛ᷅ nya̍ chē a̍ hɔ̄ltā nyāla̍ŋ pɛ̍ɛ̍ŋ mbo̍ yɔ̄nu᷄ŋ ndo̍. Nyɛ̄ o̍ nyɛ̄ nya̍ chē mbo̍ yɔ̄nu᷄ŋ, lā pu̍ɛ̍ɛ̍nu᷄ŋ ndu̍ le̍, ha̍a̍a̍ a̍ yōōmūlā nyāla̍ŋ mɛ̄ɛ̄lu̍la̍ŋ. Lā dīmu̍l chu̍a̍a̍ nyāa̍, ndu̍yɛ̍ a̍ chūāā nyāā ma̍māa̍,

¹⁰a̍ pāa̍le̍ nya̍ si᷄m Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lāchī o̍ Pēmbīī Sa̍a̍nāīve̍ le̍ŋ o̍kɔ̄ɔ̄. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl la̍ āā, ‘Chu̍u̍ŋgi̍a̍a̍ wa᷅ŋnda̍ I̍sɔ̄lūɛ̄ī kpo̍u̍ na̍a̍ pi᷅lɛ̍ mā hu᷄ŋ si᷅m ya̍ o̍ hɔ̄l. I̍ ye̍e̍ma̍ mī so̍ō nāa̍ nda̍ chūā, le̍ mā pɛ̄ɛ̄ku̍ mɛ̄ɛ̍ nda̍ kē ya̍ Mɛ̄lɛ̄ka̍ bɛ̄ɛ̄le̍ŋ ndu̍yɛ̍ mā tūēī ya̍ dīōm yɛ̍, ha̍a̍a̍ a̍ mɛ̄ɛ̄lu̍la̍ yōōmūlā ndāla̍ŋ. I̍ ye̍e̍ma̍ nda̍ vɛ̄lɛ̄ mā pɛ̄ɛ̄ku̍ chūāā ndāa̍ mɛ̄ɛ̍ nda̍ kē ya̍ bɛ̄ɛ̄le̍ŋ ndu̍yɛ̍ mā tūēī ya̍ dīōm yɛ̍.’

¹¹“Mi̍ lā hūŋ Mɛ̄lɛ̄ka̍ lāchī, mi̍ lā hu᷄ŋ si᷅m o̍ pēmbēi̍. O̍ ko̍ŋ kɔ̍ɔ̍lī, mi̍ yīŋndē bɛ̄ŋnde̍ŋ lē kīnda᷅ŋ o̍ pēmbēi̍ he̍ī chōo̍ tu̍a̍ŋ, chɔ̍ŋ o̍ pēmbēi̍ chōo̍, mi̍ lē fūūlūū o̍ ha̍la̍ di̍. Mi̍ kūmi̍i̍ ti̍ŋīī bɛ̄ndūe̍i̍ ī kūmbū pēmbēi̍ kpo̍u̍. Mi̍ pēmbēi̍ ī pīīmīāā kpi̍lo̍ a̍ ku᷄mnde̍.

¹²O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ nya̍ chūā o̍ yīŋndē lēŋ ni᷄ŋ. Mi̍ lā tūɛ̄ī dīōm ndɔ̄ɔ̍ sūɛ̍i̍, kɛ̍ lā chi᷅ wa̍nā o̍ wānā le̍. Dīōmndo̍ ko̍ni̍ nya̍ wa̍ tūēīyɔ̄ɔ̍ ni̍ mbo̍ wā sūɛ̍i̍.

¹³Mbo̍ sūāā nāa̍ nya̍ chūā, a̍ kpe̍ma̍a̍ nya̍ tɛ̄ɛ̄ŋ nya̍ nda̍ā o̍kɔ̄ɔ̄, ndu̍ yɔ̍nūŋ māā sāwāla̍ ndɔ̄la̍ tɔ̍ la̍ŋ ni̍. Mbo̍ dīmūl nya̍ le̍ mī lā wa̍ nyɛ̄ sāwāla̍ŋ nda᷅ŋ lā dīmi̍ wo̍ tōsāa̍, ndu̍yɛ̍ mbo̍ pōōnyīāā la̍ŋ o̍ pōūtā yɛ̍ndɛ̍la̍ŋ ti̍ɔ̍ɔ̍ŋnda̍ŋ chōo̍.

¹⁴Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ a̍ te̍le̍ŋ ko̍ŋ le̍ mī pɛ̍ɛ̍ku̍ nya̍ sāwāla̍ ndɔ̄la̍ŋ, ndu̍yɛ̍ a̍ nyɛ̄ o̍ di̍mu̍l nya̍ māā lā nɔ̄ le̍ tōsāa̍, le̍ mī lā wa̍ nyɛ̄ la̍ dīmi̍ wo̍, a̍ nyɛ̄ o̍ di̍mu̍l nya̍ le̍ tōsāa̍ wo̍ tōsāa̍ o̍ lɛ̄ŋndē nya̍ chō kɔ̄la̍ŋ bīyɔ̄ɔ̍ Chɔ̍ɔ̍dāŋ le̍e̍lōo̍ māā nyɛ̄ nyā le̍ŋ ni᷄ŋ.”

¹⁵Mi̍ Mūu̍sē o̍ di̍mūl I̍sɔ̄lūɛ̍i̍ya̍ āā, “Nya̍ pi̍la̍ lā chē nyɛ̍ yɔ̍nu̍ŋ o̍ Pēmbīī Sa̍a̍nāīve̍ wo̍. Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ wa̍ sūɛ̍i̍ nāa̍ nya̍ chūā, dīōm ndɔ̄ɔ̍ ko̍ni̍ nya̍ wa̍ tūēīyɔ̄ɔ̍ sūɛ̍i̍ o̍ yīŋnde̍ŋ ni᷄ŋ ni̍. Kɛ̍ lā chi᷄ wa᷅na̍ wa̍ sūɛ̍i̍ yo̍ le̍. Le̍la̍ŋ lā mānda̍ŋ ma̍nda᷄ŋndo̍ pīla̍.

¹⁶Lā mānda̍ŋ yɔ̄ŋi̍ nya̍ tōsa̍ yɔ᷅ŋ wɔ̄ɔ̍ŋndo̍ a̍ Mɛ̄lɛ̄ka̍. Ko̍ŋ cho̍ ni̍, lā to̍o̍sīāā vēla᷅ŋ nyɛ̄ o̍ nyɛ̄ le̍ ndu̍ sōōlūūwo̍ māā mɛ̄lɛ̄ka̍ nyā le̍, nyɛ᷄ ve̍la᷅ŋ a̍ wānā pɔ̍nɔ̍ kɛ̄lɛ̄ŋgāā wānā la̍nɔ̍ ni̍,

¹⁷nyɛ̍ ve̍la᷅ŋ a̍ vīsī ni̍, nyɛ̍ ve̍la᷅ŋ a̍ yōū ni̍,

¹⁸nyɛ̍ ve̍la᷅ŋ a̍ nyɛ̄ yōōmāa̍ ku̍ā o̍ dēmbē cho̍o̍ ni̍, a̍ nyɛ̄ o̍ nyɛ̄ ve̍la᷅ŋ māā sūū.

¹⁹O̍ ko̍ŋ kɔ̍ɔ̍lī, tē lā tōfa̍ o̍ ha̍la̍a̍ ni᷄ŋ cho̍o̍ cho̍o̍ pɛ̍, mī lā chē pāa̍le̍ŋ, a̍ pāŋge̍i̍, a̍ lōo̍ŋ, kɔ̄l de᷅l nya̍, le̍ tūndɔ᷄ŋndo̍ le̍ nyɔ̄ɔ̍ mu᷅ŋ sōōlūūwo̍ ndu̍yɛ̍ mī lā sāāŋgi̍a̍l mu̍ŋ māā mɛ̄lɛ̄ka̍a̍ nyā le̍. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, ō tōōsi̍a̍a̍ nyɔ̄ɔ̍ŋ mu᷅ŋ o̍ ha̍la̍a̍ ni᷄ŋ cho̍o̍ cho̍o̍, le̍ wānā o̍ wāna̍ cho̍ o̍ chi̍e̍ēŋndo̍ chōo̍.

²⁰Lā wa̍ I̍chi̍pī o̍ sāŋgā bɛ̄ndōo̍ ni᷄ŋ, kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ so̍lī nya̍ lo̍ŋ mɛ̄ɛ̍ nda̍ sōlī nu̍a̍ā chīli̍ŋnde̍ o̍ yīŋndē bɛ̄ŋnde̍ŋ ni᷄ŋ yɛ̍, mbo̍ hūŋ a̍ nya̍, le̍ mbō hu᷄ŋ si̍i̍ŋgūū nya̍ wānāā ndɔ̄, mɛ̄ɛ̍ nya̍ chō nu̍a̍ā hāū yɛ̍.

²¹Le̍ sa̍bū nyāa̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ ya̍ mbo̍ tīāŋnu᷄ŋ māā ō chɛ᷅l la̍ mī ta̍ŋ Chɔ̍ɔ̍dāŋ nda̍ŋ mī lu̍ɛ̍ī o̍ lɛ̄ŋndē kɛ̄ndɛ̄ kɛ̍ndɛ̄lē ndu̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō nya̍ kīo̍o̍ māā nyɛ̄ nyā le̍ŋ ni᷄ŋ te̍.

²²Ya̍ ya̍ I̍ si̍nā ni᷅ŋ māā o̍ lɛ̄ŋnde̍ŋ nde᷅ŋ ni᷄ŋ Chɔ̍ɔ̍dāŋ le̍e̍lōo̍ na̍nu᷄ŋ ya̍ I̍ cho̍ wu᷄ ni̍. I̍ cho̍ Chɔ̍ɔ̍dāŋ nda̍ŋ tāŋɔ̄ɔ̄ le̍. Kɛ̍ nya̍ nya̍ lā chō hūnɔ̄ɔ̍ tāŋɔ̄ɔ̍ le̍ kɔ̄la̍ŋ lɛ̄ŋndē kɛ̄ndɛ̄lē lēŋ chūa̍a̍ māā nyɛ̄ nyā.

²³Kɛ̍ ndu̍yɛ̍ lā mānda̍ŋ. Lā pu̍ɛ̍ɛ̍nu᷄ŋ kpe̍ma̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō yīi̍ a̍ nya̍ wo̍ le̍. Lā chūa̍ si̍lā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō sīla̍ nya̍ wo̍. Ko̍ŋ cho̍ ni̍ lā to̍o̍sīāā vēla᷅ŋ nyɛ̄ o̍ nyɛ̄ mī lā sōōlu̍u̍ ndu̍ māā mɛ̄lɛ̄ka̍ nyā le̍.

²⁴Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ nyāa̍, Mɛ̄lɛ̄ka̍ pāŋa̍lɛ̍i̍yo̍ o̍ cho̍ ni̍, ō chɛ᷅l mī lā sōōlu̍u̍ mɛ̄lɛ̄ka̍ o̍ mɛ̄lɛ̄ka̍ chēle̍ŋ o̍ ndu̍ kɔ̍ɔ̍lī le̍. Tē ō dɔ̄ɔ̄nu᷄ŋ tu̍mbe̍ pɛ̍, mɛ̄ɛ̍ yīŋnde̍ŋ lē tɛ̄ɛ̄mbūū nu̍a̍ā nyɔ̄ɔ̍ŋ yɛ̍, le̍nde̍ o̍ wa᷅ ni̍.

²⁵“Ā yɔ᷄ŋ bɛ̍ɛ̍ mī lā kɔ̍ vi̍o̍ū ni᷅ŋ te̍i̍ o̍ lɛ̄ŋnde̍ŋ nde᷅ŋ ni᷄ŋ, mī lā vēlū ŋ̄chūāū lo̍ŋ, mī chūāūwāā kāŋ bɛ̍ɛ̍ nda̍ vēlū ŋ̄chūāū, lā to̍sā yɔ̄ŋ wɔ̄ɔ̍ŋ wāā le̍nde̍ a̍ Mɛ̄lɛ̄ka̍ le̍. Ko̍ŋ cho̍ ni̍, lā to̍o̍sīāā vēla᷅ŋ nyɛ̄ o̍ nyɛ̄ le̍ ndu̍ sōōlūūwo̍ māā mɛ̄lɛ̄ka̍ nyā le̍. Sūɛ̍i̍ bɛ̍nda̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l te̍ ve̍ i̍ cho̍ ni̍. Ndu̍yɛ̍ tē lā tōsa̍ ke̍ŋ pɛ̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō tu̍mbe̍ dɔ̍u̍nɔ᷄ŋ a̍ nya̍. Nyɛ̄ ya̍ I̍ nɔ̍ le̍ nya̍ dīmūllo̍ pāa̍le̍ hāūle̍ŋ nde᷅ŋ ndo̍, ndu̍ cho̍ ko̍ŋ ni̍.

²⁶Ndu̍yɛ̍ I̍ ve̍e̍lu̍ ha̍la̍a̍ a̍ lɛ̄ŋnde̍ŋ mā wa̍ māā se̍īya̍ pāa̍le̍ hāūle᷅ŋ nde᷅ŋ, le̍ mā tɛ̄nda̍ se̍īle̍ŋ a̍ nya̍ o̍kɔ̄ɔ̄. Sɔ̄ɔ̍ŋ ya̍ I̍ ke̍i̍ mu᷅ŋ sōndōo̍ chōo̍ wo̍ŋ ki̍nɛ̍i̍, tē lā fūla̍ dīōm nūu̍ kɔ̄ɔ̄lī pɛ̍ mi̍ lā tōsā i̍ bɛ̍ndā le̍ ve̍ pɛ̍, ī cho̍ ba̍ndu̍ a̍ te̍le̍ŋ te̍, mī lā wa̍ ā bāsāā tɛ̍ɛ̍, o̍ lɛ̄ŋnde̍ŋ nde᷅ŋ ni᷄ŋ, lɛ̄ŋndē nya̍ chō le᷅ŋ Chɔ̍ɔ̍dāŋ nda̍ŋ tāŋɔ̄ɔ̍ le̍ le̍ŋ kɔ̄la̍ŋ bīyɔ̄ɔ̍ le̍ŋ. Tē lā fūla̍ dīōm nūu̍ kɔ̄ɔ̄lī pɛ̍, lā cho̍ vi̍o̍u̍wɔ̄ɔ̄ o̍ lɛ̄ŋnde̍ŋ nde᷅ŋ ni᷄ŋ te̍. Nya̍ kpo̍u̍, lā chō wā ā tɛ̄ɛ̄mbāā.

²⁷Mɛ̄lɛ̄ka̍ Ya̍a̍wɛ̄ɛ̄ o̍ cho̍ tōsā mā sɛ̄ŋi̍ŋ a̍ nya̍ o̍ lɛ̄ŋīī chēle̍ŋnde̍ ni᷄ŋ o̍ bīyɔ̄ɔ̍ ni᷄ŋ. Ndu̍yɛ̍ nya̍ lo᷅ ni̍ŋ yo̍o̍mū o̍ lɛ̄ŋīī kēŋ ni᷄ŋ nda̍, lā ve᷅ ni̍ŋ a̍ bɔ̍ɔ̍ le̍.

²⁸O̍ lɛ̄ŋīī sūmīāl kēŋ ni᷄ŋ nya̍ chō lākɔ̄ wā nyɛ̄m wāŋndā chīe̍e̍ya̍ ā tōōsīāā a̍ lābā, a̍ yɔ̄mnde̍, ndu̍yɛ̍ a̍ pōūta̍ŋ ndo̍ŋ sāāŋgīāllo̍ ni̍ mī lā sōōlūū mu̍ŋ māā mɛ̄lɛ̄ka̍ā nyā, nyɛ᷄m cho̍ ŋ̄ chi᷅ le̍, ŋ̄ tu̍i̍ī le̍, ŋ̄ di᷅ nyɛ̍ dīāā le̍, ndu̍yɛ̍ ŋ̄ tu̍i̍ī nyɛ᷅ chūŋ te̍ wo̍ŋ.

²⁹Tē dɛ̍nɛ̍ pa̍lāā bɛ̄ndōo̍ ō kōma̍l nya̍ lo̍ŋ pɛ̍, mī sɔ̄ɔ̍ŋ pa̍la᷄ŋ mu᷅ŋ kpo̍u̍ ŋ̍ ko̍ma̍l nya̍, o̍ mɛ̄ɛ̄lu̍la̍ŋ kpɔ̍ŋ, lā chō kɛ̄ɛ̄sīāā, le̍ kɔ̄ltā nyāla̍ŋ mīŋgīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍, ndu̍yɛ̍ mī lā tūsi̍ŋ o̍ dīōm ndɔ̄ɔ̍ bɛ̄ŋgu̍. A̍ te̍le̍ŋ ko̍ŋ, tē lā nūūwa̍ ndu̍ pɛ̍, mī lā tōl nɛ̄i̍ ndɔ̄ɔ̍ kɔ̄ɔ̄lī a̍ kɔ̄ltā nyāla̍ŋ kpo̍u̍, sāālɔ᷄ŋndo̍ nya̍ sāālūŋ ndu̍ ni̍.

³⁰

³¹Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, wāna̍ īnyīɛ̍ɛ̍yo̍ o̍ cho̍ ni̍. Ō me᷅l nya̍ le̍, kɛ̄lɛ̄ŋgāāle̍, mbō tɛ̄ɛ̄mbu̍u̍ nya̍. Kpe̍ma̍ o̍ yi̍i̍ a̍ fi̍nyāā nyāā ma̍māa̍, ndu̍yɛ̍ mbo̍ tīāŋnu᷄ŋ ndo̍, ō pu̍ɛ̍ɛ̍nūŋ a̍ kpe̍ma̍ ko̍ŋ te̍.

³²“Lā yāāsi̍a̍a̍ wɔ̍ sɔ̍ɔ̍ŋ pa̍a̍ndo᷄ŋ, chɔ̍ŋ a̍ te̍le̍ŋ Mɛ̄lɛ̄ka̍ tōōsīa̍a̍ wāna̍ chi̍o̍o̍ o̍ chi̍e̍ēŋndo̍ chōo̍ wo̍, mbo̍ bīī a̍ te̍le̍ŋndo̍ ho̍ō. Lā nyūūni̍a̍a̍ wɔ̍ o̍ chi̍e̍ēŋndo̍ ni᷄ŋ kpo̍u̍, tē sūɛ̍i̍ bɛ̍ndūīī wāā nu̍a̍ā ī yɔ̄nu̍ŋ ni᷅ŋ kāni̍ bɛ̍ɛ̍, ɔ̄ɔ̄ tē wānā tu̍e̍ī yɔ̄ bɛ̍ɛ̍ a̍ ī bɛ̄ndūīī wāā nu̍a̍ā o̍kɔ̄ɔ̄.

³³Kāni̍ bɛ̍ɛ̍, ɔ̍ɔ̄ wānāa̍ tu̍e̍ī ni᷅ŋ mi̍ mɛ̄lɛ̄ka̍ ndāa̍ ō sūāā nāa̍ nda̍ chūā o̍ yīŋnde̍ŋ ni᷄ŋ, wānāā kāŋ ā vi̍ le̍ ma̍ wā yōōmū mɛ̄ɛ̍ i̍ yɔ̍nu̍ŋ a̍ nya̍ yɛ̍ wa̍?

³⁴Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō wa̍ nya̍ sōlīo̍o̍ I̍chi̍pī ve̍, nya̍ pi̍la̍ lā chē, mɛ̄ɛ̍ o̍ to̍sa̍ a̍ kpāāya̍ ndɔ̄ bɛ̍ndōo̍, ndu̍yɛ̍ a̍ dīāllūŋ ndɔ̄ŋ ka̍la᷄ŋ, mbo̍ tōsā mi̍ wāŋnda̍ I̍chi̍pī a̍ sa̍ŋgā sāŋgā bɛ̄ndōo̍ pīla̍ yɛ̍. Mbo̍ tōsā sɔ̄ɔ̍ŋ kɔ̄ndɔ̄fi̍llo̍ŋ, ndu̍yɛ̍ a̍ sɔ̄ɔ̍ŋ ŋ̄sīōōŋ bɛ̄ndo᷄ŋ, ŋ̍ to̍sa̍ mi̍ sīōōŋīī bɛ̄ndūe̍i̍ ī bīī wāŋnda̍ I̍chi̍pī wo̍ŋ, ndu̍yɛ̍ mbo̍ sɔ̄ŋgā a̍ nda̍ le̍ nya̍. Nyɛ̄ o̍ nyɛ̄ o̍ to̍sa̍ le̍ nya̍ lo̍ŋ, mi̍ lā chā. Ɔ̍ɔ̄ mɛ̄lɛ̄ka̍ tɔ̍ɔ̍nda̍ŋ ni᷅ŋ mbo̍ kūā le̍ wānāā ndūa̍a̍ sōlī wāā nu̍a̍ā o̍ lɛ̄ŋndē chēle̍ŋ ni᷄ŋ māā Mɛ̄lɛ̄ka̍ nyāa̍ wo̍?

³⁵Mi̍ Mɛ̄lɛ̄ka̍ lō o̍ ko̍ŋ mbo̍ chɔ̄m sɔ̄ɔ̍ŋ mu᷅ŋ, le̍ mī lā sīna̍ māā ndu̍ Mɛ̍lɛ̄ka̍ Ya̍a̍wɛ̄ɛ̄, ndu̍ pīlɛ̍ kpe̍ cho̍ Mɛ̄lɛ̄ka̍ ni̍, māā mɛ̄lɛ̄ka̍ o̍ mɛ̄lɛ̄ka̍ cho̍ o̍ ndu̍ kɔ̍ɔ̍lī le̍.

³⁶Mɛ̄lɛ̄ka̍ lo̍ o̍ fo̍ndāŋ ndɔ̄ɔ̍ chōo̍ cho̍o̍ mbo̍ sūāā nāa̍ nya̍ chūā le̍ nya̍ sīlāa̍, ndu̍yɛ̍ mi̍ lā tūɛ̄ī dīōm ndɔ̄ɔ̍ sūɛ̍i̍ kpe̍nde̍ke̍le̍. Mbo̍ tōsā mi̍ lā chā yīŋndē ndɔ̄le̍ kpāāyāle̍ bɛ̄ŋnde̍ŋ o̍ chi̍e̍ēŋndo̍ chōo̍, ndu̍yɛ̍ mi̍ lā tūɛ̄ī dīōm ndɔ̄ɔ̍ sūɛ̍i̍ o̍ yīŋndē lēŋ ni᷄ŋ.

³⁷Le̍ kāālā o̍ ka̍a̍la̍ fi̍nyāā nyāā ma̍māa̍ wo̍, nya̍ fu̍la̍ o̍ pūlālē ndāle̍ŋ chōo̍ wa̍ mbo̍ hɛ̄lī nya̍ le̍ mī lā wa᷄ wānāā ndɔ̄. Ndu̍ pi̍la̍ kɛ̍sɛ̍ kɛ̍sɛ̍, mbo̍ sōlī nya̍ nāa̍ nya̍ wa̍ I̍chi̍pī wa̍ a̍ kpāāya̍ ndɔ̄ bɛ̍ndōo̍ mbo̍ hūŋ a̍ nya̍.

³⁸Kāa̍la̍ wa̍ īchāli̍ nya̍ lāchī o̍ lɛ̄ŋndē lēŋ ni᷄ŋ, mi̍ lā nɔ̄ kpāāyāa̍ mi̍ lā hīāū nya̍ la̍ŋ, mbo̍ tūāū kāa̍la̍ la̍ŋ nya̍ lāchī, le̍ mbō lo̍ o̍ ko̍ŋ mbō hīŋ a̍ nya̍ o̍ lɛ̄ŋndē ndāle̍ŋ ni᷄ŋ, mbō hu᷄ŋ ke᷅ nya̍ le̍ŋ māā nyɛ̄ nyā. Ndu̍yɛ̍ lɛ̄ŋndē le̍ŋ lē chō hāū le̍ nya̍.

³⁹Le̍la̍ŋ lā lōōnu̍ŋ pāa̍le̍ hāūle̍ŋ nde᷅ŋ māā Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ cho̍ Mɛ̄lɛ̄ka̍ ni̍, o̍ fo̍ndā ndɔ̄ɔ̍ chōo̍ cho̍o̍ ni̍, o̍ chi̍e̍ēŋndo̍ chōo̍ ni̍, māā mɛ̄lɛ̄ka̍ o̍ mɛ̄lɛ̄ka̍ chēle̍ŋ cho̍ o̍ ndu̍ kɔ̍ɔ̍lī le̍.

⁴⁰Nyɛ̄ o̍ nyɛ̄ o̍ dɔ̍ū ya̍ o̍ sōndō mi̍ di̍mūl nya̍ ndu̍ pāa̍le̍ hāūle̍ŋ nde᷅ŋ, sāwāla̍ ndɔ̄la̍ŋ ni̍, ndu̍yɛ̍ a̍ nyɛ̄ o̍ nyɛ̄ o̍ di̍mu̍l nya̍ le̍ tōsāa̍, lā wa̍ ndu̍ tōsāa̍ le̍ te̍le̍ŋ o̍ te̍le̍ŋ, ko̍ŋ to̍sa̍ ni̍, nya̍ ni̍, a̍ chūāūwāā nyāā ma̍māa̍ mī nyɛ̄ o̍ nyɛ̄ ō wa̍ ō kɛ̄ndɛ̄ a̍ nya̍, ndu̍yɛ̍ mī lā vīōū o̍ lɛ̄ŋnde̍ŋ nde᷅ŋ ni᷄ŋ, lē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ke̍ nya̍ le᷅ŋ le̍ fɛ̍ɛ̍ŋ a̍ fɛ̍ɛ̍ŋ nde̍ŋ.”

⁴¹O̍ ko̍ŋ kɔ̍ɔ̍lī, mi̍ Mūu̍sē o̍ hɛ̍lī chi̍o̍o̍ŋ ŋ̄gāa̍ Chɔ̍ɔ̍dāŋ le̍e̍lōo̍, bā pāa̍le̍ŋ lē chāŋndo̍.

⁴²Le̍ tē sūlɛ̍i̍ fūla̍ wāŋndo̍ o̍ bā pɛ̍ mbō dīī wāna̍ chi̍o̍o̍, ō ve᷅ o̍ lēya̍a̍mɔ̍ɔ̍ ni̍ŋ te̍ pɛ̍, wānā ko̍ŋ ō nyāānu̍ŋ o̍ chi̍e̍e̍ŋ mu̍ŋ o̍ pīlɛ̍ ni᷄ŋ nāa̍ wānā yɔ᷅ŋ ndu̍ nyɛ̄ le̍ wa̍, le̍ yōōmū ndɔ̄ɔ̍ chīīndīa̍a̍.

⁴³Chi̍e̍e̍ŋ o̍ hɛ̍li̍ mu̍ŋ ndo̍ŋ mu̍ŋ ŋ̍ cho̍ mu᷅ŋ ni̍. Le̍ yu̍ŋgu̍ Lūbɛ᷅ŋ ndo̍, mbo̍ hɛ̄lī Bɛ̍sā o̍ po̍llo̍ ni᷄ŋ, o̍ lɛ̄ŋndē dɛ̍ŋgbɛ̍le̍ŋ o̍ pēmbēi̍ chōo̍. Le̍ yu̍ŋgu̍ Ka̍a̍dī wo̍ mbo̍ hɛ̄lī Lu̍a̍mɔ̍tī, o̍ tāndā Ki̍li̍a̍a̍dī wo̍ ni᷄ŋ. Le̍ yu̍ŋgu̍ Mānāa̍sē wo̍, mbo̍ hɛ̄lī Ko̍lāŋ o̍ tāndā Ba̍a̍sīāŋndo̍ ni᷄ŋ.

⁴⁴Mī Mūu̍sē ke᷅ wāŋnda̍ I̍sɔ̄lūɛ̍i̍ sāwāla̍ Mɛ̄lɛ̄ka̍ ke̍ ndu̍ le̍ nda̍ la̍ŋ.

⁴⁵Mɛ̄ɛ̍ I̍sɔ̄lūɛ̍i̍ya̍ ā fūla̍ I̍chi̍pī ma̍ wā o̍ dɔ̍ɔ̍ŋgɔ̍ɔ̍ o̍ lɛ̄ŋndē dɛ̍ŋgbɛ̍le̍ŋ Chɔ̍ɔ̍dāŋ le̍e̍lōo̍, bā pāa̍le̍ŋ lē chāŋndo̍, Bɛ̄tīpi̍ɔ̍ɔ̄ chi̍e̍e̍ i̍kɛ̍i̍, o̍ ko̍ŋ Mūu̍sē ke᷅ I̍sɔ̄lūɛ̍i̍ya̍ sāwāla̍ Mɛ̄lɛ̄ka̍ la̍ŋ nda᷅ŋ ni̍, ndu̍yɛ̍ a̍ pɛ̄ɛ̄kūla̍ Mɛ̄lɛ̄ka̍ la̍ŋ nda᷅ŋ. I̍sɔ̄lūɛ̍i̍ya̍ ā wa̍ o̍ dɔ̍ɔ̍ŋgɔ̍ɔ̍ o̍ būŋgɛ̄ī Māsāa̍ Si̍hɔ̄ŋ o̍ wa̍ pāāndū māsāa̍ chōo̍ ve̍ ni᷄ŋ, Māsa̍ A̍mɔ̍lu̍a̍i̍tīi̍ya̍ o̍ wa̍ Hɛ̍si̍bɔ̄ŋ chi̍e̍e̍ wo̍. Kɛ̍ mi̍ Mūu̍sē nda̍ wāŋnda̍ I̍sɔ̄lūɛ̄ī nda̍ a̍a̍ ya᷅m māsāa̍ ho̍ō bōōndi̍i̍ nda̍ fūla̍ I̍chi̍pī ve̍.

⁴⁶

⁴⁷Māsāa̍ A̍mɔ̍lu̍a̍i̍tīi̍ya̍ ŋi̍ɔ̍ɔ̍ŋāa̍ wa̍ ka̍ŋ Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋndo̍ wa̍, Māsāa̍ Si̍hɔ̄ŋ ni̍, a̍ Māsāa̍ Ɔ̍kū o̍ wa̍ Ba̍a̍sīāŋndo̍ ni̍, būŋgāŋ nda᷄ŋ nda̍ wa̍ mu̍ŋ ma̍sāa̍ chōo̍ wo̍ŋ kpo̍u̍, mi̍ I̍sɔ̄lūɛ̍i̍ya̍ ā bīī mu̍ŋ mi̍ ŋ̄ wā ni᷅ŋ le̍ nda̍.

⁴⁸Lɛ̄ŋndē nda̍ wa̍ le̍ŋ māsāa̍ chōo̍ le̍ŋ ki̍nɛ̍i̍, chɔ̍ŋ A̍lo̍yā chi̍e̍e̍, o̍ dɛ̍ŋgbɔ̍ɔ̍ A̍nɔ̄ŋ mɛ̄ɛ̄lu̍la̍ŋ, mbo̍ kūā le̍nde̍ ba᷅ tōūwo̍ di̍, o̍ Pēmbīī Si̍līɔ̄ŋ nde̍, ī nda̍ ve̍e̍lū vɛ̍lɛ̄ āā Pēmbīī Ha̍mɔ̄ŋnde̍ ve̍, le̍ŋ kpo̍u̍ mi̍ I̍sɔ̄lūɛ̍i̍ya̍ ā bīī mi̍ le̍ wa̍ ni᷅ŋ le̍ nda̍.

⁴⁹Lɛ̄ŋndē dɛ̍ŋgbɛ̍le̍ŋ Chɔ̍ɔ̍dāŋ le̍e̍lōo̍ ki̍nɛ̍i̍ ba᷅ pāa̍le̍ŋ lē chāŋ ndo̍, mbo̍ kūā le̍nde̍ di̍ o̍ Pēe̍ Mɛ̄ŋmā Īhɛ᷄l nɔ̍ nya̍ā yōōmāā lēni᷄ŋ te̍ wo̍ bā tōūwo̍, ndu̍yɛ̍ mbo̍ fūūlūū le̍nde̍ a̍ Pēmbīī Pi̍si̍kāve̍ bā pāa̍le̍ŋ lē chāŋndo̍, lɛ̄ŋndē ndāle̍ le̍ŋ le̍ ku̍ɛ̄ le̍ŋ kpo̍u̍ ni̍.