Read Southern Kisi Dītɔ̍nɔ̍mi̍ī 5 Bible Online

Dītɔ̍nɔ̍mi̍ī 5 - Southern Kisi bible

Dītɔ̍nɔ̍mi̍ī 5

¹O̍ ko̍ŋ kɔ̍ɔ̍lī, mi̍ Mūu̍sē o̍ ve̍e̍lū I̍sɔ̄lūɛ̍i̍ya̍ kpo̍u̍ na̍a̍ pi᷅lɛ̍. Mbo̍ dīmūl nda̍ āā, “Lā ya᷄ŋ ni᷅la̍ŋ wāŋnda̍ I̍sɔ̄lūɛ̄ī, mī lā tūēī sāwāla̍ Mɛ̄lɛ̄ka̍ lā ya̍ I̍ cho̍ nya̍ pāa̍le̍ hāūle̍ŋ nde᷅ŋ tōmbōlāllo̍ la̍ŋ, ndu̍yɛ̍ a̍ nyɛ̄ o̍ nyɛ̄ Mɛ̄lɛ̄ka̍ dīmi̍, mī lā pɛ̄ɛ̄ku̍ la̍ŋ ndu̍yɛ̍ mī lā tōsa̍ ndu̍.

²Bōōndi̍i̍ na̍a̍ ŋ̄ wa̍ o̍ Pēmbīī Sa̍a̍nāīve̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō yīī kpe̍ma̍a̍ a̍ na̍a̍ lo̍ŋ.

³Ō cho̍ a̍ fi̍nyāā nāā ma̍māa̍ le̍ Mɛ̄lɛ̄ka̍ yīi̍ kpe̍ma̍a̍ ho̍ō le̍. Na̍a̍ ŋ̍ lo̍ yōōmū, chɔ̍ŋ a̍ te̍le̍ŋ ko̍ŋ, ha̍a̍a̍ a̍ pāa̍le̍ hāūle̍ŋ nde᷅ŋ mi̍ ŋ̄ wā na̍ŋnu᷄ŋ nda̍, a̍ na̍a̍ o̍ yi̍i̍ kpe̍ma̍a̍ ho̍ō ni̍.

⁴Mi̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ su̍a̍ā nāa̍ nya̍ chūa̍ kpe̍nde̍ke̍le̍ o̍ yīŋndē bɛ̄ŋnde̍ŋ ni᷄ŋ o̍ pēmbīī kēŋ.

⁵Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ wa̍ sūɛ̍i̍ nāa̍ nya̍ chūa̍, ya̍ wa̍ nya̍ īsīsi̍ tɛ̍ɛ̄ŋ nya̍ nda̍ā ni̍, le̍ mī lo̍ o̍ ko̍ŋ mī di̍mu̍l nya̍ nyɛ̄ o̍ wa̍ nya̍ dīmūllo̍ wo̍. Sīōōŋnde̍ wa̍ nya̍ a̍ yīŋnde̍ wa̍ o̍ pēmbēi̍ he̍ī chōo̍ le̍ŋ. Le̍ he̍ī, lā nɔ̄la̍ mī lā he᷄l o̍ pēmbēi̍ he̍ī chōo̍ le̍. Ndu̍yɛ̍ nyɛ̄ ō di̍mu̍l la̍ wo̍ ndu̍ wa̍ ho̍ō ni̍.” “Mī Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl la̍ āā,

⁶‘Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Ya̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ni̍, nāa̍ nya̍ wa̍ o̍ bīyɔ̄ɔ̍ ni᷄ŋ nda̍.’ ”

⁷“ ‘Lā so̍o̍lūū mɛ̄lɛ̄ka̍ o̍ mɛ̄lɛ̄ka̍ chēle̍ŋ o̍ ya̍ kɔ̍ɔ̍lī le̍.’ ”

⁸“ ‘Lā to̍o̍sīāā vēla᷅ŋ nyɛ̄ o̍ nyɛ̄ mī lā sōōlu̍u̍ ndu̍ māā mɛ̄lɛ̄ka̍ nyā le̍, nyɛ̄m wāā chōo̍ cho̍o̍ ni̍, nyɛ̄m wāā o̍ chi̍e̍ēŋndo̍ chōo̍ ni̍, nyɛ̄m wāā o̍ mɛ̄ŋnda̍ŋ bɛ̄ŋgu̍ ni̍.’ ”

⁹Lā tu̍ndu᷄ŋ mɛ̍lɛ̄ka̍ o̍ mɛ̄lɛ̄ka̍ chēle̍ŋ o̍ lābɛ̄ŋgu̍ ni̍ŋ le̍ ndu̍ sōōlūūwo̍ le̍, kɛ̄lɛ̄ŋgāā ni᷅ŋ te̍, mī lā sāāŋgi̍a̍l ndu̍. Kāni̍ fo̍ndōle̍, ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, Mɛ̄lɛ̄ka̍ pāŋa̍lɛ̍i̍yo̍ ya̍ I̍ cho̍ ni̍. Wānāa̍ tu̍l la̍ lēyɛ̄ wa̍, wānāā kāŋ chūāūwāā ndāa̍ ni̍, a̍ chūāūwāā ndāā ma̍māa̍, ndu̍yɛ̍ a̍ chūāūwāā ndāā ma̍māā kāŋ chūāūwāā ndāā ma̍māa̍, dɛ̍nɛ̍ pālāa̍ ya̍ I̍ tu̍sī nda̍ chōo̍ ni̍ le̍ yɔ̄ŋ wɔ̄ɔ̍ŋ fi̍nyāā ndāā kāŋ ā tōsa̍ ko̍ŋ ndo̍.

¹⁰Kɛ̍ wānāa̍ ka̍a̍lā ya̍ ndu̍yɛ̍ mā tōsā nyɛ᷅ ya̍ I̍ di̍mūl nda̍ wo̍ wa̍, wānāā kāŋ chūāā ndāa̍ ni̍, a̍ chūāā ndāā ma̍māa̍, mbō kūɛ̄ a̍ lāchī kɛ᷅, kāālāa̍ ya̍ I̍ hi̍a̍ū la̍chi̍ a̍ nda̍ chɔ̄mndo̍ ni̍.

¹¹“ ‘Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍. Wānā o̍ wānā ve̍e̍lū dīōlā nīla̍ŋ o̍ fo̍ndō fu̍u̍wo̍ chōo̍ le̍. Wānā o̍ wāna̍ ve̍e̍lu̍ dīōlā nīla̍ŋ o̍ fo̍ndō fu̍u̍wo̍ chōo̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄, I̍ me᷅l wa̍nā ko̍ŋ le̍ yɔ̄ŋ wɔ̄ɔ̍ŋ o̍ to̍sā ko̍ŋ ndo̍ le̍, dɛ̍nɛ̍ pālāa̍ ya̍ I̍ tu̍sī ndu̍ chōo̍ ni̍.’ ”

¹²“ ‘Lā lōōnu̍ŋ a̍ pāa̍le̍ nīle̍ pɛ̍ŋgīāāle̍ŋ mī lā kɛ̄si̍ le̍ŋ lēbɛ̄ɛ̄ māā pāa̍le̍ di̍a̍ndāā, mɛ̄ɛ̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīmu̍l nya̍ yɛ̍.

¹³Lā nɔ̄ pālɛ̍i̍ ī ŋɔ᷄mpu᷅m o̍ lɔ̍ɔ̍ bɛ̄ŋgu̍ le̍ wa̍lta̍ nyāla̍ŋ tōsāa̍.

¹⁴Kɛ̍ o̍ pāa̍le̍ ŋɔ̍mmɛ̍ū le̍ŋ chōo̍, lā to̍sā wa̍li̍ o̍ wa̍li̍ le̍cho̍ō le̍, fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, pāa̍le̍ nīle̍ pɛ̍ŋgīāāle̍ŋ le̍ cho̍ le̍ŋ ni̍. Pāa̍le̍ le̍ŋ, wānā o̍ wānā nɔ̍ mā to̍sa̍ wa̍li̍ o̍ wa̍li̍ le̍cho̍ō le̍, nya̍ pi̍la̍ ni̍, chūāūwāā nyāa̍ ni̍, bu̍ɛ̍i̍yāā nyāā pi̍a̍a̍ndūa̍a̍, a̍ ā lāāndūa̍a̍ ni̍, nāūvāā nyāā wa̍a̍ ni̍, sōfɛ̍li̍a̍a̍ nyāa̍ a̍ chɔ̄lūāā nyāa̍ wa̍lla̍ a̍ pīli̍a̍a̍ ni̍, wānāā lēkāa̍wa̍a̍ cho̍ nya̍ tɛ̄ɛ̄ŋ o̍ lɛ̄ŋndē nyāle̍ŋ ni᷄ŋ nda̍ ni̍, lā to̍sā wa̍li̍ o̍ wa̍li̍ o̍ pāa̍le̍ le̍ŋ chōo̍ le̍. Lā nɔ̄ mī lā pɛ̄ŋgi̍ o̍ pāa̍le̍ le̍ŋ chōo̍.

¹⁵Lā lōōnu̍ŋ māā chīa̍a̍ nya̍ wa̍ o̍ lɛ̄ŋndē I̍chi̍pīle̍ŋ ni᷄ŋ ni̍, mi̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ sōlī nya̍ lo̍ŋ a̍ kpāāya̍ nūu̍, ndu̍yɛ̍ a̍ dīāllūŋ nīŋ ka̍lāŋ mi̍ hu᷅ŋ a̍ nya̍. Le̍la̍ŋ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, ya̍ do̍u̍ nya̍ sāwāa̍ ho̍ō ni̍, māā lā nɔ̄ mī lā pɛ̄ŋgi̍ o̍ pāa̍le̍ nīle̍ pɛ̍ŋgīāāle̍ŋ chōo̍.’ ”

¹⁶“ ‘Lā ke̍ fi̍nyāā nyāa̍ a̍ kālāa̍ nyāa̍ bɛ̄ɛ̄le̍ŋ mɛ̄ɛ̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīmu̍l nya̍ yɛ̍. Ko̍ŋ to̍sā ni̍, mī lā vīōū yōōmū ndu̍yɛ̍ mī nyɛ̄ o̍ nyɛ̄ ō wa̍ o̍ kɛ̄ndɛ̄ a̍ nya̍ o̍ lɛ̄ŋndē ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ chō nya̍ kīo̍o̍ le̍ŋ ni᷄ŋ.’ ”

¹⁷“ ‘Lā di̍ī wāna̍ chi̍o̍o̍ le̍.’ ”

¹⁸“ ‘Wānā su̍u̍ndā nya̍ wāna̍ nya̍ cho̍ o̍ nɔ̄ ni̍ŋ nya̍ ndu̍ le̍ wo̍ le̍.’ ”

¹⁹“ ‘Wānā yɔ᷅ŋ lēvīī le̍.’ ”

²⁰“ ‘Wānā tɛ̍ndāl cha̍ŋ nu̍m se̍īlē lāka̍fā le̍.’ ”

²¹“ ‘Wānā lu̍e̍ī le̍hɔ̍l o̍ nyɛ̄ o̍ nyɛ̄ pi̍la̍ le̍. La̍nɔ̍ pi̍la̍ ni̍, chīɛ̄ī pi̍la̍ ni̍, chīɛ̄ī ndūɛ̍i̍ ni̍, bu̍ɛ̍ī ndɔ̄ pi̍a̍a̍ndū kɛ̄lɛ̄ŋgāā ō lāāndū ni̍, nāū ndɔ̄ ni̍, sōfɛ̍lɛ̍ ndɔ̄ ni̍, kɛ̄lɛ̄ŋgāā nyɛ̄ o̍ nyɛ̄ ndɔ̄ che᷅le̍ŋ, wānā lu̍e̍ī ndu̍ lēhɔ̄l te̍.’ ”

²²“Sāwāla̍ŋ nda᷅ŋ Mɛ̄lɛ̄ka̍ Ya̍a̍wɛ̄ɛ̄ o̍ ke̍ nya̍ o̍ Pēmbīī Sa̍a̍nāīve̍ ni̍. Nya̍ kpo̍u̍ lā wa̍ ā dīīna᷄ŋ ku̍ndāa̍ mi̍ Mɛ̄lɛ̄ka̍ wā nya̍ sāwāla̍ŋ nda᷅ŋ kīo̍o̍, mi̍ dīōm ndɔ̄ɔ̍ ō wā sūɛ̍i̍ chōo̍ cho̍o̍ kpe̍le̍ŋ o̍ yīŋnde̍ŋ ni᷄ŋ o̍ kūmi̍i̍ ti̍ŋīī bɛ̄ndūe̍i̍ ni᷄ŋ. Sāwāla̍ o̍ ke̍ nya̍ la̍ŋ la̍ŋ la̍ wa̍ la᷅ŋ ni̍, ō hēndu̍ nyɛ᷅ o̍ nyɛ̄ chēle̍ŋ lēchōo̍ le̍. Ndu̍yɛ̍ mbo̍ pōōnyīāā la̍ŋ o̍ pōūtā yɛ̍ndɛ̍la̍ ti̍ɔ̍ɔ̍ŋnda̍ŋ chōo̍ mbo̍ kē ya̍ la̍ŋ.”

²³Mi̍ Mūu̍sē hi̍a̍ū lāchī a̍ sūɛ̍i̍, mbo̍ dīmī āā, “Bōōndi̍i̍ Mɛ̄lɛ̄ka̍ wa̍ sūɛ̍i̍ ye̍, mɛ̄ɛ̍ nya̍ chē mi̍ yīŋnde̍ŋ lē kūmbū pēmbēi̍ kpo̍u̍, mi̍ lā tūɛ̄ī mi̍ dīōmndo̍ ō wā sūɛ̍i̍ o̍ yīŋndē lēŋ ni᷄ŋ o̍ kūmi̍i̍ ti̍ŋīī bɛ̄ndūe̍i̍ ni᷄ŋ, mi̍ sīōōŋīī bɛ̄ndūe̍i̍ ī bīī nya̍. O̍ ko̍ŋ kɔ̍ɔ̍lī, bōlīī nyɛ̍i̍ lāyu̍ŋgu̍e̍i̍ kpo̍u̍, ndu̍yɛ̍ a̍ lāŋgba̍ā nyāā ka᷅lla̍, ma̍ hūŋ nāa̍ ya̍ chu̍a̍.

²⁴Ma̍ dīmūl la̍ āā, ‘Mūu̍sē, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō chɔ᷄m na̍a̍ pāa̍le̍ hāūle̍ŋ nde᷅ŋ pa̍ŋgēle̍ ndɔ̄ bɛ̍ndu̍ chɔ᷅m māā ō chō na̍a̍ tɛ̄ɛ̄ŋ ndo̍, ndu̍yɛ̍ mbo̍ chɔ̄m na̍a̍ mɛ̄ɛ̍ o̍ cho̍ wāna̍ kpāāyā bɛ̍ndū yɛ̍. Ŋ̄ tūēī dīōm ndɔ̄ɔ̍ sūɛ̍i̍ kpe̍nde̍ke̍le̍ o̍ yīŋnde̍ŋ ni᷄ŋ, ndu̍yɛ̍ mi̍ ŋ̄ sɔ̄lā sīnā pɛ̄ŋgo̍o̍ māā Mɛ̄lɛ̄ka̍ ō sōo̍ bɛ̍ɛ̍ nāa̍ wānā chu̍a̍ kpe̍nde̍ke̍le̍ māā wānā vi᷅ le̍.

²⁵Kɛ̍ ŋ̄ yēēma̍ mī ŋ̄ pīsi̍ yōōmūlā nāāla̍ŋ mī ŋ̄ sɔ̄la̍ pīɔ̍mndo̍ le̍. Ŋ̄ yēēma̍ mī yīŋndē bɛ̄ŋnde̍ŋ nde᷅ŋ lē tɛ̄ɛ̄mbu̍u̍ na̍a̍ le̍. Tē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō sōō ni᷅ŋ nāa̍ na̍a̍ chūa̍ pɛ̍, yīŋndē bɛ̄ŋnde̍ŋ nde᷅ŋ lē chō na̍a̍ dīū.

²⁶Kāni̍ bɛ̍ɛ̍ ī wāā nu̍a̍ā ī yɔ̄nu̍ŋ ndɔ̍ mī ŋ̄ chē le̍, le̍ mī wāna̍ chi̍e̍e̍ yo̍o̍māa̍ ō tūēī Mɛ̄lɛ̄ka̍ cho̍ yōōmū wo̍ sūɛ̍i̍ o̍ yīŋndē wāā nu̍a̍ā ni᷄ŋ mɛ̄ɛ̍ i̍ yɔ̍nu̍ŋ nu̍a̍ā a̍ na̍a̍ yɛ̍, mī wāna̍ chi̍e̍e̍ ko̍ŋ ō wa̍ wɔ̄ yōōmū kɛ᷅.

²⁷Le̍la̍ŋ Mūu̍sē, nūm sɔ̍ɔ̍ŋgu̍u̍ kpɛ̍ɛ̍la̍ŋ mā tūēī nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō chō dīmīo̍o̍ wo̍. Tē ō chīi̍ īsɔ̄ɔ̍ nāa̍ nūm chu̍a̍ pɛ̍, ā hīŋ a̍ hu̍ŋ di̍mūl na̍a̍. Nyɛ̄ o̍ nyɛ̄ o̍ di̍mu̍l na̍a̍ le̍ tōsāa̍ pɛ̍, ŋ̄ chō ndu̍ tūēīyɔ̄ɔ̄ mī ŋ̄ tōsa̍ ndu̍.’ ”

²⁸“O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍ɛ̍ī nyɛ̄ nya̍ sōō nāa̍ ya̍ chu̍a̍ wo̍. Mbo̍ dīmūl la̍ āā, ‘Ī tu̍e̍ī nyɛ̄ wāŋnda̍ ha̍ā ā sōō nāa̍ nūm chu̍a̍ wo̍. Ndu̍yɛ̍ nyɛ̄ nda̍ dīmi̍ wo̍ chō tōnya̍.

²⁹Tē kɔ̄l wāā ndo̍ō ko̍ni̍ wāŋnda̍ ha̍ā nda̍ a̍a̍ nɔ̍ ni᷄ŋ lɔ̍ɔ̍ o̍ lɔ̍ɔ̍ ni̍, le̍ sīōōŋīī nīi̍ nɔ̄ɔ̍ ndu̍yɛ̍ mā tōsa̍ nyɛ̄ sāwāla̍ nīla̍ŋ lā dīmi̍ wo̍, nyɛ̄ o̍ nyɛ̄ wa᷄ wā ō kɛ̄ndɛ̄ a̍ nda̍, ndu̍yɛ̍ a̍ chūāūwāā ndāa̍ le̍ fɛ̍ɛ̍ŋ a̍ fɛ̍ɛ̍ŋ.

³⁰Mi̍i̍ŋgu̍ mā kɔ̍ di̍mūl nda̍ mī wānā o̍ wānā mi̍i̍ŋgu̍ o̍ tɛ̍ndīi̍ ndɔ̄ɔ̍ ni᷄ŋ.

³¹Kɛ̍ nūm Mūu̍sē nūm lo̍ ya̍ īkɛ̄i̍ na̍ŋ mī ke̍ nu̍m sāwāla̍ nīla̍ŋ kpo̍u̍ ndu̍yɛ̍ a̍ nyɛ̄ o̍ nyɛ̄ ya̍ I̍ cho̍ nya̍ dīmūl le̍ tōsāa̍. Pɛ̍ɛ̍ku̍ wa᷅ŋnda̍ ha̍ā sāwāla̍ŋ nda᷅ŋ ndu̍yɛ̍ a̍ pɛ̄ɛ̄kūla̍ŋ nda᷅ŋ, o̍ ko̍ŋ kɔ̍ɔ̍lī, a̍ nyɛ̄ o̍ nyɛ̄ ya̍ I̍ cho̍ nya̍ dīmūl le̍ to̍sāa̍ o̍ lɛ̄ŋndē ya̍ I̍ cho̍ nya̍ le᷅ŋ kīo̍o̍ māā nyɛ̄ nyā le̍ŋ ni᷄ŋ.’ ”

³²“Lēla̍ŋ nya̍ wāŋnda̍ I̍sɔ̄lūɛ̄ī lā mānda̍ŋ. Nyɛ̄ o̍ nyɛ̄ sāwāla̍ŋ nda᷅ŋ lā dīmi̍, sāwāla̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō ke̍ nya̍ la᷅ŋ nda̍ŋ, lā wa̍ ndu̍ tōsāa̍. Ō pīlɛ̍ bɛ̍ɛ̍ lā tɛ̍ɛ̍mbūū le̍.

³³Nɛ̄i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dīmu̍l nya̍ le̍ wāa̍ lēchōo̍ wo̍, lā kɔ̍ o̍ nɛ̄ī ko̍ŋ chōo̍, ko̍ŋ to̍sā ni̍ mī nyɛ̄ o̍ nyɛ̄ wa̍ ō kɛ̄ndɛ̄ a̍ nya̍ o̍ ko̍ŋ kɔ̍ɔ̍lī, mī lā vīōū vɛ̄lɛ̄ yōōmū o̍ lɛ̄ŋndē nya̍ chō kɔ̄la̍ŋ chūa̍a̍ māā nyɛ̄ nyā le̍ŋ ni᷄ŋ.”