Read Southern Kisi Dītɔ̍nɔ̍mi̍ī 8 Bible Online

Dītɔ̍nɔ̍mi̍ī 8 - Southern Kisi bible

Dītɔ̍nɔ̍mi̍ī 8

¹Mi̍ Mūu̍sē o̍ hi̍a̍ū lāchī a̍ sūɛ̍i̍ mbo̍ dīmūl I̍sɔ̄lūɛ̍i̍ya̍ āā, “Wāŋnda̍ I̍sɔ̄lūɛ̄ī, sāwā o̍ sāwā Mɛ̄lɛ̄ka̍ ke̍ nya̍ mi̍ wa᷅ nya̍ la̍ŋ dīmūllo̍ pāa̍le̍ hāūle̍ŋ nde᷅ŋ, lā kīndi̍ŋ o̍ nɛ̄ī o̍ nɛ̄ī ni̍ŋ mī lā chūa̍ la̍ŋ kpo̍u̍. Ko̍ŋ to̍sā ni̍ mī lā hīōū lāchī a̍ wāa̍ yōōmū, ndu̍yɛ̍ mī lā kūi̍ ta̍u̍ ta̍u̍. Ndu̍yɛ̍ ko̍ŋ to̍sā ni̍ mī lā kūɛ̄ o̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄ o̍ chu̍e̍l fi̍nyāā nyāā ma̍māa̍ būŋgɛ̄i̍, le̍ nda̍ kīo̍o̍ le̍ŋ ni᷄ŋ mī lā kɔ̍ chu̍ā le̍ŋ māā nyɛ̄ nyā.

²Wɔ̄sīlā be̍le̍-hi̍ɔ̍ɔ̍lu̍la̍ nya̍ chīi̍ o̍ lɛ̄ŋndē po̍lte̍ŋ ni᷄ŋ bōōndi̍i̍ nya̍ wa̍ hūnɔ̄ɔ̍ ve̍ la̍ŋ, lā lōōnu̍ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō wa̍ hūnɔ̄ɔ̍ a̍ nya̍ yɛ̍. O̍ hūnɔ̄ɔ̄ nyāa̍ ni᷄ŋ, mbo̍ lō o̍ ko̍ŋ mbo̍ sōlī nya̍ kɔ̄ltā yōŋgāla̍ŋ ni᷄ŋ po̍, a̍ nya̍ nyɛ̄ kīndīlāa̍ hāndɔ̄ɔ̍ chōo̍, ndu̍yɛ̍ mbo̍ tōfā nya̍ kɔ̄lta̍ŋ le̍ mbō sīna̍ nyɛ̄ wa̍ nya̍ o̍ lākɔ̄l lo̍, tē nya̍ a̍a̍ to̍sā ni̍ŋ nyɛ᷅ sāwāla̍ ndɔ̄la̍ŋ lā dīmi̍ wo̍ ɔ̄ɔ̄, tē nya̍ a̍a̍ to̍sa̍ ni̍ŋ te̍.

³Kɔ̄ltā yōŋgālā nya̍ a̍a̍ nɔ̍ la̍ŋ mbo̍ tūsī la̍ŋ tōōlō mbo̍ tōsā mi̍ yīa̍a̍ŋ mā kōmāl nya̍ o̍ lɛ̄ŋndē po̍lte̍ŋ ni᷄ŋ lo̍ŋ. Ndu̍yɛ̍ mɛ̄ɛ̍ yīmā māŋ mā kōma̍l nya̍, mbo̍ lō o̍ ko̍ŋ mbo̍ kē nya̍ ma̍nɛ̄i̍yo̍ le̍ dīo̍o̍, nyɛ̄ dīāā nya̍ a̍a̍ si̍nā bɛ̍ɛ̍ kāni̍ ma̍si̍ndɛ̄ le̍ wo̍, ō fi̍nyāā nyāā ma̍māa̍ bɛ̍ɛ̍ nda̍ a̍a̍ si̍nā bɛ̍ɛ̍ le̍ wo̍. Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ye̍e̍ma̍ mī nya̍ a̍a̍ si̍na̍ māā ō cho̍ nyɛ̍ dīa̍a̍ ko̍ni̍ le̍ to̍sā mī wāna̍ chi̍o̍o̍ ō wa̍ yōōmū le̍, māā le̍ mī wāna̍ chi̍o̍o̍ ō wa̍ yōōmū kpe̍e̍kpe̍i̍, mɛ̄ɛ̍ mbō chūa̍ nyɛ̄ dīo̍m Mɛ̄lɛ̄ka̍a̍ ō dīmu̍l ndu̍ wo̍. Nyɛ̄ kōŋ o̍ to̍sa̍ he̍ī ni̍.

⁴Wɔ̄sīlā be̍le̍-hi̍ɔ̍ɔ̍lu̍la̍ nya̍ chīi̍ la᷅ŋ o̍ ti᷅ŋndo̍ tɛ̄ɛ̄ŋ nda̍ŋ kpo̍u̍, nyɛ̄lā nyāla̍ chu̍ɛ̍i̍ya᷄ŋnda̍ŋ lā sīɔ̍ŋ te̍. Pēlūŋ hīīndu̍u̍ wa̍nā o̍ wānā o̍ lākɔ̄ ni᷄ŋ te̍.

⁵Lā lōōnu̍ŋ māā mɛ̄ɛ̍ chūā vīālāa̍ ō tɛ̄ɛ̄mbūū nu̍a̍ā sūɛ̍i̍ mī wānāa̍ ve̍lū ndu̍ wa̍ ā tūsi̍ ndu̍ nyɛ̄ pālāa̍ chōo̍ le̍ ndu̍ mīŋgīo̍o̍ o̍ nɛ̄ī yɛ̍, le̍nde̍ ko̍ni̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tūsī nya̍ nyɛ̄ pālāa̍ chōo̍ le̍ nya̍ mīŋgīo̍o̍ o̍ nɛ̄ī ni̍, tē lā tɛ̄ɛ̄mbu̍u̍ sūɛ̍i̍ pɛ̍.

⁶Le̍la̍ŋ lā kɔ̍ o̍ nɛ̄ī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chɔ᷄m nya̍ wo̍ chōo̍ mī lā chūa̍ sāwāla̍ o̍ ke̍ nya̍ la̍ŋ ndu̍yɛ̍ mī lā ke̍ ndu̍ bɛ̄ɛ̄le̍ŋ.

⁷Mɛ̄lɛ̄ka̍ Ya̍a̍wɛ̄ɛ̄, o̍ cho̍ kɔ̄la̍ŋ a̍ nya̍ o̍ lɛ̄ŋndē kɛ̄ndɛ̄ kɛ̍ndɛ̄lē bɛ̄ŋnde̍ŋ ni᷄ŋ, lɛ̄ŋndē tɔ̄lɔ̄ɔ̄la̍ŋ lā nāŋ na̍ŋɔ̄ɔ̄ bɛ̄ndōo̍ le̍ŋ. Lɛ̄ŋnde̍ŋ nde᷅ŋ lē nɔ̄ pēēla̍ pɔ̍mbɔ̄la̍ŋ la̍ tīūwāā sɔ̍, a̍ mɛ̄ŋmā ŋ̄būŋga᷄ŋ, ndu̍yɛ̍ a̍ mɛ̄ŋma̍ fu̍lā o̍ būūlūla̍ŋ ni᷄ŋ, mi̍ mā yāmbū pe̍ēla̍ pɔ̍mbɔ̄la̍ŋ o̍ kpōlōŋ kpo̍lo̍ŋ nda̍ŋ ni᷄ŋ nda̍ŋ.

⁸Lɛ̄ŋnde̍ nɔ̍ nyɛ̄ dīa̍a̍ ta̍u̍ ta̍u̍ le̍ŋ le̍ cho̍ ni̍, le̍ nɔ̍ tɔ̄lɔ̄ɔ̄ ŋ̄wi̍tīi̍yo̍, a̍ tɔ̄lɔ̄ɔ̄ ŋ̄ba̍a̍līi̍yo̍, a̍ kīle̍pīi̍ya̍ŋ, a̍ fi̍kīi̍ya̍ŋ, o̍ ko̍ŋ kɔ̍ɔ̍lī, a̍ tɔ̄lɔ̄ɔ̄ pɔ̄mɛ̄ki̍la̍ne̍tīi̍yo̍, a̍ kpe̍le̍la̍ yɔ̄mīī ɔ̄li̍fīi̍ la̍ŋ, ndu̍yɛ̍ a̍ līa̍a̍ŋ nde̍ŋ.

⁹Nyɛ̄ dīāā lēpɛ̄ŋ ō ve᷅ ni̍ŋ nya̍ o̍ lɛ̄ŋnde̍ŋ nde᷅ŋ ni᷄ŋ mī yīmā bīī wānā o̍ wānā le̍. Ndu̍yɛ̍ vɛ̍lɛ̄, nyɛ̄ o̍ nyɛ̄ ō ve᷅ ni̍ŋ nya̍ lēpɛ̄ŋ o̍ lɛ̄ŋnde̍ŋ nde᷅ŋ ni᷄ŋ te̍. Pōūta̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍ŋ, pōūtā ŋ̄chi̍li̍ŋnda̍ŋ kpo̍so̍ŋ la̍ cho̍ ni̍. Ndu̍yɛ̍ vɛ̍lɛ̄, lā wā ni̍ŋ ka̍pāla̍ŋ tōūwɔ̄ɔ̍ o̍ pēmbu᷄ŋ cho̍ o̍ lɛ̄ŋnde̍ŋ nde᷅ŋ ni᷄ŋ ndo̍ŋ.

¹⁰Nyɛ̄ o̍ nyɛ̄ sōndō dē, lā wā ni̍ŋ ndu̍ sɔ̄lāa̍ o̍ lɛ̄ŋnde̍ŋ nde᷅ŋ ni᷄ŋ mī lā dīā mī lā pūm. Lā sāŋgālā ni̍ŋ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, le̍ mɛ̄ɛ̍ o̍ ke̍ nya̍ lɛ̄ŋndē kɛ̄ndɛ̄lē bɛ̄ndūlē wāā nu̍a̍ā yɛ̍.”

¹¹Mi̍ Mūu̍sē o̍ si̍lā I̍sɔ̄lūɛ̍i̍ya̍, mbo̍ dīmūl nda̍ āā, “Lā chō kɔ̄la̍ŋ, kɛ̍ lā mānda̍ŋ. Lā pu̍ɛ̍ɛ̍nu᷄ŋ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ le̍. Nyɛ̄ o̍ nyɛ̄ ya̍ I̍ cho̍ nya̍ dīmūllo̍ pāa̍le̍ hāūle̍ŋ nde᷅ŋ, sāwāla̍ o̍ ke̍ nya̍ la̍ŋ ni̍, a̍ pɛ̄ɛ̄kūlā ndɔ̄la̍ŋ, ndu̍yɛ̍ a̍ nyɛ̄ o̍ nyɛ̄ o̍ di̍mu̍l nya̍ le̍ tōsāa̍, ō pīlɛ̍ bɛ̍ɛ̍ lā be̍ŋgā le̍ ndu̍ chūa̍a̍ le̍.

¹²Nyɛ̄ o̍ nyɛ̄ sōndō dē, lā wā ni̍ŋ ndu̍ sɔ̄lāa̍ o̍ lɛ̄ŋnde̍ŋ nde᷅ŋ ni᷄ŋ. Lā tāŋgūl ni̍ŋ chīɛ̄īlā kɛ̄ndɛ̄ kɛ̍ndɛ̄la̍ŋ, mī lā wānu̍ŋ le̍ni̍ŋ.

¹³Nāūwāā nyāa̍, a̍ chūīŋāā nyāa̍, a̍ sāa̍ nyāa̍, ā wā ni̍ŋ ku̍īyo̍ ta̍u̍ ta̍u̍, ndu̍yɛ̍ mī lā wa̍ nyɛ̄ sɔ̄lāa̍ sɔ̄lāa̍ ta̍u̍ ta̍u̍, ka̍ni̍ŋ hu̍mbo᷄ŋ a̍ ka̍ni̍ŋ si̍a̍ŋa᷄ŋ. Nyɛ̄ o̍ nyɛ̄ ō wā ni̍ŋ nya̍ chɛ̄lɔ̄ɔ̍ o̍ lɛ̄ŋnde̍ŋ nde᷅ŋ ni᷄ŋ, mī nyɛ̄m nyāa̍ŋ ŋ̄ kūi̍ kūīyo̍ pīla̍.

¹⁴A̍ te̍le̍ŋ ko̍ŋ, kɔ̄l yōŋgāa̍ ō chō nya̍ lūɛ̄īyɔ̄ɔ̄ ni᷄ŋ, mī lā pūɛ̄ɛ̄nu̍ŋ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, o̍ so̍li̍ nya̍ o̍ chɛ̄le̍ŋ ni᷄ŋ I̍chi̍pī nāa̍ nya̍ wa̍ o̍ sāŋgā bɛ̄ndōo̍ ni᷄ŋ nda̍ wo̍.

¹⁵Ndu̍ so̍li̍ nya̍ lo̍ŋ ni̍, mbo̍ kēēkū a̍ nya̍ o̍ lɛ̄ŋndē po̍lte̍ bɛ̍ndūle̍ŋ wɔ̄ɔ̍ŋ wɔ̄ɔ̍ŋ nde̍ŋ ni᷄ŋ, lɛ̄ŋndē po̍lte̍ nɔ̍ kɛ̄ūwāā wɔ̄ɔ̍ŋ wɔ̄ɔ̍ŋnda̍ a̍ ŋge̍e̍ma̍a̍ le̍ŋ, mbo̍ hūŋ a̍ nya̍ na̍ŋnu᷄ŋ. O̍ lɛ̄ŋndē vēsɛ̍i̍le̍ bɛ̍ndūle̍ŋ lēŋ ni᷄ŋ nāa̍ māmɛ̄ŋ o̍ māmɛ̄ŋ mā cho̍ le̍ wa̍, mbo̍ tōsā mi̍ mɛ̄ŋnda̍ŋ mā fūlā o̍ pōū kālā ka̍lā bɛ̄ndōo̍ le̍ mī lā ko᷄l.

¹⁶O̍ ko̍ŋ kɔ̍ɔ̍lī, o̍ lɛ̄ŋndē po̍lte̍ le̍ŋ ni᷄ŋ mɛ̄ɛ̍ yīa̍a̍ŋ mā kōma̍l nya̍, mbo̍ kē nya̍ ma̍nɛ̄i̍yo̍ mi̍ lā dīā, nyɛ̄ dīāā nya̍ a̍a̍ si̍nā bɛ̍ɛ̍ pa̍a̍ndū le̍ wo̍, ō fi̍nyāā nyāā ma̍māa̍ bɛ̍ɛ̍ nda̍ a̍a̍ si̍nā bɛ̍ɛ̍ le̍ wo̍. Ō tōsa̍ mu᷅ŋ kpo̍u̍ a̍ nya̍ le̍ mbō tōsa̍ mī kɔ̄ltā yōŋgāla̍ŋ lā fūla̍ nya̍ ni᷄ŋ, ndu̍yɛ̍ a̍ lē mbō tōfa̍ nya̍ kɔ̄lta̍ŋ, le̍ mī ndu̍ o̍o̍ to̍sa̍ mī nyɛ̄ o̍ nyɛ̄ ndu̍ o̍o̍ hu̍ŋ mɛ̍ɛ̍lū wā ō kɛ̄ndɛ̄ a̍ nya̍.

¹⁷Le̍la̍ŋ lā mānda̍ŋ, yɔ̄ŋi̍ nya̍ yīya̍ŋ o̍ kɔ̄ltā nyāla̍ŋ ni᷄ŋ māā sūl o̍ sūl nya̍ nɔ̄, māā kpāāya̍ nyāa̍, a̍ dīāllūŋ nyāŋ ka̍la̍ŋ to̍sa̍ ni̍ mi̍ lā sɔ̄lā ndu̍.

¹⁸Lā lōōnu̍ŋ a̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, mī lā sīna̍ māā ndu̍ ke̍ nya̍ kpāāyāa̍ ni̍, mi̍ lā sɔ̄lā sūl o̍ sūl nya̍ nɔ̄. Ō tōsa̍ he̍ī le̍ chɔ̄mndo̍ māā kpe̍ma̍ o̍ yi̍i̍ a̍ fi̍nyāā nyāā ma̍māa̍ wo̍, māā ō chō o̍ kpe̍ma̍ ko̍ŋ chōo̍. Ndu̍yɛ̍ pāa̍le̍ hāūle̍ŋ nde᷅ŋ bɛ̍ɛ̍ ō chō wɔ̄ lēchōo̍.

¹⁹I̍ cho̍ nya̍ pāa̍le̍ hāūle̍ŋ nde᷅ŋ sīlāa̍ ō kālā ka̍lā, māā tē lā pūɛ̄ɛ̄nu̍ŋ a̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ pɛ̍, mī lā mūli̍ŋ nyɛ᷅m chēle̍ŋndo̍ŋ sōōlūūwo̍, ndu̍yɛ̍ mī lā sāāŋgi̍a̍l mu̍ŋ māā mɛ̄lɛ̄ka̍a̍ nyā pɛ̄, mɛ̄ɛ̍ lā sīna̍ pɛ̍ŋgu̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ dīū.

²⁰Tē lā sōli̍ ndu̍ dīōm pɛ̍, ō chō nya̍ tɛ̄ɛ̄mbūū mɛ̄ɛ̍ o̍ tɛ̍ɛ̍mbūū ni̍ŋ lɛ̍ŋīī nya̍ sɔ̄ŋgā ni̍ŋ a̍ ndi̍ mī lā yēm nde̍ ve̍ yɛ̍.”