Read Southern Kisi Dītɔ̍nɔ̍mi̍ī 9 Bible Online

Dītɔ̍nɔ̍mi̍ī 9 - Southern Kisi bible

Dītɔ̍nɔ̍mi̍ī 9

¹Mi̍ Mūu̍sē o̍ di̍mī āā, “Wāŋnda̍ I̍sɔ̄lūɛ̄ī, lā ya᷄ŋ ya̍ nīla̍ŋ. Lā chō hūnɔ̄ɔ̍ Chɔ̍ɔ̍dāŋ nda̍ŋ tāŋɔ̄ɔ̍ mi̍ lā wa̍ kɔ̄la̍ŋ kāa̍la̍ cho̍ nya̍ lāchī la̍ŋ sōlīo̍o̍ o̍ lɛ̄ŋndē nya̍ chō kɔ̄la̍ŋ bīyɔ̄ɔ̍ le̍ŋ ni᷄ŋ. Kāa̍la̍ŋ nda᷅ŋ lā chō kāa̍la̍ bɛ̍ndū, ndu̍yɛ̍ lā chō kāa̍la̍ kpāāyāla̍ bɛ̍ndū, mi̍ lā hīāū nya̍. Chi̍e̍e̍ŋ kāa̍la̍ŋ nda᷅ŋ chi̍e̍e̍ŋ bɛ̍ndo᷄ŋ pīla̍ ŋ̍ cho̍ ni̍, ŋ̄ bālāā a̍ sāāsāla̍ ka̍lā ka̍lālā bɛ̄ŋnda̍ŋ kpɔ̍kɔ̍su̍, sāāsāla̍ŋ chɔ̄nɔ᷄ŋndo̍ lɛ̄ŋ mi̍ lā kūā le̍ ha̍la̍a̍ pīla᷄ŋndo̍.

²Wānāa̍ cho̍ o̍ lɛ̄ŋnde̍ŋ nde᷅ŋ ni᷄ŋ nda̍, wānāā dīāllūŋ kālāā bɛ̄ndūa̍a̍ pīla̍ nda̍ chō ni̍, ā vīlɛ̄ī kpo̍lōŋ. Wāŋnda̍ ha̍ā o̍ pūlāle̍ A̍na̍kīle̍ŋ chōo̍ nda̍ fūla̍ ni̍, ku̍u̍ba̍nɔ̍ dīāllūŋ kālā bɛ̄ndōo̍. Lā tūēī mi̍ wāŋnda̍ dīmī a̍ wāŋnda̍ ha̍ā o̍kɔ̄ɔ̄ māā wānā o̍ wānā nɔ̍lā mā yēm nda̍ le̍.

³Kɛ̍ ndu̍yɛ̍, lā chā ni̍ŋ mī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō si᷄m nya̍ lāchī, mbō wa̍ nya̍ kɔ̄la̍ŋ lāchī mɛ̄ɛ̍ yīŋndē bɛ̄ŋnde̍ŋ lē wā nu̍a̍ā kɔ̄la̍ŋ a̍ nyɔ̄ɔ̍ŋ tɛ̄ɛ̄mbūūwo̍ yɛ̍. Ō chō nda̍ yōmɔ̄ɔ̄ nya̍ lāchī, ndu̍yɛ̍ mbō tōsa̍ mī lā tōū nda̍, mī lā tɛ̄ɛ̄mbu̍u̍ nda̍ o̍ lēpīlɛ̍ ni᷄ŋ, mɛ̄ɛ̍ o̍ chu̍e̍l nya̍ būŋgɛ̄i̍ yɛ̍.

⁴“Kɛ̍ ndu̍yɛ̍ tē Mɛ̄lɛ̄ka̍ Ya̍a̍wɛ̄ɛ̄, o̍ to̍sa̍ pɛ̍ mī lā tōū kāa̍la̍ŋ nda᷅ŋ nya̍ lāchī, lā yi̍ya᷄ŋ o̍ kɔ̄ltā nyāla̍ŋ ni᷄ŋ mī lā dīmi̍ māā chōo̍ le̍ nya̍ chō wānāā sa̍kpō māā nyɛ̄ kōŋ te̍ Mɛ̄lɛ̄ka̍ Ya̍a̍wɛ̄ɛ̄ o̍ hi᷅ŋ a̍ nya̍ o̍ lɛ̄ŋnde̍ŋ nde᷅ŋ ni᷄ŋ mbo̍ hu᷄ŋ ke᷅ nya̍ le̍ŋ te̍. Ō cho̍ le̍ sa̍kpōyɛ̍ī nyā le̍. Lē mɛ̄ɛ̍ kāa̍la̍ŋ nda᷅ŋ lā chō kāa̍la̍ dɛ̍nɛ̍ wɔ̍ɔ̍ŋ yɛ̍, nyɛ̄ kōŋ o̍ cho̍ tōsā ni̍ mī lā tōū kāa̍la̍ŋ nda᷅ŋ.

⁵Kɛ̍ ō cho̍ le̍ sa̍kpōyɛ̍ī nyā, kɛ̄lɛ̄ŋgāā mī lā wa᷄ wānāā kɛ̄ndɛ̄ le̍ o̍ cho̍ nya̍ lɛ̄ŋnde̍ŋ nde᷅ŋ kīo̍o̍ nyɛ̄ nyā le̍. Le̍ mɛ̄ɛ̍ kāa̍la̍ŋ nda᷅ŋ lā chō kāa̍la̍ dɛ̍nɛ̍ wɔ̍ɔ̍ŋ yɛ̍, nyɛ̄ kōŋ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō chō tōsā ni̍ mī lā tōū nda̍ nya̍ lāchī. Ndu̍yɛ̍ o̍ ko̍ŋ kɔ̍ɔ̍lī, būŋgɛ̄ī o̍ chu̍e̍l fi̍nyāā nyāā ma̍māa̍ E̍bīlāha᷅m a̍ Āa̍se̍, a̍ Che̍kɔ̍pū mbo̍ mēna᷄ŋ nde̍, ō yēēma̍ mbō lo̍ o̍ būŋgɛ̄ī kēŋ chōo̍.

⁶Le̍la̍ŋ lā sīna̍ ndi̍ pɛ̄ŋgu̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ lɛ̄ŋndē kɛ̄ndɛ̄le̍ŋ nde᷅ŋ kīo̍o̍ le̍ sa̍kpōyɛ̍ī nyā le̍. Nya̍ wāŋnda̍ I̍sɔ̄lūɛ̄ī, wānāā bōlīī kālāa̍ nya̍ chō ni̍.

⁷“Lā lōōnu̍ŋ nyɛ᷅ nya̍ tōsa̍ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ wo̍. Lā pu̍ɛ̍ɛ̍nu᷄ŋ a̍ mɛ̄ɛ̍ nya̍ tōsa̍ mbo̍ dūāūnu᷄ŋ tu̍mbe̍ a̍ nya̍ o̍ lɛ̄ŋndē po̍lte̍ŋ ni᷄ŋ yɛ̍ le̍. Chɔ̍ŋ a̍ mālɔ̄ɔ̄ nyāa̍ I̍chi̍pī, mbo̍ bīya᷅ŋ a̍ fūūlūū nyāa̍ na̍nu᷄ŋ o̍ fo̍ndāa̍ ho̍ō, wānāa̍ si̍mu̍l Mɛ̄lɛ̄ka̍ Ya̍a̍wɛ̄ɛ̍ wa̍ nya̍ chō ni̍.

⁸O̍ Pēmbīī Sa̍a̍nāīve̍ bɛ̍ɛ̍, mi̍ lā tōsā mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ nya̍, mbo̍ yēēmā bɛ̍ɛ̍ le̍ nya̍ tɛ̄ɛ̄mbūūwo̍ lo̍ŋ.

⁹Mɛ̄ɛ̍ ya̍ I̍ he̍l o̍ pēmbēi̍ chōo̍ le̍ kɔ̄la̍ŋ kpe̍ma̍ Mɛ̄lɛ̄ka̍ Ya̍a̍wɛ̄ɛ̄ o̍ yi̍i̍ a̍ nya̍, mbo̍ wā ō pōōnyīāā o̍ pōūtā yɛ̍ndɛ̍la̍ ti̍ɔ̍ɔ̍ŋnda̍ŋ chōo̍ wo̍ bīyɔ̄ɔ̍, mi̍ kɔ̍ chi̍ī pālɛ̍i̍ be̍le̍-hi̍ɔ̍ɔ̍lu̍ a̍ nyūmnda̍ŋ be̍le̍-hi̍ɔ̍ɔ̍lu̍ o̍ pēmbīī kēŋ chōo̍. Pālɛ̍i̍ ya̍ I̍ chi̍i̍ ke̍ŋ lo̍ŋ a̍ nyūmmā māŋ nde̍, ya̍ i̍i̍ di᷅ nyɛ̍ dīāā le̍, ya̍ i̍i̍ ko᷅l te̍.

¹⁰O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ pōūtā yɛ̍ndɛ̍la̍ ti̍ɔ̍ɔ̍ŋnda̍ŋ lā pōōnyīāā ndɔ̍ ndu̍ pi̍la̍ kɛ̍sɛ̍ kɛ̍sɔ̍ɔ̍ ō wa̍ lēchōo̍ la̍ŋ. Bōōndi̍i̍ nya̍ wa̍ ā dīīna᷄ŋ ku̍ndāa̍ o̍ pēmbīī kēŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ sūɛ̍i̍ nāa̍ nya̍ chūā mī lā tūɛ̄ī di̍ōm ndɔ̄ɔ̍ sūɛ̍i̍ o̍ yīŋnde̍ŋ ni᷄ŋ nde̍, nyɛ̄ o̍ nyɛ̄ o̍ so̍ō pāa̍le̍ le̍ŋ, ndu̍ wa̍ ō pōōnyīāā o̍ pōūtā yɛ̍ndɛ̍la̍ ti̍ɔ̍ɔ̍ŋndā lāŋ chōo̍ ni̍.

¹¹I̍ chi̍i̍ pālɛ̍i̍ be̍le̍-hi̍ɔ̍ɔ̍lu̍ a̍ nyūmnda̍ŋ be̍le̍-hi̍ɔ̍ɔ̍lu̍ o̍ pēmbīī kēŋ chōo̍. Pālɛ̍i̍ ke̍ŋ hīōūwɔ̄ɔ̍ a̍ nyūmmā māŋ, o̍ ko̍ŋ Mɛ̄lɛ̄ka̍ Ya̍a̍wɛ̄ɛ̄ o̍ ke̍ ya̍ pōūtā yɛ̍ndɛ̍la̍ ti̍ɔ̍ɔ̍ŋnda̍ŋ nda᷅ŋ ni̍, lā kpe̍ma̍ o̍ yi̍i̍ a̍ nya̍ wo̍ ō wa̍ ō pōōnyīāā lēchōo̍ la̍ŋ.

¹²“Mī Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl la̍ āā, ‘Chɔ̍ŋ mā tōl pēmbēi̍ chɔ̍chɔ̍, Mūu̍sē. Wānāā nūm a̍ ŋ̄ sōli̍ I̍chi̍pī ma̍ hūŋ a̍ nda̍ wa̍, ā tōsa̍ yɔ̄ŋ wɔ̄ɔ̍ŋndo̍, ā chīi̍ bɛ̍ɛ̍ fa̍ŋa᷄ŋ o̍ nɛ̄i̍ ya̍ I̍ chɔ̍m nda̍ le̍ mā wa̍ lēchōo̍ wo̍ chōo̍, o̍ chɔ̍chɔ̍ bɛ̍ndū ni᷄ŋ. Ā lo̍ o̍ ko̍ŋ ma̍ tōōsīāā nyɔ̄ɔ̍ a̍ ko̍o̍līi̍ŋ te̍e̍ŋgīa̍ŋ ma̍ wa̍ ndu̍ sōōlūūwo̍ māā mɛ̄lɛ̄ka̍ ndā.’

¹³“O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, ‘I̍ mɛ̍ɛ̍nda̍ŋ wa᷅ŋnda̍ ha̍ā, mi̍ sa̍a̍lu᷄ŋ māā wānāā bōlīī kālāa̍ nda̍ chō ni̍.

¹⁴Le̍la̍ŋ so̍li̍ na̍a̍ bāla̍ŋ tɛ̄ɛ̄ŋ na̍a̍ nda̍ā I̍ di̍ū nda̍, mī ba̍su̍ nda̍ tɛ̍ɛ̍ o̍ chi̍e̍ēŋndo̍ chōo̍, mī to̍sa̍ wānā o̍ wānā yi̍yāŋ ndɛ̍ bɛ̍ɛ̍ a̍ nda̍ o̍kɔ̄ɔ̄ le̍. O̍ ko̍ŋ kɔ̍ɔ̍lī, I̍ nɔ̍lā mī to̍sa̍ mī kāa̍le̍ che᷅le̍ŋ lē fūla̍ o̍ nūm ni̍ŋ, kāa̍le̍ wa᷅ le̍ bɛ̍ndū, ndu̍yɛ̍ mī lē nɔ̄ kpāāyāa̍ mbō hīōū nda̍ le̍ŋ.’

¹⁵“Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, o̍ di̍mu̍l la̍ sūɛ̍i̍ he̍ī, mi̍ ma̍lnu᷄ŋ mi̍ tu̍āl pēmbēi̍, yīŋnde̍ŋ lē wa̍ sānde̍i̍ o̍ pēmbēi̍ chōo̍ le̍nde̍ kpe̍e̍kpe̍i̍. Pōūtā yɛ̍ndɛ̍la̍ ti̍ɔ̍ɔ̍ŋndā Mɛ̄lɛ̄ka̍ Ya̍a̍wɛ̄ɛ̄ o̍ po̍o̍nyi̍a̍a̍ kpe̍ma̍ o̍ yi̍i̍ a̍ nya̍ wo̍ lēchōo̍ la̍ŋ lā wa̍ ya̍ o̍ lābā vēllāa̍ vēllē.

¹⁶Mɛ̄ɛ̍ ya̍ I̍ to᷅l pēmbēi̍, mi̍ mɛ̍ɛ̍nda᷄ŋ nyɛ᷅ nya̍ wa̍ chōo̍ wo̍, mi̍ cha᷅ māā nya̍ wāŋnda̍ I̍sɔ̄lūɛ̄ī, lā tōsa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, le̍ nāūwo̍ tūūlāa̍ a̍ ko̍o̍līi̍ te̍e̍ŋgīɛ̍i̍ mī lā sōōlu̍u̍ ndu̍ māā mɛ̄lɛ̄ka̍ nyā. Nɛ̄i̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍m nya̍ le̍ mī lā wa̍ lēchōo̍ wo̍, mi̍ lā kēlēŋā bɛ̍ɛ̍ fa̍ŋa᷄ŋ o̍ nɛ̄ī ko̍ŋ chōo̍ o̍ chɔ̍chɔ̍ bɛ̍ndū ni᷄ŋ.

¹⁷O̍ ko̍ŋ, nya̍ o̍ hɔ̄l lo̍ŋ, mi̍ vi̍ɔ̄l pōūtā yɛ̍ndɛ̍la̍ ti̍ɔ̍ɔ̍ŋndā lāŋ lɛ̄ŋ ndo̍ŋ, mi̍ lā pēsī kpo̍u̍.

¹⁸O̍ ko̍ŋ kɔ̍ɔ̍lī, mi̍ hi̍nī vɛ̄lɛ̄ lɛ̄ŋ ndo̍ŋ sa̍kpō o̍ dēmbōo̍ chōo̍ Mɛ̍lɛ̄ka̍ Ya̍a̍wɛ̄ɛ̍ lāchī, mi̍ wa᷅ ndu̍ pīɛ̄īyo̍ le̍ nya̍, mɛ̄ɛ̍ ya̍ I̍ to̍sa̍ o̍ tāse̍la̍ ndɔ̄ɔ̍ yɛ̍. Le̍ pālɛ̍i̍ be̍le̍-hi̍ɔ̍ɔ̍lu̍ a̍ nyūmnda̍ŋ be̍le̍-hi̍ɔ̍ɔ̍lu̍ I̍ cho̍ ndu̍ īhīni̍ la̍chi̍ lo̍ŋ, I̍ di᷅ nyɛ̍ dīāā le̍, I̍ ko᷅l te̍. Sīōōŋnde̍ wa̍ ya̍, māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ tu̍mbe̍ dɔ̍u̍nɔ᷄ŋ o̍ ka̍lā ka̍lā a̍ nya̍ ndu̍yɛ̍ a̍ E̍lɔ̄ŋ, mbō tɛ̄ɛ̄mbu̍u̍ nya̍, fo̍ndōle̍, le̍ dɛ̍nɛ̍ wɔ̍ɔ̍ŋ bɛ̄ndū nya̍ tōsa̍ a̍ ndu̍ wo̍, ndu̍ yɔ̍nūŋ ni̍ māā nyɛ̍ bɛ̍nda̍ ndu̍ o̍ hɔ̄l te̍ wo̍ tōsāa̍, ō to̍sā mbō dɔ̄ɔ̄nu᷄ŋ tu̍mbe̍ a̍ nya̍ wo̍. Mi̍ pi̍ɛ̍ī Mɛ̄lɛ̄ka̍ le̍ nya̍ ndu̍yɛ̍ a̍ le̍ E̍lɔ̄ŋ māā pāāndū, ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍ɛ̍ī pīɛ̄īlē nīle̍ŋ, mbo̍ mūlī ya̍ dīōm.

¹⁹

²⁰

²¹O̍ ko̍ŋ kɔ̍ɔ̍lī, mi̍ chu̍ā nāū fɔ̍ŋndɔ̍ nya̍ tūūla̍ ko̍ŋ māā mɛ̄lɛ̄ka̍ nyā mbo̍ tōsā mi̍ lā sīmnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄llo̍, mi̍ ma᷅l ndu̍ o̍ yīŋ. Mi̍ pe̍sī pēsī ndu̍, ndu̍yɛ̍ mi̍ chu̍ī ndu̍ mu̍lu̍lu̍ māā lāpūl. O̍ ko̍ŋ kɔ̍ɔ̍lī, mi̍ chu̍ā nyɛ̄ ya̍ I̍ chu̍i̍ ko̍ŋ māā lāpūl lo̍, mi̍ kɔ̍ vi̍o̍ū o̍ pēē pɔ̍mbɔ̍ ndu̍ o̍o̍ cha᷅ŋ o̍ pēmbēi̍ yo̍.

²²“Ndu̍yɛ̍ o̍ ko̍ŋ kɔ̍ɔ̍lī, le̍nde̍ ko̍ni̍ nya̍ tōsa̍ a̍ Mɛ̄lɛ̄ka̍ Ya̍a̍wɛ̄ɛ̄, Ta̍bɛ̍lūā, a̍ Ma̍sāā, a̍ Kībīlɔ̄tī Hāta̍a̍vāā ni̍. Lo̍ŋ bɛ̍ɛ̍ mi̍ lā tōsā mbo̍ dūāūnu᷄ŋ tu̍mbe̍ a̍ nya̍.

²³O̍ ko̍ŋ kɔ̍ɔ̍lī, bōōndi̍i̍ nya̍ wa̍ Ka̍dɛ̍sī Ba̍a̍nīāā ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl nya̍ le̍ mī lā kūɛ̄ mī lā kɔ̍ bi̍ī lɛ̄ŋndē o̍ cho̍ nya̍ kīo̍o̍ le̍ŋ. Kɛ̍ lo̍ŋ bɛ̍ɛ̍ mi̍ lā kɛ̄ɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ dīōm. Lā nɔ̄la̍ mī lā dɔ̄ū lāāla᷄ŋ nyāa̍ o̍ ndu̍ ni̍ŋ te̍, kɛ̄lɛ̄ŋgāāle̍ ni᷅ŋ te̍, mī lā tūsi̍ŋ o̍ dīōm ndɔ̄ɔ̍ bɛ̄ŋgu̍.

²⁴Wāŋnda̍ I̍sɔ̄lūɛ̄ī, chɔ̍ŋ a̍ te̍le̍ŋ ya̍ I̍ si̍na̍ nya̍ wo̍, mbo̍ bīī a̍ pāa̍le̍ hāūle̍ŋ nde᷅ŋ, I̍ si̍nā nya̍ māā wānāa̍ si̍mu̍l Mɛ̄lɛ̄ka̍ Ya̍a̍wɛ̄ɛ̍ wa̍ nya̍ chō ni̍.

²⁵“Mɛ̄ɛ̍ nya̍ tōsa̍ yɔ̄ŋ wɔ̄ɔ̍ŋ kōŋ a̍ Mɛ̄lɛ̄ka̍ Ya̍a̍wɛ̄ɛ̄, mi̍ hi̍nī lɛ̄ŋ sa̍kpō o̍ dēmbōo̍ chōo̍ Mɛ̍lɛ̄ka̍ lāchī le̍ mī pi̍ɛ̍i̍ ndu̍ le̍ nya̍, fo̍ndōle̍, mi̍ si̍nā māā Mɛ̄lɛ̄ka̍ ndu̍ o̍o̍ chi̍i̍ ni᷅ŋ kɛ̄ɛ̄sīāā le̍ nya̍ dīūwo̍.

²⁶Mi̍ pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄ a̍a̍, ‘O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, tɛ̍ɛ̍mbūū wānāā nūmnda̍ ha̍ā le̍. Nyɛ̄m nu᷄m ŋ̄ki̍ɔ̍ɔ̍ŋ wāŋnda̍ ha̍ā ā chō ni̍, wānāā ŋ̄ bāŋa̍ ha̍ā o̍ chɛ̄le̍ŋ ni᷄ŋ I̍chi̍pī ma̍ sōlī nda̍ lo̍ŋ a̍ kpāāyā nu̍m bɛ̄ndōo̍, ndu̍yɛ̍ a̍ dīāllūŋ nūm ka̍la᷄ŋ nda̍.

²⁷Lo̍o̍nu̍ŋ a̍ bu̍ɛ̍i̍yāā nūmnda̍ E̍bīlāha᷅m, a̍ Āa̍se̍, a̍ Che̍kɔ̍pū. Pu̍u̍lu᷄ŋ wa᷅ŋnda̍ ha̍ā le̍ bōllē ndāle̍ ka̍lāle̍ŋ, a̍ dɛ̍nɛ̍ ndā wɔ̍ɔ̍ŋndo̍, ndu̍yɛ̍ a̍ yɔ̄ŋndā ndāla̍ wɔ̍ɔ̍ŋnda̍ŋ te̍.

²⁸Tē a̍ tɛ̍ɛ̍mbu̍u̍ wāŋnda̍ ha̍ā pɛ̍, wāŋnda̍ I̍chi̍pī a̍ cho̍ dīmī āā, “Mbɔ̄ būmbāa̍ Mɛ̍lɛ̄ka̍ Ya̍a̍wɛ̄ɛ̄ o̍ bu̍mba̍ le̍ kɔ̄la̍ŋ a̍ wānāā ndūa̍a̍ o̍ lɛ̄ŋndē o̍ chu̍e̍l nda̍ būŋgɛ̄i̍ le̍ŋ ni᷄ŋ ni̍, ɔ̄ɔ̄ yɛ̄le̍ŋ o̍ tu̍l nda̍ ni̍, nyɛ̄ kōŋ o̍ ke̍i̍ a̍ nda̍ o̍ po̍li̍ ko̍ŋ ni᷄ŋ ni̍, le̍ mbō kɔ̍ di̍ū nda̍.”

²⁹Ndu̍yɛ̍ wānāā nūmnda̍ wāŋnda̍ ha̍ā ā chō ni̍, Mɛ̄lɛ̄ka̍ Ya̍a̍wɛ̄ɛ̄, nyɛ̄m nu̍m ŋ̄ki̍ɔ̍ŋ. Nu᷄m so̍li̍ nda̍ o̍ chɛ̄le̍ŋ ni᷄ŋ I̍chi̍pī a̍ kpāāyā nu̍m bɛ̄ndōo̍, ndu̍yɛ̍ a̍ dīāllūŋ nūm ka̍la᷄ŋ ni̍.’ ”