Read Southern Kisi Chɔ᷄ŋ 12 Bible Online

Chɔ᷄ŋ 12 - Southern Kisi bible

Chɔ᷄ŋ 12

¹Ndu̍ o̍o̍ lo̍ ni᷅ŋ pālɛ̍i̍ ī ŋɔ᷄mpu᷅m, le̍ mī bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ ndu̍ o̍o̍ fu̍u̍lu̍u̍. Mi̍ Chi̍i̍sū cha̍ŋ mbo̍ kūā Bɛ̍ta̍nī chi̍e̍e̍. La̍sa̍lɔ̄ɔ̄ ō Chi̍i̍sū mi̍ŋgi̍ yōōmū wo̍, lo̍ŋ o̍ wa̍ īchāli̍ ni̍.

²Ma̍ tōōsīāl Chi̍i̍su̍ nyɛ̄ dīa̍a̍. Ma̍tā wa̍ nda̍ nyɛ̄ dīa̍a̍ pīɔ̄ūwo̍ ni̍. Ndu̍yɛ̍, La̍sa̍lɔ̄ɔ̄ wa̍ā nda̍ wa̍ īchāli̍ nyɛ̍ dīa̍a̍ ho̍ō dīo̍o̍ nda̍ Chi̍i̍sū wa̍ā ni̍.

³O̍ ko̍ŋ, mi̍ Mēēle̍ chu̍ā sānīo̍o̍ a̍ si̍ɛ̍ndīi̍ma̍ ba̍ā kālā mā pūm lēni᷄ŋ. Tɔ̄lɔ̄ɔ̍ ō pūm dīōla̍ŋ āā, na̍ād, a̍ ndu̍ nda̍ a̍a̍ to̍o̍si̍a̍a̍ si̍ɛ̍ndīi̍ya̍ŋ ma᷅ŋ ni̍. Mā kɛ̄ndɛ̄ wa̍la̍ŋ. Mɛ̄ɛ̍ o̍ chu̍a̍ ma̍ŋ, mbo̍ tālā ma̍ŋ Chi̍i̍sū o̍ ŋ̄pēlū wu̍ū. Mbo̍ mūli᷄ŋ mbo̍ wɔ̄ɔ̄sūū ndu̍ pēlo᷄ŋ a̍ yīīŋnde̍ ndu̍ o̍ lēbōl. Mi̍ chūŋ kɛ̄ndɔ̄ɔ̍ tīū chīɛ̄ī ni̍ŋ si̍lɔ̍.

⁴Mi̍ bu̍ɛ̍i̍yāa̍ Chi̍i̍sūa̍a̍ ō pīlɔ̍ɔ̄ dīōla̍ŋ āā, Chu̍dā Īsīka̍a̍līɔ̄ɔ̄, o̍ wa̍ Chi̍i̍su̍ hūnɔ̄ɔ̄ pīsī wāŋnda̍ o̍ bā wo̍, mbo̍ lō o̍ ko̍ŋ mbo̍ dīmī āā,

⁵“Si̍ɛ̍ndīi̍ya̍ŋ ma᷅ŋ ma̍ a̍a̍ pi̍sīŋ le̍ nyɛ̄ sɔ̄lāā ba̍nā ba̍na̍ mī wānā ndu̍ o̍o̍ ke̍ wānāā tāmbɛ̍i̍ya̍ ka̍ni̍ŋ mu̍ŋ.”

⁶Kɛ̍ ndu̍yɛ̍, nyɛ̄ Chu̍dā di̍mi̍ ko̍ŋ ndo̍ ō dīmi̍ ndu̍ le̍ būūla᷄ŋ wānāā tāmbɛ̍i̍ le̍. Vīīnɔ̄ɔ̍ o̍ wa̍ ni̍. Ndu̍yɛ̍, ndu̍ wa̍ wānā kɛ̍sīāā ŋ̄ka̍ni̍o̍o̍ ni̍. Pɛ̄ŋgu̍ o̍ pɛ̍ŋgu̍ ō wa̍ nyɛ̄ sɔ̄lāa̍ ho̍ō dīo̍o̍ lēchōo̍. Si̍ɛ̍ndīi̍ya̍ŋ ma᷅ŋ ba̍ā ndɔ̄ɔ̍, ndu̍ o̍o̍ wa᷅ le̍ pāāwā wa̍li̍ wɔ̄sī pīlɛ̍ kpu̍lu̍ku̍u̍ mɛ̄ɛ̍ wa̍li̍ īchīɔ̍ɔ̍ cho̍ nu̍a̍ā yɛ̍.

⁷Kɛ̍, mi̍ Chi̍i̍sū di̍mī āā, “Lā pa̍lā chūa̍a̍ ho̍ō le̍. Ō kɛ̄si̍ mākɛ̄sīāā si̍ɛ̍ndīi̍ma̍ ma̍ŋ le̍ pāa̍le̍ nda̍ chɔ̄ ni̍ŋ ya̍ le̍ŋ.

⁸Wānāā tāmbɛ̍i̍ya̍, nda̍ nda̍ chō nya̍ tɛ̄ɛ̄ŋ te̍le̍ŋ o̍ te̍le̍ŋ. Kɛ̍, ya̍ ya̍ I̍ ve᷅ ni̍ŋ la̍tu̍lu̍ a̍ nya̍ le̍ te̍le̍ŋ o̍ te̍le̍ŋ te̍.”

⁹Mi̍ Chu̍ūwa̍ fāŋga̍ bɛ̍ndōo̍ ā tūɛ̄ī māā Chi̍i̍sū cho̍ Bɛ̍ta̍nī. Tūēīyɔ̄ɔ̍ le̍nde̍, ma̍ kūā lo̍ŋ. Kɛ̍, ō ve̍ ko̍ le̍ Chi̍i̍sū le̍ nda̍ kūɛ̄ lo̍ŋ te̍. Nda̍ a̍a̍ ku̍ɛ̄ vɛ̄lɛ̄ le̍ mī nda̍ a̍a̍ che᷅ La̍sa̍lɔ̄ɔ̄ ō Chi̍i̍sū mi̍ŋgi̍ yōōmū wo̍.

¹⁰O̍ ko̍ŋ, mi̍ wānāā bɛ̄ndūāā sōlīāā lāsa̍lāa̍ ā kɛ̄ɛ̄sīāā le̍ mī nda̍ a̍a̍ di̍ī La̍sa̍lɔ̄ɔ̄ bɛ̍ɛ̍.

¹¹Le̍ sa̍bū nda̍ a̍a̍ kɛ̍ɛ̍si̍a̍a̍ he̍ī yo̍ cho̍ ni̍, māā sūɛ̍i̍ yɔ̍nu̍ŋ a̍ La̍sa̍lɔ̄ɔ̄ ve̍, māā ke̍ŋ to̍sa̍ ni̍ mi̍ Chu̍ūwa̍ ta̍u̍ a̍ wa᷅ nda̍ mālɔ̄ɔ̍ ma̍ wā tīīnda᷄ŋndo̍ dɔ̄wɔ̄ɔ̍ o̍ Chi̍i̍sū ni̍ŋ.

¹²Dīi̍mā ndɔ̄ɔ̍, mi̍ fāŋgā bɛ̍ndu̍ hi᷅ŋ o̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ wo̍ tūɛ̄ī māā Chi̍i̍sū cho̍ hūnɔ̄ɔ̍ Chūlu̍sɛ̄lɛ̄m.

¹³Tūēīyɔ̄ɔ̍ le̍nde̍, ma̍ bīī sīɔ̍ɔ̍la̍ wāūla̍ŋ o̍ lābā ma̍ kūā ndu̍ dēmūl. Ā wa̍ dēŋīo̍o̍ mā dīmī āā, “Lā ŋ̄ sāŋga̍la᷅ŋ Mɛ̄lɛ̄ka̍. Wāna̍ hi᷅ŋ ho̍ō sɔ̍ŋgɔ̍ Māsānɔ̄ɔ̍ Mɛ̄lɛ̄ka̍a̍ wo̍, o̍ cho̍ ho̍ō māsā bɛ̍ndōo̍ le̍ I̍sɔ̄lūɛ̄ī yo̍, Mɛ̄lɛ̄ka̍ dɔ̄ū ndu̍ sa̍lā bɔ̄ɔ̍.”

¹⁴Mi̍ Chi̍i̍sū sɔ̍lā sōfɛ̍lɛ̍ fɔ̍ŋndɔ̍ɔ̍ mbo̍ chāl lēchōo̍. O̍ he̍ī ni᷄ŋ, mi̍ ī yɔ̄nu᷄ŋ mɛ̄ɛ̍ Yāu̍ Mɛ̄lɛ̄ka̍a̍ ō dīmi̍ yɛ̍.

¹⁵Kāni̍, Yāu̍ Mɛ̄lɛ̄ka̍ dīmī āā, “Lā wo᷅ nyɛ̄ o̍ nyɛ̄ le̍, wāŋnda̍ Sa̍a̍yɔ̄ŋ chi̍e̍e̍. Lā tōfa̍ wɔ̍, māsa̍ nyāa̍ chō hūnɔ̄ɔ̍. Ō chō hūnɔ̄ɔ̍ o̍ sōfɛ̍lɛ̍ fɔ̍ŋndɔ̍ɔ̍ chōo̍.”

¹⁶Bōōndi̍i̍ sɔ̄ɔ̍ŋ mu᷅ŋ ŋ̄ yɔ̄nu̍ŋ nde̍, bu̍ɛ̍i̍yāa̍ Chi̍i̍sūa̍a̍ ā sīna̍ mu̍ŋ pɛ̄ŋgu̍ le̍. Kɛ̍, mɛ̄ɛ̍ Mɛ̄lɛ̄ka̍ tōsa̍ mi̍ Chi̍i̍sū lu̍ɛ̍ī o̍ nāŋɔ̄ɔ̄ ndɔ̍ kɔ̄ndɔ̄fi̍llo̍ ni᷄ŋ, ma̍ lōōnu᷄ŋ māā Yāu̍ Mɛ̄lɛ̄ka̍a̍ dīmi̍ sɔ̄ɔ̍ŋ mu᷅ŋ a̍ ndu̍ o̍kɔ̄ɔ̄, ndu̍yɛ̍, māā mi̍ wāŋnda̍ tōsā le̍nde̍ a̍ ndu̍.

¹⁷Bōōndi̍i̍ Chi̍i̍sū ve̍e̍lu̍ La̍sa̍lɔ̄ɔ̄ le̍ mbō fūla̍ o̍ sɛ̄īyo̍ ni᷄ŋ nde̍, ndu̍yɛ̍, mbo̍ mīŋgī ndu̍ yōōmū ve̍, mi̍ wānāa̍ wa̍ o̍ hɔ̄lndɔ̄ ma̍ chā wa̍ ā kɔ̍ di̍mūl wāŋnda̍ a̍ ndi̍ o̍kɔ̄ɔ̄.

¹⁸Mɛ̄ɛ̍ tūēīyɔ̄ɔ̄ nda̍ tūēī ko̍ŋ a̍ kɔ̄ndɔ̄fi̍li̍ o̍ to̍sa̍ ho̍ō wo̍ o̍kɔ̄ɔ̄ wo̍, o̍ ko̍ŋ, fāŋgā bɛ̍ndōo̍ kūɛ̄ ndu̍ dēmūl ni̍.

¹⁹O̍ ko̍ŋ, mi̍ ku̍ndā Fālīsi̍īya̍ dīmu̍la᷅ŋ āā, “Nyɛ̄ o̍ nyɛ̄ fe̍e̍ na̍a̍ ŋ̄ kɛ̄ɛ̄si̍a̍a̍ ŋ̄ būmba̍. Chi̍e̍ēŋndo̍ kpo̍u̍ ā chō ndu̍ tōlɔ̄ɔ̍ kɔ̄ɔ̄lī.”

²⁰Bōōndi̍i̍ wāŋnda̍ kūɛ̄ Chūlu̍sɛ̄lɛ̄m o̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ le̍ Mɛ̄lɛ̄ka̍ pīɛ̄īyo̍ ve̍, Kīli̍kīi̍ya̍ ā pūm bɛ̍ɛ̍ ā wa̍ nda̍ tɛ̄ɛ̄ŋ.

²¹Mi̍ Kīli̍kīi̍ya̍ ha̍ā kūā nāa̍ po̍ pi᷅lɛ̍ chūā dīōla̍ŋ āā, Fi̍li̍pī, wānā wa̍ā Bɛ̄tīsa̍i̍dā chi̍e̍e̍ o̍ lɛ̄ŋndē Kāli̍līle̍ŋ ni᷄ŋ. Ma̍ kɔ̍ dīmūl ndu̍ āā, “Fāllo̍, ŋ̄ hɛ̄na̍ŋ mī ŋ̄ chē Chi̍i̍sū.”

²²Mi̍ Fi̍li̍pī ku̍ā mbo̍ kɔ̍ di̍mūl A̍ndūlū. O̍ ko̍ŋ kɔ̍ɔ̍lī, ma̍ kūā nda̍ ŋi̍ɔ̍ɔ̍ŋ ma̍ kɔ̍ di̍mūl Chi̍i̍sū.

²³Mi̍ Chi̍i̍sū lo᷅ o̍ ko̍ŋ mbo̍ mūlūl nda̍ āā, “Te̍le̍ŋndo̍ ō fūūlu̍u̍ le̍ mī Mɛ̄lɛ̄ka̍ chɔ᷄m mɛ̄ɛ̍ wāna̍ nda̍ vēēlū āā, Po̍ Wa̍nā Pɔ̍nɔ̍ɔ̍ wo̍ chō wāna̍ kɔ̄ndɔ̄fi̍li̍ yɛ̍.

²⁴Mī di̍mu̍l nya̍ tōnya̍a̍ wa̍la̍ŋ, tē ō ve̍ mā wōu̍ ku̍lo̍o̍ o̍ pūūlōo̍ bɛ̄ŋgu̍, o̍ ko̍ŋ kɔ̍ɔ̍lī mbō vī le̍, mɛ̄ɛ̍ ndu̍ pīlɛ̍ o̍ wa᷅ ni̍. Kɛ̍, tē ō vī pɛ̍, ō chō wūlɔ̄ɔ̄ mbō hu᷄ŋ to̍sā ku̍lu̍la̍ŋ ta̍u̍.

²⁵Wānā o̍ wāna̍ ka̍a̍la̍ yōōmū ndɔ̄ɔ̍ pɛ̍, mɛ̄ɛ̍ ō chō yōōmū kpe̍e̍kpe̍i̍yo̍ fūlā. Ndu̍yɛ̍, wānā o̍ wāna̍ tu̍l yōōmū ndɔ̄ɔ̍ ho̍ō chi̍e̍ēŋ na̍nu᷄ŋ le̍yɛ̍ pɛ̍, mɛ̄ɛ̍ wānā ko̍ŋ chō hūnɔ̄ɔ̄ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lā.

²⁶Wānā o̍ wāna̍ hɛ̄na̍ŋ mbō tōsa̍ wa̍llo̍ le̍ ya̍ pɛ̍, mɛ̄ɛ̍ mbō tōl la̍ kɔ̄ɔ̄lī. Nāa̍ ya̍ I̍ chō wā wa̍, lo̍ŋ bu̍ɛ̍i̍yāā nīa̍a̍ bɛ̍ɛ̍ a̍ cho̍ wā ni̍. Ndu̍yɛ̍, wānā o̍ wāna̍ to̍sa̍ wa̍llo̍ le̍ ya̍ pɛ̍, fi̍nyā nūu̍ chō wānā ko̍ŋ bɛ̄ɛ̄le̍ŋ kē.”

²⁷Mi̍ Chi̍i̍sū di̍mī āā, “Mɔ̍nɛ̍i̍ chō o̍ kɔ̄l nūu̍ ni᷄ŋ pɛ̍ŋgo̍o̍ ho̍ō. I̍ si̍nā bɛ̍ɛ̍ nyɛ᷅ ya̍ I̍ di̍mī le̍. Bāā I̍ di̍mi̍ nu̍a̍ā āā, ‘Kɛ̄kɛ̍, chɛ᷅l mī I̍ ke̍e̍ku̍ o̍ nyɛ̄ pālāa̍ ho̍ō ni᷄ŋ te̍?’ Kɛ̍ ndu̍yɛ̍, le̍ sa̍bōo̍ ho̍ō ya̍ I̍ hi᷅ŋ o̍ chi̍e̍ēŋndo̍ chōo̍ ni̍, le̍ mī I̍ ke̍e̍ku̍ o̍ nyɛ̄ pālāa̍ ho̍ō ni᷄ŋ.

²⁸Kɛ̄kɛ̍, chɔ̍m wa᷅ŋnda̍ a̍ mɛ̄ɛ̍ ŋ̄ chō wāna̍ kɔ̄ndɔ̄fi̍li̍ yɛ̍.” O̍ ko̍ŋ, mi̍ dīōmndo̍ sūāā ɛ̄chɛ̍nɛ̄. Mbo̍ dīmī āā, “I̍ chɔ̍m mɛ̄ɛ̍ ya̍ I̍ cho̍ wāna̍ kɔ̄ndɔ̄fi̍li̍ yɛ̍. Ndu̍yɛ̍, I̍ cho̍ vɛ̄lɛ̄ chɔ̄ɔ̄lū chɔ̄m.”

²⁹Mi̍ fāŋga̍ wa̍ īsīsi̍ lo̍ŋ ndo̍ tūɛ̄ī dīōm kōŋ. Ma̍ dīmī āā, “Ta᷅ŋnda̍ŋ ma̍ dēŋī ni̍.” Mi̍ ā pūm ā dīmī āā, “Ki̍i̍la̍nɔ̍ Mɛ̄lɛ̄ka̍a̍ so̍ō nāa̍ ndu̍ chu̍a̍ ni̍.”

³⁰Kɛ̍, mi̍ Chi̍i̍sū di̍mūl nda̍ āā, “Ō cho̍ le̍ ya̍ le̍ dīōmnda̍ŋ nda᷅ŋ lā sōōnu᷄ŋ te̍. Le̍ mālā nyāa̍ la̍ so̍o̍nu᷄ŋ ni̍.

³¹Bōōnde̍i̍ he̍ī Mɛ̄lɛ̄ka̍ chō kɔ̍ɔ̍sɔ̍ a̍ chi̍e̍ēŋndo̍ ni̍. Ndu̍yɛ̍, bōōnde̍i̍ he̍ī wāna̍ cho̍ māsāa̍ le̍ chi̍e̍ēŋndo̍ ho̍ō wo̍ chō pīɔ̄lɔ̄ɔ̍ sɔ̄lā o̍ lēmāsā ni̍.

³²Tē ā ba᷄ŋ ya̍ pɛ̍ o̍ yɔ̄mndo̍ chōo̍, mī I̍ fa̍ŋa̍ŋ o̍ chi̍e̍ēŋndo̍ chōo̍ pɛ̍, I̍ cho̍ tōsā wāŋnda̍ kpo̍u̍ mā hīŋ nāa̍ ya̍ chu̍a̍.”

³³Chi̍i̍sū wa̍ māwāā dīōmnda̍ŋ nda᷅ŋ dīmīo̍o̍ a̍ mɛ̄ɛ̍ ndu̍ o̍o̍ wa̍ hūnɔ̄ɔ̄ pīɔ̍mndo̍ sɔ̄lā yɛ̍.

³⁴Mi̍ fāŋgāa̍ dīmī āā, “Yāu̍ Mɛ̄lɛ̄ka̍a̍ dīmi̍ māā Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ chō wā yōōmū le̍ fɛ̍ɛ̍ŋ a̍ fɛ̍ɛ̍ŋ. Kɛ̍, vɛ᷅ ni᷅ŋ ma̍ dīmī māā mɛ̄ɛ̍ mā ba᷄ŋ wāna̍ nda̍ vēēlū āā, Po̍ Wa̍nā Pɔ̍nɔ̍ɔ̍ wo̍ o̍ yɔ̄mndo̍ chōo̍? Nɛ̄ɛ̍nɛ̍ cho̍ yɛ̄ Po̍ Wa̍nā Pɔ̍nɔ̍ɔ̍ ho̍ō?”

³⁵Mi̍ Chi̍i̍sū mu̍lī āā, “Nyɛ̄ wa̍wo̍ŋndo̍ chō chɔ̄ɔ̄lū wā nya̍ tɛ̄ɛ̄ŋ le̍ te̍le̍ŋ ti̍ŋ. Lā hīo̍u̍ la̍chi̍ a̍ kɔ̄la̍ŋ lɔ̍ɔ̍ nyɛ̄ wa̍wo̍ŋndo̍ chō nya̍ tɛ̄ɛ̄ŋ ndo̍, yɔ̄ŋi̍ nyūmnda̍ŋ mā bīi̍ nya̍. Kāni̍ fo̍ndōle̍, wāna̍ ku̍ā ho̍ō o̍ nyūmnda̍ŋ ni᷄ŋ ndo̍, ō si̍nā na̍a̍ o̍ wa᷅ kɔ᷅la̍ŋ nda̍ le̍.

³⁶Lā dɔ̄u̍ ti̍i̍nda᷄ŋ nyāa̍ o̍ nyɛ̄ wa̍wo̍ŋndo̍ ni᷄ŋ bōōndi̍i̍ o̍ cho̍ nya̍ tɛ̄ɛ̄ŋ nde̍, le̍ mī lā sīmnu᷄ŋ wa̍nāā wāā o̍ nyɛ̄ wa̍wo̍ŋ ni̍ŋ.” Mɛ̄ɛ̍ Chi̍i̍sū so̍ō dīōmnda̍ŋ nda᷅ŋ, mbo̍ fa̍ŋa᷄ŋ lo̍ŋ mbo̍ kɔ̍ vi̍o̍ŋnu᷄ŋ.

³⁷Mi̍ chē bɛ̍ɛ̍ mbo̍ tōsā wa̍lta̍ kɔ̄ndɔ̄fi̍lta̍ŋ nda᷅ŋ kpo̍u̍ nda̍ o̍ hɔ̄l kpe̍nde̍ke̍le̍ ni̍, kɛ̍, ā chɛ᷄l mā dɔ̄ū tīīnda᷄ŋndo̍ o̍ ndu̍ ni̍ŋ te̍.

³⁸He̍ī yɔ̄nu̍ŋ le̍ mī nyɛ̄ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā o̍ di̍mi̍ wo̍ ō yɔ̄nu̍ŋ. Mbo̍ dīmī āā, “Māsānɔ̄ɔ̍ Mɛ̄lɛ̄ka̍, ō nɛ̄ɛ̍nɛ̍ la̍a̍lāŋ yɛ̍ ni̍ŋ yo̍o̍ŋgū na̍a̍ ŋ̄ dīmi̍ wo̍? Ō nɛ̄ɛ̍nɛ̍ Māsānɔ̄ɔ̍ Mɛ̄lɛ̄ka̍ ō chɔ᷄m yɛ̄ kpāāya̍ ndɔ̄ɔ̍?”

³⁹Mi̍ Āīsa̍yā di̍mī vɛ̄lɛ̄ āā, “Mɛ̄lɛ̄ka̍ sūūmi̍a̍a̍ nda̍ yɔ̄ŋi̍ nda̍ chɔ̍. Ndu̍yɛ̍, ō kīnda̍ nda̍ hūlla̍ŋ yɔ̍ŋi̍ nda̍ sīna̍ pɛ̍ŋgu̍. Mi̍ Mɛ̄lɛ̄ka̍ dīmī āā, ‘I̍ to̍sa̍ he̍ī yɔ̄ŋi̍ nda̍ hu᷄ŋ nāa̍ ya̍ chu̍a̍ le̍ mī si̍ŋgi̍ nda̍.’ ” Le̍ sa̍bōo̍ ho̍ō nda̍ nɔ̄la̍ mā lāāla̍ŋ te̍ ni̍.

⁴⁰

⁴¹A̍ Chi̍i̍sū o̍kɔ̄ɔ̄ Āīsa̍yā so̍ō dīōmnda̍ŋ nda᷅ŋ ni̍. Kāni̍ fu̍u̍le̍, chɔ̄ɔ̍ ndu̍ o̍o̍ che᷅ Chi̍i̍sū o̍ nāŋɔ̄ɔ̄ ndɔ̍ kɔ̄ndɔ̄fi̍llo̍ ni᷄ŋ ni̍.

⁴²O̍ sa̍na̍a̍ īsɔ̄ɔ̍ ni᷄ŋ, wānāā bɛ̄ndūāā Chu̍ūwa̍ ta̍u̍ nda̍ a̍a̍ dɔ̍ū tīīnda᷄ŋndo̍ o̍ Chi̍i̍sū ni̍ŋ. Kɛ̍, nda̍ a̍a̍ sɔ̍lɔ̄lāŋ wa᷅ŋnda̍ o̍ hɔ̄l le̍nde̍ le̍, kāni̍ fo̍ndōle̍, ā wa̍ wōo̍ yɔ̄ŋi̍ ku̍ndā Fālīsi̍īya̍ sōli̍ nda̍ o̍ chīɛ̄ī nda̍ pīɛ̄ī Mɛ̍lɛ̄ka̍ wo̍ ni᷄ŋ.

⁴³Chāndɔ̄ɔ̄ wāŋnda̍ chīe̍e̍ya̍ nda̍ hīōū hɛ̄na᷄ŋ a̍ Mɛ̄lɛ̄ka̍ ndu̍ ndu̍ cha̍ndɔ̄ɔ̍ nda̍.

⁴⁴Mi̍ Chi̍i̍sū di̍mī chōo̍ cho̍o̍ āā, “Wānā o̍ wāna̍ dɔ̍ū tīīnda᷄ŋndo̍ o̍ ya̍ ni̍ŋ pɛ̍, mɛ̄ɛ̍ ō cho̍ ko̍ ya̍ le̍ o̍ dɔ̍ū tīīnda᷄ŋndo̍ o̍ ya̍ ni̍ŋ te̍. Mɛ̄ɛ̍ wāna̍ ve᷅m ya̍ wo̍, o̍ ndu̍ ni̍ŋ o̍ dɔ̍ū tīīnda᷄ŋndo̍ ni̍.

⁴⁵Wānā o̍ wāna̍ che᷅ ya̍ pɛ̍, mɛ̄ɛ̍ ō chīi̍ wāna̍ ve᷅m ya̍ wo̍ chɔ̄.

⁴⁶I̍ hi᷅ŋ māhūnāā o̍ chi̍e̍ēŋndo̍ chōo̍ māā nyɛ̄ wa̍wo̍ŋ māā wānā o̍ wāna̍ dɔ̍ū tīīnda᷄ŋndo̍ o̍ ya̍ ni̍ŋ pɛ̍, ō lo᷅ lɛ̍ o̍ mānyūm ni᷄ŋ te̍.

⁴⁷Wānā o̍ wāna̍ tu̍e̍ī pɛ̍ di̍ōmndā ya̍ I̍ di̍mī la̍ŋ, kɛ̍, mbō tōsa̍ nyɛ᷅ la̍ di̍mi̍ wo̍ le̍, mɛ̄ɛ̍ ō cho̍ ya̍ le̍ cho̍ ndu̍ īyāma̍ kīlūl te̍. Kāni̍ fu̍u̍le̍, ya̍ I̍ hi᷅ŋ māhūnāā le̍ mī wāŋnda̍ sɔ̄la̍ pīōŋɔ̄ɔ̍. I̍ hi̍ŋ le̍ mī I̍ ki̍lu̍l wāŋnda̍ o̍ chi̍e̍ēŋndo̍ ni᷄ŋ i̍ya᷅ma̍ le̍.

⁴⁸Wānā o̍ wānā kɛ̍ɛ̍ ya̍ pɛ̍, ndu̍yɛ̍, mbō kɛ̄ɛ̍ le̍ nyɛ̄ ya̍ di̍mi̍ wo̍ chūa̍a̍ pɛ̍, nyɛ̄ chō o̍ cho̍ ndu̍ yāmɛ̍i̍ kīlūl lo̍. Dīōmndā ya̍ di̍mi̍ la̍ŋ, la̍ŋ la̍ cho̍ ndu̍ yāmɛ̍i̍ kīlūl o̍ pāa̍le̍ mɛ̍ɛ̍lāāle̍ŋ chōo̍ ni̍.

⁴⁹Kāni̍ fu̍u̍le̍, dīōmndā ya̍ I̍ di̍mi̍ la̍ŋ, ō cho̍ di̍ōmndā nīla̍ ya̍ pi̍la̍ kɛ̍ɛ̍si̍a̍a̍ le̍. Fi̍nyā nūu̍ o̍ ve᷅m ya̍ wo̍, ndu̍ chɔ̍m ya̍ nyɛ̄ ya̍ I̍ nɔ̍ le̍ dīmīo̍o̍ wo̍ ni̍. Ndu̍yɛ̍, ndu̍ ve᷅m ya̍ ndu̍ dīmī ni̍.

⁵⁰I̍ si̍nā māā nyɛ̄ o̍ ve᷅m ya̍ ko̍ŋ le̍ dīmīo̍o̍ wo̍, ndu̍ chu̍ū wa᷅ŋnda̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wō ni̍. Le̍la̍ŋ, dīōmndā Fi̍nyā nūu̍ vīām ya̍ le̍ dīmīo̍o̍ la̍ŋ, la̍ŋ ko̍ ya̍ di̍mī ni̍.”