Read Southern Kisi Chɔ᷄ŋ 13 Bible Online

Chɔ᷄ŋ 13 - Southern Kisi bible

Chɔ᷄ŋ 13

¹Pāa̍le̍ wāŋnda̍ bīī bɔ᷅ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ wo̍ o̍kɔ̄ɔ̄ le̍ŋ, lē wa̍ māā sīɔ̄dīi̍. Ndu̍yɛ̍, mi̍ Chi̍i̍sū si̍nā ndi̍ pɛ̄ŋgu̍ māā te̍le̍ŋndo̍ chō ni᷅ŋ kpɛ̍ɛ̍lūŋ le̍ mbō fāŋa̍ŋ o̍ chi̍e̍ēŋndo̍ ho̍ō chōo̍, le̍ mbō kūɛ̄ nāa̍ Fi̍nyā ndɔ̄ chu̍a̍. Chi̍i̍sū ndu̍ o̍o̍ ka̍a̍la̍ wānāā ndūa̍a̍ a̍ cho̍ o̍ chi̍e̍ēŋndo̍ ni᷄ŋ nda̍ le̍ te̍le̍ŋ o̍ te̍le̍ŋ. Ndu̍yɛ̍, mbo̍ chɔ̄m nda̍ o̍ bōōndi̍i̍ ke̍ŋ ni᷄ŋ mɛ̄ɛ̍ kpɛ̍ o̍ ka̍a̍la̍ nda̍ yɛ̍.

²Mi̍ ī yɔ̄nu᷄ŋ, Chi̍i̍sū nda̍ bu̍ɛ̍i̍yāā ndūa̍a̍ ā wa̍ nyɛ̄ dīāā īchɔ̄llo̍ dīo̍o̍. Ndu̍yɛ̍, māsa̍ nyi̍nāā wɔ̄ɔ̍ŋnda̍ Sēta̍nā, ndu̍ o̍o̍ chi̍i̍ ni᷅ŋ Chu̍dā po̍ Sa̍i̍mɔ̄ŋ Īsīka̍a̍līɔ̄ɔ̄ wo̍ dɔ̄wɔ̄ɔ̄ o̍ kɔ̄l le̍ Chi̍i̍su̍ pīsīo̍o̍.

³Ndu̍yɛ̍, Chi̍i̍sū ndu̍ o̍o̍ si̍nā māā Fi̍nyā ndɔ̄ o̍ ke̍ ndu̍ kpāāyāa̍ nyɛ̄ o̍ nyɛ̄ fe̍e̍ cho̍o̍. Ndu̍ o̍o̍ si̍nā māā Mɛ̄lɛ̄ka̍ ve᷅m ndu̍ ni̍, ndu̍yɛ̍, māā nāa̍ Mɛ̄lɛ̄ka̍ chūā o̍ cho̍ vɛ̄lɛ̄ mīīŋgū ni̍.

⁴Mɛ̄ɛ̍ nda̍ wa̍ nyɛ̄ dīa̍a̍ dīo̍o̍, mi̍ Chi̍i̍sū cha̍ŋ mbo̍ sōlī dōmā le̍cho̍o̍ wa̍ ndu̍ lēkɔ̄ɔ̍ wo̍. Mbo̍ chūā kōlāa̍ mbo̍ yīīnu᷄ŋ o̍ chāŋ.

⁵Mbo̍ dūāū mɛ̄ŋnda̍ŋ o̍ hɛ̄ŋgɔ̍ɔ̍ ni᷄ŋ mbo̍ sāā bu̍ɛ̍i̍yāā ndūa̍a̍ pēlo᷄ŋ pūlɔ̄ɔ̍. Bu̍ɛ̍ī o̍ pu̍lū ko̍ pe̍lo᷄ŋ ō wɔ̄ɔ̄sūū mu̍ŋ a̍ kōla̍ wa̍ ko̍ŋ ndu̍ o̍ chāŋ ndo̍.

⁶Kɛ̍, mɛ̄ɛ̍ o̍ fu̍u̍lu̍u̍ o̍ Sa̍i̍mɔ̄ŋ Pītɛ̍ lo̍, mi̍ Pītɛ̍ di̍mūl ndu̍ āā, “Māsānɔ̄ɔ̍, ya̍ ŋ̄ pūlū pe̍lo᷄ŋ ni̍?”

⁷Mi̍ Chi̍i̍sū mu̍lī āā, “A̍ si̍nā wɔ̍ nyɛ̄ ya̍ I̍ cho̍ ho̍ō tōsāa̍ wo̍ pɛ̄ŋgu̍ le̍. Kɛ̍ ndu̍yɛ̍, ā chō hūnɔ̄ɔ̄ ndu̍ pɛ̄ŋgu̍ si̍nā.”

⁸Mi̍ Pītɛ̍ di̍mī āā, “I̍ cho̍ chɛ̍lɔ̄ɔ̄ mā pūlū ya̍ pēlo᷄ŋ kpo̍so̍ŋ te̍.” Mi̍ Chi̍i̍sū di̍mī āā, “Tē I̍ pu̍lu̍ nu̍m pēlo᷄ŋ te̍, na̍a̍ nūm ŋ̄ ve᷅ o̍ dīōm pīlɛ̍ ni᷄ŋ te̍.”

⁹Mɛ̄ɛ̍ Chi̍i̍sū di̍mi̍ le̍nde̍, mi̍ Sa̍i̍mɔ̄ŋ Pītɛ̍ di̍mūl ndu̍ āā, “Māsānɔ̄ɔ̍, mɛ̄ɛ̍ ō wa᷅ pēlo᷄ŋ ko̍ le̍ ŋ̄ pūlu̍ ya̍ le̍. Pu̍lu̍ ya̍ bāla̍ŋ a̍ bōlle̍ŋ kpo̍u̍.”

¹⁰Mi̍ Chi̍i̍sū lo᷅ lo̍ŋ mbo̍ dīmī āā, “Wāna̍ pu̍lu᷄ŋ ni᷅ŋ ndo̍, ndu̍ ndu̍ cho̍ ni᷅ŋ ō dīāndāā pa̍ku̍. Pēlo᷄ŋ ko̍ o̍ nɔ᷅ ni᷅ŋ ni̍ mbō pūlū. Nya̍ kpo̍u̍ lā chō ā dīāndāā, mɛ̄ɛ̍ wānā pi᷅lɛ̍ ō cho̍ o̍ di̍a̍ndāā le̍.”

¹¹Chi̍i̍sū ndu̍ o̍o̍ si̍nā ni᷅ŋ wāna̍ wa̍ ndu̍ hūnɔ̄ɔ̄ pīsī wo̍. Le̍ sa̍bū kōŋ o̍ di̍mi̍ ni̍ āā, “Nya̍ kpo̍u̍ lā chō mɛ̄ɛ̍ wānā pi᷅lɛ̍ ō cho̍ o̍ di̍a̍ndāā le̍.”

¹²Mɛ̄ɛ̍ Chi̍i̍sū chi̍i̍ nda̍ pēlo᷄ŋ pūlɔ̄ɔ̄, mbō mīŋgī dōma̍ ndɔ̄ le̍cho̍o̍wo̍ wōūnɔ᷄ŋ mbo̍ mīīŋgū o̍ fo̍ndāŋ ndɔ̄ɔ̍, mbo̍ chāl. Mbo̍ nyūnā nda̍ āā vɛ̄ɛ̄, “Lā sīnā pa̍ nyɛ᷅ ya̍ I̍ to̍sa̍ ho̍ō a̍ nya̍ wo̍ pɛ̄ŋgu̍?

¹³Lā chō ya̍ vēēlōo̍ āā, Ti̍chɛ̄i̍nɔ̍ nāa̍, mī lā vēēlū vɛ̍lɛ̄ ya̍ āā, Māsānɔ̄ɔ̍. Ī chō tōnya̍ mī lā vēēlu̍ ya̍ le̍nde̍. Kāni̍ fu̍u̍le̍, wānā wa̍ā le̍nde̍ ya̍ I̍ cho̍ ni̍.

¹⁴Ya̍ cho̍ Ma̍sānɔ̄ nyāa̍, ndu̍yɛ̍, mi̍ wa᷅ Ti̍chɛ̄i̍nɔ̍ nyā wo̍, nāa̍ ya̍ ya̍ I̍ pu̍lū wɔ̄ nya̍ pēlo᷄ŋ, mɛ̄ɛ̍ nya̍ bɛ̍ɛ̍ lā pūla᷅ŋ pe̍lo᷄ŋ vēllāa̍ vēllē le̍nde̍.

¹⁵Tāāmāsi̍o̍o̍ ya̍ I̍ chɔ̍m nya̍ ho̍ō ni̍. Lā tōsa̍ mɛ̄ɛ̍ ya̍ I̍ to̍sa̍ a̍ nya̍ yɛ̍.

¹⁶Mī di̍mu̍l nya̍ tōnya̍a̍ wa̍la̍ŋ, chɛ̄ o̍ chɛ̄ bɛ̍ɛ̍ cho̍ mbō hīōū wāna̍ ō cho̍ o̍ bā wo̍ le̍. Ndu̍yɛ̍, wāna̍ nda̍ vīām ki̍i̍la̍le̍ŋ ndo̍, ō hi̍ū wa᷅na̍ vi̍ām ndu̍ wo̍ le̍.

¹⁷Mɛ̄ɛ̍ nya̍ sīna̍ ni᷅ŋ sɔ̄ɔ̍ŋ mu᷅ŋ nu̍a̍ā yɛ̍, tē ō wa̍ pɛ̍ mī lā tōsa̍ mu̍ŋ, mɛ̄ɛ̍ lā pɛ̄l tɔ̄nɔ̄ɔ̍.

¹⁸“Ō cho̍ le̍ nya̍ kpo̍u̍ le̍ ya̍ I̍ cho̍ he̍ī dīmīo̍o̍ le̍. Kāni̍, nya̍ ya̍ I̍ hɛ̍li̍ wa̍ ki̍nɛ̍i̍, I̍ si̍nā a̍ nya̍ o̍kɔ̄ɔ̄. Ndu̍yɛ̍, mɛ̄ɛ̍ mī nyɛ̄ Yāu̍ Mɛ̄lɛ̄ka̍a̍ dīmi̍ ho̍ō wo̍ ō yɔ̄nu̍ŋ. Mbo̍ dīmī āā, ‘Wāna̍ na̍a̍ ŋ̄ chō nyɛ̄ dīa̍a̍ dīo̍o̍ lātūlu̍ na̍a̍ ndu̍ wo̍, ō sīmu̍l la̍.’

¹⁹I̍ cho̍ nya̍ sɔ̄ɔ̍ŋ mu᷅ŋ pɔ̄ɔ̄ dīmūllo̍ pɛ̄ŋgo̍o̍ ho̍ō, ko̍ŋ to̍sā ni̍, tē sɔ̄ɔ̍ŋ ka̍la᷄ŋ ŋ̄ hu᷄ŋ yɔ̄nu᷄ŋ pɛ̍, lā lāāla̍ŋ māā ya̍ cho̍ wāna̍ cho̍ kāni̍ ma̍si̍ndɛ̄ wo̍ ni̍.

²⁰Mī di̍mu̍l nya̍ tōnya̍a̍ wa̍la̍ŋ, wāna̍ chɛ̍l wāna̍ ya̍ I̍ vi̍ām ndo̍ pɛ̍, mɛ̄ɛ̍ ya̍ o̍ chɛ̍l ko̍ŋ ni̍. Ndu̍yɛ̍, wāna̍ chɛ̍l la̍ pɛ̍, mɛ̄ɛ̍ wāna̍ ve᷅m ya̍ wo̍, ndu̍ o̍ chɛ̍l ko̍ŋ ni̍.”

²¹Mɛ̄ɛ̍ Chi̍i̍sū chi̍i̍ dīōmnda̍ŋ nda᷅ŋ dīmī, mi̍ mɔ̍nɛ̍i̍ pīā o̍ kɔ̄l ndɔ̄ɔ̍ ni᷄ŋ ta̍u̍. Mbo̍ dīmī kpe̍nde̍ke̍le̍ āā, “Mī di̍mu̍l nya̍ tōnya̍a̍ wa̍la̍ŋ, wānā pi᷅lɛ̍ chō nya̍ tɛ̄ɛ̄ŋ ō chō ya̍ hūnɔ̄ɔ̄ pīsī.”

²²Mi̍ bu̍ɛ̍i̍yāā ndūa̍a̍ sāā nūāna᷅ŋndo̍. Mi̍ sūɛ̍i̍ he̍ī ī bīī nda̍ kɔ̄ndɔ̄fi̍li̍, le̍ wāna̍ Chi̍i̍sū wa̍ ho̍ō dīmīo̍o̍ māā ō chō ndu̍ pīsī wo̍.

²³Bu̍ɛ̍ī Chi̍i̍sū ndu̍ o̍o̍ ka̍a̍la̍ kāālā bɛ̄ndōo̍ wo̍ ō wa̍ ndu̍ īchāli̍ i̍kɛ̍i̍.

²⁴Mi̍ Sa̍i̍mɔ̄ŋ Pītɛ̍ tu̍u̍līāl bu̍ɛ̍ī kōŋ a̍ lābā mbo̍ dīmūl ndu̍ āā, “Nyu̍na̍ wɔ̍ ndu̍ le̍ wāna̍ o̍ cho̍ ho̍ō sūɛ̍i̍ a̍ ndu̍ o̍kɔ̄ɔ̄ wo̍.”

²⁵Mi̍ bu̍ɛ̍ī Chi̍i̍sū ka̍a̍la̍ ko̍ŋ ndo̍ nāŋnu᷄ŋ Chi̍i̍su̍ īkɛ̄i̍ mbo̍ nyūnā ndu̍ āā, “Māsānɔ̄ɔ̍, ō nɛ̄ɛ̍nɛ̍ cho̍ yɛ̄ nu̍m hūnɔ̄ɔ̄ pīsī?”

²⁶Mi̍ Chi̍i̍sū lo᷅ o̍ ko̍ŋ mbo̍ mūlī āā, “Wāna̍ ya̍ I̍ cho̍ bēe̍dīi̍yo̍ yīŋɔ̄ɔ̄ o̍ lāmndo̍ ni᷄ŋ mī I̍ ke̍ ndu̍ wo̍, mɛ̄ɛ̍ ndu̍ ni̍.” Mbo̍ chūā bēe̍dīi̍yo̍. Mɛ̄ɛ̍ o̍ yi᷅ŋ o̍ lāmndo̍ ni᷄ŋ, mbo̍ kē Chu̍dā, po̍ Sa̍i̍mɔ̄ŋ Īsīka̍a̍līɔ̄ɔ̄ wo̍.

²⁷Mɛ̄ɛ̍ Chu̍dā bi̍ī dɔ̍ɔ̍ bēe̍dīi̍ ko̍ŋ mbo̍ dīā, mi̍ Sēta̍nā māsa̍ nyi̍nāā wɔ̄ɔ̍ŋnda̍ tūāl bɛ̍ɛ̍ ndu̍ kɔ̄ɔ̄lī. Mi̍ Chi̍i̍sū di̍mūl ndu̍ āā, “Nyɛ̄ ŋ̄ nɔ̄ le̍ tōsāa̍ wo̍, sē kɔ̍ ni̍ko̍ chɔ̍ chɔ̍ mā kɔ̍ to̍sā ndu̍.”

²⁸Bu̍ɛ̍īya̍ ā tūa̍a̍ kpo̍u̍, ā nda̍ wa̍ īchāli̍ nyɛ̍ dīa̍a̍ dīo̍o̍ wa̍, ā sīna̍ le̍ sa̍bū Chi̍i̍sū di̍mu̍l Chu̍dā dīōmnda̍ŋ nda᷅ŋ ndo̍ le̍.

²⁹Chu̍dā wa̍ wānā kɛ̍sīāā ŋ̄ka̍ni̍o̍o̍ ni̍. Le̍ he̍ī, mɛ̄ɛ̍ Chi̍i̍sū di̍mu̍l Chu̍dā le̍nde̍, mi̍ bu̍ɛ̍īya̍ ā pūm ā yīya᷄ŋ māā vīōmɔ̄ɔ̍ Chi̍i̍sū wa̍ ndu̍ le̍ mbō kɔ̍ pi̍i̍ndūū nyɔ̄ɔ̍ŋ le̍ bɔ̄ŋa᷅ŋndo̍ ni̍, ɔ̄ɔ̄, māā vīōmɔ̄ɔ̍ o̍ wa̍ ndu̍ ni̍ le̍ mbō kɔ̍ ke᷅ wānāā tāmbɛ̍i̍ya̍ nyɛ̄ sɔ̄lāā pɔ̄mbɔ̄.

³⁰Mɛ̄ɛ̍ Chu̍dā de᷅ dɔ̍ɔ̍ bēe̍dīi̍ Chi̍i̍sū ke̍ ndu̍ ko̍ŋ ndo̍, mbo̍ cha᷄ŋ le̍pi᷅lɛ̍ kpe̍ mbo̍ fūlā. Ndu̍yɛ̍, nyūmnda̍ŋ mā wa̍ ni᷅ŋ mā tūālāā.

³¹Mɛ̄ɛ̍ Chu̍dā fu̍la̍, mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Te̍le̍ŋndo̍ fūūlu̍u̍ le̍ mī Mɛ̄lɛ̄ka̍ chɔ᷄m mɛ̄ɛ̍ wāna̍ nda̍ vēēlū āā, Po̍ Wa̍nā Pɔ̍nɔ̍ɔ̍ wo̍ ō chō wāna̍ kɔ̄ndɔ̄fi̍li̍ yɛ̍. Ndu̍yɛ̍ te̍le̍ŋndo̍ ho̍ō, ndu̍ Po̍ Wa̍nā Pɔ̍nɔ̍ɔ̍ chō chɔ̄m mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍ ni̍.

³²Ndu̍yɛ̍, tē ō chɔ᷄m mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍ pɛ̍, Mɛ̄lɛ̄ka̍ pi̍la̍ o̍ cho̍ chɔ̄m mɛ̄ɛ̍ ndu̍ Po̍ Wa̍nā Pɔ̍nɔ̍ɔ̍ chō wāna̍ kɔ̄ndɔ̄fi̍li̍ yɛ̍. Ndu̍yɛ̍, ō chō ke̍ŋ to̍sā su̍ŋ su̍ŋ.

³³Nya̍ chāāŋāā nīāā ka̍a̍lāa̍, le̍ te̍le̍ŋ bi̍ŋgī ko̍ni̍ ya̍ I̍ cho̍ ni᷅ŋ lātūlu̍ a̍ nya̍ ni̍. Lā chō ya̍ hūnɔ̄ɔ̄ nūūvīāā. Ndu̍yɛ̍, nyɛ̄ ya̍ I̍ di̍mu̍l Chu̍ūwa̍ wo̍, ndu̍ ko̍ni̍ ya̍ I̍ cho̍ nya̍ dīmūl ni̍. Ndu̍ yɔ̍nūŋ ni̍ māā, lā nɔ̍lā mī lā kūɛ̄ nāa̍ ya̍ I̍ cho̍ kɔ̄la̍ŋ nda̍ le̍.

³⁴Ndu̍yɛ̍, I̍ cho̍ nya̍ sāwā sɛ̍nɛ̄ī dōū, ndu̍ yɔ̍nūŋ ho̍ō ni̍ māā, lā kāāli̍āŋ ve᷅llāa̍ vēllē. Mɛ̄ɛ̍ ya̍ I̍ ka̍a̍la̍ nya̍ yɛ̍, le̍nde̍ nya̍ kāāli̍āŋ ve᷅llāa̍ vēllē ni̍.

³⁵Tē lā kāāli̍āŋ ve᷅llāa̍ vēllē pɛ̍, o̍ ko̍ŋ, wānā o̍ wānā si̍na̍ dɔ̍ɔ̍ māā bu̍ɛ̍i̍yāā nīa̍a̍ nya̍ chō ni̍.”

³⁶O̍ ko̍ŋ kɔ̍ɔ̍lī, mi̍ Sa̍i̍mɔ̄ŋ Pītɛ̍ nyu̍nā āā, “Māsānɔ̄ɔ̍, kūɛ̍ɛ̍nɛ̍ ŋ̄ chō yɛ̄ kɔ̄la̍ŋ?” Mi̍ Chi̍i̍sū lo᷅ o̍ ko̍ŋ mbo̍ mūlī āā, “A̍ nɔ̍lā pɛ̍ŋgo̍o̍ ho̍ō mā tōl la̍ kɔ̄ɔ̄lī nāa̍ ya̍ I̍ cho̍ kɔ̄la̍ŋ nda̍ le̍. Kɛ̍ ndu̍yɛ̍, tē bōōndi̍i̍ ti̍ŋ Ī hīōū pɛ̍, ā tūāl ni̍ŋ ya̍ kɔ̄ɔ̄lī.”

³⁷Mi̍ Pītɛ̍ lo᷅ o̍ ko̍ŋ mbo̍ nyūnā Chi̍i̍su̍ āā, “Māsānɔ̄ɔ̍, ɔ̍ɔ̄ le̍ sa̍bū ya̍ I̍ nɔ̍lā nu̍m tōlɔ̄ɔ̄ kɔ̄ɔ̄lī pɛ̄ŋgo̍o̍ ho̍ō le̍ wo̍? I̍ cho̍ ō bɛ̄ɛ̄ndīa̍ŋ mī I̍ vi᷅ le̍ nūm.”

³⁸Mɛ̄ɛ̍ Pītɛ̍ so̍ō le̍nde̍, mi̍ Chi̍i̍sū lo᷅ o̍ ko̍ŋ mbo̍ nyūnā ndu̍ āā, “Lēkɛ̍ndɛ̍ī ā chō ō bɛ̄ɛ̄ndīa̍ŋ mā vī le̍ ya̍?” Āā, “Mī di̍mu̍l nu̍m tōnya̍a̍ wa̍la̍ŋ, sɔ̄ɔ̍ cho̍ ko̍o̍wā le̍ mā vi̍i̍nu̍ŋ le̍ ya̍a̍ māā a̍ si̍nā ya̍ le̍.”