Read Southern Kisi Chɔ᷄ŋ 14 Bible Online

Chɔ᷄ŋ 14 - Southern Kisi bible

Chɔ᷄ŋ 14

¹Mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Lā wa᷅ a̍ kɔ̄ltā tāmbɛ̍i̍ le̍. Lā dɔ̄u̍ ti̍i̍nda᷄ŋ nyāa̍ o̍ Mɛ̄lɛ̄ka̍ ni᷄ŋ, ndu̍yɛ̍, mī lā dɔ̄ū vɛ̄lɛ̄ tīīnda᷄ŋ nyāa̍ o̍ ya̍ ni̍ŋ.

²Chīɛ̍i̍ Fi̍nyā nūu̍ nɔ̄ yīya̍la̍ŋ ta̍u̍. Ndu̍yɛ̍, I̍ cho̍ lākɔ̄ yīya̍la̍ŋ bɛ̄ɛ̄ndīāā le̍ nya̍. Tē ndi̍ i̍i̍ ve̍ le̍nde̍ le̍, ya̍ i̍i̍ di̍mūl nya̍ le̍nde̍ le̍.

³Ndu̍yɛ̍, tē I̍ kɔ̍ chi̍ī yīya̍la̍ŋ bɛ̄ɛ̄ndīāā pɛ̍, I̍ cho̍ mīīŋgū mī I̍ hu̍ŋ kɔ᷅ a̍ nya̍ le̍ mī ŋ̄ wa̍ na̍a̍ nya̍ā nāa̍ ya̍ I̍ wa᷅ ni̍ŋ nda̍.

⁴Lā sīnā nɛ̍īyo̍ le̍ kɔ̄la̍ŋ o̍ fo̍ndāŋ ya̍ I̍ cho̍ kɔ̄la̍ŋ ndo̍.”

⁵O̍ ko̍ŋ kɔ̍ɔ̍lī, mi̍ Tɔ̄mɔ̍si̍ di̍mūl Chi̍i̍sū āā, “Māsānɔ̄ɔ̍, ŋ̄ si̍nā na̍a̍ ŋ̄ chō kɔ̄la̍ŋ nda̍ le̍. Mī vɛ̄ɛ̄ na̍a̍ ŋ̄ lōōku̍ yɛ̄ nɛ̄īyo̍ sīnā le̍ kɔ̄la̍ŋ lo̍ŋ?”

⁶Mi̍ Chi̍i̍sū lo᷅ lo̍ŋ mbo̍ dīmūl ndu̍ āā, “Ya̍ cho̍ nɛ̄īyo̍ ni̍, a̍ tōnya̍a̍, a̍ yōōmōo̍. Wānā o̍ wānā nɔ̍lā mbō fu̍u̍lu̍u̍ nāa̍ Mɛ̄lɛ̄ka̍ Fi̍nyāa̍ chūā le̍ mɛ̄ɛ̍ o̍ sa̍bū nūu̍ ni᷄ŋ.

⁷Mɛ̄ɛ̍ nya̍ sīna̍ ni᷅ŋ nu̍a̍ā wāna̍ ya̍ I̍ cho̍ wo̍ yɛ̍, lā chō wāna̍ Fi̍nyā nūu̍ bɛ̍ɛ̍ o̍ cho̍ wo̍ si̍nā. Ndu̍yɛ̍, chɔ̍ŋ ni᷅ŋ a̍ bōōnde̍i̍ he̍ī, lā sīnā ni᷅ŋ ndu̍, ndu̍yɛ̍, lā chē ni᷅ŋ ndu̍.”

⁸O̍ ko̍ŋ kɔ̍ɔ̍lī, mi̍ Fi̍li̍pī di̍mūl Chi̍i̍su̍ āā, “Māsānɔ̄ɔ̍, to̍sa̍ mī ŋ̄ chē Mɛ̄lɛ̄ka̍ Fi̍nyāa̍. Ko̍ŋ wa᷅ le̍tu̍u̍.”

⁹Mi̍ Chi̍i̍sū mu̍lī āā, “Fi̍li̍pī, le̍ te̍le̍ŋ vi̍lɛ̄ī ni᷅ŋ na̍a̍ nya̍ā ŋ̄ chō hɔ̄lāā tūlu̍. Bāā ho̍ō kpo̍u̍ a̍ si̍na̍ wɔ̍ wa᷅na̍ ya̍ I̍ cho̍ wo̍ le̍?” Mbo̍ dīmī āā, “Wānā o̍ wāna̍ che᷅ ya̍ pɛ̍, mɛ̄ɛ̍ ō chīi̍ Fi̍nyā nūu̍ chɔ̄. Ɔ̍ɔ̄ le̍ sa̍bū ŋ̄ dīmī vɛ̍lɛ̄ māā, Chɔ̍m na̍a̍ Mɛ̄lɛ̄ka̍ Fi̍nyāa̍ wo̍?

¹⁰Fi̍li̍pī, bāā a̍ la̍a̍la̍ŋ māā ya̍ ni̍, fi̍nyā nūu̍ ni̍, māā nyɔ̄ɔ̍ ō pīlɛ̍ le̍ na̍a̍ ŋ̄ chō le̍? Dīōmndā ya̍ I̍ di̍mu̍l nya̍ la᷅ŋ nda̍ŋ, I̍ di̍mi̍ la̍ŋ o̍ kpāāya̍ ni̍ ya̍ pi̍la̍ ni̍ŋ te̍. Mɛ̄lɛ̄ka̍ Fi̍nyāa̍ o̍ cho̍ ya̍ kɔ̄ɔ̄lī wo̍, ndu̍ pi̍la̍ cho̍ wa̍li̍ ndɔ̄ɔ̍ tōsāa̍ ni̍.

¹¹Tē I̍ di̍mu̍l nya̍ pɛ̍ māā ya̍ ni̍, Fi̍nyā nūu̍ ni̍, māā nyɔ̄ɔ̍ ō pīlɛ̍ na̍a̍ ŋ̄ chō ni̍, lā lāāla̍ŋ a̍ ya̍. Kɛ̍ ndu̍yɛ̍, ā yɔ᷄ŋ bɛ̍ɛ̍ mī dīōmndā ya̍ I̍ di̍mu̍l nya̍ la̍ŋ mī la̍ŋ la̍ to̍sa̍ mī lā lāāla̍ŋ a̍ ya̍ le̍, ō wa̍ bɛ̍ɛ̍ le̍ wa̍lta̍ kɔ̄ndɔ̄fi̍ltā ya̍ I̍ to̍sa̍ la̍ŋ su̍e̍e̍, lā lāāla̍ŋ.

¹²Mī di̍mu̍l nya̍ tōnya̍a̍ wa̍la̍ŋ, wānā o̍ wāna̍ dɔ̍ū tīīnda᷄ŋndo̍ o̍ ya̍ ni̍ŋ pɛ̍, wa̍lta̍ kɔ̄ndɔ̄fi̍ltā ya̍ I̍ to̍sā la̍ŋ, wānā ko̍ŋ chō la̍ŋ tōsā. Wānā ko̍ŋ chō wa̍lta̍ bɛ̍ndū tōsā mbō hīōū bɛ̍ɛ̍ la᷅ŋ, kāni̍ fo̍ndōle̍, ya̍ ya̍ I̍ cho̍ lākɔ̄nɔ᷄ŋ nāa̍ Fi̍nyā nūu̍ chūā.

¹³Ndu̍yɛ̍, o̍ ko̍ŋ kɔ̍ɔ̍lī, nyɛ̄ o̍ nyɛ̄ nya̍ nyūna̍ le̍ ndu̍ a̍ dīōlā nīla̍ŋ pɛ̍, tōsāa̍ ya̍ I̍ to̍sāl nya̍ ni̍. Kāni̍ fu̍u̍le̍, le̍ mī Po̍ Mɛ̄lɛ̄ka̍a̍ tōsa̍ mī wāŋnda̍ chē mɛ̄ɛ̍ Mɛ̄lɛ̄ka̍ chō wāna̍ kɔ̄ndɔ̄fi̍li̍ yɛ̍.

¹⁴Nyɛ̄ o̍ nyɛ̄ lā nyūna̍ le̍ ndu̍ a̍ dīōlā nīla̍ŋ pɛ̍, tōsāa̍ ya̍ I̍ to̍sā ni̍.”

¹⁵Mi̍ Chi̍i̍sū di̍mī āā, “Tē lā kāāla̍ ya̍ pɛ̍, mɛ̄ɛ̍ lā chō sāwāla̍ nīla̍ŋ chūā.

¹⁶Ndu̍yɛ̍ o̍ ko̍ŋ kɔ̍ɔ̍lī, I̍ nɔ̍lā mī di̍mu̍l Fi̍nyā nūu̍ mbō ke̍ nya̍ Wānā Ma̍lāā chēle̍ŋ mbō wa̍ a̍ nya̍ la̍tu̍lu̍ le̍ fɛ̍ɛ̍ŋ a̍ fɛ̍ɛ̍ŋ.

¹⁷Ndu̍ Nyi̍na̍ Mɛ̄lɛ̄ka̍a̍, ndu̍ chɔ᷅m wa᷅ŋnda̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ ni̍. Kɛ̍ ndu̍yɛ̍, wānāa̍ do̍ū ti̍i̍nda᷄ŋ ndāa̍ o̍ Mɛ̄lɛ̄ka̍ ni᷄ŋ te̍ wa̍, ō tu᷅l nda̍ kɔ̄ɔ̄lī le̍. Kāni̍ fu̍u̍le̍, ā chi᷅ ndu̍ le̍, ndu̍yɛ̍, ā si̍nā ndu̍ le̍. Kɛ̍ ndu̍yɛ̍, nya̍ nya̍ sīnā ndu̍ ni᷅ŋ, kāni̍ fo̍ndōle̍, ō chō a̍ nya̍ la̍tu̍lu̍. Ndu̍yɛ̍, ō chō wā nya̍ kɔ̄ɔ̄lī.

¹⁸“Kɔ̄lā ya̍ I̍ cho̍ la̍ŋ, I̍ cho̍ nya̍ mɛ̄ī nya̍ kpe̍e̍le̍ le̍. I̍ cho̍ hūnɔ̄ɔ̄ nāa̍ nya̍ chūā.

¹⁹Te̍le̍ŋndo̍ ō bīŋgī ko̍ni̍ lo̍ ni᷅ŋ ni̍, o̍ ko̍ŋ, wānāa̍ do̍u̍ ti̍i̍nda᷄ŋ ndāa̍ o̍ Mɛ̄lɛ̄ka̍ ni᷄ŋ te̍ wa̍, ā chi᷅ lɛ̍ ni̍ŋ ya̍ le̍. Kɛ̍, nya̍ nya̍ lā chō vɛ̄lɛ̄ ya̍ chɔ̄. Ndu̍yɛ̍, mɛ̄ɛ̍ ya̍ I̍ cho̍ yōōmū yɛ̍, nya̍ bɛ̍ɛ̍ lā chō wā yōōmū.

²⁰Ndu̍yɛ̍, tē pāa̍le̍ le̍ŋ lē fūūlu̍u̍ pɛ̍, lā chō hūnɔ̄ɔ̄ sīnā māā ya̍ ni̍, Fi̍nyā nūu̍ ni̍, māā nyɛ̄ pīlɛ̍ na̍a̍ ŋ̄ chō ni̍. Ndu̍yɛ̍ o̍ ko̍ŋ kɔ̍ɔ̍lī, mī lā sīna̍ māā ya̍ ni̍, nya̍ ni̍, māā nyɛ̄ pīlɛ̍ na̍a̍ ŋ̄ chō ni̍.

²¹“Wānā o̍ wāna̍ chu̍a̍ sāwāla̍ nīla̍ŋ pɛ̍, mɛ̄ɛ̍ ndu̍ ka̍a̍la̍ ya̍ ni̍. Ndu̍yɛ̍, wānā o̍ wāna̍ ka̍a̍la̍ ya̍ pɛ̍, kāālāa̍ Fi̍nyā nūu̍ ō kāālā wa̍nā ko̍ŋ ni̍. Ya̍ bɛ̍ɛ̍ I̍ cho̍ wānā ko̍ŋ kāālā, ndu̍yɛ̍, mī I̍ chɔ̍mnu̍ŋ ndu̍.”

²²O̍ ko̍ŋ kɔ̍ɔ̍lī, mi̍ Chu̍dā nyu̍nā, kɛ̍, ō cho̍ Chu̍dā Īsīka̍a̍līɔ̄ɔ̄ le̍. Mbo̍ nyūnā āā, “Māsānɔ̄ɔ̍, vɛ̄ɛ̍nɛ̍ ŋ̄ chɔ̍mnu̍ŋ yɛ̍ ni̍ŋ na̍a̍, kɛ̍, a̍ chɔ̍mnūŋ wa̍nāa̍ do̍u̍ ti̍i̍nda᷄ŋndo̍ o̍ Mɛ̄lɛ̄ka̍ ni᷄ŋ te̍ wa̍ le̍ nɛ̍?”

²³Mi̍ Chi̍i̍sū mu̍lī āā, “Wānā o̍ wāna̍ ka̍a̍la̍ ya̍ pɛ̍, chūa̍a̍ o̍ chu̍ā pɛ̍ɛ̍kūlā nīla̍ŋ ni̍. Ndu̍yɛ̍, wānā ko̍ŋ, Fi̍nyā nūu̍ chō ndu̍ kāālā. O̍ ko̍ŋ kɔ̍ɔ̍lī, ya̍ ni̍, Fi̍nyā nūu̍ ni̍, ŋ̄ nɔ̄lā mī ŋ̄ hīŋ nāa̍ ndu̍ chu̍a̍ mī ŋ̄ wa̍ lātūlu̍ na̍a̍ nda̍ā.

²⁴Wānā o̍ wāna̍ ka̍a̍la̍ ya̍ le̍, ō chu̍ē pɛ̍ɛ̍kūlā nīla̍ŋ te̍. Mɛ̄lɛ̄ka̍ Fi̍nyāa̍ o̍ ve᷅m ya̍ wo̍, ndu̍ ve᷅m ya̍ la̍ŋ dīmī ni̍.

²⁵“Dīōmndā ya̍ I̍ di̍mu̍l nya̍ la᷅ŋ nda̍ŋ, I̍ di̍mu̍l nya̍ la̍ŋ pɔ̄ɔ̄ bōōndi̍i̍ ya̍ I̍ cho̍ wɔ̄ he̍ī a̍ nya̍ la̍tu̍lu̍ ve̍.

²⁶Mɛ̄lɛ̄ka̍ Fi̍nyāa̍ chō nya̍ Wānā Ma̍lāa̍ vīm, ndu̍ yɔ̍nūŋ māā Nyi̍na̍ ndɔ̄ɔ̍ ni̍. Ō chō ndu̍ vīōmɔ̄ɔ̄ a̍ dīōlā nīla̍ŋ. Ō hīŋ pɛ̍, nyɛ̄ o̍ nyɛ̄ nya̍ nɔ̄ le̍ sīnāa̍, ō chō nya̍ mu̍ŋ pɛ̄ɛ̄kū kpo̍u̍. Ndu̍yɛ̍, nyɛ̄ o̍ nyɛ̄ ya̍ I̍ di̍mu̍l nya̍, ō chō nya̍ yīyāla᷄ŋ.

²⁷“Kɔ̄l nyūlōo̍ ya̍ I̍ cho̍ nya̍ mēl ni̍. Kɔ̄l nyūlū ya̍ I̍ nɔ̍ wo̍, ndu̍ ya̍ I̍ cho̍ nya̍ kē ni̍. Kɔ̄l nyūlū kōŋ, chi̍e̍ēŋndo̍ ō nɔ̍lā mbō ke̍ nya̍ ndu̍ le̍. Lā wa᷅ a̍ kɔ̄ltā tāmbɛ̍i̍ le̍. Ndu̍yɛ̍, lā yɔ᷅ŋ īsīōōŋ tē.

²⁸Lā tūēī mi̍ I̍ di̍mūl nya̍ māā I̍ cho̍ lākɔ̄nɔ᷄ŋ. Kɛ̍ ndu̍yɛ̍, I̍ cho̍ vɛ̄lɛ̄ mīīŋgū nya̍ o̍ ībūŋ. Ndu̍yɛ̍, tē nya̍ a̍a̍ ka̍a̍la̍ ya̍ lēkɛ̍ndɛ̍ī pɛ̍, mɛ̄ɛ̍ lā wa̍ wā a̍ kɔ̄l kɛ̄ndɛ̄ le̍ tūēīyɔ̄ɔ̍ māā I̍ cho̍ kɔ̄la̍ŋ nāa̍ Fi̍nyā nūu̍ chūā. Kāni̍ fo̍ndōle̍, Fi̍nyā nūu̍ ndu̍ hi̍o̍ū a̍ ya̍.

²⁹I̍ di̍mu̍l pɔ̄ɔ̄ nya̍ sɔ̄ɔ̍ŋ mu᷅ŋ pɛ̄ŋgo̍o̍ ho̍ō lɔ̍ɔ̍ ŋ̍ yɔ̍nu̍ŋ ndɔ̍ le̍ wo̍ŋ. O̍ ko̍ŋ, tē ŋ̄ yɔ̄nu̍ŋ pɛ̍, lā lāāla̍ŋ māā nyɛ̄ ya̍ I̍ di̍mi̍ wo̍ chō tōnya̍.

³⁰I̍ nɔ̍ lɛ̍ te̍le̍ŋ bɔ̍ɔ̍ le̍ hīōūwɔ̄ɔ̍ lāchī a̍ sūūki̍āŋndo̍ na̍a̍ nya̍ le̍. Kāni̍ fo̍ndōle̍, wāna̍ cho̍ māsāa̍ le̍ chi̍e̍ēŋndo̍ ho̍ō wo̍ chō hūnɔ̄ɔ̍. Kɛ̍ ō nɔ̍lā ya̍ nyɛ̄ o̍ nyɛ̄ yɔ̄ŋ te̍.

³¹Sɔ̄ɔ̍ŋ mu᷅ŋ ŋ̄ nɔ̄ le̍ yɔ̄nɔ᷄ŋndo̍. O̍ ko̍ŋ, mī chi̍e̍ēŋndo̍ sīna̍ māā I̍ ka̍a̍la̍ Fi̍nyā nūu̍, ndu̍yɛ̍, māā nyɛ̄ o̍ di̍mu̍l la̍ le̍ tōsāa̍ wo̍ māā ndu̍ ki̍nɛ̍i̍ ko̍ni̍ ya̍ I̍ to̍sa̍ ni̍. “Lā chɔ᷄ŋ ŋ̄ fāŋa̍ŋ o̍ fo̍ndāa̍ ho̍ō.”