Read Southern Kisi Chɔ᷄ŋ 15 Bible Online

Chɔ᷄ŋ 15 - Southern Kisi bible

Chɔ᷄ŋ 15

¹Mi̍ Chi̍i̍sū di̍mu̍l vɛ̄lɛ̄ bu̍ɛ̍i̍yāā ndūa̍a̍, āā, “I̍ cho̍ māchūāā mɛ̄ɛ̍ tɔ̄lɔ̄ɔ̄ kpe̍e̍kpe̍i̍yo̍ chō nu̍a̍ā yɛ̍. Fi̍nyā nūu̍ ndu̍ cho̍ māchūāā māā wāna̍ ma̍ndā tɔ̍lɔ̄ɔ̍ wo̍.

²Lɛ̄vīi̍ wa̍ o̍ ya̍ mī ī kɛ̄ɛ̍ le̍ kōmɔ̄ɔ̍ pɛ̍, Fi̍nyā nūu̍ fāŋa̍ ndi̍. Lɛ̄vīi̍ ku̍ām ko̍mɔ̄ɔ̄ kɛ̄ndɔ̄ɔ̍ ve̍, ndi̍ ndi̍ mbō kēlū ndi̍ ī ti᷄ŋ lēchōo̍ mbō bɛ̄ɛ̄ndi̍a̍a̍ ndi̍ nyɛ̄ kɛ̄ndɛ̍ī le̍ mī ī chɔ̄ɔ̄lu̍ kōmɔ̄ɔ̄.

³Dīōmndā ya̍ I̍ so̍ō nāa̍ nya̍ chūā lāŋ, lā bɛ̄ɛ̄ndi̍a̍a̍ ni᷅ŋ nya̍ nyɛ̄ kɛ̄ndɛ̍ī.

⁴Tē lā hīōū lāchī a̍ wāa̍ ā mɔ̄ɔ̄sa᷅ŋ a̍ ya̍ pɛ̍, ya̍ bɛ̍ɛ̍ I̍ hi̍o̍ū lāchī a̍ wāa̍ ō mɔ̍ɔ̄sa᷅ŋ a̍ nya̍. Tē lɛ̄vīī tɔ̄lɔ̄ɔ̍ ī ve̍ i̍ mɔ̍ɔ̄sa᷅ŋ a̍ tɔ̄lɔ̄ɔ̄ bɛ̄ŋgo̍o̍ le̍, lɛ̄vīī kēŋ ī ku᷅m te̍. Le̍ mī lɛ̄vīī tɔ̄lɔ̄ɔ̍ ī kōm, mɛ̄ɛ̍ mī ī hīōū lāchī a̍ wāa̍ ī mɔ̄ɔ̄sa᷅ŋ a̍ tɔ̄lɔ̄ɔ̄ bɛ̄ŋgo̍o̍. Le̍nde̍ ko̍ni̍ nya̍ bɛ̍ɛ̍ nya̍ chō ni̍. Le̍ mī lā yɔ̄ŋgu̍ kōmɔ̄ɔ̍ mɛ̄ɛ̍ mī lā hīōū lāchī a̍ wāa̍ ā mɔ̄ɔ̄sa᷅ŋ a̍ ya̍.

⁵“Ya̍ I̍ cho̍ māchūāā mɛ̄ɛ̍ tɔ̄lɔ̄ɔ̍ chō nu̍a̍ā yɛ̍. Nya̍ nya̍ chō māchūāā mɛ̄ɛ̍ lɛ̄ūwo̍ŋ ŋ̄ chō yɛ̍. Tē wāŋndo̍ hīōū lāchī a̍ wāa̍ ō mɔ̄ɔ̄sa᷅ŋ a̍ ya̍ pɛ̍, ndu̍yɛ̍, mī ya̍ I̍ hi̍o̍ū lāchī a̍ wāa̍ ō mɔ̄ɔ̄sa᷅ŋ a̍ ndu̍ pɛ̍, ō nɔ̄lā mbō yɔ̄ŋgu̍ kōmɔ̄ɔ̄ kɛ̄ndɔ̄ɔ̍ ta̍u̍. Kāni̍, tē ō cho̍ ya̍ le̍, lā nɔ̍lā mī lā tōsa̍ nyɛ̄ o̍ nyɛ̄ le̍.

⁶Ndu̍yɛ̍, ī chō yɔ̄nɔ᷄ŋ mɛ̄ɛ̍ nda̍ kīālū nu̍a̍ā lɛ̄vīī tɔ̄lɔ̄ɔ̍, mā vīōū ndi̍, mī ī vēsa̍ yɛ̍. Tē lɛ̄ūwūŋ wāā le̍ndo̍ŋ ŋ̄ vēsa̍ yɛ̄ pɛ̍, wāŋnda̍ hu᷄ŋ chɔ̍ɔ̍vīāā ā kɔ̍ dɔ̍ū o̍ yīŋ, ŋ̄ ŋūɛ̄. Le̍nde̍ i̍ cho̍ yɔ̄nɔ᷄ŋ a̍ wānāa̍ hi̍ū la̍chi̍ a̍ wāa̍ ā mɔ̄ɔ̄sa᷅ŋ a̍ ya̍ le̍ wa̍ ni̍.

⁷Tē lā hīōū lāchī a̍ wāa̍ ā mɔ̄ɔ̄sa᷅ŋ a̍ ya̍ pɛ̍, mī dīōmndā nīla̍ŋ lā hīōū lāchī a̍ wāa̍ o̍ nya̍ ni̍ŋ pɛ̍, lā nɔ̄lā mī lā nyūna̍ Fi̍nyā nūu̍ le̍ nyɛ̄ o̍ nyɛ̄ nya̍ yēēma̍, ndu̍yɛ̍, kīo̍o̍ o̍ ke᷅ nya̍ ni̍.

⁸Tē lā yɔ̄ŋgu̍ kōmɔ̄ɔ̄ kɛ̄ndɔ̄ɔ̍ pɛ̍ ta̍u̍, mɛ̄ɛ̍ o̍ nɛ̄īyo̍ ho̍ō ni᷄ŋ lā chɔ᷄m wāŋnda̍ māā bu̍ɛ̍i̍yāā nīa̍a̍ nya̍ chō ni̍. Ndu̍yɛ̍, o̍ he̍ī ni᷄ŋ ko̍ni̍ nya̍ tōsā ni̍ mī wāŋnda̍ chē mɛ̄ɛ̍ Fi̍nyā nūu̍ chō wāna̍ kɔ̄ndɔ̄fi̍li̍ yɛ̍.

⁹Mɛ̄ɛ̍ Mɛ̄lɛ̄ka̍ Fi̍nyā nūu̍ kāāla̍ ya̍ yɛ̍, le̍nde̍ ko̍ni̍ ya̍ I̍ ka̍a̍la̍ nya̍ ni̍. Lā hīo̍u̍ la̍chi̍ a̍ wāa̍ o̍ kāālā nūu̍ bɛ̄ŋgu̍.

¹⁰Tē lā chu̍a̍ sāwāla̍ nīla̍ŋ pɛ̍, mɛ̄ɛ̍ lā chō hīōūwɔ̄ɔ̄ lāchī a̍ wāa̍ o̍ kāālā nūu̍ bɛ̄ŋgu̍. Mɛ̄ɛ̍ ya̍ I̍ chu̍a̍ sāwāla̍ Fi̍nyā nūu̍, mi̍ I̍ wa᷅ hīōūwɔ̄ɔ̍ lāchī a̍ wāa̍ o̍ kāālā ndɔ̄ɔ̍ bɛ̄ŋgu̍ yɛ̍.

¹¹“Dīōmndā ya̍ I̍ di̍mu̍l nya̍ la᷅ŋ nda̍ŋ, I̍ di̍mu̍l nya̍ la̍ŋ kpo̍u̍ le̍ mī lā sɔ̄la̍ kɔ̄l kɛ̄ndɛ̍ cho̍ ya̍ ni᷄ŋ ndo̍, ndu̍yɛ̍ mī kɔ̄l nyā kɛ̍ndɔ̄ɔ̍ fūūlu̍u̍ mɛ̍ɛ̄.

¹²Lā kāāli̍āŋ ve᷅llāa̍ vēllē mɛ̄ɛ̍ ya̍ I̍ ka̍a̍la̍ nya̍ yɛ̍. Sāwa̍ nūu̍ cho̍ ho̍ō le̍ nya̍ ni̍.

¹³Kāālā o̍ kāālā hīu̍ lɛ̍ ho̍ō le̍, ō wāŋndo̍ kāālā ndi̍a̍a̍mɔ̍ɔ̍wa̍a̍ ndūa̍a̍, o̍ ko̍ŋ kɔ̍ɔ̍lī mbō sɔ̄la̍ pīɔ̍mndo̍ le̍ nda̍ wo̍.

¹⁴Tē lā tōsa̍ nyɛ̄ ya̍ I̍ di̍mu̍l nya̍ wo̍ pɛ̍, mɛ̄ɛ̍ ndi̍a̍a̍mɔ̍ɔ̍wa̍a̍ nīa̍a̍ nya̍ chō ni̍.

¹⁵I̍ cho̍ lɛ̍ nya̍ vēēlū āā bu̍ɛ̍i̍yāā nī le̍. Kāni̍ fu̍u̍le̍, bu̍ɛ̍īyo̍ ō chi̍ī nyɛ᷅ ma̍sānɔ̄ ndɔ̄ɔ̍ kɛ̄ɛ̄sīāā le̍ tōsāa̍ wo̍ sīnā le̍. I̍ ve̍e̍lū ni᷅ŋ ma̍ve̍e̍lāā nya̍ āā ndi̍a̍a̍mɔ̍ɔ̍wa̍a̍ nīa̍a̍. Kāni̍ fu̍u̍le̍, I̍ bi̍ī mi̍ chɔ᷅m nya̍ nyɛ̄ o̍ nyɛ̄ Fi̍nyā nūu̍ ō dīmu̍l la̍.

¹⁶Ō cho̍ nya̍ le̍ hɛ̍li̍ ya̍ le̍. Ya̍ hɛ̍li̍ nya̍ ni̍, mi̍ ke᷅ nya̍ wa̍li̍ kpe̍e̍kpe̍i̍ le̍ tōsāa̍. Ndu̍ yɔ̍nu̍ŋ ni̍ māā, mī lā yɔ̍ŋgu̍ kōmɔ̄ɔ̍ o̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍. O̍ ko̍ŋ, nyɛ̄ o̍ nyɛ̄ tē lā nyūna̍ Fi̍nyā nūu̍ le̍ ndu̍ a̍ dīōlā nīla̍ŋ pɛ̍, kīo̍o̍ o̍ ke᷅ nya̍ ni̍.

¹⁷Le̍la̍ŋ, sāwa̍ ya̍ I̍ cho̍ nya̍ dōū wo̍, ndu̍ cho̍ ho̍ō ni̍, māā lā kāāli̍āŋ ve᷅llāa̍ vēllē.”

¹⁸“Wānāa̍ cho̍ le̍ chi̍e̍ēŋndo̍ wa̍ ā chō nya̍ yɛ̄le̍ŋ tūl. Kɛ̍ ndu̍yɛ̍, tē ā tu᷄l nya̍ lēyɛ̄ pɛ̍, lā lōōnu̍ŋ māā ya̍ fɛ̍lɛ̍ŋ nda̍ tu᷄l lēyɛ̄.

¹⁹Tē nya̍ a̍a̍ wa̍ le̍ chi̍e̍ēŋndo̍ pɛ̍, wānāa̍ cho̍ le̍ chi̍e̍ēŋndo̍ wa̍, ā wa̍ nya̍ kāālā māā wānāā ndā. Kɛ̍ ndu̍yɛ̍, I̍ hɛ̍li̍ nya̍ le̍ mī lā sōli̍ bāla̍ŋ o̍ sɔ̄ɔ̍ŋ chi̍e̍ēŋndo̍ŋ ni᷄ŋ. Le̍ he̍ī lā cho̍ lɛ̍ le̍ chi̍e̍ēŋndo̍ le̍. Le̍ sa̍bōo̍ ho̍ō nda̍ tu᷄l nya̍ lēyɛ̄ ni̍.

²⁰Lā lōōnu̍ŋ a̍ dīōm ya̍ I̍ di̍mu̍l nya̍ wo̍. Mi̍ di̍mūl nya̍ māā chīɔ̍ɔ̍ ō cho̍ o̍ bɛ̍ndū mbō hīōū wāna̍ o̍ cho̍ o̍ bā wo̍ le̍. Mɛ̄ɛ̍ nda̍ tūsi̍ ya̍ nyɛ̄ pālāa̍ chōo̍ yɛ̍, le̍nde̍ ko̍ni̍ nda̍ chō nya̍ nyɛ̄ pālāa̍ tūsī chōo̍ ni̍. Mɛ̄ɛ̍ nda̍ chu̍a̍ pɛ̄ɛ̄kūlā nīla̍ŋ yɛ̍, le̍nde̍ ko̍ni̍ nda̍ chō pɛ̄ɛ̄kūlā nyāla̍ŋ chūā ni̍.

²¹Ā chō mu᷅ŋ ki̍nɛ̍i̍ to̍sā a̍ nya̍ le̍ mɛ̄ɛ̍ nya̍ chō bu̍ɛ̍i̍yāā nīa̍a̍ yɛ̍, ndu̍yɛ̍ vɛ̄lɛ̄, le̍ mɛ̄ɛ̍ nda̍ si̍nā wa᷅na̍ ve᷅m ya̍ wo̍ le̍ yɛ̍.

²²Tē ya̍ i̍i̍ hi̍ŋ kpo̍so̍ŋ mi̍ hu̍ŋ so̍ō nāa̍ nda̍ chūā le̍, mɛ̄ɛ̍ tɔ̍ɔ̍ya̍ŋ ve̍ wa᷅ nda̍ chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ te̍. Kɛ̍ ndu̍yɛ̍, I̍ hi᷅ŋ mi̍ hu̍ŋ so̍ō nāa̍ nda̍ chūā. Le̍la̍ŋ, ā nɔ̍lā lɛ̍ mā dīmi̍ māā ā sīna̍ pɛ̍ŋgu̍ māā yɔ̄ŋ wɔ̄ɔ̍ŋ te̍ le̍ nda̍ tōsa̍ le̍.

²³Wānā o̍ wāna̍ tu̍l la̍ lēyɛ̄ pɛ̍, mɛ̄ɛ̍ ō cho̍ ko̍ ya̍ le̍ o̍ tu̍l lēyɛ̄ le̍, mɛ̄ɛ̍ ō tu᷄l Fi̍nyā nūu̍ bɛ̍ɛ̍ le̍yɛ̍.

²⁴I̍ hi᷅ŋ mi̍ to̍sā sɔ̄ɔ̍ŋ kɔ̄ndɔ̄fi̍llo̍ŋ mu᷅ŋ nda̍ o̍ hɔ̄l ŋ̄ wānā o̍ wānā che᷅le̍ŋ to̍sa̍ wɔ̍ le̍ wo̍ŋ. Tē ya̍ i̍i̍ to̍sa̍ le̍nde̍ le̍, tɔ̍ɔ̍ya̍ŋ yɔ̄ŋndā ndāla̍ wɔ̍ɔ̍ŋnda̍ŋ ō ve̍ wa᷅ nda̍ chōo̍ le̍. Ā chē sɔ̄ɔ̍ŋ kɔ̄ndɔ̄fi̍li̍ŋ ya̍ I̍ to̍sa̍ wo̍ŋ. Kɛ̍ o̍ ko̍ŋ ni̍ŋ kpo̍u̍, ma̍ tūl la̍ lēyɛ̄ na̍a̍ Fi̍nyā nūu̍.

²⁵Kɛ̍ ndu̍yɛ̍, mɛ̄ɛ̍ mī ī yɔ̄nu̍ŋ le̍nde̍ le̍ mī nyɛ̍ cho̍ ō pōōnyīāā o̍ yāu̍ nda̍ lāsāwāa̍ ni᷄ŋ ndo̍ ō yɔ̄nu̍ŋ. Ī chō ī pōōnyīāā āā, ‘Fo̍ndō fu̍u̍ nda̍ tu᷄l la̍ lēyɛ̄ ni̍.’

²⁶“I̍ cho̍ nya̍ wānā ma̍lāa̍ yɔ̄ŋ, chɔ̄nɔ᷄ŋndo̍ nāa̍ Fi̍nyā nūu̍ chūā. Nyi̍na̍ chɔ᷅m ko̍ŋ wa᷅ŋnda̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ wo̍, o̍ cho̍ chɔ̄nɔ᷄ŋndo̍ o̍ Mɛ̄lɛ̄ka̍ Fi̍nyāa̍ lo̍ wo̍, tē ō hīŋ pɛ̍, ndu̍ cho̍ hūnɔ̄ɔ̄ wāŋnda̍ dīmūl a̍ ya̍ o̍kɔ̄ɔ̄ ni̍.

²⁷Ndu̍yɛ̍, nya̍ bɛ̍ɛ̍ lā dīmūl ni̍ŋ wa᷅ŋnda̍ a̍ ya̍ o̍kɔ̄ɔ̄. Kāni̍ fu̍u̍le̍, lā wa̍ hɔ̄lāā tūlu̍ a̍ ya̍ chɔ̍ŋ o̍ kāndɔ᷄ŋndo̍ di̍.