Read Southern Kisi Chɔ᷄ŋ 16 Bible Online

Chɔ᷄ŋ 16 - Southern Kisi bible

Chɔ᷄ŋ 16

¹“Dīōmndā ya̍ I̍ di̍mu̍l nya̍ la᷅ŋ nda̍ŋ, I̍ di̍mi̍ la̍ŋ yɔ̄ŋi̍ nya̍ hu᷄ŋ ma᷅l lāāla᷄ŋ nya̍ nɔ̄ o̍ ya̍ ni̍ŋ ndo̍.

²Ā chō hūnɔ̄ɔ̄ nya̍ sōlī o̍ chīɛ̄īlā ndāla̍ nda̍ pīɛ̄ī Mɛ̍lɛ̄ka̍ la̍ŋ ni᷄ŋ. Ndu̍yɛ̍, te̍le̍ŋ fu̍u̍lūū ni̍ŋ mā dīī nya̍, kɛ̍ ndu̍yɛ̍, mī wānāa̍ di̍ī nya̍ ka̍ŋ nda̍ ā yīya̍ŋ māā tē ā tōsa̍ le̍nde̍ pɛ̍, mɛ̄ɛ̍ wa̍li̍ Mɛ̄lɛ̄ka̍a̍ nda̍ chō ko̍ŋ to̍sāa̍ ni̍.

³Wāŋnda̍ tōsā ni̍ŋ sɔ̍ɔ̍ŋ mu᷅ŋ a̍ nya̍, kāni̍ fo̍ndōle̍, pāāndu̍ bɛ̍ɛ̍ ā sīna̍ wa᷅na̍ Fi̍nyā nūu̍ ō chō wo̍ le̍, ndu̍yɛ̍, ā si̍nā wa᷅na̍ ya̍ I̍ cho̍ wo̍ le̍.

⁴Le̍ sa̍bū ya̍ I̍ cho̍ nya̍ pɔ̄ɔ̄ he̍ī dīmūl lo̍ cho̍ ni̍ māā tē bōōndi̍i̍ nda̍ chō sɔ̄ɔ̍ŋ mu᷅ŋ tōsā a̍ nya̍ ve̍ ī fūūlu̍u̍ pɛ̍, lā kɛ̄si̍ŋ dɔ̍ɔ̍ o̍ kɔ̄l māā I̍ di̍mu̍l nya̍ a̍ ndi̍ o̍kɔ̄ɔ̄. “Sɔ̄ɔ̍ŋ ya̍ I̍ cho̍ mu᷅ŋ nya̍ dīmūllo̍ wo̍ŋ, I̍ di̍mu̍l nya̍ mu̍ŋ o̍ pāāndōo̍ ni᷄ŋ te̍, kāni̍ fu̍u̍le̍, I̍ wa̍ wɔ̄ hɔ̄lāā tūlu̍ a̍ nya̍.

⁵Kɛ̍ pɛ̄ŋgo̍o̍ ho̍ō ni᷅ŋ, I̍ cho̍ mīīŋgōo̍ nāa̍ Fi̍nyā nūu̍ o̍ ve᷅m ya̍ wo̍ chūā. Kɛ̍ ndu̍yɛ̍, nya̍ ki̍nɛ̍i̍ wānā pi᷅lɛ̍ bɛ̍ɛ̍ o̍ nyu̍na̍ ya̍ bɛ̍ɛ̍ le̍ nāa̍ ya̍ I̍ cho̍ kɔ̄la̍ŋ nda̍ le̍.

⁶Kɛ̍ ndu̍yɛ̍, mɛ̄ɛ̍ ya̍ I̍ di̍mu̍l nya̍ māā I̍ cho̍ lākɔ̄nɔ᷄ŋ mi̍ kɔ̄lta̍ŋ lā tāmbū nya̍.

⁷Kɛ̍ ndu̍yɛ̍, mī di̍mu̍l nya̍ tōnya̍a̍, sūɛ̍i̍ kɛ̍ndɛ̄i̍ i̍ wa᷅ le̍ nya̍ ni̍ tē ō wa̍ pɛ̍ mī ma̍l mī ku̍ɛ̄. Kāni̍ fu̍u̍le̍, tē ō ve̍ mī I̍ ku̍ɛ̄ le̍, Wānā Ma̍lāa̍ ō hi᷅ŋ mbō hu᷄ŋ wa᷅ lātūlu̍ a̍ nya̍ le̍. Kɛ̍, tē ō wa̍ pɛ̍ mī I̍ ku̍ɛ̄, I̍ cho̍ ndu̍ yɔ̄ŋ nāa̍ nya̍ chūā.

⁸Tē ō hīŋ pɛ̍, ō chō hūnɔ̄ɔ̄ wāŋndā chīe̍e̍ya̍ chɔ̄m o̍ chi̍e̍ēŋndo̍ ni᷄ŋ māā ā bēndū nɛ̄īyo̍ a̍ nyɛ̍ kpe̍e̍kpe̍i̍ yɔ̄ŋ wɔ̄ɔ̍ŋndo̍ ō chō wo̍, ndu̍yɛ̍, mbō chɔ᷄m nda̍ māā ā bēndū nɛ̄īyo̍ le̍ yīya᷄ŋ nda̍ yīya̍ŋ māā I̍ cho̍ wa̍nā sa̍kpō Mɛ̄lɛ̄ka̍ o̍ hɔ̄l te̍ wo̍, ndu̍yɛ̍, ō chɔ̄m ni̍ŋ nda̍ vɛ̄lɛ̄ māā ā bēndū nɛ̄īyo̍ a̍ kɔ̍ɔ̍sɔ̍ Mɛ̄lɛ̄ka̍a̍ o̍kɔ̄ɔ̄.

⁹Nāa̍ nda̍ bēndū nɛ̄īyo̍ a̍ nyɛ̄ kpe̍e̍kpe̍i̍ cho̍ yɔ̄ŋ wɔ̄ɔ̍ŋndo̍ wo̍, ndu̍ cho̍ ni̍ māā wānā ma̍lāa̍ chō hūnɔ̄ɔ̄ tōsā mā sīna̍ māā tē wāŋndo̍ dōu̍ ti̍i̍nda᷄ŋndo̍ o̍ ya̍ ni̍ŋ te̍, mɛ̄ɛ̍ yɔ̄ŋ wɔ̄ɔ̍ŋndo̍ i̍ cho̍ ni̍.

¹⁰O̍ ko̍ŋ kɔ̍ɔ̍lī, nāa̍ nda̍ bēndū nɛ̄īyo̍ le̍ yīya᷄ŋ nda̍ yīya̍ŋ māā I̍ cho̍ wa̍nā sa̍kpō Mɛ̄lɛ̄ka̍ o̍ hɔ̄l te̍ wo̍, ndu̍ cho̍ ni̍ māā, ō chō tōsā mā sīna̍ māā wānā sa̍kpōo̍ ya̍ I̍ cho̍ Mɛ̄lɛ̄ka̍ o̍ hɔ̄l ni̍, kāni̍ fu̍u̍le̍ le̍ kɔ̄lā ya̍ I̍ cho̍ o̍ Fi̍nyā nūu̍ lo̍ lā chi᷅ lɛ̍ ya̍ le̍ wo̍.

¹¹Ndu̍yɛ̍, nāa̍ nda̍ bēndū nɛ̄īyo̍ a̍ kɔ̍ɔ̍sɔ̍ Mɛ̄lɛ̄ka̍a̍ o̍kɔ̄ɔ̄ wa̍, ndu̍ cho̍ ni̍ māā ō chō tōsā mā sīna̍ māā Mɛ̄lɛ̄ka̍ chīi̍ yāmɛ̍i̍ kīōlɔ̄ɔ̄, kāni̍ fu̍u̍le̍, ō chīi̍ wāna̍ cho̍ māsāa̍ le̍ chi̍e̍ēŋndo̍ ho̍ō wo̍ yāmɛ̍i̍ kīlūl.

¹²“Sɔ̄ɔ̍ŋ ka̍ ka̍ ŋ̍ cho̍ I̍ nɔ̍ mī I̍ di̍mu̍l nya̍ mu̍ŋ. Kɛ̍ ndu̍yɛ̍, tē I̍ chi̍i̍ nya̍ mu̍ŋ dīmūl pɛ̄ŋgo̍o̍ ho̍ō pɛ̍, ŋ̄ wā nya̍ ŋ̄ hīāūwāā māyōōmū.

¹³Tē ō lo̍ pɛ̍ o̍ ko̍ŋ mī nyi̍na̍ chɔ᷅m wa᷅ŋnda̍ tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ ō hīŋ, ndu̍ cho̍ tōsā ni̍ mī lā sīna̍ īsɔ̄ɔ̍ o̍ īsɔ̄ɔ̍ to᷅nya̍. Ō cho̍ di̍ōmndā ndɔ̄la̍ ndu̍ pi̍la̍ le̍ ō su̍a̍ā ni̍ŋ te̍. Nyɛ̄ o̍ tu̍ɛ̍ī Mɛ̍lɛ̄ka̍ o̍ sōndō wo̍, ndu̍ o̍ su̍a̍ā ni̍ŋ ni̍. Ndu̍yɛ̍, ō dīmūl ni̍ŋ nya̍ a̍ sɔ̄ɔ̍ŋ nɔ̍ le̍ hūnɔ̄ɔ̄ yɔ̄nɔ᷄ŋ ndo̍ wo̍ŋ o̍kɔ̄ɔ̄.

¹⁴Ndu̍ Nyi̍nā kōŋ ō chō tōsā mī wāŋnda̍ chē mɛ̄ɛ̍ ya̍ I̍ cho̍ wāna̍ kɔ̄ndɔ̄fi̍li̍ yɛ̍. Kāni̍ fo̍ndōle̍, tē ō tūēī sɔ̄ɔ̍ŋ mu᷅ŋ ya̍ o̍ sōndō pɛ̍, ō chu̍a̍ mu̍ŋ, o̍ ko̍ŋ kɔ̍ɔ̍lī, ō dīmu̍l nya̍ mu̍ŋ.

¹⁵Nyɛ̄ o̍ nyɛ̄ kpo̍u̍ Fi̍nyā nūu̍ nɔ̄, ya̍ nɔ̍ ni̍. Le̍ sa̍bōo̍ ho̍ō ya̍ I̍ di̍mi̍ ni̍ māā, tē Nyi̍na̍ Mɛ̄lɛ̄ka̍a̍ tūēī sɔ̄ɔ̍ŋ mu᷅ŋ ya̍ o̍ sōndō pɛ̍, ō chu̍a̍ mu̍ŋ, o̍ ko̍ŋ kɔ̍ɔ̍lī, ō dīmu̍l nya̍ mu̍ŋ.”

¹⁶Mi̍ Chi̍i̍sū di̍mūl vɛ̄lɛ̄ bu̍ɛ̍i̍yāā ndūa̍a̍ āā, “Te̍le̍ŋ bi̍ŋgī ko̍ni̍ o̍ lo̍ ni̍, lā chi᷅ lɛ̍ ni̍ŋ ya̍ le̍. Kɛ̍ ndu̍yɛ̍, tē te̍le̍ŋ bi̍ŋgī ō hīōū vɛ̄lɛ̄ pɛ̍, lā chē vɛ̄lɛ̄ ya̍.”

¹⁷O̍ ko̍ŋ kɔ̍ɔ̍lī, mi̍ bu̍ɛ̍i̍yāā ndūa̍a̍ ā pūm ā kāndū nyūūni̍āŋndo̍ āā, “Ō yɛ̄ɛ̍nɛ̍ o̍ di̍mi̍ yɛ̄ ko̍ŋ? Vɛ᷅ mbo̍ dīmī māā, te̍le̍ŋ bi̍ŋgī ko̍ni̍ o̍ lo̍ ni̍ ŋ̄ chi᷅ lɛ̍ ni̍ŋ ndu̍ le̍, māā kɛ̍ ndu̍yɛ̍, tē te̍le̍ŋ bi̍ŋgī ō hīōū vɛ̄lɛ̄ pɛ̍, ŋ̄ chē vɛ̄lɛ̄ ndu̍? Ō dīmi̍ vɛ̄lɛ̄ māā ŋ̄ chi᷅ ndu̍ le̍, māā, fo̍ndōle̍, ō chō la̍ŋ o̍ Fi̍nyā ndɔ̄ lo̍.

¹⁸Yɛ̄ɛ̍nɛ̍ o̍ di̍mi̍ yɛ̄ ko̍ŋ māā te̍le̍ŋ bi̍ŋgī ko̍ni̍ o̍ lo̍ ni̍? Ŋ̄ si̍nā nyɛ᷅ o̍ di̍mi̍ ko̍ŋ ndo̍ pɛ̄ŋgu̍ le̍.”

¹⁹Mi̍ Chi̍i̍sū si̍nā māā ā hɛ̄na̍ŋ mā nyūna̍ ndu̍ a̍ sɔ̄ɔ̍ŋ o̍ di̍mi̍ wo̍ŋ o̍kɔ̄ɔ̄. O̍ ko̍ŋ, mbo̍ dīmūl nda̍, āā, “Ya̍ di̍mu̍l nya̍ ni̍ māā te̍le̍ŋ bi̍ŋgī ko̍ni̍ o̍ lo̍ ni̍, lā chi᷅ lɛ̍ ni̍ŋ ya̍ le̍. Kɛ̍ ndu̍yɛ̍, māā tē te̍le̍ŋ bi̍ŋgī ō hīōū vɛ̄lɛ̄ pɛ̍, lā chē vɛ̄lɛ̄ ya̍. Dīōmnda̍ŋ nda᷅ŋ te̍ nya̍ chō nyūūni̍āŋndo̍ le̍ nyɛ̄ la̍ si̍m ndo̍ le̍?

²⁰Mī I̍ di̍mu̍l nya̍ tōnya̍a̍ wa̍la̍ŋ, lā chō hūnɔ̄ɔ̄ cha᷄ŋ cha̍ŋ īmɔ̍nɔ̍ɔ̍. Kɛ̍, wāŋnda̍ o̍ chi̍e̍ēŋndo̍ ni᷄ŋ, nda̍ nda̍ chō wā a̍ kɔ̄l kɛ̄ndɛ̄. Lā chō hūnɔ̄ɔ̄ kɔ̄l tāmbu̍. Kɛ̍ ndu̍yɛ̍ o̍ ko̍ŋ kɔ̍ɔ̍lī, kɔ̄l tāmbɛ̍i̍ ka̍lāa̍ sīmnūŋ ni̍ŋ kɔ᷅l kɛ̄ndɔ̄ɔ̍.

²¹Tē bōōndi̍i̍ wānā la̍nɔ̍ɔ̍ ō nɔ̄ le̍ vīōlɔ̄ɔ̍ ve̍ ī fūūlu̍u̍ pɛ̍, nyɛ̄ nɛ̄īyāa̍ pi̍la̍ wa᷅ ndu̍ chōo̍ ni̍. Kāni̍ fu̍u̍le̍, bōōndi̍i̍ nyɛ̄ nɛ̄īyāa̍ ō kōmāl ndu̍ ve̍ ī fūūlu̍u̍. Kɛ̍, tē ō vēlū ni᷅ŋ pɛ̍, ō pu̍ɛ̍ɛ̍ŋ dɔ̍ɔ̍ nyɛ̄ nɛ̄īyāā o̍ wa̍ lēni᷄ŋ ndo̍. Kāni̍ fu̍u̍le̍, ō wā ni᷅ŋ a̍ kɔ̄l kɛ̄ndɛ̄ le̍ mɛ̄ɛ̍ o̍ ve̍lū chɛ̄lɛ̄kpɛ̍ sɛ̍nɛ̄īyo̍ yɛ̍.

²²Le̍nde̍ i̍ wa᷅ ni̍ŋ a̍ nya̍ ni̍. Lā chō a̍ kɔ̄ltā tāmbɛ̍i̍la̍ŋ bōōnde̍i̍ he̍ī. Kɛ̍, bōōndi̍i̍ cho̍ hūnɔ̄ɔ̄ fūūlūū, na̍a̍ nya̍ā mī ŋ̄ chāna᷅ŋ vɛ̍lɛ̄. O̍ ko̍ŋ, lā wā ni̍ŋ a̍ kɔ̄l kɛ̄ndɛ̄ ta̍u̍. Ndu̍yɛ̍, wānā o̍ wānā nɔ̍lā ni̍ŋ mbō tɛ̄ɛ̄mbu̍u̍ kɔ̄l nyā kɛ̍ndɛ̄ kōŋ te̍.

²³“Tē pāa̍le̍ le̍ŋ lē fūūlu̍u̍ pɛ̍, lā nyu̍u̍nīāā lɛ̍ ni̍ŋ ya̍ nyūūnīāālā chēle̍ŋ te̍. Mī di̍mu̍l nya̍ tōnya̍a̍ wa̍la̍ŋ, nyɛ̄ o̍ nyɛ̄ nya̍ nyūna̍ Fi̍nyā nūu̍ dīōm le̍ ndu̍ a̍ dīōlā nīla̍ŋ pɛ̍, kīo̍o̍ o̍ ke᷅ nya̍ ni̍.

²⁴Chɔ̍ŋ ha̍a̍a̍ mbo̍ fūūlūū a̍ bōōnde̍i̍ he̍ī, lā nyūna̍ wɔ̍ Fi̍nyā nūu̍ dīōm le̍ nyɛ̄ a̍ dīōlā nīla̍ŋ te̍. Lā nyūna̍ ndu̍ dīōm le̍ nyɛ̄ nya̍ hāu̍ bā wo̍. Ō nɔ̄lā mbō ke̍ nya̍ le̍ mī lā wa̍ a̍ kɔ̄l kɛ̄ndɛ̄ mī kɔ̄l nyā kɛ̍ndɔ̄ɔ̍ fūūlu̍u̍ mɛ̍ɛ̄.”

²⁵“O̍ tāle̍la̍ŋ ni᷄ŋ ya̍ i̍i̍ nɔ̍ nya̍ sɔ̄ɔ̍ŋ dīmūllo̍ ni̍. Kɛ̍, bōōndi̍i̍ chō fūūlūū, tē ī fūūlu̍u̍ pɛ̍, I̍ su̍ū lɛ̍ ni̍ŋ na̍a̍ nya̍ chūā o̍ lātāle̍ ni᷄ŋ te̍. I̍ cho̍ hūnɔ̄ɔ̄ nya̍ sɔ̄ɔ̍ŋ chɔ̄m kpe̍nde̍ke̍le̍ a̍ Fi̍nyā nūu̍ o̍kɔ̄ɔ̄.

²⁶Pāa̍le̍ le̍ŋ lā chō Fi̍nyā nūu̍ dīōm nyūnā le̍ nyɛ̄ nya̍ hāu̍ bā wo̍ a̍ dīōlā nīla̍ŋ. O̍ ko̍ŋ, mī I̍ nyu̍na̍ lɛ̍ bɛ̍ɛ̍ Mɛ̍lɛ̄ka̍ dīōm le̍ mbō ke̍ nya̍ nyɛ̄m mu᷅ŋ tē.

²⁷Kāni̍ fu̍u̍le̍, Fi̍nyā nūu̍ pi̍la̍ ō kāāla̍ nya̍ le̍ mɛ̄ɛ̍ nya̍ kāāla̍ ya̍, ndu̍yɛ̍, mi̍ lā lāāla᷄ŋ māā nāa̍ ndu̍ Mɛ̍lɛ̄ka̍ chūā ya̍ I̍ chɛ̍ŋ ni̍ yɛ̍.

²⁸Ī chō tōnya̍ māā nāa̍ ndu̍ chu̍a̍ ya̍ I̍ chɛ̍ŋ ni̍, mi̍ hu᷅ŋ o̍ chi̍e̍ēŋndo̍ chōo̍. Ndu̍yɛ̍, I̍ cho̍ hūnɔ̄ɔ̄ su̍ŋ chi̍e̍ēŋndo̍ ho̍ō mālɔ̄ɔ̄ mī I̍ mi̍i̍ŋgu̍ nāa̍ ndu̍ Fi̍nyā nūu̍ chūā.”

²⁹Mi̍ bu̍ɛ̍i̍yāā ndūa̍a̍ dīmūl ndu̍ āā, “Ɛ̄ɛ̄ hɛ̍ɛ̄, ā chō ni᷅ŋ sūɛ̍i̍ nyɛ̄ kɛ̄ndɛ̄ wa̍la̍ŋ. A̍ cho̍ lɛ̍ īsɔ̄ɔ̍ o̍ lātāle̍ ni᷄ŋ te̍.

³⁰Ŋ̄ sīna̍ ni᷅ŋ wa̍la̍ŋ māā nūm ā sīnā i̍sɔ̍ɔ̍ o̍ īsɔ̄ɔ̍ fe̍e̍. Nyūna̍ wa᷅ wa᷅ŋndo̍ o̍ kɔ̄l lo̍, mī wānā chɔ̍m nu̍m bɛ̍ɛ̍ le̍, ā sīnā. He̍ī to̍sa̍ ni̍ mi̍ ŋ̄ lāāla̍ŋ māā nāa̍ Mɛ̄lɛ̄ka̍ chūā ŋ̄ chɛ᷄ŋ ni̍.”

³¹Mi̍ Chi̍i̍sū nyu̍nā nda̍ āā, “Lēkɛ̍ndɛ̄, lā lāāla̍ŋ ni᷅ŋ?

³²Bōōndi̍i̍ cho̍ fūūlūū, ndu̍yɛ̍, ī fūūlāā bɛ̍ɛ̍ i̍ cho̍ ni᷅ŋ ni̍, lā chō sāŋnɔ᷄ŋ. Nya̍ pi̍lɛ̍ŋ pi̍lɛ̍ŋ nda̍ fa̍ū lā chō lākɔ̄nɔ᷄ŋ o̍ lā nya̍ lo̍, mī lā mɛ̄i̍ ya̍ ya̍ pīlɛ̍ kpe̍. Kɛ̍ ndu̍yɛ̍ vɛ̍lɛ̄, I̍ ve᷅ ni̍ŋ ya̍ pīlɛ̍ le̍, kāni̍, Fi̍nyā nūu̍ chō hɔ̄lāā tūlu̍ a̍ ya̍.

³³I̍ di̍mu̍l nya̍ he̍ī le̍ mī lā sɔ̄la̍ kɔ̄l nyūlōo̍ le̍ chō nya̍ chō dīōm pīlɛ̍ a̍ ya̍ wo̍. Lā sɔ̄lā ni̍ŋ nyɛ᷅ pālāa̍ o̍ chi̍e̍ēŋndo̍ ho̍ō ni᷄ŋ, kɛ̍ ndu̍yɛ̍, lā bīi̍ kɔ᷅ltā nyāla̍ŋ. I̍ chi̍i̍ chi̍e̍ēŋndo̍ ho̍ō yōmɔ̄ɔ̄.”