Read Southern Kisi Chɔ᷄ŋ 18 Bible Online

Chɔ᷄ŋ 18 - Southern Kisi bible

Chɔ᷄ŋ 18

¹Mɛ̄ɛ̍ Chi̍i̍sū chi̍i̍ Mɛ̄lɛ̄ka̍ pīɛ̄īyo̍ mbo̍ chūā bu̍ɛ̍i̍yāā ndūa̍a̍, ma̍ kūānu᷄ŋ. Ma̍ tāŋ pēē pɔ̍mbɔ̄ pīlɛ̍ dīōla̍ŋ āā, Ki̍di̍lɔ̄ŋ. Kpe̍le̍ pu̍m wa̍ pēē pɔ̍mbɔ̄ kōŋ lēe̍lōo̍ lo̍ŋ, mi̍ Chi̍i̍sū nda̍ bu̍ɛ̍i̍yāā ndūa̍a̍ ā lūɛ̄ī lēni᷄ŋ.

²Ndu̍yɛ̍, Chu̍dā o̍ wa̍ hūnɔ̄ɔ̄ ndu̍ pīsī wo̍ ndu̍ o̍o̍ si̍nā fo̍ndāŋ kōŋ. Kāni̍ fu̍u̍le̍, lo̍ŋ Chi̍i̍sū nda̍ bu̍ɛ̍i̍yāā ndūa̍a̍ nda̍ a̍a̍ nɔ̍ chūūŋgi̍āŋndo̍ ni̍.

³O̍ ko̍ŋ kɔ̍ɔ̍lī, mi̍ Chu̍dā hu᷅ŋ a̍ so̍vɛ̄i̍ya̍a̍ māLu̍o̍māŋnda̍ ku̍ndā a̍ pōli̍si̍i̍ya̍a̍ ma̍ndā chi̍ɛ̍ī Chu̍ūwa̍ sōlī sa̍lāa̍ wo̍ wa̍ o̍ kpe̍le̍ ko̍ŋ ni᷄ŋ. Wānāā bɛ̄ndūāā sōlīāā lāsa̍lāa̍ a̍ ku̍ndā Fālīsi̍īya̍ nda̍ nda̍ a̍a̍ ve᷅m nda̍ ni̍. Ma̍ hūŋ a̍ la̍mbūi̍la̍ŋ o̍ lābā, a̍ tɛ̄ŋgɛ̍la̍ŋ, a̍ nyɛ̄m pīāāndo᷄ŋ.

⁴Chi̍i̍sū ndu̍ o̍o̍ si̍nā ni᷅ŋ nyɛ̄ o̍ nyɛ̍ wa̍ ndu̍ hūnɔ̄ɔ̄ yɔ̄nɔ᷄ŋ. Mɛ̄ɛ̍ nda̍ fūūlu̍u̍ lo̍ŋ, mi̍ Chi̍i̍sū fu̍lā mbo̍ nyūnā nda̍ āā, “Ō nɛ̄ɛ̍nɛ̍ nya̍ chō yɛ̄ nūūvīa̍a̍?”

⁵Ma̍ dīmī āā, “Chi̍i̍sū o̍ fu̍la̍ Na̍a̍sa̍lūɛ̄ī chi̍e̍e̍ wo̍, ndu̍ na̍a̍ ŋ̄ chō nūūvīa̍a̍ ni̍.” Mi̍ Chi̍i̍sū mu̍lī āā, “Mɛ̄ɛ̍ mi̍ che᷄ŋ ya̍.” Chu̍dā o̍ pi̍si̍ ndu̍ wo̍ ō wa̍ īsīsi̍ lo̍ŋ nda̍ tɛ̄ɛ̄ŋ.

⁶Mɛ̄ɛ̍ Chi̍i̍sū di̍mi̍ dɔ̍ɔ̍ āā, “Mɛ̄ɛ̍ mi̍ che᷄ŋ ya̍,” ma̍ mīīŋgū a̍ mākɔ̄ɔ̄ ma̍ dēlī lɛ̄ŋ lɛ̍ɛ̍si̍ɛ̍ŋ.

⁷Mbo̍ nyūnā nda̍ vɛ̄lɛ̄ āā, “Nɛ̄ɛ̍nɛ̍ nya̍ chō yɛ̄ nūūvīa̍a̍?” Ma̍ dīmī vɛ̄lɛ̄ āā, “Chi̍i̍sū fu̍la̍ Na̍a̍sa̍lūɛ̄ī yo̍.”

⁸Mi̍ Chi̍i̍sū di̍mī āā, “I̍ chi̍i̍ nya̍ dīmūl māā ya̍ cho̍ Chi̍i̍sū ni̍. Tē ō wa̍ ya̍ pɛ̍ nya̍ chō nūūvīa̍a̍ ni̍, mɛ̄ɛ̍ ha̍ā nda̍ nda̍ kɔ̄nu̍ŋ.”

⁹He̍ī yɔ̄nu̍ŋ le̍ mī nyɛ̄ ndu̍ o̍o̍ di̍mi̍ wo̍ ō yɔ̄nu̍ŋ. Kāni̍, mbo̍ dīmī āā, “Wānāā ŋ̄ ke̍ ya̍ wa̍ ki̍nɛ̍i̍, ō pīlɛ̍ bɛ̍ɛ̍ o̍ la̍a̍si̍a̍ŋ te̍.”

¹⁰O̍ ko̍ŋ kɔ̍ɔ̍lī, Sa̍i̍mɔ̄ŋ Pītɛ̍ ndu̍ o̍o̍ nɔ̍ mūɛ̄ī fāŋnde̍. Mbo̍ nāŋ ndi̍ ya̍ū, mbo̍ lɔ̄wā po̍ pi᷅lɛ̍ a̍ ndi̍ chu̍ɛ̍i̍, mbo̍ kīālū ndu̍ nīlē bā kɛ̄ndɛ̄le̍ŋ kpa̍li̍. Māsa̍ wānāā sōlīāā lāsa̍lāa̍, chɛ̄ ndɔ̄ɔ̍ pōo̍ ho̍ō wa̍ ni̍, mā vēēlū po̍ chɛ᷅ kōŋ āā, Ma̍li̍kɔ̄ɔ̄.

¹¹Mi̍ Chi̍i̍sū di̍mūl Pītɛ̍ āā, “Mi̍ŋgi̍ mu̍ɛ̍ī nūmnde̍ o̍ bōo̍ ni᷄ŋ. Kāni̍ fu̍u̍le̍, I̍ nɔ̍ mī I̍ ko̍l o̍ tāāla̍ īmɔ̍nɛ̍ Fi̍nyā nūu̍ ke̍ ya̍ le̍ kōlɔ̄ɔ̍ lēni᷄ŋ ndo̍.”

¹²Mi̍ so̍vɛ̄i̍ya̍a̍ māLu̍o̍māŋnda̍, a̍ wāna̍ wa̍ nda̍ bōlle̍ŋ ndo̍, a̍ pūa̍a̍ ma̍ndā chi̍ɛ̍ī Chu̍ūwa̍ sōlī sa̍lāa̍ wo̍ wa̍, ā bīī Chi̍i̍sū. Bīyɔ̄ɔ̍ ndu̍, ma̍ yīī ndu̍ po᷅ŋ.

¹³Ma̍ kūā fɛ̍ɛ̍ŋ a̍ ndu̍ o̍ A̍na̍sī lo̍, Ka̍ya̍fāā, o̍ wa̍ māsa̍ wānāā sōlīāā lāsa̍lāa̍ wɔ̄sī kōŋ ndo̍, lēfū ndɔ̄.

¹⁴Ka̍ya̍fāā ko̍ŋ yɛ̍, ndu̍ ndu̍ o̍o̍ di̍mu̍l wānāā bɛ̄ndūāā Chu̍ūwa̍ te̍le̍ŋ pi᷅lɛ̍ ni̍ māā ō bɛ̄nda̍ mī wānā pi᷅lɛ̍ vī le̍ wāŋnda̍.

¹⁵Sa̍i̍mɔ̄ŋ Pītɛ̍ ni̍, a̍ Chi̍i̍sū bu̍ɛ̍ī ndɔ̄ pi᷅lɛ̍, ma̍ tūāl Chi̍i̍su̍ kɔ̄ɔ̄lī. Māsa̍ wānāā sōlīāā lāsa̍lāa̍, nda̍ a̍a̍ si᷅na᷅ŋ ta̍u̍ nda̍ nda̍ bu̍ɛ̍ī kōŋ. Mɛ̄ɛ̍ nda̍ fūūlu̍u̍ o̍ bɛ̍ɛ̄ chīɛ̄ī māsa̍ wānā so̍līāā lāsa̍lāa̍ kōŋ, mi̍ bu̍ɛ̍ī kōŋ lūɛ̄ī Chi̍i̍su̍ kɔ̄ɔ̄lī.

¹⁶Mi̍ Pītɛ̍ ndu̍ si᷅m o̍ kpākīo̍o̍ lēkɔ̍ɔ̍lī o̍ dīō. Mi̍ bu̍ɛ̍i̍ nda̍ a̍a̍ si᷅na᷅ŋ ko̍ŋ nda̍ māsa̍ wānā so̍līāā lāsa̍lāa̍ wo̍ o̍ mīīŋgū. Mbo̍ kɔ̍ so̍ō nāa̍ chūāāmbɔ̄ bu̍ɛ̍īyo̍ chūā, o̍ wa̍ o̍ kpākīo̍o̍ sōndōo̍ wo̍. Mbo̍ tōsā ma̍ lūɛ̄ī nda̍ Pītɛ̍.

¹⁷Mi̍ chūāāmbɔ̄ bu̍ɛ̍i̍ wa̍ ko̍ŋ o̍ dīō wo̍ lō o̍ ko̍ŋ mbo̍ nyūnā Pītɛ̍ āā, “Nya̍ le̍ cho̍ pōo̍ ho̍ō bu̍ɛ̍i̍yāā ndūa̍a̍ le̍?” Mi̍ Pītɛ̍ vi̍i̍nu᷄ŋ. Mbo̍ dīmī āā, “Ɛ̄ ɛ̍, I̍ cho̍ bu̍ɛ̍ī ndɔ̄ le̍.

¹⁸“Mi̍ bu̍ɛ̍i̍yāā māsa̍ wānāā sōlīāā lāsa̍lāa̍ a̍ pōli̍sīi̍yāa̍ ma̍ndā chi̍ɛ̍ī Chu̍ūwa̍ sōlī sa̍lāa̍ wo̍ wa̍ ā kīīsūū yīŋnde̍ŋ, kāni̍, hūēīye̍ ī wa̍. Mɛ̄ɛ̍ nda̍ kīīsu̍u̍ yīŋnde̍ŋ, ma̍ sīm hāŋgɔ̄ɔ̍ ā bālāā yīŋnde̍ŋ si̍lɔ̍. Mi̍ Pītɛ̍ bɛ̍ɛ̍ o̍ ku̍ā, mbo̍ sīm hāŋgɔ̄ɔ̍ nda̍ nda̍ā.”

¹⁹Mi̍ māsa̍ wānāā sōlīāā lāsa̍lāa̍ ō nyūnā Chi̍i̍su̍ a̍ bu̍ɛ̍i̍yāa̍ ndūa̍a̍ o̍kɔ̄ɔ̄. Mbo̍ nyūnā ndu̍ vɛ̄lɛ̄ a̍ pɛ̄ɛ̄kūlā o̍ wa̍ wāŋnda̍ la̍ŋ o̍kɔ̄ɔ̄.

²⁰Mi̍ Chi̍i̍sū di̍mūl ndu̍ āā, “Kpe̍nde̍ke̍le̍ ya̍ I̍ wa̍ wāŋnda̍ pɛ̄ɛ̄kōo̍ lɔ̍ɔ̍ lɔ̍ɔ̍ ni̍. O̍ chīɛ̄īlā Chu̍ūwa̍ pi̍ɛ̍i̍ Mɛ̄lɛ̄ka̍la̍ŋ ni᷄ŋ ni̍ a̍ o̍ chīɛ̍i̍ Mɛ̄lɛ̄ka̍a̍ ni᷄ŋ, nāa̍ wānāā nāa̍ ā chūūŋgi̍āŋ nda̍, lo̍ŋ ya̍ I̍ wa̍ wāŋnda̍ pɛ̄ɛ̄kōo̍ ni̍. Nyɛ̄ o̍ nyɛ̄ ya̍ di̍mu̍l nda̍, I̍ di̍mu̍l nda̍ ndu̍ sɔ̍ɔ̍ sɔ̍ɔ̍ le̍.

²¹Le̍ sa̍bū yɛ̄ɛ̍nɛ̍ ŋ̄ chō yɛ̄ ni᷅ŋ ya̍ nyūnāa̍? Wānāa̍ tu̍e̍ī dīōmndā ya̍ I̍ di̍mi̍ la̍ŋ nda̍ ŋ̄ nyūnā ni̍. Nda̍ sīnā nyɛ᷅ ya̍ I̍ di̍mi̍ wo̍.”

²²Mɛ̄ɛ̍ Chi̍i̍sū di̍mi̍ le̍nde̍, pōli̍sīi̍yāa̍ ma̍ndā chi̍ɛ̍i̍ Mɛ̄lɛ̄ka̍a̍ wa̍ ō pīlɛ̍ wa̍ īsīsi̍ lo̍ŋ, mbo̍ sōlī bāa̍ mbo̍ lūāā Chi̍i̍su̍ kpa᷅ŋnde̍. Mbo̍ dīmūl ndu̍ āā, “Vɛ᷅ mā mu̍li̍ bāli̍o̍o̍ māsa̍ wānāā sōlīāā lāsa̍lāa̍ o̍ sōndō le̍nde̍?”

²³Mi̍ Chi̍i̍sū di̍mūl ndu̍ āā, “Tē ō wa̍ dīōm wɔ̄ɔ̍ŋ pɛ̍ ya̍ I̍ di̍mi̍ pɛ̍, mɛ̄ɛ̍ chɔ̍m ndɔ̍ di̍ōm wɔ̄ɔ̍ŋ kōŋ. Kɛ̍, tē I̍ di̍mi̍ di̍ōm wɔ̄ɔ̍ŋ te̍, mɛ̄ɛ̍ le̍ sa̍bū yɛ̄ɛ̍nɛ̍ ŋ̄ lɔ̄ɔ̄ yɛ̄ ni᷅ŋ ya̍?”

²⁴O̍ ko̍ŋ kɔ̍ɔ̍lī, mi̍ A̍na̍sī yɔ᷅ŋ Chi̍i̍su̍ ō yīyāā le̍nde̍ nāa̍ Ka̍ya̍fāā chu̍a̍, o̍ wa̍ māsa̍ wānāā sōlīāā lāsa̍lāa̍ wo̍.

²⁵A̍ bōōndi̍i̍ ke̍ŋ Sa̍i̍mɔ̄ŋ Pītɛ̍ wa̍ wɔ̄ īsīsi̍ ha̍ŋgɔ̄ɔ̍. Mi̍ wānā pu̍m lō o̍ ko̍ŋ mbo̍ nyūnā ndu̍ āā, “Nūm bɛ̍ɛ̍ bu̍ɛ̍ī ndɔ̄ɔ̍ ŋ̄ chō ni̍ nɛ̄ɛ̍?” Kɛ̍, mi̍ Pītɛ̍ vi̍i̍nu᷄ŋ. Mbo̍ dīmī āā, “Ɛ̄ ɛ̍. I̍ cho̍ bu̍ɛ̍ī ndɔ̄ le̍.”

²⁶Po̍ Pītɛ̍ lɔ̍wa̍ nīle̍ŋ ndo̍, wāna̍ ndɔ̄ pi᷅lɛ̍ ō wa̍ vɛ̄lɛ̄ lo̍ŋ, wāna̍ ndɔ̄ ko̍ŋ bɛ̍ɛ̍, chīɔ̍ɔ̍ o̍ wa̍ māsa̍ wānāā sōlīāā lāsa̍lāa̍ o̍ bā ni̍. Mbo̍ nyūnā Pītɛ̍ āā, “Ō cho̍ nu᷅m te̍ ya̍ che᷅ o̍ kpe̍lo̍o̍ ni᷄ŋ nya̍ nda̍ā le̍?”

²⁷Mi̍ Pītɛ̍ vi̍i̍nu᷄ŋ vɛ̍lɛ̄. Vīīnɔ᷄ŋ ko̍ŋ dɔ̍ɔ̍ mi̍ sɔ̄ɔ̍ kōōwā bɛ̍ɛ̍.

²⁸Īdīi̍yo̍ pu̍u̍ŋ, ma̍ cha᷄ŋ a̍ Chi̍i̍sū o̍ chīɛ̍i̍ Ka̍ya̍fāāwo̍, ma̍ kūā a̍ ndu̍ o̍ bɛ̍ɛ̄ lēmāsa̍ Pa̍i̍lē wo̍ nāa̍ Māsāa̍ Pa̍i̍lē chu̍a̍ o̍ wa̍ māsa̍ māLu̍o̍ma᷅ŋndo̍ le̍ būŋgɛ̄ī kēŋ ndo̍. Mɛ̄ɛ̍ nda̍ fūūlu̍u̍, Chu̍ūwa̍ nda̍ nda̍ lūe̍i̍ chi̍ɛ̍ī ni̍ŋ te̍, kāni̍ nda̍ a̍a̍ hɛ̍na̍ŋ mī nda̍ a̍a̍ to̍sa̍ īsɔ̄ɔ̍ o̍ īsɔ̄ɔ̍ i̍ si̍i̍ŋgūū nda̍ wānāā nɔ̄ɔ̄lɛ̍i̍ Mɛ̍lɛ̄ka̍ o̍ hɔ̄l te̍. Kāni̍ fo̍ndōle̍, nda̍ a̍a̍ hɛ̍na̍ŋ mī nda̍ a̍a̍ de᷅ nyɛ̄ dīāā bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄.

²⁹Le̍ sa̍bōo̍ ho̍ō mi̍ Pa̍i̍lē fu̍lā, mbo̍ hūŋ nāa̍ nda̍ chūā. Mbo̍ nyūnā nda̍ āā, “Sūɛ̍i̍ yɛ̄ɛ̄ po̍o̍ ho̍ō tɛ̄ɛ̄mbu̍u̍ yɛ̄ mi̍ lā hūŋ a̍ ndu̍?”

³⁰Ma̍ dīmī āā, “Tē ndu̍ o̍o̍ ve̍ wa̍nā wɔ̍ɔ̍ŋ te̍, ŋ̄ ve̍ hu̍nɔ̄ɔ̄ a̍ ndu̍ nāa̍ nūm chu̍a̍ le̍.”

³¹Mi̍ Pa̍i̍lē di̍mūl nda̍ āā, “Nya̍ pi̍la̍ lā kɔ̍, mī lā kɔ̍ kɔ̍ɔ̍sā a̍ ndu̍ mɛ̄ɛ̍ sāwā nya̍a̍ dīmi̍ yɛ̍.” Ma̍ dīmī āā, “Kpāāyā cho̍ na̍a̍ ō kēna᷄ŋ le̍ mī ŋ̄ kēlū īyāma̍ le̍ wāna̍ chi̍e̍e̍ di̍yɔ̄ɔ̄ le̍.”

³²He̍ī ī yɔ̄nu̍ŋ ma̍yɔ̍ŋna᷄ŋ le̍ mī nyɛ̄ Chi̍i̍sū di̍mu̍l pāāndū wāŋnda̍ a̍ pīɔ̍m ndɔ̄ɔ̍ o̍kɔ̄ɔ̄ wo̍ mbō yɔ̄nu̍ŋ mɛ̄ɛ̍ o̍ di̍mi̍ yɛ̍.

³³Mi̍ Māsāa̍ Pa̍i̍lē mi̍i̍ŋgū mbo̍ lūɛ̄ī o̍ chīɛ̄ī lēmāsāa̍ ni᷄ŋ. Mbo̍ vēēlū vɛ̄lɛ̄ Chi̍i̍sū, mbo̍ nyūnā ndu̍ āā, “Nu᷄m cho̍ māsā bɛ̍ndū Chu̍ūwa̍ ni̍?”

³⁴Mi̍ Chi̍i̍sū nyu̍nā ndu̍ āā, “Nyūnā ŋ̄ nyūna̍ ho̍ō wo̍, bāā nūm pi̍la̍ kɛ̍ɛ̍si̍a̍a̍ ndu̍ ni̍, bāā dīmūllo̍ nda̍ dīmu̍l nu̍m a̍ ya̍ o̍kɔ̄ɔ̄ ni̍?”

³⁵Mi̍ Pa̍i̍lē mu̍lī āā, “Bāā Chu̍ūnɔ̄ ya̍ I̍ cho̍ ni̍? Wānāā nyāa̍, a̍ wānāā bɛ̄ndūāā sōlīāā lāsa̍lāa̍, nda̍ hi᷅ŋ a̍ nūm nāa̍ ya̍ chu̍a̍ ni̍. Chɔ̍m ya̍ sūɛ̍i̍ ŋ̄ tɛ̄ɛ̄mbu̍u̍ ve̍.”

³⁶Mi̍ Chi̍i̍sū mu̍lī āā, “Māsāle̍ nīle̍ŋ lē cho̍ ma̍sāle̍ wa̍ā chi̍e̍ēŋ na̍ŋ te̍. Tē le̍ le̍e̍ wa̍ māsāle̍ wa̍ā chi̍e̍ēŋ na̍ŋ pɛ̍ bu̍ɛ̍i̍yāā nīa̍a̍ cho̍ ya̍ kɔ̄ɔ̄lī wa̍ nda̍ a̍a̍ sɔ̍ŋgā yɔ̍ŋi̍ Chu̍ūwa̍ nda̍ a̍a̍ bi̍i̍ ya̍. Kɛ̍ ndu̍yɛ̍ māsāle̍ nīle̍ŋ lē cho̍ ma̍sāle̍ wa̍ā chi̍e̍ēŋ na̍ŋ kpo̍so̍ŋ te̍.”

³⁷Mi̍ Pa̍i̍lē nyu̍nā ndu̍ āā, “Mɛ̄ɛ̍ māsā bɛ̍ndōo̍ ŋ̄ chō ni̍?” Mi̍ Chi̍i̍sū di̍mī āā, “A̍ di̍mi̍ māā māsā bɛ̍ndōo̍ ya̍ I̍ cho̍ ni̍, ndu̍yɛ̍ ī chō tōnya̍. Le̍ sa̍bū ya̍ I̍ hi̍ŋ mi̍ I̍ vi̍a̍lu᷄ŋ o̍ chi̍e̍ēŋndo̍ ho̍ō chōo̍ wo̍ cho̍ ni̍ māā le̍ mī I̍ chɔ̍m tōnya̍a̍ nāa̍ wāŋnda̍ chūā. Ndu̍yɛ̍, wānā o̍ wāna̍ wa̍ o̍ kūmbū tōnya̍a̍ chōo̍ pɛ̍, nīla̍ŋ o̍ ya᷅ŋ o̍ dīōmndā ya̍ I̍ di̍mī la̍ŋ ni̍.”

³⁸Mi̍ Pa̍i̍le̍ nyu̍nā ndu̍ āā, “Yɛ̄ɛ̍nɛ̍ cho̍ yɛ̄ tōnya̍a̍?” O̍ ko̍ŋ kɔ̍ɔ̍lī, mi̍ Pa̍i̍lē cha̍ŋ mbo̍ fūlā vɛ̄lɛ̄ nāa̍ Chu̍ūwa̍ chūā. Mbo̍ dīmūl nda̍ āā, “I̍ se̍e̍lu̍ŋ nyɛ̄ o̍ nyɛ̄ wɔ̄ɔ̍ŋ pōo̍ ho̍ō tōsa̍ le̍.

³⁹Kɛ̍, mɛ̄ɛ̍ nya̍ tōsā pa̍a̍ndū māā tē bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ wa̍ pɛ̍, lā nyūna̍ ya̍ le̍ mī I̍ me̍l nya̍ wānāa̍ cho̍ o̍ chīɛ̄ī mānyūmndo̍ ni᷄ŋ nda̍ ō pīlɛ̍ yɛ̍, lā hɛ̄nāŋ mī I̍ me̍l nya̍ Māsā Bɛ̍ndū Chu̍ūwa̍?”

⁴⁰Kɛ̍, ma̍ dīmī vɛ̄lɛ̄ chōo̍ cho̍o̍ āā, “Ɛ̄ ɛ̍. Ō cho̍ ndu̍ le̍ ŋ̄ māl te̍. Ba̍lu̍a̍bāā ŋ̄ mēl na̍a̍ ni̍.” Ndu̍yɛ̍, Ba̍lu̍a̍bāā nda̍ wa̍ ko̍ŋ yēēmɛ̍i̍ le̍ nda̍ mēllo̍ wo̍, vīīnɔ̄ ma᷅ŋto̍ndōnɔ̄ bɛ̄ndōo̍ o̍ wa̍ ni̍.