Read Southern Kisi Chɔ᷄ŋ 19 Bible Online

Chɔ᷄ŋ 19 - Southern Kisi bible

Chɔ᷄ŋ 19

¹O̍ ko̍ŋ, mi̍ Pa̍i̍lē yɔ̍ŋgū Chi̍i̍sū ma̍ lūāā ndu̍.

²Mi̍ so̍vɛ̄i̍ya̍ lūā yɔ̄ɔ̍ŋ fi̍ŋɔ̍ɔ̍ ma̍ wōū ndu̍ o̍ lēbōl māā mɔ̍si̍l lēmāsā. Ma̍ chūā dōmā bɛ̍ndū sīāŋāa̍ ō pūm ma̍ wōū ndu̍ māā dōma̍ lēmāsā.

³Ma̍ kūā nāa̍ ndu̍ chu̍a̍ ma̍ dīmī āā, “Māsā bɛ̍ndū Chu̍ūwa̍, vi̍o̍u̍ na̍a̍ chōo̍ kɛ̍ndi̍a̍a̍.” Ma̍ mūli᷄ŋ ma̍ lūāā ndu̍.

⁴Mi̍ Pa̍i̍lē fu̍lā vɛ̄lɛ̄ nāa̍ Chu̍ūwa̍ chūā. Mbo̍ dīmūl nda̍ āā, “Lā ya᷄ŋ ndɔ̍ ya̍ nīla̍ŋ, I̍ cho̍ fūlā a̍ pōo̍ ho̍ō nya̍ o̍ hɔ̄l le̍ mī lā sīna̍ māā I̍ se̍e̍lu̍ŋ nyɛ᷅ o̍ nyɛ̄ wɔ̄ɔ̍ŋ o̍ to̍sa̍ le̍.”

⁵Mi̍ Chi̍i̍sū fu̍lā. Fi̍ŋɛ̍ ŋ̄yɔ̄ kōŋ ō wa̍ wɔ̄ ndu̍ ō wōūwāā o̍ lēbōl. Dōmā si̍a̍ŋā kōŋ bɛ̍ɛ̍, ō wa̍ ndu̍ lēkɔ̄ɔ̍. Mi̍ Pa̍i̍lē di̍mūl nda̍ āā, “Lā che᷄ŋ ndu̍.”

⁶Mɛ̄ɛ̍ wānāā bɛ̄ndūāā sōlīāā lāsa̍lāa̍, a̍ pōli̍si̍i̍ya̍ a̍ ma̍ndā chi̍ɛ̍ī Mɛ̄lɛ̄ka̍a̍ wa̍ ā chē Chi̍i̍sū, ma̍ dīmī chōo̍ cho̍o̍ āā, “Ba̍ŋ ndu̍ o̍ yɔ̄m sīŋgāfīlāa̍ chōo̍ ō wu̍. Ba̍ŋ ndu̍ o̍ yɔ̄m sīŋgāfīlāa̍ chōo̍ ō wu̍.” Mi̍ Pa̍i̍lē di̍mūl nda̍ āā, “Nya̍ pi̍la̍ lā kɔ̍ ba᷅ŋ ndu̍ o̍ yɔ̄m sīŋgāfīlāa̍ chōo̍. Ya̍ ya̍ I̍ se̍e̍lu̍ŋ nyɛ᷅ o̍ nyɛ̄ wɔ̄ɔ̍ŋ o̍ to̍sa̍ le̍.”

⁷Mi̍ Chu̍ūwāā kāŋ dīmī āā, “Pōo̍ ho̍ō dīmi̍ māā ndu̍ cho̍ Po̍ Mɛ̄lɛ̄ka̍a̍ ni̍. Mɛ̄ɛ̍ sāwā na̍a̍ dīmi̍ yɛ̍, tē wāŋndo̍ sōō le̍nde̍ pɛ̍, ō nɔ̄ mbō sɔ̄la̍ pīɔ̍mndo̍. Le̍la̍ŋ pīɔ̍mndo̍ o̍ sɔ̍lā ni̍.”

⁸Mɛ̄ɛ̍ nda̍ dīmi̍ le̍nde̍, mi̍ sīōōŋnde̍ chɔ̄ɔ̄lū Māsāa̍ Pa̍i̍le̍ bīyɔ̄ɔ̄.

⁹Mbo̍ mīīŋgū vɛ̄lɛ̄ o̍ chīɛ̄ī lēmāsāa̍ ni᷄ŋ a̍ Chi̍i̍sū. Mbo̍ nyūnā Chi̍i̍su̍ āā, “Kūɛ̍ɛ̍nɛ̍ ŋ̄ fūla̍ yɛ̄?” Kɛ̍, Chi̍i̍sū mu̍li̍ le̍.

¹⁰Mi̍ Pa̍i̍lē nyu̍nā ndu̍ āā, “Vɛ᷅ a̍ mu̍lī ya̍ dīōm te̍? A̍ si̍nā nu̍a̍ā māā I̍ nɔ̍ kpāāyāa̍ mī I̍ ma̍l nu̍m mā kūɛ̄nu᷄ŋ, kɛ̄lɛ̄ŋgāā mī I̍ to̍sa̍ mā ba᷄ŋ nu̍m o̍ yɔ̄m sīŋgāfīlāa̍ chōo̍ mā dīī nu̍m te̍?”

¹¹Mi̍ Chi̍i̍sū di̍mūl ndu̍ āā, “Mɛ̄lɛ̄ka̍ ndu̍ ke̍ nu̍m kpāāyā ko̍ŋ ni̍. Kɛ̍ tē ō cho̍ ko̍ŋ te̍, a̍ nɔ᷅ ya̍ kpāāyā o̍ kpāāyā cho̍o̍ le̍. Le̍ he̍ī, wāna̍ ma̍l la̍ nu̍m o̍ bā wo̍, ndu̍ hi̍o̍ū yɔ̄ŋ wɔ̄ɔ̍ŋ tōsā.”

¹²Mɛ̄ɛ̍ Pa̍i̍lē tu̍e̍ī he̍ī, mbo̍ chīɔ̄ū le̍ Chi̍i̍su̍ ma̍lɔ̄ɔ̍. Kɛ̍, mi̍ Chu̍ūwa̍ hīāū lāchī a̍ dēŋīo̍o̍. Ma̍ dīmī āā, “Tē a̍ ma̍l ndu̍ pɛ̍, mɛ̄ɛ̍ māsā bɛ̍ndōo̍ o̍ cho̍ māsāa̍ kpe̍de̍ bo᷅lle̍ŋ o̍ lɛ̄ŋīī Lu̍o̍ma᷅ŋnde̍ ni᷄ŋ ndo̍, mɛ̄ɛ̍ a̍ cho̍ bɛ̍ɛ̍ ndi̍a̍a̍mɔ̍ɔ̍ ndɔ̄ le̍. Kāni̍ fo̍ndōle̍, wānā o̍ wāna̍ di̍mi̍ pɛ̍ māā māsā bɛ̍ndōo̍ o̍ cho̍ ni̍, mɛ̄ɛ̍ māsā bɛ̍ndu̍ cho̍ māsāa̍ kpe̍de̍ bo᷅lle̍ŋ ndo̍ o̍ si̍mu̍l ni̍.”

¹³Mɛ̄ɛ̍ nda̍ dīmi̍ le̍nde̍, mi̍ Pa̍i̍lē fu̍lā a̍ Chi̍i̍sū. Mbo̍ kūā mbo̍ kɔ̍ cha᷅l o̍ kpe̍ŋgbe̍i̍ ndɔ̍ lēmāsāa̍ chōo̍. Ā vēēlu̍ fo̍ndāŋ kōŋ āā, fo̍ndāŋ nda̍ tōōsi̍a̍a̍ a̍ pōūwo̍ wo̍, ō Hi̍būlūi̍ye̍ ni᷄ŋ āā, Kāba̍tāā.

¹⁴Ndu̍yɛ̍, pāa̍le̍ lo̍o̍na᷄ŋnde̍ŋ a̍ hīōūwɔ̄ɔ̍ chōo̍ wo̍ o̍kɔ̄ɔ̄ lē wa̍ ni᷅ŋ māā sīɔ̄dīi̍. Pāa̍le̍ŋ wāa̍ le̍ sīsi̍la̍ŋ o̍ bōlle̍ŋ chōo̍ ki̍nɛ̍i̍ mi̍ Pa̍i̍lē di̍mūl wāŋnda̍ ha̍ā āā, “Lā che᷄ŋ ma̍sā nya̍ bɛ̄ndōo̍.”

¹⁵Ma̍ dīmī chōo̍ cho̍o̍ āā, “Lā kɔ̍ a̍ ndu̍. Lā kɔ̍ a̍ ndu̍, lā kɔ̍ di̍ī ndu̍. Lā kɔ̍ ba᷅ŋ ndu̍ o̍ yɔ̄m sīŋgāfīlāa̍ chōo̍ mī lā dīī ndu̍.” Mi̍ Pa̍i̍lē nyu̍nā nda̍ āā, “Lā hɛ̄na̍ŋ mī I̍ ba̍ŋ māsā nya̍ bɛ̄ndōo̍ o̍ yɔ̄m sīŋgāfīlāa̍ chōo̍?” Mi̍ wānāā bɛ̄ndūāā sōlīāā lāsa̍lāa̍ ā mūlī āā, “Māsā bɛ̍ndōo̍ ō pīlɛ̍ kpe̍ na̍a̍ ŋ̄ nɔ̄ ni̍, ndu̍ yɔ̍nūŋ ni̍ māā māsā bɛ̍ndōo̍ o̍ cho̍ māsāa̍ kpe̍de̍ bo᷅lle̍ŋ o̍ lɛ̄ŋīī Lu̍o̍ma᷅ŋnde̍ ni᷄ŋ ndo̍.”

¹⁶O̍ mɛ̄ɛ̄lu̍la̍ŋ kpɔ̍ŋ Pa̍i̍lē bɛ̍ɛ̍ mbo̍ māl Chi̍i̍su̍ nda̍ o̍ bā le̍ mā kɔ̍ ba᷅ŋ ndu̍ o̍ yɔ̄m sīŋgāfīlāa̍ chōo̍ mā dīī ndu̍. Mi̍ so̍vɛ̄i̍ya̍ kūā a̍ Chi̍i̍sū.

¹⁷Kɔ̄la̍ŋ a̍ ndu̍, ma̍ kɔ̍ ha̍ndū ndu̍ yɔ̄m sīŋgāfīlāā nda̍ wa̍ ndu̍ lākɔ̄ bāŋɔ̄ɔ̄ wo̍ o̍ chōŋgu̍. O̍ ko̍ŋ kɔ̍ɔ̍lī, ma̍ kūā a̍ ndu̍ o̍ fo̍ndāŋ pūm, mā vēēlū ndu̍ āā, fo̍ndāŋ lākpōkpōo̍, o̍ Hi̍būlūi̍ye̍ ni᷄ŋ āā, Kɔ̍ɔ̍kɔ̍tā.

¹⁸Lo̍ŋ nda̍ kɔ̍ ba᷅ŋ ndu̍ o̍ yɔ̄m sīŋgāfīlāa̍ chōo̍ ni̍. O̍ ko̍ŋ kɔ̍ɔ̍lī, ma̍ bāŋ vɛ̄lɛ̄ wānāā ŋīɔ̍ɔ̍ŋāā chēle̍ŋ o̍ yɔ̄mīī sīŋgāfīlɛ̄i̍ chōo̍. Mɛ̄ɛ̍ nda̍ ba᷄ŋ ho̍ō ba̍ā, ma̍ bāŋ ho̍ō ba̍ā, mi̍ Chi̍i̍sū wa᷅ nda̍ tɛ̄ɛ̄ŋ.

¹⁹Mɛ̄ɛ̍ nda̍ wa̍ ndu̍ bāŋɔ̄ɔ̍, mi̍ Māsāa̍ Pa̍i̍lē to̍sā ma̍ po̍o̍nyīāā dīōmnda̍ŋ ma̍ hōl o̍ yɔ̄m sīŋgāfīlāa̍ Chi̍i̍sōo̍ le̍ mī wāŋnda̍ chē. Dīōmndā nda̍ pōōnyi̍a̍a̍ la̍ŋ la̍ cho̍ la᷅ŋ ni̍ āā, “Chi̍i̍su̍ fu̍la̍ Na̍a̍sa̍lūɛ̄ī chi̍e̍e̍ wo̍ cho̍ ho̍ō ni̍, Māsā Bɛ̄ndū Chu̍ūwa̍.”

²⁰Dīōmnda̍ŋ nda᷅ŋ lā wa̍ lā pōōnyīāā o̍ Hi̍būlūi̍ye̍ ni᷄ŋ, a̍ La̍tīŋnde̍, a̍ Kīli̍kīi̍ye̍. Ndu̍yɛ̍, fo̍ndāŋ nda̍ ba᷄ŋ ndu̍ ko̍ŋ o̍ yɔ̄mndo̍ chōo̍ wo̍ ō ve̍ le̍vi̍l a̍ Chūlu̍sɛ̄lɛ̄m tē. Lē he̍ī, Chu̍ūwa̍ ā fāŋgā fa̍ŋgā ma̍ chā dīōmndā lāŋ.

²¹Mɛ̄ɛ̍ wānāā bɛ̄ndūāā sōlīāā lāsa̍lāa̍ le̍ Chu̍ūwa̍ ā chē nyɛ̄ Māsāa̍ Pa̍i̍lē po̍o̍nyi̍a̍a̍ ko̍ŋ ndo̍, ma̍ kūā nāa̍ ndu̍ chu̍a̍. Ma̍ dīmūl ndu̍ āā, “Ō bɛ̄nda̍ mā po̍o̍nyi̍a̍a̍ āā, ‘Chu̍ūwa̍ Māsā nda̍ Bɛ̄ndōo̍’ le̍. Po̍o̍nyi̍a̍a̍ āā, ‘Ō dīmi̍ māā ndu̍ cho̍ Chu̍ūwa̍ Māsā nda̍ Bɛ̄ndōo̍ ni̍.’ ”

²²Kɛ̍, mi̍ Pa̍i̍lē di̍mūl nda̍ āā, “I̍ chi̍i̍ ni᷅ŋ pōōnyīāā, ō fe̍ŋāŋ lɛ̍ lēchōo̍ le̍.”

²³Mɛ̄ɛ̍ so̍vɛ̄i̍ya̍ ba᷄ŋ Chi̍i̍sū, o̍ ko̍ŋ kɔ̍ɔ̍lī, ma̍ chūā nyɛ̄lā ndɔ̄la̍ŋ ma̍ pīɔ̄ū la̍ŋ sālā hīɔ̍ɔ̍lu̍. Ma̍ chɔ̄ɔ̄vīāā, wānā pi᷅lɛ̍ ō pīlɛ̍. Ma̍ chūā vɛ̄lɛ̄ dōma̍ ndɔ̄ɔ̍ ō pīlɔ̍ɔ̄. Kɛ̍ ndu̍ ndu̍, a̍ kōla̍ pūli̍i̍ pi᷅lɔ̍ɔ̍ o̍ wa̍ ō sūāndāā ni̍. Ndu̍ o̍o̍ nɔ̍ na̍a̍ bɔ̄ŋāā le̍ mī nda̍ a̍a̍ ti̍mbi̍ ndu̍ tɛ̄ɛ̄ŋ te̍.

²⁴Ma̍ dīmu̍la᷅ŋ āā, “Ŋ̄ tɛ̍ndāŋ ndu̍ le̍. Lā ŋ̄ wūūnu᷅ŋ kōo̍ŋ le̍ ndu̍, wāna̍ dē pɛ̍, ō kūɛ̄nu᷄ŋ a̍ ndu̍.” Mɛ̄ɛ̍ i̍ cho̍ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ yɛ̍, le̍nde̍ ko̍ni̍ so̍vɛ̄i̍ya̍ tōsa̍ ni̍. Kāni̍ fo̍ndōle̍, ī chō ī pōōnyīāā āā, “Ma̍ pīɔ̄ūvi̍āŋ nyɛ̍lā nīla̍ŋ nda̍ pi̍la̍ tɛ̄ɛ̄ŋ, ndu̍yɛ̍, ma̍ wūū kōo̍ŋ le̍ wāna̍ ku̍ā a̍ dōma̍ nūu̍ wo̍.”

²⁵Kālāa̍ Chi̍i̍sū ni̍, a̍ kālāa̍ Chi̍i̍sū pɔ̄mbɔ̄ ndɔ̄, a̍ la̍nɔ̍ɔ̍ Ki̍lo̍pāā, a̍ Mēēle̍ Māŋgāli᷅ŋ, ā wa̍ īsīsi̍ o̍ yɔ̄m sīŋgāfīlāā nda̍ ba᷄ŋ Chi̍i̍su̍ wo̍ īkɛ̄i̍.

²⁶O̍ ko̍ŋ, mi̍ Chi̍i̍sū cha᷅ kāla̍ ndɔ̄. Mbo̍ chā bu̍ɛ̍ī ndu̍ o̍o̍ ka̍a̍la̍ wo̍. Ndu̍ bɛ̍ɛ̍, ō wa̍ īsīsi̍ lo̍ŋ ka̍lāa̍ Chi̍i̍su̍ īkɛ̄i̍. Mi̍ Chi̍i̍sū lo᷅ o̍ ko̍ŋ mbo̍ di̍mūl kāla̍ ndɔ̍ āā, “Wɛ̄ɛ̄ŋndo̍, ā chē po̍ nu̍mndo̍.”

²⁷Mbo̍ dīmūl bu̍ɛ̍ī kōŋ āā, “Pōo̍, ā chē kālā nu̍m.” Chɔ̍ŋ ni᷅ŋ a̍ bōōndi̍i̍ ke̍ŋ mi̍ bu̍ɛ̍īyo̍ ho̍ō kūā a̍ kālāa̍ Chi̍i̍sū ō chīɛ̄ī ndɔ̄ɔ̍ mbo̍ kɔ̍ wa᷅ lo̍ŋ.

²⁸O̍ ko̍ŋ kɔ̍ɔ̍lī, mi̍ Chi̍i̍sū si̍nā māā nyɛ̄ o̍ nyɛ̄ ndu̍ o̍o̍ nɔ̍ le̍ tōsāa̍ māā ō chīi̍ tōsā. O̍ ko̍ŋ, mbo̍ dīmī āā, “Kōlɔ̄ɔ̍ bīī ya̍ fɔ̍.” Ndu̍ o̍o̍ di̍mi̍ mādīmīāā dīōmnda̍ŋ nda᷅ŋ le̍ mī ī yɔ̄nu̍ŋ mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍.

²⁹Mɛ̄ɛ̍ o̍ di̍mi̍ āā, kōlɔ̄ɔ̍ bīī ya̍, nda̍ a̍a̍ nɔ̍ mūɛ̄īmā wāālɛ̍i̍ma̍ pu̍m o̍ kpɛ̍ɛ̍nɛ̍i̍ ni᷄ŋ lo̍ŋ. Ma̍ chūā nyɛ̄ fɔ̄fɔ̄ū pūm ma̍ māl o̍ mūɛ̄īmā māŋ ni᷄ŋ, ma̍ sɔ̄ɔ̄ŋā o̍ yɔ̄m ha̍sɔ̍pī wo̍. Ma̍ hēēlū, ma̍ hāndū ndu̍ o̍ sōndō.

³⁰Mɛ̄ɛ̍ Chi̍i̍sū sɔ̍sa̍ mūɛ̄īmā māŋ, mbo̍ dīmī āā, “Nyɛ̄ o̍ nyɛ̄ chūū yɔ̄nɔ᷄ŋ.” Mɛ̄ɛ̍ o̍ di̍mi̍ dīōmndā lāŋ, mbo̍ māl bōlle̍ŋ. Mbo̍ mālnu᷄ŋ kɔ̍l.

³¹O̍ Chi̍mɛ̄i̍yo̍ chōo̍ sūɛ̍i̍ he̍ī ī yɔ̄nu̍ŋ ni̍. Ndu̍yɛ̍, pāa̍le̍ le̍ŋ nda̍ a̍a̍ bɛ̍ɛ̍ndīāŋ le̍ pāa̍le̍ pɛ̍ŋgīāā lē Chu̍ūwa̍ ni̍. Chu̍ūwa̍ nda̍ a̍a̍ chɛ᷅l mī wānāā nda̍ bāŋ o̍ yɔ̄m sīŋgāfīlāa̍ chōo̍ wa̍ ā lo̍ lo̍ŋ mī pāa̍le̍ pɛ̍ŋgīāāle̍ŋ lē fūūlu̍u̍ le̍. Tāāma̍ pāa̍le̍ pɛ̍ŋgīāāle̍ wa̍ le̍ŋ fūūlūūwo̍ le̍ŋ lē wa̍ pāa̍le̍ pɛ̍ŋgīāālē bɛ̄ndū. Le̍ sa̍bōo̍ ho̍ō, mi̍ Chu̍ūwa̍ cha᷄ŋ ma̍ kūā nāa̍ Māsāa̍ Pa̍i̍lē chu̍a̍. Ma̍ kɔ̍ nyu̍nā ndu̍ dīōm le̍ mbō chɛ᷄l nda̍ mā kɔ̍ yi̍mī wānāā nda̍ ba᷄ŋ o̍ yɔ̄mīī sīŋgāfīlɛ̄i̍ chōo̍ wa̍ pēlo᷄ŋ mā tūsi̍ nda̍.

³²O̍ ko̍ŋ, mi̍ so̍vɛ̄i̍ya̍ kūā ma̍ kɔ̍ yīmī pūa̍a̍ nda̍ ba᷄ŋ nda̍ Chi̍i̍sūa̍a̍ wa̍ pēlo᷄ŋ. Yīmīo̍o̍ ō tāso̍o̍, ma̍ kɔ̍ yi̍mī vɛ̄lɛ̄ ō pīlɔ̍ɔ̄.

³³Kɛ̍ mɛ̄ɛ̍ nda̍ hīŋ o̍ Chi̍i̍sū lo̍ le̍ ndu̍ pēlo᷄ŋ yīmīo̍o̍, ma̍ sāālu᷄ŋ māā ō vī ni᷅ŋ. O̍ ko̍ŋ, ā yīmi̍ lɛ̍ ndu̍ pēlo᷄ŋ te̍.

³⁴Kɛ̍, mi̍ so̍vɛ̄i̍nɔ̍ɔ̍ ō pīlɔ̍ɔ̄ chūā ba̍l ndɔ̄ɔ̍ mbo̍ chūkū ndu̍ lūŋgbu̍e̍i̍ a̍ ndu̍. Chūkɔ̄ɔ̍ ndu̍ dɔ̍ɔ̍, mi̍ kōo̍wa̍ŋ mā tālā a̍ mɛ̄ŋnda̍ŋ lātūlu̍.

³⁵Wāna̍ che᷅ sɔ̄ɔ̍ŋ mu᷅ŋ o̍ yɔ̄nɔ᷄ŋndo̍ wo̍, ndu̍ cho̍ nya̍ ho̍ō chɔ̄mndo̍ a̍ nyɛ̍ yɔ̄nu᷄ŋ ndo̍ o̍kɔ̄ɔ̄ ni̍. Ndu̍yɛ̍, tōnya̍a̍ kpe̍e̍kpe̍i̍ o̍ cho̍ dīmīo̍o̍ ni̍. Ō sīnā māā tōnya̍a̍ o̍ cho̍ dīmīo̍o̍ ni̍. Ndu̍yɛ̍, le̍ sa̍bū o̍ di̍mi̍ dīōmnda̍ŋ nda᷅ŋ ndo̍ cho̍ ni̍ māā le̍ mī nya̍ bɛ̍ɛ̍ mī lā nɔ̄ lāāla᷄ŋndo̍.

³⁶Sɔ̄ɔ̍ŋ mu᷅ŋ kpo̍u̍ ŋ̄ yɔ̄nu̍ŋ le̍ mī nyɛ̍ cho̍ ō pōōnyīa̍ŋ o̍ Yāu̍ Mɛ̄lɛ̄ka̍a̍ ni᷄ŋ ndo̍ ō yɔ̄nu̍ŋ. Kāni̍ fo̍ndōle̍, ī chō ī pōōnyīāā āā, “Ā yi᷅m ni̍ŋ pa̍ā ndɔ̄ɔ̍ ō pīlɛ̍ bɛ̍ɛ̍ le̍.”

³⁷Ī chō vɛ̄lɛ̄ ī pōōnyīāā o̍ fo̍ndāŋ chēle̍ŋ o̍ Yāu̍ Mɛ̄lɛ̄ka̍a̍ ni᷄ŋ āā, “Wāŋnda̍ chō hūnɔ̄ɔ̄ hɔ̄lla̍ chūā mā tōfa̍ wāna̍ nda̍ chūkū a̍ ba̍llo̍ wo̍.”

³⁸Po̍ pi᷅lɛ̍ ō wa̍ dīōla̍ŋ āā, Chōo̍sɛ̍, wānā wa̍ā Ālīmāti̍a̍ā chi̍e̍e̍. Ndu̍ bɛ̍ɛ̍, bu̍ɛ̍i̍ Chi̍i̍sōo̍ o̍ wa̍ ni̍. Kɛ̍ ndu̍yɛ̍, ndu̍ o̍o̍ chɔ̍mnūŋ kpe̍nde̍ke̍le̍ māā bu̍ɛ̍i̍ Chi̍i̍sōo̍ le̍ o̍ cho̍ le̍. Kāni̍ fo̍ndōle̍, sīōōŋnde̍ ī wa̍ ndu̍ le̍ wānāā bɛ̄ndūa̍a̍ Chu̍ūwa̍. Mɛ̄ɛ̍ Chi̍i̍sū vi᷅, mi̍ pōo̍ ho̍ō kūā mbo̍ kɔ̍ di̍mūl Pa̍i̍lē māā Pa̍i̍lē fe̍ŋa̍l ndu̍ bāla̍ŋ mbō kūɛ̄ a̍ dīāllu᷄ŋ Chi̍i̍so᷄ŋ. Mi̍ Pa̍i̍lē chɛ᷅l. O̍ ko̍ŋ kɔ̍ɔ̍lī, mi̍ Chōo̍sɛ̍ ku̍ā, mbo̍ kɔ̍ chu̍ā dīāllu᷄ŋ Chi̍i̍so᷄ŋ. Mbo̍ kūā a̍ mu̍ŋ.

³⁹Nīkōdi̍mɔ̄ɔ̄, ō ndu̍ o̍o̍ ku̍ɛ̄ te̍le̍ŋ pi᷅lɛ̍ a̍ nyūmnda̍ŋ nāa̍ Chi̍i̍sū chu̍a̍ wo̍, ndu̍ bɛ̍ɛ̍, mbo̍ kūā nda̍ Chōo̍sɛ̍. Mi̍ Nīkōdi̍mɔ̄ɔ̄ ko̍ŋ chūā nyɛ̄m chūŋ kɛ̄ndɔ᷄ŋ a̍ kōo̍ma̍ pu̍m mbo̍ kūā a̍ ma̍ŋ. Lūsu̍l nyɛ̄m mu᷅ŋ a̍ kōo̍ma̍ ma̍ŋ ndu̍ o̍o̍ wa᷅ pa᷅ŋnda̍ŋ kɛ̄mɛ̄. Dīōlā nyɛ̄m mu᷄ŋ la̍ cho̍ la᷅ŋ ni̍, ā vēēlū ho̍ō āā, mɔ̍ɔ̄, ā vēēlu̍ ō pīlɔ̍ɔ̄ āā, a̍lo̍o̍sī.

⁴⁰Mi̍ pūa̍a̍ ŋi̍ɔ̍ɔ̍ŋnda̍ ha̍ā ā chūā dīāllu᷄ŋ Chi̍i̍so᷄ŋ ma̍ kɔ̍ dɔ̍ū mu̍ŋ o̍ kōlāla̍ fe̍ŋgbɛ̍la̍ŋ ni᷄ŋ la̍tu̍lu̍ a̍ nyɛ̄m chūŋ kɛ̄ndɛ̄ŋ mu᷅ŋ a̍ kōo̍ma̍ ma̍ŋ. Le̍nde̍ Chu̍ūwa̍ nda̍ a̍a̍ bɛ̍ɛ̍ndīāā wa̍nā vi̍lɛ̍i̍yo̍ le̍ ndu̍ kɔ̄la̍ŋ kūmbɔ̄ɔ̍ ni̍.

⁴¹Kpe̍lo̍o̍ ō wa̍ o̍ fo̍ndāŋ nda̍ ba᷄ŋ ko̍ŋ Chi̍i̍sū o̍ yɔ̄m sīŋgāfīlāa̍ chōo̍ wo̍. Sɛ̄īyo̍ wa̍ ō tūāūwāā sɛ̄nɛ̄ī o̍ kpe̍lo̍o̍ ho̍ō ni᷄ŋ, tōūwɔ̄ɔ̍ ndu̍ o̍ pōūwo̍ ni᷄ŋ māā būūlū. Ndu̍yɛ̍, nda̍ a̍a̍ chɔ̍ wɔ̍ wa̍nā o̍ wānā le̍ni̍ŋ le̍pi᷅lɛ̍ bɛ̍ɛ̍ le̍.

⁴²Sɛ̄īyo̍ ho̍ō, ō ve̍ le̍vi̍l a̍ fo̍ndāŋ nda̍ ba᷄ŋ Chi̍i̍sū wo̍ le̍, ndu̍yɛ̍, pāa̍le̍ bɛ̍ɛ̍ndīa̍ŋnde̍ŋ le̍ pāa̍le̍ pɛ̍ŋgīāālē Chu̍ūwa̍, le̍ŋ le̍ wa̍ pāa̍le̍ le̍ŋ ni̍. Le̍ he̍ī, mɛ̄ɛ̍ nda̍ dɔ̄ū dīāllu᷄ŋ Chi̍i̍so᷄ŋ o̍ fe̍ŋgbɔ̍ɔ̍ ni᷄ŋ, ma̍ lūēī mu̍ŋ o̍ sɛ̄ī ko̍ŋ ni᷄ŋ ma̍ yāmbū.