Read Southern Kisi Chɔ᷄ŋ 20 Bible Online

Chɔ᷄ŋ 20 - Southern Kisi bible

Chɔ᷄ŋ 20

¹Īdīi̍yo̍ pu̍u̍ŋ o̍ pāa̍le̍ Kpu̍yāle̍ŋ chōo̍, mi̍ Mēēle̍ Māŋgāli᷅ŋ cha̍ŋ mbo̍ kūā o̍ sɛ̄īyo̍. Nyɔ̄ɔ̍ ndu̍ o̍o̍ te̍ŋga̍ wɔ̍ bɛ̍ɛ̍ le̍. Mɛ̄ɛ̍ o̍ fu̍u̍lu̍u̍, mbo̍ sāālu᷄ŋ po̍ū nda̍ a̍a̍ ha̍ndu̍ o̍ sɛ̄īyo̍ sōndōo̍ wo̍ ō fāŋāā, ndu̍yɛ̍, sɛ̄i̍ būūlōo̍.

²Sāālɔ᷄ŋndo̍ le̍nde̍, mbo̍ mīīŋgū a̍ kīlta̍ŋ nāa̍ Sa̍i̍mɔ̄ŋ Pītɛ̍ chu̍a̍ nda̍ bu̍ɛ̍īyo̍ ō pīlɔ̍ɔ̄, ō Chi̍i̍sū ndu̍ o̍o̍ ka̍a̍la̍ wo̍. Mbo̍ kɔ̍ di̍mūl nda̍ āā, “Ā sōli̍ dīāllūŋ Ma̍sānɔ̄ɔ̍ o̍ sɛ̄īyo̍ ni᷄ŋ, ndu̍yɛ̍, ŋ̄ si̍nā nāa̍ nda̍ hīvi̍ mu̍ŋ nda̍ le̍.”

³O̍ ko̍ŋ, mi̍ Pītɛ̍ nda̍ bu̍ɛ̍īyo̍ ō pīlɔ̍ɔ̄ ā cha᷄ŋ kɔ᷅la̍ŋ o̍ sɛ̄īyo̍.

⁴Nda̍ ŋi̍ɔ̍ɔ̍ŋ ma̍ kāndū kīlta̍ŋ, kɛ̍, mi̍ bu̍ɛ̍īyo̍ ō pīlɔ̍ɔ̄ ō mɛ̄ī Pītɛ̍ kɔ̄ɔ̄lī. Mbo̍ fūūlūū o̍ sɛ̄īyo̍ ndu̍ tāse̍.

⁵Mɛ̄ɛ̍ o̍ fu̍u̍lu̍u̍, mbo̍ tūndu᷄ŋ mbo̍ tōfā o̍ sɛ̄īyo̍ ni᷄ŋ. Mbo̍ chā kōlāla̍ fe̍ŋgbɛ̍la̍ dīāllo̍ŋ ŋ̄ wa̍ lēni᷄ŋ nda̍ŋ o̍ sɛ̄īyo̍ ni᷄ŋ. Kɛ̍, ō lūe̍i̍ le̍ni̍ŋ te̍.

⁶O̍ ko̍ŋ, mi̍ Sa̍i̍mɔ̄ŋ Pītɛ̍ o̍ wa̍ kɔ̄ɔ̄lī wo̍ bɛ̍ɛ̍ o̍ fu̍u̍lūū. Mɛ̄ɛ̍ o̍ fu̍u̍lu̍u̍ dɔ̍ɔ̍, mbo̍ lūɛ̄ī sa̍kpō o̍ sɛ̄i̍ būūlōo̍ ho̍ō ni᷄ŋ. Mbo̍ chā fe̍ŋgbɛ̍la̍ dīāllo̍ŋ ŋ̄ wa̍ lēni᷄ŋ nda̍ŋ o̍ sɛ̄īyo̍ ni᷄ŋ.

⁷Mbo̍ chā vɛ̄lɛ̄ kōla̍ nda̍ a̍a̍ pi̍nda̍ pi̍nda̍ ndu̍ o̍ lēbōl lo̍. Kɛ̍ ndu̍ ndu̍ wa̍ ō tūī tūīyāā, ō kɛ̄sīāā nāa̍ ndɔ̄ te̍ŋge̍le̍ŋ.

⁸Mi̍ bu̍ɛ̍īyo̍ ō pīlɔ̍ɔ̄, o̍ ke̍le̍ŋa̍ fūūlūū wo̍ bɛ̍ɛ̍ o̍ lu̍ɛ̍ī o̍ sɛ̄īyo̍ ni᷄ŋ. Mbo̍ chā wōlɔ̄ɔ̄la̍ŋ nda᷅ŋ. Mbo̍ lāāla᷄ŋ.

⁹Nyɛ̄ Yāu̍ Mɛ̄lɛ̄ka̍a̍ dīmi̍ a̍ chi̍i̍sū o̍kɔ̄ɔ̄ māā mɛ̄ɛ̍ mbō mīīŋgū yōōmū wo̍, nda̍ a̍a̍ si̍na̍ wɔ̍ ndu̍ pɛ̄ŋgu̍ le̍.

¹⁰O̍ ko̍ŋ kɔ̍ɔ̍lī, mi̍ bu̍ɛ̍īya̍ ha̍ā ā mīīŋgu᷄ŋ o̍ chīɛ̄īlā ndāla̍ŋ.

¹¹Mēēle̍ Māŋgāli᷅ŋ wa̍ īsīsi̍ o̍ sɛ̄īyo̍ kɔ̄ŋgɔ̍ mbo̍ wā cha᷄ŋndo̍. Ō lo̍ cha᷄ŋndo̍ mbo̍ sɔ̄ɔ̄ŋgūū mbo̍ tōfā o̍ sɛ̄ī būūlōo̍ ho̍ō ni᷄ŋ.

¹²Mɛ̄ɛ̍ o̍ mɛ̍ɛ̍nda̍ŋ o̍ sɛ̄īyo̍ ni᷄ŋ, mbo̍ chā ki̍i̍la̍a̍ Mɛ̄lɛ̄ka̍a̍ ā ŋīɔ̍ɔ̍ŋ a̍ nyɛ̄lā hūmbūla̍ŋ nda̍ lēkɔ̄ɔ̍. Ā wa̍ īchāli̍ nāa̍ dīāllu᷄ŋ Chi̍i̍so᷄ŋ ŋ̄ wa̍ ŋ̄ yāmbāā wa̍. Ho̍ō wa̍ īchāli̍ nāa̍ nda̍ a̍a̍ mu̍li̍ wānā vi̍lɛ̍i̍yo̍ bōlle̍ŋ nda̍, mi̍ ō pīlɔ̍ɔ̄ wā īchāli̍ nāa̍ pēlo᷄ŋ ŋ̄ wa̍ wa̍.

¹³Mi̍ ki̍i̍la̍a̍ Mɛ̄lɛ̄ka̍a̍ ha̍ā ā nyūnā Mēēle̍ āā, “Wɛ̄ɛ̄ŋndo̍ cha᷄ŋ yɛ̄ɛ̍nɛ̍ ŋ̄ chō yɛ̄?” Mi̍ Mēēle̍ mu̍lī āā, “Ma̍sānɔ̄ nūu̍ nda̍ chu̍a̍ ni̍, ndu̍yɛ̍, I̍ si̍nā bā nda̍ hīōū a̍ ndu̍ le̍.”

¹⁴Mɛ̄ɛ̍ o̍ di̍mi̍ le̍nde̍, mbo̍ mūli᷄ŋ. Mūli᷄ŋ ko̍ŋ, mbo̍ chā Chi̍i̍su̍ īsīsi̍. Kɛ̍, ō sīna̍ māā ndu̍ le̍.

¹⁵Mi̍ Chi̍i̍sū nyu̍nā ndu̍ āā, “Wɛ̄ɛ̄ŋndo̍, vɛ᷅ cha᷄ŋndo̍? Ō nɛ̄ɛ̍nɛ̍ ŋ̄ chō yɛ̄ nūūvīāā?” Mēēle̍ wa̍ ko̍ kɔ̍l māā wāna̍ to̍sā wa̍llo̍ o̍ kpe̍le̍ ko̍ŋ ni᷄ŋ ndo̍ ni̍. O̍ ko̍ŋ, mbo̍ dīmūl ndu̍ āā, “Fāllo̍, tē nu᷄m chu̍a̍ dīāllūŋ ndɔ᷄ŋ ni̍, mɛ̄ɛ̍ chɔ̍m ya̍ nāa̍ ŋ̄ hīvi̍ mu̍ŋ nda̍. Chɔ̍m ya̍ mī I̍ kɔ᷅ chu̍ā.”

¹⁶O̍ ko̍ŋ, mi̍ Chi̍i̍sū ve̍e̍lū ndu̍ āā, “Mēēle̍.” Mi̍ Mēēle̍ mūli᷄ŋ mbo̍ ve̍e̍lū o̍ Hi̍būlūi̍ye̍ ni᷄ŋ āā, “Lūābo̍nī,” ko̍ŋ cho̍ ni̍, Ti̍chā.

¹⁷Mi̍ Chi̍i̍sū di̍mūl ndu̍ āā, “Ba̍a̍mba᷄ŋ ndɔ̍ ya̍ le̍, kāni̍, I̍ mi̍i̍ŋgu̍ wɔ̍ nāa̍ Mɛ̄lɛ̄ka̍ Fi̍nyāa̍ chūā le̍. Kɔ̍ nāa̍ bu̍ɛ̍i̍yāā nīa̍a̍ chūā mā kɔ̍ di̍mūl nda̍ māā I̍ cho̍ mīīŋgōo̍ nāa̍ Fi̍nyā nūu̍ chūā, nda̍ bɛ̍ɛ̍, Fi̍nyā ndā. I̍ cho̍ mīīŋgōo̍ nāa̍ Mɛ̄lɛ̄ka̍ nūu̍ chūā, nda̍ bɛ̍ɛ̍, Mɛ̄lɛ̄ka̍ ndāa̍.”

¹⁸O̍ ko̍ŋ kɔ̍ɔ̍lī, mi̍ Mēēle̍ Māŋgāli᷅ŋ ku̍ā, mbo̍ kɔ̍ di̍mūl bu̍ɛ̍i̍yāa̍ Chi̍i̍sūa̍a̍ māā ō chē Māsānɔ̄ɔ̍. O̍ ko̍ŋ kɔ̍ɔ̍lī, mbo̍ chɔ̄m nda̍ nyɛ̄ Chi̍i̍sū di̍mu̍l ndu̍ wo̍.

¹⁹O̍ pāa̍le̍ Kpu̍yālē lēŋ chōo̍ i̍chɔ᷅llo̍, mi̍ bu̍ɛ̍īya̍ chūūŋgi̍āŋ na̍a̍ pi᷅lɛ̍. Kɛ̍, ā wa̍ sīōōŋnde̍ le̍ wānāā bɛ̄ndūāā Chu̍ūwa̍. Le̍ he̍ī, ma̍ kīīndīāā dīōla̍ŋ kpa̍ŋ kpa̍ŋ. Kɛ̍, o̍ lēpīlɛ̍ ni᷄ŋ kpe̍ mɛ̄ɛ̍ ma̍ chā ni᷅ŋ Chi̍i̍su̍ nda̍ tɛ̄ɛ̄ŋ. Mbo̍ yīl nda̍ āā, “Lā wa̍ a̍ kɔ̄ltā nyūlū.”

²⁰Mɛ̄ɛ̍ o̍ di̍mi̍ le̍nde̍, mbo̍ chɔ̄m nda̍ bāla̍ŋ a̍ lūŋgbu̍e̍i̍. Mɛ̄ɛ̍ bu̍ɛ̍īya̍ chē Māsānɔ̄ɔ̍, ma̍ nāŋ kɔ̄l ta̍u̍ ta̍u̍.

²¹Mi̍ Chi̍i̍sū di̍mūl nda̍ vɛ̄lɛ̄ āā, “Lā wa̍ a̍ kɔ̄ltā nyūlū. Mɛ̄ɛ̍ Mɛ̄lɛ̄ka̍ vēm ya̍ yɛ̍, le̍nde̍ ko̍ni̍ ya̍ bɛ̍ɛ̍ ya̍ I̍ cho̍ nya̍ vīōmɔ̄ɔ̍ ni̍.”

²²Mɛ̄ɛ̍ o̍ di̍mi̍ le̍nde̍, mbo̍ hūl nda̍ fu̍ū. Mbo̍ dīmūl nda̍ āā, “Lā chē Nyi̍nā Kāsīo̍o̍.

²³Wānā o̍ wāna̍ nya̍ ma᷄l le̍ yɔ̄ŋndā ndɔ̄la̍ wɔ̍ɔ̍ŋnda̍ŋ pɛ̍, wānā ko̍ŋ ō sɔ̄la̍ mālɔ̄ɔ̍. Kɛ̍, wānā o̍ wāna̍ nya̍ me᷄l te̍, ō sɔ̍lā ma̍lɔ̄ɔ̄ le̍.”

²⁴Bu̍ɛ̍īyāā tɔ̍ a̍ ā ŋīɔ̍ɔ̍ŋnda̍ ō pīlɔ̍ɔ̄, ndu̍ yɔ̍nūŋ māā Tɔ̄mɔ̍si̍ ni̍, mā vēēlū vɛ̍lɛ̄ ndu̍ āā, Pɛ̄ndūnɔ̍ɔ̍, ō ve̍ lo̍ŋ bo̍o̍ndi̍i̍ bu̍ɛ̍īya̍ ā pīli̍a̍ā chē Chi̍i̍sū ve̍ le̍.

²⁵O̍ ko̍ŋ kɔ̍ɔ̍lī, ma̍ dīmūl ndu̍ māā ma̍ chā Māsānɔ̄ɔ̍. Kɛ̍, mi̍ Tɔ̄mɔ̍si̍ lo᷅ lo̍ŋ mbo̍ dīmūl nda̍ āā, “Tē I̍ chi̍ yɛ̍ ndu̍ tīndīlā ŋ̄lɔ̄ndīmɛ̄i̍la̍ŋ o̍ lābā pɛ̍ɛ̍ŋ, ndu̍yɛ̍, mī ha̍ndu̍ sūe̍i̍ o̍ tīndīlā lāŋ te̍, I̍ la̍a̍lāŋ māā ī chō tōnya̍ le̍. Mɛ̄ɛ̍ mī I̍ ha̍ndu̍ sūe̍i̍ o̍ tīndīlā lāŋ, ndu̍yɛ̍, mī I̍ wo̍u̍ bāa̍ ndu̍ o̍ lūŋgbu̍e̍i̍ nāa̍ nda̍ chūkū ndu̍ wa̍.”

²⁶O̍ ko̍ŋ kɔ̍ɔ̍lī, mɛ̄ɛ̍ lɔ̍ɔ̍ hīōū ō pīlɛ̍, bu̍ɛ̍īya̍ wa̍ nāa̍ pi᷅lɛ̍ vɛ̄lɛ̄ chīɛ̄ī ni̍ŋ. Tɔ̄mɔ̍si̍ bɛ̍ɛ̍ ō wa̍ lo̍ŋ pa̍a̍le̍ le̍ŋ. Dīōla̍ŋ lā wa̍ lā kīīndīāā. Kɛ̍, o̍ lēpīlɛ̍ ni᷄ŋ kpe̍ mā chā Chi̍i̍su̍ īsīsi̍ nda̍ tɛ̄ɛ̄ŋ. Mbo̍ yīl nda̍ āā, “Lā wa̍ a̍ kɔ̄ltā nyūlū.”

²⁷O̍ ko̍ŋ kɔ̍ɔ̍lī, mbo̍ dīmūl Tɔ̄mɔ̍si̍ āā, “Tɔ̄mɔ̍si̍, hu̍ŋ ha̍ndū ya̍ sūe̍i̍ na̍ŋ. O̍ ko̍ŋ kɔ̍ɔ̍lī, mā to̍fa̍ ya̍ bāla̍ŋ. Ndu̍yɛ̍ vɛ̍lɛ̄, mā si̍ɛ̍ndi̍ bāa̍ mā wo̍u̍ ya̍ o̍ lūŋgbu̍e̍i̍. Ma̍l ki̍i̍sa᷄ŋndo̍ mā nɔ̄ lāāla᷄ŋndo̍.”

²⁸O̍ ko̍ŋ, mi̍ Tɔ̄mɔ̍si̍ di̍mī āā, “Nu᷄m cho̍ Māsānɔ̍ nūu̍ ni̍, nu᷄m cho̍ Mɛ̄lɛ̄ka̍ nūu̍ ni̍.”

²⁹Mi̍ Chi̍i̍sū di̍mūl ndu̍ āā, “Le̍ chɔ̄ ŋ̄ chē ya̍ wo̍ ŋ̄ lāāla̍ŋ ni᷅ŋ ni̍? Wāna̍ chi̍ wɔ̍ ya̍ le̍ wo̍, kɛ̍ ndu̍yɛ̍, mbo̍ lāāla᷄ŋ ndo̍, wānā ko̍ŋ ō pɛ̄l tɔ̄nɔ̄ɔ̍.”

³⁰Mi̍ Chi̍i̍sū to̍sā wa̍lta̍ fa̍ŋgā fa̍ŋgālā chēle̍ŋ bu̍ɛ̍i̍yāā ndūa̍a̍ o̍ hɔ̄l la̍ cho̍ bɛ̍ɛ̍ la̍ po̍o̍nyīāā o̍ yāu̍wo̍ ho̍ō ni᷄ŋ te̍ la̍ŋ.

³¹Kɛ̍ ndu̍yɛ̍, la᷅ŋ lā pōōnyi̍a̍ŋ le̍ mī lā lāāla̍ŋ māā Chi̍i̍sū ndu̍ cho̍ Ki̍li̍tī ni̍, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, Mɛ̄lɛ̄ka̍ Po̍ ndɔ̄ɔ̍. Ndu̍yɛ̍, o̍ lāāla᷄ŋndo̍ ho̍ō ni᷄ŋ, mi̍ lā sɔ̄la̍ yōōmū kpe̍e̍kpe̍i̍yo̍ o̍ sa̍bū ndɔ̄ɔ̍ ni᷄ŋ.