Read Southern Kisi Chɔ᷄ŋ 3 Bible Online

Chɔ᷄ŋ 3 - Southern Kisi bible

Chɔ᷄ŋ 3

¹Po̍ pi᷅lɛ̍ wa̍ dīōla̍ŋ āā, Nīkōdi̍mɔ̄ɔ̄. Wānā bɛ̍ndū Chu̍ūwa̍ o̍ wa̍ ni̍. Ndu̍yɛ̍, o̍ ku̍ndā Fālīsi̍īya̍ chōo̍ ndu̍ o̍o̍ fu̍la̍ ni̍.

²Mbo̍ cha᷄ŋ mbo̍ kūā nāa̍ Chi̍i̍sū chu̍a̍ nyūmmā pīlɛ̍. Mɛ̄ɛ̍ o̍ ku̍ɛ̄, mbo̍ dīmūl ndu̍ āā, “Ti̍chā, ŋ̄ sīnā māā Ti̍chɛ̄i̍nɔ̍ɔ̍ ō Mɛ̄lɛ̄ka̍ vēm ndo̍ ŋ̄ chō ni̍. Kāni̍ fo̍ndōle̍, wānā o̍ wānā nɔ̍lā mbō tōsa̍ kɔ̄ndɔ̄fi̍ltā ŋ̄ tōsā la᷅ŋ nda̍ŋ te̍, mɛ̄ɛ̍ mī Mɛ̄lɛ̄ka̍ wa̍ ndu̍ kɔ̄ɔ̄lī.”

³Mi̍ Chi̍i̍sū lo᷅ o̍ ko̍ŋ mbo̍ mūlūl Nīkōdi̍mɔ̄ɔ̄ āā, “Mī di̍mu̍l nu̍m tōnya̍a̍ wa̍la̍ŋ, wānā o̍ wānā tē a̍ mi̍i̍ŋgu̍ vi̍o̍lɔ᷄ŋ pi̍la̍ le̍, Mɛ̄lɛ̄ka̍ ve᷅ nu̍m chōo̍ Ma̍sā le̍.”

⁴Mi̍ Nīkōdi̍mɔ̄ɔ̄ mu̍li᷄ŋ o̍ ko̍ŋ kɔ̍ɔ̍lī, mbo̍ nyūnā Chi̍i̍sū āā vɛ̄ɛ̄, “Wāna̍ cho̍ ni᷅ŋ ho̍ō lāŋu̍nɔ̄ ka̍lāa̍ wo̍ ō nɔ̄lā lɛ̍ mbō mīīŋgu̍ vīōlɔ᷄ŋ vɛ̍lɛ̄? Bāā mbō mīīŋgu̍ kāla̍ ndɔ̍ o̍ dēmbē mā vēlū ndu̍ vɛ̄lɛ̄ dīi̍ŋ ndɔ̄ɔ̍?”

⁵Mi̍ Chi̍i̍sū mu̍lī āā, “Mī di̍mu̍l nu̍m tōnya̍a̍ wa̍la̍ŋ, wānā o̍ wānā tē a̍ vi̍lu̍ŋ a̍ mɛ̄ŋnda̍ŋ, ndu̍yɛ̍, mā vēlu᷄ŋ a̍ Nyi̍na̍ Mɛ̄lɛ̄ka̍a̍ le̍, Mɛ̄lɛ̄ka̍ ve᷅ nu̍m chōo̍ Ma̍sā le̍.

⁶Vīōlɔ̄ɔ̄ fi̍nyāā nāa̍ nda̍ kālāa̍ nāa̍ ā vīālū na̍a̍ wo̍, ndu̍ ke᷅ na̍a̍ yōōmū yɔ̄ŋāa̍ ho̍ō ni̍. Kɛ̍, vīōlɔ̄ɔ̄ Nyi̍na̍ Mɛ̄lɛ̄ka̍a̍ ō vīālū na̍a̍ wo̍, ndu̍ ke᷅ na̍a̍ yōōmū kpe̍e̍kpe̍i̍yo̍ ni̍.

⁷Kɔ̄ndɔ̄fi̍li̍ o̍ kɔ̄ndɔ̄fi̍li̍ ō bi̍ī nu̍m le̍ mɛ̄ɛ̍ ya̍ I̍ di̍mi̍ māā mɛ̄ɛ̍ mī lā mīīŋgu̍ vīōlɔ᷄ŋ pi̍la̍ yɛ̍ le̍.”

⁸Mi̍ Chi̍i̍sū hi̍a̍ū lāchī a̍ ndu̍ dīmūllo̍ o̍ lētāle̍ ni᷄ŋ āā, “Bā hūēīye̍ ī hɛ̄nāŋ le̍ hɔ̄ŋndo̍ wo̍, lo̍ŋ i̍ hu̍āŋ ni̍. Mī wānā tu̍e̍ī ndi̍ hɔ̄ŋndo̍, kɛ̍, a̍ si̍nā na̍a̍ i̍ cha᷅ŋ nda̍ le̍. Ndu̍yɛ̍, a̍ si̍nā na̍a̍ i̍ wa᷅ kɔ᷅la̍ŋ nda̍ le̍. Mɛ̄ɛ̍ le̍nde̍ ko̍ni̍ i̍ yɔ̍nūŋ a̍ wānā o̍ wāna̍ Nyi̍na̍ Mɛ̄lɛ̄ka̍a̍ ō vīālū wo̍ ni̍.”

⁹Mi̍ Nīkōdi̍mɔ̄ɔ̄ nyu̍nā vɛ̄lɛ̄ ndu̍ āā, “Vɛ̄ɛ̍nɛ̍ he̍ī ī yɔ̄nūŋ yɛ̍?”

¹⁰Mi̍ Chi̍i̍sū mu̍lī āā, “Ti̍chɛ̄i̍nɔ̍ɔ̍, ō wāŋnda̍ I̍sɔ̄lūɛ̄ī a̍ si̍nā wa̍la̍ŋ ndo̍ ŋ̄ chō ni̍. Bāā mā bu̍mba̍ he̍ī pɛ̄ŋgu̍ si̍na̍?

¹¹Mī di̍mu̍l nu̍m tōnya̍a̍ wa̍la̍ŋ, nyɛ̄ na̍a̍ ŋ̄ sīnā pɛ̍ŋgu̍ wa̍la̍ŋ, ndu̍yɛ̍, mi̍ ŋ̄ chā wo̍ ndu̍ na̍a̍ ŋ̄ chō nya̍ dīmūllo̍ ni̍. Kɛ̍ o̍ ko̍ŋ ni̍ŋ kpo̍u̍, nya̍ fa̍ū lā chɛ᷄l mī lā lāāla̍ŋ a̍ nyɛ̄ na̍a̍ ŋ̄ dīmi̍ wo̍ le̍.

¹²I̍ di̍mu̍l nya̍ a̍ sɔ̄ɔ̍ŋ cho̍ yɔ̄nɔ᷄ŋndo̍ o̍ chi̍e̍ēŋndo̍ ho̍ō chōo̍ wo̍ŋ lā lāāla̍ŋ te̍. Tē ō wa̍ pɛ̍, mī di̍mu̍l nya̍ a̍ sɔ̄ɔ̍ŋ cho̍ yɔ̄nɔ᷄ŋndo̍ o̍ fo̍nda᷄ŋ Mɛ̄lɛ̄ka̍a̍ wo̍ŋ pɛ̍, lā lāāla̍ŋ pa̍?

¹³Lē pīlɛ̍ bɛ̍ɛ̍ wānā o̍ wānā che̍ŋ ndɔ̍ mbō he᷄l o̍ fo̍nda᷄ŋ Mɛ̄lɛ̄ka̍a̍ le̍, mɛ̄ɛ̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ o̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ mbo̍ tūāl lo̍.”

¹⁴Mi̍ Chi̍i̍sū hi̍a̍ū lāchī a̍ sūɛ̍i̍ āā, “Mɛ̄ɛ̍ Mūu̍sē he̍e̍lu̍ kɛ̄ū nda̍ tūūla̍ a̍ būlɔ̍ŋsīi̍ye̍ o̍ po̍llo̍ ni᷄ŋ yɛ̍, le̍nde̍ ko̍ni̍ nda̍ chō wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ bāŋɔ̄ɔ̄ o̍ yɔ̄mndo̍ chōo̍ mā hēēlu̍ ni̍.

¹⁵O̍ ko̍ŋ, wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ ndu̍ Po̍ Wānā Pɔ̍nɔ̍ɔ̍ ni᷄ŋ pɛ̍, wānā ko̍ŋ sɔ̄la̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍.”

¹⁶Mɛ̄lɛ̄ka̍ kāāla̍ wāŋndā chīe̍e̍ya̍. O̍ ko̍ŋ, mbo̍ yɔ̄ŋgū Po̍ ndɔ̄ pi᷅lɔ̍ɔ̍ kpe̍ le̍ nda̍, māā wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ Po̍ ndɔ̄ pi᷅lɔ̍ɔ̍ ho̍ō ni᷄ŋ pɛ̍, wānā ko̍ŋ ō vi᷅ lɛ̍ le̍. Yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍, ndu̍ o̍ sɔ̍lā ni̍.

¹⁷Mɛ̄lɛ̄ka̍ vi᷄m Po̍ ndɔ̄ɔ̍ o̍ chi̍e̍ēŋndo̍ ni᷄ŋ le̍ mbō hu᷄ŋ ki̍lūl wāŋnda̍ īyāma̍ mbō tūsi̍ nda̍ nyɛ̄ pālāā chōo̍ le̍. Ō vēm māvīāmāā Po̍ ndɔ̄ɔ̍ le̍ mbō hu᷄ŋ pi̍ŋī wāŋndā chīe̍e̍ya̍.

¹⁸Ndu̍yɛ̍, wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ Po̍ ndɔ̄ɔ̍ ho̍ō ni᷄ŋ pɛ̍, ā ki̍lūl lɛ̍ ndu̍ īyāma̍ mā tūsi̍ ndu̍ nyɛ̄ pālāā chōo̍ le̍. Kɛ̍, wānā o̍ wāna̍ do̍u̍ ti̍i̍nda᷄ŋ ndɔ̄ɔ̍ o̍ ndu̍ ni̍ŋ te̍, mɛ̄ɛ̍ ā chīi̍ ni᷅ŋ bɛ̍ɛ̍ wa̍nā ko̍ŋ yāmɛ̍i̍ kīlūl le̍ ndu̍ nyɛ̄ pālāa̍ tūsī chōo̍, kāni̍ fo̍ndōle̍, le̍ mɛ̄ɛ̍ o̍ kɛ̍ɛ̍ le̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ Po̍ ndɔ̄ pi᷅lɔ̍ɔ̍ ni᷄ŋ yɛ̍.

¹⁹Sa̍bū Mɛ̄lɛ̄ka̍ kīlūl ni̍ŋ wa᷅ŋnda̍ o̍ chi̍e̍ēŋndo̍ chōo̍ ya᷅mɛ̍i̍ mbō tūsi̍ nda̍ nyɛ̄ pālāa̍ chōo̍ wo̍, ndu̍ cho̍ ho̍ō ni̍. Mɛ̄lɛ̄ka̍ yɔ̄ŋgu̍ nyɛ̄ wa̍wo̍ŋndo̍ o̍ chi̍e̍ēŋndo̍ chōo̍ ndu̍ yɔ̍nūŋ māā nyɛ̄ wa̍wo̍ŋ tōnya̍a̍ a̍ ndu̍ pi̍la̍ o̍kɔ̄ɔ̄ ni̍. Kɛ̍, yɔ̄ŋi̍ nda̍ kāāla̍ nyɛ᷅ wa̍wo̍ŋ tōnya̍a̍ ho̍ō yɛ̍, nīīlū mānyūmndo̍ nda̍ kāāla̍ ni̍, kāni̍ fo̍ndōle̍, le̍ sɔ̄ɔ̍ŋ wɔ̍ɔ̍ŋ nda̍ tōsā wo̍ŋ.

²⁰Wāna̍ to̍sā sɔ̍ɔ̍ŋ wɔ̍ɔ̍ŋndo̍ŋ ndo̍, ndu̍ ko̍ tu᷅l nyɛ᷅ wa̍wo̍ŋ tōnya̍a̍ lēyɛ̄ ni̍. Ndu̍yɛ̍, ō fu̍lā na̍a̍ nyɛ̄ wa̍wo̍ŋndo̍ chō wa̍ le̍, yɔ̄ŋi̍ yɔ̄ŋ ndɔ̄ wɔ̍ɔ̍ŋndo̍ chɔ̄ɔ̄mu̍ŋ.

²¹Kɛ̍, wānā o̍ wāna̍ to̍sā nyɛ᷅ Mɛ̄lɛ̄ka̍ dīmi̍ māā ō chō sa̍kpo̍ le̍ tōsāa̍ wo̍, wānā wa̍ā le̍nde̍ fūlāa̍ o̍ fu̍lā o̍ nyɛ̄ wa̍wo̍ŋndo̍ ni̍. O̍ ko̍ŋ, mī nyɛ̄ wa̍wo̍ŋndo̍ ho̍ō tōsa̍ mī wāŋnda̍ chē māā ō tōsa̍ nyɛ̄ Mɛ̄lɛ̄ka̍ hɛ̄na̍ŋ ndu̍ mbō tōsa̍ wo̍.

²²O̍ ko̍ŋ kɔ̍ɔ̍lī, mi̍ Chi̍i̍sū nda̍ bu̍ɛ̍i̍yāā ndūa̍a̍ ā kūā o̍ būŋgɛ̄ī Chūdi̍a̍āve̍ ni᷄ŋ. Mbo̍ chūā pālɛ̍i̍ ī ti᷄ŋ lo̍ŋ nda̍ nda̍ā. O̍ ko̍ŋ kɔ̍ɔ̍lī, mi̍ Chi̍i̍sū yi᷅ŋ wāŋnda̍ lo̍ŋ.

²³Chɔ᷄ŋ Wānā Yi̍ŋāa̍ bɛ̍ɛ̍, ndu̍ wa̍ wāŋnda̍ yīŋɔ̄ɔ̍ E̍nɔ̄ŋ, Sa̍līm chi̍e̍e̍ i̍kɛ̍i̍. Kāni̍ fo̍ndōle̍, mɛ̄ŋnda̍ŋ mā wa̍ lo̍ŋ ta̍u̍. Wāŋnda̍ wa̍ kɔ̄la̍ŋ nāa̍ Chɔ᷄ŋ chu̍a̍ mbo̍ wā nda̍ yīŋɔ̄ɔ̍.

²⁴Kɛ̍, bōōndi̍i̍ ke̍ŋ nda̍ a̍a̍ do̍u̍ wɔ̍ ndu̍ Chɔ̍ŋ chi̍ɛ̍i̍ ni̍ŋ te̍.

²⁵O̍ ko̍ŋ kɔ̍ɔ̍lī, mi̍ lāŋu̍nɔ̄ Chu̍ūnɔ̄ pīlɛ̍, nda̍ bu̍ɛ̍i̍yāa̍ Chɔ᷄ŋ nda̍ ā pūm, ā sa̍āŋ di̍ōmnda̍ŋ hīŋa᷅ŋndo̍ a̍ mɛ̄ɛ̍ nda̍ yīŋ nda̍ pi̍la̍, le̍ mā wa̍ ā dīāndāā Mɛ̄lɛ̄ka̍ o̍ hɔ̄l lɛ̍.

²⁶O̍ ko̍ŋ kɔ̍ɔ̍lī, mi̍ bu̍ɛ̍i̍yāa̍ Chɔ᷄ŋ nda̍ ha̍ā, ā kūā ma̍ kɔ̍ di̍mūl Chɔ᷄ŋ āā, “Ti̍chā, ā lōōnūŋ pa̍ po̍ pi᷅lɛ̍ mi̍ lā wā Chɔ̍ɔ̍dāŋ le̍e̍lōo̍ nya̍ ndu̍, ma̍ dīmī bɛ̍ɛ̍ a̍ ndu̍ o̍kɔ̄ɔ̄? Po̍ ko̍ŋ, ō chō wāŋnda̍ yīŋɔ̄ɔ̍. Ndu̍yɛ̍, wānāā fāŋgā fa̍ŋgā ā chō kɔ̄la̍ŋ nāa̍ ndu̍ chu̍a̍.”

²⁷Mɛ̄ɛ̍ nda̍ dīmu̍l ndu̍ le̍nde̍, mi̍ Chɔ᷄ŋ di̍mūl nda̍ āā, “Tē ō ve̍ mī Mɛ̄lɛ̄ka̍ ndu̍ chɛ̍l te̍, ī wāā le̍nde̍ i̍ yɔ̍nūŋ a̍ wāŋndo̍ le̍.”

²⁸O̍ ko̍ŋ kɔ̍ɔ̍lī, mbo̍ dīmūl nda̍ āā, “Nya̍ pi̍la̍ lā wa̍ o̍ hɔ̄lndɔ̄ mi̍ di̍mī māā ō cho̍ ya̍ le̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ le̍. Ya̍ ya̍ Mɛ̄lɛ̄ka̍ vēm ya̍ māvīāmāā wānā ko̍ŋ lāchī.”

²⁹O̍ ko̍ŋ kɔ̍ɔ̍lī, mi̍ Chɔ᷄ŋ di̍mī o̍ lētāle̍ ni᷄ŋ āā, “Wāna̍ cho̍ la̍nɔ̍ɔ̍ chūa̍a̍ wo̍, ndu̍ nɔ̍ la̍nɔ̍ɔ̍ ni̍. Ndi̍a̍a̍mɔ̍ɔ̍ wāna̍ cho̍ la̍nɔ̍ɔ̍ chūa̍a̍ wo̍, ndu̍ ndu̍, sīsi̍la̍ŋ ko̍ni̍ o̍ si᷅m ni̍ mbō ya᷄ŋ nīla̍ŋ. Tē ō tūēī wāna̍ cho̍ la̍nɔ̍ɔ̍ chūa̍a̍ wo̍ sūɛ̍i̍ pɛ̍, ō na᷄ŋ kɔ̄l. Mɛ̄ɛ̍ le̍nde̍ ko̍ni̍, kɔ̄l kɛ̄ndɛ̄ bɛ̄ndōo̍ chō ya̍ ni᷄ŋ ni̍.

³⁰Ndu̍ nɔ̍ ni̍ mbō hīōū lāchī a̍ wāa̍ ō bɛ̄ndū mī ya̍ I̍ dɔ̍ɔ̍na̍ŋ.”

³¹Wāna̍ chɛ̍ŋ ɛ̄chɛ̍nɛ̄ wo̍, ndu̍ hi̍o̍ū a̍ wānā o̍ wānā. Wāna̍ chɛ̍ŋ o̍ chi̍e̍ēŋndo̍ ni᷄ŋ ndo̍, ndu̍ ndu̍, wānā wa̍ā chi̍e̍ēŋ na̍nu᷄ŋ o̍ cho̍ ni̍. Ndu̍yɛ̍, a̍ sɔ̄ɔ̍ŋ o̍ chi̍e̍ēŋndo̍ ni᷄ŋ o̍kɔ̄ɔ̄ o̍ su̍a̍ā ni̍. Wāna̍ chɛ̍ŋ ɛ̄chɛ̍nɛ̄ wo̍, ndu̍ cho̍ wānā o̍ wānā fe̍e̍ bo᷅lle̍ŋ ni̍.

³²Ndu̍yɛ̍, nyɛ̄ o̍ che᷅ o̍ ko̍ŋ kɔ̍ɔ̍lī, mbo̍ tūɛ̄ī yo̍, ndu̍ o̍ di̍mūl wa᷅ŋnda̍ ni̍. Kɛ̍, o̍ ko̍ŋ ni̍ŋ kpo̍u̍, wānā bɛ̍ɛ̍ la̍a̍la̍ŋ a̍ nyɛ̄ o̍ di̍mi̍ wo̍ le̍.

³³Wānā o̍ wāna̍ la̍a̍la̍ŋ nyɛ᷅ o̍ di̍mi̍ wo̍ pɛ̍, mɛ̄ɛ̍ wānā ko̍ŋ ndu̍ chɔ̍m ni̍ māā nyɛ̄ Mɛ̄lɛ̄ka̍ dīmi̍ wo̍ chō tōnya̍.

³⁴Wāna̍ Mɛ̄lɛ̄ka̍ vēm ndo̍, ndu̍ di̍mūl wa᷅ŋnda̍ yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ ni̍. Kāni̍ fo̍ndōle̍, ndu̍ Mɛ̄lɛ̄ka̍ tōsa̍ ni̍ mi̍ Nyi̍na̍ ndɔ̄ɔ̍ wā ndu̍ kɔ̄ɔ̄lī ta̍u̍.

³⁵Mɛ̄lɛ̄ka̍ Fi̍nyāa̍ ō kāāla̍ Po̍ ndɔ̄ɔ̍. Ndu̍yɛ̍, ō hāndu̍ Po̍ ndɔ̄ɔ̍ le̍ mī nyɛ̄ o̍ nyɛ̄ fe̍e̍ wa̍ ndu̍ o̍ bā bɛ̄ŋgu̍.

³⁶Wānā o̍ wāna̍ dɔ̍ū tīīnda᷄ŋndo̍ o̍ Po̍ Mɛ̄lɛ̄ka̍a̍ ho̍ō ni᷄ŋ pɛ̄, wānā ko̍ŋ ō sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍. Kɛ̍, wānā o̍ wāna̍ to̍sa̍ nyɛ᷅ o̍ di̍mūl ndu̍ wo̍ le̍ ō sɔ̍lā yo̍o̍mū kpe̍e̍kpe̍i̍yo̍ le̍. Ndu̍yɛ̍, o̍ ko̍ŋ kɔ̍ɔ̍lī, mī Mɛ̄lɛ̄ka̍ ō lo̍ wānā ko̍ŋ nyɛ̄ pālāa̍ tūsīo̍o̍ chōo̍ ha̍a̍a̍.