Read Southern Kisi Chɔ᷄ŋ 4 Bible Online

Chɔ᷄ŋ 4 - Southern Kisi bible

Chɔ᷄ŋ 4

¹Mi̍ ku̍ndā Fālīsi̍īya̍ tūɛ̄ī māā Chi̍i̍sū cho̍ bu̍ɛ̍īya̍ sɔ̄lāa̍, ndu̍yɛ̍ mbo̍ wā wāŋnda̍ yīŋɔ̄ɔ̍ mbo̍ hīāū Chɔ᷄ŋ Wānā Yi̍ŋāa̍.

²Kɛ̍ ndu̍yɛ̍, ō ve̍ Chi̍i̍sū pi̍la̍ kpe̍e̍kpe̍i̍ le̍ wa̍ wāŋnda̍ yīŋɔ̄ɔ̍ le̍. Bu̍ɛ̍i̍yāā ndūa̍a̍ nda̍ a̍a̍ nɔ̍ wāŋnda̍ yīŋɔ̄ɔ̍ ni̍.

³O̍ ko̍ŋ kɔ̍ɔ̍lī, mɛ̄ɛ̍ Māsānɔ̄ɔ̍ Chi̍i̍sū tu̍e̍ī nyɛ̄ nda̍ dīmi̍ a̍ ndu̍ o̍kɔ̄ɔ̄ wo̍, mbo̍ fāŋa᷄ŋ o̍ lɛ̄ŋndē Chūdi̍a̍āle̍ŋ ni᷄ŋ. Mbo̍ mīīŋgū o̍ lɛ̄ŋndē Kāli̍līle̍ŋ ni᷄ŋ.

⁴O̍ kɔ̄lā ndɔ̄la̍ŋ ni᷄ŋ Kāli̍lī, mɛ̄ɛ̍ mī ndu̍ o̍o̍ ke̍e̍ku̍ o̍ lɛ̄ŋndē Sāme̍e̍līāāle̍ŋ ni᷄ŋ.

⁵O̍ ko̍ŋ kɔ̍ɔ̍lī, mbo̍ fūūlūū o̍ chi̍e̍e̍ pu̍m o̍ lɛ̄ŋndē Sāme̍e̍līāālē lēŋ ni᷄ŋ, dīōla̍ŋ āā, Si̍kāā. Chi̍o̍o̍ ho̍ō yɛ̍ ō ve̍ le̍vi̍l a̍ fo̍ndāŋ Che̍kɔ̍pū ndu̍ o̍o̍ ke̍ sīndɛ̄ Chōo̍sɛ̍ po̍ ndɔ̄ wo̍ le̍.

⁶Ndu̍yɛ̍, so̍o̍ŋ māmɛ᷄ŋ Che̍kɔ̍pū wo̍ sīndɛ̄, ō wa̍ o̍ fo̍ndāŋ kōŋ. Pāa̍le̍ŋ lē wa̍ ni᷅ŋ o̍ bōlle̍ŋ chōo̍. Ndu̍yɛ̍, Chi̍i̍sū wa̍ ni᷅ŋ ō sāŋgāā a̍ kɔ̄la̍ŋ. Fūūlūūwo̍ lo̍ŋ, mbo̍ chāl o̍ so̍o̍ŋ māmɛ̄ŋ kōŋ īkɛ̄i̍.

⁷O̍ ko̍ŋ, mi̍ chūā Sāme̍e̍līāānɔ̄ pīlɛ̍ hūŋ mɛ̄ŋnda̍ŋ kɔ̄ndɔ̄ɔ̍. Mɛ̄ɛ̍ o̍ hi᷅ŋ, mi̍ Chi̍i̍sū di̍mūl ndu̍ āā, “Ke̍ ya̍ mɛ̄ŋnda̍ŋ I̍ ko᷅l.”

⁸A̍ bōōndi̍i̍ ke̍ŋ, bu̍ɛ̍i̍yāā ndūa̍a̍ nda̍ a̍a̍ ku̍ɛ̄ chi̍e̍e̍ le̍ nyɛ̄ dīa̍a̍ pīōndɔ̄ɔ̍.

⁹Mɛ̄ɛ̍ Chi̍i̍sū pi̍ɛ̍i̍ chūa̍a̍ ho̍ō mɛ̄ŋnda̍ŋ, mi̍ chūa̍a̍ mūlūl ndu̍ āā, “Nūm Chu̍ūnɔ̄ɔ̍ mā pi̍ɛ̍i̍ ya̍ Sāme̍e̍līāānɔ̄ɔ̍ mɛ̄ŋnda̍ŋ?” Chu̍ūwa̍ yɛ̄, nda̍ a̍a̍ chɛ᷅l mā ko᷄l a̍ tāāla̍ Sāme̍e̍līāāŋnda̍ kōl lo̍ le̍.

¹⁰Mi̍ Chi̍i̍sū lo᷅ o̍ ko̍ŋ mbo̍ dīmūl chūa̍a̍ ho̍ō āā, “A̍ si̍nā ke᷅ Mɛ̄lɛ̄ka̍a̍ le̍. Ndu̍yɛ̍, ya̍ cho̍ ho̍ō nu̍m mɛ̄ŋnda̍ŋ pīɛ̄īyo̍ wo̍, a̍ si̍nā ya̍ le̍. Tē nūm o̍o̍ si̍nā ya̍ pɛ̍, nu̍a̍ā nūm o̍o̍ nyu̍nā ya̍, mī ya̍ i̍i̍ ke̍ nu̍m mɛ̄ŋma̍ to̍sā mī wānā wa̍ yōōmū kpe̍e̍kpe̍i̍ ya̍ŋ.”

¹¹Mi̍ chūa̍a̍ lō o̍ ko̍ŋ mbo̍ dīmūl Chi̍i̍su̍ āā, “Fāllo̍, a̍ so̍o̍ŋ yi̍ŋgi̍lɛ̍i̍yo̍ ho̍ō, nūm yɛ̍ a̍ nɔ̍ ba̍a̍wa̍ nānāā māmɛ̄ŋ te̍. Mī kūɛ̍ɛ̍nɛ̍ ŋ̄ fūla̍ yɛ̄ a̍ mɛ̄ŋma̍ to̍sā ma̍ŋ mī wānā wa̍ yōōmū kpe̍e̍kpe̍i̍ ya̍ŋ?

¹²Fi̍nyā nāā ma̍māa̍ Che̍kɔ̍pū, ndu̍ me̍l na̍a̍ so̍o̍ŋndo̍ ho̍ō ni̍. Ndu̍ ni̍, nda̍ pūa̍a̍ ndūa̍a̍, a̍ chɔ̄lūāā ndūa̍a̍, so̍o̍ŋndo̍ ho̍ō nda̍ a̍a̍ ko᷅l ni̍. A̍ hɛ̍na̍ŋ mā di̍mu̍l la̍ māā nūm ā hīōū Che̍kɔ̍pū?”

¹³O̍ ko̍ŋ kɔ̍ɔ̍lī, mi̍ Chi̍i̍sū mu̍lī āā, “Mɛ̄ŋmā yɔ̄ŋa᷄ŋ ma᷅ŋ ma̍ŋ, wānā ko̍l ma̍ŋ bɛ̍ɛ̍ bo̍lōla̍ŋ lā nɔ̄lā mī lā vēsa̍ vɛ̄lɛ̄ nu̍m.

¹⁴Kɛ̍, mɛ̄ŋmā ya̍ ya̍ I̍ ke᷅ wa̍nā wa̍ŋ, tē wāŋndo̍ ko᷄l ma̍ŋ pɛ̍, bo̍lōlā ve̍sā lɛ̍ ndu̍ le̍. Kāni̍ fo̍ndōle̍, mɛ̄ŋmā ya̍ ya̍ I̍ ke᷅ wa̍nā wa̍ŋ, sīmnɔ᷄ŋndo̍ ma̍ si̍mnūŋ ndu̍ ni᷄ŋ mɛ̄ɛ̍ pēe̍ būūlōo̍ wā nu̍a̍ā yɛ̍ ni̍, mā chu̍ū kɔ̍ɔ̍lī le̍. Mā tōsā mī wānā ko̍ŋ ō wa̍ yōōmū kpe̍e̍kpe̍i̍. Ndu̍yɛ̍, yōōmū kōŋ, ō nɔ᷅ la̍mɛ̍ɛ̍lu̍ le̍.”

¹⁵O̍ ko̍ŋ, mi̍ chūā Sāme̍e̍li̍tīāŋnɔ̄ɔ̍ ho̍ō dīmūl Chi̍i̍sū āā, “Fāllo̍, mɛ̄ɛ̍ ke̍ ya̍ mɛ̄ŋmā māŋ. Ko̍ŋ to̍sā bo̍lōlā ve̍sā lɛ̍ ya̍ le̍, ndu̍yɛ̍, I̍ hi᷅ŋ lɛ̍ māmɛ̄ŋ kɔ̄ndɔ̄ɔ̄ na̍nu᷄ŋ te̍.”

¹⁶Mi̍ Chi̍i̍sū di̍mūl ndu̍ āā, “Kɔ̍ mā kɔ̍ ve̍e̍lū pɔ̍nɔ̍ nu̍m mī lā hīŋ.”

¹⁷Mi̍ chūa̍a̍ dīmī āā, “I̍ nɔ̍ pɔ̍nɔ̍ le̍.” Mi̍ Chi̍i̍sū di̍mūl ndu̍ āā, “Tē a̍ di̍mi̍ pɛ̍ māā a̍ nɔ̍ pɔ̍nɔ̍ le̍, mɛ̄ɛ̍ a̍ di̍mi̍ tōnya̍.

¹⁸Kāni̍ fo̍ndōle̍, pīāāndūāā ŋ̄ kēēku̍ ni᷅ŋ o̍ bā wa̍, ā pɛ̄ ni᷅ŋ ā ŋūɛ̍ɛ̍nu̍. Ndu̍yɛ̍ po̍ nya̍ chō su̍ŋ su̍ŋ nya̍ ndu̍ wo̍, ō cho̍ pɔ̍nɔ̍ nu̍m te̍. Le̍la̍ŋ, tōnya̍ ŋ̄ dīmi̍ ni̍.”

¹⁹Mi̍ chūa̍a̍ dīmī āā, “I̍ si̍na̍ ni᷅ŋ wāna̍ ŋ̄ chō wo̍, fāllo̍. Wāna̍ su̍a̍ā le̍ Mɛ̄lɛ̄ka̍ wo̍ ŋ̄ chō ni̍.

²⁰Ya̍ ya̍ fi̍nyāā nīāā ma̍māa̍ o̍ pēmbo᷄ŋ mu᷅ŋ nda̍ a̍a̍ so̍o̍lūū Mɛ̍lɛ̄ka̍ ni̍. Kɛ̍, nya̍ Chu̍ūwa̍ lā dīmi̍ māā Chūlu̍sɛ̄lɛ̄m chi̍e̍e̍ na̍a̍ ŋ̄ nɔ̄ ni̍ mī ŋ̄ sōōlu̍u̍ Mɛ̄lɛ̄ka̍.”

²¹Mi̍ Chi̍i̍sū lo᷅ o̍ ko̍ŋ mbo̍ dīmūl chūa̍a̍ ho̍ō āā, “Chūa̍a̍, nyɛ̄ ya̍ I̍ cho̍ ho̍ō nu̍m dīmūllo̍ wo̍, la̍a̍la̍ŋ a̍ ndu̍. Bōōndi̍i̍ cho̍ fūūlūū ō ve᷅ lɛ̍ ni̍ŋ māā mɛ̄ɛ̍ o̍ pēmbo᷄ŋ mu᷅ŋ kɛ̄lɛ̄ŋgāā mɛ̄ɛ̍ Chūlu̍sɛ̄lɛ̄m chi̍e̍e̍, mī wāŋnda̍ sōōlu̍u̍ Mɛ̄lɛ̄ka̍ Fi̍nyāa̍ le̍. A̍ bōōndi̍i̍ ke̍ŋ ō ve᷅ lɛ̍ ni̍ŋ fo̍ndāŋ wāŋndo̍ sōōlūū Mɛ̍lɛ̄ka̍ wo̍ le̍ wa᷅ lɛ̍ ni̍ŋ su̍ɛ̍i̍ le̍bo᷅l te̍.

²²Nya̍ Sāme̍e̍li̍tīāŋnda̍, Mɛ̄lɛ̄ka̍ nya̍ dīmi̍ māā lā chō ndu̍ sōōlūūwo̍ wo̍, lā si̍nā ndu̍ kpe̍e̍kpe̍i̍ le̍. Kɛ̍, na̍a̍ na̍a̍ Chu̍ūwa̍, na̍a̍ ŋ̄ sīnā Mɛ̍lɛ̄ka̍ na̍a̍ ŋ̄ chō sōōlūūwo̍ wo̍. Ndu̍yɛ̍, na̍a̍ Chu̍ūwa̍, o̍ sa̍bū nāa̍ ni᷄ŋ Mɛ̄lɛ̄ka̍ chō ŋ̄wāŋndā chīe̍e̍ pi̍ŋī ni̍.

²³Bōōndi̍i̍ cho̍ fūūlūū, ndu̍yɛ̍, ī chīi̍ ni᷅ŋ bɛ̍ɛ̍ fu̍u̍lūū, bōōndi̍i̍ ke̍ŋ wāna̍ so̍o̍lūū ni̍ŋ Mɛ̍lɛ̄ka̍ Fi̍nyāa̍ mɛ̄ɛ̍ Nyi̍na̍ Mɛ̄lɛ̄ka̍a̍ ō chɔ̄m ndu̍ yɛ̍ wo̍, ndu̍ so̍o̍lūū ni̍ŋ ndu̍ o̍ nɛ̄ī sa̍kpō ni̍. Ndu̍yɛ̍, mbō sōōlu̍u̍ ndu̍ o̍ nɛ̄ī tōnya̍a̍ chōo̍. Wāna̍ so̍o̍lūū Mɛ̍lɛ̄ka̍ Fi̍nyāa̍ o̍ nɛ̄ī wa̍ā nu̍a̍ā cho̍o̍ wo̍, ndu̍ Mɛ̄lɛ̄ka̍ yēēmā māā ō sōōlu̍u̍ ndu̍ ni̍.

²⁴O̍ Īnyi̍nāya̍ Mɛ̄lɛ̄ka̍ chō ni̍. Wāna̍ so̍o̍lūū ndu̍ Mɛ̍lɛ̄ka̍ wo̍, mɛ̄ɛ̍ mbō sōōlu̍u̍ ndu̍ mɛ̄ɛ̍ Nyi̍na̍ Mɛ̄lɛ̄ka̍a̍ chɔ̄m ndu̍ yɛ̍, ndu̍yɛ̍, mbō sōōlu̍u̍ ndu̍ o̍ nɛ̄i̍ tōnya̍a̍ chōo̍.”

²⁵Mi̍ chūa̍a̍ lō o̍ ko̍ŋ mbo̍ dīmī āā, “I̍ si̍nā māā Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō chō hūnɔ̄ɔ̄. Tē ō hīŋ pɛ̍, ō chō na̍a̍ hūnɔ̄ɔ̄ nyɛ̄ o̍ nyɛ̄ fe̍e̍ chɔ᷅m.”

²⁶Mi̍ Chi̍i̍sū di̍mūl ndu̍ āā, “Ya̍ cho̍ ho̍ō sūɛ̍i̍ nāa̍ nūm chu̍a̍ wo̍, ya̍ cho̍ wānā ko̍ŋ ni̍.”

²⁷A̍ te̍le̍ŋ ko̍ŋ ki̍nɛ̍i̍, mi̍ bu̍ɛ̍īyāa̍ Chi̍i̍sūa̍a̍ mīīŋgū nāa̍ ndu̍ chu̍a̍. Mi̍ kɔ̄ndɔ̄fi̍llo̍ bīī nda̍ ta̍u̍ ta̍u̍ le̍ mɛ̄ɛ̍ nda̍ kōma̍l ndu̍ sūɛ̍i̍ nda̍ wānā la̍nɔ̍ɔ̍ yɛ̍. Kɛ̍, wānā pi᷅lɛ̍ bɛ̍ɛ̍ nyu̍na̍ ndu̍ mbō yɔ᷄ŋ, “Ō yɛ̄ɛ̍nɛ̍ ŋ̄ yēēma̍ yɛ̄?” Kɛ̄lɛ̄ŋgāā, “Vɛ᷅ sūɛ̍i̍ nāa̍ chūa̍a̍ ho̍ō chūā le̍?”

²⁸O̍ ko̍ŋ kɔ̍ɔ̍lī, mi̍ chūa̍a̍ mɛ̄ī kpɛ̍ɛ̍nɛ̍i̍ ndūɛ̍i̍ māmɛ̄ŋ nde̍, mbo̍ mīīŋgū chi̍e̍e̍. Mɛ̄ɛ̍ o̍ ku̍ɛ̄, mbo̍ kɔ̍ di̍mūl wāŋnda̍ lo̍ŋ āā,

²⁹“Wāŋnda̍ lā hu᷄ŋ mī lā hu᷄ŋ chɔ᷅ po̍ ya̍ ko̍ma̍l o̍ so̍o̍ŋndo̍ wo̍. Nyɛ̄ o̍ nyɛ̄ fe̍e̍ ya̍ I̍ to̍sa̍, mbo̍ chɔ̄m pa̍ku̍. Bāā mbō wa̍ dɔ̍ɔ̍ ndu̍ cho̍ wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍?”

³⁰Mɛ̄ɛ̍ chūa̍a̍ ho̍ō dīmi̍ le̍nde̍, mi̍ wāŋnda̍ cha᷄ŋ chi̍e̍e̍ ma̍ kūā nāa̍ Chi̍i̍sū chu̍a̍.

³¹A̍ bōōndi̍i̍ ke̍ŋ, Chi̍i̍sū bu̍ɛ̍i̍yāā ndūa̍a̍ ā wa̍ ndu̍ nyɔ̄ɔ̄lōo̍ le̍ mbō dē nyɛ̄ dīa̍a̍. Ma̍ dīmūl ndu̍ āā, “Ti̍chɛ̄i̍nɔ̍ nāa̍, yāndi̍i̍ di̍o̍ nyɛ̍ dīāā pɔ̄mbɔ̄.”

³²Kɛ̍, mi̍ Chi̍i̍sū mu̍lūl nda̍ āā, “I̍ de᷅ nyɛ̄ dīa̍a̍ ō nya̍ si̍nā a̍ ndu̍ o̍kɔ̄ɔ̄ le̍ wo̍.”

³³Mɛ̄ɛ̍ o̍ so̍ō le̍nde̍, mi̍ bu̍ɛ̍i̍yāā ndūa̍a̍ ā kāndū nyūūni̍āŋndo̍ āā, “Bāā mbō wa̍ wāŋndo̍ chu̍u̍ ndu̍ nyɛ̄ dīa̍a̍ ni̍?”

³⁴Mi̍ Chi̍i̍sū di̍mūl nda̍ āā, “Nyɛ̄ nī di̍a̍a̍ ndu̍ cho̍ nyɛ̄ wāna̍ ve᷅m ya̍ wo̍ ō hɛ̄na̍ŋ ndo̍ tōsāa̍ ni̍, a̍ wa̍li̍ o̍ ve᷅m ya̍ wo̍ sīōūwo̍.

³⁵Tāle̍ pīlɛ̍ chō mī wāŋnda̍ dīmī ndu̍ āā, ‘Ō lo̍ pāŋgo̍ŋ ŋ̄ hīɔ̍ɔ̍lu̍ mī chīɔ̍ɔ̍ŋ ŋ̄ vēsa̍.’ Kɛ̍, ya̍ ya̍ mī di̍mu̍l nya̍ lā chu̍a̍ wɔ̍ hɔ᷅lla̍ mī lā tōfa̍ chīɔ̍ɔ̍ŋ mɛ̄ɛ̍ ŋ̍ cho̍ ŋ̄ vēsɛ̍i̍ le̍ kōūwɔ̄ɔ̍ yɛ̍.

³⁶Ndu̍yɛ̍, wānā o̍ wāna̍ ko̍ū pɛ̍, wānā ko̍ŋ chō pāāwāa̍ sɔ̄lā. Ndu̍yɛ̍, tɔ̄lɔ̄ɔ̄ nda̍ chūūŋgīāā ko̍ŋ ndo̍, ndu̍ yɔ̍nūŋ māā ŋ̄wāŋndā chīe̍e̍ ni̍. Ā chō yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lā. O̍ ko̍ŋ, wāna̍ wa̍a̍ chīɛ̍i̍ yo̍ ni̍, wāna̍ ko̍ū wo̍ ni̍, ā chō kɔ̄l nāŋɔ̄ɔ̄ dīōm pīlɛ̍.

³⁷Dīo̍m di̍mi̍ŋ ho̍ō āā, ‘Tē wāŋndo̍ ō pīlɔ̍ɔ̄ wāa̍ pɛ̍, ho̍ō kōū wo̍,’ tōnya̍a̍ o̍ cho̍ ni̍.

³⁸I̍ ve᷅m nya̍ māvīāmāā le̍ mī lā kɔ̍ ko̍ū chīɛ̄ī nya̍ tōsa̍ wa̍li̍ le̍ni̍ŋ te̍ ve̍. Wānāā chēle̍ŋ a̍ to̍sa̍ wa̍llo̍ o̍ chīɛ̄ī ke̍ŋ ni᷄ŋ ni̍. Kɛ̍, mi̍ nya̍ wā tɔ̄nɔ̄ɔ̍ sɔ̄lāa̍ o̍ lāli̍i̍ ndɛ̄i̍ ni᷄ŋ.”

³⁹O̍ ko̍ŋ kɔ̍ɔ̍lī, le̍ dīmī chūa̍a̍ kɔ̍ dīmi̍ āā, “Mbo̍ chɔ̄m nyɛ̄ o̍ nyɛ̄ fe̍e̍ ya̍ I̍ to̍sa̍,” wo̍, mi̍ wānāā fāŋgā fa̍ŋgā o̍ chi̍e̍e̍ māSāme̍e̍līāā kōŋ ni᷄ŋ a̍ du̍a̍ū tīīnda᷄ŋ ndāa̍ o̍ Chi̍i̍sū ni̍ŋ.

⁴⁰Le̍ he̍ī, mi̍ wāŋnda̍ ha̍ā hūŋ nāa̍ Chi̍i̍sū chu̍a̍, ma̍ nyɔ̄ɔ̄lū ndu̍ māā Chi̍i̍sū wa̍ chi̍e̍e̍ lo̍ŋ nda̍ nda̍ā. O̍ ko̍ŋ kɔ̍ɔ̍lī, mi̍ Chi̍i̍sū chu̍ā pālɛ̍i̍ ī ŋīi̍ŋ lo̍ŋ nda̍ nda̍ā.

⁴¹O̍ ko̍ŋ kɔ̍ɔ̍lī, mɛ̄ɛ̍ nda̍ tūēī nyɛ̄ Chi̍i̍sū so̍ō nāa̍ nda̍ chūā wo̍, mi̍ wānāā ka̍ ka̍ a̍ che᷅le̍ŋ ā dūāū tīīnda᷄ŋ ndāa̍ o̍ ndu̍ ni̍ŋ.

⁴²Ma̍ dīmūl chu̍a̍ ko̍ma̍l ko̍ŋ Chi̍i̍sū o̍ so̍o̍ŋndo̍ wo̍ āā, “Na̍a̍ bɛ̍ɛ̍, ŋ̄ dɔ̄ū ni᷅ŋ tīīnda᷄ŋ nāa̍ o̍ ndu̍ ni̍ŋ. Ō cho̍ lɛ̍ ko̍ le̍ dīmī nūm ndo̍ le̍. Kāni̍ fo̍ndōle̍, na̍a̍ pi̍la̍ bɛ̍ɛ̍, ŋ̄ tūēī ni᷅ŋ ndu̍ dīōm. Ndu̍yɛ̍, ŋ̄ sīnā māā ndu̍ kpe̍e̍kpe̍i̍ cho̍ wāna̍ cho̍ wāŋndā chīe̍e̍ya̍ pi̍ŋī wo̍ ni̍.”

⁴³Mɛ̄ɛ̍ Chi̍i̍sū chu̍a̍ pālɛ̍i̍ ī ŋīi̍ŋ lo̍ŋ, mbo̍ māl mbo̍ kūā o̍ lɛ̄ŋndē Kāli̍līle̍ŋ ni᷄ŋ.

⁴⁴Kāni̍ fo̍ndōle̍, Chi̍i̍sū pi̍la̍ mbo̍ dīmī āā, “Wāna̍ su̍a̍ā le̍ Mɛ̄lɛ̄ka̍ wo̍ wāŋnda̍ o̍ lɛ̄ŋndē ndɔ̄le̍ŋ ni᷄ŋ ā ke᷅ ndu̍ lēbɛ̄ɛ̄ le̍.”

⁴⁵Mɛ̄ɛ̍ o̍ fu̍u̍lu̍u̍ Kāli̍lī, mi̍ wāŋnda̍ lo̍ŋ a̍ cha̍ā ndu̍ bīyɔ̄ɔ̄ ta̍u̍. Kāni̍ fo̍ndōle̍, lɔ̍ɔ̍ bɔ̄ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ o̍ bi̍i̍nu᷄ŋ Chūlu̍sɛ̄lɛ̄m ndo̍, wāŋnda̍ ha̍ā ā wa̍ lo̍ŋ. Ā wa̍ lo̍ŋ ma̍ chā nyɛ̄ o̍ nyɛ̄ Chi̍i̍sū to̍sa̍ o̍ bɔ̄ŋa᷅ŋ kōŋ.

⁴⁶O̍ ko̍ŋ kɔ̍ɔ̍lī, mi̍ Chi̍i̍sū ku̍ā Ke̍nā chi̍e̍e̍ o̍ lɛ̄ŋndē Kāli̍līle̍ŋ ni᷄ŋ nāa̍ o̍ si̍i̍ŋgu̍u̍ mɛ̄ŋnda̍ŋ māmūɛ̄ī ya̍. Wānā bɛ̍ndū pīlɛ̍ ō wa̍ Kēpa̍a̍nīɔ̄m chi̍e̍e̍ o̍ lɛ̄ŋndē lēŋ ni᷄ŋ, po̍ ndɔ̄ɔ̍ wa̍ a̍ nāa̍ lākālu̍ te̍i̍.

⁴⁷Mɛ̄ɛ̍ wānā bɛ̍ndōo̍ ho̍ō tūēī tɔ̍ɔ̍ māā Chi̍i̍sū chɛ̍ŋ o̍ lɛ̄ŋndē Chūdi̍a̍āle̍ŋ ni᷄ŋ mbo̍ hūŋ Kāli̍lī, mbo̍ kūā nāa̍ ndu̍ chu̍a̍. Mɛ̄ɛ̍ o̍ ku̍ɛ̄, mbo̍ dīmūl Chi̍i̍sū le̍ mā kūɛ̄ Kēpa̍a̍nīɔ̄m le̍ mbō kɔ̍ si̍ŋgūl ndu̍ po̍ ndɔ̄ɔ̍. Po̍ ndɔ̄ ka̍lāa̍ ō wa̍ ni᷅ŋ tēndu̍ pīɔ̍m.

⁴⁸Mi̍ Chi̍i̍sū lo᷅ o̍ ko̍ŋ mbo̍ dīmūl wānā bɛ̍ndōo̍ ho̍ō āā, “Nya̍ ki̍nɛ̍i̍ wānā o̍ wānā cho̍ mbō dɔ̄ū tīīnda᷄ŋ ndɔ̄ɔ̍ o̍ ya̍ ni̍ŋ te̍, mɛ̄ɛ̍ mbō chē fɛ̍lɛ̍ŋ mī I̍ to̍sa̍ ka̍a̍ma̍āla̍ŋ a̍ wa̍lta̍ kɔ̄ndɔ̄fi̍lta̍ŋ.”

⁴⁹O̍ ko̍ŋ kɔ̍ɔ̍lī, mi̍ wānā bɛ̍ndōo̍ ho̍ō dīmūl Chi̍i̍su̍ āā, “Fāllo̍, ŋ̄ kɔ̍ fɔ̍, yɔ̄ŋi̍ po̍ nūu̍ ō wu̍.”

⁵⁰Mi̍ Chi̍i̍sū di̍mūl ndu̍ āā, “Mi̍i̍ŋgu̍. Po̍ nu̍mndo̍ chō sīōŋgɔ̄ɔ̄.” Dīōmndā Chi̍i̍sū di̍mi̍ la̍ŋ nda̍ŋ, mi̍ wānā bɛ̍ndōo̍ ho̍ō lāāla᷄ŋ a̍ la̍ŋ. Mbo̍ cha᷄ŋ mbo̍ mīīŋgū.

⁵¹Mɛ̄ɛ̍ o̍ wa̍ kɔ̄la̍ŋ, ma̍ kēī bɔ̄ŋa᷅ŋ nda̍ bu̍ɛ̍i̍yāā ndūa̍a̍. Ma̍ chūū ndu̍ yōōŋgōo̍ āā, “Po̍ nu̍mndo̍ chō sīōŋgɔ̄ɔ̄.”

⁵²Mbo̍ nyūnā nda̍ le̍ bōōndi̍i̍ o̍ ka̍ndu̍ pɛ̄ŋgīo̍o̍ ve̍. Ma̍ dīmūl ndu̍ āā, “Chi̍ɛ̍i̍ īpāla̍a̍ a̍ bōōndi̍i̍ pāa̍le̍ŋ lē fāŋa̍ŋ o̍ bōlle̍ŋ chōo̍ ki̍nɛ̍i̍ ye̍ mi̍ dīāllūŋ tūūwo̍ŋ ŋ̄ pɛ̄ŋgī.”

⁵³Mi̍ fi̍nyāa̍ pōo̍mbɔ̄ɔ̍ lōōnu᷄ŋ dɔ̍ɔ̍ māā a̍ bōōndi̍i̍ ke̍ŋ ki̍nɛ̍i̍ Chi̍i̍sū di̍mu̍l ndu̍ ni̍ āā, “Po̍ nu̍mndo̍ chō sīōŋgɔ̄ɔ̄.” O̍ ko̍ŋ kɔ̍ɔ̍lī, wānā bɛ̍ndōo̍ ho̍ō ni̍ a̍ yu̍ŋgu̍ ndɔ̄ɔ̍ ma̍ dūāū tīīnda᷄ŋndo̍ o̍ Chi̍i̍sū ni̍ŋ.

⁵⁴Mālɔ̄ɔ̄ Chi̍i̍sū ma̍l lɛ̄ŋndē Chūdi̍a̍āle̍ŋ mbo̍ kūā Kāli̍lī wo̍, wa̍lta̍ kɔ̄ndɔ̄fi̍ltā o̍ to̍sa̍ la̍ŋ tīɔ̍ɔ̍ŋ ndɔ̄ɔ̍ wa̍ ho̍ō ni̍.