Read Southern Kisi Chɔ᷄ŋ 5 Bible Online

Chɔ᷄ŋ 5 - Southern Kisi bible

Chɔ᷄ŋ 5

¹O̍ ko̍ŋ kɔ̍ɔ̍lī, bɔ̄ŋa᷅ŋ pīɛ̄īyāā Mɛ̄lɛ̄ka̍a̍ ō pūm ō wa̍ Chūlu̍sɛ̄lɛ̄m. Mi̍ Chi̍i̍sū ku̍ā lo̍ŋ le̍ bɔ̄ŋa᷅ŋ kōŋ.

²Mɛ̄ŋmā tīīla̍ŋma̍ pūm mā wa̍ Chūlu̍sɛ̄lɛ̄m lo̍ŋ, mā vēēlū ma̍ŋ o̍ Hi̍būlūi̍ye̍ ni᷄ŋ āā, Bɛ̄sa̍tā. Sāāsa̍ wa̍ chi̍o̍o̍ ō bālāā wo̍, o̍ dīō sāāsā ko̍ŋ ō pīlɔ̍ɔ̄ īkɛ̄i̍ lo̍ŋ mɛ̄ŋnda̍ŋ ma᷅ŋ mā wa̍ ni̍, mā ve̍e̍lū di̍o̍ kōŋ āā, Dīō Sāa̍ Lūɛ̄ī yo̍. Fo̍ndāŋndā chālāāla̍ŋ lā wa̍ lā tōōsīāā o̍ mɛ̄ŋmā māŋ īkɛ̄i̍ sa̍lā ŋūɛ̍ɛ̍nu̍.

³Wānāā lānāāwa̍ ā wa̍ ā yɛ̄ɛ̄mbāā o̍ fo̍ndāŋndā chālāālā sālā ŋūɛ̍ɛ̍nu̍la̍ la̍ŋ ta̍u̍ ta̍u̍. Wānāā sūmɛ̍i̍ya̍ ni̍, a̍ wānāa̍ nɔ̍lā kɔ᷅la̍ŋ lāpi̍ le̍ wa̍, a̍ wānāā bɛ̄vɛ̍i̍ya̍ fa̍ū ā wa̍ lo̍ŋ. [Wānāā lānāāwa̍ ha̍ā ā wa̍ chūmndo̍ le̍ bōōndi̍i̍ mɛ̄ŋnda̍ŋ mā hīīlūŋ nde̍.

⁴Kāni̍ fo̍ndōle̍, ki̍i̍la̍nɔ̍ Mɛ̄lɛ̄ka̍a̍ ndu̍ o̍o̍ nɔ̍ tōlɔ̄ɔ̍ o̍ mɛ̄ŋnda̍ŋ ma᷅ŋ ni᷄ŋ a̍ bōōndo̍ŋ ŋ̄ pūm ni̍, mbō hīīlūū ma̍ŋ. Ndu̍yɛ̍, te̍le̍ŋ o̍ te̍le̍ŋ o̍ hi̍i̍lu̍u̍ ma̍ŋ le̍nde̍ pɛ̍ wāna̍ tāse̍ tu̍āl le̍ni̍ŋ ndo̍, nāā o̍ nāa̍ wa̍ ndu̍ sīōŋgɔ̍ɔ̍ ndu̍ o̍o̍ si̍a̍ŋgū ni̍.]

⁵Po̍ pi᷅lɛ̍ ō wa̍ o̍ wānāā lānāāwa̍ ha̍ā tɛ̍ɛ̄ŋ, le̍ wɔ̄sīla̍ŋ be̍le̍-ya̍a̍ a̍ lā ŋɔ̄ma̍a̍ ō chō a̍ nāa̍.

⁶Mi̍ Chi̍i̍sū cha᷅ pōo̍ ho̍ō īhīni̍. Ndu̍yɛ̍, mbo̍ sīnā māā ō vīōū ni᷅ŋ a̍ nāa̍ ho̍ō. Mi̍ Chi̍i̍sū nyu̍nā ndu̍ āā vɛ̄ɛ̄, “A̍ hɛ̍na̍ŋ mā sēŋgū?”

⁷Mi̍ pōo̍ mūlī āā, “Mī vɛ̄ɛ̍nɛ̍ ya̍ I̍ sēŋgū yɛ̄ kɛ̍i̍, Fāllo̍? I̍ nɔ̍ wa᷅na̍ chu̍a̍ ya̍ mbō tūsi̍ ya̍ o̍ mɛ̄ŋnda̍ŋ ni᷄ŋ te̍. Bōōndi̍i̍ mɛ̄ŋnda̍ŋ mā hīīlūŋ nde̍ I̍ wa᷅ ki̍ndīo̍o̍ le̍ tōlɔ̄ɔ̍ lēni᷄ŋ mī wānā che᷅le̍ŋ kēlū ya̍ lāchī.”

⁸Mi̍ Chi̍i̍sū lo᷅ o̍ ko̍ŋ mbo̍ dīmūl ndu̍ āā, “Chɔ̍ŋ mā chu̍a̍ wāla̍ nu̍mndo̍ mā kūɛ̄nu᷄ŋ.”

⁹Dīmīo̍o̍ le̍nde̍, mi̍ pōo̍ sīāŋgū o̍ lēpīlɛ̍ ni᷄ŋ kpe̍. Mbo̍ chūā wāla̍ ndɔ̄ɔ̍ mbo̍ kāndū kɔ᷄ŋnda̍ŋ Ndu̍yɛ̍, o̍ pāa̍le̍ pɛ̍ŋgīāālē Chu̍ūwa̍ chōo̍ sūɛ̍i̍ he̍ī yɔ̄nu̍ŋ ni̍.

¹⁰Le̍ he̍ī, mi̍ wānāā bɛ̄ndūāā Chu̍ūwa̍ dīmūl po̍ Chi̍i̍sū si̍ŋgi̍ wo̍ āā, “Pāa̍le̍ nāāle̍ pɛ̍ŋgīāāle̍ŋ le̍ cho̍ hāū ni̍. Sāwa̍ nāa̍ dīmi̍ māā a̍ nɔ̍ mā kūɛ̄ īnɛ̍ a̍ wāla̍ nu̍mndo̍ o̍ pāa̍le̍ŋ nde᷅ŋ chōo̍ le̍.”

¹¹Mi̍ pōo̍ mūlī āā, “Wāna̍ si̍ŋgi̍ ya̍ wo̍, ndu̍ di̍mu̍l la̍ ni̍ māā ya̍ I̍ chu̍a̍ wa̍la̍ nūu̍ mī ku̍ɛ̍nu᷄ŋ.”

¹²Ma̍ nyūnā ndu̍ āā, “Ō nɛ̄ɛ̍ di̍mu̍l lɛ̄ nu̍m ko̍ŋ māā nūm chu̍a̍ wa̍la̍ nu̍mndo̍ mā kūɛ̄nu᷄ŋ?”

¹³Kɛ̍, pōo̍ ndu̍ o̍o̍ si̍nā wa᷅na̍ si̍ŋgi̍ ndu̍ wo̍ le̍, ndu̍yɛ̍, wāŋnda̍ wa̍ fāŋgā ta̍u̍ lo̍ŋ. Sīŋgī kōŋ ndu̍, mī Chi̍i̍sū lu̍ɛ̍i̍nu᷄ŋ o̍ fāŋgāa̍ tɛ̄ɛ̄ŋ mbo̍ kūa̍ŋ.

¹⁴Vīōūwɔ̄ɔ̍ kpɛ̍ɛ̍, mi̍ Chi̍i̍sū sa̍a̍lu᷄ŋ po̍ o̍ si̍ŋgi̍ ho̍ō wo̍ o̍ chīɛ̍i̍ Mɛ̄lɛ̄ka̍a̍ ni᷄ŋ. Mi̍ Chi̍i̍sū di̍mūl ndu̍ āā, “Mī di̍mu̍l nu̍m, mɛ̄ɛ̍ ŋ̄ sēŋgū nu̍a̍ā yɛ̍, ma̍l ni̍ko̍ yɔ᷅ŋndā nūmnda̍ wɔ̍ɔ̍ŋnda̍ŋ. Tē a̍ me̍l te̍, ā chō nyɛ̄ pālāā chēle̍ŋ sɔ̄lā mbō hīōū bɛ̍ɛ̍ le̍nde̍.”

¹⁵Mɛ̄ɛ̍ o̍ si̍na̍ māā Chi̍i̍su̍ si̍ŋgi̍ ndu̍ ni̍, mbo̍ kūā mbo̍ kɔ̍ di̍mūl wānāā bɛ̄ndūāā Chu̍ūwa̍.

¹⁶O̍ ko̍ŋ kɔ̍ɔ̍lī, ma̍ kāndū Chi̍i̍su̍ nyɛ̄ pālāa̍ tūsīo̍o̍ chōo̍ le̍ sīŋgī o̍ si̍ŋgi̍ pōo̍ ho̍ō o̍ pāa̍le̍ ndā le̍ pɛ̍ŋgīāā le̍ŋ chōo̍ wo̍.

¹⁷Mi̍ Chi̍i̍sū mu̍lūl wānāā bɛ̄ndūāā Chu̍ūwa̍ ha̍ā āā, “Le̍ te̍le̍ŋ o̍ te̍le̍ŋ Fi̍nyā nūu̍ chō wa̍llo̍. Ya̍ bɛ̍ɛ̍ mɛ̄ɛ̍ mī to̍sa̍ wa̍llo̍.”

¹⁸Le̍ nyɛ̄ Chi̍i̍sū di̍mi̍ ko̍ŋ ndo̍, mi̍ wānāā bɛ̄ndūa̍a̍ chɔ̄ɔ̄lū ni̍ko̍ kɛ̍ɛ̍sīāā le̍ ndu̍ dīyɔ̄ɔ̍. Kāni̍ fo̍ndōle̍, māā ō cho̍ lɛ̍ ko̍ le̍ sāwa̍ pāa̍le̍ pɛ̍ŋgīāā lē Chu̍ūwa̍ tɛ̄ɛ̄mbūūwo̍ le̍, kɛ̍, māā ō dīmi̍ āā, “Mɛ̄lɛ̄ka̍ cho̍ Fi̍nyā ndɔ̄ ni̍.” Māā tē ō dīmi̍ yɛ̄ pɛ̍, māā Mɛ̄lɛ̄ka̍ cho̍ Fi̍nyā nūu̍ ni̍, mɛ̄ɛ̍ dīmīo̍o̍ o̍ di̍mi̍ ko̍ŋ ni̍ māā nda̍ Mɛ̄lɛ̄ka̍ ā sīīma᷅ŋ.

¹⁹O̍ ko̍ŋ, mi̍ Chi̍i̍sū di̍mūl wānāā bɛ̄ndūāā Chu̍ūwa̍ āā, “Mī di̍mu̍l nya̍ tōnya̍a̍ wa̍la̍ŋ, Po̍ Mɛ̄lɛ̄ka̍a̍ ō nɔ̍lā mbō to̍sa̍ nyɛ̄ o̍ nyɛ̄ a̍ bā ndɔ̄ le̍. Nyɛ̄ o̍ cha᷅ Fi̍nyā ndɔ̍ o̍ tōsāa̍ wo̍, ndu̍ ko̍ni̍ o̍ to̍sā ni̍. Nyɛ̄ Mɛ̄lɛ̄ka̍ Fi̍nyāa̍ ō tōsā wo̍, ndu̍ ko̍ni̍ Po̍ ndɔ̄ɔ̍ bɛ̍ɛ̍ ō tōsā ni̍.

²⁰Kāni̍ fo̍ndōle̍, Mɛ̄lɛ̄ka̍ Fi̍nyāa̍ kāāla̍ Po̍ ndɔ̄ɔ̍, ndu̍yɛ̍, nyɛ̄ o̍ nyɛ̄ ndu̍ Mɛ̍lɛ̄ka̍ ō wa̍ tōsāa̍ chɔ̄mndo̍ o̍ chɔ᷅m ndu̍ ni̍. Ndu̍yɛ̍, ō chō ndu̍ sɔ̄ɔ̍ŋ bɛ̍ndūŋ chēle̍ŋ chɔ̄m le̍ tōsāa̍ mī ŋ̄ hīōū bɛ̍ɛ̍ i̍ yɔ̍nu̍ŋ he̍ī ye̍. O̍ ko̍ŋ, nya̍ kpo̍u̍ mī kɔ̄ndɔ̄fi̍llo̍ bīī nya̍.

²¹Mɛ̄ɛ̍ Mɛ̄lɛ̄ka̍ Fi̍nyāa̍ sōlī wa̍nāā vīlɛ̍i̍ya̍ o̍ pīɔ̍mndo̍ ni᷄ŋ mbō tōsa̍ mā wa̍ yōōmū yɛ̍, le̍nde̍ ko̍ni̍ Po̍ ndɔ̄ɔ̍ ō kē wa̍nāā o̍ ye̍e̍mā wa̍ yōōmōo̍ ni̍.

²²Mɛ̄lɛ̄ka̍ Fi̍nyāa̍ ō ki̍lūl wa̍nā o̍ wānā i̍ya᷅ma̍ le̍. Ō ke̍ Po̍ ndɔ̄ɔ̍ kpāāyāa̍ le̍ wāŋnda̍ kpo̍u̍ ya᷅mɛ̍i̍ kīlūl lo̍.

²³Ndu̍yɛ̍, Mɛ̄lɛ̄ka̍ Fi̍nyāa̍ ō tōsa̍ he̍ī le̍ mī wāŋnda̍ ā ke̍ Po̍ ndɔ̄ɔ̍ bɛ̄ɛ̄le̍ŋ, mɛ̄ɛ̍ nda̍ kē Fi̍nyā ndɔ̍ bɛ̄ɛ̄le̍ŋ yɛ̍. Wānā o̍ wāna̍ ke̍ Po̍ ndɔ̄ɔ̍ bɛ̄ɛ̄le̍ŋ te̍ mɛ̄ɛ̍ Mɛ̄lɛ̄ka̍ o̍ ve᷅m ndu̍ wo̍, mɛ̄ɛ̍ ndu̍ wānā ko̍ŋ ō kɛ̄ɛ̍ ko̍ŋ bɛ̍ɛ̄le̍ŋ kīo̍o̍ ni̍.

²⁴“Mī di̍mu̍l nya̍ tōnya̍a̍ wa̍la̍ŋ, wānā o̍ wāna̍ tu̍e̍ī nyɛ̄ ya̍ I̍ di̍mī wo̍ pɛ̍, ndu̍yɛ̍, mbō tōsa̍ ndu̍, o̍ ko̍ŋ kɔ̍ɔ̍lī, mbō dɔ̄ū tīīnda᷄ŋndo̍ o̍ Mɛ̄lɛ̄ka̍ ni᷄ŋ o̍ ve᷅m ya̍ wo̍ pɛ̍, mɛ̄ɛ̍ wānā ko̍ŋ ō kāndu̍ ni᷅ŋ bɛ̍ɛ̍ yo̍o̍mū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lāa̍. Mɛ̄ɛ̍ wānā ko̍ŋ ā ki̍lūl lɛ̍ ndu̍ īyāma̍ le̍ ndu̍ nyɛ̄ pālāā tūsī chōo̍ le̍. Ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ wānā ko̍ŋ ō fāŋa̍ŋ o̍ nɛ̄i̍ ku̍ɛ̄ o̍ pīɔ̍mndo̍ ni᷄ŋ ndo̍ chōo̍ mbo̍ kāndū wāa̍ yōōmū kpe̍e̍kpe̍i̍.

²⁵Mī di̍mu̍l nya̍ tōnya̍a̍ wa̍la̍ŋ, bōōndi̍i̍ cho̍ fūūlūū, ndu̍yɛ̍, ī chīi̍ ni᷅ŋ bɛ̍ɛ̍ fu̍u̍lūū, tē wānāa̍ cho̍ māā wānāā vīlɛ̍i̍ ya̍ ā tūēī nyɛ̄ Po̍ Mɛ̄lɛ̄ka̍a̍ dīmī wo̍ pɛ̍, ndu̍yɛ̍, mā tōsa̍ ndu̍ pɛ̍, wānāā kāŋ ā chō wā yōōmū kpe̍e̍kpe̍i̍.

²⁶Mɛ̄ɛ̍ Mɛ̄lɛ̄ka̍ Fi̍nyāa̍ chō wāna̍ to̍sā mī wāŋnda̍ ā wa̍ yōōmū kpe̍e̍kpe̍i̍ yɛ̍, le̍nde̍ ko̍ni̍ o̍ to̍sā mi̍ Po̍ ndɔ̄ɔ̍ ō wā wāna̍ to̍sā mī wāŋnda̍ wā yōōmū kpe̍e̍kpe̍i̍ yɛ̍ ni̍.

²⁷Ndu̍yɛ̍, ō ke̍ Po̍ ndɔ̄ɔ̍ kpāāyāa̍ le̍ wāŋnda̍ yāmɛ̍i̍ kīlūl lo̍. Kāni̍ fo̍ndōle̍, ndu̍ Po̍ ndɔ̄ɔ̍ ndu̍ cho̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ni̍.

²⁸Kɔ̄ndɔ̄fi̍li̍ bi̍ī nya̍ le̍ nyɛ̄ ya̍ I̍ cho̍ nya̍ dīmūllo̍ wo̍ le̍. Ndu̍ cho̍ ni̍, māā te̍le̍ŋ cho̍ fūūlūū mī wānāā vīlɛ̍i̍ya̍ kpo̍u̍ a̍ tu̍e̍ī dīōm ndɔ̄ɔ̍

²⁹o̍ ko̍ŋ, mā fūla̍ o̍ sɛ̄īla̍ŋ ni᷄ŋ. O̍ ko̍ŋ, wānāa̍ to̍sa̍ yɔ̄ŋndā kɛ̄ndɛ̄la̍ŋ nda̍ ā chō fūlā mā sɔ̄la̍ yōōmū kpe̍e̍kpe̍i̍yo̍. O̍ ko̍ŋ kɔ̍ɔ̍lī, mī wānāa̍ to̍sa̍ yɔ̄ŋndā wɔ̄ɔ̍ŋnda̍ŋ nda̍ mā fūla̍ mā kūɛ̄ o̍ nyɛ̄ nɛ̄īyāa̍ ni᷄ŋ.”

³⁰Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ dīmī āā, “I̍ to̍sā nyɛ᷅ o̍ nyɛ̄ o̍ kpāāya̍ ni̍ ya̍ pi̍la̍ ni̍ŋ te̍. Mɛ̄ɛ̍ Mɛ̄lɛ̄ka̍ dīmūl la̍ yɛ̍, le̍nde̍ ko̍ni̍ ya̍ I̍ ki̍lūl wa᷅ŋnda̍ yāmɛ̍i̍ ni̍. Le̍la̍ŋ, tē I̍ ki̍lu̍l wānā o̍ wānā ya᷅mɛ̍i̍ pɛ̍, yāmɛ̍ī sa̍kpūe̍i̍ i̍ wa᷅ ni̍. Kāni̍ fu̍u̍le̍, I̍ cho̍ ki̍ndī le̍ hɛ̄na᷄ŋ ni̍ ya̍ pi̍la̍ to̍sā le̍. Wāna̍ ve᷅m ya̍ wo̍ nyɛ̄ o̍ hɛ̍na̍ŋ ndo̍, ndu̍ ya̍ I̍ to̍sā ni̍.

³¹“Tē ndu̍ o̍o̍ wa̍ ya̍ pi̍la̍ ko̍ni̍ pɛ̍ chɔ̍m a̍ ya̍ pi̍la̍ o̍kɔ̄ɔ̄ ni̍, wāŋnda̍ nda̍ a̍a̍ nɔ᷅ di̍ le̍ kɛ̄ɛ̄ lāāla᷄ŋndo̍ a̍ nyɛ̄ ya̍ I̍ di̍mi̍ a̍ ya̍ pi̍la̍ o̍kɔ̄ɔ̄ wo̍.

³²Kɛ̍ ndu̍yɛ̍, wānā che᷅le̍ŋ chō o̍ nɔ̍lā mbō chɔ᷄m nyɛ̄ o̍ si̍nā a̍ ya̍ o̍kɔ̄ɔ̄ wo̍. Ndu̍yɛ̍, I̍ si̍nā māā tōnya̍a̍ o̍ di̍mī a̍ ya̍ o̍kɔ̄ɔ̄ ni̍.

³³O̍ ko̍ŋ kɔ̍ɔ̍lī, mi̍ nya̍ pi̍la̍ vīām bu̍ɛ̍i̍yāā nyāa̍ nāa̍ Chɔ᷄ŋ chu̍a̍. Ndu̍yɛ̍, mbo̍ sūāā tōnya̍a̍ a̍ ya̍ o̍kɔ̄ɔ̄.

³⁴Kɛ̍ ndu̍yɛ̍, ō cho̍ ma̍chu̍a̍ā māā mɛ̄ɛ̍ mī wāna̍ chi̍e̍e̍ o̍ chɔ̍m īsɔ̄ɔ̍ a̍ ya̍ o̍kɔ̄ɔ̄ le̍. I̍ di̍mi̍ mādīmīāā he̍ī a̍ Chɔ᷄ŋ Wānā Yi̍ŋāa̍ o̍kɔ̄ɔ̄ le̍ mī lā pēŋ.

³⁵Dīōmndā Chɔ᷄ŋ di̍mi̍ la̍ŋ lā chō māchūāā mɛ̄ɛ̍ la̍mbūi̍yo̍ wā nu̍a̍ā sānde̍i̍ mbō yɔ̄ŋgū nyɛ᷅ wa̍wo̍ŋndo̍ yɛ̍. Ndu̍yɛ̍, le̍ te̍le̍ŋ ti̍ŋ mi̍ lā sɔ̄lā tɔ̄nɔ̄ɔ̍, ndu̍yɛ̍, mi̍ lā wā a̍ kɔ̄l kɛ̄ndɛ̄ a̍ nyɛ̄ wa̍wo̍ŋ ko̍ŋ.

³⁶Kɛ̍ ndu̍yɛ̍, nyɛ̄ chēle̍ŋ chō o̍ chɔ᷅m i̍sɔ̍ɔ̍ a̍ ya̍ o̍kɔ̄ɔ̄ wo̍. Nyɛ̄ kōŋ ndu̍ chɔ᷅m wa᷅na̍ ya̍ I̍ cho̍ wo̍ mbo̍ hīāū bɛ̍ɛ̍ nyɛ᷅ dīōmndā Chɔ᷄ŋ di̍mi̍ a̍ ya̍ o̍kɔ̄ɔ̄ la̍ŋ. Nyɛ̄ kōŋ ndu̍ yɔ̍nūŋ māā wa̍lta̍ ya̍ to̍sā la̍ŋ ni̍, wa̍lta̍ Mɛ̄lɛ̄ka̍ Fi̍nyāa̍ ō ke̍ ya̍ le̍ tōsāa̍ la̍ŋ. Wa̍lta̍ la̍ŋ la̍ŋ la̍ chɔ᷅m wa᷅na̍ ya̍ I̍ cho̍ wo̍ ni̍. La̍ŋ ko̍ni̍ la̍ chɔ᷅m ni̍ māā ndu̍ Mɛ̍lɛ̄ka̍ Fi̍nyāa̍ māā ndu̍ ve᷅m ya̍ ni̍.

³⁷O̍ ko̍ŋ kɔ̍ɔ̍lī, Mɛ̄lɛ̄ka̍ Fi̍nyāa̍ o̍ ve᷅m ya̍ wo̍, ndu̍ bɛ̍ɛ̍ ō chɔ̄m a̍ ya̍ o̍kɔ̄ɔ̄. Lā tūi̍i̍ yɔ̍ bɛ̍ɛ̍ ndu̍ dīōm te̍. Ndu̍yɛ̍, lā chi̍ wɔ̍ bɛ̍ɛ̍ ndu̍ mī lā sīna̍ mɛ̄ɛ̍ o̍ cho̍ yɛ̍ le̍.

³⁸Yōōŋgu̍ chɛ̍ŋ o̍ ndu̍ lo̍ wo̍, lā cho̍ chɛ̍lɔ̄ɔ̄ mbō cha᷄l nya̍ o̍ lākɔ̄l te̍, kāni̍ fo̍ndōle̍, lā lāāla̍ŋ a̍ wāna̍ o̍ ve᷅m ndo̍ le̍.

³⁹Dīōmnda̍ cho̍ o̍ Yāu̍ Mɛ̄lɛ̄ka̍a̍ ni᷄ŋ nda̍ŋ mī lā pɛ̄ɛ̄ku̍ la̍ŋ, kāni̍ fo̍ndōle̍, lā nɔ̄ yīya᷄ŋndo̍ māā, lā nɔ̄lā mī lā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍ o̍ dīōmndā lāŋ ni᷄ŋ. O̍ Yāu̍ Mɛ̄lɛ̄ka̍ ko̍ŋ ni᷄ŋ ko̍ni̍ dīōmnda̍ŋ lā chō lā dīmīa̍ŋ a̍ ya̍ o̍kɔ̄ɔ̄ ni̍.

⁴⁰Kɛ̍ o̍ ko̍ŋ ni̍ŋ kpo̍u̍, lā chɛ᷅l mī lā dɔ̄ū tīīnda᷄ŋ nyāa̍ o̍ ya̍ ni̍ŋ le̍ mī lā sɔ̄la̍ yōōmū kpe̍e̍kpe̍i̍yo̍ le̍.”

⁴¹Mi̍ Chi̍i̍sū hi̍a̍ū lāchī a̍ sūɛ̍i̍ āā, “Ō cho̍ ki̍ndī le̍ ya̍ I̍ cho̍ māā wāna̍ chi̍e̍e̍ o̍ sa̍ŋga̍la̍ ya̍ le̍.

⁴²Kɛ̍ ndu̍yɛ̍, I̍ si̍nā wānāā nya̍ chō wa̍. I̍ si̍nā māā lā nɔ̍ ka̍a̍lā o̍ kɔ̄ltā nyāla̍ŋ ni᷄ŋ le̍ Mɛ̄lɛ̄ka̍ le̍.

⁴³Fi̍nyā nūu̍, ndu̍ ve᷅m ya̍ māā hɔ̄ltē ndɔ̄ kpe̍e̍kpe̍i̍ ni̍. Kɛ̍ ndu̍yɛ̍, lā chɛ᷄l mī lā ya᷄ŋ ya̍ lānī le̍. Kɛ̍ o̍ ko̍ŋ kɔ̍ɔ̍lī, tē wānā che᷅le̍ŋ ndu̍ hi᷅ŋ a̍ kpāāya̍ ndɔ̍ ndu̍ pi̍la̍a̍ pɛ̍, nu̍a̍ā nya̍ yāŋ ndu̍ ndu̍ la̍ni̍.

⁴⁴Lā lēndu̍ŋ kɔ̍l māā o̍ cho̍ ho̍ō Mɛ̄lɛ̄ka̍ ndu̍ pīlɛ̍ kpe̍ wo̍ māā ndu̍ sa̍ŋga̍la̍ nya̍ le̍. Nya̍ pi̍la̍ sāŋga̍li̍āŋndo̍ vēllāa̍ vēllē, ndu̍ nɛ̍ŋī nya̍ kɔ̄lta̍ŋ ni̍. Le̍la̍ŋ bɛ̍ɛ̍, nya̍ nɔ̍lā mī lā lāāla̍ŋ a̍ ya̍ le̍ ni̍.

⁴⁵Kɛ̍ o̍ ko̍ŋ ni̍ŋ kpo̍u̍, lā nɔ᷅ o̍ kɔ̄l māā ya̍ le̍ cho̍ lākɔ̄ sūɛ̍i̍ nyā dɔ̍wɔ̄ɔ̄ o̍ Mɛ̄lɛ̄ka̍ Fi̍nyāa̍ lāchī le̍. Mūu̍sē ō nya̍ tīīnda̍ŋ le̍ nya̍ mālāa̍ wo̍, ndu̍ kpe̍e̍kpe̍i̍ cho̍ lākɔ̄ sūɛ̍i̍ nyɛ̄i̍ dɔ̄wɔ̄ɔ̄ o̍ Mɛ̄lɛ̄ka̍ Fi̍nyāa̍ lāchī ni̍.

⁴⁶Tē ndu̍ o̍o̍ wa̍ pɛ̍, mī nya̍ a̍a̍ la̍a̍la̍ŋ a̍ sɔ̄ɔ̍ŋ Mūu̍sē pōōnyīāā wo̍ŋ lēkɛ̍ndɛ̍ī pɛ̍, lā wa̍ lāāla᷄ŋ a̍ ya̍, kāni̍ fo̍ndōle̍, a̍ ya̍ o̍kɔ̄ɔ̄ Mūu̍sē po̍o̍nyi̍a̍a̍ dīōmndā lāŋ ni̍.

⁴⁷Kɛ̍, lā kɛ̄ɛ̍ wɔ̄ le̍ lāāla᷄ŋndo̍ a̍ nyɛ̄ o̍ po̍o̍nyi̍a̍a̍ wo̍, vɛ̄ɛ̍nɛ̍ nya̍ lōōkū yɛ̍ lāāla᷄ŋ a̍ dīōmnda̍ ya̍ di̍mi̍ la̍ŋ?”