Read Southern Kisi Chɔ᷄ŋ 6 Bible Online

Chɔ᷄ŋ 6 - Southern Kisi bible

Chɔ᷄ŋ 6

¹Mɛ̄ɛ̍ te̍le̍ŋ ti̍ŋ hīōū, mi̍ Chi̍i̍sū ta᷅ŋ o̍ Mɛ̄ŋmā Ībūŋga᷄ŋ Kāli̍lī le̍e̍lōo̍. Ā vēēlū vɛ̍lɛ̄ mɛ̄ŋmā ībūŋga᷄ŋ ma᷅ŋ āā, mɛ̄ŋmā ībūŋga᷄ŋ Tābi̍līāā.

²Mɛ̄ɛ̍ o̍ ta̍ŋ kɔ̄ŋgɔ̍ɔ̍ lēe̍lōo̍, mi̍ wāŋnda̍ tūāl ndu̍ kɔ̄ɔ̄lī fāŋgā bɛ̍ndōo̍, kāni̍ fo̍ndōle̍, le̍ wa̍lta̍ bɛ̍ndūlā nda̍ chē mbo̍ tōsā la̍ŋ. La̍ŋ la̍ yɔ̍nūŋ māā wānāā lānāā o̍ si̍ŋgi̍ wa̍ ni̍.

³Mi̍ Chi̍i̍sū lo᷅ o̍ ko̍ŋ mbo̍ hēl pēmbēi̍ chōo̍ mbo̍ chāl nda̍ bu̍ɛ̍i̍yāā ndūa̍a̍.

⁴Ndu̍yɛ̍, pāa̍le̍ Chu̍ūwa̍ bīī bɔ᷅ŋa᷅ŋ lōōna᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ le̍ŋ lē wa̍ ni᷅ŋ kpɛ̍ɛ̍lūŋ.

⁵Mɛ̄ɛ̍ Chi̍i̍sū wa̍ mɛ̄ɛ̄ndīa̍ŋndo̍, mbo̍ chā wāŋnda̍ fāŋgā bɛ̍ndōo̍ ā chō hūnɔ̄ɔ̍ nāa̍ ndu̍ chu̍a̍. Mbo̍ nyūnā bu̍ɛ̍ī ndɔ̄ɔ̍ ō pīlɔ̍ɔ̄ Fi̍li̍pī āā, “Kūɛ̍ɛ̍nɛ̍ na̍a̍ ŋ̄ sɔ̄lā yɛ̍ nyɛ̄ dīa̍a̍ tūu̍le̍ŋ le̍ pīōndɔ̄ɔ̍ mī wāŋnda̍ ha̍ā dē?”

⁶Kɛ̍ ndu̍yɛ̍, le̍ Fi̍li̍pī kɔ̄llo̍ tōfāa̍ ni᷄ŋ ko̍ni̍ o̍ nyu̍na̍ ndu̍ nyūnā kōŋ ni̍. Ndu̍ pi̍la̍ ndu̍ o̍o̍ si̍nā nyɛ᷅ ndu̍ o̍o̍ nɔ̍ le̍ tōsāa̍ wo̍.

⁷Mi̍ Fi̍li̍pī lo᷅ o̍ ko̍ŋ mbo̍ mūlī Chi̍i̍su̍ dīōm āā, “A̍ fāŋgā ka̍āku̍u̍wo̍ ho̍ō, mɛ̄ɛ̍ ni᷅ŋ dɔ̍ɔ̍ mī ŋ̄ pēndū bēe̍dīi̍yo̍ a̍ nyɛ̄ sɔ̄lāa̍ ō bānā ba̍na̍[1] mālāŋ nda̍ kpo̍u̍ a̍ sɔ̍lā bɛ̍ɛ̍ o̍ pɔ᷅m pɔ̍mbɔ̄.”

⁸O̍ ko̍ŋ, Chi̍i̍sū bu̍ɛ̍i̍yāā ndūa̍a̍ ō pīlɔ̍ɔ̄ dīōla̍ŋ A̍ndūlū, pɔ̄mbɔ̄ɔ̍ Sa̍i̍mɔ̄ŋ Pītɛ̍, mbo̍ dīmī āā,

⁹“Pōo̍mbɔ̄ pīlɛ̍ chō na̍nu᷄ŋ ō nɔ̄ bēe̍dīi̍ ŋ̄ba̍a̍līi̍yo̍ kpūŋgba᷄ŋ ŋ̄ ŋūɛ̍ɛ̍nu̍ a̍ sūūwa̍ ā ŋīɔ̍ɔ̍ŋ. Kɛ̍, mī yɛ̄ɛ̍nɛ̍ ko̍ŋ yɔ̍ŋ yɛ̄ a̍ fāŋgā ka̍āku̍u̍wo̍ ho̍ō?”

¹⁰Mi̍ Chi̍i̍sū di̍mūl nda̍ āā, “Lā tōsa̍ mī wāŋnda̍ cha᷄l.” Ndu̍yɛ̍, bīl pūīyāa̍ wa̍ o̍ fo̍ndāŋ kōŋ ta̍u̍. Mi̍ wāŋnda̍ kpo̍u̍ a̍ cha᷅l. Pūa̍a̍ su̍e̍e̍ nda̍ a̍a̍ wa᷅ wa̍a̍la̍ŋ lā ŋūɛ̍ɛ̍nu̍.

¹¹Mi̍ Chi̍i̍sū bi̍ī bēe̍dīi̍ kpūŋgba᷄ŋ ŋūɛ̍ɛ̍no̍o̍ ho̍ō mbo̍ me᷅l Mɛ̄lɛ̄ka̍ ba̍li̍ka̍a̍ le̍ ndu̍. Mbo̍ pīɔ̄ū wānāa̍ wa̍ īchāli̍ lo̍ŋ nda̍. Sūūwāā ŋīɔ̍ɔ̍ŋnda̍ bɛ̍ɛ̍, le̍nde̍ ko̍ni̍ o̍ to̍sa̍ a̍ nda̍ ni̍. Mɛ̄lɛ̄ka̍ ba̍li̍ka̍a̍ mēllo̍, mbo̍ pīɔ̄ū nda̍. Wāŋnda̍ kpo̍u̍ ma̍ dīā ma̍ pūm.

¹²Mɛ̄ɛ̍ nda̍ kpo̍u̍ a̍ de᷅ ma̍ pūm, mi̍ Chi̍i̍sū di̍mūl bu̍ɛ̍i̍yāā ndūa̍a̍ āā, “Lā chɔ̄ɔ̄vi̍a̍a̍ o̍ nda̍ dēma̍ wo̍. Ō pɔ̄mbɔ̄ bɛ̍ɛ̍ ō ta̍mbū le̍.”

¹³Ma̍ chɔ̄ɔ̄vīāā ō bīŋgī bi̍ŋgi̍ nda̍ dēma̍ ko̍ŋ ndo̍ ma̍ dūāū o̍ kāmbɛ̍i̍la̍ŋ ni᷄ŋ. Bēe̍dīi̍ ŋ̄ba̍a̍līi̍ kpūŋgba᷄ŋ ŋūɛ̍ɛ̍nu̍ wāŋnda̍ dē ko̍ŋ ndo̍, mɛ̄ɛ̍ bu̍ɛ̍īya̍ chɔ̄ɔ̄vi̍a̍a̍ ō bīŋgī bi̍ŋgī nda̍ dēma̍ wo̍, mbo̍ pīā kāmbɛ̍i̍la̍ŋ tɔ̍ a̍ lā tīɔ̍ɔ̍ŋ.

¹⁴Mɛ̄ɛ̍ wāŋnda̍ chē sūɛ̍i̍ kɔ̄ndɔ̄fi̍li̍i̍ bɛ̄ndūīī Chi̍i̍sū to̍sa̍ ve̍, ma̍ kāndū dīmu̍la᷅ŋndo̍ āā, “Lē kɛ̍ndɛ̍ī, wāna̍ su̍a̍ā le̍ Mɛ̄lɛ̄ka̍ wo̍ ō nda̍ dīmi̍ māā ō chō hūnɔ̄ɔ̄ o̍ chi̍e̍ēŋndo̍ ni᷄ŋ ndo̍, ndu̍ kpe̍e̍kpe̍i̍ cho̍ ho̍ō ni̍.”

¹⁵O̍ ko̍ŋ kɔ̍ɔ̍lī, mi̍ Chi̍i̍sū du̍a̍ū tāāsi̍ māā wāŋnda̍ cha᷄l le̍ ndu̍ chūa̍a̍ a̍ ka̍ka̍ mā sīīŋgu̍u̍ ndu̍ māsā bɛ̍ndōo̍. Sīnāa̍ le̍nde̍, mbo̍ kūānu᷄ŋ vɛ̍lɛ̄ pɔ̍ o̍ pēmbo᷄ŋ tɛ̄ɛ̄ŋ ndu̍ pīlɛ̍.

¹⁶Mɛ̄ɛ̍ pāa̍le̍ŋ lē de᷄l, mi̍ bu̍ɛ̍i̍yāa̍ Chi̍i̍sūa̍a̍ tūāl o̍ mɛ̄ŋmā ībūŋga᷄ŋ kɔ̄ŋgɔ̍.

¹⁷O̍ ko̍ŋ kɔ̍ɔ̍lī, ma̍ lūɛ̄īnu᷄ŋ o̍ dɛ̄ndɔ̄ɔ̍ ni᷄ŋ ma̍ kāndū mɛ̄ŋmā ībūŋga᷄ŋ tāŋɔ̄ɔ̍ kūmbū Kēpa̍a̍nīɔ̄m ndo̍. Mbo̍ lō o̍ ko̍ŋ mi̍ nyūmnda̍ŋ mā tūāl, Chi̍i̍sū mi̍i̍ŋgū nda̍ o̍ ībūŋ te̍.

¹⁸A̍ bōōndi̍i̍ ke̍ŋ, hūēīye̍ ī wa̍ hɔ̄ŋndo̍ mi̍ mɛ̄ŋnda̍ŋ mā wā hīīlɔ᷄ŋndo̍ ta̍u̍.

¹⁹Mɛ̄ɛ̍ bu̍ɛ̍īya̍ lo̍ kɔ̄la̍ŋ a̍ mɛ̄ŋnda̍ŋ kɔ̄ndɔ̄ɔ̍, ma̍ kūā la̍nda̍ŋ, le̍ mɛ̍ɛ̍līi̍la̍ ya̍a̍, kɛ̄lɛ̄ŋgāā lā hīɔ̍ɔ̍lu̍, ma̍ chā Chi̍i̍su̍ ō chō hūnɔ̄ɔ̍ o̍ mɛ̄ŋnda̍ŋ chōo̍, o̍ dɛ̄ndɔ̄ɔ̍ īkɛ̄i̍. Chɔ̄ɔ̍ ndu̍ hūnɔ̄ɔ̍, mi̍ sīōōŋnde̍ bīī nda̍ ta̍u̍ ta̍u̍.

²⁰Mi̍ Chi̍i̍sū lo᷅ o̍ ko̍ŋ mbo̍ dīmūl nda̍ āā, “Lā yɔ᷅ŋ īsīōōŋ te̍, ya̍ ni̍.”

²¹O̍ ko̍ŋ, ma̍ dīmūl ndu̍ a̍ kɔ̄l kɛ̄ndɛ̄ māā ō lūɛ̍i̍ o̍ dɛ̄ndɔ̄ɔ̍ ni᷄ŋ. He̍ī yɔ̄nɔ᷄ŋndo̍ dɔ̍ɔ̍, mi̍ dɛ̄ndɔ̄ɔ̍ fūūlūū bɛ̍ɛ̍ o̍ kɔ̄ŋgɔ̍ɔ̍ nāa̍ nda̍ a̍a̍ nɔ̍ le̍ tāŋɔ̄ɔ̍ wa̍.

²²Dīi̍māndɔ̄ɔ̍, wāŋnda̍ fāŋgā bɛ̍ndōo̍ ho̍ō ā wa̍ wɔ̍ o̍ kɔ̄ŋgɔ̍ɔ̍ lēe̍lōo̍. Ndu̍yɛ̍, nda̍ a̍a̍ si̍nā māā dɛ̄ndɔ̄ɔ̍ ō pīlɛ̍ ko̍ni̍ o̍ wa̍ lo̍ŋ pa̍a̍le̍ le̍ŋ ni̍. Ndu̍yɛ̍, nda̍ a̍a̍ si̍nā māā bōōndi̍i̍ bu̍ɛ̍īya̍ ā lūɛ̄ī ō dɛ̄ndɛ̄ ko̍ŋ ni᷄ŋ ma̍ wā kɔ̄la̍ŋ nde̍, māā Chi̍i̍sū ndu̍ ve̍ nda̍ tɛ̄ɛ̄ŋ te̍.

²³Dīi̍māndɔ̄ ko̍ŋ, mi̍ dɛ̄ndɛ̄la̍ che᷅le̍ŋ lā cha᷄ŋ Tābi̍līāā chi̍e̍e̍, mi̍ lā hūŋ o̍ fo̍ndāŋ Māsānɔ̄ɔ̍ Chi̍i̍sū me̍l Mɛ̄lɛ̄ka̍ ba̍li̍ka̍a̍ le̍ bēe̍dīi̍yo̍, mbo̍ kē wāŋnda̍ ma̍ dīā wo̍.

²⁴Mɛ̄ɛ̍ fāŋgāa̍ sāālu̍ŋ māā Chi̍i̍sū ni̍, a̍ bu̍ɛ̍i̍yāā ndūa̍a̍ māā ā cho̍ lo̍ŋ te̍, ma̍ lūɛ̄ī o̍ dɛ̄ndɛ̄la̍ la̍ŋ ni᷄ŋ. Ma̍ kūā Kēpa̍a̍nīɔ̄m chi̍e̍e̍ Chi̍i̍su̍ nūūvīa̍a̍.

²⁵Mɛ̄ɛ̍ fāŋgāa̍ sāālu̍ŋ Chi̍i̍sū o̍ mɛ̄ŋmā ībūŋga᷄ŋ lēe̍lōo̍ pīlɔ̍ɔ̄, ma̍ nyūnā ndu̍ āā, “Lɔ̍ɔ̍ kūɛ̍ɛ̍nɛ̍ ŋ̄ hīŋ yɛ̄ na̍nu᷄ŋ, Ti̍chā?”

²⁶Mi̍ Chi̍i̍sū mu̍lūl nda̍ āā, “Mī di̍mu̍l nya̍ tōnya̍a̍ wa̍la̍ŋ, le̍ mɛ̄ɛ̍ ya̍ I̍ ke̍ nya̍ nyɛ̄ dīa̍a̍ mi̍ lā dīā mɛ̄ɛ̍ nya̍ hɛ̄na̍ŋ yɛ̍, le̍la̍ŋ nya̍ chō ya̍ nūūvīa̍a̍ ni̍. Ō cho̍ ma̍chu̍a̍ā māā wa̍lta̍ kɔ̄ndɔ̄fi̍lta̍ ya̍ I̍ to̍sa̍ la̍ŋ māā la̍ŋ te̍ nya̍ sīna̍ pɛ̄ŋgu̍ le̍.

²⁷Lā fa̍fālā le̍ nyɛ̄ dīa̍a̍ o̍ nɔ̍lā mbō tāmbu̍ wo̍ le̍. Lā fāfa̍la̍ le̍ nyɛ̄ dīa̍a̍ o̍ te̍mbū le̍ wo̍. Ko̍ŋ cho̍ ni̍, nyɛ̄ dīa̍a̍ o̍ to̍sā mī wāŋnda̍ sɔ̄la̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍. Ndu̍ yɔ̍nūŋ māā nyɛ̄ dīāā wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ō kē nya̍ wo̍ ni̍. Kāni̍, ndu̍ Mɛ̄lɛ̄ka̍ Fi̍nyāa̍ ō hāndu̍ tāāmāsi̍ ndɔ̄ɔ̍ chōo̍ ni̍ le̍ chɔ̄mndo̍ māā ō hīni̍ kɔ̄l a̍ ndu̍.”

²⁸O̍ ko̍ŋ, mi̍ wāŋnda̍ ha̍ā nyūnā Chi̍i̍su̍ āā, “Mɛ̄ɛ̍ yɛ̄ɛ̍nɛ̍ na̍a̍ ŋ̄ tōsa̍ yɛ̍ mbō wa̍ wa̍lta̍ Mɛ̄lɛ̄ka̍la̍ŋ?”

²⁹Mi̍ Chi̍i̍sū di̍mūl nda̍ āā, “Wa̍li̍ Mɛ̄lɛ̄ka̍ hɛ̄na̍ŋ nya̍ mī lā tōsa̍ wo̍, ndu̍ cho̍ ni̍, lā dɔ̄u̍ tīīndāŋ nyāa̍ o̍ wāna̍ o̍ ve᷅m ndo̍ ni᷄ŋ.”

³⁰O̍ ko̍ŋ kɔ̍ɔ̍lī, ma̍ dīmūl ndu̍ āā, “To̍sa̍ wɔ̍ su̍ɛ̍i̍ kɔ̄ndɔ̄fi̍li̍ na̍a̍ ŋ̄ chā, o̍ ko̍ŋ kɔ̍ɔ̍lī, mī ŋ̄ dɔ̄ū tīīnda᷄ŋndo̍ o̍ nūm ni̍ŋ nde̍. To̍sa̍ wɔ̍ mī ŋ̄ chē.

³¹Bōōndi̍i̍ fi̍nyāā nāā ma̍māa̍ ā wa̍ o̍ po̍llo̍ ni᷄ŋ nde̍, ma̍nɛ̄i̍yo̍ nda̍ a̍a̍ di̍ā ni̍. Ī chō ī dīmīa̍ŋ o̍ Yāu̍ Mɛ̄lɛ̄ka̍a̍ ni᷄ŋ le̍nde̍ āā, ‘Mbo̍ kē nda̍ bēe̍dīi̍yo̍ chɔ̄nɔ᷄ŋndo̍ ɛ̄chɛ̍nɛ̄ le̍ mā dē.’ ”

³²Mi̍ Chi̍i̍sū lo᷅ o̍ ko̍ŋ mbo̍ dīmūl nda̍ āā, “Mī di̍mu̍l nya̍ tōnya̍a̍ wa̍la̍ŋ, ō ve̍ Mūu̍sē le̍ yɔ̍ŋgu̍ nya̍ bēe̍dīi̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ wo̍ le̍. Fi̍nyā nūu̍, ndu̍ ke᷅ nya̍ bēe̍dīi̍ kpe̍e̍kpe̍i̍ cha᷅ŋ ɛ̄chɛ̍nɛ̄ mbo̍ tūāl lo̍ ni̍.

³³Kāni̍, bēe̍dīi̍ Mɛ̄lɛ̄ka̍ yɔ̄ŋgu̍ wo̍, ndu̍ cho̍ wāna̍ chɛ̍ŋ ɛ̄chɛ̍nɛ̄ mbo̍ tūāl lo̍ ni̍. Ndu̍yɛ̍, wānā ko̍ŋ, ndu̍ yɔ̍ŋgū ŋ̍wa᷅ŋndā chīe̍e̍ yo̍o̍mū kpe̍e̍kpe̍i̍yo̍ ni̍.”

³⁴Ma̍ dīmūl Chi̍i̍sū āā, “Mɛ̄ɛ̍ wa̍ na̍a̍ bēe̍dīi̍yo̍ ho̍ō kīo̍o̍ lɔ̍ɔ̍ lɔ̍ɔ̍ wa᷅, Fāllo̍.”

³⁵Mi̍ Chi̍i̍sū di̍mūl nda̍ āā, “Ya̍ cho̍ bēe̍dīi̍ to̍sā mī wāŋnda̍ ā wa̍ yōōmū kpe̍e̍kpe̍i̍yo̍ ni̍. Wāna̍ to᷅l la̍ kɔ̄ɔ̄lī pɛ̍, yīmā nɛ̍ī lɛ̍ ndu̍ le̍. Ndu̍yɛ̍, wāna̍ dɔ̍ū tīīnda᷄ŋ ndɔ̄ɔ̍ o̍ ya̍ ni̍ŋ pɛ̍, bo̍lōlā ve̍sā lɛ̍ ndu̍ le̍.

³⁶Kɛ̍, mi̍ I̍ di̍mūl nya̍ māā lā chē ya̍, kɛ̍ ndu̍yɛ̍, lā do̍ū ti̍i̍nda᷄ŋ nyāa̍ o̍ ya̍ ni̍ŋ te̍.

³⁷Ndu̍yɛ̍, wānāā Fi̍nyā nūu̍ ō chu̍a̍ chɔ̍ mbo̍ kē ya̍ wa̍, nda̍ kpo̍u̍ ā chō ya̍ tōlɔ̄ɔ̄ kɔ̄ɔ̄lī. Ndu̍yɛ̍, wānā o̍ wāna̍ hi᷅ŋ nāa̍ ya̍ chu̍a̍ pɛ̍, I̍ tu̍ū ndu̍ le̍.

³⁸Kāni̍ fo̍ndōle̍, Mɛ̄lɛ̄ka̍ o̍ ve᷅m ya̍ wo̍, le̍ nyɛ̄ o̍ hɛ̍na̍ŋ ndo̍ tōsāa̍ ya̍ I̍ chɛ̍ŋ ɛ̄chɛ̍nɛ̄ mi̍ hu᷅ŋ ni̍. I̍ hi̍ŋ le̍ hɛ̄na᷄ŋ ni̍ ya̍ pi̍la̍ to̍sā le̍.

³⁹Mɛ̄lɛ̄ka̍ o̍ ve᷅m ya̍ wo̍, nyɛ̄ o̍ hɛ̍na̍ŋ mī I̍ to̍sa̍ wo̍, ndu̍ cho̍ ho̍ō ni̍ māā wānāā o̍ ke̍ ya̍ wa̍ ki̍nɛ̍i̍ ō pīlɛ̍ bɛ̍ɛ̍ ō la̍a̍sīa̍ŋ te̍. Ndu̍yɛ̍ o̍ ko̍ŋ kɔ̍ɔ̍lī, māā nda̍ kpo̍u̍ mī I̍ hu̍ŋ mi̍ŋgī nda̍ yōōmū o̍ pāa̍le̍ mɛ̍ɛ̍lāāle̍ŋ chōo̍.

⁴⁰Kāni̍, nyɛ̄ ndu̍ Fi̍nyā nūu̍ hɛ̄na̍ŋ ndo̍, ndu̍ cho̍ ni̍ māā wānāa̍ tu̍āl Po̍ Mɛ̄lɛ̄ka̍a̍ kɔ̄ɔ̄lī wa̍, ndu̍yɛ̍, mā dɔ̄ū tīīnda᷄ŋndo̍ o̍ ndu̍ ni̍ŋ nda̍, māā ā nɔ̄ mā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍. Ndu̍yɛ̍ o̍ ko̍ŋ kɔ̍ɔ̍lī, I̍ cho̍ wānāā kāŋ mīŋgī yōōmū o̍ pāa̍le̍ mɛ̍ɛ̍lāā le̍ŋ chōo̍.”

⁴¹O̍ ko̍ŋ kɔ̍ɔ̍lī, mi̍ Chu̍ūwa̍ kāndū ŋɔ̄ɔ̄chīa̍ŋnda̍ŋ a̍ Chi̍i̍sū, kāni̍ fo̍ndōle̍, māā ō dīmi̍ māā ndu̍ cho̍ bēe̍dīi̍yo̍ chɛ̍ŋ ɛ̄chɛ̍nɛ̄ mbo̍ tūāl lo̍ ni̍.

⁴²Ma̍ hīāū lāchī a̍ ŋɔ̄ɔ̄chīa̍ŋnda̍ŋ āā, “Chi̍i̍su̍ cho̍ ho̍ō ni̍, Chōo̍sɛ̍ po̍ ndɔ̄ɔ̍. Fi̍nyā ndɔ̄ ni̍, kāla̍ ndɔ̄ ni̍, ŋ̄ sīnā nda̍. Kɛ̍, vɛ᷅ ni᷅ŋ mbo̍ dīmī māā ɛ̄chɛ̍nɛ̄ o̍ chɛ̍ŋ ni̍ mbo̍ tūāl?”

⁴³Mi̍ Chi̍i̍sū mu̍lī nda̍ dīōm, mbo̍ dīmī āā, “Lā pɛ̄ŋgi̍ ŋɔ̍ɔ̍chīa̍ŋnda̍ŋ nya̍ pi̍la̍ tɛ̄ɛ̄ŋ.

⁴⁴Wānā o̍ wānā nɔ̍lā mbō tōl la̍ kɔ̄ɔ̄lī le̍, mɛ̄ɛ̍ mī Mɛ̄lɛ̄ka̍ Fi̍nyāa̍ tōsa̍ a̍ sa̍bū mālāŋ o̍ tu̍āl la̍ kɔ̄ɔ̄lī. O̍ ko̍ŋ, I̍ nɔ̍lā mī mi̍ŋgi̍ ndu̍ yōōmū o̍ pāa̍le̍ mɛ̍ɛ̍lāāle̍ŋ chōo̍.”

⁴⁵Mi̍ Chi̍i̍sū hi̍a̍ū lāchī a̍ sūɛ̍i̍ nāa̍ nda̍ chūā āā, “Ī chō ī pōōnyīāā o̍ yāu̍ wānāa̍ su̍a̍ā le̍ Mɛ̄lɛ̄ka̍ wa̍ ō pīlɛ̍ ni᷄ŋ āā, ‘Mɛ̄lɛ̄ka̍ chō wāŋnda̍ kpo̍u̍ pɛ̍ɛ̍kū.’ Wānā o̍ wāna̍ ya̍ŋ Mɛ̄lɛ̄ka̍ Fi̍nyāa̍ lānī, ndu̍yɛ̍ o̍ ko̍ŋ kɔ̍ɔ̍lī, mbō sɔ̄la̍ pɛ̄ɛ̄kōo̍ ndu̍ o̍ bā bɛ̄ŋgu̍ pɛ̍, tōlɔ̄ɔ̍ wānā ko̍ŋ ō tūāl lā kɔ̄ɔ̄lī ni̍.

⁴⁶Kɛ̍ ndu̍yɛ̍, ke̍ŋ chɔ᷅m ma̍chɔ̍māā māā wāŋndo̍ ō pīlɛ̍ bɛ̍ɛ̍ ō chē ni᷅ŋ Mɛ̄lɛ̄ka̍ Fi̍nyāa̍ lē pīlɛ̍ le̍, mɛ̄ɛ̍ wāna̍ chɛ̍ŋ ɛ̄chɛ̍nɛ̄ wo̍. Ndu̍ ko̍ni̍ che᷅ wɔ̄ Mɛ̄lɛ̄ka̍ Fi̍nyāa̍ ni̍.

⁴⁷Mī di̍mu̍l nya̍ tōnya̍a̍ wa̍la̍ŋ, wāna̍ du̍a̍ū ti̍i̍nda᷄ŋ ndɔ̄ɔ̍ o̍ ya̍ ni̍ŋ ndo̍, ō sɔ̄la̍ ni᷅ŋ bɛ̍ɛ̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍.

⁴⁸Ya̍ cho̍ bēe̍dīi̍ to̍sā mī wāŋnda̍ ā wa̍ yo̍o̍mū kpe̍e̍kpe̍i̍yo̍ ni̍.

⁴⁹Mi̍ fi̍nyāā nyāa̍ dīā ma̍nɛ̄i̍yo̍ o̍ po̍llo̍ ni᷄ŋ. Kɛ̍ ndu̍yɛ̍, o̍ ko̍ŋ ni̍ŋ fa̍ū, ma̍ wū.

⁵⁰Kɛ̍, bēe̍dīi̍ chɛ̍ŋ ɛ̄chɛ̍nɛ̄ wo̍ ndu̍ ndu̍ wānā o̍ wāna̍ de᷅ ndu̍ pɛ̍, ō vi᷅ le̍.

⁵¹Ya̍ cho̍ bēe̍dīi̍ ke᷅ wa᷅ŋnda̍ yōōmū kpe̍e̍kpe̍i̍yo̍ o̍ chɛ̍ŋ ɛ̄chɛ̍nɛ̄ mbo̍ tūāl lo̍ ni̍. Wānā o̍ wāna̍ de᷅ bēe̍dīi̍yo̍ ho̍ō pɛ̍, wānā ko̍ŋ chō wā yōōmū le̍ fɛ̍ɛ̍ŋ a̍ fɛ̍ɛ̍ŋ. Bēe̍dīi̍ ya̍ I̍ ke᷅ ko̍ŋ wa᷅ŋnda̍ wo̍, ndu̍ cho̍ dīāllūŋ nu᷄ŋ ni̍. Mu̍ŋ ya̍ I̍ yɔ̍ŋgu̍ le̍ mī wāŋndā chīe̍e̍ya̍ ā sɔ̄la̍ yōōmū kpe̍e̍kpe̍i̍yo̍ ni̍.”

⁵²O̍ ko̍ŋ kɔ̍ɔ̍lī, mi̍ Chu̍ūwa̍ ā tūūlū kɔ̄l a̍ Chi̍i̍sū. Ma̍ kāndū dīōmnda̍ŋ hīŋa᷅ŋndo̍ nda̍ pi̍la̍ tɛ̄ɛ̄ŋ mā dīmī āā, “Mī vɛ̄ɛ̍nɛ̍ po̍o̍ ho̍ō ō lōōku̍ yɛ̄ na̍a̍ dīāllūŋ ndɔ̄ɔ̍ŋ kē mī ŋ̄ dē mu̍ŋ?”

⁵³Mi̍ Chi̍i̍sū di̍mūl nda̍ āā, “Mī di̍mu̍l nya̍ tōnya̍a̍ wa̍la̍ŋ, tē lā di̍ di̍a̍llūŋ wāna̍ nda̍ vēēlū āā Po̍ Wānā Pɔ̍nɔ̍ɔ̍ wo̍ŋ, ndu̍yɛ̍, mī lā ko᷄l kōo̍ma̍ ndūa̍ŋ te̍, lā ve᷅ yo̍o̍mū kpe̍e̍kpe̍i̍ le̍.

⁵⁴Ndu̍yɛ̍, wāna̍ di̍ā dīāllūŋ nu᷄ŋ, ndu̍yɛ̍, mbō ko᷄l kōo̍ma̍ nīa̍ŋ ndo̍, ō sɔ̄la̍ ni᷅ŋ bɛ̍ɛ̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍. O̍ ko̍ŋ kɔ̍ɔ̍lī, I̍ cho̍ wānā ko̍ŋ mīŋgī yōōmū o̍ pāa̍le̍ mɛ̍ɛ̍lāāle̍ŋ chōo̍.

⁵⁵Dīāllūŋ nu᷄ŋ mu̍ŋ cho̍ nyɛ̄ dīāā kpe̍e̍kpe̍i̍yo̍ ni̍. Ndu̍yɛ̍, kōo̍ma̍ nīa̍ŋ ma̍ŋ ma̍ cho̍ nyɛ̄ kōlāā kpe̍e̍kpe̍i̍yo̍ ni̍.

⁵⁶Wāna̍ di̍ā dīāllūŋ nu᷄ŋ, ndu̍yɛ̍, mbō ko᷄l kōo̍ma̍ nīa̍ŋ ndo̍, wānā ko̍ŋ mɛ̄ɛ̍ ō chō o̍ dīōm pīlɛ̍ ni᷄ŋ a̍ ya̍, ndu̍yɛ̍, mi̍ ya̍ I̍ wa᷅ o̍ dīōm pīlɛ̍ ni᷄ŋ a̍ ndu̍.

⁵⁷Mɛ̄lɛ̄ka̍ Fi̍nyāa̍ o̍ to̍sā mī wāŋnda̍ ā wa̍ yōōmū wo̍, ndu̍ ve᷅m ya̍ ni̍. Ndu̍yɛ̍, ō tōsa̍ mi̍ I̍ wa᷅ yōōmū. Le̍nde̍ ko̍ni̍, wānā o̍ wāna̍ de᷅ dīāllūŋ nu᷄ŋ pɛ̍, I̍ to̍sa̍ wānā ko̍ŋ ō wa̍ yōōmū.

⁵⁸Le̍la̍ŋ, bēe̍dīi̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ wo̍, ndu̍ cho̍ ho̍ō ni̍. Ndu̍ cho̍ māā bēe̍dīi̍ fi̍nyāā nyāā ma̍māa̍ ā dē wo̍ le̍. Bēe̍dīi̍ nda̍ dē ko̍ŋ ndo̍, ndu̍ to̍sa̍ mā wa̍ yōōmū le̍ fɛ̍ɛ̍ŋ a̍ fɛ̍ɛ̍ŋ te̍. Kɛ̍, bēe̍dīi̍ chɛ̍ŋ o̍ fo̍nda᷄ŋ Mɛ̄lɛ̄ka̍a̍ wo̍, ndu̍ ndu̍ wānā de᷅ ndu̍ pɛ̍, a̍ wa̍ yōōmū le̍ fɛ̍ɛ̍ŋ a̍ fɛ̍ɛ̍ŋ.”

⁵⁹Bōōndi̍i̍ Chi̍i̍sū wa̍ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ Kēpa̍a̍nīɔ̄m chi̍e̍e̍ ve̍, o̍ ko̍ŋ o̍ di̍mi̍ dīōmnda̍ŋ nda᷅ŋ ni̍.

⁶⁰Mi̍ bu̍ɛ̍i̍yāa̍ Chi̍i̍sūa̍a̍ ā ka̍ ka̍, a̍ tu̍ɛ̍ī nyɛ̄ Chi̍i̍sū di̍mi̍ wo̍. O̍ ko̍ŋ, ma̍ dīmī āā, “Pɛ̄ɛ̄kū o̍ pɛ̍ɛ̍ku̍ ho̍ō wo̍, ō kēndū bɔ̄ɔ̍. Ō nɛ̄ɛ̍nɛ̍ nɔ̍lā yɛ̍ mbō chɛ̄la᷅ŋ a̍ ndu̍ a̍ pɛ̄ɛ̄kū ndɔ̄ɔ̍ ho̍ō?”

⁶¹Wānā o̍ wānā bɛ̍ɛ̍ o̍ di̍mu̍l Chi̍i̍sū a̍ nyɛ̄ bu̍ɛ̍īya̍ ā dīmi̍ wo̍ o̍kɔ̄ɔ̄ le̍. Kɛ̍ ndu̍yɛ̍, mbo̍ sīnā māā ŋɔ̄ɔ̄chīa̍ŋnda̍ŋ nda̍ wa̍ a̍ nyɛ̄ o̍ di̍mi̍ wo̍ o̍kɔ̄ɔ̄ ni̍. Mi̍ Chi̍i̍sū nyu̍nā nda̍ āā, “Bāā mī dīōmndā ya̍ I̍ di̍mi̍ la᷅ŋ nda̍ŋ lā tɛ̄ɛ̄mbu̍u̍ nya̍ lākɔ᷄l?

⁶²Tē ō wa̍ yɛ̄ mī lā chē wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ mbō mīīŋgu̍ nāa̍ o̍ chɛ̍ŋ nda̍?”

⁶³Mi̍ Chi̍i̍sū di̍mī āā, “Nyi̍na̍ Mɛ̄lɛ̄ka̍a̍, ndu̍ ke᷅ wa̍nā yo̍o̍mū kpe̍e̍kpe̍i̍yo̍ ni̍. Wāna̍ chi̍e̍e̍ nɔ̍lā mbō sɔ̄la̍ yōōmōo̍ ho̍ō o̍ kpāāya̍ ndɔ̍ ndu̍ pi̍la̍ ni̍ŋ te̍. Dīōmnda̍ ya̍ I̍ so̍ō la᷅ŋ nāa̍ nya̍ chūā la̍ŋ, la̍ŋ la̍ to̍sā ni̍ mī Nyi̍na̍ Mɛ̄lɛ̄ka̍a̍ ō tōl nya̍ kɔ̄ɔ̄lī. Ndu̍yɛ̍, la̍ŋ la̍ to̍sā ni̍ mī lā sɔ̄la̍ yōōmū kpe̍e̍kpe̍i̍yo̍.

⁶⁴Kɛ̍ ndu̍yɛ̍, nya̍ pūm nda̍ lā dōu̍ ti̍i̍nda᷄ŋ o̍ ya̍ ni̍ŋ te̍.” Chɔ̍ŋ o̍ kāndɔ᷄ŋndo̍ di̍ Chi̍i̍sū ndu̍ o̍o̍ si̍nā wa̍nāa̍ nda̍ a̍a̍ dɔ̍ū tīīnda᷄ŋndo̍ o̍ ndu̍ ni̍ŋ nda̍. Ndu̍yɛ̍, ndu̍ o̍o̍ si̍nā wa᷅na̍ wa̍ ndu̍ hūnɔ̄ɔ̄ pīsī wo̍.

⁶⁵Mi̍ Chi̍i̍sū di̍mī vɛ̄lɛ̄ āā, “Le̍ sa̍bōo̍ ho̍ō ya̍ I̍ di̍mu̍l nya̍ ni̍ māā wānā o̍ wānā nɔ̍lā mbō tōl la̍ kɔ̄ɔ̄lī le̍ mɛ̄ɛ̍ mī Mɛ̄lɛ̄ka̍ Fi̍nyāa̍ tōsa̍ a̍ sa̍bū mālāŋ o̍ tu̍āl la̍ kɔ̄ɔ̄lī.”

⁶⁶Chɔ̍ŋ a̍ bōōndi̍i̍ ke̍ŋ, mi̍ wānāa̍ wa̍ ndu̍ kɔ̄ɔ̄lī wa̍ cha̍po̍ ma̍ māl ndu̍. Ā ve̍ lɛ̍ ndu̍ bālɔ̄ɔ̄ kɔ̄ɔ̄lī le̍.

⁶⁷Le̍ he̍ī, mi̍ Chi̍i̍sū nyu̍nā bu̍ɛ̍i̍yāā ndūāā tɔ̍ a̍ ā ŋīɔ̍ɔ̍ŋnda̍ āā, “Nya̍ yɛ̄, lā yēēma̍ mī lā ma᷄l la̍ mī lā kūɛ̄nu᷄ŋ?”

⁶⁸Mi̍ Sa̍i̍mɔ̄ŋ Pītɛ̍ lo᷅ lo̍ŋ mbo̍ mūlī āā, “Māsānɔ̄ɔ̍, tē ŋ̄ ma᷄l nu̍m pɛ̍, mī nɛ̄ɛ̍nɛ̍ na̍a̍ ŋ̄ tōl lɛ̄ kɔ̄ɔ̄lī? Dīōmndā nūmnda̍ŋ, la̍ŋ la̍ to̍sā ni̍ mī wāŋnda̍ sɔ̄la̍ yōōmū kpe̍e̍kpe̍i̍yo̍, o̍ nɔ̍ la̍mɛ̍ɛ̍lu̍ le̍ wo̍.

⁶⁹Ŋ̄ dɔ̄ū tīīnda᷄ŋndo̍ o̍ nūm ni̍ŋ. Ndu̍yɛ̍ vɛ̍lɛ̄, ŋ̄ sīnā māā nu᷄m cho̍ wāna̍ cho̍ le̍ Mɛ̄lɛ̄ka̍ wo̍ ni̍.”

⁷⁰Mi̍ Chi̍i̍sū nyu̍nā nda̍ āā vɛ̄ɛ̄, “Ya̍ le̍ hɛ̍li̍ nya̍ ŋ̄ wāŋ tɔ̍ a̍ wānāā ŋīɔ̍ɔ̍ŋnda̍ ha̍ā le̍? Kɛ̍ ndu̍yɛ̍, wānā pi᷅lɛ̍ chō nya̍ tɛ̄ɛ̄ŋ, nyi̍nā wɔ̄ɔ̍ŋndo̍ o̍ cho̍ ni̍.”

⁷¹A̍ Chu̍dā po̍ Sa̍i̍mɔ̄ŋ Īsīka̍a̍līɔ̄ɔ̄ wo̍ o̍kɔ̄ɔ̄ o̍ wa̍ sūɛ̍i̍ he̍ī ni̍. Kāni̍, mi̍ chē bɛ̍ɛ̍ mi̍ Chu̍dā wa᷅ bu̍ɛ̍īyo̍ ō pīlɛ̍ bu̍ɛ̍i̍yāā tɔ̍ a̍ ā ŋīɔ̍ɔ̍ŋāa̍ Chi̍i̍sūa̍a̍ tɛ̄ɛ̄ŋ ni̍, kɛ̍ ndu̍yɛ̍, ndu̍ wa̍ ndu̍ hūnɔ̄ɔ̄ pīsī ni̍.